Choose Language
New Testament Books
view with a second Bible
1Сэсся енӧжас лоис ыджыт мыччалан пас*б ─ шондіӧ пасьтӧтӧм инька. Коккез увтас сылӧн вӧлі тӧлісь, юр вылас ─ даскык кӧдзулісь юркытш.2Сія вӧлі кынӧма да горӧтліс зубытсяняс, кагаыс пондіс ни чужны да.
3Сэтӧн енӧжас мыччисис мӧдік мыччалан пас: сизим юра, дас сюра да сизим юркытша ыджыт гӧрд гундыр.4Бӧжнас сія чышкис енӧжсис кӧдзуввеслісь куимӧт торсӧ да чапкис му вылас. Гундырыс сувтіс кага вайись инька одзӧ. Сія лӧсьӧтчис сёйны кагасӧ, кӧр сія чужас.
5Инькаыслӧн чужис зон. Сія пондас видзӧтны быдӧс отир сьӧрын кӧрт бедьӧн. Сійӧ кагасӧ лэбтісӧ Еныс дынӧ, Сылӧн юралан пукӧс дынӧ.6Ачыс инькаыс пышшис кушмуӧ. Сэтчин Еныс сылӧ лӧсьӧтӧм оланін. Кушмуас сійӧ пондасӧ вердны сюрс кыксё кватьдас*в лун сьӧрна.7Енӧжас лэбтісис тышкасьӧм-пессьӧм. Микаилыс да сылӧн ангеллэс тышкасисӧ гундырыскӧт. Гундырыс аслас ангеллэзкӧт тышкасис ныкӧт.8Но гундырсӧ да сылісь ангеллэсӧ вермисӧ, нія ӧштісӧ енӧжсис ассиныс оланінсӧ.9Ыджыт гундырсӧ, важ кыйсӧ, шентісӧ му вылас. Сылӧн нимыс ─ куль да сотана. Сія ылӧтлӧ Еныслісь быдӧс аркмӧтӧмсӧ. Сылісь ангеллэсӧ шентісӧ ӧтлаын сыкӧт.10Сэк ме кылі енӧжас горӧн висьталӧм шы:
─ Ӧні локтіс мезмӧмыс, выныс,
миян Енлӧн Юралӧмыс
да Сылӧн Мавтӧмлӧн веськӧтлӧмыс!
Ӧні эд улӧ шупкӧм сійӧ,
кӧда Енным одзын ой и лун
висьтавліс миян воннэз вылӧ умӧльсӧ.
11Миян воннэзным вермисӧ сійӧ
Дзельлӧн вирӧн да асланыс висьтасьӧмӧн.
Нія эзӧ видзсьӧ оланныс бердӧ,
эзӧ полӧ кулӧмсис*г.
12Сідзкӧ, гажӧтчы, енӧж!
Гажӧтчӧ сэтчин оліссез!
Умӧль лоас му вылас да саридзас оліссезлӧ
─ кульыс лэдзчис тіян дынӧ!
Сія ёна лёксялӧм.
Тӧдӧ эд ─ кадыс сылӧ кольччис етша!
13Гундырыс казяліс: сійӧ шентісӧ му вылас. Сэк сія пондіс вӧтлісьны зонсӧ чужтісь инька сьӧрын.14Сэк инькаыслӧ сетісӧ ыджыт кутшлісь*д кык борд лэбзьыны гундырыс шогья кушмуӧ. Сэтчин, гундыр дынсянь ылынжык, сылӧ вӧлі лӧсьӧтӧм оланін. Сійӧ пондасӧ вердны куим во да во джын сьӧрна.15Сэк гундырыс ӧмсис койыштіс ю мымда ва, медбы кылӧтны инькасӧ.16Муыс отсаліс инькаыслӧ. Сія оссис да ньылыштіс васӧ, кӧдӧ гундырыс койыштіс ӧмсис.17Гундырыс лёксяліс инькаыс вылӧ. Сэк сія муніс тышкасьны инькалӧн мӧдік челядькӧт, кӧдна олӧны Енлӧн тшӧктӧммез сьӧрті да Кристос Исуслӧн висьталӧм сьӧрті.
*а 12.1 гундыр ─ драгон
*б 12.1 мыччалан пас ─ знамение
*в 12.6 сюрс кыксё кватьдас ─ 1260
*г 12.11 кулӧм ─ смерть
*д 12.14 кутш ─ орёл
Глава 12
