Choose Language
New Testament Books
view with a second Bible
1Тійӧ Кристосыскӧт ловзитӧ кӧ, то кошшӧ енӧж вылісьсӧ. Сэтчин эд Еныс дынын веськыт ладорас пукалӧ Кристосыс.2Енӧж вылісьсӧ юраныт видзӧ, эдӧ му вылісьсӧ.3Тійӧ кулітӧ, ӧні тіян оланныт Кристосыскӧт сайӧвтӧм Еныс пытшкын.4Тіян оланныт ─ Кристос. Кӧр Сія локтас, сэк и тійӧ Сыкӧт локтат югьялӧмас.
5Сідзкӧ, му вылас оліссез сьӧрті керӧмнытӧ пӧдтӧ. Нія керӧммес ─ кыскасьӧм, сэрпӧсьмӧм, ӧзйӧтчӧм, умӧльсӧ керны юрӧ пыртӧм, горшасьӧм. А горшасьӧмыс ─ ас керӧм енлӧ копрасьӧм.6Этна керӧммез понда Еныслӧн лӧгыс локтас кывзісьтӧм отирыс вылӧ.7Одзжык и тійӧ сідз жӧ олітӧ:8тійӧ лӧгаліт, лёксявліт, видчит, морт йылісь вӧвлытӧмсӧ висьтавліт, нёштӧм кыввезӧн баитіт. Ӧні сійӧ быдӧс чапкӧ.9Ӧтамӧдныт одзын эд бӧбӧтчӧ. Одзза моз олӧмнытӧ тійӧ эд важ паськӧм моз чапкит10да пасьталіт вильӧ. Быдыс тіян коласісь пӧртчис виль мортӧ, кӧда пыр вильмӧ. Енсӧ буржыка тӧдӧмсянь виль мортыс пондӧ вачкисьны Аркмӧтісьыс вылӧ.11Ӧні иудей, мӧдік отир я, вундыштыштӧм, абу я вундыштыштӧм, варвар*а, скиф*б, раб, абу я раб ─ нія ӧтамӧдныскӧт озӧ янсӧтчӧ. Эстӧн эм дзир Кристос, Сія ─ быдӧс да быдӧсын!
12Тійӧ Енлӧн бӧрйӧммез, тійӧ ─ вежа отир. Сія тіянӧс радейтӧ. Сідзкӧ, лоӧ небыт сьӧлӧмаӧсь, бура отсасьӧ, лоӧ бур мывкыдаӧсь, рамӧсь, мыла быртӧг кужӧ видзсьыны,13ӧтамӧдныткӧт кужӧ лӧсявны. Вонныт вылӧ эм кӧ тіян кытшӧмкӧ норасьӧм, эд лӧгасьӧ. Кристосыс проститіс тіянӧс, тійӧ Сы моз проститӧ.14Сэтчӧ содтӧ радейтӧмнытӧ, сія медколана. Сія быдӧс ӧтлаӧтӧ да вайӧтӧ быдсӧн бурӧдз.15Еныслӧн сетӧм лӧньыс ась веськӧтлӧ сьӧлӧммезнаныт. Тійӧ эд корӧмӧсь лӧнь оланӧ, ӧктӧмӧсь ӧтік вывтырӧ. Енсӧ буркывтны эд вунӧтӧ!16Кристослӧн кылыс ась тыртӧ тіянӧс. Быдсӧн мывкыднаныт велӧтӧ, вежӧрсьӧтӧ ӧтамӧднытӧ Енсӧ ошкан кыввезӧн, сьыланкыввезӧн, Ловсянь сетӧм сьылӧтаннэзӧн. Енлӧн бурсетӧм понда сьӧлӧмсянь ошкӧ-сьылӧтӧ Дӧсвидзисьсӧ.17Мый керат кылын, уджын я, быдӧс керӧ Дӧсвидзись Кристос Исус нимӧн. Сы пыр буркывтӧ Ен Айнымӧс.
18Иннез, кывзісьӧ ассиныт жӧниккезнытӧ. Сідз эд колӧ керны Дӧсвидзисьлӧн отирлӧ.19Ай отир, радейтӧ ассиныт иннезнытӧ. Нійӧ чорыта эд видзӧ.20Челядь, ассиныт ай-мамнытӧ пыр кывзісьӧ. Сідз керӧмыс Дӧсвидзисьыс сьӧрті.21Айез, ассиныт челядьнытӧ эд лӧгӧтлӧ, медбы нія юрнысӧ эзӧ ӧшӧтӧ.
22Раббез, быдӧсын кывзісьӧ кӧзяиннэзнытӧ. Енсис полӧмӧн быдӧс керӧ сьӧлӧмсянь бура. Бура керӧмныт ась оз ло дзир син одзын мыччалӧм могись.23Быдӧс керӧ сьӧлӧмсянь, жыв тійӧ Дӧсвидзисьлӧ керат, а одӧ мортлӧ.24Тӧдат эд, Дӧсвидзисьыс козьналас тіянлӧ лӧсьӧтӧм пайсӧ. Тійӧ эд кысъялат*в Дӧсвидзись Кристослӧ.25Кин умӧльсӧ керӧ, сія босьтас аслас керӧм понда. Еныс эд оз видзӧт чужӧм сьӧрті.
*а 3.11 варвар ─ греккез сідз шувлісӧ мӧдік отирӧс
*б 3.11 скиф ─ сідз кӧркӧ шуӧмась отирӧс, кӧдна олӧмась Сьӧд Саридз сайын ойланяс
*в 3.24 кысъявны ─ служить
Глава 3
