Choose Language
New Testament Books
view with a second Bible
1Ме, Павел, Кристос Исуслӧн раб, сійӧн и пукала тіян понда, ентӧдтӧм отир.2Тійӧ кывлітӧ ни, Еныс Аслас небыт сьӧлӧмсянь козьналіс меным удж ─ кысъявны*а тіянлӧ.3Еныс осьтӧм*б пыр сетіс меным тӧдны Ассис тӧдлытӧм лӧсьӧтӧмсӧ, кӧда йылісь ме тіянлӧ одзас невна гижи ни.4Тійӧ лыддьӧтіканыт вермат казявны: ме бура вежӧрта Кристосыс йылісь Енлісь тӧдлытӧм лӧсьӧтӧмсӧ*в.5Вежа Лолыс сійӧ тӧдлытӧмсӧ ӧні осьтіс Кристослӧн вежа апостоллэзлӧ да Енсянь юӧртіссезлӧ. Кӧркӧсянь олісь отир сійӧ тӧдлытӧмсӧ эзӧ тӧдӧ.6Сія тӧдлытӧмыс то мый: иудейес да и мӧдік отирыс кыласӧ Бур Юӧрсӧ. Нія ӧтлаасясӧ Кристос Исусыскӧт да лоасӧ ӧтік вывтырӧн, ӧтлаын босьтасӧ Еныслісь лӧсьӧтӧм пайсӧ*г.
7Бур Юӧрсӧ висьтасян уджыс меным ─ Енлӧн бурсетӧм. Сэтчӧ Сія сувтӧтіс менӧ Аслас вынӧн.
8Ме вежа отирыс коласісь медучӧтыс, но меным сетӧм эта бурыс: ентӧдтӧммезлӧ висьтасьны Кристослӧн донася-дона бурсетӧм йылісь Бур Юӧрсӧ.9Меным колӧ быдӧнныслӧ осьтны, мый сія тӧдлытӧм лӧсьӧтӧмыс, кӧдӧ Еныс одзза каддэзсянь вӧлі сайӧвтӧм. Сія быдӧс аркмӧтіс Кристос Исус отсӧтӧн.10Ӧні енӧжсис юраліссес да веськӧтліссес Вичкуыс пыр ась пондӧны тӧдны Еныслісь быдпӧлӧс мывкыдсӧ.11Сідз керны Еныс вӧлі лӧсьӧтӧм одзза каддэзсянь. Сійӧ ӧні Еныс аркмӧтіс миян Дӧсвидзись Кристос Исус отсӧтӧн.12Кристоскӧт ӧтлаасьӧмӧн, Сылӧ веритӧмӧн мийӧ повтӧг-тӧждісьтӧг вермам локны Еныс дынӧ.13Сійӧн кора тіянӧс: эд ӧшӧтӧ юрнытӧ, кӧть меным и колӧ пессьыны-мырсьыны*д тіян понда. Эта эд вайӧ тіянлӧ ошкӧмсӧ.
14Сійӧн ме сувта пидзӧс вылам миян Дӧсвидзись Кристос Исуслӧн Ай одзӧ.15Сія сетӧ ним быд увтырлӧ енӧжас да му вылас.16Сія Аслас Лолӧн ась вынсьӧтас тіянӧс пытшксяняныт. Сылӧн югьялан выныс эд ыджытся-ыджыт.17Веритӧмныт пыр Кристосыс ась олӧ сьӧлӧммезаныт.18Сэк тійӧ лоат вужсялӧмӧсь да вынсьӧтӧмӧсь радейтӧмас. Ӧтлаын вежа отиркӧт тійӧ казялат, мый пасьта, мый кузя, мый вылына да мый пыдына Кристослӧн радейтӧмыс.19Сэк тійӧ тӧдат Сылісь радейтӧмсӧ, кӧдӧ мортыс аслас мывкыдӧн и вежӧртны оз вермы. Сідз тіян пытшкын лоас Еныслӧн быдӧс тырмӧмыс*е.
20Ошкӧ Енсӧ! Сія Аслас вынӧн керӧ миян пытшкын уджсӧ. Сія вынӧн Еныс аркмӧтӧ унажык миян корӧмся да юраным пыртӧмся!21Быд кадӧ оліссез, Кристос Исускӧт ӧтлаасьӧммез, Вичкуын ошкӧ Енсӧ пырся-пыр! Аминь.
*а 3.2 кысъявны ─ служить
*б 3.3 осьтӧм ─ откровение
*в 3.4 тӧдлытӧм лӧсьӧтӧм ─ тайна, тайный план
*г 3.6 лӧсьӧтӧм пай ─ наследство
*д 3.13 пессьыны-мырсьыны ─ страдать
*е 3.19 быдӧс тырмӧм ─ полнота
Глава 3
