Choose Language
New Testament Books
view with a second Bible
1Воннэзӧ, Еныс миян дынӧ небыт сьӧлӧма. Сійӧн кора тіянӧс: быдсӧн вывтырнаныт сетӧ асьнытӧ Еныслӧ ловья да вежа езъялан козин*а туйӧ. Сія козиныс Еныс сьӧрті. Сідз тійӧ бур мывкыдӧн вермат керны Сылісь вежа уджсӧ.2Эдӧ олӧ ӧння кадӧ оліссез моз. Вежсьӧ, мывкыднытӧ вильмӧтӧ. Сэк пондат тӧдны, мый Еныслӧ колӧ тіянсянь. Тійӧ вежӧртат, мый туйӧ керны, мый Сы сьӧрті да быдсӧн бур*б.
3Менам уна Еныслӧн бурсетӧмыс. Сійӧн ме тіянлӧ быдӧннытлӧ висьтала: юраныт ас йывсиныт уна эд пыртӧ, асьнытӧ эд лэбтӧ. Юраныт видзӧ веритӧмныт сьӧрті дзир коланасӧ, мымда веритӧмсӧ быднытлӧ сетіс Еныс.4Мортлӧн эм ӧтік вывтыр, а сыын уна тор. Быд торлӧн аслас удж.5Сідз и мийӧ Кристоскӧт ӧтлаасим ӧтік вывтырӧ. Ӧтамӧдлӧ мийӧ ӧтік вывтырлӧн торрез.6:Миянлӧ быдӧннымлӧ Еныс сетіс кытшӧмкӧ верман-кужан козин*в. Енлӧн бурсетӧмсянь миян коласісь быдыс вермӧ керны кытшӧмкӧ удж. Сетӧм кӧ тэныт Енсянь юӧртны, юӧрт веритӧмыт сьӧрті.7Кужан кӧ вичкуын*г Енлӧ уджавны, кер сетӧм уджтӧ. Кужан кӧ велӧтны, велӧт.8Кужан кӧ мӧдіккезӧс вынсьӧтны, вынсьӧт. Верман кӧ отсӧт сетавны, сетав сӧстӧм сьӧлӧмӧн. Верман кӧ керны удж веськӧтлісьлісь, веськӧтлы бур мывкыдӧн. Верман кӧ бурсӧ керны, кер гаж сьӧлӧмӧн.
9Радейтӧмныт ась оз ло дзир мыччалӧм могись. Умӧльсӧ керӧм дынісь бергӧтчӧ, кутчисьӧ бурыс бердӧ.10Ӧтамӧднытӧ радейтӧ сьӧлӧмсянь, сой-вонӧс моз. Вынсьӧтчӧ ӧтамӧднытӧ бурӧ пуктыны.11Ловнытӧ ӧзйӧтӧ. Быд вынісь уджалӧ Дӧсвидзисьыслӧ, эд сайкалӧ.12Гажӧн видзчисьӧ бурсӧ. Сьӧкыт кадӧ видзсьыны ась мыланыт оз быр. Пыр кеймӧ.13Вежа отирлӧ отсасьӧ, рочалӧ*д гортаныт мунісь-локтіссесӧ.14Тіянӧс вашӧтліссесӧ эд ёрдӧ, а бласлӧвитӧ.15Гажӧтчӧ гажӧтчиссескӧт, горзӧ горзіссескӧт.
16Ӧтамӧдныткӧт лӧсялӧ. Асьнытӧ вылына эд лэбтӧ, умӧля олісь отирлӧ ёрттэз моз отсалӧ. Эд пуксьӧ уна тӧдіссезӧ.17Некинлӧ эд вештісьӧ умӧльыс понда умӧльнас. Ась отирыс адззӧны, тійӧ вынсьӧтчат керны бурсӧ.18Позьӧ кӧ, вынсьӧтчӧ быд морткӧт овны лӧсялӧмӧн.19Менам донаэзӧ, эд вештісьӧ ас пондасиныт. Кольӧ вештісьӧмсӧ Енлӧн лӧглӧ. Вежа Гижӧтсис лыддьӧтам: «Ме вештіся, Ме бергӧта» ─ висьталӧ Дӧсвидзись.20Гижӧм тай: «Тэныт умӧльсӧ керисьыс кӧ тшыг, сійӧ верд. Горшыс кӧ косьмӧ, юктав сійӧ. Сідз керӧмнат тэ сы юр вылӧ ӧктан сотчан шоммез*е».21Умӧльыс ась оз вермы тэнӧ. Умӧльсӧ вермы бурнас.
*а 12.1 езъялан козин ─ жертвенный дар, жертва
*б 12.2 быдсӧн бур ─ совершенный
*в 12.6 верман-кужан козин ─ дарование, духовный дар
*г 12.7 вичку ─ церковь, община верующих
*д 12.13 рочавны ─ приглашать
*е 12.20 кинкӧ юр вылӧ ӧктыны сотчан шоммез ─ пристыдить кого-либо
Глава 12
