Choose Language
New Testament Books
view with a second Bible
1Ме, вичкуын*а веськӧтлісь, гижа сойӧлӧ*б да сы челядьлӧ. И тэ Еныслӧн бӧрйӧмыс. Ме тіянӧс сьӧлӧмсянь радейта. Тіянӧс радейтӧны и Еныслісь быльсӧ быдӧс тӧдіссес.2Сія быльыс олӧ миян сьӧлӧммезын да пыр миянкӧт лоас.
3Ась сетас тіянлӧ Ен Айным небыт сьӧлӧмсянь бурсетӧмсӧ*в да лӧньсӧ овны быльнас да радейтӧмнас.
4Ме ёна гажми тэнчит челядьтӧ казялікӧ. Мукӧдыс ны коласісь олӧны быльыс сьӧрті, кыдз миянлӧ вӧлі тшӧктӧм*г Енӧжись Айным.5Ӧні кора тэнӧ, дона сойӧ, пондам радейтны ӧтамӧднымӧс. Эта гижӧмӧ абу кытшӧмкӧ виль тшӧктӧм. Сія миянлӧ вӧлі висьталӧм одззасянь ни.6Радейтӧмыс эд и эм Сы тшӧктӧм сьӧрті олӧмыс. Этӧ тшӧктӧмсӧ тійӧ кыліт одззасянь. Ен тшӧктӧм сьӧрті и колӧ овны.
7Уна эд ылӧтліссес ӧні отирыс коласын лэбтісисӧ. Нія озӧ веритӧ Кристос Исуслӧн морт вывтырын локтӧмӧ. Сэтшӧм мортыс отирсӧ ылӧтлісь, Кристос вылӧ лэбтісись.8Видзӧтӧ ас сьӧраныт, медбы мийӧ эгӧ ӧштӧ сійӧ, мый понда уджалімӧ да медбы быдсӧн вермим босьтны шедтӧм козинсӧ.
9Быдыс, кин оз ов Кристослӧн велӧтӧм сьӧрті, оз видзсьы сы бердӧ, сія Ентӧг олісь. Кристослӧн велӧтӧм сьӧрті олісьлӧн эм и енӧжись Айыс и Сылӧн Зоныс.10Тіян дынӧ локтісь морт вайӧ кӧ мӧдік велӧтӧм, сійӧ эдӧ лэдзӧ керкуӧ. Пантасьтӧн и кинытӧ эд сетӧ.11Умӧльсӧ керисьыслӧ кисӧ сетісь мортыс сыкӧт умӧльсӧ керӧ.
12Уна мый колӧ гижны тіянлӧ, да ог ни понды ӧні чернилоӧн гижны бумага вылӧ. Чайта*д локны тіян дынӧ да паныт пуксьӧмӧн тіянкӧт баитны. Сэк и сьӧлӧммезным ёнжыка гажмасӧ.
13Пым юӧр тэныт ыстӧны бӧрйӧм сойытлӧн*е челядьыс. Аминь.
*а 1.1 вичку ─ церковь, община верующих
*б 1.1 сой ─ Иоан висьталӧ вичку йылісь
*в 1.3 бурсетӧм ─ благодать
*г 1.4 тшӧктӧм ─ заповедь, повеление
*д 1.12 чайтны ─ думать
*е 1.13 бӧрйӧм сой ─ Иоан висьталӧ мӧдік вичку йылісь
Глава 1
