1 Иисус Христосын пачмашыжы; шукышты агыл ма лишӓшлыкым ӹшке цоравлӓжӹлӓн анжыкташ манын, ти пачмашым Йымы Иисус Христослан пуэн. Тӹдӹжӹ цилӓ тидӹм Иоанн цоражы докы колтымы Ангелжӹ гач анжыктен.
2 Йымын шамакшы дӓ Иисус Христосын пӓлдӹртен попымыжы гишӓн – цилӓ мам ужмыжы гишӓн Иоанн пӓлдӹртен попа.
3 Пророкла попымы ти шамакым лыдшы дӓ колыштшывлӓ, тӹшӓкен сирӹмӹм шоктышывлӓ цӓшӓн ылыт, вет шокталтмы жеп лишемӹн.
5 (4-5) Иоанн дорц Асиштӹшӹ шӹм церкӹлӓн. Кӱ улы, Кӱ ылын дӓ Кӱ толеш, Тӹдӹ дорц, Тӹдӹн престолжы анзылнышы шӹм шӱлӹш дорц дӓ ӹнян свидетель, колышывлӓ логӹц сек пӹтӓри ӹлӹжшӹ, сӓндӓлӹк вӹлнӹшӹ кугижӓвлӓн вуйлатышышты Иисус Христос дорц тӓлӓндӓ благодать дӓ тыр лижӹ. Тӹдӹ мӓмнӓм яратен дӓ ӹшке Вӹржӹ доно сулыквлӓнӓ гӹц мышкын ирӹктен,
6 Йымын, ӹшке Ӓтяжӹн, кугижӓ дон священниквлӓжӹм мӓмнӓм ӹштен. Тӹдӹлӓн курым-курымеш лӹмлештӓрӓлтмӓш дӓ сила лижӹ! Аминь.
7 Теве Тӹдӹ пӹлвлӓ лошты толеш,
Тӹдӹм цилӓн ӹшке сӹнзӓштӹ доно ужыт,
ужыт Тӹдӹм шыралшывлӓӓт,
сӓндӓлӹк вӹлнӹшӹ цилӓ йых
Тӹдӹ анзылны мӓгӹрӓш тӹнгӓлеш.
Тенгеок лиэш, аминь.
8 «Мӹнь Альфа дӓ Омега,* Тӹнгӓлтӹш дӓ Мычаш ылам», – манеш Господь, Тӹдӹ, Кӱ улы, Кӱ ылын дӓ Кӱ толеш, Цилӓ Кычышы.
9 Мӹнь, Иоанн, Иисус Христосын орлыкшым, Кугижӓншӹжӹм дӓ цӹтӹмӓшӹжӹм тӓ донда иквӓреш нӓлшӹ шӱмбелдӓ, Йымын шамакшы верц дӓ Иисус Христос гишӓн пӓлдӹртен попымем верц Патмос лӹмӓн островышты ылынам.
10 Господьын кечӹнжӹ* мӹньӹм Шӱлӹш ӓвӓлтен, дӓ пыч гӹц лӓкшӹ гань кого юкым шайыцем колынам. Тӹдӹ попен: «Мӹнь Альфа дӓ Омега, Пӹтӓришӹ дӓ Остатка ылам.
11 Мам ужметӹм книгӓш сирӹ дӓ Асиштӹ ылшы церкӹвлӓлӓн колты: Ефесӹш, Смирнаш, Пергамыш, Фиатираш, Сардисӹш, Филадельфиш дӓ Лаодикиш».
13 (12-13) Мӹнь донем попышы юк кӱн ылеш, пӓлӓш манын, сӓрнӓл анжальым. Сӓрнӓлмӹкем, шӹм шӧртньӹ светильникӹм дӓ нӹнӹ лошты Эдем Эргӹлӓ кайшым ужым. Тӹдӹ кужы выргемӹм чишӹ дӓ онгжы йӹр шӧртньӹ ӹштӹм ӹштӓлшӹ ылын.
14 Тӹдӹн вуйжы дӓ ӱпшӹ ош миж гань, лым гань ошы, а сӹнзӓжӹ тыл салым ганьы,
15 ялжы йӹлгӹжшӹ той ганьы, вуйта камакаэш кальымы, а юкшы кого вӹд ружгымы ганьы ылыныт.
16 Вургымла кидешӹжӹ Тӹдӹ шӹм шӹдӹрӹм кычен, ышмажы гӹц кок тӹрге пӹсӹ меч лӓктӹн, а шӹргӹвӹлӹшӹжӹ – кечӹвӓл ӹрдӹн валгалтшы кечӹ гань.
17 Тӹдӹм ужмыкем, ялышкыжы мӹнь колышы ганьы кенвазынам. Тӹдӹ вургымла кидшӹм вӹкем пиштен дӓ келесен: «Ит лӱд. Мӹнь Пӹтӓришӹ дӓ Остатка
18 дӓ Ӹлӹшӹ ылам; Мӹнь колышы ылынам, а теве Мӹнь курым-курымеш ӹлӹшӹ ылам, аминь, дӓ колымаш дон адын сыравачышты Мӹнь донем.
19 Тенгежӹ, мам ужметӹм – ма улым дӓ тилец вара ма лишӓшлыкым – сирӹ.
20 Вургымла кидӹштем тӹньӹн ужмы шӹм шӹдӹр дӓ шӹм шӧртньӹ светильник теве тидӹм анжыктат: шӹм шӹдӹр – шӹм церкӹн Ангелвлӓжӹ, тӹньӹн ужмы шӹм светильникшӹ – шӹм церкӹ.
*1:8 «Альфа дӓ Омега»: грек алфавитӹштӹ пӹтӓриш дӓ пӹтӓртӹш буквавлӓ. *1:10 «Господьын кечӹнжӹ»: рушӓрнян.1 Ефесӹштӹшӹ церкӹн Ангелжӹлӓн сирӹ: «Вургымла кидешӹжӹ шӹм шӹдӹрӹм Кычышы, шӹм шӧртньӹ светильник лошты Каштшы тенге попа:
2 Тӹньӹн пӓшӓвлӓэтӹм, труйыметӹм, цӹтӹметӹм дӓ худавлӓм тырхен керддӹметӹм пӓлем. Апостол агылеп гӹнят, южшы ӹшкӹмӹштӹм апостол маныт, тӹнь нӹнӹм тергенӓт дӓ алталышы ылмыштым пӓлен нӓлӹнӓт.
3 Тӹнь шукы тырхенӓт, цӹтӹмӓшет улы, Мӹньӹн лӹмем верц пӓшӓм шукы ӹштенӓт дӓ янгылыделат.
4 Но ваштарешет Мӹньӹн теве ма улы: тӹнь первиш яратымашетӹм шуэнӓт.
5 Тенгежӹ, ма гӹц карангметӹм ӓшӹндӓрӹ, сулыкетӹм простьыктен, Йымы докы сӓрнӓл дӓ первиш пӓшӓэтӹм ӹштӹ. Уке гӹнь тӹнь докет шукышты агыл миэм дӓ светильникетӹм вӓржӹ гӹц карангдем.
6 Но николаитвлӓн* пӓшӓштӹм ужын керддӹмет доно тӹнь тӧр ӹштет. Тидӹжӹм Мӹньӹнӓт ужмем ак шо.
7 Кӱн пӹлӹшӹжӹ улы, церкӹвлӓлӓн Шӱлӹшӹн мам попымыжым колжы. Сӹнгӹшӹлӓн Мӹнь Йымын райжы покшалны шалгышы ӹлӹмӓш пушӓнгӹ гӹц качкаш ирӹкӹм пуэм».
8 Смирнаштышы церкӹн Ангелжӹлӓн сирӹ: «Пӹтӓришӹ дӓ Остатка, колышы ылшы дӓ кӹзӹт ӹлӹшӹ тенге попа:
9 Мӹнь тӹньӹн пӓшӓэтӹм, орлыкетӹм, укеӓн ылметӹм пӓлем – тенге гӹнят тӹнь паян ылат. Ӹшкӹмӹштӹм иудей маншывлӓн тӹньӹм кыце вырсымыштым пӓлем, а нӹнӹ иудей агылеп, сатанан тӹшкӓжӹ ылыт.
10 Мам тӹлӓт цӹтӓш вӓрештеш, нима гӹцӓт ит лӱд. Теве, тӓмдӓм тергӓш манын, тӓ логӹцдӓ южшым диавол кызаматыш кӹшкӓ, дӓ лу кечӹ орлыкан лидӓ. Колымаш якте ӹнян ли, дӓ тӹлӓт ӹлӹмӓш вуйӓршӓшӹм пуэм.
11 Кӱн [колышташ] пӹлӹшӹжӹ улы, церкӹвлӓлӓн Шӱлӹшӹн мам попымыжым колжы. Сӹнгӹшӹлӓн кокшы колымаш эксӹкӹм ак ӹштӹ».
12 Пергамыштышы церкӹн Ангелжӹлӓн сирӹ: «Кӱн кок тӹрге пӹсӹ мечшӹ улы, Тӹдӹ тенге попа:
13 Мӹнь тӹньӹн пӓшӓэтӹм дӓ, сатанан престолжы кышты ылеш, тӹштӹ ӹлӹметӹм пӓлем. Тӹнь Мӹньӹн лӹмем пингӹдӹн кычет дӓ Мӹньӹн Антипа ӹнян свидетелемӹм тӓ доныда, сатана ӹлӹмӹ вӓрӹштӹ, пуштмы годымат Мӹлӓнем ӹнянӹмет гӹц карангделат.
14 Но тӹнь ваштарешет попышашемӓт изиш улы: эдеметвлӓ лошты Валаамын тымдымыжым кычышывлӓ ылыт. Тӹдӹжӹ, Израиль эргӹвлӓ идоллан кандымы жертвӹм качкышты дӓ шӓхӓрлӓнӹштӹ манын, нӹнӹм алталаш Валакым тымден.
15 Николаитвлӓн тымдымыштым кычышывлӓ тӹньӹнӓт ылыт, ти тымдымашым Мӹньӹн ужмемӓт ак шо.
16 Тенгежӹ, сулыкетӹм простьыктен, Йымы докы сӓрнӓл. Уке гӹнь тӹнь докет шукышты агыл миэм дӓ ышмаэм гӹц лӓкшӹ мечем доно нӹнӹ ваштареш кредӓлӓш тӹнгӓлӓм.
17 Кӱн [колышташ] пӹлӹшӹжӹ улы, церкӹвлӓлӓн Шӱлӹшӹн мам попымыжым колжы. Сӹнгӹшӹлӓн Мӹнь шӹлтен перегӹмӹ манным качкаш пуэм, тенгеок тӹдӹлӓн ош кӱм пуэм, кӱ вӹлӓнжӹ у лӹмӹм сирӹмӹ, тӹдӹжӹм кӱм нӓлшӹ гӹц молы иктӓт ак пӓлӹ».
18 Фиатираштышы церкӹн Ангелжӹлӓн сирӹ: «Йымын Эргӹ – Тӹдӹн сӹнзӓжӹ тыл салым гань, ялжы йӹлгӹжшӹ той гань – тенге попа:
19 Мӹнь тӹньӹн пӓшӓэтӹмӓт, яратымашетӹмӓт, служыметӹмӓт, ӹнянӹметӹмӓт, цӹтен кердметӹмӓт пӓлем. Кӹзӹт тӹнь тӹнгӓлмет годшы гӹц шукырак ӹштет.
20 Но тӹнь ваштарешет попышашемӓт изиш улы: ӹшкӹмжӹм пророк маншы ӹдӹрӓмӓшлӓн, Иезавельлӓн, ӹшке тымдымыжы доно Мӹньӹн цоравлӓэм шӓхӓрлӓнӹмӓшкӹ дӓ идолвлӓлӓн кандымы жертвӹм качмашкы шыпшылаш ирӹкӹм пуэнӓт.
21 Мӹнь тӹдӹлӓн шӓхӓрлӓнӹмӹжӹ гӹц карангаш веремӓм пуэнӓм, но тӹдӹ сулыкшы гӹц карангде.
22 Седӹндон Мӹнь тӹдӹм орланымаш вӓрӹшкӹ шуэм дӓ тӹдӹн доно шӓхӓрлӓнӹшӹвлӓм, ӹшке пӓшӓштӹ гӹц ак карангеп гӹнь, кого эксӹкӹш пыртем.
23 Тетявлӓжӹмӓт колымашкы шоктем. Тӹнӓм цилӓ церкӹвлӓ пӓлӓш тӹнгӓлӹт: Мӹнь шӱмӹм дӓ шанымашым тергӹшӹ ылам, каждыйланда пӓшӓдӓ семӹнь тӱлем.
24 А тӓлӓндӓ дӓ Фиатираштышы молы эдемвлӓлӓн, кыдывлӓ ти ӹдӹрӓмӓшӹн тымдымыжым ак кычеп дӓ, мам «сатанан келгӹцшӹ» маныт, тӹдӹм пӓлен нӓлделыт, попем: тӓ вӹкӹдӓ вес нелӹцӹм ам пиштӹ –
25 ма тӓмдӓн улы, тӹдӹм Мӹнь толмешкем кычыда веле.
26 Кӱ сӹнгӓ дӓ Мӹньӹн шӱдӹмӹ пӓшӓэм мычаш якте ӹштен шалга, тӹдӹлӓн язычниквлӓм вуйлаташ властьым пуэм.
27 Тӹдӹ нӹнӹм кӹртни скипетр доно кӹтӓш тӹнгӓлеш, нӹнӹ шун ӓтӹлӓ шӓлӓнӓт. Техень властьымок Мӹнь Ӓтя гӹц нӓлӹнӓм.
28 Мӹнь сӹнгӹшӹлӓн ирокшы шӹдӹрӹм* пуэм.
29 Кӱн [колышташ] пӹлӹшӹжӹ улы, церкӹвлӓлӓн Шӱлӹшӹн мам попымыжым колжы».
*2:6 Николаитвлӓ – алтанзык тымдымашан тӹшкӓ. *2:28 Ирокшы шӹдӹр – сӹнгӹмӓшӹн символжы.1 Сардисӹштӹшӹ церкӹн Ангелжӹлӓн сирӹ: «Йымын шӹм шӱлӹшӹжӹ дӓ шӹм шӹдӹр кӱн улы, Тӹдӹ тенге попа: Мӹнь тӹньӹн мам ӹштӹметӹм пӓлем. Лӹмет ӹлӹшӹн, но ӹшкежӹ колышы ылат.
2 Понгыжалт, ма эче кодын дӓ колымашкы лишемӹн, тӹдӹм пингӹдемдӹ. Йымем анзылны тӹньӹн пӓшӓэт керӓл семӹнь мычаш якте ӹштен шоктымы агылым ужынам.
3 Тенгежӹ, мам тӹнь нӓлӹнӓт дӓ колынат, тӹдӹм ӓштӹ, кычы дӓ, сулыкетӹм простьыктен, Йымы докы сӓрнӓл. Ат понгыжалт гӹнь, Мӹнь шолы семӹнь вычыде миэм, дӓ, кынам вӹкет кечӓлтӓм, тӹнь ат пӓлӹ.
4 Но выргемӹштӹм лявӹртӹдӹмӹ эдемвлӓӓт Сардисӹштӹ тӹньӹн икманярын ылыт. Нӹнӹ Мӹнь сагаэм ош выргемӓн кашташ тӹнгӓлӹт, тидӹлӓн нӹнӹ ярал ылыт.
5 Сӹнгӹшӹ ош выргемӹм чиӓ, дӓ Мӹнь лӹмжӹм ӹлӹмӓш книгӓ гӹц ӹштӹл ам шу, а Ӓтям анзылны дӓ Ангелвлӓжӹ анзылны тӹдӹм пӓлӹмем пачын келесем.
6 Кӱн пӹлӹшӹжӹ улы, церкӹвлӓлӓн Шӱлӹшӹн мам попымыжым колжы».
7 Филадельфиштӹшӹ церкӹн Ангелжӹлӓн сирӹ: «Святой дӓ Лачок, Тӹдӹ, Кӱн Давидӹн сыравачшы улы – Тӹдӹн пачмыжым иктӓт ак питӹрӹ дӓ Тӹдӹн питӹрӹмӹжӹм иктӓт ак пач, – тенге попа:
8 Тӹньӹн пӓшӓэтӹм пӓлем. Теве анзылнет Мӹнь амасам пачынам, дӓ иктӓт тӹдӹм питӹрен ак керд. Силаэт чӹдӹ гӹнят, шамакем шоктен ӹленӓт дӓ Мӹньӹн лӹмем гӹц карангделат.
9 Теве Мӹнь тӹлӓнет сатанан тӹшкӓжӹ гӹц ӹшке гишӓнӹштӹ иудей ылына маншывлӓм пуэм, но нӹнӹ иудей агылеп, алталат веле. Мӹнь тенге ӹштем: нӹнӹ толыт, ялышкет кымал вазыт дӓ тӹньӹм яратымемӹм пӓлен нӓлӹт.
10 Мӹньӹн цӹтӓш шӱдӹмемӹм тӹнь шоктен ӹленӓт, седӹндон, кынам мӱлӓндӹ вӹлнӹ ӹлӹшӹвлӓм тергӓш толшы пиш нелӹ жеп улы сӓндӓлӹкӹш вазеш, Мӹнь тӹньӹм ытарен кодем.
11 Шукышты агыл миэм: тӹньӹн сӹнгӹмӓш вуйӓршӓшетӹм иктӓт ӹнжӹ нӓл манын, маэт улы, тӹдӹм кычы.
12 Сӹнгӹшӹм Мӹнь Йымемӹн пӧртешӹжӹ мӓнгӹм ӹштем, тӹшецӹн тӹдӹ ӹнде ак лӓк. Вӹлӓнжӹ Йымемӹн лӹмжӹм дӓ Йымемӹн халажын – Йымем дорц пӹлгом гӹц валышы у Иерусалимӹн – лӹмжӹм дӓ Ӹшкӹмемӹн у лӹмем сирем.
13 Кӱн пӹлӹшӹжӹ улы, церкӹвлӓлӓн Шӱлӹшӹн мам попымыжым колжы».
14 Лаодикиштӹшӹ церкӹн Ангелжӹлӓн сирӹ: «Ӹнян дӓ лачок свидетель, Йымын цилӓ ӹштӹмӹжӹн тӹнгӓлтӹшӹжӹ, Аминь, тенге попа:
15 Мӹнь тӹньӹн пӓшӓэтӹм пӓлем. Тӹнь ӱштӓт, шокшат ат ыл. О, тӹнь ӱштӹ ӓль шокшы лиӓт ылгецӹ!
16 Но шокшат, ӱштӓт ат ыл, а ливӹ ылат, седӹндон тӹньӹм ышмаэм гӹц шӹвӓл шуэм,
17 вет тӹнь попет: «Мӹнь паян ылам, паенӓм, ма келеш, мӹньӹн цилӓ улы». Тӹнь цӓшдӹмӹ, жӓлӓйӹмӓшӹм лыкшы, укеӓн, слӧпӧй, цӓрӓн ылметӹм ат пӓлӹ.
18 Тӹлӓнет ышым пуэм: паян лиӓш манын, тылеш ирӹктӹмӹ шӧртньӹм Мӹнь гӹцем тӱлен нӓл; чиӓш дӓ намысыш пыртышы цӓрӓэтӹм питӹрӓш манын, Мӹнь гӹцем ош выргемӹм нӓл; ужаш манын, сӹнзӓшкет сӹнзӓм тӧрлӹшӹ мазьым шӹрӹ.
19 Кӱм Мӹнь яратем, цилӓштӹм пелештем дӓ тӧрлӓтем. Тенге, йӓнг йылен цацышы ли дӓ, сулыкетӹм простьыктен, Йымы докы сӓрнӓл.
20 Теве Мӹнь амаса сага шалгем дӓ тӹкӓлтем. Иктӓжӹ Мӹньӹн юкем колеш дӓ амасам пачеш гӹнь, тӹдӹн докы Мӹнь пырем дӓ тӹдӹн доно вады качкышым качкам, а тӹдӹ – Мӹнь донем.
21 Сӹнгӹшӹлӓн Мӹнь сагаэм престолышкем шӹнзӓш ирӹкӹм пуэм. Тенгеок Мӹнят сӹнгенӓм дӓ Ӓтям доно Тӹдӹн престолышкыжы шӹнзӹнӓм.
22 Кӱн пӹлӹшӹжӹ улы, церкӹвлӓлӓн Шӱлӹш мам попымым колжы».
1 Тилец вара мӹнь ужынам: теве пӹлгомышты пачмы амаса. Мӹлӓнем андак пыч семӹнь йонген попышы юк келесен: «Тишкӹ кузы, тилец вара ма лишӓшлыкым тӹлӓнет анжыктем».
2 Тӹнӓмок мӹньӹм Шӱлӹш ӓвӓлтӹш. Теве пӹлгомышты престол шалга, а престолышты Шӹнзӹшӹ ылеш.
3 Шӹнзӹшӹжӹн цӹрежӹ яспис дон сардис кӱлӓ кайын, престол йӹр смарагдыла кайшы шанавӹл ылын.
4 Ти престол йӹр коклы нӹл престол ылын, тӹштӹ коклы нӹл старец шӹнзӹмӹм ужынам, нӹнӹ ош выргемӹм чиэнӹт, вуйыштышты шӧртньӹ вуйгӹшӹл ылын.
5 А престол гӹц валгынзыш дон хӹдӹртӹш дӓ юквлӓ лӓктӹнӹт. Престол анзылны шӹм факел йылен, нӹнӹ Йымын шӹм шӱлӹшӹжӹ ылыт.
6 Престол анзылны – хрусталь гань охоницӓ тангыж. Престол покшалны дӓ престол йӹр нӹл ӹлӹшӹ* шалген, кӓпӹштӹштӹ цилӓ вӓре, анзылнат, шайылнат, пиш шукы сӹнзӓ ылын.
7 Пӹтӓришӹжӹ лев гань ылын, кокшыжы – ӱшкӱж гань, кымшыжын шӹргӹжӹ – эдемӹн гань, а нӹлӹмшӹжӹ – чонгештӹшӹ кучкыж гань.
8 Нӹл ӹлӹшӹ гӹц каждыйжын куд шылдыржы улы, сӹнзӓштӹ – улы кӓп мычкы, кӧргӹштӹштӓт. Йыдет-кечет цӓрнӹде чӹнь попат:
«Святой, Святой, Святой
Господь Йымы, Цилӓ Кычышы!
Тӹдӹ ылын, ылеш дӓ толеш».
9 А кынам ӹлӹшӹвлӓ престолышты Шӹнзӹшӹм, курым-курымок Ӹлӹшӹм, лӹмлештӓрӓт, Тӹдӹм шотеш пиштӹмӹштӹм анжыктат дӓ таум ӹштӓт,
10 коклы нӹл старец престолышты Шӹнзӹшӹ анзылан кымык вазыт, курым-курымок Ӹлӹшӹлӓн кымалыт, вуйгӹшӹлӹштӹм престол анзык пиштӓт дӓ попат:
11
«Господь,
Тӹнь лӹмлештӓрӓлтмӓшӹмӓт, шотеш пиштӹмӓшӹмӓт, властьымат нӓлӓш
пиш ярал ылат:
ма улы – цилӓ Тӹнь ӹштенӓт,
Тӹньӹн ирӹкет* доно цилӓ лин дӓ ӹштӓлтӹн».
1 Престолышты Шӹнзӹшӹн вургымла кидӹштӹжӹ книгӓм ужынам, кӧргӹштӹжӓт дӓ вӹлнӹжӓт сирӹмӹ* дӓ шӹм шӹштӹ пецӓт доно тӹдӹм питӹрӹмӹ.
2 Мӹнь силан Ангелӹм ужынам, тӹдӹ кого юк доно увертӓрен: «Кӱ пецӓтвлӓм карангдаш дӓ книгӓм пачаш ярал улы?»
3 Но пӹлгомыштат, мӱлӓндӹ вӹлнӓт, мӱлӓндӹ лӹвӓлнӓт книгӓм пачынат, кӧргӹшкӹжӹ анжалынат кердшӹ иктӓт ылде.
4 Книгӓм пачаш дӓ лыдаш, кӧргӹшкӹжӹ анжалашат вӓк ярал иктӓт лӓкдеӓт, мӹнь шукы мӓгӹренӓм.
5 Старецвлӓ логӹц иктӹжӹ мӹлӓм попен: «Ит мӓгӹрӹ. Теве Иуда йых гӹц Лев, Давидӹн Важшы, сӹнген. Тӹдӹ шӹм шӹштӹ пецӓтӹм карангда дӓ ти книгӓм пачеш».
6 Мӹнь ужынам: престол, нӹл ӹлӹшӹ дӓ старецвлӓ лошты шӹшкӹлмӹ ганьы Патя шалга, Тӹдӹ шӹм шуран дӓ шӹм сӹнзӓӓн, нӹнӹ улы мӱлӓндӹ вӹкӹ Йымын колтымы шӹм шӱлӹшӹжӹ ылыт.
7 Патя миэн дӓ престолышты Шӹнзӹшӹн вургымла кидшӹ гӹц книгӓм нӓлӹн.
8 Тӹнӓм нӹл ӹлӹшӹ дӓ коклы нӹл старец Патя анзылан кымык вазыныт. Каждыйжын кӓрш дӓ тотлы пышан фимиамым циц оптымы шӧртньӹ цӓшкӓ ылын, тидӹжӹ – святойвлӓн ыдылмышты.
9 Нӹнӹ у мырым мыренӹт:
«Тӹнь книгӓм нӓлӓш
дӓ тӹшец шӹштӹ пецӓтвлӓм пачаш пиш ярал ылат,
вет Тӹнь шӹшкӹлмӹ ылынат,
цилӓ йых дӓ йӹлмӹ, халык дӓ вырлык гӹц
мӓмнӓм Йымылан ӹшке Вӹрет доно тӱлен нӓлӹнӓт.
10 Тӹнь мӓмнӓн Йымыланна
мӓмнӓм кугижӓ дон священниквлӓм ӹштенӓт,
мӓ мӱлӓндӹ вӹлнӹ кугижӓлӓнӓш тӹнгӓлӹнӓ».
11 Вара мӹнь ужынам дӓ шукы Ангелӹн юкыштым колынам, нӹнӹ престол, ӹлӹшӹвлӓ дӓ старецвлӓ йӹр ылыныт. Шотышты тӹжем тӹжем, лыдын пӹтӓрӹдӹмӹ.
12 Нӹнӹ кого юк доно попенӹт:
«Шӹшкӹлмӹ Патя
силамат, пайдамат, кого ышымат, властьымат,
шотеш пиштӹмӓшӹмӓт, лӹмлештӓрӓлтмӓшӹмӓт, хвальымашымат
нӓлӓш ярал ылеш».
13 Йымы ӹштӹмӹвлӓн пӹлгомыштат, мӱлӓндӹ вӹлнӓт, мӱлӓндӹ лӹвӓлнӓт, тангыжыштат мам попымыштым мӹнь колынам. Тӹштӹ ылшывлӓ цилӓн попенӹт:
«Престолышты Шӹнзӹшӹлӓн дӓ Патялан
курым-курымеш хвальымаш, шотеш пиштӹмӓш, лӹмлештӓрӓлтмӓш дӓ власть лижӹ!»
14 Вара нӹл ӹлӹшӹ келесен: «Аминь». Коклы нӹл старец кымык вазыныт дӓ курым-курымеш Ӹлӹшӹлӓн кымалыныт.
*5:1 Тиштӹ вӹдӹлтӹш книгӓ гишӓн попалтеш, тӹштӹшӹ пумагаэш кок велӓнжӓт сирӹмӹ.1 Шӹм пецӓт гӹц иктӹжӹм Патян пачмыжым мӹнь ужынам дӓ нӹл ӹлӹшӹ гӹц иктӹжӹн хӹдӹртӹш гань юк доно «Тол дӓ анжал!» манмыжым колынам.
2 Вара мӹнь ужынам: теве ош имни, вӹлнӹжӹ шӹнзӹшӹн пикш янгежшӹ улы. Тӹдӹлӓн вуйӓршӓшӹм пуэнӹт, тӹдӹ сӹнгӹшӹ семӹнь дӓ сӹнгӓш манын лӓктӹн.
3 А Патя кокшы пецӓтӹм пачмыкы, мӹнь нӹл ӹлӹшӹ гӹц кокшыжын «Тол дӓ анжал!» келесӹмӹжӹм колынам.
4 Тыл гань якшар вес имни лӓктӹн. Эдемвлӓ икӓнӓ-иктӹштӹм пуштышты манын, тӹдӹм кышкыжшылан сӓндӓлӹк вӹлец тырым нӓлӓш силам пумы дӓ кого мечӹм кычыктымы.
5 А Патя кымшы пецӓтӹм пачмыкы, нӹл ӹлӹшӹ гӹц кымшыжын «Тол дӓ анжал!» манмыжым колынам. Теве шим имним ужынам, вӹлнӹжӹ шӹнзӹшӹн кидӹштӹжӹ висӓ ылын.
6 Нӹл ӹлӹшӹ логӹц лӓкшӹ юкым колынам, тӹдӹ келесен: «Хиникс висӓ шӓдӓнгӹ ик динарим стоя, кым хиникс висӓ шожат – ик динаримок.* А олив ӱлӓн дӓ якшар ӓрӓкӓлӓн нимахань худамат ит ӹштӹ».
7 А Патя нӹлӹмшӹ пецӓтӹм пачмыкы, мӹнь нӹл ӹлӹшӹ гӹц нӹлӹмшӹжӹн юкшым колынам, тӹдӹ попен: «Тол дӓ анжал!»
8 Мӹнь ужынам: теве ыжаралгы-луды имни дӓ вӹлнӹжӹ имниэшкӹ, тӹдӹн лӹмжӹ колымаш, паштекшӹ ад каштын. Тӹдӹн кид лӹвӓкӹжӹ мӱлӓндӹн нӹлӹмшӹ лаштыкшы пуалтын. Меч доно, шужымаш доно, цер доно дӓ зверьвлӓ доно эдемӹм пушташ тӹдӹлӓн власть пуалтын.
9 А Патя вӹзӹмшӹ пецӓтӹм пачмыкы, жертвенник лӹвӓлнӹ мӹнь Йымын шамакшы верц дӓ Тӹдӹ гишӓн пӓлдӹртен попымышты верц пуштмывлӓн йӓнгӹштӹм ужынам.
10 Нӹнӹ чӹнь сасленӹт: «Святой дӓ Лачок Господь, эче маняр веремӓ Тӹнь мӱлӓндӹ вӹлнӹ ӹлӹшӹвлӓм ат суйы дӓ мӓмнӓн вӹрнӓ верц кӱсӹм ат пӧрӹктӹ?»
11 Нӹнӹлӓн каждыйжылан ош выргемӹм пуэнӹт. Тӓ сагада пӓшӓм ӹштӹшӹвлӓ дӓ шӱмбелвлӓ логӹц шукыштым тӓ семӹньдӓок пуштыт, нӹнӹн шотышты маняр лишӓшлыкыш шомешкӹ, эче икманяр веремӓ ладнан вычалда манын, нӹнӹлӓн келесенӹт.
12 А Патя кудымшы пецӓтӹм пачмыкы, мӹнь ужынам: теве мӱлӓндӹ когон цӹтӹрнӓлтӹн, кечӹ ойхы выргем гань шимӹ лин, тӹлзӹ вӹр ганьыш сӓрнӓлтӹн.
13 Смоква пушӓнгӹн кӱн шодымы кӹцкӹжӹ кого мардежеш вилмӹ семӹнь пӹлгомыштышы шӹдӹрвлӓ мӱлӓндӹ вӹкӹ йогенӹт,
14 свиток семӹнь пӹтӹрнӓлтӹн, пӹлгом ямын, цилӓ кырык дӓ остров ӹшке вӓрӹштӹ гӹц тӓрвӓненӹт.
15 Сӓндӓлӹк вӹлнӹшӹ кугижӓвлӓ, тӧрӓ дон паянвлӓ, салтак вуйлатышывлӓ дон силанвлӓ, цилӓ раб дон цилӓ ирӹкӓнвлӓ кырыкыштышы ыраж дон шелӹквлӓшкӹ шӹлӹнӹт
16 дӓ кырык дон кӱвлӓлӓн попенӹт: «Вӹкӹнӓ йӧрӹлтдӓ дӓ престолышты Шӹнзӹшӹн сӹнзӓжӹ дӓ Патян шӹдӹжӹ гӹц мӓмнӓм шӹлтӹдӓ!
17 Вет Тӹдӹн шӹдӹжӹн кого кечӹжӹ толын, дӓ кӱ тидӹм тырхен лӓктӹн кердеш?»
*6:6 Хиникс висӓ – литр нӓрӹ. Ик динари – ик кечӓш пӓшӓдӓр.1 Тилец вара мӹнь нӹл Ангелӹм ужынам, нӹнӹ мӱлӓндӹн нӹл оголыштыжы шалгенӹт дӓ, мӱлӓндӹшкӓт, тангыжышкат, нимахань пушӓнгӹшкӓт мардеж ӹнжӹ пуал манын, мӱлӓндӹн нӹл мардежшӹм кыченӹт.
2 Мӹнь кечӹ лӓкмӹ вел гӹц лӱлтшӹ вес Ангелӹм ужынам. Тӹдӹ Ӹлӹшӹ Йымын пецӓтшӹм кычен дӓ мӱлӓндӹлӓн дӓ тангыжлан эксӹкӹм ӹштӓш ирӹкӹм пумы нӹл Ангеллӓн чӹнь сӹгӹрӓлӹн:
3 «Йымын цоравлӓжӹлӓн лепкӓэшӹштӹ пецӓтӹм шӹндӹмешкӹнӓ, мӱлӓндӹлӓнӓт, тангыжланат, пушӓнгӹлӓнӓт нимахань эксӹкӹм идӓ ӹштӹ».
4 Пецӓт доно пӓлдӹртӹмӹ эдем шотым кольым, тидӹ – шӱдӹ нӹллӹ нӹл тӹжем, нӹнӹ Израиль эргӹвлӓн цилӓ йыхышты гӹц ылыныт:
5 Иудан йыхшы гӹц луаткок тӹжемӹм пецӓт доно пӓлдӹртӹмӹ, Рувимӹн йыхшы гӹц – луаткок тӹжемӹм, Гадын йыхшы гӹц – луаткок тӹжемӹм,
6 Асирӹн йыхшы гӹц – луаткок тӹжемӹм, Неффалимӹн йыхшы гӹц – луаткок тӹжемӹм, Манассийӹн йыхшы гӹц – луаткок тӹжемӹм,
7 Симеонын йыхшы гӹц – луаткок тӹжемӹм, Левийӹн йыхшы гӹц – луаткок тӹжемӹм, Иссахарын йыхшы гӹц – луаткок тӹжемӹм,
8 Завулонын йыхшы гӹц – луаткок тӹжемӹм, Иосифӹн йыхшы гӹц – луаткок тӹжемӹм, Вениаминӹн йыхшы гӹц – луаткок тӹжемӹм пӓлдӹртӹмӹ.
9 Тилец вара мӹнь ужынам: теве пиш шукы халык, нӹнӹм иктӓт шотлен пӹтӓрен кердде. Тӹштӹ цилӓ вырлык, йых, халык дӓ йӹлмӹ гӹц эдемвлӓ ылыныт. Нӹнӹ престол анзылны дӓ Патя анзылны шалгенӹт, вӹлнӹштӹ ош выргем, кидешӹштӹ пальма укшым кыченӹт.
10 Пиш чӹнь нӹнӹ сасленӹт:
«Престолышты шӹнзӹшӹ Йымына дорц дӓ Патя дорц
ытарымаш толеш!»
11 Ангелвлӓ цилӓн престол, старецвлӓ дӓ нӹл ӹлӹшӹ йӹр шалгенӹт, престол анзылан кымык вазыныт дӓ Йымылан кымалын
12 келесенӹт:
«Аминь! Хвальымаш, лӹмлештӓрӓлтмӓш, кого ыш,
таум ӹштӹмӓш, шотеш пиштӹмӓш,
власть дӓ сила
мӓмнӓн Йымыланна курым-курымеш лижӹ! Аминь!»
13 Вара старецвлӓ логӹц иктӹжӹ мӹнь гӹцем ядын: «Ти ош выргемӓнвлӓ кӱ ылыт дӓ кышец толыныт?»
14 Мӹнь тӹдӹлӓн келесенӓм: «Шотеш пиштӹмем, тӹнь пӓлет». А тӹдӹ мӹлӓнем манын: «Ти эдемвлӓ пиш кого орлык гӹц толыныт, нӹнӹ выргемӹштӹм мышкыныт дӓ Патян Вӹржӹ доно ошемденӹт.
15 Седӹндон нӹнӹ Йымын престолжы анзылны ылыт,
Тӹдӹлӓн пӧртӹштӹжӹ йыдет-кечет служат,
дӓ престолышты Шӹнзӹшӹ нӹнӹ лошты переген ӹлӓш тӹнгӓлеш.
16 Ӹнде нӹнӹ шужымым дӓ йӱмӹ шомым ак пӓлеп,
нӹнӹм кечӓт, нимахань шокшат панежӓш ак тӹнгӓл.
17 Престол покшалнышы Патя нӹнӹм кӹтӓ,
ӹлӹшӹ вӹдӹм лыкшы вӹд важ докы кандышташ тӹнгӓлеш,
дӓ Йымы сӹнзӓштӹ гӹц улы сӹнзӓвӹдӹштӹм ӹштӹлеш».
1 Патя шӹмшӹ пецӓтӹм пачмыкы, пел цӓш нӓрӹ пӹлгомышты шӹп лин.
2 Йымы анзылны шалгышы шӹм Ангелӹм ужынам, нӹнӹлӓн шӹм шактымы пычым пумы.
3 Эче ик Ангел толын дӓ, шӧртньӹ доно ӹштӹмӹ тӹтӹрӹмӹ ӓтӹм кычен, жертвенник анзылан шагалын. Престол анзылнышы шӧртньӹ жертвенникӹш цилӓ святойвлӓн ыдылмышты доно иквӓреш жертвеш пиштӓш тотлы пышан фимиамым тӹдӹлӓн шукы пумы ылын.
4 Святойвлӓн ыдылмышты доно иквӓреш фимиамын шӹкшӹжӹ Ангелӹн кидшӹ гӹц Йымы анзыкы лӱлтӹн.
5 Вара Ангел тӹтӹрӹмӹ ӓтӹм нӓлӹн, тӹшкӹ жертвенникӹштӹшӹ тылым темен дӓ мӱлӓндӹ вӹкӹ шуэн. Тӹнӓм юквлӓ шактен колтенӹт, хӹдӹртӹш хӹдӹртен, валгынзыш кайын дӓ мӱлӓндӹ цӹтӹрнӓлтӹн.
6 Ӹнде шӹм пычым кычышы шӹм Ангел пуалташ йӓмдӹлӓлтӹн.
7 Пӹтӓриш Ангел пычым пуалтымыкы, шолем дӓ тыл вӹр ярелӓ лӓктӹнӹт дӓ мӱлӓндӹ вӹкӹ вазыныт. Пушӓнгӹвлӓ логӹц кымшы лаштыкшы дӓ цилӓ ыжар шуды йылен.
8 Кокшы Ангел пычым пуалтымыкы, тангыжыш салымын йылышы кого кырык ганьы кенвазын. Тангыжын кымшы лаштыкшы вӹрӹш сӓрнӓлтӹн,
9 тангыжышты ӹлӹшӹвлӓ логӹц кымшы лаштыкшы колен, корабльвлӓ логӹц кымшы лаштыкшы пӹтен.
10 Кымшы Ангел пычым пуалтымыкы, факел ганьы йылышы кого шӹдӹр рекӓвлӓ логӹц кымшы лаштыкышкыжы дӓ вӹдсӹнзӓвлӓ вӹкӹ пӹлгом гӹц кенвазын.
11 А шӹдӹржӹн лӹмжӹ – шодышуды.* Вӹдӹн кымшы лаштыкшы шодышуды ганьыш сӓрнӓлтӹн, дӓ вӹд гишӓн шукы эдем колен, вет вӹдшӹ качы лин.
12 Нӹлӹмшӹ Ангел пычым пуалтымыкы, кечӹн кымшы лаштыкшылан, тӹлзӹн кымшы лаштыкшылан, шӹдӹрвлӓн кымшы лаштыкыштылан эксӹк лин. Нӹнӹн кымшы лаштыкышты пӹцкемӹшӓлтӹн, дӓ сотыгечӹн кымшы лаштыкшы соты ылде, йыд донат тенгеок лин.
13 Тӹнӓм мӹнь пӹлгом покшалны чонгештӹшӹ Ангелӹм ужынам дӓ тӹдӹн кого юк доно попымыжым колынам: «Ойхы, ойхы, ойхы толеш мӱлӓндӹ вӹлнӹ ӹлӹшӹвлӓлӓн кодшы пычвлӓ пуалтымы юк гӹц, вет эче кым Ангел пуалташ тӹнгӓлеш».
*8:11 Шодышуды – полынь..1 Вӹзӹмшӹ Ангел пычым пуалтымыкы, мӹнь пӹлгом гӹц мӱлӓндӹш кенвацшы шӹдӹрӹм ужынам, тӹдӹлӓн пындашдымы келгӹцӹн мӱгӹреп сыравачшым пумы.
2 Шӹдӹржӹ пындашдымы келгӹцӹн мӱгӹрепшӹм пачын, дӓ пиш кого камака гӹц лӓкмӹ семӹнь мӱгӹреп гӹц шӹкш кузен, тӹ шӹкшеш кечӹ дӓ воздух тӹтӹрӓнгӹнӹт.
3 Шӹкш гӹц мӱлӓндӹ вӹкӹ ныр цӹрцӹквлӓ лӓктӹнӹт, нӹнӹлӓн мӱлӓндӹ вӹлнӹ скорпионлан пумы гань сила пуалтын.
4 Мӱлӓндӹштӹшӹ шудылан, нимахань ыжар кушкышлан дӓ нимахань пушӓнгӹлӓн эксӹкӹм ӹнжӹштӹ ӹштеп манын, ныр цӹрцӹквлӓлӓн келесӹмӹ ылын: кӱн лепкӓштӹжӹ Йымын пецӓтшӹ уке, техень эдемлӓн веле эксӹкӹм ӹштӓш нӹнӹлӓн ирӹк пуалтын.
5 Нӹнӹлӓн эдемвлӓм пушташ агыл, а вӹц тӹлзӹ ясыландараш ирӹкӹм пумы. Нӹнӹ пышкылшы скорпион семӹнь эдемвлӓм ясыландаренӹт.
6 Тӹ кечӹвлӓн эдемвлӓ колымашым кӹчӓлӹт, но ак моэп, нӹнӹ колынештӹ, а колымаш нӹнӹ дорц кыргыжеш.
7 Ныр цӹрцӹквлӓ вырсеш йӓмдӹлӹмӹ имнилӓ кайыныт. Вуйыштышты шӧртньӹ гӹц ӹштӹмӹлӓ кайшы вуйгӹшӹл ганьы ылын, а шӹргӹвӹлӹшӹштӹ – эдемӹн ганьы.
8 Нӹнӹн ӹдӹрӓмӓш ӱплӓ кайшы ӱпӹштӹ ылын, а пӱштӹ – левӹн ганьы.
9 Вӹлнӹштӹ кӹртни тыгыр ганьы перегӹшӹ тыгыр ылын, шылдыр юкышты – шукы кӹцкӹмӹ имни кредӓлмӓшкӹ кыдалмы годшы арава рушткымы ганьы.
10 Нӹнӹн скорпионын ганьы пачышты улы, пачыштышты – шылангы. Эдемвлӓлӓн вӹц тӹлзӹ эксӹкӹм ӹштӓш властьышты ылын.
11 Нӹнӹн кугижӓштӹ пындашдымы келгӹцӹн ангелжӹ ылын, еврейлӓ тӹдӹн лӹмжӹ Аваддон, а греклӓ – Аполлион.*
12 Пӹтӓриш ойхы эртен, тилец вара эче кок ойхы толеш.
13 Кудымшы Ангел пычым пуалтымыкы, Йымы анзылнышы шӧртньӹ жертвенникӹн нӹл шуржы гӹц мӹнь юкым колынам.
14 Пычым кычышы кудымшы Ангеллӓн тӹдӹ келесен: «Кого Евфрат рекӓ доны пидӹн шӹндӹмӹ нӹл Ангелӹм шӱтӹ».
15 Нӹл Ангелӹм шӱтенӹт. Эдем йыхын кымшы лаштыкшым пуштышты манын, нӹнӹм ти цӓшеш, кечеш, тӹлзеш дӓ иэш йӓмдӹм кыченӹт.
16 А имниэшкӹ салтаквлӓн шотышты кокшӱдӹ миллион нӓрӹ ылын, мӹнь ти шотым колынам.
17 Ужмаштем ти имни дон имниэшкӹвлӓ мӹлӓм тенге кайыныт: имниэшкӹвлӓ вӹлнӹ тыл гань якшаргы, шимӓлгӹ-кловой дӓ сирӓ* гань нарынзы цӹреӓн перегӹшӹ кӹртни тыгырвлӓ ылыныт. Имнивлӓн вуйышты левӹн ганьы, ышмашты гӹц тыл, шӹкш дӓ сирӓ лӓктеш.
18 Ти кым эксӹк – ышмашты гӹц лӓкшӹ тыл, шӹкш дӓ сирӓ – эдемвлӓ логӹц кымшы лаштыкшым пӹтӓрен.
19 Имнивлӓн силашты – нӹнӹн ышмаштышты дӓ пачыштышты. Пачышты – кӹшкӹ ганьы дӓ вуян, вуйышты доно эксӹкӹм ӹштенӹт.
20 Вес эдемвлӓжӹ, техень эксӹкеш колыдымывлӓ, ӹшке кидӹштӹ доно ӹштӹмӹштӹ гӹц карангделыт: нӹнӹ иӓлӓн дӓ ужынат, колынат, каштынат керддӹмӹ шӧртньӹ, ши, той, кӱ дӓ пу идолвлӓлӓн кымалаш цӓрнӹделыт.
21 Нӹнӹ пуштмышты, йозы ылмышты, шӓхӓрлӓнӹмӹштӹ дӓ шолыштмышты гӹц карангделыт.
*9:11 Аполлион лӹм пӹтӓрӹшӹм анжыкта. *9:17 Сирӓ – сера, химический элемент.1 Вара мӹнь эче ик Ангелӹм ужынам. Тӹдӹ кого силан ылын, пӹлгом гӹц вален. Выргемжӹ – пӹл, вуй мычаштыжы – шанавӹл, шӹргӹвӹлӹшӹжӹ кечӹ ганьы, ялжы тыл мӓнгӹ ганьы.
2 Кидешӹжӹ тӹдӹ пачмы книгӓм кычен. Вургымла ялжым тангыж вӹкӹ, шалахайжым мӱлӓндӹ вӹкӹ шӹнден,
3 лев ырлымы семӹнь кого юк доно сӹгӹрӓлӹн. А сӹгӹрӓлмӹкӹжӹ, шӹм хӹдӹртӹш каждыйжы ӹшке юкшы доно попаш тӹнгӓлӹн.
4 Шӹм хӹдӹртӹш каждый ӹшке юкшы доно келесӹмӹкӹ, мӹнь сирӓш шанышым, но пӹлгом гӹц мӹлӓм попышы юкым кольым: «Шӹм хӹдӹртӹш мам попымым шӹлтӹ, тидӹм ит сирӹ».
5 Вара тангыж дӓ мӱлӓндӹ вӹлнӹ шалгышы мӹньӹн ужмы Ангел кидшӹм пӹлгомыш лӱктӓлӹн
6 дӓ пӹлгомым дӓ цилӓ тӹштӹ ылшым, мӱлӓндӹм дӓ цилӓ тӹштӹ ылшым, тангыжым дӓ цилӓ тӹштӹ ылшым Ӹштӹшӹ, курым-курымок Ӹлӹшӹ доно цуратлен: «Ӹнде жеп ак ли.
7 Шӹмшӹ Ангелӹн пыч юкшы шактымы кечӹвлӓн Йымын тайныжы – пуры шанымашыжы – Тӹдӹн пророк цоравлӓжӹлӓн увертӓрӹмӹжӹ семӹньок шокталтеш».
8 А пӹлгом гӹц мӹлӓнем шактышы юк эчеӓт мӹнь донем попаш тӹнгӓлӹн дӓ келесен: «Ке, тангыж дӓ мӱлӓндӹ вӹлнӹ шалгышы Ангелӹн кидшӹ гӹц пачмы книгӓм нӓл».
9 Мӹнь Ангел докы миэнӓм, книгӓм пуаш ядынам. А тӹдӹ мӹлӓм келесен: «Нӓл дӓ кач. Кӧргӹштет тӹдӹ качым лыктеш, но ышмаштет мӱ гань тотлы лиэш».
10 Мӹнь Ангелӹн кидшӹ гӹц книгӓм нӓльӹм дӓ качкым, ышмаштем тӹдӹ мӱ гань тотлы ылын, а качмыкем, кӧргӹштем качы ли.
11 А тӹдӹ мӹлӓнем попен: «Тӹлӓнет шукы халык, йых, йӹлмӹ дӓ кугижӓ гишӓн эчеӓт пророкла попашет келеш».
1 Мӹлӓм висӹмӹ панды гань амыж вургым пумы дӓ келесӹмӹ: «Кӹньӹл, Йымын пӧртшӹм дӓ жертвенникшӹм висӹ, тӹштӹ кымалшывлӓм шотлы.
2 А Йымын пӧртӹн тӱжвӓл кудывичӹжӹм коды, тӹдӹм ит висӹ, вет тӹдӹм язычниквлӓлӓн пумы, дӓ нӹнӹ святой халам нӹллӹ кок тӹлзӹ ташкаш тӹнгӓлӹт.
3 Мӹнь кок свидетелем колтем; нӹнӹ, цаштыра мӹнер выргемӹм чиэн, тӹжем кокшӱдӹ кудлу кечӹ пророкла попаш тӹнгӓлӹт».
4 Нӹнӹ мӱлӓндӹн Йымыжы анзылны шалгышы кок олив пушӓнгӹ дӓ кок светильник ылыт.
5 Нӹнӹлӓн худам ӹштӓш шанышы лиэш гӹнь, ышмашты гӹц тыл лӓктеш дӓ тӹ тышманым пӹтӓрӓ. Кӱ нӹнӹлӓн худам ӹштӹнежӹ, тӹдӹ пуштмы лишӓшлык.
6 Пророкла попымышты годым юр [мӱлӓндӹ вӹкӹ] ӹнжӹ юр манын, пӹлгомым чӱчӓш нӹнӹн правашты улы, дӓ кынам шанат гӹнь, вӹдӹм вӹрӹш сӓртӓш дӓ мӱлӓндӹш шукы йиш эксӹкӹм колташ властьышты улы.
7 А пӓлдӹртен попен пӹтӓрӹмӹкӹштӹ, пындашдымы келгӹц гӹц лӓкшӹ зверь ваштарешӹштӹ кредӓлӓш тӹнгӓлеш, сӹнгӓ дӓ нӹнӹм пуштеш.
8 Нӹнӹн кӓпӹштӹм кого хала ӧлицӓэш кода, тӹ халажым тыштен попымы годым Содом дон Египет маныт, тӹшток мӓмнӓн Господьнамат крестеш пыдаленӹт.
9 Шукы йиш халык, йых, йӹлмӹ, вырлык гӹц лӓкшӹ эдемвлӓ кым кечӓт пелӹ колышы кӓпӹштӹм анжат дӓ шӹгерӹш пиштӓш ак пуэп.
10 Мӱлӓндӹ вӹлнӹ ӹлӹшӹвлӓ нӹнӹн колымыштылан сусу лит дӓ ӹвӹртӓт, икӹжӓк-иктӹштӹлӓн подаркавлӓм колтат, вет ти кок пророк мӱлӓндӹ вӹлнӹ ӹлӹшӹвлӓм ясыландаренӹт.
11 Но кым кечӓт пелӹштӹ пророквлӓн кӧргӹшкӹ Йымы гӹц ӹлӹмӓш шӱлӹш пырен, дӓ нӹнӹ [коктынат] ял вӹкӹ кӹньӹл шагалыныт. Нӹнӹм анжышывлӓ когон лӱдӹнӹт.
12 Пророквлӓ пӹлгом гӹц «Тишкӹ кузыда» манмы кого юк келесӹмӹм колыныт. Пророквлӓ пӹл вӹлӓн пӹлгомышкы кузенӹт, а тышманвлӓштӹ нӹнӹм анженӹт.
13 Ти жепӹн мӱлӓндӹ когон цӹтӹрнӓлтӹн, дӓ халан лушы лаштыкшы шӓлӓнен. Мӱлӓндӹ цӹтӹрнӓлтмӓшеш шӹм тӹжем эдем колен, молышты пиш когон лӱдӹнӹт дӓ пӹлгомыштышы Йымым жеплӓш тӹнгӓлӹнӹт.
14 Кокшы ойхы эртен, теве кымшы ойхы шукышты агыл толеш.
15 Шӹмшӹ Ангел пычым пуалтен. Тӹнӓм пӹлгомышты кого юквлӓ шактенӹт, нӹнӹ попенӹт:
«Сӓндӓлӹкӹштӹ кугижӓлӓнӹмӓш
мӓмнӓн Господьнан дӓ Тӹдӹн Христосшын лин!
Тӹдӹ курым-курымок кугижӓлӓнӓш тӹнгӓлеш».
16 Йымы анзылны ӹшке престолыштышты шӹнзӹшӹ коклы нӹл старец, кымык вазын, Йымылан кымалын
17 попенӹт:
«Цилӓ Кычышы Господь Йымы,
Ылшы, Лишӹ дӓ Толшашлык,
Тӹлӓнет таум ӹштенӓ:
Тӹнь Ӹшкӹметӹн кого силаэтӹм анжыктенӓт
дӓ кугижӓлӓнӓш тӹнгӓлӹнӓт.
18 Язычниквлӓ пиш когон шӹдешкенӹт,
но Тӹньӹн шӹдӹ жепет ӹнде толын.
Колышывлӓм суяш,
Тӹньӹн пророк цораэтвлӓлӓн,
святойвлӓлӓн, лӹметӹм лӱдӹн шотеш пиштӹшӹвлӓлӓн,
изилӓнӓт, коголанат, тӓрӹм пуаш
дӓ мӱлӓндӹм пӹтӓрӹшӹ эдемвлӓм пӹтӓрӓш
жеп шон».
19 Вара Йымын пӹлгомыштышы пӧртшӹ пачылтын, дӓ пӧртӹштӹжӹ Тӹдӹн согонь ковчегшӹ кайын. Валгынзыш валгалтын, юквлӓ шактенӹт, хӹдӹртӹш хӹдӹртен, мӱлӓндӹ цӹтӹрнӓлтӹн, дӓ кого шолем ылын.
1 Пӹлгомышты кого пӓлӹк кайын: кечеш вӹдӹлӓлтшӹ ӹдӹрӓмӓш, ял лӹвӓлнӹжӹ тӹлзӹ, вуйыштыжы луаткок шӹдӹрӓн вуйгӹшӹл.
2 Ӹдӹрӓмӓш мӹшкӹрӓн ылын, ӓзӓ ӹштӹмӹ карштышеш ясыланен саслен.
3 Вара пӹлгомышты вес пӓлӹк кайын: теве шӹм вуян, лу шуран, тыл гань якшар кого дракон, тӹдӹн вуйвлӓштӹжӹ шӹм диадим.
4 Тӹдӹн пачшы пӹлгомыштышы шӹдӹрвлӓ логӹц кымшы лаштыкыштым ӹштӹл нӓлӹн дӓ нӹнӹм мӱлӓндӹ вӹкӹ шӹкӓл колтен. Дракон ӓзӓм ӹштӹшӹ ӹдӹрӓмӓш анзылны шалген, ӓзӓжӹм, шачмыкыжы, качнежӹ ылын.
5 Ӹдӹрӓмӓш эргӹ ӓзӓм ӹштен, эргӹжӹ цилӓ халыкым кӹртни скипетр доно кӹтӹшӓшлык. Ти тетя Йымы докы дӓ Тӹдӹн престолжы докы нӓлмӹ ылын.
6 А ӹдӹрӓмӓш пустыньыш кыргыжын, тӹштӹ тӹдӹлӓн Йымы йӓмдӹлӹмӹ вӓр ылын, тӹштӹ тӹдӹм тӹжем кокшӱдӹ кудлу кечӹ пукшаш тӹнгӓлӹт.
7 Вара пӹлгомышты вырсы тӹнгӓлӹн: Михаил дӓ тӹдӹн Ангелвлӓжӹ дракон ваштареш шагалыныт. Дракон дӓ тӹдӹн ангелвлӓжӹ ваштарешӹштӹ кредӓлӹнӹт,
8 но сӹнген кердделыт, ӹнде нӹнӹлӓн пӹлгомышты вӓр ылде.
9 Улы сӓндӓлӹкӹм алталышы кого драконым, ӓкрӓм годшы кӹшкӹм, диавол дӓ сатана манын лӹмдӹмӹм, мӱлӓндӹ вӹкӹ сӹмӹрен шуэнӹт, сагажы ангелвлӓжӹмӓт сӹмӹренӹт.
10 Вара мӹнь кого юкым колынам, тӹдӹ пӹлгомышты попен:
«Мӓмнӓн Йымын ытарымашыжы,
силажы дӓ Кугижӓншӹжӹ,
Тӹдӹн Христосшын властьшы ӹнде толыныт,
вет мӓмнӓн шӱмбелвлӓнӓм йӓтлӹшӹм,
мӓмнӓн Йымына анзылны нӹнӹм йыдет-кечет йӓтлӹшӹм,
сӹмӹрен шумы.
11 Тӹдӹм нӹнӹ Патян вӹржӹ
дӓ ӹшке пӓлдӹртен попымы шамакышты доно сӹнгенӹт,
йӓнгӹштӹмӓт жӓлӓйӹделыт,
колашат йӓмдӹ ылыныт.
12 Тенгежӹ, пӹлгом дӓ тӹштӹ ӹлӹшӹвлӓ, ӹвӹртӹдӓ!
А мӱлӓндӹ вӹлнӹ дӓ тангыжышты ӹлӹшӹвлӓлӓн – ойхы!
Тӓ докыда диавол вален,
жепшӹ чӹдӹ ылмым пӓленӓт,
тӹдӹ пиш шӹдешкӹшӹ ылеш».
13 Ӹшкӹмжӹм мӱлӓндӹ вӹкӹ шумым ужмыкыжы, дракон эргӹ ӓзӓм ӹштӹшӹ ӹдӹрӓмӓшӹм поктен шоаш цацен.
14 Пустыньыш, пӓлдӹртӹмӹ вӓрӹш, ӹдӹрӓмӓш чонгештен кен кердшӹ манын, тӹдӹлӓн кого кучкыжын кок шылдыржым пумы: тӹштӹ, кӹшкӹ гӹц мӹндӹрнӹ, жеп, кок жеп дӓ пел жеп* тӹдӹм пукшышашлык ылыт.
15 Ӹдӹрӓмӓшӹм йогы*1 нӓнгежӹ манын, тӹдӹн паштек кӹшкӹ ышмажы гӹц рекӓ гань вӹдӹм йоктарен колтен.
16 А ӹдӹрӓмӓшлӓн мӱлӓндӹ палшен: ӹшке ышмажым пачын дӓ драконын ышмажы гӹц йоктарен колтымы рекӓм нелӹн.
17 Ӹдӹрӓмӓш вӹкӹ дракон когон шӹдешкен дӓ Йымы шӱдӹмӹм ӹштӹшӹ, Иисус Христосын пӓлдӹртен попымыжым кычышы молы тетявлӓжӹ доно кредӓлӓш кен.
*12:14 «Жеп, кок жеп дӓ пел жеп – кым иӓт пелӹ. Анжы Дан 7:25, 12:7. *12:15 Йогы – течение.1 Мӹнь тангыж сирӹштӹшӹ ошмашкы шагалынам дӓ тангыж гӹц зверьӹн лӓкмӹжӹм ужынам. Тӹдӹн шӹм вуйжы дӓ лу шуржы ылыныт, шурвлӓштӹжӹ лу диадим, а вуйвлӓштӹжӹ – Йымым мыскылымы лӹмвлӓ.
2 Мӹньӹн ужмы зверь леопард ганьы ылын, а ялжы – мӧскӓн ганьы, ышмажы – левӹн ышмажы ганьы. Дракон тӹдӹлӓн ӹшке силажым, ӹшке престолжым дӓ кого властьым пуэн.
3 Мӹнь ужынам: зверьӹн ик вуйжы паремӓш лидӹмӹн шушыргышы ылын, но кӹзӹт колышаш гань шушыржы тӧрлӓнӹшӹ. Улы мӱлӓндӹ, ӧрӹн, зверь паштек кен. Зверьлӓн властьым пушы драконлан эдемвлӓ кымалыныт
4 дӓ, зверьлӓнӓт кымалын, попенӹт: «Кӱ ти зверь гань ылеш дӓ кӱ тӹдӹн доно кредӓл кердеш?»
5 Когоэшнен дӓ Йымым мыскылен попышы ышма зверьлӓн пуалтын, тенгеок тӹдӹлӓн нӹллӹ кок тӹлзӹ ӹшке пӓшӓжӹм ӹштӓш ирӹкӹм пумы.
6 Йымым мыскылаш, Тӹдӹн лӹмжӹм, ӹлӹмӹ вӓржӹм дӓ пӹлгомышты ӹлӹшӹвлӓм вырсаш ышмажым зверь пачын.
7 Святойвлӓ ваштареш вырсым тӓрвӓтӓш дӓ нӹнӹм сӹнгӓш тӹдӹлӓн ирӹк пуалтын, тенгеок цилӓ йых, халык, йӹлмӹ дӓ вырлыквлӓм тӹдӹн кидӹшкӹжӹ пумы.
8 Мӱлӓндӹ вӹлнӹ ӹлӹшӹвлӓ, кӱвлӓн лӹмӹштӹм шӹшкӹлмӹ Патян ӹлӹмӓш книгӓштӹжӹ сӓндӓлӹк тӹнгӓлтӹш гӹцок сирӹмӹ агыл, цилӓн зверьлӓн кымалыт.
9 Кӱн пӹлӹшӹжӹ улы, колжы.
10 Кӱ пленӹш нӓнгеӓ, пленӹш вӓрештеш,
кӱ меч доно пуштеш, меч гӹц колышашлык.
Тиштӹ святойвлӓн цӹтӹмӓшӹштӹ дӓ ӹнянӹмӓшӹштӹ.
11 Мӹнь мӱлӓндӹ гӹц вес зверьӹн лӓкмӹжӹм ужынам, тӹдӹн патян гань кок шуржы ылын, дӓ дракон семӹнь попен.
12 Вес зверь пӹтӓриш зверьӹн улы властьшы доно тӹдӹ анзылны ӹштӓ, пӹтӓриш зверьлӓн, кыдын колышаш гань шушыржы тӧрлӓнен, улы мӱлӓндӹм дӓ мӱлӓндӹ вӹлнӹ ӹлӹшӹвлӓм силом кымалыкта.
13 Тӹдӹ кого пӓлӹквлӓм анжыкта, эдемвлӓ анзылны пӹлгом гӹц мӱлӓндӹш тылымат валта.
14 Зверь анзылны тӹдӹлӓн ӹштӓш пумы пӓлӹквлӓ доно мӱлӓндӹ вӹлнӹ ӹлӹшӹвлӓм алтала, меч доно шушыргышы дӓ ӹлӹшӹ кодшы зверь лӹмеш тӹдӹн сӹнжӹм ӹштӓш мӱлӓндӹ вӹлнӹ ӹлӹшӹвлӓлӓн шӱдӓ.
15 Зверьӹн сӹнжӹлӓн ӹлӹмӓш шӱлӹшӹм пырташ тӹдӹлӓн ирӹк пуалтын, седӹндон зверьӹн сӹнжӹ попашат тӹнгӓлӹн дӓ, кӱ тӹдӹлӓн кымалде, цилӓштӹм пуштыктен.
16 Изилӓн дӓ коголан, уланлан дӓ укеӓнлӓн, ирӹкӓнлӓн дӓ раблан – цилӓлӓн вургымла кидешӹштӹ ӓль лепкӓэшӹштӹ пӓлӹм шӹндӹктӓ.
17 Тенге, ти пӓлӹм – зверьӹн лӹмжӹм ӓль лӹмжӹн числажым – нӓлшӹвлӓ гӹц молыжы выжаленӓт, нӓлӹнӓт ак кердеп.
18 Тиштӹ кого ыш. Кӱн ынгылымашыжы улы, зверьӹн числажым шотлыжы: тидӹ эдемӹн числажы, тӹдӹн числажы – кудшӱдӹ кудлу кудыт.*
*13:18 Грек дӓ еврей алфавитвлӓштӹ буквавлӓ цифр дон числавлӓмӓт анжыктат.1 Мӹнь ужынам: теве Сион кырыкышты Патя шалга, Тӹдӹн доно иквӓреш шӱдӹ нӹллӹ нӹл тӹжем эдем, нӹнӹн лепкӓштӹштӹ Тӹдӹн Ӓтяжӹн лӹмжӹм сирӹмӹ.
2 Пӹлгом гӹц мӹнь шукы вӹд ружгымы, кого хӹдӹртӹш хӹдӹртӹмӹ гань юкым колынам. Колмы юкем кӓрш мастарвлӓн кӓршӹштӹм шактымы гань ылын.
3 Нӹнӹ престол анзылны, нӹл ӹлӹшӹ дӓ старецвлӓ анзылны у гань мырым мыренӹт. Мӱлӓндӹ вӹлец тӱлен нӓлмӹ шӱдӹ нӹллӹ нӹл тӹжем эдем гӹц молыжы ти мырым иктӓт мыраш тымень кердде.
4 Ти эдемвлӓ теве кӱ ылыт: нӹнӹ ӹшкӹмӹштӹм ӹдӹрӓмӓшвлӓ доно лявӹртӹделыт, нӓрӓштӓ ӹдӹр гань ире ылыт дӓ, Патя кышкы кеӓ, паштекшӹ кеӓт. Нӹнӹм Йымылан дӓ Патялан эдемвлӓ логӹц сек пӹтӓри тӱлен нӓлмӹ.
5 Попымаштышты алталымаш уке, Йымын престолжы анзылны ситӹдӹмӓш гӹц пасна ылыт.
6 Вара мӹнь пӹлгом покшалны чонгештӹшӹ эче ик Ангелӹм ужынам. Мӱлӓндӹ вӹлнӹ ӹлӹшӹвлӓлӓн, цилӓ вырлыклан, йыхлан, йӹлмӹлӓн дӓ халыклан увертӓрӓш манын, тӹдӹн курымаш Евангелижӹ ылын.
7 Тӹдӹ кого юк доно попен: «Йымы гӹц лӱддӓ, Тӹдӹм жеплӹдӓ, вет Тӹдӹн суйымы жепшӹ толын. Пӹлгомым дӓ мӱлӓндӹм, тангыжым дӓ вӹд важвлӓм Ӹштӹшӹлӓн кымалда.
8 Тӹдӹ паштек кокшы Ангел толын дӓ попен: «Сӹмӹрлен! Ӹшке шӓхӓрлӓнӹмӹжӹн шӹдӹ ӓрӓкӓжӹм цилӓ халыклан йӱктӹмӹжӹ гишӓн кого Вавилон хала сӹмӹрлен!»
9 Нӹнӹ паштек кымшы Ангел толын дӓ кого юк доно попен: «Кӱ зверьлӓн дӓ тӹдӹн сӹнжӹлӓн кымалеш дӓ тӹдӹн пӓлӹжӹм ӹшке лепкӓшкӹжӹ ӓль кидӹшкӹжӹ шӹндӹктӓ,
10 тӹдӹ Йымын шӹдӹжӹн ӓрӓкӓжӹм, вӹдӹм ярыдымы, Йымын шӹдӹжӹн цӓшкӓэшӹжӹ йӓмдӹлӹмӹ ӓрӓкӓм, йӱшӓшлык дӓ святой Ангелвлӓ дон Патя анзылны тыл дӓ сирӓ доно ясыландарымы лишӓшлык.
11 Техень эдемвлӓм ясыландарымашеш лӓкшӹ шӹкш курым-курымок кузаш тӹнгӓлеш; кӱ зверьлӓн дӓ тӹдӹн сӹнжӹлӓн кымалеш дӓ тӹдӹн лӹм пӓлӹжӹм ӹшкӹлӓнжӹ шӹндӹктӓ, техень эдем йыдымат, кечӹвӓлӹмӓт тырым ак уж.
12 Тиштӹжӹ Йымын шӱдӹмӹвлӓжӹм шоктышы дӓ Иисуслан ӹнян ылшы святойвлӓн цӹтӹмӓшӹштӹ».
13 Вара мӹнь пӹлгом гӹц юкым колынам, тӹдӹ мӹлӓм келесен: «Кӱвлӓ тилец вара Господь доно ушнымашты колат, нӹнӹ цӓшӓн ылыт манын, сирӹ». «Тенге, – Шӱлӹш попа, – нӹнӹ ӹшке пӓшӓштӹ гӹц кӓнӓт, дӓ нӹнӹн ӹштӹмӹштӹ паштекӹштӹ кеӓ».
14 Мӹнь ужынам: теве ош пӹл, пӹл вӹлнӹ Эдем Эргӹлӓ кайшы шӹнзен, вуйыштыжы шӧртньӹ вуйгӹшӹл, кидӹштӹжӹ пӹсӹ сарла.
15 Вара Йымын пӧртшӹ гӹц вес Ангел лӓктӹн дӓ пӹл вӹлнӹ шӹнзӹшӹлӓн кого юк доно сӹгӹрӓлӹн: «Сарлаэтӹм колты дӓ тӹред! Тӹредмӹ жеп толын, мӱлӓндӹ вӹлнӹ шурны поспеен».
16 Тӹнӓм пӹл вӹлнӹ шӹнзӹшӹ сарлажым мӱлӓндӹ вӹкӹ шуэн, дӓ мӱлӓндӹ тӹредмӹ лин.
17 Вара Йымын пӹлгомыштышы пӧртшӹ гӹц эче ик Ангел лӓктӹн, тӹдӹнӓт пӹсӹ сарлажы ылын.
18 Вес Ангел жертвенник гӹц лӓктӹн, тӹдӹ тыллан хоза ылын. Пӹсӹ сарлам кычышылан тӹдӹ когон чӹнь сӹгӹрӓлӹн: «Пӹсӹ сарлаэтӹм колты дӓ мӱлӓндӹ вӹлнӹшӹ виноградын арлыквлӓжӹм пӹчкедӹ, вет кӹцкӹжӹ кӱн».
19 Ангел сарлажым мӱлӓндӹ вӹкӹ шуэн, мӱлӓндӹ вӹлнӹшӹ виноград арлыквлӓм, пӹчкӹн, сокым пӹзӹрен лыкмы вӓрӹш, Йымын кого шӹдӹжӹн вӓрӹшкӹжӹ, кӹшкен.
20 Арлыквлӓжӹм хала ӧрдӹжтӹшӹ сокым пӹзӹрен лыкмы вӓрӹштӹ ташкенӹт, дӓ тӹшец йоген лӓкшӹ вӹр тӹжем кудшӱдӹ стадишкӹ* шӓрлен дӓ имни сермӹц кӱкшӹцӹш шон.
*14:20 Стади – 185 метр нӓрӹ.1 Пӹлгомышты мӹнь кого дӓ ӧрӹктӓрӹшӹ вес пӓлӹкӹм ужынам: остатка шӹм эксӹкӹм кычышы шӹм Ангел. Ти шӹм эксӹк доно Йымын шӹдӹжӹлӓн мычаш лиэш.
2 Мӹнь тылым ярымы охоницӓ тангыж ганьым ужынам. Зверьӹм дӓ тӹдӹн сӹнжӹм, пӓлӹжӹм дӓ лӹмжӹн числажым сӹнгӹшӹвлӓ охоницӓ тангыж вӹлнӹ шалгенӹт, Йымын кӓршвлӓм кыченӹт.
3 Нӹнӹ Йымын цоражы Моисейӹн мырыжым дӓ Патян мырыжым мыренӹт:
«Господь Йымы, Цилӓ Кычышы,
Тӹньӹн ӹштӹмӹ пӓшӓэт кого дӓ цӱдейӹктӹшӹ!
Святойвлӓн Кугижӓштӹ, Тӹньӹн корнет тӧр дӓ лачок!
4 Господь, кӱ вӓл Тӹнь гӹцет ак лӱд,
кӱ вӓл лӹметӹм ак лӹмлештӓрӹ?
Тӹнь иктӹ святой ылат.
Цилӓ халыквлӓ толыт
дӓ анзыланет кымал вазыт,
вет Тӹньӹн тӧр пӓшӓэт пачылтын».
5 Вара мӹнь ужынам: теве пӹлгомышты святой вӓр, свидетельствын скинижӹ, пачылтын.
6 Тӹшец шӹм эксӹкӹм кычышы шӹм Ангел лӓктӹн. Нӹнӹ йӹлгӹжшӹ ире итӹн выргемӹм чиэнӹт, онгышты йӹр шӧртньӹ ӹштӹвлӓм ӹштӓлӹнӹт.
7 Вара нӹл ӹлӹшӹ гӹц иктӹжӹ курым-курымок ӹлӹшӹ Йымын шӹдӹжӹм темӹмӹ шӹм шӧртньӹ цӓшкӓм шӹм Ангеллӓн пуэн.
8 Йымын лӹмлештӓрӓлтмӹжӹ дӓ Тӹдӹн силажы гӹц лӓкшӹ шӹкш Йымын пӧртшӹм темен, дӓ шӹм Ангеллӓн пумы шӹм эксӹклӓн мычаш лимешкӹ, тӹшкӹ иктӓт пырен кердде.
1 Вара мӹнь Йымын пӧрт гӹц шӹм Ангеллӓн кого юк доно попымым колынам: «Кедӓ дӓ Йымын шӹдӹжӹн шӹм цӓшкӓжӹм мӱлӓндӹ вӹкӹ кӹшкӓлдӓ!»
2 Пӹтӓриш Ангел кен дӓ ӹшке цӓшкӓжӹм мӱлӓндӹ вӹкӹ кӹшкӓлӹн. Тӹнӓм зверьӹн пӓлӹжӹм шӹндӹктӹшӹ дӓ тӹдӹн сӹнжӹлӓн кымалшы эдемвлӓн кӓпешӹштӹ шӱшӹ, когон ясыландарышы йӹрнӹк шушырвлӓ лӓктӹнӹт.
3 Кокшы Ангел ӹшке цӓшкӓжӹм тангыжыш кӹшкӓлӹн: вӹд колышын вӹржӹ ганьы лин, дӓ тангыжышты цилӓ йӓнгӓн колен.
4 Кымшы Ангел ӹшке цӓшкӓжӹм рекӓвлӓшкӹ дӓ вӹд важвлӓшкӹ кӹшкӓлӹн, дӓ нӹнӹ вӹрӹш сӓрнӓлтӹнӹт.
5 Мӹнь вӹд Ангелӹн попымыжым колынам:
«Господь, Тӹнь ылшы дӓ лишӹ, святой,
тенге суйымет доно тӧр ӹштенӓт.
6 Нӹнӹ святой дон пророквлӓн вӹрӹштӹм йоктаренӹт,
дӓ Тӹнь нӹнӹлӓн вӹрӹм йӱӓш пуэнӓт.
Нӹнӹ тидӹм сылен нӓлӹнӹт».
7 Мӹнь жертвенник гӹц весӹн попымыжым колынам:
«Тенге, Цилӓ Кычышы Господь Йымы,
Тӹньӹн суйымет лачок дӓ тӧр».
8 Нӹлӹмшӹ Ангел ӹшке цӓшкӓжӹм кечӹшкӹ кӹшкӓлӹн: кечӹлӓн эдемвлӓм когертӓш ирӹк пуалтын.
9 Кечӹ когон панежмӓшеш эдемвлӓ когергенӹт дӓ ти эксӹквлӓм кидӹштӹжӹ кычышы Йымын лӹмжӹм мыскыленӹт, сулыкышты гӹц карангделыт, Йымым жеплӹделыт.
10 Вӹзӹмшӹ Ангел ӹшке цӓшкӓжӹм зверьӹн престолышкыжы кӹшкӓлӹн, дӓ тӹдӹн кугижӓншӹжӹ пӹцкемӹшӓлтӹн. Эдемвлӓ парвалымышты доно йӹлмӹштӹм пырыныт,
11 ясыланымышты дӓ шушырвлӓштӹ гишӓн пӹлгомыштышы Йымым мыскыленӹт, худа пӓшӓштӹ гӹц карангделыт.
12 Кудымшы Ангел ӹшке цӓшкӓжӹм кого Евфрат рекӓш кӹшкӓлӹн. Рекӓн вӹдшӹ кошкен, тенге ирвелнӹшӹ кугижӓвлӓлӓн корны пачылтын.
13 Вара драконын ышмажы гӹц, зверьӹн ышмажы гӹц дӓ алтанзык пророкын ышмажы гӹц жавала кайшы кым худа шӱлӹш лӓкмӹм ужынам.
14 Нӹнӹ пӓлӹквлӓм анжыктышы иӓ шӱлӹш ылыт, улы сӓндӓлӹкӹн кугижӓвлӓжӹ докы лӓктӹт дӓ нӹнӹм Цилӓ Кычышы Йымын ти кого кечӹжӹн кредӓлмӓшӹш погат.
15 «Теве, вычыде, шолы семӹнь толам. Выргемжӹм перегӹшӹ дӓ амалыде вычышы эдем цӓшӓн ылеш, тӹдӹ цӓрӓн кашташ ак тӹнгӓл дӓ намысшым иктӓт ак уж.»
16 Ангел цилӓ кугижӓвлӓм еврейлӓ Армагеддон манмы вӓрӹш поген.
17 А шӹмшӹ Ангел ӹшке цӓшкӓжӹм воздухыш кӹшкӓлӹн, дӓ Йымын пӹлгомыштышы пӧртшӹ гӹц, престолжы дорц, кого юк шактен, тӹдӹ келесен: «Шокталтын!»
18 Валгынзыш валгалтын, хӹдӹртӹш хӹдӹртен, дӓ юквлӓ шактен колтенӹт, мӱлӓндӹ пиш цӹтӹрнӓлтӹн. Техень кого дӓ силан цӹтӹрнӓлтмӓш лин, маханьы мӱлӓндӹ вӹлнӹ эдем ылмы годым нигынамат ылде.
19 Кого хала кым лаштыкеш шелӹн, язычниквлӓн халавлӓштӹ шӓлӓненӹт. Пиш кого шӹдӹжӹн ӓрӓкӓжӹм йӱктӓш манын, Йымы кого Вавилон халамат ӓшӹндӓрен.
20 Цилӓ остров ямын, кырыквлӓӓт кодделыт.
21 Пӹлгом гӹц эдемвлӓ вӹкӹ талант* нӓрӹ нелӹцӓн шолем вилӹн. Шолем кандымы эксӹк гишӓн эдемвлӓ Йымым мыскыленӹт, вет эксӹкшӹ пиш кого ылын.
*16:21 Талант – нӹллӹ килограмм нӓрӹ.1 Шӹм цӓшкӓм кычышы шӹм Ангел гӹц иктӹжӹ толын дӓ мӹлӓм келесен: «Тишкӹ тол, мӹнь тӹлӓнет шукы вӹд вӹлнӹ шӹнзӹшӹ когон шӓхӓрлӓнӹшӹ ӹдӹрӓмӓшӹм суйымым анжыктем.
2 Тӹдӹн доно мӱлӓндӹ вӹлнӹшӹ кугижӓвлӓ шӓхӓрлӓненӹт, дӓ тӹдӹн шӓхӓрлӓнӹмӹжӹн ӓрӓкӓжӹ доно мӱлӓндӹ вӹлнӹ ӹлӹшӹвлӓ йӱкшӹ линӹт».
3 Вара мӹньӹм Шӱлӹш ӓвӓлтен, дӓ Ангел мӹньӹм пустыньыш нӓнген. Якшар зверь вӹлнӹ шӹнзӹшӹ ӹдӹрӓмӓшӹм ужынам, зверьӹн шӹм вуйжы дӓ лу шуржы ылын, кӓпшӹ Йымым мыскылымы лӹмвлӓ доно темӹмӹ.
4 Ӹдӹрӓмӓш шимӓлгӹ-якшаргы дӓ кӹнӓ цӹреӓн выргемӹм чиэн, шӧртньӹ, шергӓкӓн кӱвлӓ дӓ жемчугвлӓ доно цеверемдӹмӹ ылын, йӹрнӹкӹм дӓ шӓхӓрлӓнӹмӹжӹн лявӹрӓжӹм темӹмӹ шӧртньӹ цӓшкӓм кидешӹжӹ кычен.
5 Тӹдӹн лепкӓштӹжӹ шӹлтӹмӹ шанымашан лӹмӹм сирӹмӹ: «Кого Вавилон – мӱлӓндӹ вӹлнӹшӹ шӓхӓрлӓнӹшӹвлӓн дӓ йӹрнӹкӹн ӓвӓштӹ».
6 Святойвлӓн вӹрӹштӹ дӓ Иисусын свидетельвлӓжӹн вӹрӹштӹ доно йӱкшӹ лишӹ ылмыжым мӹнь ужынам. Ӹдӹрӓмӓшӹм ужмыкем, мӹнь чотымаш ӧрӹнӓм.
7 Ангел мӹлӓм келесен: «Малын тӹнь ӧрӓт? Мӹнь тӹлӓнет ти ӹдӹрӓмӓшӹн дӓ тӹдӹм намалшы шӹм вуян, лу шуран зверьӹн тайныштым келесем.
8 Тӹньӹн ужмы зверь ылын, а ӹнде уке. Тӹдӹ пындашдымы келгӹц гӹц лӓктеш дӓ пӹтӹмӓшкӹ кеӓ. Мӱлӓндӹ вӹлнӹ ӹлӹшӹвлӓ, кыдывлӓн лӹмӹштӹм сӓндӓлӹкӹм ӹштӹмӹ годшенок ӹлӹмӓш книгӓшкӹ сирӹмӹ агыл, зверьӹм ужмыкышты, ӧрӹт: ти зверь ылын, ӹнде уке, но толеш.
9 Тиштӹ кого ыш дӓ ынгылымаш келӹт. Шӹм вуй – тидӹ шӹм кырык, вӹлнӹштӹ ӹдӹрӓмӓш шӹнзӓ;
10 тенгеок тидӹ шӹм кугижӓ. Нӹнӹ логӹц вӹзӹтӹнжӹ сӹмӹрленӹт, иктӹжӹ улы, остаткажы эче толде, толмыкыжы, шукы жепеш кодшашлык агыл.
11 Ти зверь, кыды ылын дӓ ӹнде уке, тӹдӹ кӓндӓкшӹмшӹ, но ти шӹмӹт логӹц ылеш дӓ пӹтӹмӓшкӹ кеӓ.
12 Тӹньӹн ужмы лу шур – тидӹ лу кугижӓ, нӹнӹ эче ак кугижӓлӓнеп, но зверь доно иквӓреш кугижӓн властьым кӹтӹк веремӓэш нӓлӹт.
13 Нӹнӹ икышын лит: силаштымат, властьыштымат зверьлӓн пуат.
14 Нӹнӹ Патя доно кредӓлӓш тӹнгӓлӹт, дӓ Патя нӹнӹм сӹнгӓ, вет Тӹдӹ – господьвлӓн Господьышты дӓ кугижӓвлӓн Кугижӓштӹ, а Тӹдӹн доно иквӓреш ылшывлӓжӹ ӱжмӹ, айырен нӓлмӹ дӓ ӹнян ылыт».
15 Вара Ангел мӹлӓм попен: «Шӓхӓрлӓнӹшӹн шӹнзӹмӹ вӓрӹштӹ тӹньӹн ужмы шукы вӹд – тидӹжӹ халык, эдем цуца, вырлык дӓ йӹлмӹвлӓ.
16 Тӹньӹн ужмы зверьӹн лу шуржы шӓхӓрӹм ужын керддӹмӹ лит. Нӹнӹ тӹдӹм нима гӹц пасна, цӓрӓм кодат, кӓпшӹм качкыт, шӓхӓрӹм тылеш йылатат.
17 Вет Йымы ӹшкӹмжӹн шанымыжым шоктышашлыкым нӹнӹн шӱмӹшкӹ пиштен: икышын лин, Йымын шамакшы шокталтмешкӹ, кугижӓ властьыштым зверьлӓн пуаш.
18 А тӹньӹн ужмы ӹдӹрӓмӓшет улы мӱлӓндӹштӹшӹ кугижӓвлӓ вӹлнӹ кугижӓлӓнӹшӹ кого хала ылеш».
1 Тӹлец вара мӹнь пӹлгом гӹц эче ик Ангел валымым ужынам. Тӹдӹн пиш кого властьшы ылын, дӓ тӹдӹн лӹмлештӓрӓлтмӓшӹжӹ мӱлӓндӹм сотемдӓрен.
2 Ангел кого юк доно сӹгӹрӓлӹн:
«Сӹмӹрлен, кого Вавилон хала сӹмӹрлен!
Тӹдӹ иӓвлӓн ӹлӹмӹ вӓрӹштӹ,
цилӓ худа шӱлӹшӹн шӹлмӹ вӓржӹ
дӓ цилӓ йӹрнӹк дӓ йӹгӹжгӓ кекӹн шӹлмӹ вӓржӹ лин.
Вет тӹдӹ шӓхӓрлӓнӹмӹжӹн шӹдӹ ӓрӓкӓжӹм цилӓ халыклан йӱктен,
3 мӱлӓндӹ вӹлнӹшӹ кугижӓвлӓ тӹдӹн доно иквӓреш шӓхӓрлӓненӹт,
дӓ мӱлӓндӹ вӹлнӹшӹ купецвлӓ
тӹдӹн пиш мындыр ылмыжы велдӹк паенӹт».
4 Вара пӹлгом гӹц вес юкым колынам, тӹдӹ попен:
«Мӹньӹн халыкем, ти хала гӹц лӓк!
Уке гӹнь тӹдӹн сулыкышкыжы ушнет
дӓ тӹдӹн доно иквӓреш эксӹкӹш вӓрештӓт.
5 Тӹдӹн сулыкшы пӹлгом якте шон,
Йымы тӹдӹн тӧр агыл ӹштӹмӹвлӓжӹм ӓшӹндӓрен.
6 Кыце тӓлӓндӓ пуэн, тӹдӹлӓн тенгеок пуда,
ӹштӹмӹжӹлӓн кок пачаш шукырак пӧртӹлтӹдӓ.
Весӹлӓн ӓрӓкӓм ярен йӓмдӹлӹмӹ цӓшкӓэшӹжӹ
ӹшкӹлӓнжӹ кок пачаш ярен йӓмдӹлӹдӓ.
7 Маняр тӹдӹ ӹшкӹмжӹм лӹмлештӓрен дӓ мындырланен ӹлен,
тӹнӓр парвалымашым дӓ ойхым тӹдӹлӓн пуда,
вет ӹшке шӱмӹштӹжӹ тӹдӹ попа:
”Кугижӓлӓ шӹнзем, мӹнь тылык вӓтӹ ам ыл дӓ ойхымат ам уж”.
8 Седӹндон тӹдӹлӓн эксӹквлӓ ик кечӹнок толыт:
колымаш, ойхы дӓ шужымаш.
Тӹдӹ тылеш йылатымы лиэш,
вет тӹдӹм вуйнаматыш лыкшы Господь Йымы силан ылеш.
9 Вавилон хала доно шӓхӓрлӓнӹшӹ дӓ мындырланышы мӱлӓндӹ вӹлнӹшӹ кугижӓвлӓ тӹдӹн йылымы шӹкшӹжӹм анжымышты годым тӹдӹ верц ойхырен мӓгӹрӓш тӹнгӓлӹт.
10 Нӹнӹ, тӹдӹн ясыланымыжы гӹц лӱдӹн, ӧрдӹжтӹ шалгат дӓ попат:
”Ойхы, ойхы тӹлӓнет, кого хала
Вавилон, пингӹдӹ хала!
Тӹньӹм суйымаш икӓнӓштӹ толын!”
11 Мӱлӓндӹ вӹлнӹшӹ купецвлӓ тӹдӹ верц ойхырат дӓ мӓгӹрӓт, вет нӹнӹн товарыштым ӹнде иктӓт ак нӓл:
12 шӧртньӹ дон шим, шергӓкӓн кӱм, жемчугым, цевер итӹн мӹнерӹм, пӹцӓлгӹ-якшар дӓ кӹнӓ мӹнерӹм, парсыным, йиш гӹц йиш тотлы пышан пушӓнгӹм, слон лу гӹц ӹштӹмӹ йиш гӹц йиш хӓдӹрӹм, сек шергӓкӓн пушӓнгӹ, вӹргеньӹ, кӹртни, мрамор гӹц ӹштӹмӹ хӓдӹрӹм,
13 корицӹм, фимиамым, миром, ладыным, якшар ӓрӓкӓм, олив ӱм, лашашым, шӓдӓнгӹм, вольыкым, шарыкым, имним, аравам, эдем кӓпӹм дӓ йӓнгӹм.
14
”Улы йӓнгет доно нӓлӓш шанымы кӹцкет тӹнь дорцет кен.
Цилӓ яжоэт дӓ шергӹ хӓдӹрет тӹньӹн ямын,
ӹнде нӹнӹм нигынамат ат мо”.
15 Цилӓ ти товарым выжалышы, ти шӓхӓр хала велдӹк пайышы купецвлӓ, тӹдӹн парвалымыжы гӹц лӱдӹн, ойхырен-мӓгӹрен, ӧрдӹжтӹ шалгат дӓ
16 попат:
”Ойхы, ойхы тӹлӓнет, кого хала!
Тӹнь цевер итӹн выргемӹм,
пӹцӓлгӹ-якшаргым, кӹнӓм, чишӹ,
шӧртньӹ, шергӓкӓн кӱ дӓ жемчуг доно
цеверемдӹмӹ ылынат.
17 Икӓнӓштӹ техень пурлык пӹтен!”
Корабль виктӓрӹшӹ, корабль доно каштшы, корабльышты пӓшӓм ӹштӹшӹ дӓ тангыж шотеш ӹлӹшӹвлӓ цилӓн ӧрдӹжтӹ шалгенӹт
18 дӓ тӹдӹн йылымы шӹкшӹжӹм анжен сӹгӹрӓлӹнӹт: ”Ти кого хала гань вес хала улы ма?”
19 Нӹнӹ вуйышкышты пыракым шӓвенӹт дӓ ойхырен-мӓгӹрен сасленӹт:
”Ойхы, ойхы тӹлӓнет, кого хала!
Кӱн тангыж корабльжы ылын,
халан шергӓкӓн хӓдӹрвлӓжӹ доно цилӓн паенӹт,
но икӓнӓштӹ цилӓ пӹтен”.
20 Пӹлгом, святой Апостолвлӓ дӓ пророквлӓ, тӹдӹн доно ма лимӹлӓн сусу лидӓ: тӓмдӓм тӹдӹ кыце суен, тӹдӹм Йымы тенгеок суен».
21 Вара силан ик Ангел кого вӓкшкӱ гань кӱм нӓлӹн, тангыжыш шуэн колтен дӓ келесен:
«Техень сила доно кого Вавилон халаат шуэн колтымы лиэш,
ӹнде тӹдӹм ак моэп.
22 Кӓршӹм шактымым,
мырымым, шишкышым шактымым,
пычым пуалтымым тӹньӹн ӧлицӓвлӓштет ӹнде ак колеп,
кид пӓшӓштӹм ӹштӹшӹ мастарвлӓм
тиштӹ ӹнде ат мо,
вӓкш янгыштымы юкат ак шакты.
23 Халашты лампын тылжы ӹнде сотемдӓрӓш ак тӹнгӓл,
армары дон арвӓтӹн юкыштым тиштӹ ӹнде ак колеп.
Вет тӹньӹн купецвлӓэт мӱлӓндӹ вӹлнӹ тӧрӓ ылыныт,
дӓ тӹньӹн йозыланымет цилӓ халыкым самыньыш пыртен.
24 Пророк дон святойвлӓн вӹрӹштӹм,
мӱлӓндӹ вӹлнӹ цилӓ пуштмывлӓн вӹрӹштӹм
ти халашты момы».
1 Тилец вара мӹнь пӹлгом гӹц шукы халыкын гань кого юкым колынам. Тӹдӹ попен:
«Аллилуия! Ытарымаш, лӹмлештӓрӓлтмӓш, шотеш пиштӹмӓш
дӓ сила – мӓмнӓн Йымынан:
2 Тӹдӹн суйымыжы лачок дӓ тӧр,
шӓхӓрлӓнӹмӹжӹ доно мӱлӓндӹ вӹлнӹшӹ эдемвлӓм локтылшы
кого шӓхӓрӹм Тӹдӹ суен
дӓ ӹшке цоравлӓжӹн вӹрӹштӹ
йогымы верц тӹдӹм тӱлӹктен».
3 Вара угӹц сӹгӹрӓлӹнӹт:
«Аллилуия! Тӹдӹн йылымы шӹкшӹжӹ
курым-курымок куза!»
4 Коклы нӹл старец дӓ нӹл ӹлӹшӹ кымал вазыныт дӓ престолышты шӹнзӹшӹ Йымылан попенӹт:
«Аминь! Аллилуия!»
5 Престол гӹц юк лӓктӹн:
«Мӓмнӓн Йымынан цоравлӓжӹ,
Тӹдӹм лӱдӹн шотеш пиштӹшӹвлӓ,
изижӓт-когожат, цилӓн Тӹдӹм хвальыда!»
6 Вара мӹнь шукы халыкын гань, кого вӹд ружгымы гань, хӹдӹртӹш когон силан хӹдӹртӹмӹ гань юкым колынам. Тӹдӹ попен:
«Аллилуия! Цилӓ Кычышы Господь Йымы
кугижӓлӓнӓш тӹнгӓлӹн.
7 Ӹвӹртӹшӓшлык дӓ сусу лишӓшлык ылына,
Тӹдӹм жеплӹшӓшлык ылына,
вет Патян сӱӓнжӹ шон,
дӓ Тӹдӹн арвӓтӹжӹ ӹшкӹмжӹм йӓмдӹлен.
8 Тӹдӹлӓн чиӓш ире йӹлгӹжшӹ виссон* выргемӹм пумы».
Виссонжы святойвлӓн тӧр пӓшӓштӹ ылеш.
9 Ангел мӹлӓм келесен: «Сирӹ: Патян сӱӓн празныкышкыжы ӱжмӹвлӓ пуры цӓшӓн ылыт». Эче келесен: «Нинӹ Йымын лачок шамакшы ылыт».
10 Тӹнӓм мӹнь, тӹдӹлӓн кымалаш манын, ялышкыжы кымык вазынам, а тӹдӹ мӹлӓм келесен: «Анжы, тенге ит ӹштӹ! Мӹнь тӹнь донет дӓ Иисусын пӓлдӹртен попымыжым кычышы шӱмбелетвлӓ доно иквӓреш Йымылан пӓшӓм ӹштӹшӹ ылам. Йымылан кымал». А Иисусын пӓлдӹртен попымыжы пророкла шайыштмын шӱлӹшӹжӹ ылеш.
11 Мӹнь пачылтшы пӹлгомым ужынам: теве ош имни, вӹлнӹжӹ шӹнзӹшӹм Ӹнян дӓ Лачок манын лӹмдӹмӹ. Тӹдӹ тӧр суя дӓ кредӓлеш.
12 Тӹдӹн сӹнзӓжӹ – тыл салым гань, вуйыштыжы шукы диадим. Вӹлнӹжӹ лӹмӹм сирӹмӹ, ти лӹмӹм Ӹшкежӹ гӹц пасна иктӓт ак пӓлӹ.
13 Тӹдӹ вӹреш якшаргышы выргемӓн ылын, дӓ Тӹдӹн лӹмжӹ – Йымын Шамакшы.
14 Ош ире виссон выргемӓн пӹлгомыштышы салтаквлӓ, ош имним кышкыжын, паштекшӹ кенӹт.
15 Ышмажы гӹц пӹсӹ меч лӓктӹн, тӹдӹн доно халыквлӓм шин шӓлӓтӹшӓшлык ылын. Нӹнӹм Тӹдӹ кӹртни скипетр доно кӹтӓш тӹнгӓлеш, виноград сокым пӹзӹрен лыкмы вӓрӹштӹ Цилӓ Кычышы Йымын пиш кого шӹдӹжӹн ӓрӓкӓжӹм ташкен ӹштӓ.
16 Тӹдӹн выргемӹштӹжӹ дӓ ӓрдӹштӹжӹ «Кугижӓвлӓн Кугижӓштӹ, господьвлӓн Господьышты» манын сирӹмӹ лӹм улы.
17 Мӹнь кечӹштӹ шалгышы ик Ангелӹм ужынам. Пӹлгом покшалны чонгештӹлшӹ кеквлӓлӓн тӹдӹ кого юк доно сӹгӹрӓлӹн: «Толда, Йымын кого вады качкышышкыжы погыныда!
18 Кугижӓвлӓн кӓпӹштӹм, салтак вуйлатышывлӓн кӓпӹштӹм, силанвлӓн кӓпӹштӹм, имнивлӓн дӓ имниэшкӹвлӓн кӓпӹштӹм, цилӓ ирӹкӓнвлӓн дӓ рабвлӓн, изивлӓн дӓ коговлӓн кӓпӹштӹм качда!»
19 Вара мӹнь зверьӹн, мӱлӓндӹ вӹлнӹшӹ кугижӓвлӓн дӓ нӹнӹн салтаквлӓштӹн погынымыштым ужынам. Нӹнӹ имни вӹлнӹ Шӹнзӹшӹ доно дӓ тӹдӹн салтаквлӓжӹ доно кредӓлӓш йӓмдӹлӓлтӹнӹт.
20 Но зверьӹм роалтен кыченӹт, тӹдӹ анзылны пӓлӹквлӓм анжыктышы алтанзык пророкымат сагажы кыченӹт. Пӓлӹквлӓжӹ доно тӹдӹ зверьӹн пӓлӹжӹм нӓлшӹвлӓм дӓ зверьӹн сӹнжӹлӓн кымалшывлӓм алтален. Когыньыштымат сирӓ йылымы тылан йӓрӹш ӹлӹшӹнек шумы.
21 А молыштым имни вӹлнӹ Шӹнзӹшӹн ышмажы гӹц лӓкшӹ меч доно пуштмы, дӓ кеквлӓ, нӹнӹн колышы кӓпӹштӹм качкын, цилӓн темӹнӹт.
*19:8 Виссон – итӹн мушын сек вӹцкӹж дӓ сек яжо йӓрӹмжӹ.1 Мӹнь пӹлгом гӹц Ангел валымым ужынам, тӹдӹн кидӹштӹжӹ пындашдымы келгӹцӹн сыравачшы дӓ кого цеп ылын.
2 Ангелжӹ драконым – диавол дон сатана ылшы ӓкрӓм годшы кӹшкӹм – кычен, тӹдӹм тӹжем иэш цеплен шӹнден
3 дӓ пындашдымы келгӹцӹш шуэн, тӹдӹн ӓнгжӹм питӹрен, вӹлӓнжӹ шӹштӹ пецӓтӹм темдӓлӹн. Тенгелӓ дракон, тӹжем и эртӹмешкӹ, ӹнде халыквлӓм алтален ак керд. Тӹлец вара тӹдӹ кӹтӹк жепеш ирӹкӹш лыкмы лишӓшлык.
4 Мӹнь престолвлӓм дӓ тӹштӹ шӹнзӹшӹвлӓм ужынам, нӹнӹлӓн суяш властьым пумы ылын. Иисусын пӓлдӹртен попымыжы дӓ Йымын шамакшы верц вуйыштым роал шумывлӓн йӓнгӹштӹм ужынам. Нӹнӹ зверьлӓнӓт, тӹдӹн сӹнжӹлӓнӓт кымалделыт, тӹдӹн пӓлӹжӹм лепкӓэшӹштӹ ӓль кидешӹштӹ шӹндӹктӹделыт. Нӹнӹ ӹлӹжӹнӹт дӓ Христос доно иквӓреш тӹжем и кугижӓлӓненӹт.
5 Молы колышыжы тӹжем и эртӹмешкӹ ӹлӹжделыт. Тидӹ – пӹтӓриш ӹлӹжмӓш.
6 Пӹтӓриш ӹлӹжмӓш годым ӹлӹмӓшӹм нӓлшӓшлыквлӓ цӓшӓн дӓ святой ылыт: вӹлнӹштӹ кокшы колымашын властьшы ак ли, нӹнӹ Йымын дӓ Христосын священникӹштӹ лит дӓ Тӹдӹн доно иквӓреш тӹжем и кугижӓлӓнӓш тӹнгӓлӹт.
7 Ти тӹжем и эртӹмӹкӹ, сатана ӹшке кызаматшы гӹц ирӹкӹш лыкмы лиэш. Тӹдӹ мӱлӓндӹн нӹл монгырыштыжат ӹлӹшӹ халыквлӓм, Гог дон Магогым, алталаш лӓктеш. Тӹдӹ нӹнӹм вырсыш пога, а нӹнӹн шотышты тангыж ошма пӹрцӹк нӓрӹ.
8 Нӹнӹ улы мӱлӓндӹ кымдыкеш шӓрленӹт, святойвлӓн ӹлӹмӹ вӓрӹштӹм дӓ яратымы халам ӓрен нӓлӹнӹт,
9 но пӹлгом гӹц Йымы дорц тыл вален дӓ нӹнӹм пӹтӓрен.
10 Нӹнӹм алталышы диаволым йылышы сирӓӓн йӓрӹш шуэнӹт, тӹшкок андакшы зверьӹм дӓ алтанзык пророкым шуэнӹт. Тӹштӹ нӹнӹ йыдет-кечет курым-курымок парвалтарымы лит.
11 Мӹнь кого ош престолым дӓ тӹштӹ Шӹнзӹшӹм ужынам. Тӹдӹн шӹргӹвӹлӹшӹжӹ дорц мӱлӓндӹ дон пӹлгом карангыныт – нӹнӹлӓн вӓр ылде.
12 Мӹнь колышывлӓм изимӓт, когомат ужынам, нӹнӹ Йымы анзылны шалгенӹт. Книгӓвлӓм пачыныт. Эче вес книгӓм пачыныт, тидӹ – ӹлӹмӓш книгӓ. Колышывлӓ книгӓвлӓэш сирӹмӹ негӹцеш ӹшке пӓшӓштӹ семӹнь суялтыныт.
13 Тангыжат колышывлӓжӹм пуэн, колымаш дон адат колышывлӓштӹм пуэнӹт. Каждый пӓшӓжӹ семӹнь суялтын.
14 Вара колымашымат, адымат тылан йӓрӹш шумы. Тидӹ – кокшы колымаш.
15 Кӱн лӹмжӹм ӹлӹмӓш книгӓштӹ сирӹмӹм моделыт, тӹдӹм тылан йӓрӹш шуэнӹт.
1 Вара мӹнь у пӹлгом дон у мӱлӓндӹм ужынам. Первиш пӹлгом дон первиш мӱлӓндӹ пӹтенӹт, тангыжат ӹнде уке.
2 Мӹнь, Иоанн, святой халам, у Иерусалимӹм, ужынам. Тӹдӹ армарыжылан цеверемдӹмӹ арвӓтӹ семӹнь йӓмдӹлӹмӹ ылын дӓ пӹлгом гӹц Йымы дорц вален.
3 Пӹлгом гӹц кого юкым колынам, тӹдӹ попен: «Теве, Йымын ӹлӹмӹ вӓржӹ ӹнде эдемвлӓ лошты. Тӹдӹ сагашты ӹлӓш тӹнгӓлеш, нӹнӹ Тӹдӹн халыкшы лит, Йымы, нӹнӹн Йымышты, Ӹшкеок нӹнӹ лошты лиэш.
4 Йымы сӹнзӓштӹ гӹц улы сӹнзӓвӹдӹштӹм ӹштӹлеш. Ӹнде колымаш ак ли, ойхат, мӓгӹрӹмӓт, карштымат ак ли, вет первишӹ эртен.
5 Престолышты Шӹнзӹшӹ келесен: «Теве, Мӹнь цилӓок ум ӹштем». Вара манын: «Сирен нӓл, вет ти шамаквлӓ лачок дӓ ӹнян ылыт».
6 Эче мӹлӓм попен: «Шокталтын. Мӹнь Альфа дӓ Омега, Тӹнгӓлтӹш дӓ Мычаш ылам. Мӹнь йӱмӹжӹ шошылан ӹлӹшӹ вӹдӓн вӹдсӹнзӓ гӹц йӱӓш йӓрӓ пуэм.
7 Сӹнгӹшӹ цилӓ тидӹм Мӹнь гӹцем нӓлеш, а Мӹнь тӹдӹн Йымыжы лиӓм, тӹдӹ Мӹньӹн эргем лиэш.
8 Но лӱдшӹ, ӹнянӹмӓш гӹц карангшы, йӹрнӹк, эдем пуштшы, шӓхӓрлӓнӹшӹ дон йозывлӓн, идолвлӓлӓн кымалшывлӓн дӓ алталышывлӓн цилӓштӹн вӓрӹштӹ – сирӓ йылымы тылан йӓр. Тидӹ – кокшы колымаш».
9 Остатка шӹм эксӹкӹм темӹмӹ шӹм цӓшкӓм кычышы шӹм Ангел гӹц иктӹжӹ толын дӓ мӹлӓнем келесен: «Тол, мӹнь тӹлӓнет ӹдӹрӹм, Патян арвӓтӹжӹм, анжыктем».
10 Мӹньӹм Шӱлӹш ӓвӓлтен дӓ Ангел мӹньӹм кого дӓ кӱкшӹ кырыкыш нӓнген, пӹлгом гӹц Йымы дорц валышы кого халам, святой Иерусалимӹм, мӹлӓм анжыктен.
11 Йымын лӹмлештӓрӓлтмӹжӹн сотыжы тӹдӹн улы, сек шергӓкӓн кӱ семӹнь, хрусталь гань вашт кайшы яспис кӱ семӹнь ти хала валгалтын.
12 Хала йӹр кого дӓ кӱкшӹ стенӓ улы, тӹштӹ – луаткок капка, сагашты – луаткок Ангел. Капкавлӓэш лӹмвлӓм сирӹмӹ, тидӹ Израиль эргӹвлӓн луаткок йыхын лӹмвлӓштӹ.
13 Ирвел монгырышты кым капка, йыдпелвел монгырышты кым капка, кечӹвӓлвел монгырышты кым капка дӓ вадывел монгырышты кым капка.
14 Халан стенӓжӹн луаткок негӹцшӹ улы, дӓ тӹштӹ – Патян луаткок Апостолжын лӹмӹштӹ.
15 Мӹнь донем попышы Ангелӹн халам дӓ тӹдӹн капкавлӓ дон стенӓжӹм висӓш шӧртньӹ пандыжы ылын.
16 Хала нӹл оголан ылеш, тӹдӹн кытшы торешӹжӹ ганьок. Ангел пандыжы доно халам висен, висӹмӹжӹ луаткок тӹжем стади лин: тӹдӹн кытшы, торешӹжӹ дӓ кӱкшӹцшӹ иканьы.
17 Вара стенӓм висен, эдемӹн висӓжӹ доно тӹдӹ шӱдӹ нӹллӹ нӹл кӹнер лин, Ангелӹнӓт висӓжӹ техеньок.
18 Стенӓжӹм яспис доно ӹштӹмӹ, а халажы ире охоницӓ ганьы ире шӧртньӹ ылын.
19 Халан стенӓ негӹцвлӓжӹм йиш гӹц йиш шергӓкӓн кӱ доно цеверемдӹмӹ: пӹтӓриш негӹц – яспис, кокшы – сапфир, кымшы – халкидон, нӹлӹмшӹ – смарагд,
20 вӹзӹмшӹ – сардоникс, кудымшы – сердолик, шӹмшӹ – хризолит, кӓндӓкшӹмшӹ – вирилл, ӹндекшӹмшӹ – топаз, лушы – хризопрас,* луатикшӹ – гиацинт, луаткокшы – аметист.
21 А луаткок капка луаткок жемчуг ылын: каждый капкажы – ик жемчуг. Халан ӧлицӓжӹ – вашт кайшы охоницӓ гань ире шӧртньӹ.
22 Мӹнь халашты Йымын пӧртшӹм ужделам, вет Йымын тиштӹшӹ пӧртшӹ – тидӹ Цилӓ Кычышы Господь Йымы дӓ Патя.
23 Халам сотемдӓрӓш кечӓт, тӹлзӓт ак кел: Йымын лӹмлештӓрӓлтмӹжӹ тӹдӹм сотемдӓрӓ; тӹдӹн валгалтарышыжы – Патя.
24 Ти халан сотыштыжы ытарымы халыквлӓ ӹлӓш тӹнгӓлӹт. Мӱлӓндӹ вӹлнӹшӹ кугижӓвлӓ ма доно лӹмлештӓрӓлтмӹштӹм дӓ сек яжо пайдаштым тӹшкӹ кандат.
25 Капкавлӓжӹм кечӹвӓлӹн питӹрӓш ак тӹнгӓлеп, а йыд тӹштӹ ак ли.
26 Тӹшкӹ халыквлӓ ма доно лӹмлештӓрӓлтмӹштӹм дӓ сек яжо пайдаштым кандат.
27 Тӹшкӹ нимат яктаралтшы, акъярым ӹштӹшӹ дӓ алталышы иктӓт ак пыры. Патян ӹлӹмӓш книгӓшкӹжӹ сирӹмӹвлӓ веле тӹшкӹ пырат.
*21:19-20 Кӹзӹт ти кӱвлӓ гӹц южыштым вес семӹнь лӹмдӓт: яспис – яшма, халкидон – халцедон, смарагд – изумруд, вирилл – берилл, хризопрас – хризопраз.1 Вара Ангел мӹлӓнем ӹлӹмӓш вӹдӹн ире рекӓжӹм анжыктен, тӹдӹ – хрусталь гань йӹлгӹжшӹ, Йымын дӓ Патян престолышты гӹц лӓктеш.
2 Халан ӧлицӓжӹ покшалны дӓ рекӓн кок монгырыштыжат – ӹлӹмӓш пушӓнгӹ. Тӹдӹ иэш луаткок гӓнӓ кӹцкӹм пуа, тӹлзӹ йӹде кӹцкӹжӹм канда, а пушӓнгӹн ӹлӹштӓшӹжӹ халыквлӓм паремдӓ.
3 Нимат проклинӓйӹмӹ ӹнде ак ли. Тӹштӹ Йымын дӓ Патян престолышты лиэш, дӓ цоравлӓжӹ Йымылан служаш тӹнгӓлӹт.
4 Нӹнӹ Тӹдӹн лицӓжӹм ужыт, дӓ Тӹдӹн лӹмжӹ нӹнӹн лепкӓштӹштӹ лиэш.
5 Йыд тӹштӹ ак ли, дӓ нӹнӹлӓн светильник ӓль кечӹ соты ак кел: Господь Йымы нӹнӹм сотемдӓрӓш тӹнгӓлеш, дӓ нӹнӹ курым-курымок кугижӓлӓнӓш тӹнгӓлӹт.
6 Ангел мӹлӓм попен: «Ти шамаквлӓ ӹнян дӓ лачок ылыт. Шукышты агыл ма лишӓшлыкым цоравлӓжӹлӓн анжыкташ манын, святой пророквлӓн Господь Йымышты ӹшке Ангелжӹм колтен».
7 «Теве шукышты агыл толам. Ти книгӓштӹшӹ пророкла попымы шамакым шоктышы пуры цӓшӓн ылеш».
8 Мӹнь, Иоанн, цилӓ тидӹм ужынам дӓ колынам. А ужмыкем дӓ колмыкем, цилӓ тидӹм анжыктышы Ангелӹн ялышкыжы кымал вазынам,
9 но Ангел мӹлӓнем келесен: «Анжы, тенге ит ӹштӹ! Мӹнь тӹнь донет, пророк шӱмбелетвлӓ дӓ ти книгӓштӹшӹ шамакым шоктышы цилӓ эдем доно иквӓреш служышы ылам. Йымы анзылан кымал вац».
10 Тӹдӹ мӹлӓм келесен: «Ти книгӓштӹшӹ пророкла попымы шамакым ит шӹлтӹ, вет шокталтмы жеп лишемӹн.
11 Тӧр агыл ӹштӹшӹ пакылажат тӧр агылым ӹштӹжӹ, ярдымы эчеӓт ярдымым ӹштӹжӹ. Тӧр ӹштӹшӹ анзыкыжымат тӧрӹм ӹштӹжӹ, святой святойок кодшы.
12 Теве мӹнь шукышты агыл миэм, тӓрӹм сагаэм кандем, каждыйлан пӓшӓжӹ семӹнь пуэм.
13 Мӹнь Альфа дӓ Омега, Тӹнгӓлтӹш дӓ Мычаш, Пӹтӓришӹ дӓ Остатка ылам.
14 Тӹдӹн шӱдӹмӹжӹм ӹштӹшӹвлӓ цӓшӓн ылыт: нӹнӹн ӹлӹмӓш пушӓнгӹ гӹц качкаш дӓ халашкы капка гӹц пыраш правашты лиэш.
15 А пи дон йозывлӓ, шӓхӓрлӓнӹшӹвлӓ, эдем пуштшывлӓ, идолвлӓлӓн кымалшывлӓ – алталымашым яратышывлӓ дӓ алталышывлӓ цилӓн тӱӓн кодыт.
16 Мӹнь, Иисус, тӓлӓндӓ церкӹвлӓштӹ тидӹ гишӓн пӓлдӹртен попаш Ӹшке Ангелем колтенӓм. Мӹнь Давидӹн важшы дӓ йыхшы ылам, ирокшы соты шӹдӹр ылам».
17 Шӱлӹшӓт, арвӓтӓт попат: «Тол!» Кӱ тидӹм колеш, тӹдӓт попыжы: «Тол!» Кӱн йӱмӹжӹ шоэш, толжы, кӱ ӹлӹмӓш вӹдӹм нӓлнежӹ, йӓрӓ нӓлжӹ.
18 Кӱ ти книгӓштӹшӹ пророкла келесӹмӹ шамаквлӓм колеш, мӹнь цилӓштӹлӓн пӓлдӹртен попем: иктӓжӹ ти шамаквлӓш иктӓ-мам привая гӹнь, тӹ эдемлӓн Йымы ти книгӓштӹ сирӹмӹ эксӹквлӓм привая.
19 А иктӓжӹ пророкла попымы ти книгӓштӹшӹ шамаквлӓ гӹц иктӓ-мам карангда гӹнь, Йымы тӹдӹн лӹмжӹм ӹлӹмӓш книгӓ гӹц карангда, святой халашкы ак пырты дӓ, мам ти книгӓштӹ сирӹмӹ, тӹдӹлӓн нимат ак пу.
20 Тидӹм Пӓлдӹртен Попышы келесӓ: «Лачокок шукышты агыл толам!» Аминь. Тенге, тол, Господь Иисус!
21 Мӓмнӓн Господь Иисус Христосын благодатьшы цилӓдӓ доны лижӹ. Аминь.