1 Мӹнь, Павел, Йымын цоражы дӓ Иисус Христосын Апостолжы, тӹлӓт шӓлӓм колтем. Йымы айырен нӓлмӹ эдемвлӓлӓн Христослан ӹнянӓш дӓ лачокым пӓлен нӓлӓш палшаш мӹнь колтымы ылам, ти лачокшы Йымым шотеш пиштен ӹлӹмӹм шачыкта.
2 Тенге нӹнӹ курымаш ӹлӹмӓшӹм уанен вычен кердӹт. Тӹдӹм Йымы сӓндӓлӹкӹм ӹштӹмӹ яктеок сӧрен, а Йымы нигынамат ак алталы.
3 Ӹшке жепӹштӹжӹ Тӹдӹ увертӓрен тымдымаш гач шамакшым пӓлдӹртен, а Йымын, мӓмнӓн Ытарышынан, шӱдӹмӹжӹ доно ти пӓшӓм мӹлӓм ӹнянен пумы.
4 Тит, ӹнянӹмӓшнӓ иктӹ ылешӓт, тӹнь туан эргӹм гань линӓт. Тӹлӓт Йымы Ӓтя дӓ мӓмнӓм Ытарышы Господь Иисус Христос гӹц благодать, жӓлӓйӹмӓш дӓ тыр лижӹ!
5 Ӹштӹшӓшлык пӓшӓнӓм мычашкы шокташ дӓ цилӓ халавлӓштӹ пресвитервлӓм мӹнь шӱдӹмем семӹнь шагалташ манын, мӹнь тӹньӹм Критеш коденӓм.
6 Пресвитервлӓ йӓтлӓш лидӹмӹ, ик гӓнӓ веле ӹдӹрӹм нӓлшӹ лишӓшлык ылыт. Тетявлӓштӹ Йымылан ӹнянӹшӹ лиштӹ, шотдымы кайыш дӓ шамакым колыштдымы гишӓн ӹнжӹштӹ вырсалтеп.
7 Йымын церкӹлӓн пӓшӓм ӹштӓш епископлан ӹнянен пумы, седӹндон тӹдӹ йӓтлӓш лидӹмӹ лишӓшлык. Тӹдӹ ӹшке шанымыжы семӹнь ӹштӹлшӹ, йӹле шӹдешкӹшӹ, ӓрӓкӓм йӱӓш яратышы, кредӓл каштшы, ӹшкӹлӓнжӹ пайдам кӹчӓлшӹ ӹнжӹ ли,
8 а корныгешӹвлӓлӓн палшышы, пурым яратышы, ышан-шотан, тӧр ӹштӹшӹ, Йымым шотеш пиштӹшӹ дӓ ӹшкӹмжӹм кычен мыштышы лижӹ.
9 Епископ тымдымашын ӹнян шамакшым пингӹдӹн кычышашлык. Тӹнӓм тӹдӹ эдемвлӓм шотан тымдымаш доно виктӓрен дӓ ваштареш шалгышывлӓн самынь шанымыштым анжыктен кердеш.
10 Вет шамак колыштдымы, такешӹм попен каштшы дӓ алталышы, айыртемӹнок пӹчмӓнвлӓ лошты, шукы.
11 Нӹнӹн ышмаштым питӹрӓш келеш. Намысланыде, ӹшкӹлӓнӹштӹ пайдам нӓлӓш манын, акелӹм тымден, семнявлӓм цилӓге лыгат.
12 Нӹнӹ логӹц иктӹжӹ, ӹшкӹмӹштӹнок пророкышты, келесен:
«Соок алталышы, шӹдӹ зверь,
ялахай шык мӹшкӹрвлӓ ылыт критянвлӓ».
13 Тӹдӹн пӓлдӹртен попымыжы лачок ылеш. Седӹндон нӹнӹлӓн пингӹдӹн пелештӹ, нӹнӹ шотан ӹнянӹмӓшӹм перегӹштӹ,
14 иудейвлӓн шанен лыкмы шамак-ямакыштым дӓ лачок гӹц карангшывлӓн шӱдӹмӹштӹм шотыш ӹнжӹштӹ нӓлеп.
15 Иревлӓлӓн цилӓ ире, а яктаралтшы дӓ ӹнянӹдӹмӹвлӓлӓн ире нимат уке, нӹнӹн ышыштат, совестьӹштӓт яктаралтыныт.
16 Нӹнӹ Йымым пӓленӓ маныт, но цилӓ пӓшӓштӹ доно Йымым пӓлӹдӹмӹштӹм анжыктат, йӹрнӹк дӓ шамак колыштдымы, нимахань пурым ӹштен мыштыдымы ылыт.
1 А тӹнь шотан тымдымаш семӹнь попы.
2 Ӹлӓлшӹ пӱэргӹвлӓм ары вуян, жеплӹмӹ, ышан-шотан, ӹнянӹмӓштӹ, яратымашты, тырхымашты толкан лиӓш тымды.
3 Тенгеок ӹлӓлшӹ ӹдӹрӓмӓшвлӓӓт, святойвлӓлӓн кыце олмыдеш, тенге чиштӹ,* ӓляклен каштшы, ӓрӓкӓн цоражы ӹнжӹштӹ лиэп, пуреш веле тымдышты.
5 (4-5) Нӹнӹ сӓмӹрӹк ӹдӹрӓмӓшвлӓм марыштым, тетяштӹм яраташ, ышан-шотан, ире, тонышы пӓшӓм яжон ӹштӹшӹ, пуры, ӹшке марыштым колыштшы лиӓш тымдышты. Йымын шамакшы ӹнжӹ мыскылалт.
6 Тенгеок ӹрвезӹвлӓм ышан-шотан лиӓш кымылангды,
7 ӹшке пуры пӓшӓэт доно цилӓ шотыштат кыце тӧр ӹлӓш келмӹм анжыкты. Тымдымет ире, шотеш пиштӹмӓшӹм лыкшы, локтылалтдымы лижӹ.
8 Попымет кынан лижӹ, вырсаш вирӹм ӹнжӹ пу, тӹнӓм ваштареш шалгышывлӓ мӓ гишӓннӓ нимамат худам келесен ак кердеп, намысыш пырат.
9 Рабвлӓм хозаштым цилӓ шотыштат колышташ, ярал лиӓш тымды, ваштареш ӹнжӹштӹ попеп,
10 ӹнжӹштӹ шолыштеп, со пуры дӓ ӹнян лиштӹ, тенге нӹнӹ Ытарышынан, Йымынан, тымдымыжым цилӓ шотыштат кӱшкӹ лӱктӓт.
11 Йымын ытарышы благодатьшы цилӓ эдемлӓн пачылтын.
13 (12-13) Ӹнянӹмӹ пуры цӓшӹм ‒ Кого Йымын, мӓмнӓм Ытарышы Иисус Христосын лӹмлештӓрӓлтмӹжӹ толмым ‒ вычымына годым благодать мӓмнӓм, Йымым шотлыдымаш дӓ сӓндӓлӹкӹштӹшӹ сулыкан шыкланымаш гӹц карангын, кӹзӹтшӹ курымышты ире ыш доно, тӧр, Йымым шотеш пиштен ӹлӓш тымда.
14 Мӓмнӓм цилӓ худа пӓшӓ гӹц ытараш, Ӹшкӹлӓнжӹ халыкым ирӹктӓш манын, Иисус Христос Ӹшкӹмжӹм мӓ верцнӓ пуэн. Ти халык пуры пӓшӓм пиш цацен ӹштӓ.
15 Тидӹм попы, кӓнгӓшӹм пу, улы властетӹм кычылтын пелештӹ. Иктӓт тӹньӹм шотлыдымы ӹнжӹ ли.
*2:3 «Святойвлӓлӓн кыце олмыдеш, тенге чиштӹ»: тидӹм «ӹлӹмӓшӹштӹм Йымылан свящӓен пушы эдемвлӓ семӹнь ӹшкӹмӹштӹм кычышты» манынат сӓрӓш лиэш.1 Вуйлатышывлӓн дӓ тӧрӓвлӓн шамакыштым колыштышты, ӹнжӹштӹ торешлӓнеп, керек-махань пуры пӓшӓмӓт ӹштӓш со йӓмдӹ лиштӹ манын, ӹнянӹшӹвлӓлӓн ӓшӹндӓрӹктӹ.
2 Иктӹн гишӓнӓт худам ӹнжӹштӹ попеп, ӹнжӹштӹ соредӓлеп, йӹвӹжӓ, цилӓ доно пуры кымылан лиштӹ.
3 Андак мӓӓт шанен мыштыдымы, шамак колыштдымы, ямшы, сулыкан кымылын дӓ кыце-шон мындырланымын цорашты ылынна, худам ӹштен дӓ завидуен ӹленнӓ, йӹрнӹк дӓ икӹжӓк-иктӹнӓм ужын керддӹмӹ ылынна.
4 А кынам мӓмнӓм Ытарышы Йымын пурыжы дӓ эдемӹм яратымыжы пачылтын,
5 мӓмнӓн ӹштӹмӹ тӧр пӓшӓнӓ гишӓн агыл, а угӹц шачыктышы мышмаш дӓ Святой Шӱлӹш доно уэмдӹмӓш гач Тӹдӹ ӹшке пурыжы доно мӓмнӓм ытарен.
6 Иисус Христос Ытарышына гач Святой Шӱлӹшӹм вӹкӹнӓ Йымы кукырланыде опталын.
7 Тенге мӓ, Тӹдӹн благодатьшы доно тӧрӹш лыкмывлӓ, ӹнянен вычымы курымаш ӹлӹмӓшӹм нӓлӹн кердӹнӓ.
8 Ти шамак тӧр. Тӹлӓт теве мам ӹштӓш шӱдӹнем: тидӹм ӹняндӓрен пингӹдемдӹ. Йымылан ӹнянӓш тӹнгӓлшӹвлӓ пуры пӓшӓм соок ӹштӹштӹ. Тидӹжӹ эдемвлӓлӓн яжо дӓ керӓл ылеш.
9 Но шотдымы кӹрмӓшӹмӓш, роды-шачышым пыргедмӓш, соредӓлмӓш дӓ закон гишӓн икӓнӓ-иктӹ ваштареш шалгымаш гӹц каранг, тидӹ нимахань пайдам ак пу, керӓлжӓт уке.
10 Ик гӓнӓ дӓ вес гӓнӓ шижтӓрӹмӹкет, лоштыда пайылалтмашым ӹштӹшӹ эдем дорц каранг.
11 Тӹнь пӓлет: техень эдем локтылалтын, тӹдӹ сулыкым ӹштӓ, ӹшке вӹкӹжӹ суйымашым канда.
12 Кынам тӹнь докет Артемам ӓль Тихикӹм колтем, мӹнь докем Никопольыш йӹлерӓк тол, тӹштӹ мӹнь телӹм эртӓрӓш шанем.
13 Законым тымдышы Зинам дӓ Аполлосым корныш яжон йӓмдӹлӹ, нӹнӹлӓн ма келеш, цилӓ лижӹ.
14 Мӓмнӓнвлӓӓт, кӹцкӹдӹмӹ лиӓш агыл манын, палшык келмӹ годым пуры пӓшӓм пиш цацен ӹштӓш тыменьӹштӹ.
15 Мӹнь сагаэм ылшывлӓ цилӓн тӹлӓт шӓлӓм колтат. Мӓмнӓм ӹнянӹмӓшӹштӹ яратышывлӓлӓн шӓлӓм келесӹ. Цилӓдӓ доны благодать лижӹ. Аминь.