1 Иисус Христос доно ушнымашты сӧрӹмӹ ӹлӹмӓшӹм увертӓрӓш колтымы, Йымын шанымыжы семӹнь Иисус Христосын Апостолжы лишӹ Павел дорц
2 яратымы Тимофей эргӹжӹлӓн. Йымы Ӓтя дӓ мӓмнӓн Господьна Христос Иисус дорц тӹлӓнет благодать, жӓлӓйӹмӓш дӓ тыр лижӹ.
3 Мӹнь Йымылан таум ӹштем ‒ Тӹдӹлӓн ӓтя-тьотяэмвлӓ семӹньок ире совесть доно служем ‒ дӓ йыдет-кечет ыдылмем годым тӹньӹм со ӓшӹндӓрем.
4 Мӹнь сӹнзӓвӹдетӹм ӓштем, тӹньӹм ужмем шоэш, ужмыкем, йӓнгем сусу доно темеш.
5 Йӓнг вашт ӹнянӹмӓшетӹм мӹнь ӓштем. Андак Лоида папат дон Евника ӓвӓтӹн шӱмӹштӹштӹ техеньок ӹнянӹмӓш ылын, дӓ мӹнь пингӹдӹн пӓлем: тӹдӹ тӹньӹн кӧргӹштетӓт ӹлӓ.
6 Седӹндон тӹлӓнет ӓшӹндӓрӹктем: вӹкет кидӹм пиштӹмем годым Йымы гӹц нӓлмӹ мыштымашетлӓн йӧрӓш ит пу.
7 Йымы мӓлӓннӓ лӱдмӓшӹн шӱлӹшӹжӹм агыл, а силан, яратымашын дӓ ышан-шотан ӹлӹмӓшӹн шӱлӹшӹжӹм пуэн.
8 Тенгежӹ, мӓмнӓн Господьна [Иисус Христос] гишӓн пӓлдӹртен попымы гӹцӓт, мӹнь гӹцемӓт ‒ Тӹдӹ верц питӹрӹмӓштӹ шӹнзӹшӹ гӹц – ит намысланы, а [Христосын] Пуры Увержӹ верц нелӹм цӹтӹмӓшкӹ Йымын пумы сила доно мӹнь сагаэм ушны.
9
Тӹдӹ мӓмнӓм ытарен
дӓ святой ӹлӹмӓшӹшкӹ ӱжӹн.
Тидӹм мӓмнӓн пӓшӓнӓ гишӓн агыл,
а анзыцок шанен пиштӹмӹжӹ дӓ благодатьшы велдӹк ӹштен,
благодатьшым жеп тӹнгӓлмешкок мӓлӓннӓ
Христос Иисус гач анжыктен.
10 Благодатьшы кӹзӹт мӓмнӓм ытарышы
Иисус Христосын толмыжы гач пачылтын.
Тӹдӹ колымашым пӹтӓрен,
Пуры Увер гач ӹлӹмӓшӹм дӓ колыдымашым пачын анжыктен.
11 Ти Пуры Уверӹн увертӓрӹшешӹжӹ дӓ Апостолешӹжӹ мӹньӹм шагалтымы. Мӹнь тӹдӹм язычниквлӓлӓн тымдышашлык ылам.
12 Тидӹ гишӓн мӹнь тенге парвалем. Тенге гӹнят ам намысланы: Кӱлӓн мӹнь ӹнянем, Тӹдӹм пӓлем, дӓ мӹлӓнем ӹнянен пумым* тӹ Кечӹ якте перегӓш Тӹдӹн силажы ылмылан уанем.
13 Мӹнь гӹцем тӹнь шотан тымдымашым колынат, тӹдӹ тӹлӓт корным анжыктыжы. Христос Иисус доно ушнымашты шачшы ӹнянӹмӓшӹм дӓ яратымашым перегӹ.
14 Тӹлӓнет ӹнянен пумы пурым мӓмнӓн шӱмӹштӹнӓ ӹлӹшӹ Святой Шӱлӹшӹн палшымыжы доно перегӹ.
15 Тӹнь пӓлет: Асиштӹшӹвлӓ цилӓн мӹнь дорцем карангыныт, нӹнӹ лошты Фигелл дон Ермогенӓт ылыт.
16 Онисифорлан дӓ тӹдӹн тонышывлӓжӹлӓн Господь пурым ӹштӹжӹ, вет тӹдӹ мӹньӹм шукы гӓнӓ кымылангден дӓ кӹртни кӓпшӹлем гӹцӓт намысланыде.
17 Римӹш толмыкыжы, тӹдӹ мӹньӹм когон кӹчӓлӹн дӓ мон.
18 Господь тӹ Кечӹн тӹдӹлӓн ӹшке пурыжым анжыктыжы. А маняры тӹдӹн мӹлӓм Ефесӹштӹ палшымыжым тӹнь сек яжон пӓлет.
*1:12 «Мӹлӓнем ӹнянен пумым»: греклӓ сирӹмӹм тенгеӓт сӓрӓш лиэш: «Мӹньӹн ӹнянен пумым».1 А тӹнь, эргӹм, Христос Иисусын благодатьшы доно пингӹдем.
2 Ужшывлӓ шукын ылмышты годым мам мӹнь гӹцем колынат, тӹдӹм ӹнян эдемвлӓлӓн увертӓрӹ. Нӹнӹ вара весӹвлӓмӓт тымден кердӹт.
3 Иисус Христосын яжо салтакшы семӹнь парвалымашвлӓм тырхы.
4 Командирлӓн цилӓ салтак ярал лиӓш цаца, седӹндон ӹлӹмӓшӹштӹшӹ махань-шон пӓшӓ доно ӹшкӹмжӹм ак кӹлдӹ.
5 Тенгеок тӓнгӓшӹшӹ эдемӓт керӓл правилывлӓ семӹнь ак тӓнгӓшӹ гӹнь, сӹнгӹмӓш вуйгӹшӹлӹм ак нӓл.
6 Мӱлӓндӹ пӓшӓм цацен ӹштӹшӹ эдем сек анзыц ӹшке кӹцкӹ пайжым нӓлшӓшлык.
7 Мам попымем гишӓн шаналты. Господь тӹлӓт цилӓ ынгылаш палшыжы.
8 [Господь] Иисус Христосым ӓштӹ. Мӹньӹн шӓрӹмӹ Пуры Увер семӹнь Тӹдӹ Давид вырлык гӹц ылын дӓ колымы гӹц ӹлӹж кӹньӹлӹн.
9 Пуры Увер верцӹн мӹнь парвалем, мӹньӹм худам ӹштӹшӹ семӹнь кызаматыш шӹнденӹт, но Йымын шамакшым кӓпшӹлтӓш ак ли.
10 Седӹндон мӹнь айырен нӓлмӹвлӓ верц цилӓ цӹтем: нӹнӓт Христос Иисус доно ушнымы велдӹк ытаралтышты дӓ курымок лӹмлештӓрӓлтӹштӹ.
11 Ти шамаквлӓ тӧр ылыт:
Мӓ Тӹдӹн доно иквӓреш коленнӓ гӹнь,
Тӹдӹн доно иквӓрешок ӹлӓш тӹнгӓлӹнӓ,
12 тырхенӓ гӹнь,
Тӹдӹн доно иквӓрешок кугижӓлӓненӓ.
Тӹдӹ гӹц мӓ карангына гӹнь,
Тӹдӓт мӓ гӹцнӓ карангеш,
13 мӓ ӹнян ана ыл гӹнь,
Тӹдӹ соок ӹнян ылеш,
вет Тӹдӹ Ӹшкежӹ гӹц Ӹшке каранг ак керд.
14 Тидӹм со ӓшӹндӓрӹктӹ, шамаквлӓ гишӓн ӹнжӹштӹ кӹрмӓшеп манын, Господь анзылны шӱдӹ. Тидӹ нимахань пайдам ак пу, а колыштшывлӓлӓн эксӹкӹм канда.
15 Йымылан ярал ылметӹм анжыкташ цацы: ӹшке пӓшӓэт гӹц ит намысланы, лачокын шамакшым тӧр тымды.
16 А ярдымашым, такешӹм попымаш гӹц каранг, вет тенге попен каштшывлӓ утларак дӓ утларак Йымы дорц карангыт.
17 Нӹнӹн шамакышты ӓрӓлӓнӹшӹ шушырла шӓрлӓш тӹнгӓлеш. Техень ылыт Именей дон Филит.
18 Ӹлӹж кӹньӹлмӓш уже ылын манмышты доно нӹнӹ лачок гӹц карангыныт дӓ тенге южшын ӹнянӹмӓшӹжӹм шӓлӓтӓт.
19 Но Йымы ӹштӹмӹ цаткыды негӹц шалга, вӹлнӹжӹ техень пецӓт: «Господь ӹшке эдемвлӓжӹм пӓлӓ»,* «Господьын лӹмжӹм ӱжшӹ цилӓ эдем тӧр агыл гӹц карангжы».
20 Кого пӧртӹштӹ шӧртньӹ дӓ ши ӓтӹдер веле агыл, пунат дӓ шунынат улы. Иктӹжӹм шергеш шотлымы ӓтӹдер керӓл ылмы годым кычылтыт, весӹжӹм – кудылошты.
21 Тенгежӹ, кӱ ӹшкӹмжӹн цилӓ техень худажым ирӹктӓ, тӹдӹ шергеш шотлымы ӓтӹ гань ылеш, свящӓйӹмӹ дӓ Хозажылан керӓл, шукы пуры пӓшӓм ӹштӓш йӓмдӹ лиэш.
22 Сӓмӹрӹк годшы сулыкан шукы йиш шыкланымаш гӹц ытлы, Господьлан ире йӓнг доно ыдылшывлӓ доно иквӓреш тӧр ӹштӹмӹм, Христослан ӹнянӹмӓшӹм, яратымашым, тырым пингӹдӹн кычы.
23 Но ороды дӓ шотдымы кӹрмӓшӹмӓшвлӓ гӹц каранг, пӓлет вет, нӹнӹ соредӓлмӓшӹм шачыктат.
24 Господьын цоражы соредӓлшӓшлык агыл, а цилӓ доно пуры, тымден мыштышы дӓ тырхышы лишӓшлык.
25 Ваштареш шалгышывлӓм тӹдӹ шӹмӓн тӧрлӹшӓшлык. Йымы техень эдемвлӓлӓн, сулыкыштым простьыктен, Ӹшке докыжы сӓрнӓлӓш, ӓнят, йӧнӹм пуа. Тенге лиэш гӹнь, нӹнӹ лачокым пӓлен нӓлӹн
26 дӓ, ышышты пырымыкы, диаволын вӓпшӹжӹ гӹц ытлен кердӹт, вет диавол, ӹшке кымылжым шоктышты манын, нӹнӹм кычен.
*2:19 Числ 16:51 Остатка кечӹвлӓн нелӹ жеп толшашлыкым пӓлӹ.
2 Эдемвлӓ ӹшкӹмӹштӹм дӓ оксам яратышы, ӹшкӹмӹштӹм хвален каштшы, когоэшнӹшӹ, мыскылышы, ӓтя-ӓвӓм колыштдымы, таум ӹштӹдӹмӹ, Йымым шотлыдымы, яратыдымы,
3 икышын лин керддӹмӹ, ӓляклӹшӹ, ӹшкӹмӹм кычен мыштыдымы, костан, пурын тышманжы,
4 предатель, шаналтыде ӹштӹшӹ, ӹшкӹмӹм пиш когоэш ужшы, Йымым яратышы агыл, а шӓрӹм темӓш цацышы лит.
5 Вӹлец анжен, Йымым жеплӹшӹлӓ кайыт, но ӹнянӹмӓшӹн силажы гӹц карангыт. Техень эдемвлӓ гӹц ӧрдӹшкӹ ке.
6 Нӹнӹ логӹц кыдыжы эдем пӧртӹш йойланен пырат дӓ сулык лоэш ямшы, махань-шон шыкланымы кымыл виктӓрӹмӹ ӹдӹрӓмӓшвлӓм кид лӹвӓкӹштӹ нӓлӹт.
7 Техень ӹдӹрӓмӓшвлӓ со тыменяш цацат гӹнят, лачокым пӓлӹмӓшкӹ нигынамат шон ак кердеп.
8 Кыце Моисей ваштареш Ианний дон Иамврий шагалыныт, тенгеок ти эдемвлӓӓт лачоклан торешлӓнӓт. Нӹнӹн ышышты пыжлен дӓ ӹнянӹмӓшӹштӹ цаткыды агыл.
9 Но нӹнӹ шукымок ӹштен ак кердеп, вет ышдымы ылмышты цилӓ анзылны вӹкӹ лӓктеш. Тенгеок Ианний дон Иамврий доно лин.
10 А тӹнь мӹньӹн тымдымем, кыце ӹлӹмем, мам ӹштӓш шанымем, Христослан ӹнянӹмем, тырхымем, яратымем, цӹтӹшӹ ылмем ужынат дӓ тенгеок ӹштенӓт,
11 Антиохиштӹ, Икоништӹ, Листрашты мӹньӹм поктылмым, парвалымем тӹнь пӓлет. Махань пӹзӹрньӹкӹм мӹнь цӹтенӓм! А цилӓ тидӹ гӹц мӹньӹм Господь ытарен.
12 Христос Иисус доно ушнен, Йымым шотлен ӹлӓш шанышывлӓ цилӓн поктылмы лит.
13 А ярдымы эдемвлӓ дӓ алталышывлӓ, весӹвлӓм самыньыш пыртен дӓ ӹшкештӓт самынялтын, худам ӹштӹмӓштӹ сӹнгӹмӓшкӹ шот.
14 А тӹнь мам тыменьӹнӓт дӓ мам ӹнянеш шотлет, тӹдӹм пингӹдӹн кычы, вет тӹнь тымдышетӹм пӓлет.
15 Эчежӹ тӹнь Святой Писаним изиэт годшен пӓлет. Тӹдӹ Христос Иисуслан ӹнянӹмет доно ытаралташ тӹлӓнет ышым пуэн кердеш.
16 Писани цилӓге Йымын Шӱлӹш гӹц лӓктӹн дӓ кого пайдам пуа: тымдаш, самыньым вӹкӹ лыкташ, тӧрлӓш, тӧр ӹштӹмӓшкӹ ажедӓш палша.
17 Тенгежӹ, Йымын эдемжӹн нимахань акситӹжӓт уке, тӹдӹ цилӓ пуры пӓшӓэш йӓмдӹлӹмӹ ылеш.
1 Кынам Христос толеш дӓ кугижӓлӓнӓш тӹнгӓлеш, Тӹдӹ ӹлӹшӹвлӓм дӓ колышывлӓм суя. Седӹндон Йымы дӓ Господьна Иисус Христос анзылны тӹлӓнет пингӹдӹн шӱдем:
2 Йымын шамакшым шӓрӹ, ярал ӓль ярал агыл жепӹнӓт тӹдӹ верц пингӹдӹн шалгы, вуйнаматым вӹкӹ лык, самынь ӹштӹшӹм пелештӹ, цилӓм кымылангды. Тидӹм когон цӹтен дӓ тымден ӹштӹ.
3 Вет техень жеп толеш, кынам эдемвлӓ шотан тымдымашым ак колыштеп, а ӹшке кымылыштылан ярышы, пӹлӹшӹм сусуэмдӹшӹ тымдышывлӓм йӹрӹштӹ погаш тӹнгӓлӹт,
4 лачокым колышташ агыл манын, пӹлӹшӹштӹм питӹрӓт дӓ шанен лыкмы шамак-ямак векӹ сӓрнӓлӹт.
5 Но тӹнь цилӓ шотыштат ары вуян ли, нелӹм тырхы, Пуры Уверӹм шӓрӹмӹ, служымы пӓшӓэтӹм ӹштен шокты.
6 Вет мӹньӹм жертвеш пуаш жеп шон, кешӓшлык веремӓэм лишемӹн.
7 Тӓнгӓшӹмӓштӹ мӹнь пиш яжон ӹштӓш цаценӓм, кыргыжмы корнемӹн мычашкыжы миэн шонам, ӹнянӹмӓшӹм переген коденӓм.
8 А ӹнде тӧр ӹштӹмӹ гишӓн пушашлык вуйгӹшӹл мӹньӹм выча, тӹдӹм мӹлӓнем Господь, тӧр Судья, тӹ Кечӹн пуа, дӓ мӹлӓнем веле агыл, Тӹдӹн лӹмлештӓрӓлт толмыжым яратен вычышывлӓлӓн цилӓлӓн кычыкта.
9 Мӹнь докем йӹлерӓк толаш цацы.
10 Вет кӹзӹтшӹ курымым яратымыжы гишӓн Димас мӹньӹм коден дӓ Фессалоникӹш кен, Крискент ‒ Галатишкӹ, Тит ‒ Далматишкӹ кенӹт. Лука веле мӹнь донем кодын.
11 Маркым нӓл дӓ сагаэт канды, тӹдӹн палшыкшы мӹлӓнем пишок келеш.
12 А Тихикӹм мӹнь Ефесӹш колтенӓм.
13 Толшылаэт, вӹлвӓл выргемӹм канды, тӹдӹм мӹнь Троадашты Карп доран коденӓм. Тенгеок книгӓвлӓм, айыртемӹнок каваштеш сирӹмӹвлӓм, канды.
14 Александр, ӓпшӓт, мӹлӓнем худам шукы ӹштен. Господь тӹдӹлӓн пӓшӓжӹ семӹнь тӱлӹжӹ.
15 Тӹдӹ гӹц тӹнят перегӓлт, тӹдӹ мӓмнӓн попымына ваштареш пиш шагалын.
16 Пӹтӓриш гӓнӓ судышты ӹшке верцем попымем годым мӹлӓнем палшаш иктӓт толде, цилӓн мӹньӹм коденӹт. Тидӹ нӹнӹн самынеш ӹнжӹ шотлалт.
17 А Господь мӹньӹм кодыде, палшен. Мӹнь гачем Йымын увержӹм шӓрӹмӹ пӓшӓ ӹштӓлтшӹ дӓ язычниквлӓ тӹ уверӹм цилӓн колышты манын, Тӹдӹ мӹньӹм пингӹдемден. Тенге мӹнь лев ышма гӹцӹн ытаралтынам.
18 Господь мӹньӹм цилӓ худа пӓшӓ гӹц перегӓ дӓ ӹшке Пӹлгомыштышы Кугижӓншӹжӹлӓн ытара. Тӹдӹлӓн курым-курымеш лӹмлештӓрӓлтмӓш лижӹ! Аминь.
19 Прискилла дон Акилалан, Онисифорлан дӓ тонышывлӓжӹлӓн шӓлӓм келесӹ.
20 Ераст Коринфеш кодын, а Трофимӹм, ясы ылешӓт, Милитеш коденӓм.
21 Тел якте толаш цацы. Еввул, Пуд, Лин, Клавдия дӓ вес шӱмбелвлӓӓт цилӓн тӹлӓт шӓлӓм колтат.
22 Шӱлӹшет сага Господь Иисус Христос со лижӹ. Тӓ доныда Йымын благодатьшы лижӹ. Аминь.