1 Йымын, мӓмнӓн Ытарышынан, дӓ Господь Иисус Христосын, уанымашнан, шӱдӹмӹжӹ доно Иисус Христосын Апостолжы лишӹ Павел дорц
2 ӹнянӹмӓшӹштӹ туан эргӹжӹ лишӹ Тимофейлӓн. Йымы Ӓтянӓ дӓ мӓмнӓн Господьна Христос Иисус дорц тӹлӓнет благодать, жӓлӓйӹмӓш дӓ тыр лижӹ.
4 (3-4) Македонишкӹ кеӓш лӓкмем анзыц мӹнь тӹньӹм Ефесеш кодаш ядынам, вес тымдымашым ӹнжӹштӹ шӓреп, тумаен лыкмы шамак-ямаквлӓ дӓ мычашдымы роды-важ гишӓн ӹнжӹштӹ шанеп манын, тӹнь икманяр эдемлӓн шӱдӹшӓшлык ылынат. Цилӓ тидӹ Йымын пӓшӓжӹлӓн ак палшы, а кӹрмӓшӹмӓшӹм веле лыктеш. Йымын пӓшӓжӹ ӹнянӹмӓш гач веле ӹштӓлтеш.
5 Ире шӱм, пуры совесть дӓ йӓнг вашт ӹнянӹмӓш гӹц лӓкшӹ яратымаш лижӹ манын, мӹнь тенге ӹштӓш шӱденӓм.
6 Южшы тишец карангыныт, келеш-акелӹм колышташ тӹнгӓлӹнӹт,
7 нӹнӹ законым тымдышы линештӹ, а ӹшкештӹ мам попымыштымат, малан ӹняндӓрӹмӹштӹмӓт ак ынгылеп.
8 Мӓ пӓленӓ: законым закон ядмы семӹнь кычылташ гӹнь, тӹдӹ яжо.
9 Мӓ ынгыленӓ: законым тӧр ӹштӹшӹлӓн агыл, а тӹдӹм пыдыртышы дӓ шамак колыштдымы, Йымым жеплӹдӹмӹ дӓ сулыкан, святойым шотлыдымы дӓ яктаралтшы, ӓтя-ӓвӓлӓн худам ӹштӹшӹ, эдемӹм пуштшы,
10 тӓйвилӓнӹшӹ, пӱэргӹ пӱэргӹ доно шӓхӓрлӓнӹшӹ, эдемӹм шолыштшы, [весӹ вӹкӹ попышы, вольык доно шӓхӓрлӓнӹшӹ,] алталышы, ӹшке цуратлымы шамакышты гӹц карангшывлӓлӓн дӓ шотан тымдымаш ваштареш шалгышы цилӓ молылан лыкмы.
11 Хвальымы Йымын мӹлӓнем ӹнянен пумы лӹмлештшӹ Пуры Увержӹ тенге попа.
13 (12-13) Мӹлӓнем силам пушы мӓмнӓн Господьна Христос Иисуслан таум келесем: мӹнь андак мыскылышы, поктылшы дӓ эдемлӓн худам ӹштӹшӹ ылынам гӹнят, Тӹдӹ мӹньӹм ӹнян эдемеш шотлен дӓ служымы пӓшӓшкӹ шагалтен. Мӹньӹм простен, вет мам ӹштенӓм, ӹнянӹдӹмем гишӓн пӓлӹделам.
14 Мӓмнӓн Господьнан, [Иисус Христосын,] благодатьшы Христос Иисус доно ушнымашты ылшы ӹнянӹмӓш дӓ яратымаш доно иквӓреш мӹлӓнем циц пуалтын.
15 Ти шамаквлӓ ӹнян дӓ шӱмӹш пиштӓш цилӓ шотыштат ярал ылыт: Христос Иисус сӓндӓлӹкӹш сулыканвлӓм ытараш толын, нӹнӹ логӹц сек сулыканжы мӹнь ылам.
16 Мӹньӹн, сек кого сулыканын, ӹлӹмӓшем доно Иисус Христос цилӓ тырхымашыжым анжыкташ шанен, седӹндон мӹньӹм жӓлӓен, Тӹдӹлӓн ӹнянӓш тӹнгӓлшӓшлык дӓ курымаш ӹлӹмӓшӹм нӓлшӓшлыквлӓлӓн мӹнь гачем корным анжыктен.
17 А курымаш Кугижӓлӓн, колыдымы, кайдымы, кого ышан ик ӹшкет Йымылан, курым-курымеш шотеш пиштӹмӓш дӓ лӹмлештӓрӓлтмӓш лижӹ. Аминь.
18 Тимофей эргӹм, тӹнь гишӓнет пророкла келесен кодымы семӹнь, тидӹм тӹлӓнет шӱдем: пророкла келесӹмӹлӓ ӹнянӹн кредӓл,
19 ӹнянӹмӓшӹм дӓ пуры совестьӹм перегӹ. Южшы совестьӹштӹм колышташ цӓрненӹт, дӓ нӹнӹн ӹнянӹмӓшӹштӹ кӱ вӹкӹ вӓрештшӹ корабльла шӓлӓнен.
20 Техеньӹвлӓ лошты Именей дон Александр ылыт. Йымым мыскылыде ӹлӓш тыменьӹштӹ манын, мӹнь нӹнӹм сатаналан пуэн коденӓм.
2 (1-2) Тенгежӹ, мӓлӓннӓ ладнан, тырын, цилӓ шотыштат Йымым шотеш пиштен дӓ ӹшкӹмӹм тӧр кычен ӹлӓш манын, сек пӹтӓриок цилӓ эдем верц, кугижӓ дон вуйлатышывлӓ верц ыдылаш, сарвалаш, таум ӹштӓш ядам.
4 (3-4) Цилӓ эдем ытаралтшы дӓ лачокым пӓлен нӓлжӹ манын шанышы Йымылан, мӓмнӓн Ытарышыланна, тидӹ яжо дӓ ярал ылеш.
5 Вет Йымы иктӹ, Йымы дон эдемвлӓм ушен шалгышат иктӹ ‒ эдем Христос Иисус.
6 Тӹдӹ цилӓ эдемӹм сылен нӓлӓш Ӹшкӹмжӹм пуэн: керӓл жепӹштӹ техень пӓлдӹртен анжыктымаш ылын.
7 Седӹндонок увертӓрен тымдышеш дӓ Апостолеш мӹньӹм шагалтымы. Христос доно ушнен, лачокым попем, ам алталы. Язычниквлӓм ӹнянӹмӓшеш дӓ лачокеш тымдаш колтымы ылам.
8 Тенге, пӱэргӹвлӓ, кидӹштӹм ире шанымаш доно лӱктӓлӹн, шӹдӹм кычыде дӓ коктешлӓнӹде, со ыдылышты манын шанем.
10 (9-10) Ӹдӹрӓмӓшвлӓ сӹнзӓэш тӹкнӹдӹмӹ дӓ шотан выргемӹм чиштӹ, ӹшкӹмӹштӹм айыртемӓлтшӹ калявач, шӧртньӹ, жемчуг дӓ шергӓкӓн выргем доно агыл, а пуры пӓшӓ доно цеверемдӹштӹ. Йымым жеплӹшеш ӹшкӹмӹштӹм шотлышы ӹдӹрӓмӓшвлӓлӓн тенге ӹштӓш сараса.
11 Ӹдӹрӓмӓш, цилӓ шотыштат шамакым колыштын, шӹпок тыменьжӹ.
12 Тымдаш ӓль пӱэргӹлӓн вуй лиӓш ӹдӹрӓмӓшлӓн ирӹкӹм ам пу, тӹдӹ шӹп лижӹ.
13 Вет пӹтӓри Адамым ӹштӹмӹ, вара – Евам.
14 Адамым алталымы агыл, а ӹдӹрӓмӓш алталалтын дӓ сулыкыш пырен.
15 Но ӹдӹрӓмӓш ӹнянӹмӓшӹштӹ дӓ яратымашышты пингӹдӹ ылеш гӹнь, пуры ыш дӓ шот доно ӹлӓ гӹнь, тетям ӹштӹмӹ гач тӹдӹ ытаралтеш.
1 Ти шамаквлӓ тӧр ылыт: кӱ епископ линежӹ, тӹдӹ пуры пӓшӓш пырынежӹ.
2 Но епископ йӓтлӓш лидӹмӹ эдем лишӓшлык: ик гӓнӓ веле ӹдӹрӹм нӓлшӹ,* ары, ышан-шотан, ӹшкӹмжӹм яжон кычышы, [тӧрӹм яратышы,] корныгешӹвлӓлӓн палшышы, тымден мыштышы,
3 ӓрӓкӓм йӱшӹ агыл, шиэдӓл каштшы агыл, соредӓлшӹ агыл, ӹшкӹлӓнжӹ пайдам кӹчӓлшӹ агыл, а йӹвӹжӓ, кӹрмӓшӹшӹ агыл, оксам ӹнжӹ яраты.
4 Тӹдӹ ӹшке семняжӹм мыштен кычышашлык, тетявлӓжӹм шамакым колыштшывлӓм дӓ цилӓ шотыштат тӧр ӹлӹшӹвлӓм анжен куштышашлык.
5 А кӱ ӹшке семняжӹм кычен ак керд, кыце Йымын Церкӹжӹ верц шытырланаш тӹнгӓлеш?
6 Епископ кӹзӹт веле ӹнянӓш тӹнгӓлшӹ лишӓшлык агыл. Техень эдем когоэшнӓш тӹнгӓл дӓ диавол доно иквӓреш суялт кердеш.
7 Эдемвлӓн йӓтлӹмӓшкӹ дӓ диаволын вӓпшӹшкӹжӹ ӹнжӹ вӓрешт манын, тӹдӹ гишӓн ӧрдӹжвлӓӓт пуры шамакым веле келесӹшӓшлык ылыт.
8 Тенгеок диаконвлӓӓт тӧр ӹлӹшӓшлык ылыт. Нӹнӹ кок семӹнь попышашлык агылеп, ӓрӓкӓм йӱӓш яратышы ӹнжӹштӹ лиэп, ӹшкӹлӓнӹштӹ пайдам ӹнжӹштӹ кӹчӓлеп,
9 ӹнянӹмӓшӹн тайныжым ире совесть доно пингӹдӹн кычышашлык ылыт.
10 Но ти эдемвлӓмӓт пӹтӓри тергӹмӹлӓ, вара, нӹнӹ йӓтлӓш лидӹмӹ ылыт гӹнь, служышты.
11 Ӹдӹрӓмӓшвлӓӓт тӧр ӹлӹшӓшлык ылыт, ӓляклӹшӓшлык агылеп, ары, цилӓ шотыштат ӹнян лиштӹ.
12 Диаконвлӓ ик гӓнӓ веле ӹдӹрӹм нӓлшӹ лишӓшлык ылыт, ӹшке тетяштӹм дӓ семняштӹм яжон кычышты.
13 Яжон служышывлӓ когон шотеш пиштӹмӹ дӓ Христос Иисуслан ӹнянӹмӓштӹ пиш лӱддӹмӹ лит.
14 Тӹнь докет шукышты агыл мимемлӓн уанен, мӹнь тидӹм тӹлӓт сирем.
15 А йӹле миэн ам шо гӹнь, Йымын пӧртӹштӹ* ӹшкӹмӹм кыце кычымыла, тӹлӓнет пӓлӓш келеш, вет ти пӧртшӹ ӹлӹшӹ Йымын Церкӹжӹ, лачокын негӹцшӹ дӓ кычыкшы ылеш.
16 Лачокок, Йымылан ӹнянӹмӓшӹн святой тайныжы пишок кого:
Йымы кӓп доно толын,
Святой Шӱлӹш доно тӧрӹш лӓктӹн,
Ангелвлӓлӓн Ӹшкӹмжӹм анжыктен,
халыквлӓлӓн Тӹдӹ гишӓн увертӓрӹмӹ,
сӓндӓлӹкӹштӹ Тӹдӹлӓн ӹняненӹт,
лӹмлештӓрӓлтӹн, Тӹдӹ пӹлгомышкы кузен.
1 Шӱлӹш раскыдын попа: алталышы шӱлӹшвлӓм дӓ иӓвлӓн тымдымыштым колыштын, остатка веремӓн южшы Христослан ӹнянӹмӹ гӹц карангыт.
2 Техень тымдымаш йылен пӹтӹшӹ совестян дӓ яжола каяш цацышы алталышывлӓ гач толеш.
3 Нӹнӹ ӹдӹрӹм нӓлӓш ӓль марлан кеӓш цӓрӓт дӓ, ӹнянӹшӹ дӓ лачокым пӓлен нӓлшӹвлӓлӓн таум ӹштен качкашышты мам Йымы ӹштен, тӹдӹм качкаш ак шӱдеп.
4 Йымы ӹштӹмӹ цилӓок яжо, мам таум келесен нӓлмӹ, нимат шӹкӓлмӹ лишӓшлык агыл,
5 тӹдӹм Йымын шамакшы дӓ ыдылмы свящӓйӓт.
6 Тидӹм шӱмбелвлӓлӓн со попет гӹнь, Иисус Христосын яжо служительжӹ лиӓт, ӹнянӹмӓш шамаквлӓ тӹньӹм пингӹдемдӓт, пуры тымдымаш семӹнь ӹлет, тымдымашыжы тӹньӹм цаткыдемдӓ.
7 А ярдымы дӓ шанен лыкмы шамак-ямаквлӓ гӹц каранг, Йымым шотеш пиштӹмӓштӹ ӹшкӹметӹм пингӹдемдӹ.
8 Кӓпӹм пингӹдемдӹмӓшӹн пайдажы чӹдӹ, а Йымым шотеш пиштӹмӓш цилӓ шотыштат пайдам пуа, вет тӹдӹ кӹзӹтшӹ ӹлӹмӓшӹмӓт, анзыкылашы ӹлӹмӓшӹмӓт сӧрӓ.
9 Ти шамак тӧр дӓ вуйыш пиштӓш цилӓ шотыштат ярал ылеш.
10 Вет мӓ ӹлӹшӹ Йымылан уаненӓ, седӹндон пӓшӓм йӓнг вашт ӹштенӓ дӓ вырсымым тырхенӓ, Тӹдӹжӹ цилӓ эдемӹн, айыртемӹнок ӹнянӹшӹвлӓн, Ытарышышты ылеш.
11 Тидӹм тымды дӓ ӹштӓш шӱдӹ.
12 Сӓмӹрӹк ылмет гишӓн тӹньӹм шотлыдымы иктӓт ӹнжӹ ли. Попымаштат, ӹшкӹмӹм кычымаштат, яратымашыштат, шӱлӹшӹштӓт, ӹнянӹмӓшӹштӓт, ире кайышыштат ӹнянӹшӹвлӓлӓн махань лишӓшлыкыштым анжыкты.
13 Мӹнь мимешкем, эдемвлӓлӓн Писаним лыдмылан, кӓнгӓшӹм пумылан, тымдымылан ӹшкӹметӹм пу.
14 Кынам пресвитервлӓ тӹнь донет кид пиштӹмӓш овуцам* эртӓренӹт, пророкла келесӹмӹ гач Йымы тӹлӓнет мыштымашым пуэн. Тидӹм шотыш нӓлде ит код.
15 Тӹньӹн сӹнгӹмӓшкӹ шометӹм цилӓн ужышты манын, цилӓ тидӹ верц шытырланы, тидӹлӓн улы силаэтӹм пиштӹ.
16 Ӹшкӹметӹмӓт, тымдыметӹмӓт со тӹшлӹ. Цилӓ тидӹм пингӹдӹн шокты. Тенге ӹштен, тӹнь ӹшкӹметӹмӓт, колыштшывлӓэтӹмӓт ытарет.
*4:14 Кид пиштӹмӓш гишӓн лӹмдерӹштӹ мам сирӹмӹм анжы.1 Ӹлӓлшӹ пӱэргӹлӓн ӧпкӓлен ит пелештӹ, а ӓтялӓн кӓнгӓшӹм пумыла попы, сӓмӹрӹк пӱэргӹвлӓлӓн ‒ шӱмбеллӓн кӓнгӓшӹм пумы гань.
2 Ӹлӓлшӹ ӹдӹрӓмӓшвлӓлӓн ӓвӓлӓн кӓнгӓшӹм пумыла попы, сӓмӹрӹк ӹдӹрӓмӓшвлӓлӓн ‒ ӓкӓ-шыжарлан кӓнгӓшӹм пумы семӹнь. Кайышет цилӓ шотыштат ире лижӹ.
3 Лачокок ӹшкетӹн кодшы тылык вӓтӹвлӓм шотеш пиштӹ.
4 А иктӓ тылык вӓтӹн тетявлӓжӹ ӓль ыныкавлӓжӹ улы гӹнь, пӹтӓриок ӹшке семняштӹм шотеш пиштӓш дӓ ӓтя-ӓвӓштӹлӓн пурым пӧртӹлтӓш тыменьӹштӹ, тидӹ Йымылан ярал ылеш.
5 Родньыквлӓжӹ гӹц пасна лачокок кодшы тылык ӹдӹрӓмӓш Йымылан уана дӓ, палшыкым ядын, йыдет-кечет Тӹдӹлӓн ыдылеш,
6 а шӓржӹм темӓш яратышы ӹлӹшок колен.
7 Эдемвлӓн нӹнӹм йӓтлӓш вирӹштӹ ӹнжӹ ли манын, цилӓ тидӹм ӹштӓш шӱдӹ.
8 А кӱ родняжы дӓ айыртемӹнок ӹшке семняжӹ гишӓн ак шытырланы, тӹдӹ ӹнянӹмӓш гӹц карангын дӓ ӹнянӹдӹмӹ эдем гӹцӓт худа лин.
9 Кудлу иӓш гӹц когорак дӓ ик гӓнӓ веле марлан кешӹ тылык ӹдӹрӓмӓш веле тылык вӓтӹ рӓдӹш пыртымы лижӹ.
10 Тӹдӹ пуры пӓшӓжӹ доно пӓлӹмӹ лишӓшлык: тетявлӓм анжен куштен, корныгешӹвлӓлӓн палшен, святойвлӓн ялыштым мышкын, эксӹкӹш вӓрештшӹвлӓлӓн палшен дӓ шукы пуры пӓшӓм соок ӹштен.
11 Сӓмӹрӹк тылык вӓтӹвлӓм ти рӓдӹш ит пырты. Кынам вӓтӹ-марыла ӹлӓш шанымышты ӹлӹжеш, нӹнӹ Христос дорц ӧрдӹшкӹрӓк карангыт, дӓ марлан кемӹштӹ шоэш.
12 Ӹнян лиӓш шамакым пуэнӹт гӹнят, тӹдӹм ак кычеп, седӹндон нӹнӹм суйымаш выча.
13 Тилец пасна, нӹнӹ ялахайланаш, пӧрт йӹде кашташ тыменьӹт дӓ ялахайланаш веле агыл, а ӓляклен кашташ, келеш-акелӹм пӓлен нӓлӓш цацат, акелӹм попат.
14 Седӹндон сӓмӹрӹк тылык вӓтӹвлӓ марлан кештӹ, тетям ӹштӹштӹ, суртым анжышты, худам попаш тышманлан нимахань вирӹмӓт ӹнжӹштӹ пуэп.
15 Вет южшы тӧр корны гӹц карангат шоктенӹт дӓ сатана паштек кенӹт.
16 Ӹнянӹшӹ иктӓ пӱэргӹн ӓль ӹдӹрӓмӓшӹн лишӹл роднявлӓжӹ лошты тылык вӓтӹ улы гӹнь, тӹдӹлӓн палшыжы, лачокок ӹшкет кодшы тылык вӓтӹлӓн Церкӹ палшен кердшӹ манын, ти шытырым Церкӹлӓн ӹнжӹ пу.
17 Церкӹм мыштен вуйлатышы пресвитервлӓм, айыртемӹнок Йымын шамакым цӓрнӹде шайыштшы дӓ тымдышывлӓм, шотеш пиштӓш келеш.
18 Писаништӹ попалтеш: «Кӹлтем шишӹ ӱшкӱжӹн ышмажым ит питӹрӹ»,* тенгеок: «Пӓшӓм ӹштӹшӹ ӹшке пӓшӓдӓржӹм сылен нӓлеш».
19 Кок ӓль кым пӓлдӹртен попышы гӹц пасна пресвитерӹм йӓтлӹмӹм ит колышт.
20 Молывлӓӓт лӱдӹштӹ манын, сулыкым ӹштӹшӹвлӓм цилӓ анзылны йӓтлӹ.
21 Йымы анзылны, Господь Иисус Христос анзылны дӓ айырен нӓлмӹ Ангелвлӓ анзылны мӹнь тӹлӓнет ти кӓнгӓшвлӓэм семӹнь ӹштӓш пингӹдӹн шӱдем. Пӓшӓм тӹшлӹмешкӹ, цилӓ раскыды манын, анзыцок ит шаны, иктӓжӹ векӹ лин, нимат ит ӹштӹ.
22 Иктӹн донат кид пиштӹмӓшӹм шокташ ит талашы, йӓлӹн сулыкыш ит ушны. Ире ылметӹм перегӹ.
23 Анзыкыжым вӹдӹм веле агыл йӱ, пӓгӓретлӓн дӓ шӹренок церлӓнӹмет гишӓн якшар ӓрӓкӓмӓт изиш подыл.
24 Юж эдемӹн сулыкшы тӧрӧк каеш дӓ суйымашкы канда, а южшын вара пачылтеш.
25 Тенгеок пуры пӓшӓӓт тӧрӧк каеш, кайдымыжат шӹлӹн кодын ак керд.
*5:18 Втор 25:41 Йымын лӹмжӹ дӓ мӓмнӓн тымдымашна ӹнжӹштӹ вырсалтеп манын, рабвлӓ хозаштым цилӓ шотыштат жеплӓш яралеш шотлышашлык ылыт.
2 А кӱн хозажы Христослан ӹнянӹшӹ ылеш, нӹнӹ ӹнянӹмӓшӹштӹ шӱмбелвлӓ ылытат, тӹдӹ хозажым жеплӹдӹмӹ ӹнжӹ ли. Эче утларак веле пӓшӓм ӹштӹшӓшлык, вет тӹдӹн пӓшӓжӹ ӹнянӹшӹ дӓ яратымы хозалан пайдам пуа. Цилӓ тидӹм тымды дӓ кӓнгӓшӹм пу.
3 Кӱ весӹм тымда дӓ мӓмнӓн Господьна Иисус Христосын шотан шамакшым дӓ ӹнянӹмӓшӹн лачокшы тымдымыжым ак ярыкты,
5 (4-5) тӹдӹ когоэшнӓ, нимат ак пӓлӹ, но сӹнгедӓлмӹ дӓ шамак гишӓн тавалымы цер доно церлӓнен, тидӹжӹ пыжлышы ышан, лачок гӹц карангшы эдемвлӓ лошты йӓнг йылымашым, соредӓлмӓшӹм, вырсымашым, лидӹмӹ самынь гишӓн йӓтлӹмӓшӹм, кӹрмӓшӹмӓшӹм лыктеш. Техень эдемвлӓ Йымым шотеш пиштӹмӹ доно паяш лиэш манын шанат. Нӹнӹ дорц каранг.
6 Лачокок, ма улыжылан сусу лин, Йымым шотеш пиштӹмӓш – кого пайда.
7 Мӓ сӓндӓлӹкӹш нимат кандыделна дӓ, пӓлӹмӓн, ти сӓндӓлӹк гӹц нимат сагана нӓлӹн ана керд.
8 Качкышна дӓ выргемнӓ улы гӹнь, тидӹлӓн сусу лишӓшлык ылына.
9 А паяш шанышывлӓ аздаралтыт, шотдымы, орлыкым кандышы шукы йиш сулыкан шыкланымашын вӓпшӹшкӹжӹ вӓрештӹт, техень шыкланымаш эдемвлӓм кого эксӹкӹш пырта дӓ пӹтӓрӓ.
10 Вет цилӓ худан важшы – оксам яратымаш, оксалан вуйым пумыкы, южшы ӹнянӹмӓш гӹц карангыныт дӓ ӹшкӹлӓнӹштӹ шукы орлыкым моныт.
11 А тӹнь, Йымын эдемжӹ, техень гӹц каранг дӓ тӧр ӹштӹмӓштӹ, Йымым шотеш пиштӹмӓштӹ, ӹнянӹмӓштӹ, яратымашты, цӹтӹмӓштӹ, пышкыды кымылан ылмашты сӹнгӹмӓшкӹ шо.
12 Христослан ӹнянӹмӹ верц шалгымашты улы силаэтӹм пиштӹ, курымаш ӹлӹмӓшӹм кычы. Йымы тӹньӹм ти ӹлӹмӓшлӓнок ӱжӹн, дӓ ужшы шукы эдем анзылны тӹнь ӹнянӹмет гишӓн пингӹдӹн пачын попенӓт.
13 Цилӓлӓн ӹлӹмӓшӹм пушы Йымы анзылны дӓ Понтий Пилат годым пингӹдӹн пӓлдӹртен попышы Христос Иисус анзылны мӹнь тӹлӓнет шӱдем:
14 мӓмнӓн Господьна Иисус Христос толмешкӹ, тӹлӓнет шӱдӹмӹм самыньдеок дӓ йӓтлӓш вирӹм пуде шоктен шалгы.
15
Тӹдӹн толмыжым
пуры цӓшӓн ик ӹшкет силан Йымы,
кугижӓвлӓн Кугижӓштӹ дӓ хозавлӓн Хозашты,
ӹшке жепӹштӹжӹ анжыкта.
16 Тӹдӹ ӹшкетшӹ веле колыдымы ылеш,
лишемӓш лидӹмӹ сотышты ӹлӓ,
Тӹдӹм ик эдемӓт ужде дӓ ужын ак керд.
Тӹдӹлӓн лӹмлештӓрӓлтмӓш дӓ курым-курымаш сила лижӹ. Аминь.
17 Кӹзӹтшӹ курымыштышы паянвлӓлӓн шӱдӹ: ӹшкӹмӹштӹм когоэш ӹнжӹштӹ ужеп дӓ ӹнян агыл пурлыклан агыл, а мӓлӓннӓ ӹвӹртен ӹлӓш цилӓок шукы пушы ӹлӹшӹ Йымылан уанышты.
18 Нӹнӹ пурым ӹштӹштӹ, пурлыкышты пурым ӹштӹмӓш лижӹ, весӹлӓн палшаш со йӓмдӹ дӓ кымылан лиштӹ.
19 Тенге нӹнӹ ӹшкӹлӓнӹштӹ лачокшы пурлыкым погат, тидӹжӹ анзыкылашыштылан пингӹдӹ негӹц лиэш, дӓ курымаш ӹлӹмӓшӹш шон кердӹт.
20 О Тимофей! Тӹлӓнет ӹнянен пумым перегӹ, ярал агыл, такеш хытырымаш гӹц дӓ, пӓлӹмӓш манын, мам самынь лӹмдӓт, тӹдӹн торешлӓнӹмӹжӹ гӹц каранг.
21 Южшы тӹдӹн векӹ сӓрнӓлӹн дӓ Христослан ӹнянӹмӹ корны гӹц ӧрдӹшкӹ кен. Сагаэт благодать лижӹ. Аминь.