1 Павел, Силуан дӓ Тимофей дорц Йымы Ӓтянӓ дӓ Господь Иисус Христос доно ушнен шалгышы Фессалоникӹштӹшӹ церкӹлӓн.
2 Мӓмнӓн Йымы Ӓтянӓ гӹц дӓ Господь Иисус Христос гӹц тӓлӓндӓ благодать дӓ тыр лижӹ.
3 Шӱмбелвлӓ, мӓ тӓ верцдӓ Йымылан со таум ӹштӹшӓшлык ылына, тенгеок лишӓшлык, вет тӓмдӓн ӹнянӹмӓшдӓ пиш кушкеш дӓ каждыйдан икӹжӓк-иктӹдӓм яратымаш когоэмеш.
4 Тӓлӓндӓ вӓрештшӹ цилӓ поктылмаш дон орланымашты тырхымыда дӓ ӹнянӹмӹдӓ гишӓн мӓ ӹшкежӓт Йымын церкӹвлӓ погынымы годым тӓ гишӓндӓ хвален попенӓ.
5 Йымын судшы тӧр ылмым цилӓ тидӹ анжыкта, дӓ тӓ Йымын Кугижӓншӹжӹлӓн ярал эдемеш шотлалтыда. Йымын Кугижӓншӹ верцӹнок тӓ орланедӓ.
6 Йымы тӧр ӹштӓ: тӓмдӓм орландарышывлӓлӓн орлык доно тӱлӓ,
8 (7-8) а тӓлӓндӓ, орландарымывлӓлӓн, тенгеок мӓлӓннӓӓт тырым пуа. Тидӹжӹ Господь Иисусын силан Ангелвлӓжӹ доно пӹлгом гӹц тыл салым лошты толмыжы годым лиэш. Тӹнӓм Йымым пӓлӓш шаныдымы, мӓмнӓн Господьна Иисус Христосын Пуры Увержӹм колыштдымы эдемвлӓлӓн кӱсӹм пӧрӹктӓ.
10 (9-10) Кынам Господь Иисус миӓ, нӹнӹм курымеш пӹтӓш суя, нӹнӹ Тӹдӹ гӹц дӓ Тӹдӹн силажын лӹмлештӓрӓлтмӹжӹ гӹц карангдымы лит. Господь Иисус тӹ кечӹн ӹшке святойвлӓжӹ лошты лӹмлештӓрӓлтӓш, ӹнянӹшӹвлӓ лошты хвальымы лиӓш толеш. Тӓӓт ӹнянӹшӹ ылыда, пӓлдӹртен попымыланна ӹнянедӓ.
11 Седӹндон мӓ тӓ верцдӓ со ыдылына. Йымына тӓмдӓм ӹшке ӱжмӹжӹлӓн яралым ӹштӹжӹ дӓ пурым ӹштӓш шанымыдам, ӹнянӹмӓш шачыктымы пӓшӓдӓм ӹшке силажы доно цилӓ ӹштен шокташ палшыжы.
12 Мӓмнӓн Господьна Иисус Христосын лӹмжӹ тӓ гачда лӹмлештӓрӓлтшӹ, мӓмнӓн Йымынан дӓ Господь Иисус Христосын благодатьшы доно Тӹдӹ гач тӓӓт лӹмлештӓрӓлтдӓ манын, мӓ ыдылына.
1 Шӱмбелвлӓ, Господьна Иисус Христосын толмыжы дӓ мӓмнӓм Тӹдӹн докы погымы гишӓн икманяр шамакым келесӹненӓ. Тӓмдӓм сарваленӓ:
2 иктӓ-махань шӱлӹш ӓль увер, ӓль вуйта мӓмнӓн колтымы сирмӓш Христосын кечӹжӹ ӹнде толын манын попа гӹнь, ышдам кукташ тӧрӧк идӓ пу, идӓ ӓптӹргӹ.
3 Тӓмдӓм иктӓт нигыцеӓт ӹнжӹ алталы. Вет Йымы гӹц карангмаш лимешкӹ дӓ сулыкын эдемжӹ, пӹтӹмӓшӹн эргӹжӹ, толмешкӹ, тӹ кечӹм ана уж.
4 Ти пӹтӓш пуйырымыжы, мам Йымы маныт ӓль малан кымалыт, цилӓштӹ ваштареш шагалеш, ӹшкӹмжӹм нӹнӹ гӹц кӱшкӹ лӱктӓ. Йымы семӹнь Йымын пӧртӹшкӓт шӹнзеш дӓ Йымы ылам манын увертӓрӓ.
5 Эче тӓ доныда ылмем годымок тидӹ гишӓн попымем ада ӓштӹ ма?
6 Ӹшке жепшӹ шомешкӹ толаш тӹдӹм ӹнде ма кыча, тӓ пӓледӓ.
7 Худа силан тайныжы ӹшке пӓшӓжӹм тӹнгӓлӹн, но тӹдӹм цӓрӹшӹ кӹзӹт улы. Кынам цӓрӹшӹжӹ карангдымы лиэш,
8 тӹнӓм сулыкын эдемжӹ лӓктеш. Но Господь Иисус тӹдӹм ышма шӱлӹшӹжӹ доно пуштеш, лӹмлешт толмыжы доно пӹтӓрӓ.
9 Сулыкын эдемжӹ сатанан ӹштӹмӹжӹ доно улы сила, алтанзык пӓлӹк дӓ алтанзык цӱдӓвлӓ доно толеш,
10 пӹтӹшӓшлыквлӓм шукы семӹнь алтала, вет нӹнӹ, ытаралташ манын, лачокым яратыделыт.
11 Йымы нӹнӹлӓн кого алталалтмашым колта, дӓ нӹнӹ тидӹлӓн ӹнянӓт.
12 Тенге, лачоклан ӹнянӹдӹмӹ, но тӧр агылым яратышывлӓ цилӓн суйымы лит.
13 Господь яратымы шӱмбелвлӓ, мӓ тӓ верцдӓ Йымылан соок таум ӹштӹшӓшлык ылына: Шӱлӹшӹн свящӓйӹмӹжӹ дӓ лачоклан ӹнянӹмӹ гач ытаралташ Йымы тӓмдӓм тӹнгӓлтӹш гӹцок айырен нӓлӹн.
14 Тидӹлӓн тӓмдӓмӓт Йымы мӓ шайыштмына Пуры Увер гач ӱжӹн, тӓӓт мӓмнӓн Господьна Иисус Христосын лӹмлештӓрӓлтмӹжӹм нӓлӹдӓ.
15 Седӹндон, шӱмбелвлӓ, пингӹдӹн шалгыда дӓ шамак доно ӓль сирмӓш гач увертӓрӹмӹ тымдымына гӹц идӓ каранг.
16 Мӓмнӓн Господьна Иисус Христос Ӹшке дӓ мӓмнӓм яратышы, мӓлӓннӓ благодатьшы доно курымаш ладнангдарымашым дӓ пингӹдӹ уанымашым пушы Йымы, мӓмнӓн Ӓтянӓ,
17 тӓмдӓм кымылангдыжы, пуры шамакым келесӓш дӓ пуры пӓшӓм ӹштӓш со силам пужы.
1 Тенге, шӱмбелвлӓ, Господьын шамакшы тӓ донышда семӹньок пӹсӹн шӓрлӹжӹ дӓ лӹмлештшӹ манын, мӓ верцнӓ ыдылда.
2 Ярдымы, худа эдемвлӓ гӹц мӓлӓннӓ ытлаш манынат ыдылда, вет цилӓнок ӹнянӹмӓшӹштӹ уке.
3 Но Господь ӹнян ылеш, Тӹдӹ тӓмдӓм пингӹдемдӓ дӓ худа гӹц перегӓ.
4 Господь доно ушнымашты тӓлӓндӓ ӹняннӓ улы: мам тӓлӓндӓ шӱдӹмӹнӓм кӹзӹтӓт, анзыкыжымат шокташ тӹнгӓлӹдӓ.
5 Господь шӱмдӓм Йымын яратымашкыжы дӓ Христосын цӹтӹмӓшкӹжӹ виктӓрӹжӹ.
6 Шӱмбелвлӓ, мӓмнӓн Господьна Иисус Христосын лӹмжӹ доно шӱденӓ: мӓмнӓн тымдымына семӹнь агыл, а шотде ӹлӹшӹ цилӓ шӱмбел гӹц карангда.
7 Мӓ семӹньнӓ кыце ӹштӓш келеш, тӓ ӹшкеок пӓледӓ. Тӓ доныда ылмына годым мӓ шотде ӹлӹделна,
8 иктӹнӓт киндӹжӹм такеш качделна, тӓ логӹцдӓ иктӹлӓнӓт нелӹм ӹштӓш агыл манын, йыдет-кечет пиш пӓшӓм ӹштеннӓ.
9 Тӓ шотешдӓ ӹлӓш правана улы гӹнят, тӓлӓндӓ примерӹм анжыкташ, тӓӓт мӓ семӹньнӓ ӹштӹдӓ манын цаценнӓ.
10 Кӱ пӓшӓм ӹнежӹ ӹштӹ, тӹдӹ ӹнжӹ кач ‒ тӓ доныда ылмына годым тӓлӓндӓ шӱденнӓ.
11 Но мӓ колынна: тӓ логӹцдӓ южшы шотде ӹлӓт, пӓшӓм ак ӹштеп, келеш-акелӹш шӹшкӹлтӹт.
12 Техеньӹвлӓ тырын труйышты, ӹшке киндӹштӹм качкышты манын, мӓмнӓн Господьна Иисус Христосын лӹмжӹ доно шӱденӓ дӓ сарваленӓ.
13 А тӓ, шӱмбелвлӓ, пурым ӹштӓш идӓ янгылы.
14 Ти сирмӓшӹштӹ келесӹмӹ шамакнам иктӓжӹ ак колышт гӹнь, тӹдӹм ӹшкӹлӓндӓ пӓлдӹртӹдӓ дӓ, намысланыжы манын, тӹдӹн доно кӹлӹм идӓ кычы.
15 Тенге гӹнят тышманеш идӓ шотлы, а шӱмбелӹм шижтӓрӹмӹ семӹнь пелештӹдӓ.
16 Тырым пушы Господь Ӹшкеок цилӓ годымок тӓлӓндӓ со тырым пужы. Господь цилӓдӓ сага лижӹ.
17 Мӹнь, Павел, шӓлӓм ӹшке кидем доно сирем, тидӹ мӹньӹн цилӓ сирмӓшемӹн пӓлӹжӹ ылеш ‒ мӹнь тенге сирем.
18 Мӓмнӓн Господьна Иисус Христосын благодатьшы цилӓдӓ доны лижӹ. Аминь.