1 Павел, Силуан дӓ Тимофей дорц Йымы Ӓтя дӓ Господь Иисус Христос доно ушнен шалгышы Фессалоникӹштӹшӹ церкӹлӓн. Мӓмнӓн Йымы Ӓтянӓ дӓ Господь Иисус Христос гӹц тӓлӓндӓ благодать дӓ тыр лижӹ.
2 Ыдылмына годым соок тӓмдӓм ӓштенӓ, цилӓдӓ верц Йымылан таум ӹштенӓ.
3 Ӹнянӹмӓш велдӹк мам ӹштӹмӹдӓ, яратымаш велдӹк ӹштӹмӹ пӓшӓдӓ, Господьна Иисус Христослан уанымыда гӹц лӓкшӹ тырхымашда Йымына дӓ мӓмнӓн Ӓтянӓ анзылны со ышыштына ылыт.
4 Йымы яратымы шӱмбелвлӓ, Тӹдӹ тӓмдӓм айырен нӓлмӹм пӓленӓ,
5 вет шайыштмы Пуры Увернӓ шамак доно веле агыл, кого сила, Святой Шӱлӹш дӓ кого ӹнянӹмӓш доно тӓ докыда миэн шон. Лоштыда тӓ верцӹндӓ махань ылмынам тӓ ӹшкеӓт пӓледӓ.
6 Тӓ мӓ семӹньнӓ дӓ Господь семӹнь ӹштӹшӹ линдӓ; пиш шукы нелӹм тырхендӓ гӹнят, Святой Шӱлӹш пумы сусу доно Пуры Уверӹм шӱмӹшкӹдӓ пиштендӓ.
7 Тенге Македоништӹ дӓ Ахаиштӹ ӹлӹшӹ ӹнянӹшӹ цилӓ эдемлӓн корным анжыктендӓ.
8 Господьын шамакшы Македоништӹ дӓ Ахаиштӹ веле агыл тӓ гӹцдӓ шактен, а Йымылан ӹнянӹмӹдӓ гишӓн увер цилӓ вӓре шӓрлен. Мӓлӓннӓ тенгежӹ нимамат шайышташ ак кел,
9 вет нӹнӹ ӹшке мӓ гишӓннӓ шайыштыт, тӓ докыда кыце мимӹнӓ дӓ идолвлӓ гӹц Йымы докы кыце ванжымыда гишӓн попат: тӓ ӹлӹшӹ, лачокшы Йымылан служаш тӹнгӓлӹндӓ,
10 Тӹдӹн колымы гӹц ӹлӹжтӹмӹ Иисус Эргӹжӹн пӹлгом гӹц толмыжым вычедӓ. Йымын толшашлык шӹдӹжӹ гӹц Иисус мӓмнӓм ытара.
1 Шӱмбелвлӓ, ӹшкеӓт пӓледӓ: тӓ докыда мимӹнӓ такеш лиде.
2 Тӓ пӓледӓ: тилец анзыц Филиппӹштӹ парвалымым дӓ мыскылен орландарымым тырхаш вӓрештӹн, дӓ тӓ доныдаат ваштареш шалгенӹт гӹнят, тӓлӓндӓ Ӹшке Пуры Увержӹм шайышташ Йымына мӓлӓннӓ лӱддӹмӹ лиӓш палшен.
3 Мӓмнӓн тымден попымына тӧр гӹц карангмы гӹцӓт, ире агыл шанымаш гӹцӓт, йойланымаш гӹцӓт ак лӓк.
4 А Йымы мӓмнӓм терген дӓ Пуры Уверӹм мӓлӓннӓ ӹнянӓш лимӹм ужын, дӓ мӓ тенгеок попенӓ: эдемлӓн агыл, а мӓмнӓн шӱмнӓм тергӹшӹ Йымылан ярал лиӓш цаценӓ.
5 Тӓ пӓледӓ: мӓ нигынамат яжола каяш цацен попыделна. Пайдам нӓлӓш йывырт шанымашна ылде, Йымы тидӹлӓн свидетель ылеш.
6 Мӓ лӹмнӓм эдемвлӓ кӱшкӹ лӱктӹмӹм ана кӹчӓл, тӓ лоштыдаат, молывлӓ лоштат.
7 Мӓ Христосын Апостолжы ылына дӓ тӓ гӹцдӓ пингӹдӹн терген кердӹнӓ ыльы, но ӹшке тетяжӹм анжышы ӓвӓ ганьы йӹвӹжӓ тӓ донда ылынна.
8 Тӓмдӓм мӓ яратен шӹнденнӓ, Йымын Пуры Увержӹм веле агыл, йӓнгнӓмӓт тӓлӓндӓ пуаш йӓмдӹ ылынна, мӓлӓннӓ техень шергӹ линдӓ.
9 А тӓ, шӱмбелвлӓ, пӓшӓм ӹштӹмӹнӓм дӓ ӹшкӹмнӓм жӓлӓйӹде цацымынам ӓштедӓ: тӓ логӹцдӓ иктӹлӓнӓт ӹлӹмӓшӹм нелемдӓш агыл манын, Йымын Пуры Увержӹм шайыштмына годым йыдет-кечет пӓшӓм ӹштеннӓ.
10 Кыце мӓ Йымылан яралын, тӧр дӓ йӓтлӓш лидӹмӹн тӓ донда ӹштеннӓ, тидӹлӓн тӓ, ӹнянӹшӹвлӓ, дӓ Йымы свидетель ылыда.
12 (11-12) Тӓмдӓм ӹшке Кугижӓншӹшкӹжӹ дӓ лӹмлештӓрӓлтмӓшкӹжӹ ӱжшӹ Йымылан яралын ӹлӹдӓ манын, ӓтя ӹшке тетяжӹм тымдымы семӹнь каждыйдам кымылангденнӓ, ӹняндӓреннӓ дӓ сарваленнӓ ‒ тидӹм тӓ пӓледӓ.
13 Йымылан со таум келесенӓ, вет мӓ гӹцнӓ Йымын шамакшым колмыкыда, тӓ тӹдӹм эдем шамак семӹнь агыл, Йымын шамакшы семӹнь, лачокок махань ылеш, техеньӹм ышышкыда пиштендӓ. Тӹ шамак тӓ лоштыда, ӹнянӹшӹвлӓ лошты, ӹштӓ.
14 Тӓ, шӱмбелвлӓ, Христос Иисус доно ушнен шалгышы Иудейӹштӹшӹ церкӹвлӓ семӹнь ӹштӹшӹ линдӓ. Нӹнӹ иудейвлӓ гӹц мам цӹтенӹт, тӓӓт ӹшке халыкда гӹц тӹдӹмок цӹтендӓ.
15 Иудейвлӓ Господь Иисусымат, пророквлӓмӓт пуштыныт, мӓмнӓм поктылыныт. Нӹнӹ Йымылан ак яреп дӓ цилӓ эдемӹн тышманжы ылыт.
16 Язычниквлӓлӓн попаш дӓ нӹнӹм ытаралтмашкы нӓнгеӓш мӓлӓннӓ ӓптӹртӓт, тидӹн доно ӹшке сулык висӓштӹм со темен миӓт. Но остаткаэш нӹнӹ вӹкӹ Йымын шӹдӹжӹ вазын.
17 Шӱмбелвлӓ, кужы жепеш агыл тӓ донда айырлаш вӓрештӹ, но шӱмнӓ доно мӓ сагада ылына, дӓ тӓ донда вӓшлиӓш эчеӓт кого кымыл доно цаценнӓ.
18 Мӓ тӓ докыда миӓш шаненнӓ ‒ мӹнь, Павел, ик гӓнӓ веле агыл минем ыльы, но сатана ӓптӹртӹлӹн.
19 Господьна Иисус Христос толмы годым Тӹдӹ анзылны кӱ мӓмнӓн уанымашна ӓль сусуна, кӱ мӓмнӓн сӹнгӹмӓш вуйгӹшӹлнӓ? Тӓӓт агыл ма?
20 Тӓ мӓмнӓн лӹмлештӓрӓлтмӓшнӓ дӓ сусуна ылыда.
1 Седӹндон, ӹнде тырхен кердделнаат, мӓ Афинеш ӹшкетӹн кодаш шанен пиштеннӓ
2 дӓ тӓмдӓм пингӹдемдӓш, ӹнянӹмӓштӹдӓ кымылангдаш мӓ Тимофей шӱмбелнӓм ‒ Христосын Пуры Увержӹм шайыштмашты Йымын служышыжым, мӓ донна иквӓреш пӓшӓм ӹштӹшӹм ‒ тӓ докыда колтеннӓ.
3 Кӹзӹтшӹ парвалымаш гишӓн иктӓт коктешлӓнӓш ӹнжӹ тӹнгӓл. Тӓ ӹшкеӓт пӓледӓ, тенге мӓлӓннӓ Йымы пуйырен.
4 Парвалаш вӓрештеш манын, тӓ доныда ылмына годым тӓлӓндӓ андакок келесеннӓ ыльы. Тенгеок лин, тидӹм тӓ пӓледӓ.
5 Седӹндон мӹнь ӹнде цӹтен кердделамат, ӹнянӹмӹдӓ гишӓн пӓлен нӓлӓш колтенӓм. Аздарышы тӓмдӓм аздарен шоктен ма дӓ мӓмнӓн пӓшӓнӓ такеш лин ма манын, мӹнь тыргыжланенӓм.
6 А ӹнде Тимофей, тӓ дорцда мӓ докына толмыкыжы, ӹнянӹмӓшдӓ дӓ яратымашда гишӓн пуры уверӹм канден. Тӓ мӓмнӓм со пурын ӓштедӓ дӓ, кыце мӓ тӓмдӓм пиш когон ужненӓ, тӓӓт мӓмнӓм тенгеок ужнедӓ манын шайыштын.
7 Седӹндон тӓ верцдӓ, шӱмбелвлӓ, шукы парвалымына дӓ эксӹкӹм ужмына годымок ӹнянӹмӓшдӓ гишӓн кымылна кузен.
8 Тӓ Господь доно пингӹдӹн ушнен шалгедӓ гӹнь, мӓ ӹленӓ.
9 Мӓ тӓ верцдӓ Йымына анзылны пиш ӹвӹртенӓ. Вет тӓ верцдӓ сусу лимӹнӓ гишӓн Йымылан махань таум ӹштен кердӹнӓ!
10 Тӓмдӓм ужаш дӓ, ӹнянӹмӓштӹдӓ ма ак ситӹ, тӹдӹм пуаш йӧнӹм ӹштӹжӹ манын, йыдет-кечет йӓнг вашт Йымым когон сарваленӓ.
11 Йымы, мӓмнӓн Ӓтянӓ, Ӹшкежӹ дӓ Господьна Иисус Христос мӓлӓннӓ тӓ докыда корным пачшы.
12 Кыце мӓ тӓмдӓм яратенӓ, Господь тӓлӓндӓ техеньок яратымашым шукырак дӓ шукырак пуэн мижӹ, икӓнӓ-иктӹдӓм дӓ цилӓ эдемӹм яраташ палшыжы
13 дӓ тидӹн доно йӓнгдӓм пингӹдемдӹжӹ. Тенге мӓмнӓн Господьна Иисус Христос цилӓ святойжы доно толмы годым тӓ Йымы, мӓмнӓн Ӓтянӓ, анзылан йӓтлӓш лидӹмӹ дӓ святой шагалыда. Аминь.
1 Тенгежӹ, шӱмбелвлӓ, Йымылан ярал лин, кыце ӹлӹмӹлӓ, тӓ мӓ гӹцнӓ тыменьӹндӓ. Но мӓ Иисус Христосын лӹмжӹ доно сарвален ядына: эчеӓт когорак сӹнгӹмӓшкӹ шоаш цацыда.
2 Господь Иисусын лӹмжӹ доно тӓлӓндӓ мам шӱдӹмӹнӓм тӓ пӓледӓ.
3 Йымын ирӹкшӹ* техеньӹ: тӓ святой лишӓшлык ылыда. Шӓхӓрлӓнӹмӹ гӹц ӹшкӹмдӓм кычыда.
4 Тӓ логӹцдӓ каждыйок ӹшке кӓпшӹм* святойым дӓ шотеш пиштӹмӹм кычен мыштышашлык,
5 Йымым пӓлӹдӹмӹ язычниквлӓ семӹнь сулыкан кымыл шыпшмылан вуйым пушашлык агыл.
6 Тиштӹ шӱмбелжӹлӓн иктӓт худам ӹштӹшӓшлык дӓ тӹдӹ шотеш пайдам нӓлшӓшлык агыл. Кыце мӓ тӓмдӓм андакат пингӹдӹн шижтӓреннӓ, Господь техеньлӓн кӱсӹм пӧрӹктӓ.
7 Йымы мӓмнӓм сулыкан ӹлӹмӓшӹш агыл, а святой ӹлӹмӓшӹш ӱжӹн.
8 Тенге тымдымы гӹц карангшы мӓлӓннӓ Ӹшкӹмжӹн Святой Шӱлӹшӹжӹм пушы Йымым шӹкӓлеш, эдемӹм агыл.
9 Но шӱмбелвлӓм яратымы гишӓн тӓлӓндӓ сирӓш ак кел, вет икӓнӓ-иктӹдӓм яраташ Йымы Ӹшке тӓмдӓм тымден.
10 Улы Македоништӹшӹ цилӓ шӱмбел доно тенге ӹштедӓ. Тӓмдӓм сарваленӓ, шӱмбелвлӓ, эчеӓт когорак яратымашкы шода,
11 шӱдӹмӹнӓ семӹнь тырын ӹлӓш, ӹшке пӓшӓдӓм шокташ дӓ ӹлӓшдӓ ӹшке кид доно ӹштен нӓлӓш йӓнг вашт цацыда.
12 Тӹнӓм кыце ӹлӹмӹдӓм ӧрдӹж эдемвлӓ яжоэш шотлат, дӓ тӓ нима шотыштат укеӓн ада ли.
13 Шӱмбелвлӓ, уанымаш гӹц пасна ӹлӹшӹ эдемвлӓ семӹнь идӓ ойхыры манын, колышывлӓ доно ма лимӹ гишӓн пӓлӹдӹмеш тӓмдӓм ӹнем коды.
14 Иисус колен дӓ ӹлӹж кӹньӹлӹн манын ӹняненӓ гӹнь, Иисуслан ӹнянен колышывлӓмӓт Йымы Тӹдӹн доно иквӓреш кандымыланат ӹняненӓ.
15 Мӓ тидӹм Господьын шамакшы доно попенӓ: мӓ, Господь толмешкӹ ӹлен шошывлӓ, колышывлӓм изишӓт ана анзылты.
16 Вет шӱдӹмӹ годым, Архангелӹн* юкшы дӓ Йымын пычшы шактымы годым, Господь Ӹшкеок пӹлгом гӹц вала, дӓ Христослан ӹнянен колышывлӓ сек анзыц ӹлӹж кӹньӹлӹт.
17 Вара мӓ, ӹлен шошывлӓ, нӹнӹ сага Господь доно воздухышты вӓшлиӓш пӹлеш кузыктымы линӓ. Тенге мӓ соэшок Господь доно иквӓреш линӓ.
18 Тенгежӹ, ти шамаквлӓ доно икӓнӓ-иктӹдӓм кымылангдыда.
*4:3 Ирӹк ‒ воля, желание. *4:4 «Кӓп»: греклӓ сирӹмӓштӹ «ӓтӹ». *4:16 Архангел ‒ сек кого Ангелвлӓ логӹц иктӹжӹ.1 Шӱмбелвлӓ, жеп дӓ веремӓ гишӓн тӓлӓндӓ сирӓш ак кел.
2 Тӓ ӹшкеӓт яжон пӓледӓ: Господьын кечӹжӹ йыдым толшы шолы семӹнь толеш.
3 Кынам, «Тыр, лӱдӓш ак кел» манын, эдемвлӓ попаш тӹнгӓлӹт, тӹнӓм нелемшӹ ӹдӹрӓмӓшӹн ӓзӓм ӹштӹмӹ ясыланымашыжы тӹнгӓлмӹ семӹнь эксӹк нӹнӹм вычыде роалта, дӓ ытлен ак кердеп.
4 Но тӓ, шӱмбелвлӓ, пӹцкемӹштӹ ада ыл, дӓ тӹ кечӹ тӓмдӓм шолы семӹнь кычен ак керд.
5 Тӓ цилӓн валгыдын тетяжӹ, сотыгечӹн тетяжӹ ылыда. Мӓ йыдынат, пӹцкемӹшӹнӓт шачшыжы ана ыл.
6 Тенгежӹ, молывлӓ семӹнь мӓлӓннӓ амалаш ак кел, со перегӓлтшӓшлык дӓ ары шанымашан лишӓшлык ылына.
7 Вет амалышывлӓ йыдым амалат, дӓ йӱшӹвлӓ йыдым йӱт.
8 Мӓ сотыгечӹн тетяжӹ ылына гӹнь, ары шанымашан лишӓшлык ылына, перегӹшӹ кӹртни тыгыр семӹнь яратымаш дон ӹнянӹмӓшӹм, шлем семӹнь ытарымашым уанен вычымым чишӓшлык ылына.
9 Вет Йымы мӓмнӓм ӹшке шӹдӹжӹм ужаш агыл, а мӓмнӓн Господьна Иисус Христос гач ытарымашым нӓлӓш пӓлемден.
10 Мӓ ӹлӹшӹ ӓль колышы ылына, мӓлӓннӓ сагажы ӹлӓш манын, Христос мӓ верцнӓ колен.
11 Седӹндон кӹзӹт ӹштӹмӹдӓ семӹньок икӹжӓк-иктӹдӓм кымылангдыда дӓ пингӹдемдӹдӓ.
12 Шӱмбелвлӓ, тӓ лоштыда пӓшӓм ӹштӹшӹ, Господь доно ушнымашты тӓмдӓм виктӓрӹшӹ, кӓнгӓшӹм пушы эдемвлӓм жеплӓш ядына.
13 Ӹштӹмӹ пӓшӓштӹ гишӓн айыртемӹнок шотеш пиштӹдӓ дӓ яратыда. Ӹшке лоштыда тырын ӹлӹдӓ.
14 Шотде ӹлӹшӹвлӓм пелештӹдӓ, лӱдшӹвлӓм кымылангдыда, силадымывлӓлӓн палшыда, цилӓмок тырхыда манын, шӱмбелвлӓ, тӓмдӓм сарваленӓ.
15 Анжыда, иктӓт весӹн худам ӹштӹмӹжӹ гишӓн тӹдӹлӓн худа доно ӹнжӹ тӱлӹ, икӓнӓ-иктӹлӓндӓ дӓ цилӓлӓнок со пурым ӹштӓш цацыда.
16 Со сусу лидӓ.
17 Цӓрнӹде ыдылда.
18 Цилӓ шотыштат Йымылан таум ӹштӹдӓ. Тӓ гӹцдӓ, Христос Иисус доно ушнышывлӓ гӹц, Йымы тидӹмок выча.
19 Шӱлӹшӹн тылжым идӓ йӧртӹ.
20 Пророкла попымым ӱлӹкӹ идӓ шӹндӹ.
21 Цилӓ тергӹдӓ, яжожым нӓлдӓ.
22 Цилӓ худа гӹц ӹшкӹмдӓм кычыда.
23 А тырым пушы Йымы Ӹшкеок тӓмдӓм цилӓге свящӓйӹжӹ, тӓмдӓн шӱлӹшдӓ, йӓнгдӓ дӓ кӓпдӓ цилӓге мӓмнӓн Господьна Иисус Христос толмашеш йӓтлӓш лидӹмок перегӓлт кодышты.
24 Тӓмдӓм Ӱжшӹ ӹнян ылеш, Тӹдӹ тидӹм ӹштӓ.
25 Шӱмбелвлӓ, мӓ верцнӓ ыдылда.
26 Цилӓ шӱмбелӹм святой шыпшалмаш доно вӓшлидӓ.
27 Ти сирмӓшӹм цилӓ святой шӱмбеллӓн лыдаш Господь лӹм доно шӱдем.
28 Мӓмнӓн Господьна Иисус Христосын благодатьшы тӓ донда лижӹ. Аминь.