1 Йымын ирӹкшӹ* семӹнь Иисус Христосын Апостолжы лишӹ Павел дон Тимофей шӱмбел дорц
2 Христос Иисус доно ушнен шалгышы, Колоссышты ылшы святой дӓ ӹнян шӱмбелвлӓлӓн.
3 Мӓмнӓн Йымы Ӓтянӓ дӓ Господь Иисус Христос гӹц тӓлӓндӓ благодать дӓ тыр лижӹ. Тӓ верцдӓ ыдылмына годым мӓмнӓн Господьна Иисус Христосын Йымыжылан дӓ Ӓтяжӹлӓн со таум ӹштенӓ,
4 вет Христос Иисуслан ӹнянӹмӹдӓ дӓ цилӓ святой эдемӹм яратымыда гишӓн мӓ колынна.
6 (5-6) Уанен вычымыдам тӓлӓндӓ пӹлгомышты йӓмдӹлӹмӹ, тидӹм пӓлен, тӓ ӹнянедӓ дӓ яратедӓ. Мам уанен вычедӓ, тӹдӹ гишӓн тӓ пӹтӓри лачок шамакышты, тӓ докыда шошы Пуры Уверӹштӹ, колында. Йымын благодатьшы гишӓн колмы, благодать лачокок махань ылмым пӓлен нӓлмӹ кечӹ годшен тӓ лоштыдаат цилӓ сӓндӓлӹкӹштӹшӹ семӹньок Пуры Увер шӓрлӓ дӓ кӹцкӹм пуа ‒
7 Йымын благодатьшы гишӓн тӓ мӓ донна иквӓреш пӓшӓм ӹштӹшӹ яратымы Епафрас гӹц пӓлен нӓлӹндӓ, тӹдӹ тӓ верцдӓ Христослан ӹнянӹн служа.
8 Епафрасок шӱмӹштӹдӓ махань яратымашым Шӱлӹш ӹлӹжтӹмӹ гишӓн мӓлӓннӓ увертӓрен.
9 Теве малын мӓӓт цилӓ тидӹ гишӓн колмы кечӹ годшенок тӓ верцдӓ ыдылаш ана цӓрнӹ дӓ, Йымы тӓлӓндӓ ӹшке шанымыжым Шӱлӹш пумы улы ыш дӓ ынгылымаш доно тӹрӹс* пӓлен нӓлӓш палшыжы манын, со ядына.
10 Ӹлӹмӓшдӓ Йымылан келшӹшӹ лижӹ, цилӓ шотыштат Тӹдӹлӓн ярал лиӓш цацыда, керек-махань пуры пӓшӓ донат кӹцкӹм пуда дӓ Йымым пӓлӹмӓштӹ кушда манын, Йымым сарваленӓ.
11 Тӹдӹн лӹмлештӓрӓлтмӹжӹн улы силажы дӓ цилӓ ӹштен кердмӹжӹ тӓмдӓм пингӹдемдӹжӹ, тӹнӓм тӓ соок цилӓ тырхышы, ӹвӹртӹшӹ лидӓ
12 дӓ святойвлӓлӓн йӓмдӹлӹмӹ наследствым соты Кугижӓншӹштӹ нӓлӓш мӓмнӓмӓт ӱжшӹ Ӓтя Йымылан таум ӹштӓш тӹнгӓлӹдӓ.
13 Тӹдӹ мӓмнӓм пӹцкемӹшӹн властьшы гӹц ытарен дӓ яратымы Эргӹжӹн Кугижӓншӹшкӹжӹ ваштен.
14 Тӹдӹн Вӹржӹ доно мӓмнӓм сылен нӓлмӹ, Тӹдӹ гач сулыквлӓнӓм простьымы.
15 Христос ‒ кайдымы Йымын цӹрежӹ, Йымы ӹштӹмӹ улы сӓндӓлӹк гӹц анзыц шачшы,
16 вет пӹлгомышты, мӱлӓндӹ вӹлнӹ ма улы ‒ ма каеш, ма ак кай, ‒ цилӓ Тӹдӹ гач ӹштӓлтӹн: престолат, хозаланымашат, вуйлатымашат, властят.* Цилӓок Тӹдӹ гач дӓ Тӹдӹлӓн ӹштӹмӹ.
17 Тӹдӹ цилӓ гӹц анзыц ылын, дӓ цилӓок Тӹдӹ уша.
18 Тӹдӹ ‒ кӓпӹн, вес семӹньжӹ Церкӹн, вуйжы. Тӹдӹ ‒ тӹнгӓлтӹш. Цилӓ шотыштат пӹтӓришӹ лижӹ манын, колымы гӹц ӹлӹжшӹ лошты пӹтӓришӹ ылеш.
19 Цилӓ шотыштат Христосын Ӹшке ганьжы лишӓшлыкым Йымы яжоэш шотлен.
20 Христос гач Ӹшкежӹ доно цилӓ ылшым пуремдӓш, ма мӱлӓндӹ вӹлнӹ дӓ пӹлгомышты улы, цилӓ донат Тӹдӹн крестеш йоктарымы Вӹржӹ гач мирӹм ӹштӓш шанен.
21 Тӓӓт андак Йымы гӹц ӧрдӹжтӹ шалгендӓ, тӓ ышда доно Тӹдӹн тышманжы ылында, ярдымы пӓшӓм ӹштендӓ.
22 Ӹшке анзыланжы тӓмдӓм святойым, ире йӓнгӓнӹм, вуйнаматдымым шагалташ манын, Христосын эдем кӓп доно колымыжы гач Йымы ӹнде тӓ донда миреен.
23 Тӓжӹ ӹнде ӹнянӹмӓшӹштӹ цаткыды лидӓ, пингӹдӹн шалгыда, колмы Пуры Увердӓн пумы уанымаш гӹц идӓ каранг. Пуры Уверӹм Йымы ӹштӹмӹ улы сӓндӓлӹклӓн увертӓрӹмӹ, дӓ мӹнь, Павел, тӹдӹлӓн служышы линӓм.
24 Тӓ верцдӓ нелӹм тырхымем гишӓн ӹнде сусу ылам. Христосын ясыланымаштыжы ма эче ак ситӹ, тӹдӹм мӹнь кӓпӹштем Тӹдӹн Кӓпшӹ верц темем, а Тӹдӹн кӓпшӹ ‒ Церкӹ.
25 Мӹнь Церкӹлӓн служышы линӓм, вет Йымы ирӹкшӹ доно ӹшке шамакшым тӓлӓндӓ тӹрӹс увертӓрӓш мӹлӓм ӹнянен пуэн.
26 Йымын шамакшы йых гӹц йыхыш курымвлӓ мычкы шӹлтӹмӹ тайна ылын, а ӹнде Тӹдӹн святойвлӓжӹлӓн пачмы.
27 Нӹнӹлӓн Йымы язычниквлӓ лошты ти тайнын махань пайда дӓ лӹмлештӓрӓлтшӹ ылмыжым анжыктынежӹ ылын. Тайныжы техеньӹ: тӓ донда Христос ‒ лӹмлештӓрӓлтмӓшӹн уанымашыжы.
28 Христос Иисус доно ушнымашты каждый эдемӹм нимахань ситӹдӹмӓш гӹц пасна Йымы анзыкы шагалташ манын, улы ыш-пӓлӹмӓш доно цилӓ эдемлӓн кӓнгӓшӹм пуэн дӓ цилӓ эдемӹм тымден, мӓ Тӹдӹ гишӓн увертӓренӓ.
29 Тидӹ верцок мӹнь кӧргӹштем кого сила доно ӹштӹшӹ Тӹдӹн силажы доно пиш цацен пӓшӓлем.
*1:1 Ирӹк ‒ воля, желание. Тенгеок ‒ 1:25 *1:9 Тӹрӹс – целый, полный, целиком. *1:16 Тиштӹ Ангел чин гишӓн попалтеш.1 Тӓ верцдӓӓт, Лаодикиштӹ, Иерапольышты ӹлӹшӹвлӓ верцӓт дӓ, кӱ мӹньӹн цӹреэмжӹмӓт ужде, цилӓштӹ верц кыце когон мӹлӓм кредӓлӓш вӓрештеш, тӓ пӓлӹдӓ манын шанем.
2 Цилӓштӹн шӱмӹштӹ кымылангжы дӓ цилӓнӓт яратымаш доно иктӹш ушнышты, цицмӓш ынгылымашын пумы улы пайдашкыжы ‒ Ӓтя Йымын дӓ Христосын тайныштым пӓлӹмӓшкӹ ‒ шошты манын цацем.
3 Кого ышын дӓ пӓлӹмӓшӹн цилӓ пайдаштым Христос доны перегӓш тайымы.
4 Тӓмдӓм иктӓт йӹвӹжӓ йой шамаквлӓ доно ӹнжӹ алталы манын, мӹнь тидӹм попем.
5 Вет кӓпем доно тӓ сагада ам ыл гӹнят, йӓнгем доно сагада ылам, шот доно ӹлӹмӹдӓм дӓ Христослан пингӹдӹн ӹнянӹмӹдӓм ужын, сусу ылам.
6 Тенгежӹ, Христос Иисусым, Господьым, шӱмӹшкӹдӓ пыртендӓ гӹнь, Тӹдӹн доно ушнен ӹлӹдӓ.
7 Тӓмдӓм тымдымы семӹнь Христосеш важангда, ӹлӹмӓшдӓн негӹцшӹ Тӹдӹ лижӹ, ӹнянӹмӓштӹ пингӹдемдӓ, таум шукы ӹштӹдӓ.
8 [Шӱмбелвлӓ,] Христосеш агыл, а эдем тымдымашеш дӓ сӓндӓлӹкӹн природыштышы шукы йиш силаэш негӹцлӓлтшӹ, ышанла кайшы тымдымаш дӓ акел алталымаш доно тӓмдӓм иктӓт кид лӹвӓкӹжӹ ӹнжӹ нӓл манын шеклӓнӹдӓ.
9 Христосын эдем кӓпӹштӹжӹ Йымын махань ылмыжы цицмӓш ӹлӓ.
10 Тӓӓт ти цицмӓшкӹ Христос гач ушнендӓ, Тӹдӹжӹ ‒ улы вуйлатымашын дӓ властьын вуйжы.
11 Тӹдӹн доно ушнымашты тӓ пӹчмӓшӹм* эртендӓ, но тидӹ эдем кид доно ӹштӹмӹ пӹчмӓш агыл, а вуйта эдемӹн сулыкан кӓп дон йӓнг кымылжым пӹчкӹн нӓлмӓш ылеш. Техень пӹчмӓшӹм Христос ӹштӓ.
12 Крестӹмӹ гач Тӹдӹн доно иквӓреш тайымы ылында, крестӹмӹ гачок, Тӹдӹм колымы гӹц ӹлӹжтӹшӹ Йымын силажылан ӹнянӹмӹдӓ гишӓн, Тӹдӹн доно иквӓрешок ӹлӹжӹндӓ.
13 Тӓмдӓм, сулыкда дӓ пӹчдӹмӹ ылмыда гишӓн колышывлӓм, Христос доно иквӓреш Йымы ӹлӹшӹм ӹштен. Тӹдӹ мӓмнӓн цилӓ сулыкнам простен,
14 мӓ ваштарешнӓ сирӹмӹ пынзалтышан пумагам ӹштӹл шуэн, крестеш пыдален карангден.
15 Тидӹн доно вуйлатымаш дӓ власть гӹц силаштым поген нӓлӹн, нӹнӹм цилӓ анзылны намысыш пыртен дӓ, крестӹ доно, нӹнӹм лӹмлештӹн сӹнген.
16 Тенгежӹ, мам качмы ӓль йӱмӹ, ӓль иктӓ-махань празныкым, у тӹлзӹм ӓль кукшыгечӹм айымы гишӓн тӓмдӓм иктӓт ӹнжӹ вырсы.
17 Тидӹ ‒ ма лишӓшлыкын ӹмӹлжӹ веле, а кӓп* ‒ Христосын.
18 Кӱ эдем анзылны смирнӓлӓ каяш цаца, Ангеллӓн кымалмым жеплӓ дӓ, вуйта каймашым ужын, когоэшнӹлеш, техеньӹвлӓ логӹц тӓмдӓм иктӓт ӹнжӹ алталы. Эдем ышышты доно нӹнӹ такеш чываньланат,
19 вуй доно ‒ Христос доно ‒ кӹлӹштӹ уке, а Христосшы улы кӓпӹм урда, ежӹнг дӓ шӱнвлӓ доно уша, Йымын шанымыжы семӹнь кушта.
21 (20-21) Тенгежӹ, тӓ Христос доно иквӓреш колендӓ дӓ сӓндӓлӹкӹн природыштышы шукы йиш силажы гӹц ытлендӓ гӹнь, малын ти сӓндӓлӹкӹштӹшӹ семӹнь «Ит тӹкнӹ», «Ит кач», «Ит тӹкӓл» манын шӱдӹмӹм шоктедӓ?
22 Ма гишӓн тенге попат, цилӓ тидӹ кычылтмы доно пӹтӓ. Техень цӓрӹмӓш ‒ эдемӹн шӱдӹмӹжӹ дӓ тымдымыжы веле.
23 Ӹшке шанен лыкмы семӹнь служымаш, смирнӓлӓ каяш цацымаш дӓ кӓпӹм орландарымаш ‒ цилӓ тидӹ ышанла каймаш дӓ кӓп дон йӓнгӹн ядмыштым шотыш нӓлдӹмӓш веле.
*2:11 Пӹчмӓш: книгӓ мычаштышы лӹмдерӹм анжыда. *2:17 «Кӓп»: греклӓ сирӹмӹм «Ма лачокшымок улы» манынат ынгылаш лиэш.1 Тӓ Христос доно иквӓреш ӹлӹжӹндӓ гӹнь, тенгежӹ пӹлгомыштышым кӹчӓлдӓ. Тӹштӹ Йымын вургымла велнӹжӹ Христос шӹнзӓ.
2 Мӱлӓндӹ вӹлнӹшӹ гишӓн агыл, а пӹлгомыштышы гишӓн шаныда.
3 Вет тӓ колендӓ, дӓ тӓмдӓн ӹлӹмӓшдӓ Христос доно иквӓреш Йымы доно ушнымашты кайде перегӓлтеш.
4 Кынам Христос, тӓмдӓн ӹлӹмӓшдӓ, толеш, тӹнӓм тӓӓт Тӹдӹн доно иквӓреш лӹмлешт толыда.
5 Седӹндон ти сӓндӓлӹкӹштӹшӹ тӓмдӓн ма улы, тӹдӹм пӹтӓрӹдӓ: шӓхӓрлӓнӹмӹм, ярдымы кайышым, темдӹмӹ, сулыкан кымыл шыпшмым, шыкланымым. Шыкланымыжы идоллан кымалмы доно икток ылеш.
6 Техень кайышвлӓ гишӓнок шамакым колыштдымы эдемвлӓ вӹкӹ Йымын шӹдӹжӹ вазеш.
7 Андак тӓӓт техень кайыш кид лӹвӓлнӹ ылында, ӹшкӹмдӓм тенгеок кычендӓ.
8 А ӹнде тӓ цилӓок ӧрдӹшкӹ карангдыда: шӹдӹм, азнымым, йӓллӓн худам шанымым, эдем вӹкӹ попымым, ышма гӹц лӓкшӹ худа шаям.
9 Икӹжӓк-иктӹлӓндӓ алтален идӓ попы, вет вӹлецдӓ тошты эдемӹм пӓшӓжӹ доно иквӓреш кыдаш шуэндӓ,
10 у эдемӹшкӹ вӹдӹлӓлтӹндӓ. Тӹдӹжӹ, Ӹштӹшӹжӹ ганьы лин миэн, со уэмеш, Йымым цицмӓш пӓлӓш тыменеш.
11 Тиштӹ эллинӓт, иудейӓт, пӹчмӓт, пӹчдӹмӓт, варварат,* скифӓт, рабат, ирӹкӓнӓт уке, но Христос ‒ тидӹ цилӓ дӓ цилӓштӓт.
12 Тенгежӹ тӓ, Йымы айырен нӓлмӹ, святой дӓ яратымы эдемвлӓ, йӓнг вашт жӓлӓйӹмӓш, пуры, смирнӓ, шӹмӓ ылмы, шукы тырхымаш доно вӹдӹлӓлтдӓ.
13 Икӓнӓ-иктӹдӓм цӹтен ӹлӹдӓ, тӓ логӹцдӓ иктӓжӹн весӹ докы ӧпкӹдӓ улы гӹнь, вӓшӓ-вӓшӓ простьыда. Кыце Христос тӓмдӓм простен, тӓӓт тенгеок ӹштӹдӓ.
14 Сек анзыцшок яратымаш доно вӹдӹлӓлтдӓ, тӹдӹ цилӓ яжом уша.
15 Йӓнгӹштӹдӓ Йымын тыржы хозаланыжы. Тӓмдӓм, ик кӓпӹн лаштыквлӓжӹм, тӹ тырышкы ӱжмӹ. Таум ӹштен мыштышы лидӓ.
16 Шӱмӹштӹдӓ Христосын шамакшын улы пайдажы ӹлӹжӹ. Улы ыш-пӓлӹмӓш доно икӹжӓк-иктӹдӓм тымдыда, икӹжӓк-иктӹлӓндӓ кӓнгӓшӹм пуда, псаломым, хвальымы мырым дӓ шӱлӹш кымылангдымы мырым шӱмӹштӹдӓ Господьлан таум ӹштен мырыда.
17 Мам попедӓ ӓль мам ӹштедӓ, цилӓок Господь Иисус Христос лӹм доно лижӹ, Тӹдӹ гач Йымылан дӓ Ӓтялӓн таум келесӹдӓ.
18 Вӓтӹвлӓ, марыдам колыштда, Господьлан ӹнянӹшӹ ӹдӹрӓмӓшлӓн тидӹ олмыдеш.
19 Марывлӓ, вӓтӹдӓм яратыда дӓ нӹнӹ доно костан идӓ ли.
20 Тетявлӓ, ӓтя-ӓвӓдӓм цилӓ шотыштат колыштда, Господьлан тидӹ келшӓ.
21 Ӓтявлӓ, тетявлӓдӓн кымылышты ӹнжӹ валы манын, нӹнӹм соок идӓ пелештӹ.
22 Рабвлӓ, мӱлӓндӹ вӹлнӹшӹ хозадавлӓм цилӓ шотыштат колыштда. Шӱдӹмӹштӹм, эдемлӓн ярал лиӓш цацен, хоза анзылны веле агыл, а ире шӱм доно, Йымы гӹц лӱдӹн ӹштӹдӓ.
23 Цилӓ пӓшӓдӓм эдемлӓн агыл, а Господьлан ӹштӹмӹ семӹнь йӓнг вашт ӹштӹдӓ.
24 Господь гӹц тӓр шотеш наследствым нӓлшӓшлыкдам тӓ пӓледӓ, вет Господь Христослан служедӓ.
25 А акъярым ӹштӹшӹ ӹшке акъярыжы семӹнь нӓлеш. Йымы цилӓм ик семӹнь анжа.
*3:11 Греквлӓ цилӓ вес халыквлӓм «варвар» маныныт.1 Хозавлӓ, рабвлӓ доно цилӓ шотыштат тӧр ӹштӹшӹ лидӓ. Идӓ монды: пӹлгомышты тӓмдӓнӓт Хозада улы.
2 Тырхен дӓ янгылыде со ыдылда, таум ӹштӹдӓ.
3 Ӹшке увержӹм шӓрӓш, Христосын тайныжым увертӓрӓш Йымы мӓлӓннӓ амасам пачшы манын, мӓ верцнӓӓт ыдылда. Тӹ тайна гишӓнок мӹнь кӹзӹт питӹрӹмӓштӹ шӹнзем,
4 дӓ мӹнь тӹдӹм раскыдын увертӓрӹшӓшлык ылам. Мӹлӓнем ти пӓшӓм керӓл семӹнь ӹштӓш манын ыдылда.
5 Ӧрдӹжвлӓ доно ӹшкӹмдӓм шот доно кычыда, цилӓ йӧнӓн веремӓм кычылтда.
6 Шаяда со пуры, санзал доно тотангдымы лижӹ, каждыйлан кыце келесӹмӹлӓ, пӓлӹшӓшлык ылыда.
7 Господьлан ӹнянӹн служышы, мӓ донна иквӓреш ӹштӹшӹ яратымы Тихик шӱмбел тӓлӓндӓ мӹнь гишӓнем цилӓ келесӓ.
8 Тидӹлӓнок тӹдӹм тӓ докыда колтенӓм. Тӹдӹ кыце ӹлӹмӹдӓм пӓлен нӓлжӹ дӓ йӓнгдӓм кымылангдыжы.
9 Тӹдӹ сага ӹнян дӓ яратымы Онисим шӱмбелнӓ миӓ, тӹдӹ тӓ логӹцдӓ иктӹжӹ ылеш. Нӹнӹ тиштӹшӹ пӓшӓ гишӓн цилӓ увертӓрӓт.
10 Мӹнь сагаэм кызаматышты шӹнзӹшӹ Аристарх, тенгеок Варнаван Марк двоюродный шӱмбелжӹ тӓлӓндӓ шӓлӓм колтат. Марк шотышты мам ӹштӹмӹлӓ, мӓ келесеннӓ: тӹдӹ тӓ докыда миӓ гӹнь, пурын вӓшлидӓ.
11 Эче Иуст манмы Иисус шӓлӓм колта. Пӹчмӓнвлӓ логӹц нӹнӹ веле Йымын Кугижӓншӹлӓн мӹнь сагаэм пӓшӓм ӹштӓт. Нӹнӹ мӹлӓнем кымылангдымаш ылыныт.
12 Иисус Христосын цоражы, тӓмдӓн Епафрасда шӓлӓм колта. Нимахань ситӹдӹмӓшдӹмӹ лидӓ, цилӓ шотыштат Йымын шанымыжы семӹнь ӹлӹдӓ манын, тӓ верцдӓ цӓрнӹде ыдылын кредӓлеш.
13 Тӹдӹ тӓ верцдӓ дӓ Лаодики дон Иерапольыштышывлӓ верц улы кымыл доно шытырлана, тидӹм мӹнь ӹняндӓрен кердӓм.
14 Яратымы врач Лука дӓ Димас тӓлӓндӓ шӓлӓм колтат.
15 Лаодикиштӹшӹ шӱмбелвлӓлӓн, тенгеок Нимфанлан дӓ тӹдӹн пӧртешӹжӹ погынышы церкӹлӓн шӓлӓм келесӹдӓ.
16 Ти сирмӓшӹм тӓ доныда лыдмыкы, тӹдӹм Лаодикиштӹшӹ церкӹштӓт лыдыктыда, Лаодикиштӹшӹ сирмӓшӹм тӓӓт лыдда.
17 Архипплӓн келесӹдӓ: «Анжы, Господь доно ушнымашты нӓлмӹ пӓшӓэтӹм ӹштен шокты».
18 Мӹнь, Павел, ти шӓлӓм ӹшке кидем доно сирем. Мӹньӹн питӹрӹмӓштӹ шӹнзӹмем ӓштӹдӓ. Тӓ доныда Йымын благодатьшы лижӹ. Аминь.