1 Иисус Христосын Павел дон Тимофей цоравлӓжӹ гӹц Христос Иисус доно ушнен шалгышы, Филиппӹштӹ ылшы цилӓ святойлан, тенгеок епископ дон диаконвлӓлӓн.
2 Мӓмнӓн Йымы Ӓтянӓ гӹц дӓ Иисус Христос Господь гӹц тӓлӓндӓ благодать дӓ тыр лижӹ.
3 Хоть-кынамат тӓмдӓм ӓшӹндӓрӹмем годым Йымемлӓн таум келесем.
4 Цилӓдӓ верц Йымым сарвалымем годым соок ӹвӹртен ыдылам,
5 вет тӓ пӹтӓришӹ кечӹ гӹцок тагачы яктеӓт Пуры Уверӹм шӓрӓш палшедӓ.
6 Мӹнь ӹнянем: кӧргӹштӹдӓ пуры пӓшӓм тӹнгӓлшӹ Йымы тӹдӹм Иисус Христосын кечӹжӹ якте мычашыш шокта.
7 Цилӓдӓ гишӓн мӹньӹн тенге шанымем тӧр. Тӓ йӓнгӹштем ылыда. Питӹрӹмӓштӹ лиӓм ӓль Пуры Уверӹм защищӓен попем дӓ тӹдӹ верц ӹняндӓрен шайыштам, цилӓн мӹнь донем иквӓреш Йымын благодатьыштыжы ылыда.
8 Мӹнь тӓмдӓм Иисус Христосын яратымашыжы доно яратем, тидӹлӓн Йымы свидетель ылеш.
9 Тӓмдӓн яратымашда пӓлӹмӓш дӓ шижӹн-ынгылен мыштымаш доно соок утларак шукемжӹ манын, мӹнь ыдылам.
10 Тӹнӓм ма сек яжо ылмым терген кердӹдӓ, тӓ Христосын кечӹнжӹ ире, самыньдымы лидӓ
11 дӓ Иисус Христосын шачыктымы тӧр ӹштӹмӓш кӹцкӹ доно циц темӹдӓ, тидӹжӹ Йымылан хвальымашым дӓ лӹмлештӓрӹмӓшӹм канда.
12 Шӱмбелвлӓ, пӓлӹдӓ манын шанем: ма мӹнь донем лин гӹнь, Пуры Уверлӓн утларак пайдам канден.
13 Ӹнде преториштӹшӹ улы халыклан, тенгеок цилӓ молыланат пӓлӹмӹ лин: мӹнь питӹрӹмӓштӹ Христос верц ылам.
14 Господь доно ушнышы шӱмбелвлӓ логӹц шукыракшы мӹньӹн питӹрӹмӓштӹ шӹнзӹмем гишӓн пингӹдемӹнӹт, Йымын шамакым эчеӓт патырын дӓ лӱддеок шайышташ тӹнгӓлӹнӹт.
15 Лачок, иктӹвлӓ йӓлӹнлӓн йӓнг йылымышты дӓ кӹрмӓшӓш яратымышты доно Христос гишӓн увертӓрӓт, а весӹвлӓжӹ тидӹм пуры шанымаш доно ӹштӓт:
16 иктӹвлӓжӹ ире агыл йӓнг доно, ӹшкӹлӓн пайдам кӹчӓлӹн, Христос гишӓн увертӓрӓт, тидӹн доно мӹлӓнем питӹрен шӹнзӹмӓштӹ орлыкым шукемдӹнештӹ,
17 а весӹвлӓжӹ, мӹньӹм Пуры Уверӹм перегӓш шагалтымым пӓлӓтӓт, яратымаш гишӓн ӹштӓт.
18 Ну и ма? Христос гишӓн хоть-кыце увертӓрӹштӹ, яжола каяш цацен ӓль йӓнг вашт, тидӹлӓн мӹнь ӹвӹртем веле. Анзыкыжымат ӹвӹртӓш тӹнгӓлӓм,
19 вет мӹнь пӓлем: тӓмдӓн ыдылмыда дӓ Иисус Христосын Шӱлӹшӹжӹн палшымы гишӓн тидӹ цилӓжӓт мӹлӓнем ытарымашкы сӓрнӓлтеш.
20 Мӹнь пишок вычем дӓ ӹнянем: мӹлӓнем нима шотыштат намысланаш ак вӓрешт, но лӱддӹмӹ лиӓм, дӓ хоть ӹлӹмӓш, хоть колымаш лижӹ, Христос мӹньӹн кӓпем гач кӹзӹт молнамшы семӹньок лӹмлештӓрӓлтеш.
21 Ӹлӹмӓш мӹлӓнем – Христос, а колымаш – сӹнгӹмӓш.
22 Кӓпӹштӹ ӹлӹмӓш мӹньӹн пӓшӓэм гач кӹцкӹм канда гӹнь, мам айырен нӓлшӓш, мӹнь ам пӓлӹ.
23 Мӹньӹм тидӹжӓт, тӹдӹжӓт шыпшеш: мӹнь ти ӹлӹмӓш гӹц кенем дӓ Христос доны линем, тидӹжӹ шукы пачаш яжорак,
24 но тӓ верцдӓ кӓпӹштӹ ӹлӓш кодаш керӓлрӓк.
26 (25-26) Мӹнь тидӹлӓн ӹнянем, седӹндон пӓлем: тӓ ӹнянӹмӓштӹ анзылтымашкы шода дӓ ӹвӹртӹдӓ манын, мӹнь тишӓк кодам дӓ, тӓ докыда угӹц толмыкем, мӹнь гишӓнем сусуда Иисус Христос доно ушнен шалгымашты шукемжӹ манын, цилӓдӓ доно иквӓреш ылам.
27 Анжыда, Христосын Пуры Увержӹлӓн яралын ӹлӹдӓ. Мӹнь тӓмдӓм ужаш толам ӓль агым, тӓ ик шӱлӹш доно икышын ылыда дӓ Евангелиэш негӹцлӓлтшӹ ӹнянӹмӓш верц пингӹдӹн шалгедӓ манын колнем.
28 Ваштареш шалгышывлӓ гӹц тӓ нима шотыштат лӱдшӓшлык ада ыл. Тидӹжӹ нӹнӹлӓн колымашын пӓлӹжӹ ылеш, а тӓлӓндӓ – ытарымашын пӓлӹжӹ, тидӹ – Йымы гӹц.
29 Вет Христослан ӹнянӓш веле агыл, Тӹдӹн верц парвалашат тӓлӓндӓ цӓш пуалтын.
30 Мӹньӹн кредӓлмӓшем тӓ ужында дӓ эчеӓт кредӓлмем гишӓн тӓ кӹзӹт колыда. Тӓмдӓнӓт ти кредӓлмӓшок.
1 Тенгежӹ, Христос доно ушнымаш тӓмдӓм кымылангда гӹнь, Тӹдӹн яратымашыжы тӓмдӓм ладнангдара гӹнь, Шӱлӹш доно ушнымаш улы гӹнь, пуры кымыл дӓ жӓлӓйӹмӓш улы гӹнь,
2 мӹньӹн сусуэм цицмӓшӹм ӹштӹдӓ: цилӓн ик семӹнь шаныда, икань яратымашан, икышын дӓ ик кымылан лидӓ.
3 Ӹшкӹлӓн пользым кӹчӓлмӹ ӓль ӹшкӹмдӓм хвальымы гишӓн нимат идӓ ӹштӹ, а иктӹ-весӹдӓм ӹшке гӹцдӓ когоракеш смирнӓн шотлыда.
4 Каждый ӹшке гишӓнжӹ веле агыл, а вес эдемвлӓ гишӓнӓт шытырланыжы.
5 Тӓмдӓн шанымашда дӓ шӱм шижмӓшдӓ Христос Иисусын ганьок лижӹ.
6 Тӹдӹ, Йымы цӹреӓн ылмыжы вӹлец,
Йымы доно иктӧр лиӓш цацыде,
7 а Ӹшкӹмжӹм Ӹшке лапемден,
цоран цӹрежӹм нӓлӹн, эдем гань лин,
Тӹдӹм цилӓн эдем цӹреӓнӹм ужыныт.
8 Тӹдӹ Ӹшкӹмжӹм Ӹшке изиэш лыктын,
колымыжы якте, крестеш колымы яктеӓт, шамакым колыштшы ылын.
9 Седӹндон Йымы Тӹдӹм кӱшкӹ лӱктӓлӹн,
цилӓ лӹм гӹцӓт кӱшнӹ шалгышы лӹмӹм пуэн.
10 Тенгелӓ, пӹлгомыштышы, мӱлӓндӹштӹшӹ дӓ мӱлӓндӹ лӹвӓлнӹшӹ
цилӓн Иисус лӹмеш сукалтышашлык ылыт,
11 каждый йӹлмӹ, Ӓтя Йымылан лӹмлештӓрӓлтмӓшӹм кандаш манын,
Иисус Христосым Господь манын пачын попышашлык.
12 Тенгелӓ, яратымы шӱмбелвлӓэм, тӓ донда ылмем годым кыце мӹньӹм соок колыштында, ӹнде тӓ дорцда мӹндӹрнӹ ылмем годым эчеӓт утларак колыштда: лӱдӹн дӓ цӹтӹрен ӹшке ытаралтмашдам йӓмдӹлен шоктыда.
13 Йымы Ӹшкеок тӓ кӧргӹштӹдӓ пӓшӓм ӹштӓ, тенгежӹ тӓ Тӹдӹн пуры ирӹкшӹ* доно келшӹшӹ пӓшӓм ӹштӹнедӓ дӓ ӹштедӓ.
15 (14-15) Локтылалтшы дӓ шӓхӓрлӓнӹшӹ роды-йых лошты тӓ йӓтлӓш лидӹмӹ, ире, Йымын вуйнаматдымы тетяжӹ лиӓш манын, цилӓок ӧпкӓлӹде дӓ коктелӓнен шаныде ӹштӹдӓ. Техень роды-йых лошты тӓ сӓндӓлӹкӹштӹ шӹдӹр семӹнь йӹлгӹжӹдӓ,
16 ӹлӹмӓш шамакым кычедӓ. Цилӓ тидӹ гишӓн Христосын кечӹнжӹ мӹнь хвален кердӓм, вет тидӹжӹ мӹньӹн такеш агыл цацымем дӓ такеш агыл пӓшӓм ӹштӹмем анжыкта.
17 Но ӹнянӹмӓшдӓ верц жертвӹм пуэн эртӓрӹмӹ служымашты вӹрем йога ыльы гӹнят, мӹнь ӹвӹртем, цилӓдӓ доно иквӓреш ӹвӹртем.
18 Тенгеок тӓӓт ӹвӹртӹдӓ, мӹнь сагаэм иквӓреш сусу лидӓ.
19 Тӓмдӓн кыце ӹлӹмӹдӓ гишӓн пӓлен нӓлӹн, мӹньӹнӓт кымылем кузыжы манын, тӓ докыда Тимофейӹм йӹле колтен кердмемлӓн Господь Иисус доно ушнен ӹнянем.
20 Тӹдӹ семӹнь йӓнг вашт тӓ верцдӓ цацышы мӹньӹн иктӓт весӹ уке,
21 вет цилӓн Иисус Христосын пӓшӓжӹ верц агыл, а ӹшкӹмӹштӹн пӓшӓштӹ верц веле цацат.
22 А Тимофейлӓн ӹнянӓш лиэш манын, тӓ пӓледӓ: Пуры Уверлӓн тӹдӹ мӹнь донем тенге пӓшӓм ӹштен, кыце ӓтяжӹ доно эргӹ ӹштӓ.
23 Тенгежӹ, мӹнь донем ма лишӓшлыкым пӓлен нӓлмӹкем, тӹдӹм тӹнӓмок колтен кердӓм манын ӹнянем.
24 Мӹнь ӹшкежӓт шукышты агыл тӓ докыда толам манын, Господь мӹлӓнем ӹнянӹмӓшӹм пуа.
25 Но Епафродитӹм, мӹнь донем иквӓреш пӓшӓлӹшӹ дӓ цацышы шӱмбелнӓм, мӹлӓнем келмӹ годым палшаш колтымы эдемдӓм, тӓ докыда колташ керӓлеш шотлем.
26 Тӹдӹ тӓмдӓм цилӓдӓм пишок ужнежӹ дӓ церлӓнӹмӹжӹ гишӓн уверӹм колмыланда тыргыжлана.
27 Епафродит лачокат колышаш гань церлӹ ылын, но Йымы тӹдӹм жӓлӓен, дӓ тӹдӹм веле агыл – мӹлӓнем ойхы вӹлӓн ойхы ӹнжӹ шукем манын, ӹшкӹмемӹмӓт жӓлӓен.
28 Тенгежӹ тӓлӓндӓ, тӹдӹм угӹц ужмыкы, сусу лижӹ, а мӹлӓнем чӹдӹрӓк ойхы лижӹ манын, мӹнь тӹдӹм йӹлерӓк колтем.
29 Тӹдӹм Господь доно ушнымашты ӹвӹртен вӓшлидӓ дӓ тӹдӹ гань эдемвлӓм жеплӹдӓ.
30 Тӹдӹжӹ Христосын пӓшӓжӹ гишӓн изиш веле колыде. Махань палшыкым тӓ мӹлӓнем пуэн кердделда, тӹдӹм пуаш манын, ӹлӹмӓшӹжӹмӓт жӓлӓйӹде.
*2:13 Ирӹк – воля, желание.1 Тенгежӹ, шӱмбелвлӓэм, Господь доно ушнымашты ӹвӹртӹдӓ. Тидӹмок угӹц тӓлӓндӓ сирӹмем мӹньӹм ак ясыландары, а тӓлӓндӓ пайда лиэш.
2 Пивлӓ гӹц, худа пӓшӓзӹвлӓ гӹц перегӓлтдӓ, пӹчкедӹшӹвлӓ гӹц перегӓлтдӓ.
3 Мӓ, шӱлӹш доно Йымылан служышы, Христос Иисус доно когоэшнӹшӹ дӓ кӓплӓн ӹштӹмӹ овуцалан агыл ӹнянӹмӓшӹм пиштӹшӹвлӓ, лачокат пӹчмӹ ылына.
4 Хоть мӹнь ӹшкежӹ кӓплӓнӓт уанымашым пиштен кердӓм ыльы. Иктӓжӹ кӓплӓн ӹнянӹмӓшӹм пиштӓш шана гӹнь, тидӹлӓн мӹньӹн вир утларак улы:
5 шачмыкем, мӹлӓнем кӓндӓкшӹмшӹ кечӹн пӹчмӹ овуцам ӹштенӹт, Израиль халыкын Вениамин роды-йых гӹц, еврей халык гӹц шачшы еврей ылам, а закон шотышты фарисей линӓм,
6 ӹшке пӓшӓэм докы тенге шӱмӓнгӹнӓм – Йымын Церкӹм поктылшы линӓм, законым колыштмы доно тӧр ӹштӹмӹ шотышты – йӓтлӓш лидӹмӹ эдем.
7 Но ма мӹлӓнем сӹнгӹмӓш лин, тидӹм Христос гишӓн ямдымеш шотлем.
9 (8-9) Тенге, мӹнь цилӓок ямдымеш шотлем, вет Христос Иисусым, мӹньӹн Господьым, пӓлӹмӓш мӹлӓнем цилӓ гӹцӓт утларак яжо. Тӹдӹ гишӓн мӹнь цилӓ шуэн колтенӓм. Христосым ӹшкӹлӓнем моаш дӓ Тӹдӹн доно цицмӓш ушнаш манын, мӹнь цилӓок кыныжеш шотлем. Тенге мӹнь ӹшке сылен нӓлмем доно агыл, законым колыштмы доно агыл, а Христослан ӹнянӹмӹ доно тӧр ӹштӹшеш лӓктӓм. Тенге тӧреш лӓкмӓш ӹнянӹмӓш верц Йымы гӹц лиэш.
10 Мӹнь Христосым дӓ Тӹдӹн ӹлӹжмӹжӹн силажым пӓлӹнем, Тӹдӹн ясыланымашкыжы ушнынем дӓ, Тӹдӹ семӹнь колен, Тӹдӹ гань линем.
11 Тенге, ӓнят, мӹнят колымаш гӹц ӹлӹжтӹмӹ лиӓм.
12 Мӹнь кышкы кешӓшлык ылам, тӹшкӹ шонам ӓль цицмӓшӹш толынам манын ам попы, но, кыце Христос Иисус мӹньӹм нӓлӹн, тенгеок, вычымым нӓлӓш цацен, силам пиштен, анзыкы кеем.
13 Шӱмбелвлӓ, мӹнь кышкы кешӓшлык ылам, тӹшкӹ эче шонам манын ам шотлы гӹнят, иктӹм ӹштем: шайылан кодшым цилӓ монден, анзыкы улы сила доно кеем.
14 Мӹнь тӹшкӹ шонем, кышты Христос Иисус доно ушнен шалгымашты Йымын пӹлгомыштышы ӱжмӹжӹ гач пушашлык сӹнгӹмӓш подарка мӹньӹм выча.
15 Тенгежӹ мӓ логӹцнӓ ӹнянӹмӓштӹ кушкын шошывлӓ тенге шанышашлык ылыт, а тӓ иктӓ-ма гишӓн вес семӹнь шанедӓ гӹнь, тидӹмӓт Йымы тӓлӓндӓ анжыкта.
16 Но махань кӱкшӹцӹш мӓ шонна, мӓ тенгеок шанышашлык дӓ тӹ правило семӹньок ӹлӹшӓшлык ылына.
17 Шӱмбелвлӓ, мӹнь семӹнем ӹштӹдӓ, мӓмнӓн тӓлӓндӓ анжыктымы корны доно каштшывлӓ вӹкӹ анжыда.
18 Мӹнь тидӹ гишӓн тӓлӓндӓ шӹрен попенӓм, дӓ ӹнде сӹнзӓвӹд яре келесем: шукынжы Христосын крестӹжӹн тышманжы семӹнь ӹлӓт.
19 Нӹнӹн мычашышты – пӹтӹмӓш, нӹнӹн йымышты – мӹшкӹр, а лӹмнерӹштӹ – намысан кайыш. Нӹнӹ мӱлӓндӹ вӹлнӹшӹ гишӓн шанат.
20 Но мӓмнӓн сӓндӓлӹкнӓ пӹлгомышты, тӹшецӹн мӓ Ытарышым, мӓмнӓн Господь Иисус Христосым, выченӓ.
21 Кид лӹвӓкӹжӹ цилӓ нӓлӓш Тӹдӹн силажы улы, ти сила доно Тӹдӹ мӓмнӓн лышкыды кӓпнӓм Ӹшкӹмжӹн лӹмлештӓрӓлтшӹ кӓпшӹ ганьыш сӓртен вашталта.
1 Тенгежӹ, яратымы дӓ ужаш шанымы шӱмбелемвлӓ, мӹньӹн сусуэм дӓ сӹнгӹмӓш вуй ӓршӓшем, Господь доно ушнен шалгыда, яратымывлӓэм.
2 Господь доно ушнен, икышын лиӓш Еводиям дӓ Синтихиям сарвалем.
3 Тенге, тӹньӹмӓт ядам, пӓшӓштӹ ӹнян тӓнгем: ти ӹдӹрӓмӓшвлӓлӓн палшы, нӹнӹ мӹнь донем иквӓреш, тенгеок Климент дӓ мӹнь донем ӹштӹшӹ вес эдемвлӓ доно иквӓреш Пуры Увер верц цаценӹт. Нӹнӹн лӹмвлӓштӹ – ӹлӹмӓш книгӓштӹ.
4 Господь доно ушнен, соок ӹвӹртӹдӓ. Угӹц келесем: ӹвӹртӹдӓ!
5 Тӓмдӓн пуры кымылда цилӓ эдемлӓн пӓлӹмӹ лижӹ; Господь лишнок.
6 Нима гишӓнӓт идӓ тыргыжланы, а, ыдылын, сарвален дӓ таум ӹштен, ядмыдам цилӓ годымат Йымылан пӓлдӹртӹдӓ.
7 Тӹнӓм Йымын хоть-махань ыш гӹц кӱшнӹ шалгышы тыржы тӓмдӓн шӱмдӓм дӓ шанымыдам Христос Иисус доно ушнымашты перегӓ.
8 Остаткаэш, шӱмбелвлӓ, цилӓ, ма лачок, ма жеплӹмӹ, ма тӧр, ма ире, ма келшӹшӹ, ма хваляш ярышы – ма пуры ылеш дӓ таум ӹштӓш ярал ылеш гӹнь, тидӹ гишӓн шаныда.
9 Мӹнь гӹцем тӓ маэш тыменьӹндӓ, мам нӓлӹндӓ, колында дӓ ужында, тӹдӹм ӹштӹдӓ – дӓ тырым пушы Йымы тӓ сагада лиэш.
10 Тӓ ӹнде мӹнь верцем угӹц шытырланаш тӹнгӓлӹндӓ, седӹндон, Господь доно ушнен, пишок ӹвӹртӹшӹм. Тӓ молнамат палшынедӓ ыльы, но йӧндӓ ылде.
11 Мӹнь укеӓн ылмем гишӓн агыл тидӹм попем, мӹнь ма ылмы доно сусу лиӓш тыменьӹнӓм.
12 Мӹнь незерӹштӓт, уланыштат ӹлен мыштем, цилӓлӓн дӓ цилӓштӓт тыменьӹнӓм: темӹн ӹлӓшӓт, шужашат, улан ӓль незерӹн ӹлӓшӓт тыменьшӹ ылам.
13 Мӹлӓнем силам пуэн шалгышы [Иисус] Христос доно мӹнь цилӓ ӹштен кердӓм.
14 Тенге гӹнят мӹлӓнем нелӹ ылмы годым палшымыда доно тӓ яжон ӹштендӓ.
15 Тӓ, Филиппӹштӹ ӹлӹшӹвлӓ, ӹшкеӓт пӓледӓ: Пуры Уверӹм шӓрӓш тӹнгӓлмӹ годым, Македони гӹц лӓкмӹкем, тӓ гӹцдӓ пасна молы ик церкӓт мӹлӓнем окса доно палшыде.
16 Фессалоникӹштӹ ылмем годымат тӓ келмӹ годым мӹлӓнем ик гӓнӓ веле агыл палшыкым колтендӓ.
17 Тӓ гӹцдӓ подаркам нӓлӓш манын агыл тидӹм попем, но пӓшӓ кӹцкӹдӓ тӓлӓндӓ шукеммӹм ужмем шоэш.
18 А мӹнь цилӓ нӓлӹнӓм, цилӓжӓт утымеш улы. Тӓмдӓн колтымыдам Епафродит гӹц нӓлӹнӓмӓт, мӹньӹн цилӓ шукы. Мам тӓ пуэндӓ, тидӹ «тотлы пышан подарка», «Йымылан келшӹшӹ, ярышы жертва».*
19 Мӹньӹн Йымемжӹ тӓлӓндӓ ма келмӹм лӹмлештӓрӓлтмӓш доно ӹшке пайдажы семӹнь Христос Иисус гач цилӓ темӹжӹ.
20 Йымылан, мӓмнӓн Ӓтялӓннӓ, курым-курымеш лӹмлештӓрӓлтмӓш лижӹ. Аминь.
21 Христос Иисус доно ушнен шалгышы цилӓ святойвлӓлӓн шӓлӓм келесӹдӓ. Мӹнь сагаэм ылшы шӱмбелвлӓ тӓлӓндӓ шӓлӓм колтат.
22 Тӓлӓндӓ цилӓ святой, паснаок кесарьын пӧртӹштӹшӹвлӓ, шӓлӓм колтат.
23 Иисус Христос Господьнан благодатьшы цилӓдӓ доно лижӹ. Аминь.
*4:18 Анжы: Быт 8:21, Исх 29:18.