*a
*2:22 «Шӱлӹш доно Йымын пӧртшӹ лидӓ»: тидӹм «Пӧрт лидӓ, тӹштӹ Йымы Шӱлӹшӹжӹ гач ӹлӓ» манынат сӓрӓш лиэш.
3 Глава
1 Седӹндон мӹнь, Павел, тӓ гишӓндӓ, молнам язычник ылшывлӓ гишӓн, Иисус Христос верц кычен питӹрӹмӹ ылам.
2 Йымын благодатьшы доно мӹлӓнем ӹнянен пумы тӓлӓндӓ палшышы пӓшӓ гишӓн тӓ колында, векӓт:
3 кыце мӹнь пӹтӓри кӹтӹкӹн сиренӓм, пачын анжыктымы гач мӹлӓнем тайным пӓлдӓрӹмӹ.
4 Лыдмыда годым Христосын тайныжым яжон пӓлӹмем ынгылен кердӹдӓ,
5 тӹдӹм молнамшы шачышвлӓлӓн пӓлдӓрӹмӹ агыл, а ӹнде Тӹдӹн святой Апостол дон пророквлӓжӹлӓн Святой Шӱлӹш доно пачмы.
6 А тайныжы теве тиштӹ: язычниквлӓ Пуры Увер гач иудейвлӓ доно иквӓреш наследник дӓ ик кӓпӹн лаштыкшы лишӓшлык ылыт, Йымын сӧрӹмӹм нӹнӓт Христос Иисус доно ушнымашты нӓлӹт.
7 Йымын силажы ӹштӹмӹ семӹнь Тӹдӹн мӹлӓнем пумы благодатьшы гач мӹнь Пуры Уверӹн служышыжы линӓм.
8 Мӹлӓнем, святойвлӓ логӹц сек изилӓн, ти благодать пуалтын: Христосын ланзылаш лидӹмӹ пайдажы гишӓн язычниквлӓлӓн пуры уверӹм шайышташ
9 дӓ Иисус Христос гач цилӓ сӓндӓлӹкӹм ӹштӹшӹ Йымын курымвлӓ вашт шӹлтӹмӹ тайныжым цилӓлӓн пӓлдӓрӓш.
11 (10-11) Вет Христос Иисус Господьна гач Йымын курымаш шанымашыжы семӹнь Йымын шукы сӹнӓн кого ышыжы пӹлгом сӓндӓлӹквлӓштӹшӹ Начальство дон Властьвлӓлӓн ӹнде Церкӹ гач пӓлдӓрӹмӹ лишӓшлык.
12 Христос доно ушнен шалген дӓ Тӹдӹлӓн ӹнянӹмӹ доно мӓ лӱдде дӓ ӹнянен Йымы докы толын кердӹнӓ.
13 Седӹндон тӓ верцдӓ нелӹ-качым ужмем гишӓн вуйдам идӓ сӓкӹ манын ядам, ти нелӹ-качыжы тӓмдӓн лӹмнердӓм лӱктӓ.
14 Тидӹ гишӓн мӓмнӓн Иисус Христос Господьын Ӓтяжӹ анзылан сукалтен шӹнзӓм –
15 ӓтя гӹц шачшы хоть-махань роды-йых пӹлгомыштат, мӱлӓндӹ вӹлнӓт ӹшке лӹмжӹм Тӹдӹ гӹц нӓлеш –
16 дӓ сарвалем: Тӹдӹ ӹшке лӹмлештӓрӓлтмӓшӹжӹн пайдажы доно келшӹшӹн тӓмдӓн шӱм кӧргӹдӓм ӹшке Шӱлӹшӹжӹ доно цат пингӹдемдӹжӹ.
19 (17-19) Тӓ яратымашеш важым колтыда, тӹдӹн вӹлӓн ӹлӹмӓшдӓм негӹцлӹдӓ, цилӓ святойвлӓ доно иквӓреш Христосын яратымашыжын кымдажым, кужыжым, келгӹцшӹм дӓ кӱкшӹцшӹм ынгылен керддӓ, Христосын цилӓ пӓлӹмӓш гӹц кӱшнӹ шалгышы яратымашыжым пӓлен нӓлдӓ манын, тӓмдӓн шӱмӹштӹдӓ ӹнянӹмӓш гач ӹлӓш Христосым пужы, тенге тӓ Йымын цилӓ цицмӓшӹжӹ доно темӹн кердӹдӓ.
20 Кӧргӹштӹнӓ ӹштӹшӹ силажы доно мӓмнӓн ядмына ӓли шанымына гӹц пиш шукеш шукыракым ӹштен кердшӹ Йымылан
21 Церкӹштӹ Христос Иисус доно ушнымашты роды-йых гӹц роды-йыхыш, курым-курымеш лӹмлештӓрӓлтмӓш лижӹ. Аминь.
4 Глава
1 Тенгежӹ мӹнь, Господь верц кычен питӹрӹмӹ эдем, нӓлмӹ ӱжмӓшдӓ доно яралын ӹлӓш сарвалем.
2 Соок смирнӓ, пуры кымылан дӓ кужын тырхышы, иктӹ-весӹдӓм яратен цӹтӹшӹ лидӓ.
3 Шӱлӹшӹн кандымы иктӹ лимӓшӹм тӓмдӓм ушышы тыр доно перегӓш цацыда.
4 Ик кӓп дӓ ик Шӱлӹш улы, уанен вычымашат тенгеок иктӹ, тӓ тӹшкӹ ӱжмӹ ылыда.
5 Ик Господь, ик ӹнянӹмӓш, ик крестӹмӓш,
6 ик Йымы дӓ цилӓлӓн Ӓтя. Тӹдӹ цилӓн вӹлнӹ, цилӓн гач дӓ мӓ кӧргӹштӹнӓ ылеш.
7 А мӓ логӹцнӓ каждыйлан Христосын висен пумыжы семӹнь подарка пуалтын.
8 Седӹндон Писани попа:
«Тӹдӹ кӱшкӹ кузен,
пленӹш нӓлмӹвлӓм нӓнген
дӓ эдемвлӓлӓн подаркам шӓлӓтен».*
9 Тӹдӹн кузымыжы мам анжыкта? Тӹдӹн пӹтӓри мӱлӓндӹ пындашыш валымыжым агыл ма?
10 Тӹ Валышыжок, улы сӓндӓлӹкӹм темӓш манын, цилӓ пӹлгом гӹц кӱшкӹ кузен.
11 Тӹдӹ иктӹвлӓжӹм Апостолеш, весӹвлӓм пророкеш, иктӹвлӓжӹм Пуры Уверӹм шайыштшывлӓэш, весӹвлӓм пастыреш дӓ тымдышеш шагалтен.
12 Служымы пӓшӓлӓн, Христосын Кӓпшӹм пингӹдемдӹмӹлӓн святойвлӓм йӓмдӹлӓш манын, Тӹдӹ тенге ӹштен.
13 Тенгелӓ, остаткаэш мӓ цилӓн ӹнянӹмӓштӹ дӓ Йымын Эргӹжӹм пӓлӹмӓштӹ иктӹш шона, кушкын шошы, Христосын цицмӓшӹжӹ доно келшӹшӹ кӱкшӹцӹш шошы линӓ.
14 Коэ доно кӹшкӹмӹ, цилӓ тымдымашын мардежшӹ доно ӹфӹлен нӓнгемӹ, эдемвлӓ доно мадмы, йойланымаш гач мыштен алталымы изи тетя гань мӓлӓннӓ лиӓш ӹнжӹ ли,
15 а тӧрӹм кычен, яратен ӹлен, Тӹдӹн докы ушнымашкы цилӓ шотыштат кушкын толына, Тӹдӹжӹ вуй, Христос ылеш.
16 Тӹдӹ гӹц улы кӓп, иквӓреш кычышы каждый ежӹнг палшымы доно иктӹш ушнен шалген, каждый пасна лаштыкын ӹшке ӹштӹшӓшӹжӹм ӹштӹмӹжӹ семӹнь кушкеш дӓ яратымашты ӹшкӹмжӹм пингӹдемдӓ.
17 Тенгежӹ мӹнь Господьын лӹмжӹ доно тидӹм попем дӓ сарвалем: вес халыквлӓ семӹнь акел шанымаш доно пакыла идӓ ӹштӹ.
18 Нӹнӹн ышыштым пӹцкемӹш леведӹн, пӓлӹдӹмӹштӹ дӓ шӱмӹштӹ кӱӓнгмӹ гишӓн Йымын ӹлӹмӓш гӹц ӧрдӹжтӹ ылыт.
19 Нӹнӹ цилӓ шижмӓшӹм ямденӹт, ӹшкӹмӹштӹм шӓхӓрлӓнӓш пуэнӹт, сакой йӹрнӹкӹм шыкланен ӹштӓт.
20 Но тӓ тенге агыл Христосым пӓлен нӓлӹндӓ.
21 Иисус гишӓн тӓ колында дӓ, Тӹдӹн тыменьшӹжӹ лин, Тӹдӹн доны ылшы лачокеш тымдымы линдӓ гӹнь,
22 тенгежӹ алталышы шыкланымаш доно изин-олен пӹтӓрӓлтшӹ первишӹ эдемдӓн молнамшы кайышыжы гӹц карангшашлык ылыда.
23 Тӓмдӓн шӱлӹшдӓ дӓ шанымашда уэмшӓшлык ылыт,
24 Йымы гань лиӓш ӹштӹмӹ, лачокын ядмыжы доно тӧр дӓ святойла ӹлӹшӹ у эдемӹш вӹдӹлӓлтшӓшлык ылыда.
25 Седӹндон, алталымашым ӧрдӹжеш коден, цилӓн ӹшке лишӹлвлӓлӓндӓ лачокым попыда,* вет мӓ иктӹ-весӹнӓн лаштыкшы ылына.
26 Шӹдешкедӓ гӹнят, сулыкым идӓ ӹштӹ:* кечӹ шӹцмешкӹ, шӹдешкӹмӹдӓм шуэн колтыда
27 дӓ диаволлан вӓрӹм идӓ пу.
28 Кӱ шолыштын, ӹнде ӹнжӹ шолышт, а незер эдемлӓн кышец айырен пуаш лижӹ манын, ӹшке кидшӹ доно лӓктӹшӓн пӓшӓм цацен ӹштӹжӹ.
29 Тӓмдӓн ышмада гӹц нимахань йӹрнӹк шамак ӹнжӹ лӓк, а колыштшывлӓлӓн благодатьым кандышы, ӹнянӹмӓштӹ пингӹдемдӹшӹ пуры шамакым веле попыда.
30 Йымын Святой Шӱлӹшӹжӹм идӓ ойхырыкты, вет тӓ ирӹкӹш лыкмы кечӹлӓн Шӱлӹш доно пӓлемдӹмӹ ылыда.
31 Цилӓ йӓнг качым, азнымашым, шӹдӹм, саслымым, мыскылымым цилӓ худа доно иквӓреш шуэн колтыда.
32 Иктӹ-весӹ докы пуры дӓ пышкыды кымылан лидӓ. Кыце Йымы тӓмдӓн вуйнаматдам Христос гач простен, тенгеок тӓӓт иктӹ-весӹдӓн вуйнаматдам простьыда.
*4:8 Пс 67:19.
*4:25 Зах 8:16.
*4:26 Пс 4:5
5 Глава
1 Тӓ Йымын яратымы тетяжӹ ылыда гӹнь, тенгежӹ Тӹдӹ семӹнь ӹштӹдӓ.
2 Кыце Христос мӓмнӓм яратен дӓ Ӹшкӹмжӹм мӓ верцнӓ жертва семӹнь, тотлы пышан подарка семӹнь Йымылан пуэн, тенге яратен ӹлӹдӓ.
3 Но шӓхӓрлӓнӹмӹ, сакой ире агыл кайыш ӓль шыкланымаш гишӓн тӓ лоштыда шаяат лӓкшӓшлык агыл, святовлӓлӓн тидӹ ак олмыд.
4 Тенгеок шудалмаш, келеш-акелӹм попымаш, мыскылен ваштылмаш тӓлӓндӓ ярдымы, техень вӓреш тӓ Йымылан таум ӹштӹшӓшлык ылыда.
5 Пӓлен лидӓ: ик шӓхӓрлӓнӹшӹнӓт, ӓль ире агылынат, ӓль шыкланышынат – шыкланымыжы идоллан кымалмы доно икток – техеньӹм ӹштӹшӹ ик эдемӹнӓт Христосын дӓ Йымын Кугижӓншӹштӹ нимахань наследствыжы уке.
6 Тӓмдӓм такешӹм попымы доно иктӓт ӹнжӹ алталы, вет тидӹ гишӓнок шамак колыштдымы эдемвлӓ вӹкӹ Йымын шӹдӹжӹ вазеш.
7 Техень эдемвлӓ докы идӓ ушны.
8 Пӹтӓри тӓ пӹцкемӹш ылында, а ӹнде, Господь доно ушнен, соты ылыда. Сотын тетявлӓжӹ семӹнь ӹлӹдӓ,
9 вет Шӱлӹшӹн кӹцкӹжӹ – сакой пурылык, тӧр ӹштӹмӓш дӓ лачок.
10 Йымылан ма яралым соок терген шалгыда.
11 Пӹцкемӹшӹн кӹцкӹдӹмӹ пӓшӓшкӹжӹ идӓ ушны, а техеньӹм вӹкӹ лыкда.
12 Эдемвлӓн йӹвӹрт ӹштӹмӹ пӓшӓштӹ гишӓн попашат намыс.
13 Но соты доно вӹкӹ лыкмы годым цилӓ раскыдын каеш. Вӹкӹ лыкмы цилӓок соты лиэш,
14 седӹндон келесӹмӹ:
«Амалышы, кӹньӹл дӓ колымаш гӹц ӹлӹж,
тӹньӹм Христос сотемдӓрӓш тӹнгӓлеш».
15 Тенгежӹ, кыце ӹлӹмӹдӓм тӹшлен анжыда. Ышдымы семӹнь агыл, а ышан семӹнь ӹлӹдӓ,
16 веремӓм пайда доно кычылтда, вет ти кечӹвлӓ худа ылыт.
17 Седӹндон шанен мыштыдымы идӓ ли, а Йымын ирӹкшӹм* пӓлен нӓлӓш цацыда.
18 Йӱкшӹ лимешкӹ идӓ йӱ, тидӹ шӓлӓ кайышышкы канда, а Святой Шӱлӹш доно темӹн лидӓ.
19 Псалом дӓ шӱлӹш кымылангдымы хвален мырымаш гач иктӹ-весӹдӓ доно попыда, йӓнгӹштӹдӓ Господьлан мырыда дӓ семӹм шактыда.
20 Мӓмнӓн Господьна Иисус Христос лӹм доно соок дӓ цилӓ верц Йымылан, Ӓтялӓн, таум ӹштӹдӓ.
21 Йымы гӹц лӱдӹн, иктӹ-весӹдӓм колышт ӹлӹдӓ.
22 Вӓтӹвлӓ ӹшке марыштым Господьым колыштмы семӹньок колыштышты,
23 вет кыце Христос Церкӹлӓн вуй ылеш, дӓ Тӹдок кӓпӹн* Ытарышыжы, тенгеок марат вӓтӹлӓн вуй ылеш.
24 Кыце Церкӹ Христосым колыштеш, тенгеок вӓтӹвлӓӓт ӹшке марыштым цилӓ шотыштат колыштшашлык ылыт.
26 (25-26) Марывлӓ, Христосын Церкӹм яратымыжы семӹнь ӹшке вӓтӹдӓм яратыда. Церкӹм свящӓйӓш манын, Христос тӹдӹ верц Ӹшкӹмжӹм пуэн, тӹдӹм вӹд доно дӓ шамак доно мышкын ирӹктен.
27 Христос Ӹшке анзыланжы лӹмлештӓрӓлтшӹ Церкӹм тамга ӓль кыптыр, ӓль иктӓ-ма техеньӹ гӹц пасна шагалтынежӹ, Церкӹжӹ святой дӓ нимахань ситӹдӹмӓш гӹц пасна лишӓшлык.
28 Тенгеок марат вӓтӹжӹм ӹшке кӓпшӹм яратымы семӹнь яратышашлык. Вӓтӹжӹм яратышы ӹшкӹмжӹм ӹшке ярата.
29 Иктӓт нигынамат ӹшке кӓпшӹм ужын керддӹмӹ ак ли, а тӹдӹм пукша дӓ ӹрӹктӓ. Тенгеок Церкӹ верц Господь цаца,
30 вет мӓ Тӹдӹн кӓп лаштыкшы ылына, Тӹдӹн кӓпшӹ дон лужы ылына.
31 «Седӹндон пӱэргӹ ӓтяжӹ дон ӓвӓжӹм кода, ӹшке вӓтӹжӹ доно ушна, дӓ нӹнӹ коктын ик кӓп лит».*
32 Тидӹ когон кого тайна, а попемжӹ Христос дӓ Церкӹ гишӓн.
33 Тӓ лоштыдаат тенгеок лижӹ: каждыйжы ӹшкӹмжӹм яратымы семӹньок вӓтӹжӹм яратыжы, а вӓтӹ марыжы гӹц лӱдшӹ.
*5:17 Ирӹк – воля, желание.
*5:23 Кӓп – тиштӹ «Церкӹ» манын ынгылыман.
*5:31 Быт 2:24
6 Глава
1 Тетявлӓ, Господь доно ушнен, ӓтя-ӓвӓдӓн шамакыштым колыштда, вет тенге ӹштӹмӓш тӧр ылеш.
2 «Ӹшке ӓтят дон ӓвӓтӹм шотеш пиштӹ», – тидӹ пӹтӓришӹ шӱдӹмӓш, тӹдӹн доно иквӓреш сӧрӹмӓш пуалтын:
3 тӹнӓм «тӹлӓнет яжо лиэш, дӓ мӱлӓндӹ вӹлнӹ кужы курыман лиӓт».*
4 Тӓ, ӓтявлӓ, тетявлӓдӓм шӹдӹшкӹ идӓ йышкыры, а Господьын тымдымыжы дӓ тӧрлӓтӹмӹжӹ семӹнь нӹнӹм анжен куштыда.
5 Рабвлӓ, мӱлӓндӹ вӹлнӹшӹ хозавлӓдӓм Христосым колыштмы семӹнь, лӱдӹн дӓ цӹтӹрен, ире шӱм доно колыштда.
6 Эдемлӓн ярал лиӓш цацен, хозавлӓ ужмы годым веле агыл шамакыштым колыштда, а Йымын ирӹкшӹм* йӓнг вашт ӹштен, Христосын цоражы семӹнь пӓшӓлӹдӓ.
7 Эдемлӓн агыл, а Господьлан служымы семӹнь улы кымылын пӓшӓлӹдӓ.
8 Пӓлен лидӓ: каждыйжы иктӓ-махань пурым ӹштӹмӹжӹ семӹнь, хоть раб, хоть ирӹкӓн лижӹ, Господь гӹц пурым нӓлеш.
9 Тӓӓт, хозавлӓ, лӱдӹктӹлмӓшӹм коден, рабвлӓдӓ доно тенгеок ӹштӹдӓ. Пӓлен лидӓ: пӹлгомышты нӹнӹнӓт, тӓмдӓнӓт Господь улы, Тӹдӹ цилӓ эдемӹм ик семӹнь анжа.
10 Шӱмбелемвлӓ, остаткаэш келесӹнем: Господь доно дӓ Тӹдӹн кого силажы доно пингӹдемдӓ.
11 Диаволын йойланымыжы ваштареш шалген керддӓ манын, Йымын улы вырсы хӓдӹржӹ доно вӹдӹлӓлтдӓ.
12 Вет кредӓлмӓшнӓ эдемвлӓ ваштареш агыл, а ти курымыштышы пӹцкемӹшӹн начальствыжы, властьшы дон улы сӓндӓлӹкӹм вуйлатышы тӧрӓвлӓжӹ ваштареш, пӹлгом лӹвӓлнӹшӹ худа шӱлӹшвлӓ ваштареш ылеш.
13 Тенгежӹ Йымын улы вырсы хӓдӹржӹм нӓлдӓ. Тӹнӓм тӓ худа кечӹн ваштареш кӹньӹлӹн дӓ, цилӓ ӹштӹмӹкӹ, пингӹдӹн шалген кердӹдӓ.
14 Тенгежӹ йӓмдӹ лидӓ: кӹдӓлешдӓ лачокым ӹштӓлдӓ, тӧр ӹштӹмӓшӹм кӹртни тыгыр семӹнь чидӓ,
15 тыр гишӓн пуры уверӹм шайышташ йӓмдӹ ылмым ялешдӓ чидӓ.
16 А сек когонжок ӹнянӹмӓшӹм ӓрӹк* семӹнь нӓлдӓ, тӹдӹн доно тӓ худан цилӓ йылышы пикшӹжӹм йӧртен кердӹдӓ.
17 Ытарымашым шлем семӹнь чидӓ, Шӱлӹшӹн мечшӹм, вес семӹньжӹ Йымын шамакым, нӓлдӓ.
18 Соок сарвалыда дӓ ядда, цилӓ годымат Шӱлӹш доно ыдылда, идӓ амалы, кого цӹтӹмӓш доно цилӓ святойвлӓ верц Йымым сарвалыда.
19 Попымем годым мӹлӓнем керӓл шамакым Йымы пужы дӓ Пуры Уверӹн тайныжым лӱдде пӓлдӓрӓш палшыжы манын, мӹнь верцемӓт ыдылда.
20 Пуры Увер гишӓн мӹньӹм колтымы дӓ кычен питӹрӹмӹ. Тӹдӹм керӓл семӹнь лӱдде шайышташ мӹлӓнем Йымы палшыжы манын, сарвалыда.
21 Мӹньӹн пӓшӓэм кыце кемӹ дӓ кыце ӹлӹмем гишӓн тӓӓт пӓлӹдӓ манын, Господьын ӹнян служышыжы, яратымы Тихик шӱмбел тӓлӓндӓ цилӓ шайышт пуа.
22 Мӓ гишӓннӓ цилӓ пӓлдӓрӓш дӓ тӓмдӓн йӓнгдӓм кымылангдаш манын, мӹнь тӹдӹм тӓ докыда колтенӓм.
23 Шӱмбелвлӓлӓн Йымы Ӓтя дӓ Иисус Христос Господь гӹц тыр, яратымаш дӓ ӹнянӹмӓш лижӹ.
24 Мӓмнӓн Господьна Иисус Христосым вашталтдымы яратымаш доно яратышы цилӓ эдем сага благодать лижӹ. Аминь.
*6:2-3 Исх 20:12, Втор 5:16
*6:6 Ирӹк – воля, желание.
*6.16 Ӓрӹк – щит.