1 Эдемвлӓнӓт, эдемвлӓ гачат агыл, а Иисус Христосын дӓ Тӹдӹм колымаш гӹц ӹлӹжтӹшӹ Йымы Ӓтян айырымы Апостол Павел гӹц
2 дӓ сагаэм ылшы цилӓ шӱмбелвлӓ гӹц Галатиштӹшӹ церкӹвлӓлӓн.
3 Йымы Ӓтя дӓ мӓмнӓн Господь Иисус Христос гӹц тӓлӓндӓ благодать дӓ тыр лижӹ.
4 Тӹдӹ, кӹзӹтшӹ худа веремӓ гӹцӹн мӓмнӓм ытараш манын, Йымы Ӓтянӓн ирӹкшӹ* семӹнь мӓмнӓн сулыквлӓнӓ гишӓн Ӹшке Ӹшкӹмжӹм пуэн.
5 Йымылан курым-курымеш лӹмлештӓрӓлтмӓш лижӹ. Аминь.
6 Тӓмдӓм Христосын благодатьшы доно Ӱжшӹ гӹц тенге пӹсӹн карангмыланда дӓ вес пуры увер докы сӓрнӓлмӹлӓндӓ ӧрӓм.
7 Тенге гӹнят тидӹ вес увер агыл, а тӓмдӓм пыдыратышы дӓ Христосын Пуры Увержӹм локтыл весемдӓш шанышы эдемвлӓ веле ылыт.
8 Но мӓмнӓн шайыштмы Пуры Увернӓ гӹц молым тӓлӓндӓ мӓ ӹшкежӓт шайыштына ӓль пӹлгом гӹц Ангел шайыштеш гӹнят, техень уверӹм шӓрӹшӹжӹ проклятайымы лижӹ.
9 Кыце мӓ молнам попеннӓ, кӹзӹтӓт тенгеок келесем: йӓнгӹшкӹдӓ пиштӹмӹ Пуры Увер гӹц молым тӓлӓндӓ иктӓжӹ шайыштеш гӹнь, тӹдӹ проклятайымы лижӹ.
10 Кӹзӹт мӹнь эдемвлӓн кымылыштым ӹшке векем сӓрӓлнем ӓль Йымыным? Эдемвлӓлӓн ма ярал лиӓш цацем? Мӹнь кӹзӹт яктеӓт эдемвлӓлӓн ярал лиӓш цацем ыльы гӹнь, Христосын цоражы ам ли ыльы.
11 Шӱмбелвлӓ, пӓлен лидӓ: мӹньӹн шайыштмы Пуры Увер эдемӹн агыл.
12 Тӹдӹм мӹнь эдем гӹц нӓлделам, тӹдӹлӓн мӹньӹм тымдыделыт, тӹдӹм мӹнь Иисус Христосын пачын анжыктымыжы гач нӓлӹнӓм.
13 Иудей овуца семӹнь перви кыце ӹлӹмем гишӓн тӓ колында, тӹнӓм мӹнь Йымын Церкӹм пишок поктылынам дӓ тӹдӹм пӹтӓрӓш цаценӓм.
14 Иудей овуцам кычымашты мӹнь ӹшке халыкемӹн шукы ик иӓшӓнемвлӓ гӹц утларак сӹнгӹмӓшкӹ шонам, ӓтянӓвлӓн овуцашты верц пишок пингӹдӹн шалгенӓм.
15
16 Но ӓвӓмӹн кӧргӹштӹжӹ ылмем годымок мӹньӹм айырен нӓлшӹ дӓ благодатьшы доно ӱжшӹ Йымы ӹшке Эргӹжӹм мӹнь гачем пӓлдӓрӓш яжоэш шотлен. Тӹдӹ гишӓн Пуры Уверӹм язычниквлӓ лошты шайыштшашлык ылам. Мӹнь тӹнӓмок эдем гӹц кӓнгӓшӹм ядделам
17 дӓ мӹнь гӹцем анзыц Апостол ылшывлӓ докы Иерусалимӹш кеделам, а Аравиш кенӓм дӓ угӹц Дамаскыш пӧртӹлӹнӓм.
18 Вара, кым и эртӹмӹкӹ, Петр доно вӓшлин шайышташ Иерусалимӹш кенӓм дӓ тӹдӹн доны луатвӹц кечӹ линӓм,
19 но Господьын ӹзӓжӹ Иаков гӹц молы вес Апостолым ужделам.
20 Мӹньӹн ти сирӹмем алталымаш агыл манын, тӓмдӓм Йымы анзылны ӹняндӓрем.
21 Тидӹ паштек мӹнь Сири дӓ Килики мӱлӓндӹвлӓшкӹ кенӓм.
22 Иудейӹштӹшӹ христианвлӓн церкӹвлӓштӹ мӹньӹм цӹреэм гӹц пӓлӹделыт.
23 Нӹнӹ колыныт веле: «Пӹтӓри мӓмнӓм поктылшы ти эдем ӹнянӹмӓшнӓм тилец анзыц пӹтӓрӓш цацен, но кӹзӹт тӹдӹм ӹшке увертӓрӓ».
24 Седӹндон мӹнь верцем Йымым лӹмлештӓренӹт.
*1:4 Ирӹк – воля, желание.1 Вара, луатнӹл и эртӹмӹкӹ, мӹнь Варнава доно иквӓреш угӹц Иерусалимӹш кенӓм, сагаэм Титӹмӓт нӓлӹнӓм.
2 А кенӓмжӹ Йымын пачын анжыктымыжы гишӓн. Мӹньӹн анзыцшы дӓ кӹзӹтшӹ цацымем такеш ӹнжӹ ли манын, язычниквлӓлӓн мӹньӹн шайыштмы Пуры Уверӹм тиштӹшӹвлӓлӓн ынгылдаренӓм, вуйлатышылан шотлалтшывлӓлӓн пасна шайыштынам.
3 Но нӹнӹ мӹнь донем иквӓреш толшы эллин Титлӓнӓт пӹчмӹ овуцам неволя ӹштӹктӹделыт.
4 Тенге гӹнят Христос Иисусын мӓлӓннӓ пумы ирӹкшӹм пӓлӓш йӹвӹрт толшы, ӹнянӹшӹлӓ каяш цацышы алталышы эдемвлӓ, мӓмнӓм рабыш сӓртӓш манын, мӓ лошкына йӹвӹрт пыренӹт.
5 Тӓ лоштыда Пуры Уверӹн лачокшы перегӓлтшӹ манын, мӓ нӹнӹ анзылны ик цӓшешӓт цӓкнӹделна дӓ вуйнам сӓкӹделна.
6 А кӱвлӓ вуйлатышеш шотлалтыныт – хоть-махань нӹнӹ лиштӹ, мӹлӓнем нимахань айыртемӓт уке, Йымы цилӓ вӹкӹ ик семӹнь анжа – нӹнӹ, вуйлатышеш шотлалтшывлӓ, мӹньӹн тымдымашкем нимат привайыделыт.
7 Анешлӓ, нӹнӹ ужыныт: кыце пӹчмӹвлӓ лошты Пуры Уверӹм шайышташ Петрлӓн ӹнянӹмӹ, тенгеок пӹчдӹмӹвлӓлӓн тӹдӹм шайышташ мӹлӓм ӹнянӹмӹ.
8 Петрӹм пӹчмӹвлӓн Апостолжым Ӹштӹшок мӹньӹмӓт язычниквлӓлӓн Апостолым ӹштен.*
9 Йымы благодатьшы доно мӹлӓм махань пӓшӓм пумым ынгылымыкышты, цаткыды тӹкеш шотлалтшы Иаков, Кифа дӓ Иоанн мӹлӓм дӓ Варнавалан, кидӹм пуэн, пӓшӓ кӹл ӹштӹмӹм пӓлемденӹт: мӓ язычниквлӓ докы кешӓшлык ылына, нӹнӹ – пӹчмӹвлӓ докы.
10 Незервлӓм веле ӓшӹндӓрӹшӓшлык ылына, тидӹжӹм мӹнь ӹштӓш цаценӓм.
11 А кынам Петр Антиохиш толын, мӹнь цилӓ анзылны тӹдӹ ваштареш шагалынам, вет тӹдӹ самынялтын.
12 Вет Иаков дорц эдемвлӓн толмышты анзыц тӹдӹ пӹтӓри язычник ылшы, а вара ӹнянӓш тӹнгӓлшӹвлӓ доно иквӓреш качкын, а ти эдемвлӓ толмыкы, пӹчмӹ овуца верц шалгышывлӓ гӹц лӱдӹнӓт, техень ӹнянӓш тӹнгӓлшӹвлӓ гӹц каранг кашташ тӹнгӓлӹн.
13 Тӹдӹн доно иквӓреш вес иудейвлӓӓт алталышы кайышанла кайыныт, Варнаваат нӹнӹн кайышышкы ушнен.
14 Пуры Уверӹн тӧр корныжы гӹц нӹнӹн карангмыштым ужмыкем, мӹнь цилӓ анзылны Петрлӓн келесенӓм: «Тӹнь, иудей, ӹшкежӹ иудейлӓ агыл, а язычниквлӓ семӹнь ӹлет гӹнь, малын язычниквлӓм иудей семӹнь ӹлӓш неволяет?»
15 Мӓ шачынок иудей ылына, а сулыкан язычниквлӓ логӹц агыл.
16 Тенге гӹнят мӓ пӓленӓ: законым шоктымы доно агыл эдем тӧреш лыкталтеш, а Иисус Христослан ӹнянӹмӹ доно веле. Седӹндон, законым колыштмы доно агыл, а Христослан ӹнянӹмӹ доно тӧреш лӓктӓш манын, мӓӓт Иисус Христослан ӹнянӓш тӹнгӓлӹннӓ, вет законым колышташ цацымы доно ик эдемӓт тӧреш ак лыкталт.
17 Но мӓмнӓнӓт, Христос гач тӧреш лӓктӓш шанышывлӓн, сулыкан ылмына вӹкӹ лӓктӹн гӹнь, тенгежӹ Христос сулыкын служышыжы ылеш ма? Уке!
18 Мам мӹнь пыдыртен шуэнӓм, тӹдӹм угӹц ӹштем гӹнь, мӹнь ӹшкӹмемӹм закон пыдыртышы семӹнь анжыктем.
19 Йымылан ӹлӓш манын, закон гач мӹнь законлан коленӓм. Мӹнь Христос доно иквӓреш крестеш пыдалымы линӓм,
20 дӓ ӹнде мӹнь агыл ӹлем, а, мӹнь донем ушнен, Христос ӹлӓ. А кӹзӹт кӓпӹштӹ ӹлӹмем годым мӹньӹм яратышы дӓ мӹнь верцем Ӹшкӹмжӹм пушы Йымын Эргӹлӓн ӹнянен ӹлем.
21 Йымын благодатьшым ам карангды: закон гач эдем тӧреш лыкталтеш гӹнь, Христос такеш колен.
*2:8 Тидӹм тенгеӓт сӓрӓш лиэш: «Петр гач тӹдӹн апостол пӓшӓжӹ доно пӹчмӓнвлӓ лошты Ӹштӹшӹ мӹньӹн гачемӓт язычниквлӓ лошты ӹштен».1 О, ышдымы галатвлӓ, кӱ тӓмдӓм лачокым колыштмаш гӹц карангаш алтален тӓрвӓтен? Сӹнзӓ анзылныда Иисус Христос тӓ донда пыдален сӓкӹмӹ [ганьок] анжыкталтын.
2 Тӓ гӹцдӓ тидӹм веле пӓлен нӓлнем: тӓ Йымын Шӱлӹшӹм законым колыштмы доно ма нӓлӹндӓ ӓль колмы уверлӓн ӹнянӹмӹ доно?
3 Тӹнӓрок тӓ ынгылыдымы ылыда ма? Шӱлӹш доно тӹнгӓлӹндӓ, а ӹнде кӓп дӓ йӓнг доно пӹтӓредӓ?
4 Такеш ма тинӓр шукы тырхендӓ? Уке, такеш агыл, шанем.
5 Йымы тӓлӓндӓ Шӱлӹшӹм пуа дӓ тӓ лоштыда цӱдӓвлӓм ӹштӓ. Тидӹм Тӹдӹ законым колыштмыда гишӓн ма ӹштӓ – ӓль колмы уверлӓндӓ ӹнянӹмӹ гишӓн?
6 Авраам донат тенгеок лин: «Тӹдӹ Йымылан ӹнянен, седӹндон Йымы тӹдӹм тӧр ӹштӹшеш шотлен».*
7 Тенгежӹ пӓлӹдӓ: ӹнянӹшӹвлӓ Авраамын эргӹвлӓжӹ ылыт.
8 Пӹтӓри язычник ылшывлӓм Йымылан ӹнянӹмӹштӹ гишӓн Йымы тӧреш лыктеш. Тидӹм Писани анзыцок ужын дӓ Авраамлан, «Тӹнь гачет халыквлӓ цилӓн благословаялтыт»* манын, пуры уверӹм анзыцок шижтӓрен.
9 Тенгелӓ, ӹнянӹшӹ Авраам сага ӹнянӹшӹвлӓ благословайымы лит,
10 а законым шоктымылан ӹнянӹшӹвлӓ проклятайымы ылыт. А вет сирӹмӹ: «Закон книгӓш сирӹмӹм кӱ соок цилӓ ак ӹштӹ, хоть-кӱӓт проклятайымы лиэш».*
11 А закон гач иктӓт Йымы анзылны тӧреш ак лӓк, тидӹ раскыды, вет «тӧр ӹштӹшӹ эдем ӹнянӹмӓшӹжӹ доно ӹлӓш тӹнгӓлеш».*
12 Закон ӹнянӹмӓшлӓн ак тӹкӹлӓлт, а «кӱ законын ядмыжым ӹштӓ, тӹдӹм ӹштӹмӹ доно ӹлӓ».*
13 Христос мӓмнӓм законын проклятайымыжы гӹц тӱлен нӓлӹн. Тӹдӹ мӓ верцнӓ Ӹшке проклятайымы лин, вет сирӹмӹ: «Пу мӓнгеш сӓкӹмӹ хоть-кӱӓт проклятайымы».*
14 Седӹндон Авраамлан пумы благословайымаш язычниквлӓ докы Христос Иисус гач шон кердеш, дӓ ӹнянӹмӓш доно мӓ сӧрӹмӹ Шӱлӹшӹм нӓлӹн кердӹнӓ.
15 Шӱмбелвлӓ, кечӹнь лишӹ примерӹм кандем: эдемӹн пингӹдемдӹмӹ завeщанижӹм иктӓт шӧрен дӓ тӹшкӹ нимат приваен ак керд.
16 А сӧрӹмӓшвлӓм Авраамлан дӓ тӹдӹн вырлыкшылан пумы. Писаништӹ, «вырлыкшывлӓлӓн» манын, шукы гишӓн агыл, а иктӹ гишӓн «тӹньӹн вырлыкетлӓн» манын келесӹмӹ, тидӹ – Христос.*
17 Мӹнь тидӹм келесӹнем: нӹлшӱдӹ кымлы и эртӹмӹкӹ лӓкшӹ закон Христос гишӓн Йымын пӹтӓри пингӹдемдӹмӹ согоньым шӧрен дӓ Йымын сӧрӹмӹжӹн силажым пӹтӓрен ак керд.
18 Вет наследствым нӓлмӓш законеш негӹцлӓлтеш гӹнь, тенгежӹ тӹдӹ сӧрӹмӓшеш ак негӹцлӓлт. Но Йымы Авраамлан сӧрӹмӹжӹ семӹньок наследствым подарен.
19 А малын законжы келеш? Тӹдӹм, сӧрӹмӓшӹм нӓлшӹ вырлык толмешкӹ, вуйнаматыш пырымы гишӓн варарак лыкмы дӓ лом каштшын* кидшӹ доно Ангелвлӓ гач пумы.
20 Но иктӹ годым лом каштшы ак ли, а Йымы иктӹ.
21 Тенгежӹ закон Йымын сӧрӹмӹжӹ ваштареш шалга ма? Уке! Вет ӹлӹмӓшӹм пуэн кердшӹ закон пуалтеш ылгецӹ, тӧреш лӓкмӓш лачокат закон гӹц лиэш ыльы.
22 Но мам сӧрӹмӹ, тӹдӹ ӹнянӹшӹвлӓлӓн Иисус Христослан ӹнянӹмӹ доно пуалтшы манын, Писани цилӓм сулыкеш кӓпшӹлтен.
23 Ӹнянӹмӓш толмы якте, анзыкылашы ӹнянӹмӓш анжыкталтмешкӹ, закон мӓмнӓм питӹрен кычен дӓ оролен.
24 Тенгежӹ, мӓлӓннӓ ӹнянӹмӹ доно тӧреш лӓктӓш манын, закон мӓмнӓм Христос докы виктӓрӹшӹ лин.*
25 Но ӹнянӹмӓш толмыкы, мӓ ӹнде виктӓрӹшӹн кид лӹвӓлнӹжӹ ана ыл.
26 Вет Христос Иисуслан ӹнянӹмӹ гишӓн тӓ цилӓн Йымын эргӹвлӓжӹ ылыда.
27 Тӓ цилӓн, Христос доно ушнаш крестӓлтшӹвлӓ, Христос доно вӹдӹлӓлтӹндӓ.
28 Иудей ӓль эллин, раб ӓль ирӹкӓн, пӱэргӹ ӓль ӹдӹрӓмӓш ӹнде уке, вет тӓ цилӓнӓт, Иисус Христос доно ушнен, иктӹ ылыда.
29 А Христосын ылыда гӹнь, тенгежӹ тӓ Авраамын вырлыкшы дӓ сӧрӹмӹ семӹнь наследник ылыда.
*3:6 Быт 15:6. *3:8 Быт 12:3. *3:10 Втор 27:26. *3:11 Авв 2:4. *3:12 Лев 18:5. *3:13 Втор 21:23. *3:16 Быт 12:7, 13:15, 24:7. *3:19 Лом каштшы – посредник. *3:24 «Закон мӓмнӓм Христос докы виктӓрӹшӹ лин»: греклӓ сирӹмӹм тенгеӓт ынгылаш лиэш: «Христос толмешкӹ, закон мӓмнӓм виктӓрӹшӹ ылын».1 Эче келесӹнем: наследник цилӓлӓн хоза гӹнят, тетяжӹ годым тӹдӹ раб гӹц нима донат ак айыртемӓлт.
2 Ӓтяжӹн пӓлемдӹмӹ веремӓ якте тӹдӹ анжышывлӓн дӓ сурт-пичӹм кычышывлӓн кид лӹвӓлнӹштӹ лиэш.
3 Тенгеок мӓӓт: тетя ылмына годым сӓндӓлӹкӹн природыштышы шукы йиш силан рабшы ылынна,
5 (4-5) но жеп ӹшке цицмӓшкӹжӹ шомыкы, Йымы [Ик Шачшы] Эргӹжӹм колтен. Закон лӹвӓлнӹшӹвлӓм сылен нӓлӓш дӓ мӓлӓннӓ Йымын тетяжӹ лиӓш манын, Эргӹжӹ ӹдӹрӓмӓш гӹц шачын дӓ закон кид лӹвӓлнӹ лин.
6 А тӓ Тӹдӹн тетяжӹ ылыда, седӹндон Йымы Эргӹжӹн «Авва, Ӓти!» манын ӱжшӹ Шӱлӹшӹжӹм шӱмӹшкӹдӓ колтен.
7 Тенгежӹ тӹнь ӹнде раб ат ыл, но эргӹ, а эргӹ ылат гӹнь, Иисус Христос гач Йымын наследникшӹ ылат.
8 Но пӹтӓри, кынам тӓ Йымым пӓлӹделда, тӓ «йымывлӓн» рабышты ылында, кыдывлӓ лачок йымы агылеп.
9 А ӹнде Йымым пӓледӓ ӓль, тӧррӓк келесӓш гӹнь, Йымы тӓмдӓм пӓлӓ. Малын угӹцӹн природыштышы льыскыды дӓ ярдымы шукы йиш сила докы пӧртӹлӹдӓ, ӹшкӹмдӓм эчеӓт тӹдӹн рабышкыжы сӓртӹнедӓ?
10 Тӓ кечӹ, тӹлзӹ, празнык веремӓ дӓ ивлӓм пасна аедӓ.
11 Тӓ верцдӓ лӱдӓм. Такеш ма мӹнь тӓ верцдӓ тинӓр пӓшӓм ӹштенӓм?
12 Шӱмбелвлӓ, тӓмдӓм сарвален ядам, мӹнь ганемок лидӓ, вет мӹнят тӓ ганьдаок ылам. Тӓ мӹлӓнем нимат худам ӹштӹделда.
13 Тӓ пӓледӓ: пӹтӓришӹ гӓнӓ тӓлӓндӓ Пуры Уверӹм ясы ылмем гишӓн шайыштынам.
14 Кӓп доно орланенӓм гӹнят, тӓ йӹрнӹделда дӓ ӹшке дорцда шӹкӓлделда, а Йымын Ангелжӹм ӓль Христос Иисусым вӓшлимӹ семӹнь мӹньӹм вӓшлиндӓ.
15 Кышты кӹзӹт тӓмдӓн пуры цӓшдӓ? Тӓ гишӓндӓ свидетельствуем: лиэш ылгецӹ, тӓ ӹшке сӹнзӓдӓм капаен лыктыда дӓ мӹлӓнем пуэдӓ ыльы.
16 Тенгежӹ, тӓлӓндӓ лачокым попымы доно ма мӹнь тышманыш сӓрнӓлтӹнӓм?
17 Тӓ верцдӓ тӹ эдемвлӓ цацат, но пурым ак шанеп, а ӹшкештӹ верц цацыда манын, мӓ гӹцнӓ тӓмдӓм айырынештӹ.
18 Пурылан цацымаш соок яжо, тӓ донда ылмем годым веле агыл.
19 Тетявлӓэм, Христосын сӹнжӹ тӓ гачда каяш тӹнгӓлмешкӹ, тӓ верцдӓ мӹлӓм ӓзӓм ӹштӹмӹ годшы гань орланымым угӹц цӹтӓш вӓрештеш.
20 Кыце тӓ сагада ӹнде линем дӓ юкем вашталтынем ылнежӹ! Мам тӓ донда ӹштӓш, мӹнь ам пӓлӹ.
21 Тӓ, закон лӹвӓлнӹ лиӓш шанышывлӓ, мӹлӓнем келесӹдӓ: тӓ законым ада колышт?
22 Вет сирӹмӹ: Авраамын кок эргӹжӹ ылын, иктӹжӹ раб ӹдӹрӓмӓш гӹц, а весӹжӹ – ирӹкӓн гӹц.
23 Раб ӹдӹрӓмӓш гӹц шачшы эргӹ природын пумыжы семӹнь шачын, а ирӹкӓн ӹдӹрӓмӓш гӹц шачшы – Йымын сӧрӹмӹ семӹнь.*
24 Тиштӹ тыштен келесӹмӓш улы. Ти кок ӹдӹрӓмӓш – кок согонь. Ик согоньжы Синай кырык гӹц, тӹдӹ раб лиӓш шачыкта. Тидӹ – Агарь.
25 Вет Агарьжы Аравиштӹшӹ Синай кырыкым анжыкта, кӹзӹтшӹ Иерусалимлӓн келшен толеш. Тӹдӹжӹ ӹшке тетявлӓжӹ доно рабствышты ылеш.
26 А пӹлгомыштышы Иерусалим ирӹкӓн, тӹдӹ мӓлӓннӓ цилӓлӓн ӓвӓнӓ.
27 Вет сирӹмӹ:
«Тетям ӹштен керддӹмӹ, ӓзӓм ӹштӹдӹмӹ – сусу ли,
ӓзӓм ӹштен орланыдымы – ӹвӹртен сӹгӹрӓл,
вет ӹшкет ӹдӹрӓмӓшӹн тетяжӹ шукы,
маран ӹдӹрӓмӓшӹн гӹцӓт утларак».*
28 Мӓ, шӱмбелвлӓ, Исаак семӹнь Йымын сӧрӹмӓшӹн шачшыжы ылына.
29 Кыце природа пумы семӹнь шачшы эргӹжӹ Шӱлӹш пумы семӹнь шачшым тӹнӓм поктылын, кӹзӹтӓт тенгеок.
30 А Писани мам попа? «Раб ӹдӹрӓмӓшӹм дӓ эргӹжӹм поктен колты. Рабын эргӹжӹ ирӹкӓнӹн эргӹжӹ доно иквӓреш наследник ак ли».*
31 Тенгелӓ, шӱмбелвлӓ, мӓ раб ӹдӹрӓмӓшӹн агыл, а ирӹкӓнӹн тетяжӹ ылына.
*4:22-23 Быт 16, 18:1-15, 21:1-21. *4:27 Ис 54:1. *4:30 Быт 21:10.1 Тенгежӹ, Христосын мӓлӓннӓ пумы ирӹкӹштӹжӹ пингӹдӹн шалгыда дӓ угӹцӹн раб пӹзӹрньӹкӹш идӓ кӹцкӓлт.
2 Теве мӹнь, Павел, тӓлӓндӓ попем: тӓ пӹчмӹ овуцам эртедӓ гӹнь, Христос тӓлӓндӓ нимахань пайдамат ак канды.
3 Пӹчмӹ овуцам эртӹшӹ каждый эдемлӓн эчеӓт шижтӓрем: тӹдӹ законын цилӓ ядмыжым ӹштӹшӓшлык ылеш.
4 Тӓ, закон доно ӹшкӹмдӓм тӧреш лыкташ шанышывлӓ, Христос гӹц карангында, благодать гӹц айырлендӓ.
5 А мӓ ӹнянӹмӹнӓ гач Шӱлӹш доно тӧреш лыкмым выченӓ, тӧреш лыкмылан уаненӓ.
6 Мӓ Христос Иисус доно ушнен шалгенӓ гӹнь, мӓлӓннӓ пӹчмӹ овуцам эртӓрӹмӹ ӓль уке – сойток, яратымаш гач кӹцкӹм пушы ӹнянӹмӓш веле керӓл ылеш.
7 Тӓ яжон тӹнгӓлӹндӓ. Лачокым колышташ агыл манын, кӱ тӓмдӓм цӓрен шагалтен?
8 Техень ӓптӹртӹш тӓмдӓм Ӱжшӹ гӹц агыл.
9 Чӹдӹ ру улы руашым шукта.
10 Мӹнь тӓлӓндӓ ӹнянем, вет мӓ цилӓн Господь доно ушнен шалгенӓ: тӓ вес семӹнь шанаш ада тӹнгӓл. А тӓмдӓм пыдыратылшы, хоть-кӱ лижӹ, суйымы лиэш.
11 Шӱмбелвлӓ, пӹчмӹ овуца келеш манын, мӹнь эчеӓт увертӓрем гӹнь, малын мӹньӹм эчеӓт пӹзӹрӓт? Тенгежӹ Христосын крестӹжӹ гишӓн шамак эдемвлӓм шӹдештӓрӓш цӓрнӓ ыльы.
12 О, тӓмдӓм пыдыратылшывлӓ шулын нӓлмӹ лит ылгецӹ!
13 Тӓ, шӱмбелвлӓ, ирӹкӹш ӱжмӹ ылыда. Но ирӹкдӓ кӓп дон йӓнгӹн ядмыштылан йӧнӹм ӹнжӹ ӹштӹ, а иктӹ-весӹлӓндӓ яратен палшыда.
14 Вет цымыр закон ти ик шамакышты ылеш: «Лишӹлетӹмӓт ӹшкӹметӹм яратымы семӹньок яраты»*.
15 А иктӹ-весӹдӓм пырыда дӓ качкыда гӹнь, вӓшӓ-вӓшӓ пӹтӓрӹмӹ гӹц перегӓлтдӓ.
16 Мӹнь тидӹм келесӹнем: Шӱлӹш вуйлатымы семӹнь ӹлӹдӓ, тӹнӓм тӓ кӓп дон йӓнгӹн шыкланымыштым ада шокты.
17 Вет кӓп дон йӓнг Шӱлӹш ваштареш ӹштӹнештӹ, а Шӱлӹш – кӓп дон йӓнг ваштареш. Нӹнӹ иктӹ-весӹштӹ ваштареш ылыт, седӹндон тӓ, мам ӹштӓш шанедӓ, тӹдӹм ада ӹштӹ.
18 А тӓмдӓм Шӱлӹш виктӓрӓ гӹнь, тӓ закон лӹвӓлнӹ ада ыл.
19 Кӓп дон йӓнгӹн пӓшӓжӹ цилӓлӓн каеш. Тидӹ: йӓл вӓтӹ доно каштмаш, шӓхӓрлӓнӹмӓш, йӹрнӹк кайыш, тӓйвилӓнӹмӓш,
20 идоллан кымалмаш, йозыланымаш, шӹдешкен ӹлӹмӓш, соредӓлмӓш, йӓлӹнлӓн йӓнгӹм йылатымаш, шӹдешкӹмӓш, ӹшкӹлӓн пайдам кӹчӓлмӓш, келшӹдӹмӓш, [аздарымаш,] вес тымдымаш,
21 тӹрӹнь анжымаш, пуштмаш, ӓрӓкӓ йӱмӓш, хӓрдӹмӹ лимӓш дӓ тӹлец молат. Кыце молнам тӓлӓндӓ попенӓм, кӹзӹтӓт попем: тенге ӹштӹшӹвлӓ Йымын Кугижӓншӹм ак нӓлеп.
22 А Шӱлӹшӹн кӹцкӹжӹ: яратымаш, ӹвӹртӹмӓш, тыр, кужын тырхымаш, пуры кымыл, весӹм жӓлӓйӹмӓш, ӹнянӹмӓш,*
23 смирнӓ лимӓш, ӹшкӹмӹм кычен кердмӓш. Техеньвлӓ ваштареш закон уке.
24 Но кыдыжы Христосын ылыт, нӹнӹ кӓп дон йӓнгӹм дӓ нӹнӹн шыкланен ядмыштым крестеш пыдаленӹт.
25 Мӓ Шӱлӹш доно ӹленӓ гӹнь, тенгежӹ Шӱлӹш вуйлатымы семӹнь ӹштӹшӓшлык ылына.
26 Лӹмлештӓрӓлтмӹм кӹчӓлшӹ, иктӹ-весӹм шӹдештӓрӹшӹ, иктӹ-весӹлӓн йӓнг йылышы лишӓшлык ана ыл.
*5:14 Лев 19:18 *5:22 «Ӹнянӹмӓш» – тидӹм «ӹнян ылмаш» манынат ынгылаш лиэш.1 Шӱмбелвлӓ, эдем иктӓ-махань сулыкыш пыра гӹнь, тӓ, Шӱлӹш вуйлатымы семӹнь ӹлӹшӹвлӓ, техень эдемӹм смирнӓ йӓнг доно виктӓремӓдӓ, но ӹшкӹмдӓмӓт анжыда, идӓ алталалт.
2 Иктӹ-весӹдӓн нелӹлыкым намалда, тенге тӓ Христосын законжым шоктедӓ.
3 Кӱ, нимат агыл гӹнят, ӹшкӹмжӹм тӓгӱэшок шотла, тӹдӹ ӹшкӹмжӹм ӹшке алтала.
4 Каждый ӹшке пӓшӓжӹм тергӹжӹ, тӹнӓм когоэшнӹмӹжӹ весӹн пӓшӓжӹ гишӓн агыл, а ӹшкӹмжӹн пӓшӓжӹ гишӓн лиэш.
5 Каждый ӹшке нелӹлыкшым намалшашлык.
6 Кӱм Йымын шамакеш тымдымы, тӹдӹ ӹшкӹмжӹн пурлыкшы гӹц лаштыкым тымдышыжылан пушашлык.
7 Идӓ алталалт: Йымым вырсаш ак ли. Эдем мам ӱдӓ, тӹдӹм тӹредеш.
8 Ӹшкӹмжӹн кӓп дон йӓнгӹшкӹжӹ ӱдӹшӹ – кӓп дон йӓнг гӹцок пӹтӹмӓшӹм тӹредеш, а Шӱлӹшӹш ӱдӹшӹ – Шӱлӹш гӹц курымашлык ӹлӹмӓшӹм тӹредеш.
9 Пурым ӹштӹмӓшеш мӓлӓннӓ янгылаш ӹнжӹ ли, ана слабкаэм гӹнь, ӹшке веремӓштӹжӹ лӓктӹшӹжӹм тӹредӹнӓ.
10 Тенгежӹ, веремӓнӓ улы годым, цилӓлӓн, паснаок ӹнянӹмӓш гач мӓлӓннӓ шӱмбел дон ӓкӓ-шыжар лишӹвлӓлӓн, пурым ӹштӹшӓшлык ылына.
11 Анжалда, махань кого буква доно мӹнь тӓлӓндӓ ӹшке кидем доно сирем.
12 Кӓп гишӓн хваляш шанышывлӓ тӓлӓндӓ пӹчмӹ овуцам ӹштӹктӓт. Христосын крестӹжӹ верц пӹзӹрӹмӹ лиӓш агыл манын, нӹнӹ тидӹм ӹштӓт.
13 Пӹчмӹ овуцам кычышывлӓ ӹшкежӓт законым ак колыштеп, но нӹнӹ, тӓлӓндӓ мам ӹштӹмӹ доно хваляш манын, тӓ пӹчмӓшӹм эртӹдӓ шанат.
14 А мӹнь мӓмнӓн Господьна Иисус Христосын крестӹжӹ гӹц молы доно нима донат ӹнем хвальы, тӹдӹн доно мӹлӓм улы сӓндӓлӹкӹм пыдалымы, а мӹнь сӓндӓлӹклӓн пыдалымы ылам.
15 Христос Иисус доно ушнен шалгымашты пӹчмӓшӓт, пӹчдӹмӓшӓт нимат агыл, а тидӹ веле: Йымын уэмдӹмӹ эдем.
16 Кӱвлӓ ти анжыктымы корны доно ӹлӓш тӹнгӓлӹт, нӹнӹлӓн дӓ Йымын Израильжӹлӓн тыр дӓ жӓлӓйӹмӓш лижӹ!
17 Анзыкыжым мӹлӓнем иктӓт нелӹм ӹнжӹ ӹштӹ, вет мӹнь Господь Иисусын пӧремжӹм ӹшке кӓпӹштем намалам.
18 Шӱмбелвлӓ, мӓмнӓн Господьна Иисус Христосын благодатьшы тӓмдӓн шӱлӹшдӓ сага лижӹ. Аминь.