1 Йымын ирӹкшӹ* семӹнь Иисус Христосын Апостолжы лишӹ Павел дӓ Тимофей шӱмбел дорц Йымын Коринфӹштӹшӹ церкӹжӹлӓн дӓ улы Ахаиштӹшӹ цилӓ святой эдемлӓн.
2 Мӓмнӓн Йымы Ӓтянӓ дорц дӓ Господь Иисус Христос дорц тӓлӓндӓ благодать дӓ тыр лижӹ.
3 Мӓмнӓн Господьна Иисус Христосын Йымыжы дӓ Ӓтяжӹ, жӓлӓйӹшӹ Ӓтя, цилӓ ладнангдарымашым пушы Йымы хвальымы лижӹ!
4 Тӹдӹ мӓмнӓм хоть-махань парвалымашна годымат ладнангдара, тенгежӹ, махань ладнангдарымаш доно Йымы мӓмнӓм ӹшкӹмнӓм ладнангдара, мӓӓт хоть-махань парвалымашты ылшывлӓм техень ладнангдарымаш донок ладнангдарен кердӹнӓ.
5 Кыце Христосын парвалымыжы мӓлӓннӓ шукемеш, тенгеок ладнангдарымашат Христос гач мӓлӓннӓ шукемеш.
6 Мӓ парваленӓ гӹнь, тӓлӓндӓ ладнангдарымаш дӓ ытарымаш лижӹ манын парваленӓ. Махань орлыкым мӓ тырхенӓ, тӓӓт тӹхеньӹмок тырхедӓ гӹнь, Йымы тӓлӓндӓ ытарымашым пуа.
7 Тӓ шотыштыда мӓмнӓн уанымашна пингӹдӹ. Мӓлӓннӓ ладнангдарымаш пуалтеш гӹнь, тӓлӓндӓ ладнангдарымаш дӓ ытарымаш толышты манын тӹдӹ пуалтеш. Мӓ пӓленӓ: кыце тӓ мӓмнӓн парвалымашкы ушнедӓ, тенгеок ладнангдарымашкат ушнедӓ.
8 Шӱмбелвлӓ, Асиштӹ махань эксӹкӹш вӓрештмӹнӓ гишӓн тӓлӓндӓ пӓлдӹртӹде ӹненӓ коды. Мӓ пиш кого, тырхаш лидӹмӹ эксӹкӹш вӓрештӹннӓ ыльы, ӹлӹшӹ кодына манынат ӹнянӹделна,
9 колаш суйымы ылына манын шаненнӓ. Мӓ ӹшкӹлӓннӓ агыл, а колышывлӓм ӹлӹжтӹшӹ Йымылан уанышашлык ылына, седӹндон тенге лин.
11 (10-11) Йымы техень лишнӹ ылшы колымаш гӹц мӓмнӓм ытарен дӓ ытара. Тӓӓт мӓ верцнӓ ыдылмыда доно мӓлӓннӓ палшедӓ гӹнь, Тӹдӹ мӓмнӓм анзыкылаат ытараш тӹнгӓлеш манын, мӓмнӓн уанымашна улы. Тенгежӹ шукы эдемӹн ыдылмышты гишӓн мӓлӓннӓ пурым пумыжы верц Йымылан шукын таум келесӓт.
12 Теве ма доно когоэшненӓ: ти сӓндӓлӹкӹштӹ, айыртемӹнок тӓ лоштыда, мӓ эдемӹн ышыжы семӹнь агыл, а Йымын благодатьшы семӹнь, Йымылан ярал виш йӓнг дӓ ире шанымаш доно ӹленнӓ манын, совестьнӓ пӓлдӹртӓ.
14 (13-14) Мӓ тӓлӓндӓ весӹм агыл, а мам тӓ лыдыда, мам тӓ ынгыледӓ, тӹдӹм веле сиренӓ. Тӓ мӓмнӓм ӹнде маняр-гӹнят ынгылендӓ, но мычаш якте ынгыледӓ манын, мӹнь ӹнянен вычем: мӓмнӓн Господьна Иисус Христосын кечӹнжӹ тӓ мӓ донна когоэшнедӓ, мӓӓт тӓ донда когоэшненӓ.
15 Техень ӹнян доно мӹнь тӓ докыда андакок минем ыльы. Йымы гӹц кокшы гӓнӓ тӓ благодатьым нӓлдӓ манын шаненӓм.
16 Македониш кемем годым тӓ докыда пыраш дӓ Македони гӹц угӹц тӓ докыда миӓш шаненӓм, а тӓ мӹньӹм Иудейӹш ыжатен колтедӓ ыльы.
17 Тенге шанен, яжон тумаялде ӹштенӓм ма? Ӓль мӹнь мам ӹштӹшӓшӹм ти сӓндӓлӹкӹштӹшӹ эдемвлӓ семӹнь шанен йӓмдӹлем ма? Ик веремӓнок «тенге, тенге», «агыл, агыл» манам ма?
18 Йымы ӹнян ылеш: мам мӓ тӓлӓндӓ попеннӓ, ик веремӓнок «тенге» дӓ «агыл» лиде.
19 Мӓмнӓн ‒ мӹньӹн, Силуанын дӓ Тимофейӹн ‒ тӓ доныда тымден попымы Йымын Эргӹжӹ Иисус Христос доно «тенге» дӓ «агыл» лиде, Тӹдӹн доно «тенге» лин.
20 Вет Йымын цилӓ сӧрӹмӹжӹ ‒ Тӹдӹн доны «тенге» дӓ Тӹдӹн доны «аминь». Седӹндон Йымылан мӓ гачна лӹмлештӓрӹмӓш лиэш.
21 Мӓмнӓнӓт, тӓмдӓнӓт Христос доно ушнымынам пингӹдемдӹшӹжӹ дӓ мӓмнӓм шӹрӹшӹжӹ – тидӹ Йымы. *
22 Тенге Тӹдӹ вӹлӓннӓ пецӓтшӹм пиштен дӓ шӱмӹшкӹнӓ залог шотеш Шӱлӹшӹм пуэн.
23 Тӓмдӓм жӓлӓемӓт, кӹзӹт якте мӹнь Коринфӹш миделам – свидетелеш Йымым ӱжӓм дӓ йӓнгем доно цуратлем.
24 Мӓ тӓмдӓн ӹнянӹмӓшдӓм кид лӹвӓлнӹнӓ ӹненӓ кычы, а ӹвӹртӹмӓшдӓ лижӹ манын, мӓ тӓ донда иквӓреш пӓшӓленӓ, вет тӓмдӓн ӹнянӹмӓшдӓ цаткыды.
*1:1 Ирӹк – воля, желание. *1:21 Греклӓ сирӹмӓштӹ шамак доно мадмаш улы: грек йӹлмӹштӹ Христос лӹм «шӹрен шагалтымы» лиэш, а шӹрӹмӹ овуцам священникеш ӓль кугижӓэш шагалтымы годым ӹштенӹт.1 Мӹнь тенге шанен пиштенӓм: тӓ докыда эчеӓт ойхы доно ам тол.
2 Мӹнь тӓмдӓм ойхырыктем гӹнь, кӱ мӹньӹм сусуэмдӓ? Кӱм мӹнь ойхырыктенӓм, тӹдӹ агыл ма?
3 Кӱвлӓ верц мӹнь ӹвӹртӹшӓшлык ылам, мимӹкем нӹнӹ гӹц мӹлӓнем ойхы ӹнжӹ ли манын, мӹнь тенге тӓлӓндӓ сиренӓм. Мӹньӹн ӹвӹртӹмӓшем тӓлӓндӓӓт ӹвӹртӹмӓш ылеш манын, цилӓлӓндӓ ӹнянем.
4 Кого парвалымашым тырхен дӓ тыргыжланышы йӓнг доно мӹнь, шукы сӹнзӓвӹдӹм йоктарен, тӓлӓндӓ сиренӓм. Мӹнь тӓмдӓм ойхырыкташ сирӹделам, а тӓмдӓм улы шӱмем доно яратымемӹм пӓлӹдӓ манын сиренӓм.
5 А кӱ ойхырыктен, мӹньӹм агыл ойхырыктен, маняр-гӹнят ‒ утыдон шукым ӹнем попы ‒ тӓмдӓм цилӓдӓм ойхырыктен.
6 Техень эдемлӓн тӓ логӹцдӓ шукыштынок йӓтлӹмӹштӹ ситӓ,
7 тенгежӹ пиш кого ойхы тӹдӹм ӹнжӹ нел манын, ӹнде тӹдӹм простяш дӓ ладнангдараш келеш.
8 Седӹндон ядам: тӹдӹм угӹц яратен ӹлӹдӓ.
9 Тӓмдӓм тергӓш дӓ, тӓ цилӓ шотыштат шамак колыштшы ылыда ма манын пӓлӓш, мӹнь тӓлӓндӓ сиренӓм.
10 А тӓ кӱн вуйнаматшым простедӓ, тӹдӹнӹм мӹнят простем. Мӹнят, иктӓжӹм вуйнаматыштыжы простенӓм гӹнь, тӹдӹм Христос анзылны тӓ верцдӓ простенӓм.
11 Сатана мӓмнӓм алтален ӹнжӹ керд манын, мӹнь тенге ӹштем, вет тӹдӹн худа шанымашыжы мӓлӓннӓ пӓлӹдӹмӹ агыл.
12 Троадаш Христосын Пуры Увержӹм шайышташ мимӹкем, мӹлӓм Господь амасам пачын ылын гӹнят,
13 йӓнгем ладнанг кердде, вет Тит шӱмбелемӹм мӹнь моделам. Седӹндон, тӹштӹшӹвлӓлӓн цеверӹн кодаш согоньлен, Македониш кенӓм.
14 Христос доно ушнымашты мӓмнӓм сӹнгӹмӓш доно соок нӓнгешӹ дӓ цилӓ вӓре Христосым пӓлӹмӓшӹн тотлы пышыжым мӓ гачна шӓрӹшӹ Йымылан тау!
15 Вет ытарымашкы кешӹвлӓлӓнӓт, пӹтӹмӓшкӹ кешӹвлӓлӓнӓт мӓ Йымы анзылны Христосын тотлы пышыжы ылына:
16 иктӹвлӓжӹлӓн – колымашым кандышы колымаш пыш, весӹвлӓжӹлӓн ‒ ӹлӹмӓшӹм кандышы ӹлӹмӓш пыш. Кӱ ти пӓшӓлӓн ярал ылеш?
17 Шукы эдем семӹнь мӓ Йымын шамакшы доно ана торгейӹ, а Йымы колтымы ылынаат, Йымы анзылны, Христос доно ушнен, виш йӓнг доно попенӓ.
1 Мӓ угӹц ӹшкӹмнӓм ӹшке пӓлдӹртӓш тӹнгӓлшӓшлык ылына ма? Юж эдемвлӓ семӹнь, ӓнят, мӓлӓннӓӓт пӓлӹмӹм ӹштӹшӹ сирмӓшвлӓ тӓлӓндӓ ӓль тӓ гӹцдӓ келӹт?
2 Тӓ ӹшке мӓмнӓн сирмӓшнӓ ылыда, тӹдӹм шӱмешнӓ сирӹмӹ, тӹдӹм цилӓ эдем пӓлен дӓ лыдын кердеш.
3 Христосын сирмӓшӹжӹ ылмыдам ӹшкеок анжыктедӓ. Тӹдӹм мӓмнӓн служымы пӓшӓнӓ доно сирӹмӹ, чернила доно агыл, а ӹлӹшӹ Йымын Шӱлӹшӹжӹ доно, кӱ хангаэш агыл, а эдем кӓпӹн шӱм хангаэшӹжӹ.
4 Йымы анзылны техень ӹнянӹмӓшнӓ Христос гач ылеш.
5 Тенге гӹнят мӓ нимамат ӹшке ӹштен кердӹннӓ манын ана керд, мӓмнӓн мыштымашна ‒ Йымы гӹц.
6 Тӹдӹ мӓмнӓм У Согоньлан служен кердшӹм ӹштен. Мӓ законыштышы букван служышыжы агыл, а Шӱлӹшӹн служышыжы ылына, вет законыштышы буква колымашкы шокта, а Шӱлӹш ӹлӹмӓшӹм пуа.
7 Кӱэш буква доно сирӹмӹ дӓ колымашым кандышы служымы пӓшӓӓт лӹмлештӹн, дӓ Израиль эргӹвлӓ Моисейӹн лицӓшкӹжӹ анжен кердделыт, вет тӹдӹн лицӓжӹ валгалт лӹмлештӹн, а тенге лӹмлештӓрӓлтмӹжӹ пӹтӹшӓшлык ылын.
8 Шӱлӹшлӓн служымы пӓшӓ утларак лӹмлештӓрӓлтшӹ ак ли ма?
9 Вуйнаматыш лыкмылан служымы пӓшӓӓт лӹмлештӹн гӹнь, тӧрӹш лыкмылан служымы пӓшӓ эче когоракын лӹмлештеш.
10 Тӹдӹ тенге когон лӹмлештӹн, андак лӹмлештшӹ пӓшӓ тӹдӹн доно тӓнгӓштӓрӹмӓштӹ лӹмлештшӹлӓӓт ак кай.
11 Вет пӹтӹшӓшлыкшы лӹмлештӓрӓлт толын гӹнь, курымашлыкшы шукы пачаш когон лӹмлештеш.
12 Техень уанымашна улы гӹнь, мӓ халык анзылны лӱдде попенӓ.
13 Пӹтӹшӓшлык лӹмлештӓрӓлтмӓшӹн мычашыжым Израиль эргӹвлӓ ӹнжӹштӹ анжеп манын, Моисей лицӓжӹм леведӹн, а мӓ тенге ана ӹштӹ.
14 Но Израиль халыкын ышыжы кӱӓнгӹн. Тошты Согоньым лыдмы годым тагачы яктеӓт тӹ леведӹшок карангдыде кодеш, вет Христос доно ушнымашты веле тӹдӹ карангдалтеш.
15 Моисейӹн законжым лыдмы годым леведӹш тагачы яктеӓт нӹнӹн шӱмӹштӹ вӹлнӹ киӓ.
16 Но кынам Господь векӹлӓ сӓрнӓлӹт, леведӹш нӓлӓлтеш.
17 Господь ‒ тидӹ Шӱлӹш, а кышты Господьын Шӱлӹшӹжӹ улы, тӹштӹ – ирӹк.
18 А мӓмнӓн лицӓнӓ леведмӹ агыл. Мӓ цилӓн Господьын валгалт лӹмлештӓрӓлтмӹжӹм вуйта тӹгӹрӹштӹ анженӓ, Тӹдӹ гань лиӓш манын, лӹмлештӓрӓлтмӓш гӹц лӹмлештӓрӓлтмӓшӹш вашталтына; тенге мӓмнӓм Господьын Шӱлӹшӹжӹ вашталта.*
*3:18 «Господьын Шӱлӹшӹжӹ»: грек шамакым тенгеӓт сӓрӓш лиэш: «Господь, Шӱлӹш».1 Тенге, Йымын жӓлӓйӹмӹжӹ велдӹк техень служымы пӓшӓнӓ улы гӹнь, мӓ вуйнам ана сӓкӹ.
2 Мӓ ӹшкӹмнӓм намысыш пыртышы йывырт ӹштӹмӹ пӓшӓм карангденнӓ, ана йойланы, Йымын шамакшым ана вашталтыл, а лачокым пачын увертӓренӓ дӓ ӹнян ылмынам цилӓ эдемӹн совестьшӹлӓн Йымы анзылны анжыктенӓ.
3 А мӓмнӓн шӓрӹмӹ Пуры Увернӓ леведмӹ гӹнь, пӹтӹмӓшкӹ кешӓшлыквлӓ гӹц веле леведмӹ.
4 Нӹнӹн, ӹнянӹдӹмӹвлӓн, ышыштым ти курымыштышы йымы слӧпӧйӹм ӹштен. Тенге, Христосын лӹмлештӓрӓлтмӹжӹ гишӓн шайыштшы Пуры Уверӹн сотыжы нӹнӹлӓн ак валгалт. Христосшы ‒ [ужаш лидӹмӹ] Йымын цӹрежӹ.
5 Вет мӓ ӹшке гишӓннӓ агыл увертӓренӓ, мӓмнӓн увернӓ теве маханьы: Христос Иисус ‒ Господь, дӓ Иисус верц мӓ тӓмдӓн тӓрзӹдӓ ылына.
6 Пӹцкемӹш гӹц сотылан валгалташ шӱдӹшӹ Йымы шӱмнӓм сотемдӓрен. Тенге Йымын Иисус Христосын лицӓжӹ гач валгалтшы лӹмлештӓрӓлтмӹжӹм пӓлӹмӓш мӓмнӓм сотемдӓрӓ.
7 Ти пиш кого сила мӓ гӹцнӓ агыл, а Йымы гӹц лӓкмӹм ужышты манын, ти пайда шун ӓтӹштӹнӓ ылеш.
8 Мӓмнӓм цилӓ монгыр гӹц пӹзӹртӓт, но мӓ ташкен шумы ана ыл. Уанымашна укелӓ чучеш, но уанымашым ана ямды.
9 Мӓмнӓм поктылыт, но шуэн кодымы ана ыл, мӓмнӓм сӹмӹрӓл шуат, но пӹтӓрӹмӹ ана ыл.
10 Мӓмнӓн кӓпӹштӹнӓ Иисусын ӹлӹмӓшӹжӓт пӓлдӹрнӹжӹ манын, мӓ кӓпӹштӹнӓ Господь Иисусын колымашыжым со кандыштына.
11 Вет мӓ, ӹлӹшӹвлӓ, Иисус верц со колымашлан пумы ылына, тенге Иисусын ӹлӹмӓшӹжӓт мӓмнӓн колышашлык кӓпӹштӹнӓ пӓлдӹрнӓ.
12 Тенгежӹ, мӓ лоштына колымаш пӓшӓм ӹштӓ, а тӓ лоштыда ‒ ӹлӹмӓш.
13 Мӓмнӓн техень ӹнянӹмӓш шӱлӹш улы, кыды гишӓн сирӹмӹ: «Мӹнь ӹняненӓм, седӹндон попенӓм».* Тенгеок мӓӓт ӹняненӓ, седӹндон попенӓ.
14 Пӓленӓ: Господь Иисусым колымаш гӹц Ӹлӹжтӹшӹ мӓмнӓмӓт Иисус гач ӹлӹжтӓ дӓ тӓ сагада Ӹшке анзыланжы шагалта.
15 Цилӓ тидӹ – тӓ верцдӓ, тенге благодать эче шукырак эдем докы шоэш, тӹнӓм таум ӹштӹмӓш шукемеш дӓ Йымы эчеӓт когон лӹмлештӓрӓлтеш.
16 Тенгежӹ, мӓ вуйнам ана сӓкӹ. Мӓмнӓн «вӹлвӓл эдемнӓ» тӹгӓнен пӹтӓ гӹнят, «кӧргӹ эдемнӓ» кечӹ гӹц кечӹш уэмеш.
17 Техень мытык дӓ куштылгы парвалымаш мӓлӓннӓ курымаш лӹмлештӓрӓлтмӓшӹм висӓш лидӹмӹн канда.
18 Мӓ кайшым агыл, а кайдымым анженӓ, вет кайшы кӹтӹк жепеш веле, а кайдымы ‒ курымаш.
*4:13 Пс 115:11 Мӓ пӓленӓ: мӱлӓндӹ вӹлнӹшӹ пӧртнӓ, ти амашна,* пыдыртымы лиэш гӹнят, Йымы пумы ӹлӹмӹ вӓрнӓ улы. Тидӹ ‒ эдем кид тӹкнӹде ӹштӹмӹ пӹлгомыштышы курымаш пӧрт.
2 Но тиштӹ ылмына годым мӓ, когон шӱлӓлтен, пӹлгом гӹц пуалтшашлык ӹлӹмӹ вӓрӹшкӹнӓ вӹдӹлӓлтмӹм улы шӱм доно выченӓ.
3 Вӹдӹлӓлтмӹкӹ, мӓлӓннӓ цӓрӓн кодаш веле ӹнжӹ ли ыльы.
4 Мӓ, ти кӓп-амашышты ылшывлӓ, когон шӱлӓлтен ясыланенӓ: мӓ ӹненӓ кыдаш, а колышашлыкым ӹлӹмӓш нелӹн колтыжы манын, чиненӓ.
5 Тидӹлӓнок мӓмнӓм Йымы ӹштен, Тӹдӹ мӓлӓннӓ залогеш ӹшке Шӱлӹшӹжӹм пуэн.
6 Седӹндон мӓ со лӱддӹмӹ ылына. Мӓ пӓленӓ: кӓпӹштӹ ылмына годым мӓ эче Господь сага ана ыл,
7 вет мӓ ужмы доно агыл, а ӹнянӹмӹ доно ӹленӓ.
8 Тенге мӓ лӱддӹмӹ ылына, кӓп гӹц лӓкмӹм дӓ Господь докы ванжымым яжоракеш шотленӓ.
9 Седӹндон мӓ керек-кышты линӓ гӹнят, кӓпӹштӹ ӓль Господь доны, Тӹдӹлӓн ярал лиӓш пиш цаценӓ.
10 Кӓпӹштӹ ӹлӹмӹжӹ годым каждыйна мам ӹштен, пурым ӓль худам, тӹ семӹнь нӓлӓш манын, мӓ цилӓн Христосын судшы анзылан шагалшашлык ылына.
11 Тенгежӹ, Господь гӹц лӱдмӹм пӓлен, мӓ эдемвлӓм ӹняндӓрӓш цаценӓ. А махань ылмына Йымылан пӓлӹ, тидӹ тӓмдӓн совестьлӓндӓӓт пӓлӹ манын ӹнянем.
12 Мӓ ӹшкӹмнӓм тӓлӓндӓ угӹц ана пӓлдӹртӹ, а шӱмӹштӹшӹ доно агыл, вӹлнӹшӹ доно когоэшнӹшӹвлӓлӓн мам келесӓшдӓ лижӹ манын, мӓ донна когоэшнӓш вирӹм пуэнӓ.
13 Мӓ шотдымы ылынна гӹнь – Йымы верц, а ышан-шотан гӹнь ‒ тӓ верцдӓ,
14 вет Христосын яратымашыжы мӓмнӓм вуйлата. Мӓ тенге шаненӓ: иктӹ цилӓ эдем верц колен гӹнь, тенгежӹ цилӓн коленӹт.
15 А Христос цилӓ эдем верц колен, тенгежӹ, ӹлӹшӹвлӓ ӹнде ӹшкӹлӓнӹштӹ агыл, а нӹнӹ верц Колышылан дӓ Ӹлӹжшӹлӓн ӹлӹшӓшлык ылыт.
16 Седӹндон тилец вара мӓ иктӹмӓт эдем висӓ доно ана пӓлӹ. Андакшы мӓ Христосым тенге пӓленнӓ гӹнь, ӹнде ана пӓлӹ.
17 Тенге, кӱ Христос доно ушнен ӹлӓ, тӹдӹ у эдем, первишӹжӹ шайылан кодын, ӹнде цилӓ у.
18 Цилӓок Йымы гӹц, Тӹдӹ Иисус Христос гач мӓмнӓм Ӹшкежӹ доно пуремден* дӓ пуреммӓшкӹ ӱжмӹ пӓшӓм мӓлӓннӓ ӹнянен пуэн:
19 Христос доно ушнен шалгышы Йымы сӓндӓлӹкӹм Ӹшкежӹ доно пуремден, эдемвлӓн вуйнаматыштым шотыш нӓлде, а пуремдӹмӹ гишӓн шамакым увертӓрӓш мӓлӓннӓ ӹнянен пуэн.
20 Тенгежӹ, мӓ Христосын лӹмжӹ доно колтымы ылына, Йымы Ӹшке мӓ гачна сарвала. Христосын лӹмжӹ доно ядына: Йымы доно пуремдӓ.
21 Христос доно ушнымашты мӓлӓннӓ Йымы анзылны тӧрӹш лӓктӓш манын, мӓ верцнӓ Йымы сулыкым пӓлӹдӹмӹ Христосым сулык верц жертвӹм ӹштен.
*5:1 «Мӱлӓндӹ вӹлнӹшӹ пӧрт» дӓ «амаш» колышашлык кӓпнӓм анжыктат. *5:18 Пуремдӓш – примирить.1 Йымы доно иквӓреш пӓшӓм ӹштӹшӹ ылынаат, мӓ тӓмдӓм сарваленӓ: Йымын благодатьшым нӓлмӹдӓ такеш ӹнжӹ ли.
2 Вет Йымы попа:
«Ярал веремӓн Мӹнь тӹньӹм колынам,
ытарымы кечӹн тӹлӓт палшенӓм».*
Теве ӹнде ярал жеп, теве ӹнде ытарымы кечӹ.
3 Служымы пӓшӓнӓ вырсымы ӹнжӹ ли манын, мӓ иктӹлӓнӓт нима шотыштат шӹртнялтмӹ кӱм ана пиштӹ.
5 (4-5) Цилӓ годымат ӹшкӹмнӓм Йымын служышыжы семӹнь анжыктенӓ: цӹтӹмӓштӹ, эксӹкӹштӹ, нелӹштӹ, пӹзӹрньӹкӹштӹ, мӓмнӓм шимӹ годым, кызаматышты, пыдыранзыкышты, нелӹ пӓшӓштӹ, чӹдӹ амалымашты, постышты,*
6 ирештӹ, пӓлӹмӓшӹштӹ, кужын тырхымашты, пурышты, Святой Шӱлӹшӹштӹ, лачокшы яратымашышты,
7 тӧр шамакышты, Йымын силаштыжы ‒ мӓ тӧр ӹштӹмӓш вырсы хӓдӹрӹм вургымла дӓ шалахай кидӹштӹ кыченӓ, ‒
8 лӹмлештмӓштӹ дӓ намысышты, вырсымашты дӓ хвальымашты. Мӓмнӓм алталышеш шотлат, но мӓ тӧр эдем ылына,
9 пӓлӹдӹмеш шотлат, но мӓмнӓм пӓлӓт, колышеш шотлат, но мӓ теве ӹленӓ. Мӓмнӓм ясыландарат, но мӓ ана колы.
10 Мӓмнӓм ойхырыктат, а мӓ со ӹвӹртӹшӹ ылына, мӓ незер ылына, но шукым пайдаренӓ, мӓмнӓн ниманаат уке, но цилӓок мӓмнӓн.
11 Коринфӹштӹ ӹлӹшӹвлӓ, мӓ тӓлӓндӓ цилӓ гишӓнок нимат шӹлтӹде попенӓ, мӓмнӓн шӱмнӓ тӓлӓндӓ кымдан пачмы.
12 Тӓлӓндӓ мӓмнӓн шӱмӹштӹнӓ тор агыл, но ӹшкӹмдӓн шӱмӹштӹдӓ тор.
13 Ӹшкӹмемӹн тетявлӓэмлӓн попымы семӹнь келесем: тенгеок мӓлӓннӓ пӧртӹлтӹдӓ, тӓӓт шӱмдӓм кымдан пачда.
14 Ӹнянӹдӹмӹвлӓ доно иквӓреш йӓл хамытыш идӓ кӹцкӓлт. Тӧр ӹштӹмӹн дӓ законым пыдыртымашын ма иканьышты улы? Соты дон пӹцкемӹш лошты махань кӹл улы?
15 Христос дон Велиар* кыце икышын лит? Ӓль ӹнянӹшӹ дон ӹнянӹдӹмӹ ик векӹ лин кердӹт ма?
16 Йымын пӧртшӹ кыце идолвлӓ доно ик вӓрӹштӹ лиэш? Тӓ ӹлӹшӹ Йымын пӧртшӹ ылыда. Йымы тенге келесен:
«Мӹнь нӹнӹ доны ӹлӓш
дӓ лоштышты кашташ тӹнгӓлӓм.
Нӹнӹн Йымышты лиӓм,
а нӹнӹ Мӹньӹн халыкем лит».*
17 Седӹндон
«Нӹнӹ логӹц лӓкдӓ,
нӹнӹ гӹц айырлыда, ‒ Господь попа. ‒
Ире агыл докы идӓ тӹкнӹ, тӹнӓм тӓмдӓм Ӹшке докем нӓлӓм».*
18 «Тӓлӓндӓ Ӓтя лиӓм,
а тӓ Мӹньӹн эргем дон ӹдӹрвлӓэм лидӓ», ‒
манеш Цилӓ Кычышы Господь.*
1 Тенгежӹ, яратымывлӓэм, техень сӧрӹмӓшвлӓнӓ ылыт гӹнь, мӓ кӓп дон йӓнгӹн дӓ шӱлӹшӹн цилӓ акъярышты гӹц ӹшкӹмнӓм ирӹктӹшӓшлык дӓ, Йымы гӹц лӱдӹн, святой ӹлӹмӓшӹм ӹлӹшӓшлык ылына.
2 Шӱмӹштӹдӓ мӓлӓннӓ вӓрӹм пуда. Мӓ иктӹлӓнӓт худам ӹштӹделна, эксӹкӹш иктӹмӓт пыртыделна, иктӹн гӹцӓт пайдам алтален нӓлделна.
3 Тӓмдӓм суяш агыл тидӹм попем, вет мӹнь андакат келесенӓм: тӓ мӓмнӓн шӱмӹштӹнӓ ылыда, колымаштат, ӹлӹмӓштӓт тӓ донда иквӓреш линенӓ.
4 Мӹнь тӓлӓндӓ ӹнянен попен кердӓм, тӓ донда пиш когоэшнем. Ладнангдарымаш шӱмешем темӹн, парваленӓ гӹнят, мӹньӹн сусуэм тӹрдон ылеш.
5 Македониш мимӹкӹнӓ, кӓпешнӓ дӓ йӓнгешнӓ нимахань кӓнӹмӓш ылде, цилӓ шотыштат пӹзӹрӹмӹ ылынна: вӹлец ‒ кредӓлмӓш, кӧргӹштӹ ‒ лӱдмӓш.
6 Но тырхен ӹлӹшӹвлӓм ладнангдарышы Йымы мӓмнӓм Титӹн толмыжы доно ладнангдарен.
7 Титӹн толмыжы веле агыл, тӹдӹн тӓ доныда ладнангмашым нӓлмӹжӓт мӓмнӓм ладнангдарен. Мӹньӹм ужмы шомыда, мӹнь верцем ойхырымыда дӓ шытырланымыда гишӓн тӹдӹ мӓлӓннӓ шайыштын, тенге мӹнь эчеӓт когон ӹвӹртенӓм.
8 Сирмӓшем доно тӓмдӓм ойхырыктенӓм гӹнят, ам жӓлӓйӹ. Сирмӓшем тӓмдӓм шукешок агыл ойхырыктымым ужын, тӹдӹм колтымем гишӓн жӓлӓйӹшӹм гӹнят,
9 ӹнде мӹнь ӹвӹртем. Ойхырымыда гишӓн агыл, а ойхыда тӓмдӓм сулыкдам простьыктымашкы дӓ Йымы докы сӓрнӓлмӓшкӹ кандымы гишӓн ӹвӹртем. Тӓ вет Йымылан яралын ойхырендӓ, тенгежӹ мӓ тӓлӓндӓ нимахань эксӹкӹмӓт ӹштӹделна.
10 Йымылан ярал ойхырымаш сулыкым простьыктымашкы, Йымы докы сӓрнӓлмӓшкӹ дӓ вашталташ лидӹмӹ ытарымашкы канда. А сӓндӓлӹкӹштӹшӹ ойхырымаш колымашкы нӓнгеӓ.
11 Йымылан ярал ойхырымашда мам ӹштен, анжалда: махань цацымашым, тӧрӹш лӓктӓш шанымашым, махань шӹдешкӹмӓшӹм, махань лӱдмӓшӹм, махань ужмы шомашым, махань шытырланымашым, наказаш махань йӓмдӹ ылмашым тӓ лоштыда шачыктен! Тиштӹ тӓ цилӓ шотыштат ире ылмыдам анжыктендӓ.
12 Тенгежӹ, мӹнь тӓлӓндӓ сиренӓм гӹнят, худам ӹштӹшӹ верц ӓль худам ӹштӹмӹм тырхышы верц агыл, а тӓ верцдӓ шытырланымынам ӹшкежӓт Йымы анзылны ужда манын сиренӓм.
13 Тидӹжӹ мӓмнӓм ладнангдарен. Но Титӹн ӹвӹртӹмӹжӹ мӓмнӓм ти ладнангмаш гӹц эче утларак ӹвӹртӹктен, вет тӓ цилӓн тӹдӹн йӓнгжӹм сусуэмдендӓ.
14 Мӹнь тӹдӹлӓн тӓ гишӓндӓ иктӓ-ма шотышты хвален попенӓм гӹнь, намысыш пырыделам. Кыце тӓлӓндӓ со лачокым веле попеннӓ, тенгеок Тит анзылны хвален попымынаат тӧрӹш лӓктӹн.
15 Махань шамак колыштшы тӓ ылыда дӓ кыце тӹдӹм лӱдӹн дӓ шотеш пиштен вӓшлиндӓ манын ӓшӹндӓрӹмӹжӹ годым тӹдӹн шӱмжӹ эче утларак тӓ векӹдӓ сӓрнӓлеш.
16 Тӓлӓндӓ цилӓ шотыштат ӹнянен кердӓм манын, ӹвӹртем.
1 Шӱмбелвлӓ, Македоништӹшӹ церкӹвлӓлӓн Йымы махань благодатьым пумы гишӓн тӓлӓндӓ увертӓренӓ.
2 Кого парвалымаш доно тергӹмӹм эртӹмӹ годымок нӹнӹн кого сусушты улы, дӓ пиш укеӓн ылмышты вӹлецок ӹшкӹмӹштӹнӹм улы кымыл доно пуэнӹт.
3 Нӹнӹ ӹшке кымылышты доно кердмӹштӹ семӹнь дӓ кердмӹштӹ гӹц утларакат пуэнӹт, тидӹм мӹнь ужынам.
4 Святойвлӓлӓн погымы пӓшӓштӹ нӹнӹнӓт палшыкышты лижӹ манын, пиш сарвален ядыныт.
5 Мам вычымынам веле агыл нӹнӹ ӹштенӹт: нӹнӹ ӹшкӹмӹштӹмӓт пӹтӓри Господьлан, а вара Йымын ирӹкшӹ* семӹнь мӓлӓннӓӓт пуэнӹт.
6 Седӹндон Титӹм, тӓ доныда пуры пӓшӓжӹм кыце тӹнгӓлӹн, тенгеок мычаш якте шокташ ядынна.
7 Тӓ цилӓ шотыштат паян ылыда: ӹнянӹмӓш доно, шамак доно, пӓлӹмӓш доно, цацымаш доно, мӓмнӓм яратымыда доно. Тенге гӹнь, ти пуры пӓшӓштӓт кукыр идӓ ли.
8 Шӱдӹмӹ семӹнь тидӹм ам попы, а молывлӓн цацымышты гишӓн шайыштын, тӓмдӓнӓт яратымашда йӓнг вашт ылеш ма, тергӹнем.
9 Вет мӓмнӓн Господьна Иисус Христосын благодатьшым пӓледӓ: тӓ Тӹдӹн укеӓн ылмыжы доно пайыда манын, Тӹдӹ, паян, тӓ верцдӓ незеремӹн.
10 Мӹнь тӓлӓндӓ тидӹ гишӓн кӓнгӓшӹм пуэм, тӹдӹ тӓлӓндӓ пайдам пуа, вет имешток тӓ йӓл гӹц анзыц ти пӓшӓм тӹнгӓлӹндӓ дӓ тӹдӹм пиш ӹштӹнедӓ ыльы:
11 ӹнде ти пӓшӓм мычаш якте шоктыда. Тӹнгӓлӓш кымылда ылын гӹнь, кердмӹдӓ семӹнь тӹдӹм пӹтӓрӹдӓ.
12 Вет пуаш кымыл улы гӹнь, эдемӹн ма ылмыжы гӹц пумы ситӓ. Мажы уке, тӹдӹм ак ядеп.
13 Весӹвлӓлӓн куштылгы, а тӓлӓндӓ нелӹ лишӓшлык агыл, иктӧр лижӹ:
14 кӹзӹт тӓмдӓн утыда нӹнӹн ситӹдӹмӹштӹм темӓш, а вара нӹнӹн утышты тӓмдӓн ситӹдӹмӹдӓм темӓш палшыжы, тенге цилӓ иктӧр лиэш.
15 Сирӹмӹ семӹнь
«Кӱ шукым поген, утыжы ылде,
кӱ чӹдӹм поген, ситӹдӹмӓшӹжӹ лиде»*.
16 Титӹн шӱмӹшкӹжӹ тӓ верцдӓ техеньок цацымашым пиштӹшӹ Йымылан тау.
17 Вет Тит мӓмнӓн ядмынам колыштын веле агыл, тӹдӹ техень цацышы ылеш ‒ тӓ докыда ӹшке кымылжы доно кеӓ.
18 Сагажы мӓ Пуры Уверӹм тымден шӓрӹмӹжӹ гишӓн цилӓ церкӹштӹ хвальымы шӱмбелӹм колтенӓ.
19 Эчежӹ церкӹвлӓ тӹдӹм мӓ донна иквӓреш палшыкым нӓнгеӓш айыренӹт, ти пуры пӓшӓм мӓ Господьын Ӹшкӹмжӹн когон лӹмлештӓрӓлтмӹжӹм дӓ йӓмдӹ ылмыдам анжыкташ ӹштенӓ.
20 Техень кого подарка доно мам ӹштӹмӹнӓ гишӓн иктӹнӓт мӓмнӓм йӓтлӓш вир ӹнжӹ ли манын цаценӓ.
21 Вет мӓ Господь анзылны веле агыл, эдемвлӓ анзылнат яжом ӹштӓш цаценӓ.
22 Ти кок эдем сага эче ик шӱмбелӹм колтенӓ. Мӓ тӹдӹм шукы гӓнӓ дӓ шукы шотышты тергеннӓ дӓ цацышы ылмыжым пӓленӓ. А ӹнде, тӓлӓндӓ пиш ӹнянӓӓт, эчеӓт когон цацышы лин.
23 Тит гишӓн попаш гӹнь, тӹдӹ мӹньӹн тӓнгем дӓ тӓлӓндӓ сагаэм пӓшӓм ӹштӹшӹ. А мӓмнӓн ти шӱмбелвлӓнӓм церкӹвлӓ колтат, нӹнӹ Христосын лӹмлештӓрӓлтмӹжӹ ылыт.
24 Тенгежӹ яратымашдам дӓ тӓмдӓм хваляш вирнӓ ылмым нӹнӹлӓн дӓ церкӹвлӓлӓн анжыктыда.
*8:5 Ирӹк – воля, желание. *8:15 Исх 16:18.1 Лачокшым гӹнь святойвлӓлӓн палшымы гишӓн тӓлӓндӓ сирӓш керӓлжӹ мӹлӓнем уке.
2 Вет мӹнь тӓмдӓн пуаш шанымыдам пӓлем дӓ, Ахаи мӱлӓндӹ имешшен палшаш йӓмдӹ манын, Македоништӹ ӹлӹшӹвлӓ анзылны тӓмдӓм хвален попем. Тӓмдӓн тенге палшаш цацымыда шукы эдемӹм кымылангден.
3 Тӓмдӓм хвальымына ти пӓшӓштӹ такеш ӹнжӹ ли дӓ тӓ мӹнь попымем семӹнь йӓмдӹ лидӓ манын, мӹнь шӱмбелвлӓм колтем.
4 Македоништӹ ӹлӹшӹвлӓ мӹнь сагаэм толыт дӓ тӓмдӓн йӓмдӹ агыл ылмыдам ужыт гӹнь, тӓмдӓм тинӓр хвальымына гишӓн мӓлӓннӓ намысланаш вӓрештеш, тӓжӹ, попашат уке, махань кого намысыш пыредӓ ыльы.
5 Тенгежӹ мӹнь гӹцем анзыц тӓ докыда миӓш дӓ андак сӧрӹмӹ подаркадам шот доно йӓмдӹлӓш шӱмбелвлӓм ядаш керӓлеш шотленӓм. Тӹнӓм подарка силом погымы окса семӹнь агыл, а ӹшке кымыл доно пумы лиэш.
6 Тидӹм келесем: кӱ чӹдӹм ӱдӓ, тӹдӹ чӹдӹм тӹредеш, а кӱ шукым ӱдӓ, тӹдӹ шукым тӹредеш.
7 Каждый эдем шӱмӹштӹжӹ шанен пиштӹмӹ семӹнь пужы, а ойхырен ӓль силом агыл, вет сусун пушым Йымы ярата.
8 Йымын тӓлӓндӓ пиш шукы пурым пуаш силажы улы, седӹндон тӓмдӓн соок цилӓ ситӹшӹн лиэш, дӓ шукы пуры пӓшӓм ӹштен кердӹдӓ.
9 Тенге сирӹмӹ:
«Тӹдӹ пурыжым шӓлӓтӓ, укеӓнвлӓлӓн пуа,
пурым ӹштӹмӹжӹ курым-курымеш ылеш».*
10 А ӱдӹшӹлӓн вырлыкашым дӓ качкаш киндӹм пушы Йымы тӓмдӓм вырлыкаш доно пайдара дӓ пурым ӹштӹмӹдӓн кӹцкӹжӹм шукемдӓ.
11 Тӓ шукы пурым ӹштен керддӓ манын, Йымы тӓмдӓм цилӓ шотыштат пайдара, тенге мӓмнӓн пӓшӓнӓ гач тӓмдӓн подаркада Тӹдӹлӓн таум ӹштӹмӹм шачыкта.
12 Вет тенге палшымы пӓшӓ святойвлӓн укеӓн ӹлӹмӓшӹштӹм куштылта веле агыл, а шукы эдемӹм Йымылан кого таум ӹштӹмӓшкӹ канда.
13 Кынам тӓ ти пӓшӓштӹ ӹшкӹмдӓн тӧр ылмыдам анжыктедӓ, тӹнӓм тӓ верцдӓ Йымым лӹмлештӓрӓш тӹнгӓлӹт, вет тӓ Христосын Евангелижӹлӓн ӹнянӹмӹдӓм пачын попедӓ, тӹдӹм колыштшы ылыда дӓ нӹнӹ доно дӓ цилӓ доно йӓнг вашт кӹлӹм кычедӓ.*
14 Нӹнӹ тӓ верцдӓ ыдылаш тӹнгӓлӹт, дӓ, Йымын тӓлӓндӓ пиш шукы благодатьым пумыжым ужын, кымылышты тӓ докыда сӓрнӓлеш.
15 Келесен мышташ лидӹмӹ подаркажылан Йымылан тау!
*9:9 Пс 111:9 *9:13 «Нӹнӹ доно дӓ цилӓ доно йӓнг вашт кӹлӹм кычедӓ»: грек шаям «Нӹнӹ доно дӓ цилӓ доно кӹлӹм кычен, ӹшкӹмдӓнӹм йӓнг вашт пуэдӓ» манынат сӓрӓш лиэш.1 Мӹнь, Павел, ‒ тӹдок, кӱ тӓ донда иквӓреш ылмыжы годым техень смирнӓ, укежӹ годым пингӹдӹ ‒ тӓмдӓм Христосын йӹвӹжӓ дӓ пуры ылмыжы доно сарвалем:
2 тӓ докыда мимӹкем, мӹньӹм пингӹдӹн идӓ попыкты. Мӓ вуйта кӓп дӓ йӓнг ядмы семӹнь ӹленӓ манын шотлышы эдемвлӓлӓн мӹнь чоте пингӹдӹ лиӓш шанем.
3 Вет кӓп дӓ йӓнг доно ӹленӓ гӹнят, мӓ кӓп дӓ йӓнг семӹнь агыл кредӓлӹнӓ,
5 (4-5) мӓмнӓн кредӓлмӹ хӓдӹрнӓ кӓпӹн дӓ йӓнгӹн агыл. Керек-махань цаткыды крепостьым Йымын силажы доно шӓлӓтен кердшӹ вырсы хӓдӹрнӓ улы, тӹдӹн доно акел шанымашым дӓ Йымым пӓлӹмӹ ваштареш шагалшы цилӓ ӓптӹртӹшӹм сӹмӹрӓлӹнӓ, каждый шанымашым кыченӓ дӓ Христосым колыштшыш сӓртенӓ.
6 Кынам тӓ цилӓ шотыштат шамак колыштшы лидӓ, улы шамак колыштдымашым йӓтлӓш мӓ йӓмдӹ ылына.
7 Ма тӓмдӓн сӹнзӓ анзылныда, тӹдӹм анжедӓ ма? Кӱ Христосын ылам манын ӹнянӓ, мӓмнӓмӓт ӹшке семӹньжӹ Христосын ылына манын шотлыжы.
8 Господь мӓлӓннӓ властьым пуэн, ти власть доно мӓ тӓмдӓм шӓлӓтӹшӓшлык агыл, а пингӹдемдӹшӓшлык ылына. Тидӹн доно мӹнь утларакат когоэшнем гӹнь, намысыш ам пыры.
9 Тӓмдӓм сирмӓшемвлӓ доно лӱдӹктӓш цацем манын, тӓлӓндӓ ӹнжӹ чуч.
10 Вет кыды-тидӹжӹ попа: «Павелӹн сирмӓшвлӓжӹ пингӹдӹн ядшы дӓ силан ылыт, а мӓ донына ӹшке ылмыжы годым тӹдӹ слабка, попымыжат ярыдымы».
11 Техень эдем ынгылыжы: укенӓ годым мӓ сирмӓшӹштӹшӹ шамаквлӓ доно махань ылына, ылмына годым пӓшӓнӓ донат техеньок ылына.
12 Ӹшке гишӓнӹштӹ ӹшке яжон попышывлӓ доно ӹшкӹмнӓм иктӧрӹш шӹндӓш ӓль нӹнӹ доно тӓнгӓштӓрӓш ана смейӹ. Нӹнӹ шанен мыштыдымы ылыт, ӹшкӹмӹштӹм ӹшке висӓштӹ доно висӓт дӓ ӹшкӹмӹштӹм ӹшкештӹ доно тӓнгӓштӓрӓт.
13 А мӓ утыдон ана когоэшнӹ, Йымын мӓлӓннӓ висен пумыжы нӓрӹ веле, ти висен пумы кымдыкшы тӓ яктедӓӓт шоэш.
14 Тӓ докыда толмына годым мӓлӓннӓ ӹштӹмӹ межӓм ванжыделна, но Христосын Пуры Увержӹ доно тӓ докыдаат шонна.
15 Мӓ утыдон ана когоэшнӹ, весӹвлӓ ӹштӹмӹ пӓшӓ доно ӹшкӹмнӓм ана хвальы, но уаненӓ: ӹнянӹмӓшдӓ кушмы доно тӓ лоштыда пӓшӓнӓ когон шӓрлӓ,
16 дӓ тӓ гӹцдӓ ӧрдӹжӹштӓт Пуры Уверӹм шайышт кердӹнӓ. Весӹвлӓн ӹшке кымдемӹштӹштӹ ӹштӹмӹ пӓшӓштӹ доно ӹшкӹмнӓм ӹненӓ хвальы.
17 «Кӱ когоэшнӓ, Господь доно когоэшнӹжӹ».*
18 Ӹшке гишӓнжӹ яжон попышы агыл, а кӱ гишӓн Господь яжон попа, тӹдӹ ярыктымы лиэш.
*10:17 Иер 9:241 О, ышдымы ылмемӹм изиш тырхедӓ ылгецӹ! Но тӓ мӹньӹм лачокок тырхедӓ.
2 Мӹнь Йымын шытырланымыжы доно тӓ верцдӓ йӓнг вашт шытырланем, вет мӹнь тӓмдӓм ик пӱэргӹлӓн, Христослан, сӧренӓм дӓ Тӹдӹн анзык нӓрӓштӓ ӹдӹрӹм шагалтышашлык ылам.
3 Но кыце Евам кӹшкӹ йой ылмыжы доно алтален, тенгеок тӓмдӓн шанымашдаат пыжлен кердеш, дӓ Христос доно ушнымашты ире йӓнг доно ӹлӹмӹдӓ гӹц карангыда манын лӱдӓм.
4 Вет иктӓжӹ толеш дӓ мӓ увертӓрӹмӹнӓ Иисус гишӓн агыл, вес Иисус гишӓн увертӓрӓш тӹнгӓлеш, ӓль тӓ нӓлмӹдӓ Шӱлӹшӹм агыл, а весӹм нӓлӹдӓ гӹнь, ӓль шӱмӹшкӹдӓ пиштӹмӹ Пуры Уверӹм агыл, а вес уверӹм колыда гӹнь, тӓ тидӹм тырхаш йӓмдӹ ылыда.
5 Кӱшӹл Апостолвлӓ гӹц мӹнь нима донат худа ам ыл, шанем.
6 Мӹнь попымы шотышты тыменьшӹ ам ыл гӹнят, пӓлӹмӓшем улы. Тӓлӓндӓжӹ мӓ цилӓ шотыштат, цилӓ семӹнят пӓлӹмӹ ылына.
7 Мӹнь Йымын Пуры Увержӹм тӓлӓндӓ тӓрӹм ядде шайыштынам. Тӓмдӓм лӱктӓш манын, ӹшкӹмемӹм лапемденӓм. Тидӹ сулык ма?
8 Тӓлӓндӓ пӓшӓм ӹштӓш манын, вес церкӹвлӓ гӹц оксам нӓлӹн, мӹнь нӹнӹм незеремденӓм, манаш лиэш. А тӓ доныда ылмем годым кынамжы ма-гӹнят мӹлӓнем ситӹде, тӹнӓмӓт иктӹлӓнӓт нелӹм кандыделам.
9 Ма мӹлӓм ситӹде, Македони гӹц толшы шӱмбелвлӓ пуэнӹт. Тӓлӓндӓ нима шотыштат нелӹм кандаш агыл манын цаценӓм дӓ цацаш тӹнгӓлӓм.
10 Христосын кӧргӹшкем пиштӹмӹ лачокшы доно ӹняндӓрем: тенге когоэшнӹмӓш Ахаиштӹшӹ вӓрвлӓштӹ мӹнь гӹцем ак нӓлӓлт!
12 (11-12) Малын? Вуйта мӹнь тӓмдӓм ам яраты, седӹндон ма? Йымы пӓлӓ. Мӓ ганьнаок вуйта пӓшӓм ӹштӓт манын, ӹшкӹмӹштӹм хвальышывлӓлӓн тенге хваляш вирӹм пуаш агыл манын, мӹнь мам ӹштенӓм, пакылажат тӹдӹмок ӹштӓш тӹнгӓлӓм.
13 Техеньӹвлӓ алтанзык апостол, Христосын Апостолжыла каяш цацышы йой пӓшӓлӹшӹвлӓ ылыт.
14 Ӧрӓшӹжӓт нималан: сатана ӹшкежӓт соты Ангелӹн цӹрежӹм нӓлеш.
15 Тенгежӹ, тӹдӹн тӓрзӹвлӓжӹ тӧрӹн служышыжыла кайнештӹ гӹнь, тидӹ кого пӓшӓ агыл. Нӹнӹн мычашышты пӓшӓштӹ семӹнь лиэш.
16 Эче келесем: иктӓт мӹньӹм ышдымеш ӹнжӹ шотлы. Тенге шотледӓ гӹнь, мӹлӓмӓт ӹшкӹмемӹм изиш хваляш лижӹ манын, хоть ышдымы семӹнь мӹньӹм тырхыда.
17 Мам кӹзӹт попем, Господь шанымы семӹнь агыл попем. Ӹшкӹмемӹм тенге хвальымы шотышты мӹнь ышдымы семӹнь келесем.
18 Шукын ти сӓндӓлӹкӹштӹшӹ эдемвлӓ семӹнь ӹшкӹмӹштӹм хвалят гӹнь, мӹнят тенгеок хвалем.
19 Вет тӓ, ышанвлӓ, ышдымывлӓм улы кымыл доно тырхедӓ!
20 Тӓмдӓм рабыш сӓртӓт, ма улыдам качкын пӹтӓрӓт, тӓмдӓм кид лӹвӓкӹштӹ нӓлӹт, вӹкӹдӓ кӱшӹц анжат, тӓмдӓм шӹргӹвӹлӹшдӓ гӹц шит ‒ тӓ тидӹм тырхедӓ.
21 Намысланашем попем: тидӹлӓн мӓмнӓн силана ситӹде. Ма гишӓн ӹшкӹмжӹм иктӓжӹ хваляш смейӓ гӹнь, ‒ мӹнь ышдымы семӹнь попем ‒ мӹнят смеем.
22 Нӹнӹ еврей ылыт? Мӹнят. Израиль халык ылыт? Мӹнят. Авраамын вырлыкшы ылыт? Мӹнят.
23 Христосын служышыжы ылыт? Ышым ямдышыла попем: мӹньӹм Христосын служышыжы манаш вир шукырак. Мӹнь пӓшӓм шукырак ӹштенӓм, мӹньӹм шукырак шинӹт, шӹренрӓк кызаматышкы вӓрештӹнӓм, шукы гӓнӓ колаш шошы линӓм.
24 Иудейвлӓ мӹньӹм, нӹллӹш иктӹм шоктыде лыпшен,* вӹц пачаш шинӹт.
25 Кым гӓнӓ панды доно шинӹт, ик гӓнӓ вӹкем кӱм кӹшкенӹт. Кым гӓнӓ тангыжышты корабльна шӓлӓнен. Ик йыдым дӓ ик кечӹм тангыж вӹдӹштӹ, келгӹ вӓрӹштӹ, эртӓренӓм.
26 Мӹнь корнышты шукы ылынам, рекӓвлӓштӹ эксӹкӹшкӹ, кравышывлӓ гишӓн эксӹкӹшкӹ, ӹшке халыкем гишӓн эксӹкӹшкӹ, язычниквлӓ верц эксӹкӹшкӹ, халашты, пустыньышты эксӹкӹшкӹ, тангыжышты эксӹкӹшкӹ, алтанзык шӱмбелвлӓ лошты эксӹкӹш вӓрештӹнӓм.
27 Мӹнь авыре гӹц кемешкӹ пӓшӓм ӹштенӓм, шӹренок амалаш йӧн ылде, шужымым дӓ йӱмӹ шомым цӹтенӓм, шӹренок постенӓм, ӱштӹштӓт, выргем гӹц паснаат ылынам.
28 Тилец гач, кечӹнь мӹнь докем эдемвлӓ погынат, тенгеок цилӓ церкӹвлӓ верц шытырланем.
29 Иктӓжӹ силадымы гӹнь, мӹнят силадымы ылам, иктӓжӹм сӓртен шоктат гӹнь, тӹдӹн верц йӓнгем каршта.
30 Когоэшнӓш келеш гӹнь, силадымы ылмем доно когоэшнем.
31 Господьна Иисус Христосын курым-курымеш хвальымы Йымыжы дӓ Ӓтяжӹ пӓлӓ: мӹнь ам алталы.
32 Мӹньӹм роалташ манын, Дамаскышты Арета кугижӓн ик вуйлатышыжы Дамаск халам оролен, но мӹньӹм корзинеш шӹнденӹт дӓ, окня вашт лыктын, хала стенӓ мыч валтенӹт, тенге тӹдӹн кидӹшкӹжӹ вӓрештделам.
*11:24 Втор 25:31 Мӹлӓнем когоэшнӓш пользы уке. Мӹнь кӹзӹт Господьын анжыктымы каймашвлӓжӹ дӓ пачмашвлӓжӹ гишӓн попаш тӹнгӓлӓм.
2 Христос доно ушнен шалгышы эдемӹм пӓлем. Луатнӹл и перви тӹдӹ кымшы пӹлгом якте кузыктымы ылын. Кӓпӹштӹ ылын ма ‒ ам пӓлӹ, кӓп гӹц ӧрдӹжтӹ ылын ма ‒ ам пӓлӹ, Йымы пӓлӓ.
3 Мӹнь ти эдем гишӓн пӓлем ‒ кӓпӹштӹ ылын ма ӓль кӓп гӹц ӧрдӹжтӹ, тидӹм ам пӓлӹ, Йымы пӓлӓ, ‒
4 тӹдӹ райыш кузыктымы ылын дӓ келесен керддӹмӹ шамаквлӓм колын, нӹнӹм эдемлӓн попашыжат ак ли.
5 Техень эдем доно мӹнь когоэшнем, а ӹшке донем агым, когоэшнем гӹнят, силадымы ылмем доно веле.
6 Когоэшнӹмем шоэш гӹнь, мӹнь ышдымы ам ли ыльы, вет тӧрӹм келесем. Но мӹньӹм иктӓт утыдон кӱкшӹн ӹнжӹ ӓклӹ, мам ӹштӹмемӹм ужмыжы ӓль мӹнь гӹцем мам колмыжы доно веле ӓклӹжӹ манын, ӹшкӹмемӹм кычем, ам когоэшнӹ.
7 Пиш ӧрӹктӓрӹшӹ пачмашвлӓм ужмем доно мӹнь когоэшнӹшӓшлык ам ыл, седӹндон кӓп дон йӓнгӹшкем кашаргым пиштӹмӹ, тидӹ сатанан ангелжӹ, мӹлӓм когоэшнӓш агыл манын, мӹньӹм орландара.
8 Тӹдӹм мӹнь дорцем карангдыжы манын, Господьым кым гӓнӓ сарвален ядынам.
9 Господь мӹлӓнем келесен: «Тӹлӓт Мӹньӹн благодатем ситӓ, вет Мӹньӹн силаэм силадымашты циц лиэш». Седӹндон, Христосын силажы кӧргӹшкем ӹлӓш пырыжы манын, мӹнь силадымы ылмем гишӓн улы кымыл доно когоэшнӓш тӹнгӓлӓм.
10 Седӹлӓнок Христос верц силадымы ылмылан, шотлыдымашлан, эксӹклӓн, поктылмашлан, пӹзӹртӹмӓшлӓн сусу лиӓм, вет кынам силадымы ылам, тӹнӓм силан ылам.
11 Когоэшнен, мӹнь ышдымы линӓм: техеньӹшкӹ тӓ мӹньӹм шоктендӓ. Тӓлӓндӓ мӹньӹм хваляш келеш ыльы вет. Мӹнь нимат ам ыл гӹнят, кӱшӹл Апостолвлӓ гӹц нима донат худа ам ыл.
12 Апостолын пӓлӹвлӓжӹм тӓ лоштыда цилӓ тырхымаш, пӓлӹквлӓ, цӱдӓвлӓ дӓ сила доно анжыктымы.
13 Молы церкӹвлӓ доно тӓнгӓштӓрӹмӓштӹ мада ак ситӹ? Иктӹ веле: мӹнь тӓлӓндӓ нелӹм кандыделам. Ти вуйнаматем простьыда.
14 Теве ӹнде мӹнь тӓ докыда кымшы гӓнӓ миӓш йӓмдӹ ылам дӓ тӓлӓндӓ нелӹм ам канды, вет тӓмдӓнӹм агыл, а тӓмдӓм кӹчӓлӓм. Тетявлӓ агыл ӓтя-ӓвӓштӹлӓн погышашлык ылыт, а ӓтя-ӓвӓвлӓ – тетявлӓштӹлӓн.
15 Тӓмдӓм тенге когон яратымем вӹлецок тӓ мӹньӹм чӹдӹ яратедӓ гӹнят, тӓ верцдӓ мӹнь улы кымыл доно ӹшкӹмемӹнӹм кычылтам дӓ ӹшкӹмемӹм ӹшке жӓлӓйӹдеок пуэм.
16 Яра, мӹнь тӓлӓндӓ нелӹм кандыделам лижӹ. Но йой эдем семӹнь, ӓнят, тӓмдӓм алталенӓм?
17 Тӓ докыда колтымы эдемвлӓэм логӹц иктӓжӹ гач тӓ гӹцдӓ пайдам алтален нӓлӹнӓм ма?
18 Мӹнь Титӹм тӓ докыда кеӓш сарваленӓм дӓ шӱмбелвлӓ логӹц иктӹм сагажы колтенӓм. Тит тӓ доныда иктӓ-махань пайдам кӹчӓлӹн ма? Мӓ ик шӱлӹш доно агыл ма ӹштеннӓ? Мӓ ик корны доно агыл ма каштынна?
19 Мӓ тӓ анзылныда тӧрӹш лӓктӓш цаценӓ манын, тӓ эчеӓт шанедӓ сӓй? Но мӓ Йымы анзылны Христос доно ушнен попенӓ, дӓ цилӓжӓт тидӹ, яратымемвлӓ, тӓмдӓм пингӹдемдӓш ӹштӓлтеш.
20 Мӹнь лӱдӓм: мимӹкем, маханьым ӹнем уж, тӹхеньӹм тӓмдӓм ужам, тӓӓт мӹньӹм тӹхеньӹм ужыда, маханьым ӹнедӓ уж. Икышын лидӹмӹм, завидуйымым, шӹдешкӹмӹм, соредӓлмӹм, эдем вӹкӹ попымым, ӓляклӹмӹм, когоэшнӹмӹм, пыдыранзыкым ужам манын лӱдӓм.
21 Тӓ докыда мимӹкем, Йымем тӓ анзылныда мӹньӹм ӱлӹкӹ эчеӓт ӹнжӹ шӹндӹ, дӓ кӱ андак сулыкым ӹштен дӓ ярдымы кайыш, шӓхӓрлӓнӹмӓш дӓ тӓйвилӓнӹмӓш гӹц карангде, шукышты верц мӹлӓнем мӓгӹрӓш ӹнжӹ ли.
1 Ӹнде кымшы гӓнӓ тӓ докыда миэм. «Каждый пӓшӓ кок ӓль кым ужшын келесӹмӹштӹ доно пингӹдемдӓлтшӓшлык».*
2 Кокшы гӓнӓ тӓ доныда ылмем годым андак сулыкым ӹштӹшӹвлӓм дӓ молымат мӹнь шижтӓренӓм, тенгеок кӹзӹтӓт, уке ылмем годым, сирем: угӹц толмыкем, тӓмдӓм ам жӓлӓйӹ,
3 вет Христос мӹнь гачем попа ма манын, тӓ пингӹдемдӹмӓшӹм нӓлнедӓ. Христос тӓлӓндӓ силадымы агыл, а тӓ лоштыда силан ылеш.
4 Вет Тӹдӹм силадымы ылмыжы годым крестеш пыдаленӹт гӹнят, Йымын силажы доно ӹлӓ. Мӓӓт Христос доно ушнымашты силадымы ылына, но Христос доно иквӓреш Йымын силажы доно тӓ лоштыда ӹленӓ.
5 Ӹнянӹшӹ ылыда ма, ӹшкӹмдӓм ланзылыда, ӹшкӹмдӓм тӹшлӹдӓ. Иисус Христос тӓ донда ушнен шалга манын, тӓ ӹшкӹмдӓм ӹшке ада пӓлӹ ма? Ӓль тӓ тергӹмӹм тырхен кердделда?
6 Тергӹмӹм тырхен кердмӹнӓм тӓ пӓлен нӓлӹдӓ манын, мӹнь уанем.
7 Тӓ нимахань худамат идӓ ӹштӹ манын, Йымым сарваленӓ. Тергӹмӹм эртен кердмӹнӓм анжыкташ агыл, а тӹдӹм эртен керддӹмӹлӓ кайына гӹнят, тӓ пурым ӹштӹдӓ манын, тенге ыдылына.
8 Лачок ваштареш мӓ нимат ӹштен ана керд, лачок верц веле кердӹнӓ.
9 Кынам мӓ силадымы, а тӓ силан ылыда, мӓ ӹвӹртенӓ. Тӓмдӓн кушкын шомыда гишӓнок мӓ ыдылына.
10 Господь мӹлӓнем властьым пуэн гӹнят, тӓ докыда мимӹкем, пишок пингӹдӹ ӹнем ли, седӹндон мӹнь тидӹм тӓ доныда уке ылмем годым сирем, вет ти властьым тӓмдӓм шӓлӓтӓш агыл, а пингӹдемдӓш пумы.
11 Икманаш, шӱмбелвлӓ: ӹвӹртӹдӓ, яжоэмдӓ, иктӹ-весӹдӓм кымылангдыда, икышын лидӓ, келшен ӹлӹдӓ, тӹнӓм яратымашым дӓ тырым пушы Йымы тӓ сагада лиэш.
12 Иктӹ-весӹдӓм святой шыпшалмаш доно вӓшлидӓ. Святойвлӓ цилӓн тӓлӓндӓ шӓлӓм колтат.
13 Мӓмнӓн Господьна Иисус Христосын благодатьшы, Йымы [Ӓтянӓн] яратымыжы дӓ Святой Шӱлӹш доно ушнымаш цилӓдӓ доны лижӹ. Аминь.
*13:1 Втор 19:15.