1 Йымын ирӹкшӹ* семӹнь Иисус Христосын Апостолжы лиӓш ӱжмӹ Павел дӓ Сосфен шӱмбел гӹц
2 Йымын Коринфӹштӹшӹ церкӹжӹлӓн, Христос Иисус свящӓйӹмӹвлӓлӓн дӓ святой лиӓш ӱжмӹвлӓлӓн, хоть-кыштат мӓмнӓн Господьна Иисус Христосын – нӹнӹнӓт, мӓмнӓнӓт Господьнан – лӹмжӹм ӱжӹн ыдылшывлӓлӓн.
3 Мӓмнӓн Йымы Ӓтянӓ дӓ Господь Иисус Христос гӹц тӓлӓндӓ благодать дӓ тыр лижӹ.
4 Христос Иисус гач Йымын тӓлӓндӓ пумы благодатьшы гишӓн тӓ верцдӓ Йымемлӓн со таум ӹштем.
5 Тӹдӹн доно ушнен шалген, тӓ цилӓ шотыштат – шамак донат, пӓлӹмӓш донат – паян линдӓ.
6 Христос гишӓн пӓлдӹртен попымаш тӓ лоштыда пингӹдемӹн,
7 дӓ мӓмнӓн Господьна Иисус Христосын толмыжым вычымашты Йымын пумы мыштымаш тӓмдӓн цилӓ улы.
8 Мӓмнӓн Господьна Иисус Христосын кечӹнжӹ тӓ йӓтлӹмӹ идӓ ли манын, Христос тӓмдӓм мычаш яктеок пингӹдемдӓ.
9 Ӹшке Эргӹжӹ докы, мӓмнӓн Господьна Иисус Христос докы, ушнымашкы тӓмдӓм ӱжшӹ Йымы ӹнян ылеш.
10 Шӱмбелвлӓ, тӓ цилӓн иктӹмок попыда, лоштыда шелӓлтмӓш ӹнжӹ ли, а ик ыш дӓ ик шанымаш тӓмдӓм ушыжы манын, мӓмнӓн Господьна Иисус Христосын лӹмжӹ доно сарвалем.
11 Шӱмбелемвлӓ, тӓ ӹшке лоштыда кӹрмӓшедӓ манын, мӹнь Хлоян эдемвлӓжӹ гӹц пӓлен нӓлӹнӓм.
12 Мӹнь теве ма гишӓн попем: тӓ логӹцдӓ каждый «Мӹнь Павелӹн тыменьшӹжӹ ылам», ӓль «Мӹнь Аполлосын», «А мӹнь – Кифан», «А мӹнь – Христосын» манеш.
13 Христос шелӓлтӹн ма? Ӓль тӓ верцдӓ Павелӹм пыдален сӓкенӹт? Ӓль тӓ Павел лӹмеш крестӓлтӹндӓ?
14 Крисп дон Гаий гӹц молым тӓ логӹцдӓ иктӹмӓт крестӹделам, тидӹ гишӓн Йымылан таум ӹштем:
15 ӹшке лӹмешем тӓмдӓм крестенӓм манын, иктӓт келесен ак керд.
16 Эче Стефаным дӓ тонышывлӓжӹмӓт мӹнь крестенӓм. Иктӓжӹм весӹм крестӹмем ам пӓлӹ.
17 Вет Христос мӹньӹм крестӓш агыл, а Пуры Уверӹм шайышташ колтен. Пуры Уверӹм мӹнь ышанла чучшы шамаквлӓ доно шайыштшашлык ам ыл, уке гӹнь Христосын крестӹжӹ акелӹш лӓктеш.
18 Пӹтӹмӓшкӹ кешӹвлӓлӓн крестӹ гишӓн шамак – ышым ямдымаш, а мӓлӓннӓ, ытарымашкы кешӹвлӓлӓн, – Йымын силажы.
19 Сирӹмӹ:
«Ышанвлӓн ышыштым ямдем,
ынгылышывлӓн ынгылымашыштым карангдем».*
20 Кышты ти сӓндӓлӹкӹштӹшӹ ышан эдемжӹ, кышты закон тымдышы, кышты тӹшлӹшӹ эдем? Сӓндӓлӹкӹн кого ышыжым Йымы нимамат ынгылыдымашкы сӓртӹде ма?
21 Йымын кого ышыжы гач сӓндӓлӹк ӹшке ышыжы доно Йымым пӓлен нӓлдеӓт, ышдымыла кайшы тымдымашым увертӓрӹмӹ гач Йымы ӹнянӹшӹвлӓм ӹшке пурыжы доно ытараш яжоэш шотлен.
22 Вет иудейвлӓ пӓлӹквлӓм анжыкташ ядыт, эллинвлӓ кого ышым кӹчӓлӹт,
23 а мӓ крестеш пыдалымы Христос гишӓн уверӹм шӓренӓ. Иудейвлӓлӓн тидӹ – шӹртнялтмӹ кӱ, эллинвлӓлӓн – ышым ямдымаш,
24 а Йымы ӱжмӹвлӓлӓн, иудейвлӓлӓнӓт, эллинвлӓлӓнӓт, тидӹ Христос – Йымын силажы дӓ Йымын кого ышыжы.
25 Вет Йымын ма ышдымыла каеш, эдемӹн ышыжы гӹц ышанрак, Йымын ма слабкала каеш – эдемӹн силажы гӹц силанрак.
26 Шӱмбелвлӓ, Йымы ӱжмӹ годым махань ылында, шаналтыда: шукынок агыл – кого ышанеш шотлымы, шукынок агыл властьым кычышы, шукынок агыл шотеш пиштӹмӹ йых гӹц лӓкшӹ ылыда.
27 Но сӓндӓлӹкӹштӹ ышан агылеш шотлалтшым Йымы ышанвлӓм намысыш пырташ айырен нӓлӹн, сӓндӓлӹкӹштӹ слабкаэш шотлалтшым Тӹдӹ силаным намысландараш айырен нӓлӹн.
29 (28-29) Ик эдемӓт Йымы анзылны ӹшкӹмжӹм хвален ӹнжӹ керд манын, когоэш ужмым акелӹш лыкташ Тӹдӹ жеплӹдӹмӹ йых гӹц лӓкшӹм, шотеш пиштӹдӹмӹм дӓ сӓндӓлӹкӹштӹ керӓл агылым айырен нӓлӹн.
30 Йымы тӓмдӓм Христос Иисус доно ушен, Тӹдӹжӹ мӓлӓннӓ Йымы гӹц толшы ыш – тӧрӹш лӓкмӓш, свящӓйӓлтмӓш дӓ сылен нӓлмӓш – лин.
31 Тенге, сирӹмӹ семӹнь «Кӱ когоэшнӹнежӹ гӹнь, Господь доно когоэшнӹжӹ».*
*1:1 Ирӹк – воля, желание. *1:19 Ис 29:14. *1:31 Иер 9:24.1 Шӱмбелвлӓ, тӓ докыда мимем годым мӹнь Йымын пӓлдӹртен попымыжым пиш сӹлнӹ шамаквлӓ дӓ кого ыш доно агыл увертӓрӓш миэнӓм.
2 Вет тӓ доныда ылмем годым мӹнь Иисус Христос гӹц молым – пыдален сӓкӹмӹ Иисус Христос гӹц молым – нимат пӓлӓш агыл манын шанен пиштенӓм.
3 Мӹнь тӓ доныда ылмем годым авыре гӹц кешӹ, лӱдшӹ ылынам, шӱмем цӹтӹрен,
4 мӹнь эдемӹн ышыжын ӹняндӓрӹшӹ шамаквлӓжӹ доно агыл, а Шӱлӹшӹн силажым анжыктен попенӓм дӓ увертӓренӓм,
5 вет тӓмдӓн ӹнянӹмӓшдӓн негӹцшӹ эдемӹн ышыжы агыл, а Йымын силажы лишӓшлык.
6 Тенге гӹнят мӓ ышым шӹндӹшӹвлӓ лошты кого ыш гишӓн увертӓрен попенӓ, но тидӹжӹ кӹзӹтшӹ курымын ышыжы ӓль кӹзӹтшӹ курымын пӹтӹшӓшлык вуйлатышывлӓн ышышты агыл.
7 Мӓ Йымын кого ышыжы, анжыктыдымы, шӹлтӹмӹ ышыжы, гишӓн увертӓренӓ. Ти кого ышыжым Йымы мӓмнӓн лӹмнернӓм лӱктӓш сӓндӓлӹк ылмы гӹц анзыцок пӓлдӹртен.
8 Ти кого ышым кӹзӹтшӹ курымын властьым кычышывлӓ логӹц иктӓт пӓлӹде, а пӓлӓт ылгецӹ, лӹмлештӓрӓлтшӹ Господьым пыдален ак сӓкеп ыльы.
9 Но сирӹмӹ семӹнь:
«Мам сӹнзӓӓт ужде, пӹлӹшӓт колде
дӓ мам эдем шӱмӹштӹжӹ пӓлӹде,
тӹдӹм Йымым яратышывлӓлӓн Йымы йӓмдӹлен».*
10 А мӓлӓннӓ Йымы тидӹм ӹшке Шӱлӹшӹжӹ гач пачын, вет Шӱлӹш цилӓ, Йымын келгӹцшӹмӓт тӹшлӓ.
11 Эдемӹн кӧргӹжӹм эдемвлӓ логӹц кӱ пӓлӓ? Тидӹм эдемӹн кӧргӹ шӱлӹшӹжӹ веле пӓлӓ. Тенгеок Йымын келгӹцшӹмӓт Йымын Шӱлӹш гӹц пасна иктӓт ак пӓлӹ.
12 А мӓ ти сӓндӓлӹкӹн шӱлӹшӹжӹм агыл, Йымы гӹц толшы Шӱлӹшӹм нӓлӹннӓ, вет Йымы мӓлӓннӓ мам пуэн, тӹдӹм пӓлӹшӓшлык ылына.
13 Мӓ тидӹ гишӓн эдемӹн ышыжы тымдымы шамаквлӓ доно агыл, а Святой Шӱлӹш тымдымы шамаквлӓ доно попенӓ дӓ Шӱлӹш доно кӹлдӓлтшӹм Шӱлӹш вуйлатымы семӹнь ӹлӹшӹвлӓлӓн* ынгылдаренӓ.
14 Йымын Шӱлӹш гӹц ылшым ӹшке йӓнгжӹ семӹнь ӹлӹшӹ эдем ак ярыкты, вет тидӹм тӹдӹ ышым ямдымашеш шотла, тидӹм шӱлӹш доно веле ланзылаш лиэш, седӹндон ынгылен ак керд.
15 Но Йымын Шӱлӹш вуйлатымы семӹнь ӹлӹшӹ эдем цилӓ ланзылен кердеш, а тӹдӹм ӹшкӹмжӹм иктӓт ланзылен ак керд,
16 вет
«Кӱ Господьын ышыжым пӓлӓ
дӓ Тӹдӹм тымден кердеш?»*
А Христосын ышыжы мӓмнӓн улы.
1 Шӱмбелвлӓ, мӹнь Шӱлӹш вуйлатымы семӹнь ӹлӹшӹвлӓлӓн попымыла тӓлӓндӓ попен кердделам, а кӓп дон йӓнг ядмы семӹнь ӹлӹшӹ эдемвлӓлӓн, Христосым пӓлӹмӹ шотышты ӓзӓ гань ылшы эдемвлӓлӓн попымыла шайыштынам.
2 Мӹнь тӓлӓндӓ пингӹдӹ качкышым агыл, а шӹшерӹм пукшенӓм, вет тӓ эче пингӹдӹ качкышым качкын кердделда, эче кӹзӹтӓт ада керд,
3 тӓ кӹзӹт яктеӓт кӓп дон йӓнг ядмы семӹнь ӹлӹшӹ ылыда. Тӓ лоштыда завидуйымаш дӓ кӹрмӓшӹмӓш улы гӹнь, кӓп дон йӓнг ядмы семӹнь ада ӹлӹ ма, сӓндӓлӹкӹштӹшӹ эдемвлӓлӓ ада ӹштӹ ма?
4 Вет кынам иктӹ «Мӹнь Павелӹн тыменьшӹжӹ ылам», а весӹ «Мӹнь – Аполлосын» манеш, тӓ кӓп дон йӓнг ядмы семӹнь ада ӹлӹ ма?
5 Тенгежӹ, кӱ техень Павел, кӱ техень Аполлос? Нӹнӹ служышы ылыт, нӹнӹн палшымышты доно тӓ Христослан ӹнянӓш тӹнгӓлӹндӓ. Мӓ каждыйжы Господьын мӓлӓннӓ ӹнянен пумы пӓшӓжӹм ӹштенӓ.
6 Мӹнь шӹнденӓм, Аполлос вӹдӹм кӹшкен, а Йымы куштен,
7 седӹндон шӹндӹшӓт, вӹдӹм кӹшкӹшӓт нимат агылеп, куштышы Йымы веле цилӓ ылеш.
8 Шӹндӹшӹ дон вӹдӹм кӹшкӹшӹ ик пӓшӓм ӹштӓт, но каждыйжы ӹшке пӓшӓдӓржӹм ӹштӹмӹ пӓшӓжӹ гишӓн нӓлеш.
9 Мӓ Йымылан иквӓреш пӓшӓм ӹштенӓ, а тӓ Йымын ныржы, Йымын суртшы ылыда.
10 Йымын мӹлӓнем пумы благодатьшы доно мӹнь ышан стройышы семӹнь негӹцӹм пиштенӓм, вӹлӓнжӹ весӹ строя. Но кыце стройымыжым каждый анжыжы.
11 Пиштӹмӹ негӹц вӓреш весӹм иктӓт пиштен ак керд, вет негӹцшӹ – Иисус Христос.
12 Ти негӹцеш шӧртньӹ, ши, шергӓкӓн кӱ, пушӓнгӹ, шуды ӓль олым доно строят.
13 Каждыйын пӓшӓжӹ вӹкӹ лӓктеш, тӹдӹм тыл доно толшы суд кечӹ анжыкта, дӓ каждыйын пӓшӓжӹ махань ылмым тыл тергӓ.
14 Кӱн стройымыжы тылым тырха, тӹдӹ пӓшӓдӓрӹм нӓлеш,
15 кӱн стройымыжы йыла, тӹдӹ нимадеок кодеш, ӹшкежӹ ытаралтеш, но тыл гӹц лӓкмӹ семӹнь веле.
16 Ӓль ада пӓлӹ: тӓ Йымын пӧртшӹ ылыда, дӓ Йымын Шӱлӹш кӧргӹштӹдӓ ӹлӓ?
17 Кӱ Йымын пӧртшӹм пӹтӓрӓ, тӹдӹм Йымы пӹтӓрӓ, вет Йымын пӧртшӹ святой, дӓ ти пӧртшӹ тӓ ылыда.
18 Ӹшкӹмжӹм иктӓт ӹнжӹ алталы. Ти курымын тӓ логӹцдӓ иктӓжӹ ӹшкӹмжӹм пиш ышанеш шотла гӹнь, лачокок ышан лиӓш манын, ышдымы лижӹ.
19 Вет Йымы анзылны ти сӓндӓлӹкӹн ышыжы – ышдымы ылмаш. Тенге сирӹмӹ:
«Ышанвлӓм Тӹдӹ йойланымышты гач кыча».*
20 Эче сирӹмӹ:
«Ышанвлӓн шаныкалымышты такеш ылмым Господь пӓлӓ»*
21 Тенгежӹ, эдемвлӓ доно иктӓт ӹнжӹ когоэшнӹ, вет цилӓ тӓмдӓн:
22 Павелӓт, Аполлосат, Кифаат, сӓндӓлӹкӓт, ӹлӹмӓшӓт, колымашат, кӹзӹтшӓт, анзыкылашат – цилӓ тӓмдӓн,
23 но тӓ Христосын ылыда, а Христос – Йымын.
*3:19 Иов 5:13. *3:20 Пс 93:11.1 Эдемвлӓ мӓмнӓм Христослан служышеш шотлышты дӓ мӓлӓннӓ Йымын тайнывлӓжӹм пӓлдӓрӹмӹ пӓшӓм ӹнянен пумым пӓлӹштӹ.
2 А пӓшӓм ӹнянен пумы эдем гӹц тӹдӹн ӹнян ылмыжым сек пӹтӓриок тергӓт.
3 Тӓ мӹньӹм суедӓ ӓль эдемӹн хоть-махань вес судшы суя гӹнь, тидӹ мӹньӹм ак тыргыжландары. Мӹнь ӹшкеӓт ӹшкӹмемӹм ам суйы.
4 Ӹшкӹмемӹм вуйнаматеш ам шотлы, но ӹшкӹмемӹм тӧрӹш лыкташ агыл тенге попем. Мӹньӹн судьяэм – Господь.
5 Седӹндон жеп шомешкӹ, Господь толмешкӹ, идӓ суйы. Тӹдӹ пӹцкемӹшеш шӹлтӹмӹм сотемдӓрӓ, эдемвлӓн кӧргӹ шанымыштым вӹкӹ лыктеш, тӹнӓм мактымаш каждыйлан Йымы гӹц лиэш.
6 Шӱмбелвлӓ, «Сирӹмӹ гӹц карангын, утым идӓ шаныкалы» манмы мам анжыктымым ынгылаш тӓ мӓ гӹцнӓ тыменьдӓ манын, тӓ верцдӓ цилӓ тидӹм мӹнь ӹшке гишӓнем дӓ Аполлос гишӓн тӓнгӓштӓрен попенӓм. Иктӹм кӱшкӹ, весӹм ӱлӹкӹ шӹндӹмӹжӹ гишӓн тӓ логӹцдӓ иктӓт ӹнжӹ когоэшнӹ.
7 Кӱ тӹньӹм молывлӓ гӹц кӱшкӹ лӱктӓ? Ма тӹньӹн техень улы, мам Йымы гӹц нӓлделат? А Йымы гӹц нӓлӹнӓт гӹнь, тӹдӹм подарка семӹнь агыл нӓлмӹ манын, малын хвалет?
8 Тӓ ӹнде темшӹ ылыда, тӓ ӹнде паендӓ, мӓ гӹцнӓ пасна кугижӓ линдӓ! О, мӓлӓннӓӓт сагада кугижӓлӓнӓш манын, лачокок кугижӓ лидӓ ылгецӹ!
9 Йымы мӓмнӓм, Апостолвлӓм, сек остаткавлӓм, колаш пӓлдӹртӹмӹ ганьым ӹштӹмӹлӓ мӹлӓнем чучеш, вет мӓмнӓм улы сӓндӓлӹк, Ангелвлӓӓт, эдемвлӓӓт анжат.
10 Мӓ Христос верц ышдымы ылына, а тӓ Христос доно кого ышан линдӓ. Мӓ авыре гӹц кешӹ ылына, а тӓ силан, тӓ лӹмлештӹдӓ, а мӓмнӓм шотеш ак пиштеп.
11 Кӹзӹт яктеӓт мӓ шужен ӹленӓ, йӱмӹнӓ шоэш, выргемнӓ шӱкшӹ, мӓмнӓм шит, мӓ вӓр гӹц вӓрӹш каштына,
12 ӹшке кид доно пӓшӓм шукы ӹштенӓ. Мӓмнӓм вырсат, а мӓ пурым согоньленӓ, мӓмнӓм поктылыт, а мӓ тырхенӓ,
13 мӓмнӓм мыскылат, а мӓ пуры шамак доно сарвален ладнангдаренӓ. Мӓ сӓндӓлӹклӓн лыктын шумы сӱк гань линнӓ, кӹзӹт якте цилӓлӓн кыныж гань ылына.
14 Тӓмдӓм намысландараш агыл, а тӓлӓндӓ ышым пуаш тидӹм сирем, вет тӓ мӹньӹн яратымы тетявлӓэм ылыда.
15 Вет Христос доно ушнымашты тымдышывлӓдӓ тӹжем доно ылыт гӹнят, ӓтядӓ шукы агыл. Христос доно ушнен шалгышым мӹнь тӓмдӓм Пуры Уверӹм пӓлдӓрӹмем доно шачыктенӓм.
16 Седӹндон тӓмдӓм сарвалем: кыце мӹнь Христос семӹнь ӹштем, тӓӓт мӹнь семӹнем ӹштӹдӓ.
17 Теве малан мӹнь тӓ докыда Тимофейӹм колтенӓм. Господь доно ушнымашты тӹдӹ мӹньӹн яратымы, ӹнян эргӹм. Кыце мӹнь Христос доно ушнен ӹлем дӓ цилӓ вӓре каждый церкӹштӹ мам тымдем, тӹдӹ тӓлӓндӓ ӓшӹндӓрӹктӓ.
18 Мӹнь тӓ докыда ам ми манын шанен, тӓ логӹцдӓ кыдыжы когоэшнӓш тӹнгӓлӹнӹт.
19 Но Господь колтынежӹ гӹнь, шукышты агыл тӓ докыда мӹнь миэм дӓ когоэшнӹшӹвлӓн шамакыштым агыл, силаштым пӓлен нӓлӓм.
20 Вет Йымын Кугижӓншӹ шамакышты агыл, а силашты.
21 Тӓ шанымаштыда мажы яжорак: мӹлӓм тӓ докыда панды доно ӓль яратымаш дӓ пышкыды кымыл доно миӓш?
1 Эдемвлӓ лачокок попат, лоштыда шӓхӓрлӓнӹмӓш улы – техень шӓхӓрлӓнӹмӓш, махань язычниквлӓ лоштат уке: тӓгӱ ӓтяжӹн вараш вӓтӹжӹ доно вӓтӹ-марыла ӹлӓ.
2 А тӓ когоэшнедӓ! Тӓлӓндӓ лучи ойхыраш дӓ тенге ӹштӹшӹм ӹшке логӹцдӓ карангдаш ак кел ыльы ма?
3 Мӹнь гӹнь, кӓпем доно тӓ доныда ам ыл гӹнят, шӱлӹшем доно тӓ сагада ылам дӓ, вуйта тӓ доныда лин, тенге ӹлӹшӹ эдем доно мам ӹштӓш, ӹнде шанен монам.
4 Мӓмнӓн Господьна Иисус Христос лӹмеш погынымыда годым, кынам шӱлӹшем доно сагада ылам, дӓ мӓ донна иквӓреш мӓмнӓн Господь Иисус Христосын силажат лиэш,
5 ти эдемӹм сатаналан пуда. Тӹдӹн кӓпшӹ пӹтӹжӹ, а йӓнгжӹ мӓмнӓн Господь Иисус Христосын кечӹнжӹ ытаралтшы.
6 Тӓлӓндӓ ӹшкӹмдӓм хваляш яжо агыл. Ӓль ада пӓлӹ: изи ру лаштык улы руашым шукта?
7 Тӓлӓндӓ у руаш лиӓш манын, тошты рум лыктын шуда. Ӹнде тӓ ру гӹц пасна ылыда, вет мӓмнӓн Когечӹ Патянам, Христосым, мӓ верцнӓ шӹшкӹлмӹ.
8 Тенгежӹ, тошты ру доно агыл, ярдымашын дӓ худан рушты доно агыл, а ирен дӓ лачокын шергиндӹштӹ доно празныкым ӹштенӓ.
9 Шӓхӓрлӓнӹшӹвлӓ доно кӹлӹм идӓ кычы манын, мӹнь сирмӓшӹштем тӓлӓндӓ сиренӓм.
10 Мӹнь ти сӓндӓлӹкӹштӹшӹ цилӓ шӓхӓрлӓнӹшӹ, шыкланышы, кравышы, идоллан кымалшывлӓ гишӓн сирӹделам. Уке гӹнь тӓлӓндӓ ти сӓндӓлӹк гӹц лӓктӹн кеӓшдӓ вӓрештеш ыльы.
11 Мӹнь сиренӓм ыльы: ӹнянӹшеш шотлалтшы эдем шӓхӓрлӓнӓ, шыклана, идоллан кымалеш, орла, ӓрӓкӓм йӱэш ӓль кравен каштеш гӹнь, тӹдӹн доно кӹлӹм идӓ кычы, техень эдем доно иквӓреш качкашат шӹнзӓш ак кел.
13 (12-13) Малын мӹлӓм ӧрдӹж эдемвлӓмӓт суяш? Ӧрдӹжвлӓм Йымы суя. Ӹшке лоштышда эдемӹм ӹшке ада суйы ма? «Ярдымы кайышаным ӹшке логӹцдӓ карангдыда».*
*5:12-13 Втор 17:7.1 Тӓ логӹцдӓ иктӓжӹн весӹ доно тӧрсӹрӹм тӧрлӓш пӓшӓжӹ улы гӹнь, кыце тӹдӹ язычниквлӓ доны суялташ смейӓ? Малын святойвлӓ доны агыл?
2 Сӓндӓлӹкӹм святойвлӓ суяш тӹнгӓлӹт, коли тидӹм ада пӓлӹ? Сӓндӓлӹкӹм тӓ суяш тӹнгӓлӹдӓ гӹнь, сек изи пӓшӓм суяш ада яры ма?
3 Мӓ ангелвлӓм суяш тӹнгӓлӹнӓ, тидӹм ада пӓлӹ ма? Тенгежӹ ӹлӹмӓшӹштӹ лишӹ пӓшӓм суен ана керд ма?
4 А тӓ ӹлӹмӓшӹштӹ лишӹ пӓшӓдӓм судышты анжымы годым судьяэш церкӹ шотеш пиштӹдӹмӹ эдемӹм шагалтедӓ.
5 Намысланашда попем: коли шӱмбелвлӓ лоштышы ядмашым тӧрлен кердшӹ тӓмдӓн ик ышан эдемдӓӓт уке?
6 Но шӱмбелвлӓ ӹшке лоштышты суялтыт, эче тидӹм Христослан ӹнянӹдӹмӹ судьявлӓ анзылны ӹштӓт!
7 Ӹшке лоштыда суд доно тягӓйӹмӹдӓок лӹмдӓм валта. Малын тӓлӓндӓ худам ӹштӹмӹм тырхымаш яжорак агыл? Пурлыкдам шыпшын нӓлмӹм цӹтӹмӓш яжорак агыл ма?
8 Но тӓ ӹшкеок худам ӹштедӓ дӓ пурлыкым шыпшын нӓлӹдӓ, шӱмбелвлӓнӹмӓт вӓк!
9 Тӧр агыл ӹштӹшӹвлӓ Йымын Кугижӓншӹн наследниквлӓжӹ ак лиэп, тидӹм коли ада пӓлӹ? Идӓ алталалт. Шӓхӓрлӓнӹшӓт, идолвлӓлӓн кымалшат, ӹшке вӓтӹжӹ гӹц весӹ доно каштшат, ярдымы кайышанат, пӱэргӹ пӱэргӹ доно шӓхӓрлӓнӹшӓт,
10 шолат, шыкланышат, ӓрӓкӓм йӱшӓт, орлышат, кравен каштшат Йымын Кугижӓншӹн наследниквлӓжӹ ак лиэп.
11 Тӓ логӹцдӓ южшы техень ылыныт, но мӓмнӓн Господь Иисус Христосын лӹмжӹ доно дӓ мӓмнӓн Йымынан Шӱлӹшӹжӹ доно тӓ мышмы, свящӓйӹмӹ, тӧрӹш лыкмы ылыда.
12 «Хоть-мамат ӹштӓш мӹньӹн ирӹкем улы», но цилӓок пайдам ак пу. «Хоть-мамат ӹштӓш мӹньӹн ирӹкем улы», но мӹнь ниман кид лӹвӓлнӹжӹ лишӓшлык ам ыл.
13 Качкыш мӹшкӹрлӓн, мӹшкӹр качкышлан, но Йымы тидӹжӹмӓт, тӹдӹжӹмӓт пӹтӓрӓ. Кӓп – шӓхӓрлӓнӹмӹлӓн агыл, а Господьлан, Господьшы – кӓплӓн.
14 А Йымы Господьымат колымаш гӹц ӹлӹжтен, мӓмнӓмӓт ӹшке силажы доно ӹлӹжтӓ.
15 Тӓмдӓн кӓпдӓ Христосын кӓпшӹн лаштыкшы ылмым коли ада пӓлӹ? Тенгежӹ, Христосын кӓп лаштыквлӓжӹм нӓлӹн, нӹнӹм шӓхӓрлӓнӹшӹ ӹдӹрӓмӓшӹн кӓп лаштыквлӓжӹм ӹштем ма? Тенге ӹнжӹ ли!
16 Шӓхӓрлӓнӹшӹ ӹдӹрӓмӓш доно ушнышы тӹдӹн доно ик кӓп лиэш. Тидӹм ада пӓлӹ ма? Вет тенге келесӹмӹ: «Нӹнӹ коктын ик кӓп лит».*
17 А Господь доно ушнышы Тӹдӹн доно ик шӱлӹш ылеш.
18 Шӓхӓрлӓнӹмӓш гӹц ӹшкӹмдӓм кычыда. Эдем ӹштӹмӹ цилӓ молы сулык ӹшке кӓпӹм ак тӹкӓл, а шӓхӓрлӓнӹшӹ ӹшке кӓпшӹ ваштареш сулыкым ӹштӓ.
19 Коли тӓ ада пӓлӹ: тӓмдӓн кӓпдӓ – Святой Шӱлӹшӹн пӧртшӹ, Шӱлӹшӹжӹм тӓ донда ушнен ӹлӓш Йымы пуэн? Тӓ ӹшкӹмдӓн ада ыл,
20 вет тӓ шергеш нӓлмӹ ылыда, седӹндон кӓпдӓ донат, йӓнгдӓ донат Йымым лӹмлештӓрӹдӓ, нӹнӹ Йымын ылыт.
*6:16 Быт 2:24.1 Ӹнде мӹлӓнем мам сирӹмӹдӓ гишӓн: ӹдӹрӓмӓш доно пӱэргӹ ак ушны гӹнь, яжо.
2 Но, шӓхӓрлӓнӹмӓш гӹц ӹшкӹмӹм кычаш манын, каждый пӱэргӹн ӹшке вӓтӹжӹ, каждый ӹдӹрӓмӓшӹн ӹшке марыжы лижӹ.
3 Мары вӓтӹжӹ, вӓтӹ марыжы доно керӓл семӹнь ӹлӹшӓшлык ылыт:
4 вӓтӹ ӹшке кӓпшӹлӓн хоза агыл, а марыжы хоза, тенгеок марат ӹшке кӓпшӹлӓн хоза агыл, а вӓтӹжӹ хоза.
5 Иктӹ-весӹдӓ дорц идӓ каранг. Иквӓреш хытырен ярыктен, постлан дӓ ыдылмылан ӹшкӹмӹм пуаш манын, икманяр жепеш веле карангаш лиэш, вара эчеӓт иквӓреш ӹлӹдӓ. Агыл гӹнь, ӹшкӹмдӓм кычен керддӹмӹдӓ гишӓн сатана тӓмдӓм аздара.
6 Но тидӹм мӹнь шӱден агыл, а ирӹкӹм пуэн попем.
7 Цилӓ эдем мӹнь ганем лиштӹ манын шанем, но каждыйын Йымы пумы мыштымашыжы улы, иктӹн иктӹ, весӹн весӹ.
8 А кӱн пелӓшӹжӹ уке ӓль кӱн пелӓшӹжӹ колен, нӹнӹлӓн попем: мӹнь семӹнем ӹшкетӹн ӹлӓт гӹнь, яжо.
9 Но ӹшкӹмӹштӹм кычен ак кердеп гӹнь, мыжырангышты, вет кӓп йылен каштмешкӹ, мыжырангмы яжорак.
10 Но мыжырангшывлӓлӓн мӹнь агыл, а Господь шӱдӓ: вӓтӹ марыжы гӹц айырлышашлык агыл.
11 Айырла гӹнь, марлан ӹнжӹ ке ӓль ӹшке марыжы доно мирейӹжӹ. А мары вӓтӹжӹм шушашлык агыл.
12 Молыжылан Господь агыл, мӹнь попем: иктӓ шӱмбелӹн вӓтӹжӹ Христослан ӹнянӹшӹ агыл, но марыжы доно ӹлӹнежӹ гӹнь, тӹдӹ вӓтӹжӹм шушашлык агыл.
13 А ӹдӹрӓмӓшӹн марыжы Христослан ӹнянӹшӹ агыл, но вӓтӹжӹ доно ӹлӹнежӹ гӹнь, тӹдӹ марыжым шушашлык агыл.
14 Вет ӹнянӹдӹмӹ марыжы ӹнянӹшӹ вӓтӹжӹ гач свящӓйӓлтеш, а ӹнянӹдӹмӹ вӓтӹжӹ ӹнянӹшӹ марыжы гач свящӓйӓлтеш, уке гӹнь тӓмдӓн тетявлӓдӓ ире ак лиэп ыльы, а кӹзӹт святой ылыт.
15 А ӹнянӹдӹмӹ пелӓш айырлынежӹ гӹнь, айырлыжы. Ӹнянӹшӹ пӱэргӹ ӓль ӹдӹрӓмӓш техень годым ирӹкӓн ылыт. Йымы мӓмнӓм тырын ӹлӓш ӱжӹн.
16 Кышец пӓлет, вӓтӹ, маретӹм ытарен кердӓт ма? Ӓль мары, кышец пӓлет, вӓтетӹм ытарен кердӓт ма?
17 Махань ӹлӹмӓшӹм Йымы пӓлемден, Господь ӱжмӹ годым ӹлӹмӓшӹштӹ эдемӹн вӓржӹ махань ылын, каждый техень вӓрешок кодшы. Мӹнь цилӓ церкӹштӹ тенге шӱдем.
18 Кӱ Господь ӱжмӹ анзыц пӹчмӹ овуцам эртен, тидӹм шӹлтӓш ӹнжӹ цацы, кӱ пӹчдӹмӹ ӱжмӹ, пӹчмӹ овуцам ӹнжӹ эртӹ.
19 Эдем пӹчмӓн ӓль пӹчдӹмӹ – нимат агыл, Йымын шӱдӹмӹжӹм шоктымаш веле керӓл ылеш.
20 Йымы ӱжмӹ годым ӹлӹмӓшӹштӹ эдемӹн вӓржӹ махань ылын, тӹдӹ техень вӓрешок кодшашлык.
21 Ӱжмӹ годым тӹнь раб ылынат гӹнь, тидӹ тӹньӹм ӹнжӹ тыргыжландары, а ирӹкӓн лин кердӓт гӹнь, яжоракшым айырен нӓл.*
22 Вет Господь доно ушнымашкы ӱжмӹ раб Господьын ирӹкӹш колтымы эдемжӹ ылеш, тенгеок ӱжмӹ годым ирӹкӓнжӹ Христосын цоражы ылеш.
23 Тӓ шергеш нӓлмӹ ылыда, эдемӹн цоражы идӓ ли!
24 Шӱмбелвлӓ, Йымы ӱжмӹ годым ӹлӹмӓшӹштӹ кӱн махань вӓржӹ ылын, Йымы анзылны техень вӓрешок кодшы.
25 А ӹдӹрвлӓ гишӓн шӱдӹмӹм Господь гӹц мӹнь нӓлделам, но Господьын пурыжы доно мӹнь ӹнян эдем ылам дӓ ӹшке шанымем келесем.
26 Кӹзӹтшӹ жеп нелӹ ылешӓт, эдемлӓн техеньок кодаш яжорак, шанем.
27 Вӓтӹ доно ушненӓт гӹнь, айырлаш ит цацы. Тӹньӹн вӓтет уке гӹнь, ӹдӹрӹм ит нӓл.
28 Но мыжырангат гӹнят, сулыкым ат ӹштӹ, ӹдӹрӓт, марлан кеӓ гӹнь, сулыкыш ак пыры. Но техень эдемвлӓм ти ӹлӹмӓшӹштӹ шукы орлык выча, а мӹнь тӓмдӓм тидӹ гӹц перегӹнем.
29 Мӹнь тӓлӓндӓ келесем, шӱмбелвлӓ: ӹнде жеп чӹдӹ. Вӓтӓнвлӓ вӓтӹдӹмӹвлӓ ганьы лиштӹ,
30 мӓгӹрӹшӹвлӓ – мӓгӹрӹдӹмӹвлӓ ганьы, ӹвӹртӹшӹвлӓ – ӹвӹртӹдӹмӹвлӓ ганьы, тӱлен нӓлшӹвлӓ – пурлыкдымывлӓ ганьы,
31 сӓндӓлӹкӹштӹ ма ылмым кычылтшывлӓ – викок кычылтдымывлӓ ганьы, вет ти сӓндӓлӹкӹн сӹнжӹ пӹтӓ.
32 Тӓ шытырланыде ӹлӹдӓ манын шанем. Господьлан ярал лиӓш манын, вӓтӹдӹмӹ эдем Господьын пӓшӓжӹ гишӓн шытырлана,
33 а ӹдӹрӹм нӓлшӹ – сӓндӓлӹкӹштӹшӹ гишӓн, вӓтӹжӹлӓн ярал лиӓш цаца. Марлан кешӹ дон ӹдӹр иктӹ-весӹштӹ гӹц айыртемӓлтӹт:
34 ӹдӹржӹ, кӓп донат, шӱлӹш донат святой лиӓш манын, Господьын пӓшӓжӹ гишӓн шытырлана, а марлан кешӹ – сӓндӓлӹкӹштӹшӹ гишӓн, марыжылан ярал лиӓш цаца.
35 Тидӹм мӹнь тӓмдӓм кӓпшӹлтӓш агыл, а тӓлӓндӓ палшаш шанен попем. Тӓ Господьлан цӓрнӹде керӓл семӹнь служаш ӹшкӹмдӓм цилӓге пушашлык ылыда.
36 Иктӓжӹ ӹдӹржӹм марлан пудымыжы гишӓн яжон ӹштӹделам манын шана, дӓ ӹдӹржӹн марлан кемӹ жепшӹ эртен дӓ тенгеок лишӓшлык, тӹдӹ кыце шана, тенге ӹштӹжӹ – тидӹ сулык агыл; техеньӹвлӓ марлан кештӹ.
37 Но кӱ, нимат анжыде, улы шӱмжӹ доно пингӹдӹн шалга, ӹшке ирӹкшӹлӓн хоза лиэш дӓ ӹдӹржӹм ӹдӹрӹмок кодаш шана, тӹдӹ яжон ӹштӓ.
38 Тенгежӹ, кӱ ӹдӹржӹм марлан пуа, яжон ӹштӓ, а кӱ ак пу, эчеӓт яжоракын ӹштӓ.*
39 Марыжы ӹлӹмӹ годым вӓтӹжӹ тӹдӹн доно закон семӹнь кӹлдӓлтӹн, а марыжы кола гӹнь, кӱлӓн шана, тӹдӹлӓн марлан кеӓш ирӹкшӹ улы, но Господь доно ушнымашты веле.
40 Тенге гӹнят, тӹдӹ марлан кеде кодеш гӹнь, цӓшӓнрӓк лиэш. Тенге мӹнь шанем, а Йымын Шӱлӹшӹжӹ мӹньӹнӓт улы манын тумаем.
*7:21 Греклӓ сирӹмӹм кок семӹнь ынгылаш лиэш: «Яжоракшым айырен нӓл» рабеш кодмымат, ирӹкӹш лӓкмӹмӓт анжыктен кердеш. *7:36-38 Греклӓ сирӹмӹм тенгеӓт ынгылаш лиэш: «36 Иктӓжӹ нӓлшӓшлык ӹдӹржӹ гишӓн, тӹдӹм марлан нӓлде, яжон ам ӹштӹ манын шана, ӹшкӹмжӹм кычен ак керд дӓ тенгеок лишӓшлык гӹнь, кыце шана, тенге ӹштӹжӹ, тидӹ сулык агыл, техеньӹвлӓ мыжырангышты. 37 Но кӱ, шӱмжӹ доно пингӹдӹн шалген, ӹшкӹмжӹм кычен кердеш, ӹшке ирӹкшӹлӓн хоза лиэш дӓ нӓлшӓшлык ӹдӹржӹм ӹдӹрӹмок кодаш шана, тӹдӹ яжон ӹштӓ. 38 Тенгежӹ, кӱ нӓлшӓшлык ӹдӹржӹм нӓлеш, яжон ӹштӓ, а кӱ ак нӓл, эчеӓт яжоракын ӹштӓ».1 Идолвлӓлӓн жертвеш пумы качкыш гишӓн мӓ пӓленӓ, мӓмнӓн цилӓнӓн пӓлӹмӓшнӓ улы. Но пӓлӹмӓш когоэшнӹктӓ, а яратымаш пингӹдемдӓ.
2 Кӱ шукы пӓлем манын шана, тӹдӹ керӓл семӹнь нимат ак пӓлӹ.
3 Но кӱ Йымым ярата, тӹдӹм Йымы пӓлӓ.*
4 Тенге, идолвлӓлӓн жертвеш пумы качкышым качмы гишӓн мӓ пӓленӓ: идол – сӓндӓлӹкӹштӹ нимат агыл. Ик Йымы гӹц пасна вес Йымы уке.
5 Вет йымы манмывлӓ пӹлгомыштат, мӱлӓндӹ вӹлнӓт ылыт гӹнят, – техень йымы дӓ техень хоза лачокок шукы –
6
мӓмнӓн ик Йымына – Ӓтя,
ма улы, цилӓ – Тӹдӹ гӹц, мӓӓт – Тӹдӹлӓн.
Мӓмнӓн ик Господьна – Иисус Христос,
Тӹдӹ гач цилӓ ӹштӹмӹ, мӓӓт – Тӹдӹ гач.
7 Но тидӹм цилӓнжок ак пӓлеп. Идолвлӓ улы манын, совестьшӹ доно шотлышы юж эдем жертвеш пумым качмыжы годым кӹзӹт яктеӓт шана: тидӹ лачокок идоллан пумы. Техень эдемӹн совестьшӹ слабка ылешӓт, яктаралтеш.
8 Но качкыш мӓмнӓм Йымы докы ак лишемдӹ. Качкына гӹнят, нимат ак уштаралт, ана кач гӹнят, нимат ана ямды.
9 Тенге гӹнят тӓмдӓн ти ирӹкдӓ слабкавлӓлӓн шӹртнялтмӹ кӱ ӹнжӹ ли манын, шеклӓнӹдӓ.
10 Вет иктӓжӹ тӹньӹн, пӓлӹмӓшӓн эдемӹн, идолын пӧртӹштӹжӹ качметӹм ужеш гӹнь, тӹдӹн, слабка эдемӹн, совестьшӹ идоллан жертвеш пумым качкаш ак кымылангды ма?
11 Тенгежӹ слабка шӱмбелет тӹньӹн пӓлӹмӓшет гишӓн пӹтӓ, а тӹдӹ верц Христос колен.
12 Шӱмбелвлӓ ваштареш сулыкым тенге ӹштедӓ дӓ слабка совестьӹштӹм шушыртедӓ гӹнь, тӓ Христос ваштареш сулыкым ӹштедӓ.
13 Седӹндон, шӱмбелемлӓн качкыш шӹртнялтмӹ кӱ ылеш гӹнь, шӱмбелем ӹнжӹ шӹртньӹ манын, пайым нигынамат ам кач.
*8:3 «Тӹдӹм Йымы пӓлӓ» – ӓль «Тӹдӹлӓн пӓлӹмӓшӹм Йымы пуа».1 Мӹнь Апостол ам ыл ма? Мӹнь ирӹкӓн ам ыл ма? Мӹнь Иисус Христосым, мӓмнӓн Господьнам, ужделам ма? Господь доно ушнымаштыда мӹньӹн пӓшӓэм агыл ма?
2 Весӹвлӓлӓн мӹнь Апостол ам ыл гӹнь, тӓлӓндӓжӹ Апостол ылам, вет Господь доно ушнымаштыда тӓ ӹшке Апостол ылмемӹм анжыктышы пӓлӹ ылыда.
3 Мӹньӹм йӓтлӹшӹвлӓ анзылны теве кыце перегӓлтӓм.
4 Качкаш-йӱӓш мӓмнӓн правана уке ма?
5 Пелӓшӹм – ӹнянӹшӹ ӹдӹрӓмӓшӹм – сагана кандышташ молы Апостол, Господьын шӱмбелвлӓжӹ дӓ Кифа семӹнь мӓмнӓн правана уке ма?
6 Ӓль мӹньӹн дӓ Варнаван веле ӹшкӹлӓн пӓшӓ ӹштӹде ӹлӓш правана уке?
7 Махань салтак ӹшке шотеш служа? Кӱ виноградым шӹндӓ дӓ кӹцкӹжӹм ак кач? Кӱ кӹтӧм кӹтӓ дӓ кӹтӧштӹшӹ вольык шӹшерӹм ак кач?
8 Мӹнь тидӹм эдем шанымы семӹнь веле попем ма? Законат тидӹмок ак попы ма?
9 Моисейӹн законыштыжы сирӹмӹ: «Кӹлтем шишӹ ӱшкӱжӹн ышмажым ит питӹрӹ».* Тенге попен, ӱшкӱж верц ма Йымы шытырлана?
10 Техень шамак мӓ гишӓннӓ агыл ма? Тидӹм мӓ гишӓннӓ сирӹмӹ, вет кыралшы кыралмыжы годым, кӹлтем шишӹ шимӹжӹ годым вычымым нӓлмӹлӓн уанышашлык.
11 Мӓ тӓлӓндӓ шӱлӹшлӓн керӓлӹм ӱденнӓ гӹнь, тӓ гӹцдӓ кӓплӓн керӓлӹм нӓлӓш кого пӓшӓ ма?
12 Весӹвлӓнӓт тӓ донда правашты улы гӹнь, мӓмнӓнжӹ утларак агыл ма? Тенге гӹнят мӓ ти правам кычылтделна, а Христосын Пуры Увержӹ шӓрлӹмӹлӓн нимат ӹнжӹ ӓптӹртӹ манын, цилӓ тырхенӓ.
13 Йымын пӧртӹштӹ служышывлӓ тӹшец качкышым нӓлӹт, жертвенник сага служышывлӓ жертвенник гӹц ӹшке пайыштым нӓлӹт, тидӹм ада пӓлӹ ма?
14 Пуры Уверӹм шӓрӹшӹ эдемӓт Пуры Уверӹм шӓрӹмӹ гӹц ӹлӓш керӓлӹм нӓлшӓшлык, Господь тенге шӱден.
15 Но мӹнь тидӹм ӹштӹделам дӓ ӹшкӹлӓнем техеньӹм ядаш манын агыл тидӹм сиренӓм. Тенге ӹштӹмешкӹ, мӹлӓм колаш яжорак! Когоэшнӹмемӹн виржӹм мӹнь гӹцем иктӓт ӹнжӹ нӓл.
16 Мӹнь Пуры Уверӹм шайыштам гӹнь, тиштӹ мӹлӓнем когоэшнӓш вир уке, тидӹ мӹньӹн ӹштӹшӓшлык пӓшӓэм. Пуры Уверӹм ам шайышт гӹнь, мӹлӓм ойхы!
17 Мӹнь тидӹм ӹшке кымылем доно ӹштем гӹнь, пӓшӓдӓрӹм нӓлшӓшлык ылам, а кымылем ваштареш ӹштем гӹнь, Йымылан служымы пӓшӓм мӹлӓнем сойток ӹнянен пумы.
18 Тенгежӹ, мӹлӓнем пӓшӓдӓржӹ маханьы? Христос гишӓн Пуры Уверӹм мӹнь тӓрӹм нӓлдеок шайыштам, Пуры Уверӹн пумы праважым ам кычылт.
19 Мӹнь ирӹкӓн ылам, иктӹнӓт тӓрзӹжӹ ам ыл, но шукырак эдемӹм Христос векӹ сӓрӓлӓш манын, мӹнь цилӓн рабышты линӓм.
20 Иудейвлӓм Пуры Увер докы сӓрӓлӓш манын, мӹнь иудейвлӓлӓн иудей гань линӓм, закон лӹвӓлнӹшӹвлӓм сӓрӓлӓш манын, закон лӹвӓлнӹшӹвлӓлӓн нӹнӹ ганьок линӓм.
21 Мӹнь Йымын закон гӹц пасна ам ӹлӹ, Христосын законжым колыштам, но закон гӹц пасна ӹлӹшӹвлӓм сӓрӓлӓш манын, мӹнь закон гӹц пасна ӹлӹшӹвлӓлӓн закон гӹц пасна ӹлӹшӹ ганьы линӓм,
22 слабкавлӓм сӓрӓлӓш манын, слабкавлӓлӓн слабка ганьы линӓм. Хоть южшым кыце-гӹнят ытараш манын, мӹнь цилӓлӓн цилӓ линӓм.
23 Цилӓ тидӹм мӹнь Пуры Увер гишӓн ӹштем, вет мӹнят тӹдӹ гӹц пурым нӓлнем.
24 Коли тӓ ада пӓлӹ: тӓнгӓшӹмӹ вӓрӹштӹ тӓнгӓшӹшӹвлӓ цилӓн кыргыжыт, но наградым иктӹ нӓлеш. Тӓӓт, нӓлӓш манын, тенге кыргыжда.
25 Тӓнгӓшӹшӹвлӓ цилӓ шотыштат ӹшкӹмӹштӹм кычат: нӹнӹ шӱшӓшлык вуйгӹшӹлӹм нӓлӓш манын, а мӓ – нигынамат лӹвӹжгӹдӹмӹм.
26 Тенгежӹ мӹнь кышкы кыргыжмем пӓлӹде ам кыргыж, воздухым такеш ам мышкындыл.
27 Мӹнь весӹвлӓлӓн Пуры Уверӹм шайыштмы паштек ӹшкежӹ ярдымыш ӹнем лӓк, седӹндон кӓпем орландарем дӓ колыштыктем.
*9:9 Втор 25:4.1 Шӱмбелвлӓ, ӓтявлӓнӓн цилӓн пӹл лӹвӓлнӹ ылмышты дӓ тангыж гач эртӹмӹштӹ гишӓн тӓмдӓм пӓлӹдӹмеш ӹнем коды.*
2 Пӹлеш дӓ тангыжеш нӹнӹ цилӓн Моисей доно ушнаш крестӓлтӹнӹт.
3 Цилӓн Йымы пумы ик качкышымок качкыныт,
4 дӓ цилӓн Йымы пумымок йӱнӹт, вет нӹнӹ сагашты каштшы пӹлгомыштышы кӱ кырык гӹц йӱнӹт, а кӱ кырыкшы Христос ылын.
5 Но нӹнӹм шукыштымок Йымы ярыктыде, седӹндон пустыньышты пӹтенӹт.
6 Тидӹ мӓлӓннӓ шижтӓрӹмӓш лин: нӹнӹ худалан шык ылмышты семӹнь мӓ худалан шык лишӓшлык ана ыл.
7 Нӹнӹ логӹц южшы семӹнь идоллан идӓ кымал, тидӹ гишӓн «Халык качкаш-йӱӓш шӹнзӹн, вара мадаш кӹньӹлӹн»* манын сирӹмӹ.
8 Нӹнӹ логӹц южшын шӓхӓрлӓнӹмӹштӹ семӹнь мӓ шӓхӓрлӓнӹшӓшлык ана ыл: техеньжӹ ик кечӹн коклы кым тӹжем колен.
9 Нӹнӹ логӹц южшы тергӹмӹ семӹнь мӓ Христосым тергӹшӓшлык ана ыл: нӹнӹ кӹшкӹ чӹнгӓлмӹ доно коленӹт.
10 Нӹнӹ логӹц южшын ӧпкӓлӹмӹ семӹнь идӓ ӧпкӓлӹ: нӹнӹм колымаш Ангел пуштын*.
11 Нӹнӹ доно ма лиӓлтӹн, шижтӓрӹмӓш семӹнь ылын, а мӓлӓннӓ, мычаш толшашлык жепӹн ӹлӹшӹвлӓлӓн, тымдаш манын сирен кодымы.
12 Седӹндон, кӱ ӹшке гишӓнжӹ шалгем манын шана, кенвацмы гӹц перегӓлтшӹ.
13 Тӓлӓндӓ махань тергӹмӓшӹм эртӓш вӓрештеш, тидӹ эдемӹн ӹлӹмӓштӹжӹ вӓшлиӓлт кердшӹ тергӹмӓш веле. Йымы ӹнян ылеш. Тӹдӹ тӓмдӓм тырхен кердмӹдӓ гӹц кого тергӹмӓшкӹ вӓрештӓш ак пу. Тӓмдӓм тергӹмӹ годым тӹшец лӓктӓш йӧнӹмӓт йӓмдӹлӓ, тенге тӓ тырхен кердӹдӓ.
14 Седӹндон, яратымывлӓэм, идоллан идӓ кымал.
15 Мӹнь тӓлӓндӓ шанен мыштышы эдемвлӓлӓн шайыштмыла попем. Мам попымем гишӓн ӹшке шаналтыда.
16 Благословайымаш цӓшкӓ, кыдым мӓ благословаенӓ, – Христосын Вӹржӹ доно ушнымаш агыл ма? Тодылмы сыкырна Христосын Кӓпшӹ доно ушнымаш агыл ма?
17 Сыкыр иктӹ, седӹндон мӓ шукын ик кӓп ылына, вет цилӓн ик сыкыр гӹц причӓщӓйӓлтӹнӓ.
18 Израиль халыкым анжалда: жертвеш пумым качшывлӓ жертвенникӹш ак ушнеп ма?
19 Мам вара мӹнь келесӹнем? Идол иктӓ-ма айыртемӓлтшӹ ылеш манын попем ма? Ӓль идоллан пумы жертва иктӓ-ма айыртемӓлтшӹ ылеш манын попем ма?
20 Агыл, мӹнь тидӹм келесӹнем: язычниквлӓ жертвӹштӹм Йымылан агыл, а иӓвлӓлӓн пуат. А тӓмдӓм иӓвлӓ доно ушнышым мӹнь ӹнем уж.
21 Тӓ Господьын цӓшкӓжӹ гӹц йӱдӓ гӹнь, иӓвлӓн цӓшкӓштӹ гӹц йӱн ада керд, дӓ Господьын стӧлжӹ гӹц качкыда гӹнь, иӓвлӓн стӧлӹштӹ гӹц качкын ада керд.
22 Мӓ Господьын шӹдӹжӹм ӹлӹжтӹненӓ ма? Мӓ Тӹдӹ гӹц силанрак ылына ма?
23 «Хоть-мамат ӹштӓш ирӹкем улы», но цилӓжок пайдам ак пу; «Хоть-мамат ӹштӓш ирӹкем улы», но цилӓжок агыл тымден пингӹдемдӓ.
24 Иктӓт ӹшкӹлӓнжӹ пайдам ӹнжӹ кӹчӓл, а весӹлӓн кӹчӓлжӹ.
25 Пазарышты мам выжалат, совестьдӓ верц ядыштде, цилӓ качда,
26 вет «Мӱлӓндӹ дӓ тӹштӹ ма улы, цилӓ Господьын ылеш».*
27 Христослан ӹнянӹдӹмӹ эдем тӓмдӓм хыналаш ӱжеш, дӓ кенедӓ гӹнь, мам анзыкыда шӹндӓт, совесть верц ядыштдеок, цилӓ качда.
28 Но иктӓжӹ тӓлӓндӓ «Тидӹ идоллан жертвеш пумы качкыш» манеш гӹнь, тидӹм увертӓрӹшӹ верц дӓ совесть верц идӓ кач, вет «Мӱлӓндӹ дӓ тӹштӹ ма улы, цилӓ Господьын ылеш».
29 Мӹнь тӓмдӓн совестьдӓ гишӓн агыл, а весӹн совестьшӹ гишӓн попем. – Малын вес эдемӹн совестьшӹ мӹньӹн ирӹкемӹм суйышашлык?
30 Мӹнь качкышемлӓн Йымылан таум ӹштем гӹнь, ма верц таум ӹштем, тӹдӹ гишӓн малын мӹньӹм вырсаш?
31 Тенгежӹ, тӓ качкыда ӓль йӱдӓ, ӓль иктӓ-мам весӹм ӹштедӓ, цилӓ тидӹм Йымы лӹмлештӓрӓлтшӹ манын ӹштӹдӓ.
32 Иудейвлӓлӓнӓт, эллинвлӓлӓнӓт, Йымын церкӹлӓнӓт шӹртнялтӓш вирӹм идӓ пу.
33 Нӹнӹ ытаралтышты манын, мӹнят, ӹшкӹлӓнем агыл, а весӹвлӓлӓн пурым кӹчӓлӹн, цилӓлӓн цилӓ шотыштат ярал лиӓш цацем.
*10:1 Анжы: Исх 13:18-21, 14:21-22. *10:7 Исх 32:6. *10:8-10 Анжы: Числ 16:41-49, 21:5-6, 25:1-18. *10:26 Пс 23:1.1 Кыце мӹнь Христос семӹнь ӹштем, тенгеок тӓӓт мӹнь семӹнем ӹштӹдӓ.
2 Шӱмбелвлӓ, цилӓ тымдымем ӓштӹмӹдӓ гишӓн, попен кодымем ӹштӹмӹдӓ гишӓн мӹнь тӓмдӓм хвалем.
3 Но тӓлӓндӓ пӓлдӓрӹнем: каждый пӱэргӹлӓн вуй – Христос, ӹдӹрӓмӓшлӓн вуй – пӱэргӹ, а Христослан вуй – Йымы.
4 Ыдылмыжы ӓль пророкла попымыжы годым пӱэргӹ вуйым леведеш гӹнь, вуйжым намысыш пырта,
5 а ыдылшы ӓль пророкла попышы ӹдӹрӓмӓш вуйжым ак левед гӹнь, тӹдӓт вуйжым намысыш пырта, тидӹжӹ нӹжӹн нӓлмӹ вуян ылмы доно икток.
6 Ӹдӹрӓмӓш вуйжым ак левед гӹнь, ӱпшӹмӓт тӹредӹктӹжӹ. А ӹдӹрӓмӓшлӓн тӹредӹктӹмӹ ӓль нӹжмӹ вуян лиӓш намыс гӹнь, вуйжым леведшӹ.
7 Пӱэргӹ вуйжым леведшӓшлык агыл, вет тӹдӹ Йымын сӹнжӹ дӓ лӹмлештӓрӓлтмӓшӹжӹ, а ӹдӹрӓмӓш – пӱэргӹн лӹмлештӓрӓлтмӓшӹжӹ.
8 Вет пӱэргӹм ӹдӹрӓмӓш гӹц ӹштӹмӹ агыл, а ӹдӹрӓмӓшӹм пӱэргӹ гӹц ӹштӹмӹ,
9 дӓ пӱэргӹм ӹдӹрӓмӓшлӓн агыл, а ӹдӹрӓмӓшӹм пӱэргӹлӓн ӹштӹмӹ.
10 Седӹндон Ангелвлӓ верц ӹдӹрӓмӓшӹн вуйыштыжы тӹдӹ кид лӹвӓлнӹ ылмыжым анжыктышы пӓлӹ лишӓшлык.
11 Тенге гӹнят Господь анзылны пӱэргӓт ӹдӹрӓмӓш гӹц пасна, ӹдӹрӓмӓшӓт пӱэргӹ гӹц пасна уке:
12 кыце ӹдӹрӓмӓшӹм пӱэргӹ гӹц ӹштӹмӹ, тенгеок пӱэргӓт ӹдӹрӓмӓш гӹц шачеш, но цилӓок – Йымы гӹц.
13 Ӹшке шаналтыда: ӹдӹрӓмӓшлӓн вуйым леведде Йымылан ыдылаш олмыдеш ма?
15 (14-15) Пӱэргӹ кужы ӱпӓн гӹнь, тӹдӹлӓн тидӹ намыс, а ӹдӹрӓмӓш кужы ӱпӓн гӹнь, тидӹ тӹдӹн лӹмжӹм лӱктӓ манын, природа тӓмдӓм ӹшке ак тымды ма? Ӹдӹрӓмӓшлӓн кужы ӱпӹм леведӹш ганьы пумы.
16 А иктӓжӹ тидӹ гишӓн кӹрмӓшӹнежӹ гӹнь – мӓмнӓн нимахань вес овуцана уке, Йымын церкӹвлӓжӹнӓт уке.
17 Техень кӓнгӓшӹм пумем годым иктӹ гишӓн мӹнь тӓмдӓм ам хвальы: тӓмдӓн погынымашда гӹц эксӹкшӹ пайда гӹц шукырак.
18 Сек пӹтӓриок тидӹ: церкӹ погынымашым эртӓрӹмӹдӓ годым иктӹ-весӹ ваштареш шалгышы тӹшкӓвлӓэш пайылалтмыда гишӓн мӹнь колынам. Тидӹлӓн мӹнь маняр-гӹнят ӹнянем.
19 Вет тӓ лоштыда айыртемӓлтшӹ шанымашан тӹшкӓвлӓӓт лишӓшлык ылыт, тенге, тӓ логӹцдӓ кӱ тергӹмӓшӹм эртен кердӹн, пӓледӓ.
20 Тенгежӹ, тӓ иквӓреш погынедӓ гӹнят, тидӹм Господьын вады качкышыжым эртӓрӹмӓш манаш ак ли.
21 Вет тӓ цилӓн ӹшке качкышдам качкаш талашедӓ, тенге иктӹ шужышы кодеш, весӹ утымеш йӱэш.
22 Тоныда качкын-йӱн ада керд ма? Ӓнят, Йымын церкӹжӹм ада жеплӹ дӓ укеӓнвлӓм намысыш пыртынедӓ? Тӓлӓндӓ мам келесӓш? Тӓмдӓм хваляш ма? Тидӹ гишӓн ам хвальы.
23 Тӓлӓндӓ мам шайыштынам, тӹдӹм мӹнь Господь гӹц пӓлен нӓлӹнӓм: Господь Иисусым выжалымы йыдым Иисус кидӹшкӹжӹ сыкырым нӓлӹн,
24 Йымылан таум ӹштен, тодылын дӓ келесен: «Нӓлдӓ, качда, тидӹ тӓ верцдӓ тодыл пумы Мӹньӹн Кӓпем. Мӹньӹм ӓшӹндӓрен, тенге ӹштӹдӓ».
25 Тенгеок вады качкыш паштек цӓшкӓм нӓлӹн дӓ келесен: «Ти цӓшкӓ – Мӹньӹн Вӹрем гач пумы у согонь. Тӹшец йӱмӹдӓ годым, Мӹньӹм ӓшӹндӓрен, со тенге ӹштӹдӓ».
26 Ти сыкырым качкын дӓ ти цӓшкӓ гӹц йӱн, Господьын толмешкӹжӹ, тӓ каждый гӓнӓок Тӹдӹн колымыжы гишӓн увертӓредӓ.
27 Тенгежӹ, кӱ ярдымын ти сыкырым качкеш дӓ Господьын цӓшкӓжӹ гӹц йӱэш, тӹдӹ Господьын Кӓпшӹ дӓ Вӹржӹ анзылны вуйнаматан лиэш.
28 Ти сыкырым качмы анзыц дӓ ти цӓшкӓ гӹц йӱмӹ анзыц эдем ӹшкӹмжӹм тергӹшӓшлык.
29 Вет кӱ, Господьын Кӓпшӹ дӓ молы лошты айыртемӹм ужде, шотеш пиштӹде качкеш дӓ йӱэш, тӹдӹ качмы-йӱмӹжӹ доно ӹшкӹмжӹм суйыкта.
30 Седӹндон шукынжы тӓ силадымы дӓ ясы ылыда, дӓ кыды эдемжӹ колен.
31 Мӓ ӹшкӹмнӓм ӹшке терген нӓлӹнӓ ылгецӹ, суйымы ана ли ыльы.
32 А мӓлӓннӓ сӓндӓлӹк доно иквӓреш суялташ агыл манын, Господь мӓмнӓм йӓтлӓ дӓ тӧрлӓ.
33 Седӹндон, шӱмбелемвлӓ, вады качкышым эртӓрӓш погынымыда годым иктӹ-весӹдӓм вычыда.
34 Погынымыда тӓлӓндӓ вуйнаматыш лӓкмӹм ӹнжӹ канды манын, кӱ шужен гӹнь, тоныжы качшы. Молыжы гишӓн тӓ докыда мимӹкем келесем.
1 Шӱмбелвлӓ, Святой Шӱлӹш пумы мыштымашвлӓ шотышты тӓмдӓм пӓлӹдӹмеш ӹнем коды.
2 Язычниквлӓ ылмыда годым тӓ йӹлмӹдӹмӹ идолвлӓ докы вуйта виден нӓнгемӹ гань каштында, тидӹм тӓ пӓледӓ.
3 Седӹндон попем: Йымын Шӱлӹшӹжӹ доно попышы эдем Иисусым ак шудал, дӓ Святой Шӱлӹш гӹц пасна иктӓт Иисусым Господь манын ак керд.
4 Святой Шӱлӹш пумы мыштымаш – шукы йиш, а Шӱлӹш иктӹ.
5 Служымы пӓшӓӓт шукы йиш, а Господь иктӹ.
6 Ӹштӹшӓшлык пӓшӓ шукы йиш улы, а цилӓ тидӹм цилӓнӓ гач ӹштӹшӹ Йымы иктӹ.
7 Цилӓлӓн пайда лижӹ манын, Шӱлӹш каждый эдем гач пӓлдӹрнӓ.
8 Иктӹлӓн Шӱлӹш гач ышан шамак пуалтеш, весӹлӓн тӹ Шӱлӹш гачок – пӓлӹмӓш шамак,
9 иктӹлӓн тӹ Шӱлӹшок пингӹдӹ ӹнянӹмӓшӹм пуа, весӹлӓн тӹ Шӱлӹшок – паремден мыштымашым.
10 Иктӹлӓн цӱдӓм ӹштӓш сила пуалтеш, весӹлӓн – пророкла попымаш, иктӹлӓн шӱлӹшвлӓ лоштышы айыртемӹм ужмаш, весӹлӓн – шукы йӹлмӹ, южшылан – йӹлмӹвлӓм ынгылдарымаш.
11 Цилӓ тидӹм ик Шӱлӹшок ӹштӓ. Тӹдӹ ӹшке шанымыжы семӹнь каждый эдемлӓн мыштымашым пуа.
12 Кӓп иктӹ гӹнят, лаштыкшы шукы улы, дӓ ик кӓпӹн лаштыкшы шукы гӹнят, цилӓн иквӓреш ик кӓпӹм ӹштӓт. Христосат тенгеок.
13 Мӓ цилӓн, иудей ӓль эллин, раб ӓль ирӹкӓн, тӹ ик Шӱлӹш гачок ик кӓп лиӓш крестӹмӹ ылына, дӓ цилӓн тӹ ик Шӱлӹш донок темӹмӹ ылына.
14 Кӓпӓт ик лаштык гӹц агыл, а шукы лаштык гӹц ылеш.
15 «Мӹнь кид ам ыл, седӹндон кӓпӹн ам ыл» манын, ял келесӓ гӹнят, тӹдӹ кӓпӹн лаштыкшы агыл ма?
16 «Мӹнь сӹнзӓ ам ыл, седӹндон кӓпӹн ам ыл» манын, пӹлӹш келесӓ гӹнят, тӹдӹ кӓпӹн лаштыкшы агыл ма?
17 Улы кӓп сӹнзӓ ылеш гӹнь, ма доно колеш? Улы кӓп пӹлӹш ылеш гӹнь, ма доно пышым шижеш?
18 Но Йымы цилӓ лаштыкым шанымыжы семӹнь вӓрӓнгден, кӓпӹштӹ каждыйлан ӹшке вӓржӹм пуэн.
19 А цилӓнӓт ик лаштык веле лит ылгецӹ, кышты кӓпшӹ лиэш ыльы?
20 Но теве лаштык шукы, а кӓп иктӹ.
21 Сӹнзӓ кидлӓн «Тӹнь мӹлӓнем ат кел» келесен ак керд, ӓль вуй яллан: «Тӹнь мӹлӓнем ат кел».
22 Анешлӓ, кӓпӹн кыды лаштыквлӓжӹ молы гӹц слабкаракла кайыт, нӹнӹ сек керӓл ылыт.
23 Кӓпӹн чӹдӹрӓк шотеш пиштӹмӹлӓ чучшы лаштыквлӓм айыртемӹнок перегенӓ.
25 (24-25) Анжыкташ ярыдымы лаштыквлӓнӓм мӓ яжон леведӹнӓ, а анжыкташ ярышы лаштыквлӓлӓн тидӹ ак кел. Но кӓпӹштӹ пасна лаштыквлӓ иктӹ-весӹштӹ ваштареш ӹнжӹштӹ лиэп, а цилӓн икӹжӓк-иктӹштӹ верц икань шытырланышты манын, Йымы кӓпӹн лаштыквлӓжӹм иктӹш ушымыжы годым чӹдӹрӓк шотеш пиштӹмӹ лаштыквлӓлӓн айыртемӹнок кого ӓкӹм пуэн.
26 Ик лаштык парвала гӹнь, тӹдӹн доно иквӓреш цилӓ лаштык парвала, ик лаштык лӹмлештӓрӓлтеш гӹнь, тӹдӹ сага цилӓ лаштык ӹвӹртӓ.
27 Тӓ Христосын кӓпшӹ ылыда, а пасна-пасна – тӹдӹн лаштыквлӓжӹ.
28 Иктӹвлӓм Йымы Церкӹштӹ Апостолеш, весӹвлӓм – пророкеш, кымшывлӓм тымдышеш шагалтен; южшылан цӱдӓм ӹштӓш силам, южшылан паремден мыштымашым, палшен кердмӓшӹм, вуйлатен мыштымашым ӓль шукы йӹлмӹм пуэн.
29 Цилӓн Апостол ылыт ма? Цилӓн пророк ылыт ма? Цилӓн тымдышы ылыт ма? Цилӓн цӱдӓм ӹштӓт ма?
30 Цилӓн паремден кердӹт ма? Цилӓн пӓлӹдӹмӹ йӹлмӹ доно попат ма? Цилӓн ти йӹлмӹвлӓм ынгылдарен мыштат ма?
31 Когорак мыштымашым Йымы гӹц нӓлӓш цацыда, а ӹнде мӹнь тӓлӓндӓ эчеӓт яжорак корным анжыктем.
1 Мӹнь эдемвлӓн дӓ ангелвлӓн йӹлмӹштӹ доно попем гӹнят, яратымашем уке гӹнь, тьонгышы той хӓдӹр ӓль семӹм лыкшы кимвал веле ылам.
2 Мӹньӹн пророкла попен мыштымашем, цилӓ тайным пӓлӹмӓшем, цилӓ сӹнзӹмӓшем, кырыквлӓм вашталтен шӹндӓш ситӹшӹ ӹнянӹмӓшем улы гӹнь, но яратымашем уке гӹнь, мӹнь нимат ам ыл.
3 Мӹнь улы пурлыкем пуэден пӹтӓрем дӓ кӓпем йылаташ пуэм гӹнят, яратымашем уке гӹнь, мӹлӓнем нимахань пайдаат ак ли.
4 Яратымаш кужын тырхышы дӓ пуры ылеш, яратымаш ак завидуйы, ӹшкӹмжӹм ак хвальы, когоэш ак уж,
5 ӹшкӹмжӹм худан ак кычы, ӹшкӹлӓнжӹ пайдам ак кӹчӓл, вуеш ак нӓл, шӹдӹм ак кычы,
6 тӧр агыл ӹштӹмӹлӓн ак ӹвӹртӹ, а лачоклан сусу лиэш,
7 цилӓ леведеш, соок ӹнянӓ дӓ уана, цилӓ тырха.
8 Яратымаш нигынамат ак пӹтӹ, а пророкла попымаш пӹтӓ, пӓлӹдӹмӹ йӹлмӹвлӓ доно попымаш цӓрнӓ, пӓлӹмӓш ямеш.
9 Вет мӓмнӓн пӓлӹмӓшнӓӓт, пророкла попымынаат ситӹдӹмӓшдӹмӹ агылеп,
10 а кынам ситӹдӹмӓшдӹмӹ толеш, ситӹдӹмӓшӓн пӹтӓ.
11 Тетя ылмем годым тетялӓ попенӓм, тетялӓ шаненӓм, тетя семӹнь ынгыленӓм, а кушкын шомыкем, тетя годшы гӹц карангынам.
12 Кӹзӹт мӓ вуйта раскыды агыл цӹрем тӹгӹрӹштӹ ужына, а тӹнӓм вӓшӓ-вӓшӓ анжен ужына. Кӹзӹт мӹньӹн цицмӓш пӓлӹмӓшем уке, а Йымы мӹньӹм пӓлӹмӹ семӹнь мӹнят цицмӓш пӓлӓш тӹнгӓлӓм.
13 Тенгежӹ, ти кымыт соок лит: ӹнянӹмӓш, уанымаш, яратымаш, но нӹнӹ лошты сек когожы – яратымаш.
1 Яратымашкы шоаш цацыда. Но Святой Шӱлӹш пумы мыштымашвлӓлӓнӓт, айыртемӹнок пророкла попымылан, кымылангда.
2 Вет кӱ пӓлӹдӹмӹ йӹлмӹ доно попа, эдемвлӓлӓн агыл, Йымылан попа, вет тӹдӹм иктӓт ак ынгылы, тайнывлӓм Шӱлӹш доно попа.
3 А кӱ пророкла попа, эдемвлӓлӓн попа: тымден пингӹдемдӓ, кымылангда, ладнангдара.
4 Кӱ пӓлӹдӹмӹ йӹлмӹ доно попа, попымыжы доно ӹшкӹмжӹм пингӹдемдӓ, а кӱ пророкла попа, попымыжы доно церкӹм пингӹдемдӓ.
5 Тӓмдӓм цилӓдӓм пӓлӹдӹмӹ йӹлмӹ доно попышым ужнем, но пророкла попедӓ гӹнь, эчеӓт яжорак лиэш. Пӓлӹдӹмӹ йӹлмӹ доно попымы шамак церкӹм тымден пингӹдемдӓш манын ак ынгылдаралт гӹнь, пророкла попышы эдем – пӓлӹдӹмӹ йӹлмӹ доно попышы гӹц когорак.
6 Ӹнде, шӱмбелвлӓ, тӓ докыда миэм дӓ пӓлӹдӹмӹ йӹлмӹвлӓ доно попаш тӹнгӓлӓм гӹнь, дӓ мӹньӹн шайыштмаштем пачмашат, пӓлӹмӓшӓт, пророкла попымашат, тымдымашат ак ли гӹнь, тӓлӓндӓ махань пайдам пуэм?
7 Тенгеок юкым лыкшы йӓнгдӹмӹ хӓдӹр, керек шишкыш ӓль кӓрш лижӹ, юквлӓ икӓнӓ-иктӹштӹ гӹц ак айыртемӓлтеп гӹнь, тӹдӹм шактышы мам шактымым кыце пӓлет?
8 Ӓль пыч раскыды юкым ак лык гӹнь, кӱ кредӓлмӓшеш йӓмдӹлӓлтӓш тӹнгӓлеш?
9 Тенгеок тӓӓт, йӹлмӹдӓ доно ынгылаш лидӹмӹ шамакым келеседӓ гӹнь, мам попымыдам кыце пӓлӓт? Тӓ мардежлӓн веле попедӓ.
10 Сӓндӓлӹкӹштӹ хоть-маняр йӹлмӹ лижӹ, нимат анжыктыдымы иктӓт уке.
11 А шамаквлӓн мам анжыктымыштым мӹнь ам пӓлӹ гӹнь, попышылан мӹнь вес сӓндӓлӹкӹн эдем ылам, дӓ попышат мӹлӓм вес сӓндӓлӹкӹн эдем ылеш.
12 Тӓ Святой Шӱлӹш гӹц шукы мыштымашым пиш нӓлнедӓ гӹнь, церкӹм пингӹдемдӓш манын, нӹнӹм шукырак нӓлӓш цацыда.
13 Седӹндон пӓлӹдӹмӹ йӹлмӹ доно попышы эдем ынгылдарен мыштымашым сарвален ыдылжы.
14 Мӹнь пӓлӹдӹмӹ йӹлмӹ доно ыдылам гӹнь, мӹньӹн кӧргӹ шӱлӹшем веле ыдылеш, ышемлӓн кӹцкӹжӹ уке.
15 Мам ӹштӓш? Мӹнь шӱлӹш доно ыдылаш тӹнгӓлӓм, ыш донат ыдылаш тӹнгӓлӓм. Мӹнь шӱлӹш доно мыраш тӹнгӓлӓм, ыш донат мыраш тӹнгӓлӓм.
16 Тӹнь Йымым шӱлӹшет доно веле хваляш тӹнгӓлӓт гӹнь, погынымашкы толшы ӧрдӹж эдем таум ӹштӹмет паштек кыце «аминь» манын келесӓ? Тӹдӹ тӹньӹн попыметӹм ак ынгылы вет.
17 Тӹнь яжон таум ӹштет гӹнят, весӹлӓн тидӹ ак палшы.
18 Пӓлӹдӹмӹ йӹлмӹвлӓ доно мӹнь цилӓдӓ гӹц шукы попем, тидӹ гишӓн Йымемлӓн таум ӹштем.
19 Но церкӹштӹ молымат тымдаш манын, тӹжем тӹжем шамакым пӓлӹдӹмӹ йӹлмӹ доно попымешкӹ, ышем доно вӹц шамакым келесӹнем.
20 Шӱмбелвлӓ, ышда доно тетя гань идӓ ли. Худа шотышты ӓзӓ лидӓ, а ыш доно – кушкын шошы.
21 Законышты сирӹмӹ:
«Вес йӹлмӹвлӓ доно,
вес сӓндӓлӹкӹштӹшӹ халыкын шамаквлӓжӹ доно
ти халыклан попаш тӹнгӓлӓм,
но тӹнӓмӓт Мӹньӹм ак колыштеп, манеш Господь».*
22 Тенгежӹ, пӓлӹдӹмӹ йӹлмӹвлӓ ӹнянӹшӹвлӓлӓн агыл пӓлӹк ылыт, а ӹнянӹдӹмӹвлӓлӓн. А пророкла попымаш ӹнянӹдӹмӹвлӓлӓн агыл пӓлӹк ылеш, а ӹнянӹшӹвлӓлӓн.
23 Улы церкӹ иквӓреш погынымы годым цилӓн пӓлӹдӹмӹ йӹлмӹвлӓ доно попаш тӹнгӓлӹт дӓ погынымашкы ӹнянӹдӹмӹ ӓль ӧрдӹж эдемвлӓ пырат гӹнь, тӓ ородыш кендӓ манын, ак келесеп ма?
24 А цилӓн пророкла попат дӓ ӹнянӹдӹмӹ ӓль ӧрдӹж эдем пыра гӹнь, тӹдӹн самыньжым цилӓн вӹкӹ лыктыт дӓ суят,
25 тӹдӹн йӓнгеш шӹлтӹмӹжӹ вӹкӹ лӓктеш. Тӹнӓм тӹдӹ, кымык лин, Йымылан кымалеш дӓ келесӓ: «Йымы лачокок сагада ылеш».
26 Кыце вара, шӱмбелвлӓ? Погынымыда годым каждыйдан хвальымы мыры, тымдымаш, пачмаш, йӹлмӹ, тӹдӹм ынгылдарымаш улы – цилӓ тидӹ церкӹм пингӹдемдӓш палшыжы.
27 Пӓлӹдӹмӹ йӹлмӹ доно попышывлӓ лит гӹнь, коктыт, сек шукы кымыт попыжы, нӹнӹ церот доно попышты, иктӹ ынгылдарыжы.
28 А ынгылдарышы уке гӹнь, церкӹ погынымашышты нӹнӹ шӹп лиштӹ, ӹшкӹлӓнӹштӹ дӓ Йымылан попышты.
29 Пророквлӓ логӹцӓт кок ӓль кым эдем попышты, а молывлӓжӹ попымыштым тергӹштӹ.
30 Но тӹштӹ шӹнзӹшӹвлӓ логӹц иктӓжӹлӓн Йымы дорц пачмаш лиэш гӹнь, пӹтӓриш попышы цӓрнӹжӹ.
31 Цилӓн тыменьӹштӹ дӓ кымылангышты манын, пачелӓ-пачелӓ тӓ цилӓн пророкла попен кердӹдӓ.
32 Пророквлӓн шӱлӹшвлӓштӹ пророквлӓм колыштыт,
33 вет Йымы шотде ӹштӹмӹн агыл, а тырын Йымыжы. Святойвлӓн цилӓ церкӹштӹ тенге ылеш.
34 Ӹдӹрӓмӓшвлӓдӓ церкӹ погынымашты шӹп лишӓшлык ылыт, попышашлык агылеп, шамакым колыштышты, законат тенгеок попа.
35 Нӹнӹ иктӓ-малан тыменьнештӹ гӹнь, тонышты марышты гӹц ядышты, вет ӹдӹрӓмӓшлӓн церкӹ погынымашышты попаш намыс.
36 Йымын шамак тӓ гӹцдӓ лӓктӹн ма? Ӓль тӓ докыда веле шон?
37 Иктӓжӹ ӹшкӹмжӹм пророкеш шотла ӓль Святой Шӱлӹш гӹц мыштымашым нӓлӹнӓм манеш гӹнь, тӹдӹ пӓлӹжӹ: мам мӹнь тӓлӓндӓ сирем, тидӹ Господьын шӱдӹмӹжӹ.
38 А кӱ тидӹм ак ынгылы, ӹнжӹ ынгылы.
39 Тенгежӹ, шӱмбелвлӓ, пророкла попаш кымылан лидӓ, пӓлӹдӹмӹ йӹлмӹ доно попашат идӓ цӓрӹ,
40 но цилӓок керӓл семӹнь дӓ шот доно лижӹ. *14:21 Ис 28:11-12.
2 (1-2) Шӱмбелвлӓ, мӹнь тӓлӓндӓ Пуры Уверӹм шайыштынам, а тӓ шӱмӹшкӹдӓ пиштендӓ, тӹдӹм пингӹдӹн кычедӓ. Мам тӓлӓндӓ увертӓренӓм, тӹдӹмок кычедӓ гӹнь, тӹдӹн донок ытаралтыда – такеш агыл ӹнянӹшӹ линдӓ гӹнь, тенге лиэш. Ти Пуры Уверӹм мӹнь тӓлӓндӓ ӓштӹктем.
3 Мам мӹлӓнем тымденӹт, тӹдӹм тӓлӓндӓ пӹтӓри шайыштынам: Писаништӹ келесӹмӹ семӹнь, Христос мӓмнӓн сулыкна верц колен,
4 Тӹдӹм таенӹт, дӓ, Писаништӹ сирӹмӹ семӹньок, кымшы кечӹн ӹлӹж кӹньӹлӹн,
5 Кифалан кайын, вара луаткок Апостоллан.
6 Вара вӹцшӱдӹ утла шӱмбеллӓн икӓнӓштӹ кайын, нӹнӹ шукынжы кӹзӹтӓт ӹлӓт, а южшы коленӹт.
7 Вара Иаковлан, тӹлец вара цилӓ Апостоллан кайын.
8 А цилӓштӹ паштек мӹлӓнем, веремӓ шоде шачшы ганьылан, кайын.
9 Мӹнь Апостолвлӓ логӹц сек изи ылам дӓ Апостол маналташат ам яры, вет Йымын церкӹжӹм поктылынам.
10 Но кӱ ылам, Йымын благодатьшы доно тӹдӹ ылам. Тӹдӹн мӹлӓм анжыктымы благодатьшы такеш лиде: цилӓ Апостол логӹц сек шукы пӓшӓм мӹнь ӹштенӓм – лачокшы, тидӹм мӹнь агыл ӹштенӓм, а Йымын мӹнь сагаэм ылшы благодатьшы ӹштен.
11 Тенгежӹ, мӓ цилӓн – мӹнят, нӹнӓт – тенгеок увертӓренӓ, дӓ тӓӓт тенгеок ӹнянедӓ.
12 А колымаш гӹц ӹлӹжӹн манын, Христос гишӓн увертӓрӓлтеш гӹнь, кыце тӓ логӹцдӓ южшы колымаш гӹц ӹлӹж кӹньӹлмӓш уке манын кердӹт?
13 Колымаш гӹц ӹлӹжмӓш уке гӹнь, Христосат ӹлӹжде.
14 А Христос ӹлӹжде гӹнь, мӓмнӓн шайыштмы увернӓӓт такеш, тӓмдӓн ӹнянӹмӓшдӓӓт такеш,
15 эчежӹ мӓ Йымы гишӓн алтален попышыш лӓктӹнӓ, вет Христосым Тӹдӹ ӹлӹжтен манын попенӓ. Колышывлӓ ак ӹлӹжеп гӹнь, тенгежӹ Христосым Йымы ӹлӹжтӹде.
16 Вет колышывлӓ ак ӹлӹжеп гӹнь, Христосат ӹлӹжде.
17 А Христос ӹлӹжде гӹнь, тӓмдӓн ӹнянӹмӓшдӓ такеш, тӓ эче ӹшкӹмдӓн сулыкыштыда ылыда,
18 дӓ Христослан ӹнянен колышывлӓӓт соэшок пӹтенӹт.
19 Христослан уанна кӹзӹтшӹ ӹлӹмӓшнӓ доно веле кӹлдӓлтеш гӹнь, цилӓ эдем гӹцӓт мӓ цӓшдӹмӹ ылына.
20 Но Христос колышы гӹц ӹлӹж кӹньӹлӹн, колышывлӓ логӹц ӹлӹжшӹ Тӹдӹ пӹтӓришӹ ылын.
21 Колымаш эдем гач толын гӹнь, ӹлӹжмӓшӓт эдем гач лин.
22 Кыце Адам гач цилӓн колат, тенгеок цилӓн Христос гач ӹлӹшӹ лит,
23 но каждый ӹшке церотшы доно: пӹтӓри Христос, вара, Тӹдӹ толмыкы, Христосын эдемвлӓжӹ.
24 А вара, кынам Тӹдӹ цилӓ вуйлатымашым, цилӓ властьым дӓ силам пӹтӓрӓ дӓ Кугижӓншӹм Йымылан, Ӓтялӓн, пуа, тӹнӓм мычаш лиэш.
25 Цилӓ тышманым ӹшке ял лӹвӓкӹжӹ пиштӹмешкӹ, Тӹдӹлӓн кугижӓлӓнӓш келеш.
26 Сек остаткаэш пӹтӓрӹшӓшлык тышман колымаш ылеш.
27 «Йымы цилӓ Тӹдӹн ял лӹвӓкӹжӹ пиштен»,* но цилӓ Тӹдӹн кид лӹвӓкӹжӹ пуэн манын, Писани попа гӹнят, пӓлӹмӓн, Тӹдӹлӓн цилӓ кид лӹвӓкӹжӹ Пушыжы Тӹдӹн кид лӹвӓлнӹжӹ агыл.
28 А кынам цилӓ Тӹдӹн кид лӹвӓкӹжӹ пумы лиэш, тӹнӓм Эргӹ Ӹшкежӓт кид лӹвӓкӹ Пушын кид лӹвӓкӹжӹ Ӹшкӹмжӹм пуа. Тӹнӓм Йымы цилӓшток цилӓ лиэш.
29 Уке гӹнь колышывлӓ вӓреш крестӓлтшӹвлӓ мам ӹштӓт? Колышывлӓ лачокок ак ӹлӹжеп гӹнь, малан вара колышывлӓ верц крестӓлтӹт?
30 Малан вара мӓӓт цӓш йӹде эксӹкӹм ужаш йӓмдӹ ылына?
31 Мӹнь кечӹнь колымаш тӹрӹштӹ ылам. Тидӹм, шӱмбелвлӓ, Господьна Христос Иисус анзылны тӓмдӓн хвальымыда доно* цуратлем.
32 Мӹнь Ефесӹштӹ зверьвлӓ ваштареш колышашлык эдем семӹнь веле кредӓлӹнӓм ылгецӹ, мӹлӓнем пайдажы махань? Колышывлӓ ак ӹлӹжеп гӹнь, ӓлдӓ «качкаш-йӱӓш тӹнгӓлӹнӓ, вет иргодым сойток коленӓ».*
33 Идӓ алталалт: «Худа тӓнгвлӓ пуры кайышым локтылыт».
34 Ары шанымашан лидӓ, тӧр корныш пӧртӹлдӓ дӓ сулыкым идӓ ӹштӹ. Вет тӓ логӹцдӓ южшы Йымым ак пӓлеп. Тӓлӓндӓ намысланашда попем.
35 Иктӓжӹ, ӓнят, ядеш: «Колышывлӓ кыце ӹлӹжӹт дӓ махань кӓп доно толыт?»
36 Шанен мыштыдымы! Тӹньӹн ӱдӹмет ак колы гӹнь, тӹдӹ ӹлӹж ак керд.
37 Тӹнь ӱдӹмет годым анзыкылашы кӓпӹм агыл, а пӹрцӹм, шамак толшеш, шӓдӓнгӹм ӓль иктӓ-мам весӹм веле ӱдет.
38 Но Йымы шанымыжы семӹнь тӹдӹлӓн кӓпӹм пуа, дӓ каждый пӹрцӹлӓн – ӹшке кӓпӹм.
39 Цилӓ йӓнгӓнӹн кӓпӹштӹ икань агыл: эдемӹн кӓпшӹ иктӹ, вольыкын – весӹ, колын – иктӹ, кекӹн – весӹ.
40 Пӹлгомыштышы кӓп улы, мӱлӓндӹ вӹлнӹшӹ кӓп улы, но пӹлгомыштышын лӹмлештӓрӓлтмӹжӹ иктӹ, мӱлӓндӹ вӹлнӹшӹн – весӹ.
41 Кечӹн йӹлгӹжмӹжӹ иктӹ, тӹлзӹн – весӹ, шӹдӹрвлӓн – эче весӹ, дӓ йӹлгӹжмӹштӹ доно шӹдӹрвлӓ икӹжӓк-иктӹштӹ гӹц айыртемӓлтӹт.
42 Колышывлӓ ӹлӹжмӹ годымат тенгеок лиэш: ӱдӓлтеш шӱшӓшлык, кӹньӹлеш шӱшӓшлык агыл,
43 ӱдӓлтеш лӹмлештдӹмӹ, кӹньӹлеш лӹмлештшӹ, ӱдӓлтеш силадымы, кӹньӹлеш силан,
44 ӱдӓлтеш йӓнг ядмым шоктен ӹлӹшӹ кӓп, кӹньӹлеш шӱлӹш ядмым шоктен ӹлӹшӹ кӓп. Йӓнг ядмым шоктен ӹлӹшӹ кӓп улы, шӱлӹш ядмым шоктен ӹлӹшӹ кӓпӓт улы.
45 Тенге сирӹмӹ: «Пӹтӓриш эдем, Адам, ӹлӹшӹ йӓнгӓн лин»,* а остатка Адам – ӹлӹмӓшӹм пушы шӱлӹш.
46 Но андак шӱлӹшӓн агыл, а йӓнгӓн ылын, вара шӱлӹшӓн лин.
47 Пӹтӓриш эдем – мӱлӓндӹ гӹц, рок гӹц ылын, кокшы эдем пӹлгом гӹц Господь.
48 Рок гӹц лишӹ эдем махань ылын, рок гӹц лишӹвлӓ цилӓн техень ылыт, дӓ пӹлгом гӹц толшы маханьы ылеш, пӹлгомын эдемвлӓжӹ техень ылыт.
49 Кыце мӓ рок гӹц лишӹ эдем ганьы линнӓ, тенгеок пӹлгом гӹц Толшы ганят линӓ.
50 Но, шӱмбелвлӓ, тидӹм келесем: кӓп дон вӹр Йымын Кугижӓншӹн наследникшӹ лин ак кердеп, шӱшӓшлыкат шӱшӓшлык агылын наследникшӹ ак ли.
52 (51-52) Теве тӓлӓндӓ тайным келесем: цилӓнок мӓ ана колы, но трӱк выртышты, остатка пыч пуалтымы годым цилӓн вашталтына. Пыч юк шакта – колышывлӓ ӹлӹжӹт дӓ шӱшӓшлык агыл лит, дӓ мӓ вашталтына.
53 Вет ти шӱшӓшлыкшы шӱшӓшлык агылыш вӹдӹлӓлтшӓшлык, ти колышашлыкшы – колыдымашкы.
54 А кынам ти шӱшӓшлыкшы шӱшӓшлык агылыш вӹдӹлӓлтеш, ти колышашлыкшы – колыдымашкы, Писанин шамакшы шокталтеш:
«Колымаш сӹнгӓлтӹн, колымашым нелмӹ».
55 «Колымаш, кышты тӹньӹн шылангет?
Ад, кышты тӹньӹн сӹнгӹмӓшет?»*
56 Колымашын шылангыжы – сулык, а сулыкын силажы – закон.
57 Мӓмнӓн Иисус Христос Господьна гач мӓлӓннӓ сӹнгӹмӓшӹм пушы Йымылан тау!
58 Тенгежӹ, яратымы шӱмбелвлӓэм, пингӹдӹн, сӓрӓлӓш лидӹмӹн шалгыда. Господь доно ушнен ӹштӹмӹ пӓшӓдӓн такеш агыл лимӹжӹм пӓлен, Тӹдӹн пӓшӓжӹм соок шытырланен ӹштӹдӓ.
*15:27 Пс 8:7. *15:31 «Тӓмдӓн хвальымыда доно»: тидӹм «Тӓ верцдӓ когоэшнӹмем доно» манынат ынгылаш лиэш. *15:32 Ис 22:13. *15:45 Быт 2:7. *15:54-55 Ис 25:8, Ос 13:14. Шылангы – жало.1 Святойвлӓлӓн оксам погымы гишӓн теве мам келесем: кыце мӹнь Галатиштӹшӹ церкӹвлӓштӹ ӹштӓш шӱденӓм, тӓӓт тенгеок ӹштӹдӓ.
2 Мимӹкем погаш ӹнжӹ вӓрешт манын, каждыйда кердмӹ семӹнь переген кодымы оксам, ӓрнян пӹтӓриш кечӹн ӧрдӹжӹш пиштен, тоныжы урдыжы.
3 А тӓ докыда мимӹкем, айырен нӓлмӹ эдемвлӓдӓм Иерусалимӹш сирмӓшвлӓ доно колтем. Нӹнӹ тӓмдӓн подаркадам нӓнгеӓт.
4 Мӹлӓнемӓт тӓрвӓнӓш керӓл лиэш гӹнь, нӹнӹ сагаэм кен кердӹт.
5 Македоним эртӹмӹкем, тӓ докыда толам, вет мӹнь Македони гач кеем.
6 Мӹнь тӓ доныда, ӓнят, икманяр жеп ӹлӓлӓлӓм, телӹмӓт эртӓрен кердӓм. Вара, хоть-кышкы кеем гӹнят, тӓ мӹньӹм ыжатен колтен кердӹдӓ.
7 Кӹзӹт тӓмдӓм эртен кешӹлӓ веле агыл ужнем, Господь йӧнӹм ӹштӓ гӹнь, шукырак тӓ доныда линем.
8 Но Ефесӹштӹ Пятидесятница празнык якте лиӓм.
9 Пӓшӓэмлӓн кого дӓ кымда амасам пачмы, дӓ ваштареш шалгышывлӓӓт шукын ылыт.
10 Тӓ докыда Тимофей толеш гӹнь, тӓ доныда тӹдӹлӓн нима гӹцӓт лӱдӓш ӹнжӹ ли манын шеклӓнӹдӓ, вет тӹдӹ мӹнь семӹнемок Господьын пӓшӓжӹм ӹштӓ.
11 Тенгежӹ, тӹдӹм шотлыдымы иктӓт ӹнжӹ ли, мӹнь докем мӹнгеш тырым согоньлен ыжатен колтыда. Мӹнь тӹдӹм шӱмбелвлӓ доно вычем.
12 А Аполлос шӱмбел шотышты, мӹнь тӹдӹм шӱмбелвлӓ доно иквӓреш тӓ докыда кеӓш пиш ядынам, но кӹзӹт ӹнежӹ ке.* Кынам тӹдӹлӓн йӧнеш толеш, тӹнӓм миӓ.
13 Перегӓлт шалгыда, ӹнянӹмӓштӹдӓ пингӹдӹ лидӓ, лӱддӹмӹ, силан лидӓ.
14 Мам ӹштедӓ, цилӓ яратен ӹштӹдӓ.
15 Шӱмбелвлӓ, тӓ Стефаным дӓ тонышывлӓжӹм пӓледӓ, нӹнӹ Ахаиштӹ мӓмнӓн пӓшӓнӓн пӹтӓриш кӹцкӹжӹ ылыт, ӹшкӹмӹштӹм святойвлӓлӓн пӓшӓм ӹштӓш пуэнӹт. Ядам:
16 тӓӓт техеньӹвлӓн дӓ нӹнӹ доно иквӓреш пӓшӓм ӹштӹшӹвлӓн шамакыштым колыштшы лидӓ.
17 Мӹнь Стефанын, Фортунатын дӓ Ахаикӹн толмыштылан сусу ылам. Тӓ тиштӹ уке ылыда, нӹнӹ мӹлӓнем тӓмдӓм вашталтенӹт.
18 Нӹнӹ мӹньӹнӓт, тӓмдӓнӓт кымылдам ладнангдаренӹт. Техень эдемвлӓм шотеш пиштӹдӓ.
19 Асиштӹшӹ церкӹвлӓ тӓлӓндӓ шӓлӓм колтат, Акила дон Прискилла дӓ тонышты погынышы церкӹ Господь доно ушнымашты кого шӓлӓм колтат.
20 Шӱмбелвлӓ цилӓн шӓлӓм колтат. Святой шыпшалмаш доно икӹжӓк-иктӹдӓм вӓшлидӓ.
21 Мӹнь, Павел, шӓлӓм ӹшке кидем доно сирем.
22 А иктӓжӹ Господь Иисус Христосым ак яраты гӹнь, тӹдӹ проклинӓйӹмӹ лижӹ. Господьна, тол!*
23 Господь Иисус Христосын благодатьшы тӓ доныда лижӹ.
24 Христос Иисус доно ушнымашты мӹньӹн яратымашем цилӓ доныда лижӹ. Аминь.
*16:12 «Ӹнежӹ ке»: грек шамакым «Йымы тӹдӹм ӹнежӹ колты» манынат ынгылаш лиэш. *16:22 Греклӓ сирӹмӹштӹ «анафема» шамак кычылталтеш, тӹдӹ «проклинӓйӹмӓш» манмым анжыкта. «Господьна, тол!»: Павел тиштӹ арамей «маран афа» шамакым кычылтеш, тӹдӹ «Господьна, тол!» манмым анжыкта.