1 Иисус Христосын цоражы, Йымы ӱжмӹ, Тӹдӹн Пуры Увержӹм шайышташ айырен нӓлмӹ Апостол Павел дорц (7-a) Йымы яратымы дӓ ӱжмӹ Римӹштӹшӹ святойвлӓлӓн.
2 Пуры Уверӹм Йымы пророквлӓжӹ гач Святой Писаништӹ андакок сӧрен,
3 Пуры Увер Тӹдӹн Эргӹжӹ гишӓн попа, кӓпшӹ доно Тӹдӹ Давид вырлык гӹц шачшы ылеш,
4 а шӱлӹшӹжӹн святой ылмыжы доно – Йымын Эргӹ, тидӹм колымаш гӹц кого сила доно ӹлӹжмӹ гач пачын анжыктымы. Тӹдӹ – мӓмнӓн Господьна Иисус Христос,
5 мӓ Тӹдӹ гач благодатьым дӓ Апостол пӓшӓм нӓлӹннӓ дӓ Тӹдӹн лӹмжӹ верц цилӓ халыкым ӹнянӹмӓшӹн шамакшым колыштшым ӹштӹшӓшлык ылына.
6 Тӓӓт, Иисус Христос ӱжмӹ эдемвлӓ, нӹнӹ логӹц ылыда.
7 -б Тӓлӓндӓ Йымы Ӓтянӓ дӓ Господь Иисус Христос дорц благодать дӓ тыр лижӹ.
8 Тӓмдӓн ӹнянӹмӹдӓ гишӓн цилӓ сӓндӓлӹкӹштӹ попат, седӹндон сек пӹтӓриок Йымемлӓн Иисус Христос гач цилӓдӓ верц таум келесем.
9 Йымылан мӹнь йӓнг вашт служем – Эргӹжӹ гишӓн Пуры Уверӹм шӓрем, дӓ Йымы мӹлӓнем свидетель ылеш: тӓ со ышыштем ылыда.
10 Тӓ докыда остаткаэш Йымын шанымыжы семӹнь мӹлӓнем толаш манын, ыдылмем годым со сарвалем.
11 Тӓмдӓм пингӹдемдӓш манын, Святой Шӱлӹшӹн махань-гӹнят подаркажым тӓ докыда шокташ мӹнь тӓмдӓм пишок ужнем,
12 тенге ик ӹнянӹмӓшнӓ доно икӹжӓк-иктӹлӓннӓ ӹнян кычык линӓ.
13 Шӱмбелвлӓ, мӹнь тӓмдӓм пӓлӹдӹмеш ӹнем коды: кӹзӹт якте тидӹм ӹштӓш ӓптӹртӹш лин гӹнят, мӹнь шукы гӓнӓ тӓ докыда толаш дӓ, махань кӹцкӹм молы халык лошты нӓлӹнӓм, техеньӹмок тӓ доныдаат нӓлӓш шаненӓм.
14 Эллинвлӓ дӓ варварвлӓ, ышанвлӓ дӓ тыменьдӹмӹвлӓ анзылны мӹньӹн кӱсем улы,
15 седӹндон тӓ лоштыдаат, Римӹштӹ ӹлӹшӹвлӓ лошты, Пуры Уверӹм шӓрӹмем шоэш.
16 Мӹнь Христосын Пуры Увержӹ гӹц ам намысланы, вет тӹдӹ – Йымын силажы, ӹнянӹшӹ каждый эдемлӓн – пӹтӓриок иудейлӓн, вара эллинлӓнӓт – ытарымашым канда.
17 Тӹштӹ Йымын тӧржӹ ӹнянӹмӓш гӹц ӹнянӹмӓшкӹ пачылтеш, вет тенге сирӹмӹ: «Тӧр ӹштӹшӹ эдем ӹнянӹмӓшӹжӹ доно ӹлӓш тӹнгӓлеш».*
18 Тӧр агыл доно лачокым пӹзӹрӹшӹ эдемвлӓн Йымым шотлыдымышты дӓ тӧр агыл ӹштӹмӹштӹ вӹкӹ Йымын шӹдӹжӹ пӹлгом гӹц пачылтын толеш.
19 Вет Йымы гишӓн мам пӓлӓш лиэш, тидӹ нӹнӹлӓн пӓлӹ: Йымы нӹнӹлӓн тидӹм пӓлдӹртен анжыктен.
20 Тӹдӹн кайдымы айыртемвлӓжӹм – курымаш силажым дӓ Йымы ылмыжым – сӓндӓлӹкӹм ӹштӹмӹ годшенок пӓшӓжӹ гач ужаш дӓ ынгылаш лиэш, седӹндон техень эдемвлӓ ӹшкӹмӹштӹм тӧрӹш лыктын ак кердеп.
21 Нӹнӹ Йымы гишӓн пӓленӹт гӹнят, Тӹдӹм Йымы семӹнь шотеш пиштӹделыт дӓ Тӹдӹлӓн таум ӹштӹделыт, а нӹнӹн шанымышты такеш лин, дӓ ынгылен мыштыдымы шӱмӹштӹм пӹцкемӹш леведӹн.
22 Нӹнӹ ӹшкӹмӹштӹм ышан ылына маныныт, но ышдымы линӹт
23 дӓ колыдымы Йымын лӹмлештӓрӓлтмӹжӹм колышашлык эдемӹн, кекӹн, нӹл яланын, авалянен каштшын сӹнӹштӹ доно вашталтенӹт.
24 Седӹндон Йымы нӹнӹм шӓхӓрлӓнӹмӹ шӱм кымылышты доно ярдымешок коден, тенге нӹнӹ ӹшке кӓпӹштӹм ӹшке яктаренӹт.
25 Нӹнӹ Йымын лачокшым алталымашеш вашталтенӹт дӓ Ӹштӹшӹлӓн агыл, а мам ӹштен, тӹдӹлӓн кымалыт дӓ служат. Ӹштӹшӹ Йымы курымеш хвальымы лижӹ, аминь.
26 Седӹндон Йымы нӹнӹм намысан кымыл шыпшмылан пуэн: ӹдӹрӓмӓшвлӓ природа тымдымы семӹнь вӓтӹ-марыла ӹлӹмӹм природа ваштареш ылшы кайышеш вашталтенӹт,
27 тенгеок пӱэргӹвлӓӓт ӹдӹрӓмӓш доно природа тымдымы семӹнь вӓтӹ-марыла ӹлӓш цӓрненӹт, дӓ йӹрнӹк шыкланымаш иктӹ-весӹштӹ докы ӹлӹжӹн, пӱэргӹ дон пӱэргӹ шӓхӓрлӓнӓт дӓ тенге акъяры кайышышты доно ӹшкӹлӓнӹштӹ ӹшке кӱсӹм пӧрӹктӹктӓт.
28 Йымым шотеш пиштӓш нӹнӹ керӓлеш шотлыделыт, седӹндон Йымы нӹнӹм ярдымы ышышты семӹнь ӹлӓш коден, дӓ нӹнӹ акелӹм ӹштӹлӹт.
29 Нӹнӹ сакой тӧр агыл доно цицок темӹнӹт: шӓхӓрлӓнӹмӓш, худам ӹштӹмӓш, шыкланымаш, шӹдӹм кычымаш, йӓлӹнлӓн йӓнг йылымаш, эдемвлӓм пуштмаш, кӹрмӓшӹмӓш, алталымаш, эдемлӓн худам шанымаш нӹнӹм роалтенӹт.
30 Нӹнӹ ӓляклӓт, эдем вӹкӹ попат дӓ Йымым ужмыштат ак шо, важылдымы, чывань, когоэшнӹшӹ ылыт, ярдымы пӓшӓм шанен лыктын мыштат, ӓтя-ӓвӓштӹм ак колыштеп.
31 Нӹнӹ шанен мыштыдымы, ӹнян агыл, яратыдымы, иктӹ-весӹ доно пурын ӹлен керддӹмӹ, жӓлӓйӹдӹмӹ ылыт.
32 Тенге ӹштӹшӹвлӓ колышашлык ылыт манын, Йымын тӧр суйымыжым нӹнӹ пӓлӓт, но техеньӹм ӹшке веле агыл ӹштӓт, тенге ӹштӹшӹ вес эдемвлӓмӓт яжоэш шотлат.
*1:17 Авв 2:4.1 Весӹм суйышы эдем, хоть-кӱ тӹнь ли, ӹшкӹметӹм вуйнаматдымеш лыктын ат керд: весӹм суйымет годым ӹшкӹметӹмӓт сует, вет тӹнь, весӹм суйышы, ӹшкежӓт тӹдӹмок ӹштет.
2 Йымы тенге ӹштӹшӹм тӧр суя, тидӹм мӓ пӓленӓ.
3 Тӹнь, тенге ӹштӹшӹм суйышы дӓ ӹшкежӓт тенгеок ӹштӹшӹ эдем, Йымын судшы гӹц ытлен кердӓм, шанет?
4 Ӓль тӹнь Йымын кого пурыжым, жӓлӓйӹмӹжӹм дӓ кужын тырхымыжым ат шотлы? Йымын пурыжы тӹньӹм, сулыкетӹм простьыктен, Йымы докы сӓрӓлнежӹ, тидӹм ат ынгылы ма?
5 Но тӹнь турна ылат, йӓнгет сулык гӹц ӹнежӹ каранг, седӹндон тӹнь Йымын шӹдӹ кечешӹжӹ ӹшке вӹкет Тӹдӹн шӹдӹжӹм погет. Тӹ кечӹн Йымын тӧр судшы пачылтеш,
6 дӓ Йымы каждыйлан пӓшӓжӹ семӹнь пуа:
7 кӱ, цӓрнӹде пурым ӹштен, лӹмлештӓрӓлтмӓшӹм, шотеш пиштӹмӓшӹм, колыдымашым кӹчӓлеш, тӹдӹлӓн курымаш ӹлӹмӓшӹм пуа,
8 а ӹшкӹлӓнжӹ веле яжом кӹчӓлшӹ, лачокым колыштдымы, но тӧр агыллан йӓнгӹм пушылан – кого шӹдӹжӹм.
9 Худам ӹштӹшӹ цилӓ эдемлӓн орланымаш дӓ эксӹк лиэш – пӹтӓри иудейлӓн, вара эллинлӓн.
10 Но пурым ӹштӹшӹ цилӓ эдемӹм лӹмлештӓрӓлтмӓш, шотеш пиштӹмӓш дӓ тыр выча – пӹтӓри иудейӹм, вара эллинӹм.
11 Йымы цилӓм икань анжа.
12 Сулыкым закондеок ӹштӹшӹвлӓ закондеок пӹтӓт. А кӱвлӓн законышты улы дӓ сулыкым ӹштӓт, нӹнӹ закон доно суйымы лит.
13 Вет законым колшывлӓ агыл, а закон семӹнь ӹштӹшӹвлӓ Йымы анзылны тӧрӹш лыкмы лит.
14 Вет язычниквлӓ, законышты уке гӹнят, закон ядмым йӓнгӹштӹ шыпшмы семӹнь ӹштӓт гӹнь, законышты уке гӹнят, нӹнӹ ӹшкӹлӓнӹштӹ ӹшке закон ылыт:
15 нӹнӹ законын ядмыжы шӱмешӹштӹ сирӓлтӹн манын анжыктат, тидӹм совестьӹштӹ дӓ тӧрӹш ӓль вуйнаматыш лыкшы шанымашвлӓштӓт пӓлдӹртӓт. –
16 Цилӓжӓт тӹ кечӹн лиэш, кынам Йымы эдемвлӓн шӹлтӹмӹ пӓшӓштӹм мӹньӹн увертӓрӹмӹ Пуры Увер семӹнь Иисус Христос гач суя.
17 Теве тӹнь иудей ылам манат, законлан ӹнянет дӓ Йымет улы доно хвалет,
18 закон тымдымы гӹц Йымын шанымыжым пӓлет, ма сек яжо – ынгылет.
19 Слӧпӧйӹм виден каштшы, пӹцкемӹшӹштӹ ылшывлӓлӓн соты ылам манын, тӹнь ӹнянет,
20 ынгылыдымывлӓлӓн ӹлӹмӓш корныш лыкшы, кушкын шодымывлӓлӓн тымдышы ылам, шанет, вет законышты пӓлӹмӓш дон лачокым цилӓ ужам манын ӹнянет.
21 Тӹнь, весӹм тымдышы, ӹшкӹметӹм ат тымды ма?
22 «Ит шолышт» манат, а ӹшкежӹ шолыштат? «Ит шӓхӓрлӓнӹ» маншы, шӓхӓрлӓнет? Идолвлӓ гӹц йӹрнет, а пӧртӹштӹм кравет?
23 Тӹнь, закон доно хвальышы, законым пыдыртылмет доно Йымын лӹмжӹм яктарет!
24 Сирӹмӹ семӹнь «Тӓ верцдӓ Йымын лӹмжӹ язычниквлӓ лошты мыскылалтеш».*
25 Закон семӹнь ӹлет гӹнь, пӹчмӹ овуца пайдам пуа, а тӹнь законым пыдыртылат гӹнь, пӹчмӹ овуцаэт пӹчдӹмӹ ылмы доно икток.
26 Тенгежӹ, пӹчдӹмӹ эдем законын шӱдӹмӹжӹм шоктен ӹлӓ гӹнь, тӹдӹн пӹчдӹмӹ ылмыжы пӹчмӓшеш ак шотлалт ма?
27 Сирӹмӹ законет дӓ пӹчмӓшет улы гӹнят, законым пыдыртылат гӹнь, пӹчдӹмӹ кӓпӓн, но закон семӹнь ӹштӹшӹ эдем тӹньӹм суя.
28 Иудей тӹдӹ агыл, кӱ вӹлец анжымашты иудей ылеш, пӹчмӓшӓт тӹдӹ агыл, ма кӓпӹштӹ веле каеш,
29 но тӹдӹ иудей, кӱ йӓнгжӹ доно иудей ылеш, дӓ лачокшы пӹчмӓшӓт тӹдӹ веле, кыдым законын букважы агыл, а эдемӹн шӱм кӧргӹштӹжӹ Шӱлӹш ӹштӓ. Техень эдемлӓн хвальымаш эдемвлӓ гӹц агыл, а Йымы гӹц лиэш.
*2:24 Ис 52:5.1 Тенгежӹ иудей лиӓш ма гишӓн яжорак, дӓ пӹчмӹ овуца махань пайдам пуа?
2 Цилӓ шотыштат яжожы шукы, сек пӹтӓриок тидӹ: Йымын шамакшым иудейвлӓлӓн ӹнянен пумы.
3 Ма вара? Южшы ӹнян ылделыт гӹнят, нӹнӹн ӹнян агыл ылмышты Йымын ӹнян ылмыжым укешкӹ лыктын кердеш ма?
4 Уке! Эдемвлӓ цилӓн алталышы лит гӹнят, Йымы тӧр. Сирӹмӹ:
«Тӹнь шамакетвлӓ дон тӧреш лӓктӓт,
Тӹньӹм суйымы годым сӹнгет».*
5 Мӓмнӓн тӧр агыл ӹштӹмӹнӓ Йымын тӧр ӹштӹмӹжӹм утлаок раскыдын анжыкта гӹнь, мам келесенӓ? Йымы шӹдӹм анжыктымыжы доно тӧр ак ӹштӹ манын кердӹнӓ ма? Мӹнь эдем семӹнь попем.
6 Уке! Тенге гӹнь, кыце Йымы сӓндӓлӹкӹм суя ыльы?
7 Но Йымын тӧржӹ мӹньӹн тӧр ылдымем гишӓн Тӹдӹн лӹмлештӓрӓлтмӹжӹм кӱшкӹрӓк лӱктӓлеш гӹнь, малын мӹньӹм эче сулыкан семӹнь суйымыла?
8 Пуры лижӹ манын, худам ӹштӓш тӹнгӓлӹнӓ ма? Тенге ӹштӓш тымденӓ манын, южшы мӓмнӓм мыскылат. Техень эдемвлӓм тӧр суйымаш выча.
9 Тенгежӹ мӓ, иудейвлӓ, молы халыквлӓ гӹц кӱшнӹрӓк ылына ма? Изишӓт агыл. Мӓ анжыктеннӓ: иудейвлӓӓт, эллинвлӓӓт – цилӓн сулыкын кид лӹвӓлнӹжӹ ылыт.
10
Тенге сирӹмӹ:
«Тӧр ӹштӹшӹ иктӓт уке,
11 шанен мыштышат уке,
иктӓт Йымым ак кӹчӓл.
12 Цилӓн корны гӹц карангыныт,
иктӹ дӓнгӹнь ярдымы линӹт.
Пурым ӹштӹшӹ уке, иктӓт уке.
13 Нӹнӹн логерӹштӹ – пачмы мыгилӓ,
йӹлмӹштӹ доно алталат,
тӹрвӹштӹ лӹвӓлнӹ – кӹшкӹ яд.
14 Ышмашты шудалмаш дӓ качы доно темӹн.*
15 Вӹрӹм йоктараш пӹсӹ ылыт,
16 нӹнӹ корнешӹштӹ
сӹмӹрӹмӓшӹм дӓ орлыкым кодат,
17 тыр ӹлӹмӓш корным ак пӓлеп.*
18 Сӹнзӓштӹштӹ Йымы гӹц лӱдмӓш уке».*
19 А мӓ пӓленӓ: законышты мам келесӹмӹ, тидӹ закон лӹвӓлнӹ ылшывлӓлӓн келесӹмӹ. Тенгежӹ, цилӓн ышмашты питӹрӓлтеш, улы сӓндӓлӹк Йымы анзылны вуйнаматан лиэш.
20 Вет законым шокташ цацымы доно ик эдемӓт Йымы анзылны тӧрӹш ак лӓк. Закон гач сулыкым пӓлӹмӓш веле толеш.
21 А кӹзӹт Йымы тӧржӹм закон гӹц паснаок пачын. Закон дӓ пророквлӓ ти тӧр гишӓн пӓлдӹртен попат.
22 Йымын тӧржӹ ӹнянӹшӹ цилӓ эдемӹн кӧргӹштӹжӹ Иисус Христослан ӹнянӹмӹ гач лиэш, эдемвлӓ лошты айыртем уке,
23 вет цилӓн сулыкым ӹштенӹт дӓ Йымын лӹмлештӓрӓлтмӹжӹ гӹц пасна кодыныт,
24 но Христос Иисусын сылен нӓлмӹжӹ гач Йымын благодатьшы верц цилӓн йӓрӓок тӧрӹш лӓктӹт.
26 (25-27) Христосым Йымы пуремдӹмӹ жертвеш пуэн, пуремдӹмӓш ӹнянӹмӓш гач Тӹдӹн Вӹржӹ доно лиэш. Шукы тырхымыжы доно Йымы эдемвлӓн первишӹ сулыкыштым шотыш нӓлде, тенге ӹшкӹмжӹн тӧржӹм анжыктен дӓ кӹзӹтшӹ жепӹнӓт анжыкта: Тӹдӹ Ӹшкежӹ тӧр ылеш дӓ Иисуслан ӹнянӹшӹвлӓм тӧрӹш лыктеш.
27 Тенгежӹ, ма доно мӓ когоэшнен кердӹнӓ? Когоэшнӓш вирнӓ уке. Махань закон доно? Ӹштӹмӹнӓм тергӹшӹ закон доно ма? Агыл, ӹнянӹмӓшнӓм тергӹшӹ закон доно.
28 Мӓ тенге шотленӓ: эдемӹм ӹнянӹмӓшӹжӹ тӧрӹш лыктеш, закон семӹнь ӹштӹмӓш тиштӹ шотыш ак нӓлӓлт.
29 Йымыжы иудейвлӓн веле Йымышты ылеш ма? Тӹдӹ язычниквлӓнӓт Йымышты агыл ма? Ане, язычниквлӓнӓт Йымышты,
30 вет Йымы иктӹ, Тӹдӹ пӹчмӓнвлӓмӓт ӹнянӹмӹштӹ гишӓн тӧрӹш лыктеш, пӹчдӹмӹвлӓмӓт Христослан ӹнянӹмӹштӹ гач тӧрӹш лыктеш.
31 Тенгежӹ, ӹнянӹмӓш доно мӓ законым укешкӹ лыктына ма? Агыл. Законым пингӹдемденӓ веле.
*3:4 Пс 50:6. *3:10-14 Пс 13:1-3, 52:2-4, 5:10, 139:3, 9:28. *3:15-17 Ис 59:7-8. *3:18 Пс 35:2. Тидӹм «Йымы гӹц ак лӱдеп» манынат сӓрӓш лиэш».1 Тенгежӹ, Авраам ӓтянӓ гишӓн мам келесен кердӹнӓ? Ӹшке пӓшӓжӹ доно тӹдӹ кышкы шон?
2 Авраамым пӓшӓжӹ гишӓн тӧрӹш лыкмы ылгецӹ, тӹдӹ когоэшнен кердеш ыльы, но Йымы анзылны агыл.
3 Писани мам попа? «Авраам Йымылан ӹнянен, седӹндон Йымы тӹдӹм тӧр ӹштӹшеш шотлен».*
4 Пӓшӓм ӹштӹшӹ пӓшӓдӓрӹм сылен нӓлеш, тидӹ жӓлӓен пумы подарка агыл.
5 Но кӱ пӓшӓм ак ӹштӹ, а тӧр агыл ӹштӹшӹвлӓм тӧрӹш Лыкшылан ӹнянӓ, тӹдӹ ӹнянӹмӓшӹжӹ гишӓн тӧр ӹштӹшеш шотлалтеш.
6 Кӱм Йымы, пӓшӓжӹм анжыде, тӧр ӹштӹшеш шотла, техеньӹм Давидӓт «когон цӓшӓн ылеш» манеш:
7
«Кӱн худа пӓшӓжӹм Йымы простен
дӓ кӱн сулыкшым леведӹн, тӹдӹ когон цӓшӓн.
8 Кӱлӓн Йымы сулыкым ак шотлы,
тӹ эдем когон цӓшӓн».*
9 Когон цӓшӓн манмыжы пӹчмӓнвлӓ гишӓн веле ма ӓль пӹчдӹмӹвлӓ гишӓнӓт? Мӓ попенӓ: «Ӹнянӹмӹжӹ гишӓн Авраам тӧр ӹштӹшеш шотлымы лин».
10 А кынам тидӹ лин? Пӹчмӹ овуцам эртӓрӹмӹкӹ ӓль пӹчмӹ овуца гӹц анзыц? Пӹчмӹ овуцам эртӓрӹмӹкӹ агыл, а пӹчмӹ овуца гӹц анзыц.
11 Авраам пӹчдӹмӹ ылмыжы годымок ӹнянӹмӹжӹ гишӓн тӧр ӹштӹшӹ ылын, тидӹм анжыкташ тӹдӹ пӹчмӓш пӓлӹкӹм нӓлӹн. Тенге Авраам пӹчдӹмӹ, но ӹнянӹшӹ дӓ тидӹ гишӓн тӧр ӹштӹшеш шотлалтшы цилӓ эдемвлӓлӓн ӓтяштӹ лин.
12 Тӹдӹ пӹчмӓнвлӓлӓнӓт ӓтя ылеш, но цилӓштӹлӓн агыл, а Авраамын пӹчмӹ гӹц анзыцок ӹнянӹмӹжӹ семӹнь ӹнянӹшӹ пӹчмӓнвлӓлӓн веле.
13 Сӓндӓлӹкӹн наследникшӹ лиӓш сӧрӹмӓш Авраамлан дӓ тӹдӹн йыхшылан закон гач агыл пуалтын. Авраам ӹнянен, седӹндон Йымы тӹдӹм тӧр ӹштӹшеш шотлен дӓ сӧрӹмӓшӹм пуэн.
14 Закон семӹнь ӹштӹшӹвлӓ наследник лит гӹнь, ӹнянӹмӓш укешкӹ лӓктеш дӓ сӧрӹмӹн силажы пӹтӓ.
15 Закон Йымын шӹдӹжӹм лыктеш, а кышты закон уке, тӹштӹ законым пыдыртымашат уке.
17 (16-17) Сӧрӹмӓш Йымын пурыжы гӹц лӓкшӹ манын, тӹдӹн негӹцшӹ ӹнянӹмӓш ылеш. Тенгежӹ, Йымын сӧрӹмӓш Авраамын улы йыхшылан пингӹдӹ лиэш: закон семӹнь ӹштӹшӹлӓн веле агыл, а Авраамын ӹнянӹмӓшӹжӹм кычышыланат. Вет сирӹмӹ семӹнь тӹдӹ цилӓлӓннӓ ӓтя ылеш: «Мӹнь тӹньӹм шукы халыкын ӓтяжӹм ӹштенӓм». Авраам Йымылан ӹнянен дӓ Тӹдӹ анзылны мӓлӓннӓ ӓтя лин, а Йымы колышывлӓлӓн ӹлӹмӓшӹм пуа, ылдымым ылмашкы ӱжеш.
18 Нимахань уанымаш ылде гӹнят, Авраам уанымаш доно ӹнянен, тенге «Тӹньӹн йыхет техень кого лиэш»* манын келесӹмӹ семӹнь шукы халыкын ӓтяжӹ лин.
19 Авраамлан шӱдӹ и нӓрӹ ылын, кӓпшӓт кошкен, Сарранат кӧргӹжӹ кошкен. Цилӓ тидӹм ужын гӹнят, ӹнянӹмӓшӹжӹ изиэмде.
20 Йымын сӧрӹмӹжӹ гишӓн Авраам коктешлӓнӹде, ӹнянӹмӓшӹм ямдыде, а ӹнянӹмӓш тӹдӹм пингӹдемден. Авраам Йымым лӹмлештӓрен,
21 Йымын ӹшке сӧрӹмӹжӹм шокташ силажы улы манын, пингӹдӹн ӹнянен,
22 седӹндонок Йымы тӹдӹм тӧр ӹштӹшеш шотлен.
24 (23-24) «Тӧр ӹштӹшеш шотлен» манмы шамак тӹдӹ гишӓн веле агыл, а мӓ гишӓннӓӓт сирӹмӹ ылеш. Мӓӓт, Господьна Иисус [Христосым] колымаш гӹц Ӹлӹжтӹшӹлӓн ӹнянӹшӹвлӓ, тӧр ӹштӹшеш шотлалташ тӹнгӓлӹнӓ.
25 Мӓмнӓн сулыквлӓнӓ гишӓн Иисусым пушташ пумы, мӓлӓннӓ тӧрӹш лӓктӓш манын, Тӹдӹ ӹлӹж кӹньӹлӹн.
*4:3 Быт 15:6. *4:7-8 Пс 31:1-2. *4:18 Быт 15:5.1 Тенгежӹ, ӹнянӹмӓш доно тӧрӹш лӓкмӹкӹ, мӓмнӓн Господь Иисус Христос гач Йымы дон мӓ лоштына тыр улы.
2 Ӹнянӹмӹнӓ гишӓн Христос мӓлӓннӓ благодать докы корным пачын, мӓ благодатьышты ылына дӓ, Йымы сага лӹмлештӓрӓлтмӹлӓн уанен, ӹвӹртенӓ.
3 Тидӹ гишӓн веле агыл, парвалымына гишӓнӓт ӹвӹртенӓ. Мӓ пӓленӓ, парвалымы гӹц цӹтӹмӓш лӓктеш,
4 цӹтӹмӓш гӹц – тергӹмӹм эртен кердмӓш, тергӹмӹм эртен кердмӹ гӹц – уанымаш.
5 Уанымаш намысыш ак пырты, вет Йымын яратымашыжы мӓлӓннӓ пумы Святой Шӱлӹш гач шӱмӹшкӹнӓ опталалтын.
6 Кынам мӓ эче силадымы ылынна, пӓлдӹртӹмӹ жепӹн Христос мӓ верцнӓ, сулыканвлӓ верц, колен.
7 Тӧр ӹштӹшӹ верц иктӓжӹ колынежӹ ма. Пуры эдем верц, ӓнят, иктӓжӹ колаш смеен кердеш.
8 Но Христос эче сулыкан ылмына годымок мӓ верцнӓ колен, тенге Йымы мӓ докына яратымашыжым анжыкта.
9 Христосын Вӹржӹ доно мӓ тӧрӹш лӓктӹннӓ гӹнь, кӹзӹт Тӹдӹ Йымын шӹдӹжӹ гӹц лачокок мӓмнӓм ытара.
10 Эче Йымын тышманжы ылмына годымок Эргӹжӹн колымыжы Тӹдӹн доно мӓмнӓм пуремден гӹнь, ӹнде, пуреммӹ паштек, Эргӹжӹн ӹлӹмӓшӹжӹ гач ытаралтына.
11 Тидӹ веле агыл, мӓмнӓм кӹзӹт пуремдӹшӹ Иисус Христос Господьна гач мӓ Йымы доно когоэшненӓ.
12 Тенгежӹ, сулык ик эдем гач сӓндӓлӹкӹш толын, а сулык гач – колымаш, дӓ колымаш цилӓ эдем йыхыш ванжен, вет цилӓнок сулыкым ӹштенӹт.
13 Закон лӓкмешкӓт, сӓндӓлӹкӹштӹ сулык ылын, но закон уке гӹнь, сулык шотыш ак нӓлӓлт.
14 Тенге гӹнят, Адамын гань сулыкым ӹштӹдӹмӹвлӓ вӹлнӓт колымаш хозаланен. Адам гӹц тӹнгӓлӹн Моисей якте тенге ылын. Толшашлык Эдемӹн сӹнжӹ Адам ылын.
15 Но Йымын подаркажым Адамын сулыкшы доно тӓнгӓштӓрӓшӓт ак ли. Вет ик эдемӹн сулыкшы гишӓн шукын коленӹт гӹнят, ик Эдемӹн, Иисус Христосын, благодатьшы гишӓн Йымын благодатьшы дӓ подаркажы шукы эдемлӓн эчеӓт утларак линӹт.
16 А Йымын пумы подаркажым тӹ ик эдемӹн сулыкшы кышкы шоктымы доно тӓнгӓштӓрӓш ак ли: ик сулык гишӓн суд дӓ вуйнаматыш лыкмаш лиэш, а Йымын подаркажы верц шукы сулык гӹц тӧрӹш лыкмаш лиэш.
17 Иктӹн сулыкшы гишӓн колымаш тӹ ик эдем гач хозаланаш тӹнгӓлӹн гӹнь, Йымын кого благодатьшым дӓ тӧрӹш лыкмаш подаркажым нӓлшӹвлӓ лачокок ик Эдем, Иисус Христос, гач ӹлӹмӓшӹштӹ кугижӓлӓнӓш тӹнгӓлӹт.
18 Тенге, кыце ик эдемӹн сулыкшы гишӓн цилӓ эдем вуйнаматыш лӓктеш, тенгеок ик Эдемӹн тӧр пӓшӓжӹ цилӓ эдемӹм тӧрӹш лыктеш дӓ ӹлӹмӓшӹм пуа.
19 Кыце ик эдемӹн шамак колыштдымыжы шукым сулыканым ӹштен, тенгеок Иктӹн шамак колыштмыжы шукым тӧрӹш лыктеш.
20 Сулык шукемжӹ манын, закон лӓктӹн. А кышты сулык шукемӹн, тӹштӹ Йымын благодатьшат пиш шукы лин.
21 Кыце сулык хозаланен дӓ колымашкы канден, тенгеок Йымын благодатьшат тӧр ӹштӹмӓш гач хозаланаш тӹнгӓлеш дӓ мӓмнӓн Господьна Иисус Христос гач курымаш ӹлӹмӓшӹш нӓнгеӓ.
1 Мам келесенӓ? Йымын благодатьшы шукемжӹ манын, мӓлӓннӓ сулыкеш кодмыла ма? Уке.
2 Мӓ сулыклан коленнӓ, кыце эче сулыкышты ӹлен кердӹнӓ?
3 Ада пӓлӹ ма: мӓ цилӓн, Христос Иисус доно ушнаш крестӓлтшӹвлӓ, Тӹдӹн колымашыжы доно ушнаш крестӓлтӹннӓ?
4 Тенге, мӓ Тӹдӹн колымашкыжы ушнаш манын крестӓлтмӹ гач Христос доно иквӓреш тайымы линнӓ: кыце Христос колымаш гӹц Ӓтян лӹмлештӓрӓлтмӹжӹ доно ӹлӹж кӹньӹлӹн, тенгеок мӓӓт уэмдӹмӹ ӹлӹмӓшӹм ӹлӹшӓшлык ылына.
5 Мӓ икань колымаш доно Тӹдӹн доно ушненнӓ гӹнь, икань ӹлӹжмӓш донат Тӹдӹн доно ушымы линӓ.
6 Мӓ пӓленӓ: мӓлӓннӓ ӹнде сулыкын тӓрзӹжӹ лиӓш агыл дӓ сулыкан кӓпӹм* укешкӹ лыкташ манын, «первишӹ эдемнӓм» Христос доно иквӓреш крестеш пыдалымы.
7 Вет колышы эдем сулык гӹц ирӹкӓн лин.
8 А мӓ Христос доно иквӓреш коленнӓ гӹнь, Тӹдӹн доно иквӓреш ӹлӓшӓт тӹнгӓлӹнӓ манын ӹняненӓ.
9 Мӓ пӓленӓ: Христос колымаш гӹц ӹлӹжӹн, дӓ Тӹдӹ ӹнде ак колы, вӹлнӹжӹ ӹнде колымашын властьшы уке.
10 Кынам колен – сулыклан ик гӓнӓ соэшок колен, кынам ӹлӓ – Йымылан ӹлӓ.
11 Тенгеок тӓӓт ӹшкӹмдӓм сулыклан колышеш, а мӓмнӓн Господьна Иисус Христос доно ушнымашты Йымылан ӹлӹшеш шотлыда.
12 Тенгежӹ, колышашлык кӓпӹштӹдӓ сулык ӹнжӹ хозаланы дӓ кӓпдӓн кымылжым колышташ тӓмдӓм ӹнжӹ шыпш.
13 Кид-ялдам тӧр агылын хӓдӹрвлӓэш сулыклан идӓ пу, а колымаш гӹц ӹлӹмӓшӹшкӹ ванжендӓ гӹнь, ӹшкӹмдӓм Йымылан пуда, кид-ялдамат тӧрӹн хӓдӹрвлӓэш Йымылан пуда.
14 Сулык хозада ӹнжӹ ли, вет тӓ закон кид лӹвӓлнӹ агыл, а Йымын благодатьшы лӹвӓлнӹ ылыда.
15 Тенгежӹ, закон кид лӹвӓлнӹ агыл, а Йымын благодатьшы лӹвӓлнӹ ылына гӹнь, сулыкым ӹштӓш тӹнгӓлӹнӓ ма? Уке.
16 Ада пӓлӹ ма: кӱлӓн тӓ ӹшкӹмдӓм цора семӹнь колышташ пуэдӓ, тӹдӹнок цоражы ылыда? Ӓль тӓ сулыкым колыштыда, тидӹжӹ колымашкы нӓнгеӓ, ӓль Йымым колыштыда, тидӹжӹ тӧрӹш лӓкмӓшкӹ нӓнгеӓ.
17 Тӓ андак сулыкын тӓрзӹжӹ ылында, но, Йымылан тау, тӓлӓндӓ махань тымдымашым колышташ пумы, тӹдӹм йӓнг вашт кӹзӹт колышташ тӹнгӓлӹндӓ.
18 Сулык гӹц ирӹкӹш лӓкмӹкӹ, тӓ тӧр ӹштӹмӹн цоражы линдӓ.
19 Тӓ цилӓ эдем гань силадымы ылыда, седӹндон ынгылаш лимӹ шамаквлӓ доно тӓлӓндӓ попем. Кыце тӓ андак кид-ялдам махань-шон худа пӓшӓм ӹштӓш ярдымашлан дӓ законым пыдыртымашлан тӓрзеш пуэндӓ, тенгеок, святой лиӓш манын, кид-ялдам ӹнде тӧр ӹштӹмӓшлӓн служаш пуда.
20 Кынам тӓ сулыкын тӓрзӹжӹ ылында, тӧр ӹштӹмӹ гӹц ирӹкӓн ылында.
21 Тӹнӓм тӓ махань кӹцкӹм нӓлӹндӓ? Маханьым нӓлмӹдӓ гӹц ӹнде намысланедӓ, вет тӹдӹ колымашкы канда.
22 А кӹзӹт, сулык гӹц ирӹкӹш лӓкмӹкӹ дӓ Йымын цоражы лимӹкӹ, святой ӹлӹмӓшӹш нӓнгешӹ кӹцкӹдӓ улы, тӹдӹ курымаш ӹлӹмӓшкӹ канда.
23 Вет сулыкын тӓржӹ – колымаш, а Йымын подаркажы – мӓмнӓн Господьна Иисус Христос сага нӓлмӹ курымаш ӹлӹмӓш.
*6:6 «Сулыкан кӓп»: греклӓ «сулыкын кӓпшӹ», тидӹм «сулыкан ылмынам» манын ынгылымыла.1 Шӱмбелвлӓ, – мӹнь кӹзӹт законым пӓлӹшӹвлӓлӓн попем, – эдемӹн ӹлӹмӹжӹ годым веле вӹлнӹжӹ законын силажы ылмым ада пӓлӹ ма?
2 Марлан кешӹ ӹдӹрӓмӓш марыжын ӹлӹмӹжӹ годым закон семӹнь тӹдӹн доно кӹлдӓлтӹн. А марыжы кола гӹнь, марыжы доно тӹдӹм кӹлдӹшӹ закон гӹц ирӹкӓн лиэш.
3 Тенгежӹ, марыжы ӹлӹмӹ годым весӹ доно ӹлӓ гӹнь, шӓхӓрлӓнӹшеш шотлалтеш, но, марыжы колымыкы, ти закон гӹц тӹдӹ ирӹкӓн лиэш, весӹлӓн марлан кеӓ гӹнят, ак шӓхӓрлӓнӹ.
4 Тӓӓт тенгеок, шӱмбелемвлӓ: весӹн, колымаш гӹц Ӹлӹжшӹн, лиӓш манын, тӓӓт Христосын кӓпшӹ доно законлан колендӓ. Тенге мӓ цилӓн Йымылан кӹцкӹм канденӓ.
5 Кӓпнӓ дӓ йӓнгнӓ ядмы семӹнь ӹлӹмӹнӓ годым закон тӓрвӓтӹмӹ сулыкан кымыл кӓпӹштӹнӓ пӓшӓм ӹштен, дӓ мӓ колымашлан кӹцкӹм канденнӓ.
6 Кӹзӹт мӓ ти закон гӹц ирӹкӓн ылына, ма мӓмнӓм кычен, тӹдӹлӓн коленнӓ, тенгежӹ мӓ законын первишӹ букважы семӹнь агыл, а Шӱлӹш уэмдӹмӹ семӹнь Йымылан служенӓ.
7 Мам келесенӓ? Закон – сулык ма? Агыл. Тенге гӹнят, закон ак ли ылгецӹ, ма техень сулык, мӹнь ам пӓлӹ ыльы. Закон «Ит шыкланы»* манын ак попы ылгецӹ, ма техень сулыкан шыкланымаш, мӹнь ам пӓлӹ ыльы.
8 Но законыштышы шӱдӹмӓш гӹц вирӹм нӓлӹн, сулык кӧргӹштем махань-шон шыкланымашым шачыктен, вет закон гӹц пасна сулык – колышы.
9 Мӹнь андак закондеок ӹленӓм, но кынам законыштышы шӱдӹмӓш пуалтын, сулык ӹлӹжӹн,
10 а мӹнь коленӓм. Тенге ӹлӹмӓшӹм кандышашлык шӱдӹмӓш мӹлӓм колымашым канден.
11 Сулык, законыштышы шӱдӹмӓш гӹц вирӹм нӓлӹн, мӹньӹм алтален дӓ ти шӱдӹмӓш доно пӹтӓрен.
12 Тенгежӹ, закон святой, шӱдӹмӓшӓт святой, тӧр дӓ пуры.
13 Тенгежӹ ти пурыжы мӹлӓнем колымашым канден ма? Уке. Но сулык, лачокок сулыкан ылмыжы пӓлдӹрнӹжӹ манын, пуры гач мӹлӓм колымашым канден, дӓ законыштышы шӱдӹмӓш гач сулык чотымаш кого сулыкан лин.
14 Мӓ пӓленӓ, закон – Йымын Шӱлӹш гӹц, а мӹнь кӓпӓн ылам, сулыкын кид лӹвӓкӹжӹ выжалымы.
15 Мам ӹштӹмем ам ынгылы: мам ӹштӹнем, тӹдӹм ам ӹштӹ, а мам анжалмемӓт ак шо, тӹдӹм ӹштем.
16 Мам мӹнь ӹнем ӹштӹ, тӹдӹм ӹштем гӹнь, закон пуры ылеш манын ярыктем.
17 Тенгежӹ ӹнде тидӹм мӹнь агыл, а кӧргӹштем ӹлӹшӹ сулык ӹштӓ.
18 Мӹнь пӓлем: мӹнь донем, вес семӹньжӹ кӓп дон йӓнгӹштем, нимахань пурат ак ӹлӹ. Мӹнь пурым ӹштӹнем, но тӹдӹм ӹштен ам керд.
19 Махань пурым ӹштӹнем, тӹдӹм ам ӹштӹ, но махань худам ӹнем ӹштӹ, тӹдӹм ӹштем.
20 А мам мӹнь ӹнем ӹштӹ, тӹдӹм ӹштем гӹнь, ӹнде тидӹм мӹнь ӹшке агыл, кӧргӹштем ӹлӹшӹ сулык ӹштӓ.
21 Тенге, мӹнь техень законым пӓлен нӓлӹнӓм: кынам мӹнь пурым ӹштӹнем, ярдымы пӓшӓ лӓктеш.
22 Кӧргӹштем мӹнь Йымын законлан сусу лиӓм,
23 но кӓпӹштем вес законым ужам. Ышем доно яжоэш шотлымы закон ваштареш ти закон кредӓлеш дӓ кӓпӹштем ӹлӹшӹ сулыкын законышкыжы мӹньӹм питӹрӓ.
24 Махань цӓшдӹмӹ эдем мӹнь ылам! Колымашын кид лӹвӓлнӹжӹ ылшы кӓпем гӹц кӱ мӹньӹм ытара?
25 Мӓмнӓн Господьна Иисус Христос гач Йымылан таум ӹштем! Тенгежӹ, мӹнь ышем доно Йымын законжылан служем, а кӓпем доно сулыкын законжын тӓрзӹжӹ ылам.
*7:7 Исх 20:171 Тенге, кӱвлӓ Христос Иисус доно ушнен шалгат дӓ кӓп дон йӓнгӹн ядмышты семӹнь агыл, а Йымын Шӱлӹш ядмы семӹнь ӹлӓт, ӹнде нӹнӹлӓн нимахань суйымашат ак ли.
2 Христос Иисус гач ӹлӹмӓшӹм пушы Шӱлӹшӹн законжы мӹньӹм сулыкын дӓ колымашын законышты гӹц ытарен.
3
4 (3-4) Эдемӹн кӓпшӹ дӓ йӓнгжӹ силадымы ылмышты гишӓн мам закон ӹштен кердде, Йымы тӹдӹм ӹштен: законын ядмыжы мӓмнӓн, кӓп дон йӓнг ядмы семӹнь агыл, а Шӱлӹш ядмы семӹнь ӹштӹшӹвлӓн, ӹлӹмӓшӹштӹнӓ шокталтшы манын, сулык верц Тӹдӹ Ӹшке Эргӹжӹм сулыкан эдем ганьым колтен дӓ ти эдем кӓп доно сулыкым суен.
5 Кӓп дон йӓнг ядмы семӹнь ӹлӹшӹвлӓ кӓп дон йӓнг доно кӹлдӓлтшӹ гишӓн веле шанат, а Шӱлӹш ядмы семӹнь ӹлӹшӹвлӓ – Шӱлӹш доно кӹлдӓлтшӹ гишӓн.
6 Кӓп дон йӓнгӹн шанымышты – колымаш, а Шӱлӹшӹн шанымыжы – ӹлӹмӓш дӓ тыр.
7 Кӓп дон йӓнгӹн шанымышты Йымы ваштареш тышманланымаш ылеш, вет техень шанымаш Йымын законым ак колышт дӓ колыштшат ак керд.
8 Кӓп дон йӓнг ядмы семӹнь ӹлӹшӹвлӓ Йымылан ярал лин ак кердеп.
9 А Йымын Шӱлӹш кӧргӹштӹдӓ ӹлӓ гӹнь, тӓ кӓп дон йӓнг тергӹмӹ семӹнь агыл, а Шӱлӹш тергӹмӹ семӹнь ӹледӓ. А кӱн кӧргӹштӹжӹ Христосын Шӱлӹшӹжӹ уке, тӹдӹ Христосын агыл.
10 Кӧргӹштӹдӓ Христос улы гӹнь, кӓпдӓ сулык гишӓн колышашлык ылеш, а тӧрӹш лӓкмӹдӓ гишӓн Шӱлӹш тӓлӓндӓ ӹлӹмӓшӹм пуа.*
11 Иисусым колымаш гӹц Ӹлӹжтӹшӹн Шӱлӹшӹжӹ кӧргӹштӹдӓ ӹлӓ гӹнь, Христосым колымаш гӹц Ӹлӹжтӹшӹ кӧргӹштӹдӓ ӹлӹшӹ Шӱлӹшӹжӹ доно тӓмдӓнӓт колышашлык кӓпдӓм ӹлӹшӹм ӹштӓ.
12 Тенге гӹнь, шӱмбелвлӓ, кӓп дон йӓнглӓн агыл мӓмнӓн кӱсӹнӓ улы: мӓ кӓп дон йӓнгӹн тергӹмӹштӹ семӹнь ӹлӹшӓшлык ана ыл.
13 Вет кӓп дон йӓнг ядмы семӹнь ӹледӓ гӹнь, тӓмдӓм колымаш выча, а кӓп дон йӓнгӹн ӹштӹмӹштӹм Шӱлӹш доно цӹлт пӹтӓредӓ гӹнь, ӹлӓш тӹнгӓлӹдӓ.
14 Кӱм Йымын Шӱлӹш видӓ, цилӓн Йымын эргӹжӹ ылыт.
15 Вет пакылаат лӱдӹн ӹлӓш манын, тӓ раб шӱлӹшӹм нӓлделда, а эргӹлыкеш пыртымаш Шӱлӹшӹм нӓлӹндӓ, Тӹдӹн доно мӓ «Авва, Ӓти!» манын ӱжӹнӓ.
16 Йымын тетявлӓжӹ ылмына гишӓн Йымын Шӱлӹш Ӹшкеок мӓмнӓн шӱм шӱлӹшнӓ доно* пӓлдӹртен попа.
17 Тетявлӓжӹ ылына гӹнь, тенгежӹ наследникӓт ылына, Христос доно иквӓреш Йымын наследникшӹ ылына. Мӓ Христос доно иквӓреш парваленӓ гӹнь, Тӹдӹн доно иквӓрешок лӹмлештӓрӓлтӹнӓ.
18 Мӹнь шанем: мӓмнӓн ӹлӹмӓшӹштӹнӓ пачылтшашлык лӹмлештӓрӓлтмӓш доно тӓнгӓштӓренӓ гӹнь, кӹзӹтшӹ веремӓн парвалымаш – нимат агыл.
19 Йымы ӹштӹмӹ улы сӓндӓлӹк Тӹдӹн эргӹвлӓжӹм пачын анжыктымым уанен выча,
21 (20-21) вет сӓндӓлӹк акелӹн кид лӹвӓлнӹ ылеш. Тидӹжӹ ӹшке кымыл доно агыл, а кид лӹвӓкӹ нӓлшӹ гишӓн лин. Шӱмӓшӹн рабствыжы гӹц Йымын тетявлӓжӹн ирӹкӹшкӹ дӓ лӹмлештӓрӓлтмӓшкӹ лыкмы лиӓм манын, Йымы ӹштӹмӹ сӓндӓлӹк ӹшкежӓт уана.
22 Мӓ пӓленӓ, Йымы ӹштӹмӹ улы сӓндӓлӹк кӹзӹт яктеӓт кичкӹжеш дӓ парвала.
23 Тӹдӹ веле агыл парвала, а мӓӓт, пӹтӓришӹ подарка семӹнь Йымын Шӱлӹшӹм нӓлшӹвлӓ, эргӹлыкеш пыртымым, кӓпнӓм сылен нӓлмӹм вычен, кӧргӹштӹнӓ кичкӹжӹнӓ.
24 Вет уанымаш доно мӓ ытарымы линнӓ, а уанымашын шокталтмыжы каеш гӹнь, уанен вычымаш уке. Ма сӹнзӓ анзылны каеш, кӱ тӹдӹм уанен выча?
25 Но мам ана уж, тӹдӹм уанен выченӓ гӹнь, тырхен выченӓ.
26 Шӱлӹшӓт мӓлӓннӓ, силадымывлӓлӓн, палша, вет ма гишӓн дӓ кыце ыдылмыла, мӓ ана пӓлӹ. Шӱлӹш Ӹшкеок шамак доно келесӓш лидӹмӹ шӱлӓлтӹш доно мӓ верцнӓ сарвала.
27 Шӱлӹшӹн шанымыжым йӓнгнӓм тергӹшӹ Йымы пӓлӓ, вет Шӱлӹш святойвлӓ верц Йымын ирӹкшӹ семӹнь сарвала.
28 Мӓ пӓленӓ: кӱ Йымым ярата дӓ кӱм Тӹдӹ ӹшке ирӹкшӹ* доно ӱжӹн, нӹнӹлӓн цилӓ пуреш лиэш.
29 Эргӹжӹ шукы шӱмбел лошты пӹтӓришӹ шачшы лижӹ манын, андакок пӓлӹмӹ эдемвлӓжӹм Йымы Ӹшкӹмжӹн Эргӹжӹ гань лиӓш анзыцок айырен.
30 А кӱм Йымы андакок айырен, нӹнӹмок ӱжӹн, кӱм ӱжӹн, нӹнӹмок тӧрӹш лыктын; а кӱм тӧрӹш лыктын, лӹмлештӓрӓлтмӹжӹм нӹнӹлӓнок пуэн.
31 Мӓ тидӹлӓн мам келесенӓ? Йымы мӓ верцнӓ гӹнь, кӱ мӓ ваштарешнӓ лиэш?
32 Тӹдӹ ӹшке Эргӹжӹмӓт жӓлӓйӹде, а цилӓнӓ верц пуэн гӹнь, Тӹдӹн доно иквӓреш мӓлӓннӓ цилӓ молымат ак подары ма?
33 Йымын айырен нӓлмӹвлӓм кӱ йӓтлен кердеш? Нӹнӹм Йымы тӧрӹш лыктеш!
34 Кӱ суен кердеш? Христос Иисус, Тӹдӹ колен, но ӹлӹжӹн. Тӹдок Йымын вургымла велнӹжӹ шӹнзӓ дӓ мӓ верцнӓ сарвала!
35 Йымын яратымашыжы гӹц кӱ мӓмнӓм карангден кердеш? Парвалымаш ӓль ясыланымаш, поктылмаш ӓль шужымаш, выргем ситӹдӹмӓш ӓль эксӹк, ӓль меч? Тенге сирӹмӹ:
36
«Тӹнь гишӓнет кечӹньок мӓмнӓм пуштыт,
шӹшкӹлшӓшлык шарык шотеш мӓмнӓм шотлат».*
37 Но мӓмнӓм Яратышы доно мӓ цилӓ годымок сӹнгӹшеш лӓктӹнӓ.
39 (38-39) Вет мӹнь ӹнянем: колымашат, ӹлӹмӓшӓт, Ангелвлӓӓт, Тӹнгӓлтӹшвлӓӓт, Силавлӓӓт, кӹзӹтшӓт, анзыкылашат, кӱкшӹцӓт, келгӹцӓт – Йымы ӹштӹмӹ нимат Господьна Иисус Христос гач Йымын мӓлӓннӓ анжыктымы яратымашыжы гӹц мӓмнӓм айырен ак керд.
*8:10 «Шӱлӹш тӓлӓндӓ ӹлӹмӓшӹм пуа»: тидӹм «шӱм шӱлӹшдӓ ӹлӹшӹ ылеш» манынат сӓрӓш лиэш. *8:16 «Шӱм шӱлӹшнӓ доно»: тидӹм «шӱм шӱлӹшлӓннӓ» манынат ынгылаш лиэш. *8:27-28 Ирӹк – воля, желание. *8:36 Пс 43:231 Мӹнь, Христос доно ушнен, лачокым попем, ам алталы, Йымын Шӱлӹш виктӓрӹмӹ совестемӓт мӹлӓнем тидӹмок анжыкта:
2 мӹньӹн кого ойхы, йӓнг ясем ак пӹтӹ.
3 Вет туан халыкемӹн эдемвлӓжӹ вӓреш мӹнь ӹшке Христос гӹц карангдымы линем ылнежӹ.
4 Нӹнӹ Израиль халык ылыт: нӹнӹм Йымы эргӹлыкеш нӓлӹн, Тӹдӹн лӹмлештӓрӓлтмӹжӹ дӓ согоньвлӓ – нӹнӹн; законым, службым эртӓрӹмӹм, Йымын сӧрӹмӓшвлӓжӹм нӹнӹлӓн пумы.
5 Нӹнӹ кого ӓтявлӓнӓн шачышышты ылыт, нӹнӹ гӹцок Христос кӓпшӹ доно шачын, цилӓ вӹлнӹ Тӹдӹ Йымы ылеш. Тӹдӹ курымеш лӹмлештӓрӓлтшӹ! Аминь.
6 Тенге гӹнят Йымын сӧрӹмӹжӹ силажым ямдыде. Вет Израиль шачыш гӹц ылшывлӓ цилӓнок израильтян агылеп.
7 Авраамын вырлыкшы гӹц шачшывлӓ цилӓнок тӹдӹн тетявлӓжӹ агылеп. Йымы тӹдӹлӓн келесен: «Тӹньӹн йыхет Исаак гач пакыла шӓрлӓ».*
8 Вес семӹньжӹ, кӓп гӹц шачшывлӓ агыл Йымын тетявлӓжӹ ылыт, а Йымы сӧрӹмӹ доно шачшывлӓ веле йыхешӹжӹ шотлалтыт.
9 А сӧрӹмӹ шамакшы техеньӹ: «Пӓлдӹртӹмӹ жепӹн мӹнь пӧртӹлӓм, тӹнӓм Сарран эргӹжӹ лиэш».*
10 Но тидӹ цилӓ агыл, эче Ревекка ылын, тӹдӹ ик пӱэргӹ гӹц – мӓмнӓн Исаак ӓтянӓ гӹц – мӹшкӹрӓн лин.
12 (11-12) Йӹгӹр эргӹ шачмешкок, нӹнӹн иктӓ-мам яжом ӓль худам ӹштӹмӹштӹ якте, Ревеккалан келесӹмӹ ылын: «Когорак эргӹц изирӓкшӹн тӓрзӹжӹ лиэш». Йымын айырен нӓлмӓшеш негӹцлӓлтшӹ шанымашыжы силажым ӹнжӹ ямды манын, Тӹдӹ тидӹм келесен – цилӓ тидӹжӹ эдемӹн пӓшӓжӹ гӹц агыл, а Ӱжшӹ гӹц.*
13 Тенге сирӹмӹ: «Иаковым Мӹнь яратенӓм, а Исавым ужмемӓт шоде».*
14 Мам келесенӓ? Йымы, ӓнят, тӧр ак ӹштӹ? Уке.
15 Вет Моисейлӓн Тӹдӹ попен:
«Кӱлӓн пурым ӹштӹнем, тӹдӹлӓн пурым ӹштем,
кӱм жӓлӓйӹнем, тӹдӹм жӓлӓем».*
16 Тенге, тидӹ эдем шанымы дӓ цацымы доно агыл, а Йымын жӓлӓйӹмӹжӹ доно лиэш.
17 Писаништӹ Йымы фараонлан тенге попа: «Тӹнь гачет силаэм анжыкташ дӓ цилӓ мӱлӓндӹ мычкы лӹмем увертӓрен шӓрӓш манын, Мӹнь тӹньӹм кӱшкӹ лӱктӓлӹнӓм».*
18 Тенге, Йымы, кӱм шана, жӓлӓйӓ, кӱм шана, йӓнгжӹм кӱӓнгдӓ.
19 Ӹнде тӹнь мӹнь гӹцем ядат: «Малын вара Йымы мӓмнӓм йӓтлӓ? Тӹдӹн ӹштӓш шанымыжы ваштареш иктӓжӹ шагал кердеш ма?»
20 А тӹнь, эдем, Йымы ваштареш спораш кӱ ылат? Ӹштӹшӹжӹлӓн хӓдӹр тенге келесӓ ма: «Малын тӹнь мӹньӹм техеньӹм ӹштенӓт?»
21 Коршок ӹштӹшӹн ик шун гӹцок ик ӓтӹм празнык годым, вес ӓтӹм кудылошты кычылташ ӹштӓш ирӹкшӹ уке ма?
23 (22-23) Лӹмлештӓрӓлтмӹлӓн андакок йӓмдӹлӹмӹ пурылык ӓтӹвлӓ гач когон лӹмлештӓрӓлтмӹжӹм анжыкташ манын, Йымы, ӹшке шӹдӹжӹм дӓ силажым пӓлдӹртӓш шанен, пӹтӓрӹмӹ лиӓш йӓмдӹ шӹдӹлык ӓтӹвлӓм когон цӹтен гӹнь, ма вара?
24 Мӓ, иудей логӹц веле агыл, а язычниквлӓ логӹцӓт ӱжмӹвлӓ, ти пурылык ӓтӹвлӓ ылына.
25 Осийӹн книгӓштӹжӹ Йымы тенгеок попа:
«Кыды халык Мӹньӹн ылде,
тӹдӹм ӹшке халыкем манам;
кӱм яратыделам, яратымем манам».
26 «Кышты нӹнӹлӓн келесенӹт: ”Тӓ Мӹньӹн халыкем ада ыл”,
тӹштӹ нӹнӹм ӹлӹшӹ Йымын эргӹвлӓжӹ манаш тӹнгӓлӹт».*
27 А Израиль гишӓн Исаия сӹгӹрӓлеш: «Израиль эргӹвлӓ тангыжыштышы ошма нӓрӹ лит гӹнят, чӹдӹн веле ытаралтыт.
28 Вет Господь пӓшӓм мычашкы шокта, тӹдӹм пӹсӹн тӧр ӹштӓ, веремӓм шыпшде, Господь мӱлӓндӹ вӹлнӹ ӹшке пӓшӓжӹм ӹштӓ».*
29 Исаиян андакок келесӹмӹжӹ семӹнь:
«Господь Саваоф мӓлӓннӓ шачышым кодыде ылгецӹ,
мӓ Содом гань линнӓ ыльы,
Гоморра ганьыш сӓрнӓлтӹннӓ ыльы».*
30 Мам келесенӓ? Язычниквлӓ тӧрӹш лӓктӓш цацыделыт гӹнят, ӹнянӹмӓш гач тӧрӹш лӓктӹнӹт.
31 Израиль гӹнь тӧрӹш лӓкмӹ закон якте шонежӹ ылын, но тӹшкӹ шон кердде.
32 Малын? Теве малын: Израиль ӹнянӹмӓшлӓн агыл, а законым шоктымылан уанен. Тӹдӹ шӹртньялтмӹ кӱэш шӹртнялтӹн.
33 Тидӹ гишӓн тенге сирӹмӹ:
«Теве Сионеш шӹртнялтмӹ кӱм дӓ кенвацмы кӱм пиштем,
Тӹдӹлӓн ӹнянӹшӹ намысыш ак пыры».*
1 Шӱмбелвлӓ, Израиль халык ытарымы лижӹ – тидӹ мӹньӹн йӓнг кымылем, тидӹ гишӓн Йымым сарвалем.
2 Мӹнь ужынам: нӹнӹ Йымылан пиш ярал лиӓш цацат, но циц пӓлӹмӓшӹштӹ уке.
3 Вет нӹнӹ Йымын тӧрӹш лыкмы корныжым ак ынгылеп, ӹшке корныштым пингӹдемдӓш цацат, Йымын тӧржӹм колыштшы агылеп.
4 Законын мычашыжы – Христос, тенге ӹнянӹшӹ цилӓ эдем тӧрӹш лыкмы лиэш.
5 Закон гач тӧрӹш лӓкмӹ гишӓн Моисей тенге сирӓ: «Законын шӱдӹмӹжӹ семӹнь ӹштӹшӹ эдем закон гӹц ӹлӹмӓшӹм нӓлеш».*
6 А ӹнянӹмӓш гач тӧрӹш лӓкмӓш тенге попа: «Шӱмӹштет ит келесӹ: пӹлгомышкы кӱ куза?» – Вес семӹньжӹ, Христосым ӱлӹкӹ кӱ валта?
7 Ӓль: «Кӱ пындашдымы келгӹцӹш вала?» – Вес семӹньжӹ, Христосым колымаш гӹц кӱ кузыкта?
8 Писани мам попа?
«Шамак лишнет ылеш –
ышмаштет дӓ шӱмӹштет».*
Тидӹ мӓмнӓн увертӓрӹмӹ ӹнянӹмӓш шамак.
9 Иисусым Господь манын, тӹнь йӹлмет доно эдем анзылны пачын попет дӓ, Йымы Тӹдӹм колымаш гӹц ӹлӹжтен манын, йӓнгет доно ӹнянет гӹнь, ытаралтат.
10 Вет йӓнг доно ӹнянӹмӓш тӧрӹш лӓкмӓшкӹ нӓнгеӓ, йӹлмӹ доно пачын попымаш – ытаралтмашкы.
11 Писани попа: «Тӹдӹлӓн ӹнянӹшӹ иктӓт намысыш ак пыры».*
12 Тиштӹ иудей дон эллин лошты айыртем уке: Господь цилӓштӹн икток. Кӱ Тӹдӹ гӹц палшыкым ядын ыдылеш, Господь пайдажы гӹц цилӓлӓн пуа.
13 Вет «Палшыкым ядын, Господьын лӹмжӹм ӱжшӹ хоть-кӱӓт ытаралтеш».*
14 Но кӱлӓн ак ӹнянеп, кыце Тӹдӹ гӹц палшыкым ядын кердӹт? Кӱ гишӓн колделыт гӹнь, кыце Тӹдӹлӓн ӹнянен кердӹт? Увертӓрӹшӹ уке гӹнь, кыце нӹнӹ колын кердӹт?
15 А колтымы агылеп гӹнь, кыце увертӓрен кердӹт? Тенге сирӹмӹ: «Тыр гишӓн увертӓрӹшӹвлӓн дӓ пуры уверӹм кандышывлӓн толмышты махань яжо!»
16 Но цилӓнок Пуры Уверӹн шамакшым колыштделыт. Исаия попа: «Господь! Мӓмнӓн уверлӓннӓ кӱ ӹнянен?»*
17 Тенгежӹ, ӹнянӹмӓш уверӹм колмы гӹц шачеш, а уверӹм колмаш Йымын шамакшы гач толеш.
18 Но ядам: коли нӹнӹ колделыт? Уке, колыныт:
«Нӹнӹн юкышты цилӓ мӱлӓндӹ мычкы шӓрлен,
шамакышты сӓндӓлӹк тӹр якте шон».*
19 Эче ядам: коли Израиль пӓлӹде? Сек пӹтӓри Моисей келесен:
«Техень халык доно йӓнгдӓм йылаш тӓрвӓтем,
кыдым халыкешӓт шотлаш ак ли,
шанен мыштыдымы халык доно тӓмдӓм шӹдештӓрем».*
20 Исаия гӹнь лӱдде попа:
«Кӱ Мӹньӹм кӹчӓлде, тӹдӹ мон,
кӱ Мӹнь гишӓнем ядде, тӹдӹлӓн Ӹшкӹмемӹм пӓлдӓренӓм».*
21 Израиль гишӓн гӹнь попа: «Мӹнь шамакым колыштдымы дӓ ваштареш шалгышы халык докы кечӹгыт кидем виктен шалгенӓм».*
*10:5 Лев 18:5. *10:6-8 Втор 9:4, 30:12-14. *10:11 Ис 28:16. *10:13 Иоиль 2:32. *10:16 Ис 53:1. *10:18 Пс 18:5. *10:19 Втор 32:21. *10:20 Ис 65:1. *10:21 Ис 65:2.1 Тенгежӹ, ядам: коли Йымы ӹшке халыкшы гӹц карангын? Уке! Мӹнь ӹшкежӓт Израиль халык гӹц, Авраам вырлык гӹц, Вениамин йых гӹц ылам.
2 Андакок айырен нӓлмӹ халыкшы гӹц Йымы карангде. Илия гишӓн Писани мам попа, ада пӓлӹ ма? Йымы анзылны тӹдӹ Израиль вӹкӹ тенге вуйым шиэш:
3 «Господь, пророквлӓэтӹм нӹнӹ пуштыныт, жертвенниквлӓэтӹм шӓлӓтенӹт, мӹнь ӹшкетем кодынам, мӹньӹн йӓнгемӹмӓт нӓлӓш шанат».*
4 Мам вара Йымы тӹдӹлӓн келесен? «Ваал анзылан сукалтыдымы шӹм тӹжем эдемӹм Мӹнь Ӹшкӹлӓнем переген коденӓм».*
5 Тенге кӹзӹтшӹ жепӹнӓт Йымы ӹшке благодатьшы доно чӹдӹ эдемӹм айырен нӓлӹн.
6 Тидӹжӹ Йымын благодатьшы доно лин гӹнь, тенгежӹ, эдемӹн пӓшӓжӹ доно агыл. Уке гӹнь благодать лачокшы благодать ак ли ыльы. А айырен нӓлмӓш эдемӹн пӓшӓжӹ гишӓн лиэш гӹнь, тидӹ благодать агыл, уке гӹнь пӓшӓ – пӓшӓ агыл.
7 Ма вара? Израиль кышкы шоаш цацен, тӹшкӹ шоде, айырен нӓлмӹвлӓ веле шоныт. Молыжы кӱ йӓнгӓн линӹт.
8 Сирӹмӹ семӹнь «Йымы нӹнӹлӓн нимат шиждӹмӓш шӱлӹшӹм пуэн, тагачы яктеӓт сӹнзӓштӹ ак уж, пӹлӹшӹштӹ ак кол».*
9 Давид попа:
«Качмаш-йӱмӓшӹштӹ нӹнӹлӓн шӧргӹш, вӓпш лижӹ,
шӹртнялтмӹ кӱш сӓрнӓлтшӹ, кӱсӹм пӧрӹктӹжӹ,
10 нӹнӹн сӹнзӓштӹ ужын керддӹмӹлӓ пӹцкемӹшӓлтшӹ,
дӓ тупышты курымеш пӱгӹргӹжӹ».*
11 Тенгежӹ ядам: коли иудейвлӓ кӹньӹлӓш лидӹмӹн шӹртнялт кенвазыныт? Уке! Нӹнӹн йӓнгӹштӹ йылаш тӹнгӓлжӹ манын, шӹртнялтмӹштӹ язычниквлӓлӓн ытаралташ йӧнӹм пуэн.
12 Нӹнӹн кенвацмышты сӓндӓлӹкӹштӹшӹ эдемвлӓлӓн пайда дӓ незереммӹштӹ язычниквлӓлӓн пайда гӹнь, тенгежӹ цилӓ иудейвлӓн кӹньӹл шагалмышты эчеӓт кого пайдам канда!
13 Андак язычник ылшывлӓ, тӓлӓндӓ попем: мӹнь язычниквлӓн Апостолышты ылам гӹнь, ӹшке служымы пӓшӓэмӹм лӹмлештӓрем,
14 ӓнят, ӹшке халыкемӹн эдемвлӓжӹн йӓнгӹштӹм йылаш тӓрвӓтен кердӓм дӓ иктӓ-манярыжым ытарен кодем.
15 Иудейвлӓм карангдымаш цилӓ сӓндӓлӹкӹм Йымы доно пуремден гӹнь, нӹнӹм мӹнгеш нӓлмӹжӹ колымаш гӹц ӹлӹжмӓш агыл ма?
16 У киндӹ свящӓйӹмӹ гӹнь, улы киндӓт святой. Важ святой гӹнь, укшвлӓӓт святой ылыт.
17 Олив пушӓнгӹн юж укшвлӓжӹ тодыл нӓлмӹ ылыт гӹнь, тӹнь, хир оливӹн укшыжы, тӹдӹн укшвлӓ лошкыжы ушымы ылынат дӓ важшы, сокшы доно кӹлдӓлтӹнӓт гӹнь,
18 ӹшкӹметӹм молы укш гӹц когоэш ит уж. Ӹшкӹметӹм когоэш ужат гӹнь, ӓшӹндӓрӹ: тӹнь агыл важым кычет, а важ тӹньӹм кыча.
19 Тӹнь манат: «Мӹньӹм ушаш манын, укшвлӓ тодылмы ылыныт».
20 Яра, нӹнӹ ӹнянӹдӹмӹштӹ гишӓн тодылмы ылыныт, а тӹнь ӹнянӹмӓшет гишӓн пушӓнгӹштӹ ылат. Но тидӹн доно ит когоэшнӹ, а лӱд.
21 Вет Йымы пушӓнгӹн туан укшыжым переген кодыде гӹнь, ӓнят, тӹньӹмӓт переген ак коды.
22 Тенгежӹ, Йымын пуры дӓ костан ылмыжым уж: шӹртнялт карангшывлӓлӓн костан лиэш, а Йымын пурыжым кычен ӹлет гӹнь, тӹлӓнет пуры лиэш, агыл гӹнь, тӹньӹмӓт роал шуат.
23 Но иудейвлӓӓт ӹнянӹдӹмӹ лиӓш цӓрнӓт гӹнь, ӹшке пушӓнгӹшкӹштӹ ушымы лит, вет нӹнӹм мӹнгеш ушаш Йымын силажы улы.
24 Туан хир олив пушӓнгет гӹц тӹньӹм пӹчкӹн нӓлмӹ дӓ садыштышы пушӓнгӹш ушымы. Техень укшвлӓ туан пушӓнгешӹштӹ куштылгынрак ак ушалтеп ма?
25 Шӱмбелвлӓ, ӹшкӹмдӓм когон ышанеш идӓ шотлы манын, тӓлӓндӓ ти тайным пачде ӹнем коды: Йымын Кугижӓншӹш язычниквлӓ логӹц тӹрӹс шот* пырымешкӹ веле, Израиль халыкын икманярыжы кӱ йӓнгӓн лин.
26 Дӓ тенге улы Израиль ытаралтеш. Сирӹмӹ:
«Сион гӹц Ирӹкӹш Лыкшы толеш
дӓ Йымым шотлыдымашым Иаковын йыхшы гӹц карангда.
27 Кынам Мӹнь сулыкыштым карангдем,
нӹнӹлӓн ти согоньым пуэм».*
28 Пуры Увер шотышты иудейвлӓ тӓ гишӓндӓ Йымын тышманжы ылыт, но Тӹдӹн айырен нӓлмӹжӹ шотышты нӹнӹ ӹшке ӓтя-тьотявлӓштӹ гишӓн Йымын яратымыжы ылыт.
29 Йымын подаркавлӓжӹ дӓ ӱжмӓшӹжӹ вашталташ лидӹмӹ ылыт.
30 Андакшы тӓ Йымым колыштделда, а ӹнде нӹнӹн шамак колыштдымы ылмышты гишӓн Йымы тӓмдӓм жӓлӓен.
31 Тенгеок иудейвлӓ ӹшкештӓт жӓлӓйӹмӹ лиштӹ манын, Йымы тӓмдӓм жӓлӓенӓт, нӹнӓт ӹнде шамак колыштдымы линӹт.
32 Вет цилӓ эдемӹм жӓлӓйӓш манын, Йымы нӹнӹм цилӓштӹм шамак колыштдымашкы питӹрен шӹнден.
33 Йымын пайдажы, ышыжы дӓ пӓлӹмӓшӹжӹ мычашдымы. Тӹдӹн судшы – пӓлен шоаш лидӹмӹ, Тӹдӹн корныжы – тӹшлӓш лидӹмӹ!
34
«Кӱ Господьын кӧргӹ шанымашыжым пӓлӓ?
Кӱ Тӹдӹлӓн ышым пушы лин?»*
35 Йымы пӧртӹлтӹжӹ манын,
кӱ Тӹдӹлӓн андак пуэн?
36 Вет цилӓок Тӹдӹ гӹц, Тӹдӹ гач дӓ Тӹдӹлӓн. Тӹдӹлӓн курым-курымеш лӹмлештӓрӓлтмӓш лижӹ! Аминь.
*11:3 3 Цар 19:10,14. *11:4 3 Цар 19:18. Ваал – идолын лӹмжӹ. *11:8 Втор 29:4, Ис 29:10. *11:9-10 Пс 68:23-24. *11:25 Тӹрӹс шот – полное число. *11:26-27 Ис 59:20-21‚ Иер 31:33-34. *11:34 Ис 40:13.1 Шӱмбелвлӓ, Йымын пурыжы доно мӹнь тӓмдӓм сарвалем: кӓпдӓм ӹлӹшӹ, святой, ярал жертва семӹнь Йымылан пуда. Тенге тӓ Йымылан шот доно служедӓ.
2 Ти курымыштышы эдемвлӓлӓ ӹлӓш идӓ тӹнгӓл, а Йымын шанымашыжы маханьы, ма пуры, ма ярал дӓ цилӓ шотыштат яжо, тӹшлӓш манын, ышда уэммӹ доно вашталт мидӓ.
3 Мӹлӓм пумы благодать доно цилӓлӓндӓ попем: ӹшке гишӓндӓ утла яжон идӓ шаны, кыце келеш, тенге веле шаныда, шот доно, каждыйлан Йымы пумы ӹнянӹмӓш висӓ семӹнь шаныда.
4 Кыце мӓмнӓн ик кӓпӹштӹ шукы лаштык улы дӓ цилӓн ик пӓшӓм ак ӹштеп,
5 тенгеок мӓӓт, шукын ылына гӹнят, Христос доно ушнен, ик кӓп, а каждый иктӹ-весӹнӓн лаштыкшы ылына.
6 Каждыйланна пумы благодать доно мыштымашна шукы йиш. Кӱн пророкла попен мыштымашыжы улы гӹнь, ӹнянӹмӓш висӓжӹ семӹнь пророкла попыжы;
7 служен мыштымаш улы гӹнь, служыжы; тымден мыштымаш гӹнь, тымдыжы;
8 кымылангден мыштымаш улы гӹнь, кымылангдыжы; кӱ ӹшкӹмжӹнӹм пуа гӹнь, пуры йӓнг доно пужы; вуйлатен мыштымаш улы гӹнь, ӹшке пӓшӓжӹм пиш цацен ӹштӹжӹ; палшен мыштымаш гӹнь, тидӹм сусунок ӹштӹжӹ.
9 Тӓмдӓн яратымашда йӓнг вашт лӓкшӹ лижӹ, худа гӹц карангда, пуры сага пиждӓ.
10 Иктӹ-весӹдӓм шӱмбелвлӓлӓ нӹжӹлгӹн яратыда, весӹм шотеш пиштӹмӓштӹ икӹжӓк-иктӹдӓм анзылташ цацыда.
11 Ялахай агыл, пыт цацышы лидӓ, шокшы шӱм доно Господьлан служыда.
12 Уанымашда улы гишӓн сусу лидӓ, нелӹ годым тырхышы лидӓ, со ыдылда.
13 Иктӓ-машты ак ситӹ годым святойвлӓлӓн палшыда, корныгешӹвлӓм хынала анжыда.
14 Тӓмдӓм поктылшывлӓлӓн пурым согоньлыда; пурым согоньлыда, иктӹмӓт идӓ шудал.
15 Ӹвӹртӹшӹ сага ӹвӹртӹдӓ, мӓгӹрӹшӹ сага мӓгӹрӹдӓ.
16 Иктӹ-весӹдӓ лошты икышын ӹлӹдӓ, идӓ когоэшнӹ, цӹтен ӹлӹшӹвлӓ докы кедӓ, ӹшкӹмдӓм когон ышанеш идӓ шотлы.
17 Худалан худа доно иктӹлӓнӓт идӓ тӱлӹ, а цилӓ эдем анзылны ма пуры, тӹдӹм ӹштӓш цацыда.
18 Кердӹдӓ гӹнь, цилӓ эдем доно тырын ӹлӓш цацыда.
19 Яратымы шӱмбелемвлӓ, ӹшке верцдӓ кӱсӹм идӓ пӧрӹктӹ, Йымын шӹдӹжӹлӓн вӓрӹм кодыда. Сирӹмӹ: «Кӱсӹм Мӹнь пӧрӹктем, Мӹнь пӧртӹлтем», – попа Господь».*
20 А «тышманет шужышы гӹнь, тӹдӹм пукшы, йӱмӹжӹ шоэш гӹнь, йӱктӹ: тидӹм ӹштен, тӹдӹн вуй вӹлӓнжӹ йылышы тылшолым погет».*
21 Худалан ӹшкӹметӹм сӹнгӓш ит пу, худам пуры доно сӹнгӹ.
*12:19 Втор 32:35. *12:20 Притч 25:21-22.1 Кӱшӹл властьым кычышывлӓн шамакыштым каждый эдем колыштшашлык, вет керек-махань власть – Йымы гӹц, цилӓ ылшы властьым Йымы шагалтен.
2 Кӱ властьлан торешлӓнӓ, Йымын тенге ӹштӹмӹжӹ ваштареш шагалеш, а ваштареш шагалшывлӓ ӹшке вӹкӹштӹ суйымашым кандат.
3 Вет пуры пӓшӓм ӹштӹшӹ агыл, а акъярым ӹштӹшӹ эдем вуйлатышывлӓ гӹц лӱдшӓшлык. Власть гӹц ӹнет лӱд гӹнь, пурым ӹштӹ, тӹнӓм тӹдӹ тӹньӹм хваля.
4 Тӹдӹ – Йымын тӓрзӹжӹ, тӹлӓнет яжо лижӹ манын ӹштӓ. Но тӹнь акъярым ӹштет гӹнь, лӱд, вет тӹдӹ такеш агыл мечӹм намалыштеш: тӹдӹ – Йымын тӓрзӹжӹ, тӹдӹ гач Йымын шӹдӹжӹ акъярым ӹштӹшӹ вӹкӹ вазеш.
5 Тенге гӹнь шамакым колыштшы лимӹлӓ. Тидӹжӹм Йымын наказымыжы гӹц лӱдмӹ гишӓн веле агыл, но совесть верцӹнӓт ӹштӹмӹлӓ.
6 Седӹндон тӓ лӹм оксамат тӱледӓ, вет власть кычышывлӓ Йымылан служат, со ти пӓшӓм ӹштӓт.
7 Тенге, мам пушашлыкдам каждыйлан пуда: кӱлӓн лӹм окса – лӹм оксам, кӱлӓн оброк – оброкым, кӱлӓн лӱдмӓш – лӱдмӓшӹм, кӱлӓн шотеш пиштӹмӓш – шотеш пиштӹмӓшӹм.
8 Икӹжӓк-иктӹдӓм яратымаш гӹц молы шотышты иктӹлӓнӓт кӱсӹдӓ ӹнжӹ ли. Весӹм яратышы эдем законын ядмыжым цилӓ шоктен.