1 Ма тӹнгӓлтӹш гӹцок ылын, мам мӓ колынна, мам ӹшке сӹнзӓнӓ доно ужынна, мам анженнӓ дӓ киднӓ доно шижӹннӓ, тидӹм, ӹлӹмӓш Шамакым, увертӓренӓ.
2 Ӹлӹмӓш толын, мӓ тӹдӹм ужынна, тӹдӹ гишӓн пӓлдӹртен попенӓ дӓ тӓлӓндӓ курымаш ӹлӹмӓшӹм увертӓренӓ. Тӹдӹ Ӓтя доны ылын дӓ мӓ докына толын.
3 Тӓӓт мӓ докына ушныда манын, мам ужмынам дӓ колмынам тӓлӓндӓ увертӓренӓ. Мӓжӹ Ӓтя дӓ Тӹдӹн Эргӹжӹ Иисус Христос доно ушнен шалгенӓ.
4 Сусуда циц лижӹ манын, мӓ тидӹм тӓлӓндӓ сиренӓ.
5 Теве техень уверӹм мӓ Тӹдӹ гӹц колынна дӓ тӓлӓндӓ увертӓренӓ: Йымы – соты, Тӹдӹн нимахань пӹцкемӹшӹжӓт уке.
6 Тӹдӹн доно ушнен шалгенӓ манын попенӓ, а пӹцкемӹшӹштӹ каштына гӹнь, мӓ алталенӓ, лачок семӹнь ана ӹштӹ.
7 Но Йымы сотышты ылмы семӹнь мӓӓт сотышты каштына гӹнь, иктӹ-весӹнӓ доно ушнымы кӹл улы, дӓ Тӹдӹн Эргӹжӹн, Иисус Христосын, Вӹржӹ цилӓ сулык гӹцӓт мӓмнӓм ирӹктӓ.
8 Сулыкна уке манын попенӓ гӹнь, ӹшкӹмнӓм ӹшке алталенӓ, дӓ шӱмӹштӹнӓ лачок уке.
9 Ӹшке сулыкнам лыктын келесенӓ гӹнь, Йымы, тӧр ӹштӹшӹ дӓ ӹнян ылешӓт, сулыкнам простя дӓ цилӓ йиш тӧр агыл гӹц мӓмнӓм ирӹктӓ.
10 Сулыкым ӹштӹделна манын попенӓ гӹнь, Тӹдӹм алталышыш лыктына, дӓ шӱмӹштӹнӓ Тӹдӹн Шамакшы уке.
1 Тетявлӓэм, тӓ сулыкым идӓ ӹштӹ манын, тидӹм тӓлӓндӓ сирем. А иктӓжӹ сулыкым ӹштӓ гӹнь, Ӓтя анзылны переген попышына улы: тӧр ӹштӹшӹ Иисус Христос.
2 Тӹдӹ мӓмнӓн сулыквлӓнӓм сылен нӓлӓш пумы жертва ылеш, дӓ Тӹдӹм мӓмнӓн сулыквлӓнӓ верц веле агыл, цилӓ сӓндӓлӹкӹн сулыквлӓжӹ верц жертвеш пумы.
3 А Иисус Христосым пӓлен нӓлмӹнӓм теве кышец ужына: Тӹдӹн шӱдӹмӹжӹм шоктенӓ гӹнь, Тӹдӹм пӓленӓ.
4 Кӱ «Мӹнь Тӹдӹм пӓлем» манеш, а Тӹдӹн шӱдӹмӹжӹм ак шокты, тӹдӹ алталышы ылеш, дӓ тӹдӹн шӱмӹштӹжӹ лачок уке.
5 А кӱ Иисус Христосын шамакшым шокта, Йымын яратымашыжы лачокок тӹдӹн шӱмӹштӹжӹ циц ылеш. Тишец мӓ Йымы доно ушнен шалгымынам пӓленӓ.
6 Кӱ Тӹдӹн доно ушнен шалгем манын попа, тӹдӹ ӹшкежӓт Иисус Христос ӹлӹмӹ семӹньок ӹлӹшӓшлык.
7 Яратымывлӓэм, тӓлӓндӓ у шӱдӹмӓшӹм агыл, а тошты шӱдӹмӓшӹм сирем. Тӹдӹм тӓлӓндӓ тӹнгӓлтӹшток пумы: тошты шӱдӹмӓш – тӹнгӓлтӹшток колмы шамакда.
8 Тенге гӹнят мӹнь тӓлӓндӓ у шӱдӹмӓшӹм сирем, тӹдӹн лачокшы Иисус Христос гач дӓ тӓ гачда каеш, вет пӹцкемӹш ямеш, дӓ лачокшы соты ӹнде сотемдӓрӓ.
9 Кӱ сотышты ылам манын попа, а шӱмбелжӹм ужынат ак керд, тӹдӹ кӹзӹт яктеӓт пӹцкемӹшӹштӹ ылеш.
10 А кӱ шӱмбелжӹм ярата, сотышты ӹлӓ, азныктышы* тӹдӹн нимат уке.
11 А кӱ шӱмбелжӹм ужынат ак керд, тӹдӹ пӹцкемӹшӹштӹ ӹлӓ, пӹцкемӹшӹштӹ каштеш дӓ кышкы кемӹжӹмӓт ак пӓлӹ, вет пӹцкемӹш тӹдӹн сӹнзӓжӹм уждымым ӹштен.
12 Тӓлӓндӓ сирем, тетявлӓ: Иисус Христосын лӹмжӹ верц тӓмдӓн сулыквлӓдӓ простялтыныт.
13 Тӓлӓндӓ сирем, ӓтявлӓ: тӓ тӹнгӓлтӹш гӹцок Ылшым пӓлен нӓлӹндӓ. Тӓлӓндӓ сирем, ӹрвезӹвлӓ: тӓ худан хозажым сӹнгендӓ. Тӓлӓндӓ сирем, тетявлӓ: тӓ Ӓтям пӓлен нӓлӹндӓ.
14 Тӓлӓндӓ сиренӓм, ӓтявлӓ, вет тӓ Тӹнгӓлтӹшдӹмӹм* пӓлен нӓлӹндӓ. Тӓлӓндӓ сиренӓм, ӹрвезӹвлӓ, вет тӓ силан ылыда, Йымын шамакшы шӱмӹштӹдӓ ылеш, дӓ тӓ худан хозажым сӹнгендӓ.
15 Сулыкан сӓндӓлӹкӹм идӓ яраты, ма сӓндӓлӹкӹштӹ улы, тӹдӹмӓт идӓ яраты. Кӱ сӓндӓлӹкӹм ярата, тӹдӹн шӱмӹштӹжӹ Ӓтян яратымашыжы уке.
16 Цилӓ, ма сӓндӓлӹкӹштӹ улы: кӓп дон йӓнгӹн шыкланымышты, сӹнзӓн темдӹмӹ ылмыжы дӓ ӹлӹмӓшӹштӹшӹ когоэшнӹмӓш – Ӓтя гӹц агыл, а ти сӓндӓлӹк гӹц.
17 Сӓндӓлӹкӓт, сӓндӓлӹкӹштӹшӹ сулыкан шыкланымашат ямыт, а Йымын шанымыжым шоктышы курымеш кодеш.
18 Тетявлӓ, остатка жеп толын шон. Антихрист толеш манын, тӓ колында, дӓ ӹнде шукы антихрист лӓктӹн. Остатка жеп шомым тишец пӓленӓ.
19 Нӹнӹ мӓ логӹцнӓ лӓктӹнӹт, но мӓмнӓн ылделыт. Нӹнӹ мӓмнӓн ылыныт ылгецӹ, мӓ сагана кодыт ыльы. Но цилӓн мӓмнӓн агылеп. Мӓ дорцна карангмышты тидӹм анжыкта.
20 А тӓ Святой гӹц шӹрӹмӓшӹм нӓлӹндӓ дӓ цилӓ пӓледӓ.
21 Лачокым ада пӓлӹ манын агыл мӹнь тӓлӓндӓ сиренӓм, а тӓ лачокым пӓледӓ дӓ нимахань алталымашат лачок гӹц ылдымым ынгыледӓ, седӹндон сиренӓм.
22 Кӱ алталышы ылеш? Иисусым «Христос агыл» маншы агыл ма? Тӹдӹ – антихрист, Ӓтямӓт, Эргӹмӓт шотлыдымы.
23 Кӱ Эргӹм ак шотлы, тӹдӹн Ӓтяжӓт уке, а Эргӹлӓн ӹнянӹмӹжӹм лыктын келесӹшӹн Ӓтяжӓт улы.
24 Мам тӓ тӹнгӓлтӹш гӹцок колында, тӹдок тӓ донда ушнен шалгыжы. Мам тӓ тӹнгӓлтӹш гӹцок колында, тӹдок тӓ донда ушнен шалга гӹнь, тӓӓт Эргӹ дӓ Ӓтя доно ушнен шалгедӓ.
25 А Тӹдӹн мӓлӓннӓ сӧрӹмӹжӹ – курымаш ӹлӹмӓш.
26 Тидӹм мӹнь тӓмдӓм алталышывлӓ гишӓн сиренӓм.
27 А тӓ гишӓндӓ попаш гӹнь, Тӹдӹ гӹц нӓлмӹ шӹрӹмӓш кӧргӹштӹдӓ ылеш, дӓ иктӓ-кӱн тымдымыжы тӓлӓндӓ ак кел. Тӹдӹн шӹрӹмӓшӹжӹ тӓмдӓм цилӓэш тымда дӓ лачок ылеш, алталымаш агыл. Тӹдӹн шӹрӹмӓшӹжӹ тымдымы семӹньок ӹштӹдӓ: тидӹн доно ушнен шалгыда.
28 Тенгежӹ, Тӹдӹн толмыжы годым мӓлӓннӓ лӱдӓш агыл дӓ, толмыкыжы, анзылныжы намысланаш агыл манын, тетявлӓэм, Тӹдӹн доно ушнен шалгыда.
29 Тӹдӹн тӧр ылмыжым пӓледӓ гӹнь, тӧр ӹштӹшӹ керек-махань эдемӹнӓт Тӹдӹ гӹц шачмыжым пӓледӓ.
*2:10 Азнаш – соблазняться. *2:14 «Тӹнгӓлтӹшдӹмӹм»: тидӹм «Тӹнгӓлтӹш гӹцок Ылшым» манынат сӓрӓш лиэш.1 Ӓтя мӓлӓннӓ махань яратымашым пуэн, анжалда: мӓмнӓм Йымын тетявлӓжӹ маныт, лачокок мӓ Тӹдӹн тетявлӓжӹ ылына. Седӹндон сӓндӓлӹк мӓмнӓм ак пӓлӹ, вет Тӹдӹмӓт пӓлӹде.
2 Яратымывлӓэм, мӓ ӹнде Йымын тетявлӓжӹ ылына, но махань лишӓшлык ылына, эче пачмы агыл. Мӓ тӹдӹм веле пӓленӓ: кынам тидӹ пачылтеш, Тӹдӹ ганьы линӓ, вет махань ылеш, Тӹдӹм техеньӹм ужына.
3 Керек-кӱӓт, Тӹдӹлӓн техень уанымашыжы улы гӹнь, Тӹдӹ ганьы ире лиӓш манын, ӹшкӹмжӹм ирӹктӓ.
4 Сулыкым ӹштӹшӹ каждый эдем законымат пыдырта, дӓ сулык законым пыдыртымаш ылеш.
5 Но тӓ пӓледӓ: Иисус Христос мӓмнӓн сулыкнам Ӹшке вӹкӹжӹ нӓлӓш толын, дӓ Тӹдӹн сулыкшы уке.
6 Тӹдӹн доно ушнен шалгышы эдем сулыкым ак ӹштӹ. Сулыкым ӹштӹшӹ эдем Тӹдӹм ужде дӓ Тӹдӹм пӓлен нӓлде.
7 Тетявлӓэм, тӓмдӓм иктӓт ӹнжӹ алталы. Кӱ тӧр ӹштӓ, Тӹдӹ ганьок тӧр ӹштӹшӹ ылеш.
8 А сулыкым ӹштӹшӹ – диавол гӹц. Диавол тӹнгӓлтӹш гӹцок сулыкым ӹштӓ. Диаволын пӓшӓжӹм шӓлӓтӓш манынок, Йымын Эргӹжӹ толын.
9 Йымы гӹц шачшы иктӓт сулыкым ак ӹштӹ, вет Йымын ӹлӹмӓш нӱшмӹжӹ кӧргӹштӹжӹ ӹлӓ, дӓ техень эдем сулыкым ӹштен ак керд, вет тӹдӹ Йымы гӹц шачын.
10 Кӱ Йымын, а кӱ диаволын тетяжӹ ылеш, тенге пӓлӓш лиэш: кӱ тӧр ак ӹштӹ – Йымын агыл, тенгеок шӱмбелжӹм яратыдымы эдемӓт Йымын агыл.
11 Теве техень уверӹм тӓ тӹнгӓлтӹш гӹцок колында: мӓ икӹжӓк-иктӹнӓм яратышашлык ылына.
12 Мӓ Каин гань лишӓшлык ана ыл. Тӹдӹ худан тетяжӹ ылын дӓ ӹшке шоляжым пуштын. А малын тӹдӹм пуштын? Теве малын: ӹшке пӓшӓжӹ ярдымы ылын, а шоляжын – тӧр.
13 Шӱмбелвлӓэм, сӓндӓлӹк тӓмдӓм ужын керддӹмӹ ылеш гӹнь, идӓ ӧр.
14 Мӓ колымаш гӹц ӹлӹмӓшӹш ванжымынам пӓленӓ, вет мӓ шӱмбелвлӓм яратенӓ. Кӱ шӱмбелвлӓм ак яраты, тӹдӹ колымашты кодеш.
15 Шӱмбелжӹм ужын керддӹмӹ керек-кӱӓт эдем пуштшы ылеш. А тӓ пӓледӓ: эдем пуштшын иктӹнӓт кӧргӹштӹжӹ соэшок кодшы курымаш ӹлӹмӓшӹжӹ уке.
16 Ма техень яратымаш, теве кышец мӓ пӓлен нӓлӹннӓ: Иисус Христос мӓ верцнӓ ӹшке ӹлӹмӓшӹжӹм пуэн. Мӓӓт шӱмбелвлӓ верц ӹлӹмӓшнӓм пушашлык ылына.
17 Сӓндӓлӹкӹштӹ улан ӹлӹшӹ эдем ӹшке шӱмбелжӹн незер ылмыжым ужеш, но шӱмжӹм тӹдӹ гӹц питӹрӹмӓштӹ урда гӹнь, кыце тӹдӹн кӧргӹштӹжӹ Йымын яратымашыжы кодын кердеш?
18 Тетявлӓэм, мӓ шамак доно ӓль попымы доно агыл яратышашлык ылына, мӓмнӓн яратымашна мам ӹштӹмӹнӓ гач кайжы дӓ лачокшы лижӹ.
19 Теве тенге мӓ лачок гӹц ылмынам пӓленӓ дӓ Йымы анзылны шӱмнӓм ладнангдарен кердӹнӓ,
20 вет шӱмнӓ мӓмнӓм йӓтлӓ гӹнят, Йымы шӱмнӓ гӹц кого ылеш дӓ цилӓ пӓлӓ.
21 Яратымемвлӓ, шӱмнӓ мӓмнӓм ак йӓтлӹ гӹнь, Йымы анзылны ана лӱд
22 дӓ, мам ядына, Тӹдӹ гӹц цилӓ нӓлӹнӓ, вет шӱдӹмӹжӹм шоктенӓ дӓ, Тӹдӹлӓн ма ярал ылеш, тӹдӹм ӹштенӓ.
23 А шӱдӹмӓшӹжӹ техеньӹ: мӓ Тӹдӹн Эргӹжӹн, Иисус Христосын, лӹмжӹлӓн ӹнянӹшӓшлык дӓ шӱдӹмӹжӹ семӹнь икӓнӓ-иктӹнӓм яратышашлык ылына.
24 А кӱ Йымын шӱдӹмӹжӹм шокта, тӹдӹ Йымы доно ушнен шалга, а Йымы – тӹдӹн доно. Тӹдӹн мӓ донна ушнен шалгымыжым мӓлӓннӓ пумы Шӱлӹшӹжӹ гӹц пӓленӓ.
1 Яратымывлӓэм, цилӓ шӱлӹшлӓн идӓ ӹнянӹ, Йымы гӹц ылыт ӓль агыл, шӱлӹшвлӓм тергӹдӓ, вет сӓндӓлӹк вӹкӹ алтанзык пророк шукы толын.
2 Йымын Шӱлӹшӹм [дӓ алталымашын шӱлӹшӹм] тенге пӓледӓ: Иисус Христос кӓпӓнгӹн дӓ эдем семӹнь ӹлен манын, ӹнянӹмӹжӹм лыктын келесӹшӹ каждый шӱлӹш Йымы гӹц ылеш,
3 а Иисус Христосын кӓпӓнгмӹжӹм дӓ эдем семӹнь ӹлӹмӹжӹм лачокеш шотлыдымы шӱлӹш – Йымы гӹц агыл, тидӹ антихристӹн шӱлӹшӹжӹ. Техень шӱлӹш толеш манын, тӓ колында, дӓ тӹдӹ сӓндӓлӹк вӹлнӹ ӹнде улы.
4 Тетявлӓэм, тӓ Йымы гӹц ылыда дӓ алтанзык пророквлӓм сӹнгендӓ, вет шӱм кӧргӹштӹдӓ Ылшыжы – сӓндӓлӹкӹштӹ ылшы гӹц кого.
5 Алтанзык пророквлӓ сӓндӓлӹк гӹц ылыт, седӹндон сӓндӓлӹкӹштӹшӹ семӹнь попат, дӓ сӓндӓлӹк нӹнӹм колыштеш.
6 А мӓ Йымы гӹц ылына. Йымым пӓлӹшӹ мӓмнӓм колыштеш, а кӱ Йымы гӹц агыл, тӹдӹ мӓмнӓм ак колышт. Тенге мӓ лачокын шӱлӹшӹжӹм дӓ алталымашын шӱлӹшӹжӹм пӓленӓ.
7 Яратымывлӓэм, ӓлдӓ икӹжӓк-иктӹнӓм яратенӓ, вет яратымаш – Йымы дорц, яратышывлӓ цилӓн Йымы гӹц шачыныт дӓ Йымым пӓлӓт.
8 Кӱ ак яраты, тӹдӹ Йымым ак пӓлӹ, вет Йымы яратымаш ылеш.
9 Йымын мӓмнӓм яратымыжы теве кыце пачылтын: Ик Ӹшкет Эргӹжӹ гач мӓлӓннӓ ӹлӹмӓшӹм пуаш Йымы Тӹдӹм сӓндӓлӹк вӹкӹ колтен.
10 Яратымашыжы теве кышты: мӓ агыл Йымым яраташ тӹнгӓлӹннӓ, а Тӹдӹ мӓмнӓм яратен дӓ мӓмнӓн сулыквлӓнӓм сылен нӓлӓш ӹшке Эргӹжӹм жертвеш колтен.
11 Яратымывлӓэм, Йымы мӓмнӓм тенге яратен гӹнь, мӓӓт икӓнӓ-иктӹнӓм яратышашлык ылына.
12 Йымым иктӓт нигынамат ужде, но мӓ икӓнӓ-иктӹнӓм яратенӓ гӹнь, Йымы мӓ донна ушнен шалга дӓ Тӹдӹн яратымашыжы шӱмӹштӹнӓ цицмӓш ылеш.
13 Мӓ Тӹдӹн доно ушнен ӹлӹмӹнӓм дӓ Тӹдӹ мӓ донна ушнен шалгымым тенге пӓленӓ: Йымы мӓлӓннӓ ӹшке Святой Шӱлӹшӹжӹм пуэн.
14 Ӓтя Эргӹм сӓндӓлӹкӹм Ытарышы лиӓш колтен, тидӹм мӓ ужынна дӓ пӓлдӹртен попенӓ.
15 Иисус Йымын Эргӹжӹ ылеш манын ӹнянӹмӹжӹм лыктын келесӹшӹ доно Йымы ушнен шалга, а тӹдӹ – Йымы доно.
16 Йымы мӓмнӓм махань яратымаш доно яратымым пӓлен нӓлӹннӓ дӓ тидӹлӓн ӹнянӓш тӹнгӓлӹннӓ. Йымы – тидӹ яратымаш, яратымашты ӹлӹшӹ эдем Йымы доно ушнен шалга, дӓ Йымы тӹдӹн доно ушнен шалга.
17 Яратымаш мӓмнӓн шӱмӹштӹнӓ техень кӱкшӹцӹш лӱктӓлтӹн, суд кечӹнӓт ана лӱд, вет мӓ ти сӓндӓлӹкӹштӹ Тӹдӹ ганьы ылына.
18 Яратымашты лӱдмӓш уке, а цицмӓш яратымаш лӱдмӓшӹм поктен колта, вет лӱдмӓштӹ парвалымаш улы. Лӱдшӹн яратымашыжы техень кӱкшӹцӹш лӱктӓлтшӹ агыл.
19 Йымы мӓмнӓм анзыцок яратен, седӹндон мӓ Тӹдӹм яратенӓ.
20 Кӱ «Йымым яратем» манеш, а шӱмбелжӹм ужмыжы ак шо, тӹдӹ алталышы ылеш. Вет кӱ ӹшке ужмы шӱмбелжӹм ак яраты, уждымы Йымым кыце яратен кердеш?
21 Йымы пумы техень шӱдӹмӓшнӓ улы: Йымым яратышы ӹшке шӱмбелжӹмӓт яратышашлык.
1 Иисусын Христос ылмыжылан ӹнянӹшӹ каждыйок Йымы гӹц шачын, дӓ Ӓтям яратышы каждыйок Тӹдӹн Эргӹжӹмӓт ярата.
2 Мӓ Йымын тетявлӓжӹм яратымынам теве кышец пӓленӓ: мӓ Йымым яратенӓ дӓ Тӹдӹн шӱдӹмӹжӹм шоктенӓ.
3 Йымым яратымаш Тӹдӹн шӱдӹмӹжӹм шоктымаш ылеш, а шӱдӹмӹжӹ нелӹ агыл,
4 вет Йымы гӹц шачшы каждыйок сӓндӓлӹкӹм сӹнгӓ. Сӓндӓлӹкӹм сӹнгӹшӹ сӹнгӹмӓш – тидӹ мӓмнӓн ӹнянӹмӓшнӓ.
5 Кӱ сӓндӓлӹкӹм сӹнгӓ? Иисус Йымын Эргӹжӹ ылмылан ӹнянӹшӹ агыл ма?
6 Вӹд, вӹр дӓ Святой Шӱлӹш доно толшыжы – тидӹ Иисус Христос. Тӹдӹ вӹд доно веле агыл, а вӹд дӓ вӹр доно толын. А пӓлдӹртен попышыжы Шӱлӹш ылеш, вет Шӱлӹш – тидӹ лачок.
7 Пӹлгомышты пӓлдӹртен попышы кымыт улы: Ӓтя, Шамак дӓ Святой Шӱлӹш, дӓ нинӹ кымыт иктӹ ылыт.
8 Мӱлӓндӹ вӹлнӹ пӓлдӹртен попышы кымыт улы: Шӱлӹш, вӹд дӓ вӹр, дӓ нинӹ кымытынат иктӹмок попат.
9 Мӓ эдемӹн пӓлдӹртен попымыжыланат ӹняненӓ, но Йымын пӓлдӹртен попымыжы керӓлрӓк ылеш, тидӹ – Йымын пӓлдӹртен попымыжы, тенге Тӹдӹ Эргӹжӹ гишӓн пӓлдӹртен попен.
10 Йымын Эргӹлӓн ӹнянӹшӹн тенге пӓлдӹртен попымаш шӱмӹштӹжӹ ылеш. А Йымын попымыжылан ӹнянӹдӹмӹ Тӹдӹм алталышыш лыктеш, вет Йымын ӹшке Эргӹжӹ гишӓн пӓлдӹртен попымыжылан ак ӹнянӹ.
11 Пӓлдӹртен попымыжы теве ма ылеш: Йымы мӓлӓннӓ курымаш ӹлӹмӓшӹм пуэн, дӓ тӹ ӹлӹмӓшӹжӹ Тӹдӹн Эргӹжӹ доно ушнымашты ылеш.
12 Кӱн [Йымын] Эргӹжӹ улы, тӹдӹн ӹлӹмӓшӹжӓт улы, а кӱн Йымын Эргӹжӹ уке, тӹдӹн ӹлӹмӓшӹжӓт уке.
13 Йымын Эргӹжӹлӓн ӹнянӹмӹдӓ гишӓн курымаш ӹлӹмӓшдӓ ылмым пӓлӓшдӓ мӹнь тидӹм тӓлӓндӓ, Йымын Эргӹн лӹмжӹлӓн ӹнянӹшӹвлӓлӓн, сиренӓм.
14 Йымы анзылны мӓмнӓн техень ӹнянӹмӓшнӓ улы: кынам мӓ Тӹдӹн шанымыжы семӹнь иктӓ-мам ядына, Тӹдӹ мӓмнӓм колеш.
15 Цилӓ ядмынам Йымы колмым пӓленӓ гӹнь, мам Тӹдӹ гӹц ядмынам нӓлмӹмӓт пӓленӓ.
16 Кӱ шӱмбелжӹн сулыкым ӹштӹмӹжӹм ужеш, а сулыкшы колымашкы кандышы агыл гӹнь, ыдылжы, дӓ Йымы тӹдӹлӓн ӹлӹмӓшӹм пуа. Тидӹм колымашкы кандыдымы сулыкым ӹштӹшӹвлӓ гишӓн попем. Колымашкы кандышы сулыкат улы, техень верц ыдылжы манын ам попы.
17 Керек-махань тӧр агыл ӹштӹмӓт сулык ылеш, но колымашкы кандыдымы сулыкат улы.
18 Мӓ пӓленӓ: Йымы гӹц шачшы иктӓт сулыкым ак ӹштӹ, Йымы гӹц шачшы ӹшкӹмжӹм перегӓ, дӓ вӹкӹжӹ худан хозажы ак тӹкнӹ.
19 Мӓ Йымы гӹц ылмынам дӓ цилӓ сӓндӓлӹк худан хозажы кид лӹвӓлнӹ ылмым пӓленӓ.
20 Мӓ пӓленӓ: Йымын Эргӹ толын дӓ мӓлӓннӓ лачокшы Йымым пӓлен нӓлӓш [сотым дӓ] ышым пуэн, дӓ мӓ Тӹдӹн доно – Иисус Христос Эргӹжӹ доно – ушнен ӹленӓ. Иисус Христос лачокшы Йымы дӓ курымаш ӹлӹмӓш ылеш.
21 Тетявлӓ, ӹшкӹмдӓм идолвлӓ гӹц перегӹдӓ. Аминь.