1 Иисус Христосын цоражы дӓ Апостолжы Симон-Петр гӹц – мӓмнӓн Йымынан дӓ Ытарышы Иисус Христосын тӧр ылмышты гач ӹшкӹмнӓн ӹнянӹмӓшнӓ гань шергӓкӓн ӹнянӹмӓшӹм нӓлшӹвлӓлӓн.
2 Йымы дон мӓмнӓн Господь Христос Иисусым пӓлӹмӹ гач тӓлӓндӓ благодать дӓ тыр шукемӹштӹ.
3 Мӓмнӓм ӹшке лӹмлештӓрӓлтмӓшӹжӹ дӓ пишок кого пурыжы доно Ӱжшӹм пӓлӹмӹ гач Тӹдӹн пӹлгомыштышы цӱдейӹмӓн силажы ӹлӹмӓшлӓн дӓ Йымым жеплен ӹлӹмӹлӓн цилӓ керӓлӹм мӓлӓннӓ пуэн.
4 Ӹшке лӹмлештӓрӓлтмӹжӹ дӓ кого пурыжы гач Тӹдӹ мӓлӓннӓ кого дӓ шергӓкӓн сӧрӹмӓшвлӓм подарен. Ти сӧрӹмӓшвлӓ доно тӓ, шыкланымаш гишӓн сӓндӓлӹк вӹлнӹ хозаланышы локтылалтмаш гӹц кыргыжын, Йымын гань ӹлӹмӓшкӹ ушнен кердӹдӓ.
5 Седӹндон, улы сила доно цацен, ӹнянӹмӓшӹштӹдӓ пуры пӓшӓм анжыктыда, пуры пӓшӓштӹ – пӓлӹмӓшӹм,
6 пӓлӹмӓшӹштӹ – ӹшкӹмӹм кычен мыштымашым, ӹшкӹмӹм кычен мыштымашты – цӹтӹмӓшӹм, цӹтӹмӓштӹ – Йымым жеплӹмӓшӹм,
7 Йымым жеплӹмӓштӹ – шӱмбелвлӓм шотеш пиштӹмӓшӹм, шӱмбелвлӓм шотеш пиштӹмӓштӹ – яратымашым.
8 Тӓмдӓн цилӓ тидӹ улы дӓ шукемеш гӹнь, тенгежӹ мӓмнӓн Господь Иисус Христосым пӓлӹмӓштӹ пӓшӓдӹмӹ ада ли дӓ кӹцкӹ гӹц пасна ада код.
9 А кӱн тидӹ уке, тӹдӹ слӧпӧй, мӹндӹркӹ уждымы, ӹшкӹмжӹм молнамшы сулык гӹц ирӹктӹмӹм монден.
10 Седӹндон, шӱмбелвлӓ, ӹшкӹмдӓм ӱжмӹм дӓ айырен нӓлмӹм пингӹдемдӓш утларак когон цацыда. Тидӹм ӹштедӓ гӹнь, тӓ нигынамат ада шӹртнялт,
11 тенге тӓлӓндӓ Господьна дӓ Ытарышына Иисус Христосын курымашлык Кугижӓншӹшкӹжӹ амаса кымдан пачылтеш.
12 Седӹндонок, тӓ тидӹм пӓледӓ дӓ тӓ яктедӓ шошы лачокеш пингӹдемдӹмӹ ылыда гӹнят, тидӹ гишӓн мӹнь тӓлӓндӓ ӓшӹндӓрӹктӓш ам цӓрнӹ.
13 А ти кӓпӹштӹ эче маняры лиӓм, тӓмдӓм ӓшӹндӓрӹктӹмӓш доно шижтӓрӹмӹм тӧреш шотлем.
14 Ти кӓпем мӹнь гӹцем шукышты агыл ӧрдӹшкӹ карангдышашлыкым пӓлем. Мӹлӓм тидӹм мӓмнӓн Господь Иисус Христос увертӓрен.
15 Ти ӹлӹмӓш гӹц кемем паштекӓт тӓ цилӓ тидӹм соок ӓшӹндӓрӹдӓ манын, мӹнь цацаш тӹнгӓлӓм.
16 Мӓмнӓн Господь Иисус Христоснан силажы дӓ толмыжы гишӓн тӓлӓндӓ пӓлдӹртӹмӹнӓ годым мӓ тидӹм йойын чангалтшы ямак гӹц нӓлделна: Тӹдӹн цӱдӓӓн ылмыжым мӓ ӹшкеок ужынна.
17 Кого лӹмлештӓрӓлтмӓш гӹц «Тидӹ Мӹньӹн яратымы Эргем, Тӹдӹн доны Мӹньӹн пуры кымылем» манын келесӹмӹ юк Тӹдӹлӓн шактымы годым Тӹдӹ Йымы Ӓтя гӹц жеплӹмӓшӹм дӓ лӹмлештӓрӹмӓшӹм нӓлӹн.
18 Тӹдӹн доно иквӓреш святой кырыкышты ылмына годым пӹлгом гӹц йонгалтшы ти юкым мӓ ӹшке колынна.
19 Тенгелӓ, пророквлӓн шамакыштылан мӓ эчеӓт пингӹдӹн ӹнянен кердӹнӓ. Жерӓ валгалташ тӹнгӓлмешкӹ дӓ йӓнгӹштӹдӓ ирӹ жерӓ шӹдӹр кузымешкӹ, пӹцкемӹш вӓрӹштӹ сотемдӓрӹшӹ лампа докы мелӹн лимӹ семӹнь ти шамак векӹ мелӹн лидӓ гӹнь, тӓ яжон ӹштедӓ.
20 Сек пӹтӓриок тӓ теве мам пӓлӹшӓшлык ылыда: Писаништӹ пророквлӓн попымышты гӹц иктӓт ӹшкевуя нимамат ынгылдарен ак керд.
21 Вет пророкла попымаш нигынамат эдемӹн шанымыжы семӹнь лӓкде, а Святой Шӱлӹш кымылангдымы доно Йымын святой эдемвлӓжӹ попенӹт.
1 Израиль халык лошты алтанзык пророквлӓӓт ылыныт, тенгеок тӓ лоштыдаат алталышы тымдышывлӓ лӓктӹт. Нӹнӹ пӹтен яммашыш нӓнгешӹ алталышы тымдымашым кандат дӓ ӹшкӹмӹштӹм тӱлен нӓлшӹ Господь гӹц карангыт, тидӹн доно ӹшке вӹкӹштӹ пӹсӹн пӹтен яммашым кандат.
2 Шукынжы нӹнӹн шӓхӓр корнышты доно кеӓт, дӓ тидӹ гишӓн лачокын корныжы мыскылымашты лиэш.
3 Шык ылмышты гишӓн нӹнӹ алтален попымы доно тӓ шотешдӓ ӹлӓш тӹнгӓлӹт. Нӹнӹлӓн суд пынзалтыш тагынамок йӓмдӹ, яммашышты ак нерӹ.
4 Йымы сулыкыш пырышы ангелвлӓм жӓлӓйӹде, пӹцкемӹшӹн цеп доно кӹлден, нӹнӹм адыш сӹмӹрӓл шуэн дӓ суд кечӹ якте орландарен оролаш пуэн.
5 Тошты сӓндӓлӹкӹмӓт Йымы жӓлӓйӹде, Йымым жеплӹдӹмӹвлӓн сӓндӓлӹк вӹкӹ потопым колтен. Но тӧр ӹлӹмӓш верц попышы Нойын семняжӹм – кӓндӓкш йӓнгӹм – переген коден.
6 Содом дон Гоморра халавлӓм Тӹдӹ пӹтӓрӓш суен дӓ ломыжыш сӓртен, ти халавлӓм пӹтӓрӹмӹ доно Йымым жеплӹдӹмӹ анзыкылашы эдемвлӓлӓн шижтӓрен,
7 а шӓхӓрвлӓн намысде ӹлӹмӹштӹ доно ясыланышы Лотым, тӧр ӹштӹшӹ эдемӹм, ытарен.
8 Вет нӹнӹ лошты ӹлӹмӹжӹ годым тӧр ӹштӹшӹ ти эдем законде ӹштӹмӹштӹм ужын-колын, дӓ тӹдӹн тӧрӹм яратышы йӓнгжӹ кечӹнь парвален.
9 Цилӓ тидӹм Господь ӹштен гӹнь, Йымым жеплӹшӹвлӓм тергӹмӓш гӹц кыце ытараш дӓ законде ӹштӹшӹвлӓм суд кечӹ якте оролымашты кыце орландарен кычаш, Тӹдӹ пӓлӓ.
11 (10-11) Айыртемӹнок кӓп дон йӓнг яктарышы шыкланымаш паштек кешӹвлӓлӓн дӓ властьым жеплӹдӹмӹвлӓлӓн тенге лиэш. Нӹнӹ гӹц силанрак дӓ цаткыдырак Ангелвлӓӓт Господь анзылны мыскылышы шамак доно нӹнӹм вуйнаматеш ак лыкеп, но ти тура дӓ турна эдемвлӓ лӹмлештӓрӓлтшӹ Ангелвлӓм мыскылаш ак лӱдеп.
12 Техень эдемвлӓ мам ак пӓлеп, тӹдӹм мыскылат. Нӹнӹ природа пӓлемдӹмӹ семӹнь ӹлӹшӹ, кычалташ дӓ ямаш шачшы ынгылыдымы зверь гань ылыт дӓ ти зверьвлӓ семӹньок пӹтӓрӹмӹ лит.
13 Законде ӹштӹмӹштӹ гишӓн нӹнӹлӓн кӱсӹ пӧрӹктӓлтеш. Кечӹвӓл кечӹн шӓрӹштӹм темӹмӹм сусуэш шотлат, тӓ сагада иквӓреш качмы-йӱмӹштӹ годым ти лявӹрӓ гань дӓ намысдымы эдемвлӓ алталымышты доно мындырланат.
14 Сӹнзӓштӹштӹ шӓхӓрлӓнӹмӓш дӓ цӓрнӹдӹмӹ сулык веле, ӹнянӹмӓштӹ пингӹдем шодымы йӓнгӹм роалтат, йӓнгӹштӹ шыкланымылан тыменьӹн, нӹнӹ проклятайымы ылыт.
15 Виӓш корным коден, нӹнӹ ямыныт, Восорын Валаам эргӹжӹн корныжы доно кенӹт, тӹдӹжӹ тӧр агыл пӓшӓлӓн тӱлӹмӹм яратен,
16 но законде ӹштӹмӹжӹлӓн тӹдӹм вырсымы: попен керддӹмӹ осел, эдем юк доно попен, пророкын ышдымы ылмыжым цӓрен шагалтен.
17 Ти эдемвлӓ вӹддӹмӹ вӹдсӹнзӓвлӓ, штурмаан мардеж поктылмы шим пӹлвлӓ ылыт. Нӹнӹлӓн курымашлык пӹцкемӹшӹн пӹцшӹм йӓмдӹлӹмӹ.
18 Вет когоэшнӹмӹ пуста шамакым попен, нӹнӹ кӓпӹн шыкланымыжы, шӓхӓрлӓнӹмӹжӹ доно техень эдемвлӓм кычат, кыдывлӓ алталымашты ӹлӹшӹвлӓ гӹц цуц-цуц ытлаш тӹнгӓлӹнӹт.
19 Ӹшкежӹ локтылалтмашын цоражы ылыт гӹнят, ытлаш тӹнгӓлшӹвлӓлӓн ирӹкӹм сӧрӓт. Вет кӱ тӹньӹм сӹнген, тӹдӹн цоражы ылат.
20 Мӓмнӓн Господьна дӓ Ытарышына Иисус Христосым пӓлӹмӹ гач ти сӓндӓлӹкӹн сулык лявӹрӓжӹ гӹц ытлымыкы, тӹшӓкен угӹц ӓргӓлтӹт дӓ сӹнгӓлтӹт гӹнь, тенгежӹ мычашты нӹнӹлӓн тӹнгӓлтӹш годшы гӹц хударак лиэш.
21 Тӧр ӹштӹмӓш корным пӓлен нӓлмӹ гӹц дӓ нӹнӹлӓн пумы святой шӱдӹмӓш гӹц молнамшы ӹлӹмӓш докы сӓрнӓлмӹ вӓреш тӧр ӹштӹмӓш корным ак пӓлеп ылгецӹ, нӹнӹлӓн яжорак лиэш ыльы.
22 Нӹнӹ доно халыкын тӧр шаяштыжы попымы семӹнь лин: «Пи ӹшке уксынзышыжы докы пӧртӹлеш»,* дӓ «Мышмы сасна лявӹрӓштӹ пӓрдӓлеш».
*2:22 Притч 26:11.1 Яратымывлӓэм, ӹнде кокшы сирмӓшӹм тӓлӓндӓ сирем, ти сирмӓшвлӓштӹ ӹшке ӓшӹндӓрӹктӹмем доно кӧргӹштӹдӓ ире шанымашым шижтӓрӹнем.
2 Святой пророквлӓн молнам попымы шамаквлӓштӹм дӓ Господьын, Ытарышын, тӓмдӓн Апостолвлӓдӓ гач пумы шӱдӹмӹжӹм ӓшӹндӓрӹдӓ, шанем.
3 Сек пӹтӓриок тидӹм пӓлӹдӓ: остатка кечӹвлӓн ӹшке шыкланымышты семӹнь ӹлӹшӹ мыскылен ваштылшывлӓ толыт
4 дӓ попат: «Тӹдӹн толаш сӧрӹмӹжӹ кышты? Вет ӓтянӓвлӓ курымыштым ӹленӹт, но, сӓндӓлӹкӹм ӹштӹмӹ гӹц тӹнгӓлӹн, кыце лин, цилӓжӓт тенгеок кодеш».
5 Тенге шанен, вӹд гӹц дӓ вӹд доно ӹштӹмӹ пӹлгомым дӓ мӱлӓндӹм тӹнгӓлтӹшӹштӹ Йымын шамак доно ӹштӹмӹм нӹнӹ мондат.
6 Йымын шамак донок тӹнӓмшӹ сӓндӓлӹк вӹд лӹвӓкӹ лин ямын.
7 А кӹзӹтшӹ пӹлгом дон мӱлӓндӹм ти шамак донок тыллан переген кодымы, Йымым жеплӹдӹмӹ эдемвлӓм суйымы дӓ пӹтӓрӹмӹ кечӹлӓн нӹнӹм перегӹмӹ.
8 Яратымывлӓэм, теве иктӹм тӓ идӓ монды: Господьлан ик кечӹ – тӹжем и гань, дӓ тӹжем и – ик кечӹ гань.
9 Господь ак талашы манын, юж эдем шотла гӹнят, Господь сӧрӹмӹжӹм шокташ ак талашы агыл, а мӓ шотыштына цӹтӹмӓшӹжӹм анжыкта. Иктӹнӓт пӹтӹмӹжӹм Тӹдӹ ӹнежӹ уж, а цилӓн сулыкыштым простьыктышты дӓ Йымы докы сӓрнӓлӹштӹ манын шана.
10 А Господьын кечӹжӹ йыдым толшы шолы гань толеш, тӹнӓм пӹлгом мӱгӹрен ямеш, сӓндӓлӹкӹштӹ цилӓ когон ӹрен шӓлӓнӓ, а мӱлӓндӹ дӓ тӹштӹ ма улы – цилӓ йыла.
12 (11-12) Тенге цилӓ шӓлӓнӓ гӹнь, тӓлӓндӓжӹ, Йымын кечӹжӹм дӓ тӹдӹн йӹлерӓк толын шомыжым вычышывлӓлӓн, святой ӹлӹмӓшӹштӹ дӓ Йымым жеплӹмӓштӹ махань лиӓш келеш! Тӹ кечӹн пӹлгом тыл доно шӓлӓнӓ дӓ цилӓ сӓндӓлӹк шокшеш шӹрӓнӓ.
13 Но Йымын сӧрӹмӹжӹ семӹнь мӓ у пӹлгомым дӓ у мӱлӓндӹм выченӓ. Тӹштӹ тӧр ӹштӹмӓш ӹлӓш тӹнгӓлеш.
14 Седӹндон, яратымывлӓэм, тидӹм вычен, Йымы анзылны ире йӓнгӓн, вырсаш лидӹмӹ дӓ тыр доно лиӓш цацыда.
15 Яратымы Павел шӱмбелнӓ тӹдӹлӓн пумы кого ыш доно тӓлӓндӓ кыце сирен, Господьнан цӹтӹмӹжӹм ытарымашеш шотлыда.
16 Тидӹ гишӓн сирӹмӹжӹ годым Павел соок тенге попа. Тӹдӹн сирмӓшвлӓштӹжӹ юж шанымашым ынгылаш нелӹ, нӹнӹжӹм тыменьдӹмӹ дон ӹнянӹмӓштӹ пингӹдем шодымы эдемвлӓ вес Писани семӹньок локтыл вашталтылыт, тидӹн доно ӹшкӹмӹштӹм пӹтӹмӓшкӹ шоктат.
17 Тенгежӹ тӓ, яратымывлӓ, тидӹм анзыцок пӓлен, перегӓлтдӓ. Законде ӹштӹшӹвлӓн корнышты тӓмдӓм ӹшке докыжы ӹнжӹ шыпшыл, тӓ пингӹдӹ негӹцдӓ гӹц идӓ каранг.
18 Мӓмнӓн Господьна дӓ Ытарышына Иисус Христосын благодатьыштыжы дӓ Тӹдӹм пӓлен шалгымашты кушда. Тӹдӹлӓн кӹзӹтӓт, курым-курымаш кечӹнӓт соок лӹмлештӓрӓлтмӓш лижӹ! Аминь.