1 Иисус Христосын Петр Апостолжы гӹц Понтышты, Галатиштӹ, Каппадокиштӹ, Асиштӹ дӓ Вифиништӹ ӧрдӹж эдемвлӓ семӹнь шӓлӓнен ӹлӹшӹ айырен нӓлмӹвлӓлӓн.
2 Тӓмдӓм Йымы Ӓтян анзыцок пӓлӹмӹжӹ семӹнь Шӱлӹш доно свящӓйӹмӹ гач Иисус Христосым колышташ дӓ Тӹдӹн Вӹржӹм шӓвӹмӹ доно итӹрӓйӓлтӓш айырен нӓлмӹ. Тӓлӓндӓ Йымын благодатьшы дӓ тыр шукемӹштӹ.
3 Мӓмнӓн Господьна Иисус Христосын Ӓтяжӹ дӓ Йымыжы хвальымы лижӹ! Иисус Христосын колымаш гӹц ӹлӹжмӹжӹ гач Тӹдӹ ӹшкӹмжӹн кого жӓлӓйӹмӓшӹжӹ доно живой уанымашкы мӓмнӓм угӹц шачыктен,
4 шӱн керддӹмӹ, локтылалтдымы, лӹвӹжгӹдӹмӹ наследствым сӧрен. Тӹдӹ тӓлӓндӓ пӹлгомышты перегӓлтеш,
5 тӓлӓндӓ, ӹнянӹмӹдӓ гишӓн Йымын силажы доно ытаралтмашлан перегӹмӹвлӓлӓн. Ти ытаралтмашыжы остатка веремӓвлӓн каяш йӓмдӹ.
6 Шукы йиш аздарен тергӹмӓш гӹц ӹнде тӓлӓндӓ изиш ойхыралаш вӓрештеш гӹнят, цилӓ тидӹ гишӓн ӹвӹртӹдӓ.
7 Тӓмдӓн ӹнянӹмӓшдӓн тӧр ылмыжы тыл доно тергӹмӹ пӹтен ямшашлык шӧртньӹ гӹцӓт шукы пачаш шергӓкӓнрӓк дӓ Иисус Христосын толмыжы годым хвальымашым, шотеш пиштӹмӓшӹм дӓ лӹмлештӓрӓлтмӓшӹм кандышашлык.
8 Иисус Христосым тӓ ужделда гӹнят, яратедӓ, кӹзӹт Тӹдӹм ада уж гӹнят, Тӹдӹлӓн ӹнянедӓ дӓ келесен мыштыдымы, пиш лӹмлештӓрӓлтшӹ сусу доно ӹвӹртедӓ,
9 вет тӓ ӹнянӹмӓшӹн кӹцкӹжӹм, ытарымашым, нӓлӹдӓ.
10 Тӓлӓндӓ пӓлемдӹмӹ благодать гишӓн анзыцок попышы пророквлӓ ти ытарымашым кӹчӓлӹнӹт, ланзыленӹт.
11 Нӹнӹн кӧргӹштӹштӹ Христосын Шӱлӹшӹжӹ Христосын анзыкылашы парвалымыжы гишӓн попен дӓ тидӹн паштек толшашлык лӹмлештӓрӓлтмӓш гишӓн анзыцок келесен. Тӹгодым Шӱлӹшӹн ма гишӓн дӓ махань жеп гишӓн попымыжым нӹнӹ ланзыленӹт.
12 Нӹнӹлӓн пӓлдӹртӹмӹ ылын: Пуры Уверӹм попышывлӓ ӹнде тӓлӓндӓ пӹлгом гӹц колтымы Святой Шӱлӹш доно мам увертӓренӹт, тӹдӹ гишӓн попымышты годым пророквлӓ ӹшкӹлӓнӹштӹ агыл, а мӓлӓннӓ ӹштенӹт. Цилӓ тидӹм Ангелвлӓӓт анжалнештӹ.
13 Седӹндон, [яратымывлӓ,] ышдам йӓмдӹштӹ кычыда, ары шанымашан лидӓ, Иисус Христос толмы годым тӓлӓндӓ пуалтшашлык благодатьлан улы-уке уанымашым пиштӹдӓ.
14 Шамак колыштшы тетя гань лидӓ: пӹцкемӹшӹштӹ ылмыда годым тӓмдӓм сакой шыкланымаш алтален, но ӹнде тӹдӹлӓн идӓ келӹштӓрӓлт,
15 а тӓмдӓм ӱжшӹ Святой семӹнь тӓ ӹшкежӓт хоть-мам ӹштӹмӹдӓ годым святой лидӓ.
16 Сирӹмӹ: «Святой лидӓ, Мӹнь вет святой ылам».*
17 Каждый эдемӹм айырыдеок пӓшӓжӹ семӹнь Суйышым тӓ Ӓтя маныда гӹнь, тенгежӹ ӧрдӹж эдем гань ӹлӹмӹ ти жепдӓм лӱдӹн эртӓрӹдӓ.
19 (18-19) Тӓ пӓледӓ: ӓтявлӓдӓн кодымы келеш-акел ӹлӹмӹ шот гӹц пӹтӹшӓшлык ши дӓ шӧртньӹ доно агыл, а вуйнаматдымы дӓ ире Патя гань Христосын шергӓкӓн Вӹржӹ доно тӓ сылымы линдӓ.
20 Христосым сӓндӓлӹк тӹнгӓлтӹш яктеок пуйырымы ылын, но остатка веремӓвлӓн тӓлӓндӓ пӓлдӹртӹмӹ,
21 Христос гач Йымылан ӹнянӹшӹ линдӓ, дӓ Йымылан ӹнянӹмӓшдӓ дӓ уанымашда лижӹ манын, Йымы Тӹдӹм колымаш гӹц ӹлӹжтӓрен кӹньӹлтен дӓ Тӹдӹлӓн лӹмлештӓрӓлтмӓшӹм пуэн.
22 Шӱмбелвлӓм яжола каяш цацыде яраташ манын, лачокым колыштмы доно Шӱлӹш гач йӓнгдӓм итӹрӓйӹмӹкӹдӓ, иктӹ-весӹдӓм ире шӱм доно соок яратыда,
23 вет тӓ шӱшӓшлык вырлыкаш гӹц агыл, а шӱн керддӹмӹ гӹц угӹц шачында, Йымын живой дӓ курымок ылшы шамак гӹц.
24 Вет
«Сакой эдем – шуды гань,
дӓ эдемӹн сакой лӹмлештӓрӓлтмӓшӹжӹ – шуды пеледӹш ганьок:
шуды кошка, дӓ тӹдӹн пеледӹшӹжӹ вилӹн кеӓ;
25 но Господьын шамакшы курымеш кодеш».* А ти шамакшы – тӓлӓндӓ келесӹмӹ Пуры Увер.
*1:16 Лев 11:44. *1:24-25 Ис 40:6-8.1 Тенгежӹ, цилӓ худам, йойланымашым, яжола каяш цацымым, йӓнг йылымашым дӓ цилӓ вырсымашым коден,
2 кыце токо шачшы ӓзӓвлӓ шӹшерӹм качнештӹ, тенгеок тӓӓт, кушкашда дӓ ытаралташда манын, ире шамак шӹшерӹм качкаш цацыда.
3 Вет тӓ Господьын пуры ылмыжым тотештӹндӓ.
4 Тӹдӹн докы, ӹлӹшӹ кӱ докы, толда, тӹдӹм эдемвлӓ акелеш лыктыныт, а Йымы анзылны тӹдӹ айырен нӓлмӹ дӓ пиш шергӓкӓн.
5 Дӓ ӹшкежӓт, ӹлӹшӹ кӱ гань, ӹшке гӹцдӓ Йымын Шӱлӹшӹн пӧртӹм ӹштӹдӓ, Иисус Христос гач Йымылан ярал жертвӹм Шӱлӹш доно пушы святой священниквлӓ лидӓ.
6 Вет Писаништӹ келесӹмӹ:
«Теве, Мӹнь Сионышты негӹц огол кӱм,
айырымым, шергӓкӓнӹм, пиштем;
дӓ Тӹдӹлӓн ӹнянӹшӹ намысыш ак пыры».*
7 Седӹндон тӓлӓндӓ, ӹнянӹшӹвлӓлӓн, ти кӱ шергӓкӓн ылеш, а ӹнянӹдӹмӹвлӓлӓн тӹдӹ «стройышывлӓн ярдымеш лыкмы, но оголын негӹцшӹ лишӹ кӱ», «шӹртнялтмӹ кӱ, кенвацмы кӱ»,*
8 тӹшӓк нӹнӹ шамак колыштдымышты гишӓн шӹртнялтӹт, нӹнӹлӓн тенге лиӓш пӓлемдӹмӹ.
9 Но тӓ – айырен нӓлмӹ шачыш, кугижӓн священниквлӓжӹ, святой халык, Йымын Ӹшкӹлӓнжӹ айырымы йых ылыда. Тӓмдӓм пӹцкемӹш гӹц цӱдейӹктӹшӹ сотышкыжы Ӱжшӹ Йымын пуры ылмыжым тӓ увертӓрӹшӓшлык ылыда.
10
Молнам тӓ халык ылделда,
а кӹзӹт Йымын халыкшы ылыда;
молнам жӓлӓйӹмӹ ылделда,
а ӹнде жӓлӓйӹмӹ ылыда.
11 Яратымывлӓэм, ӹлӓш толшы дӓ ӧрдӹж эдемӹм сарвалымы гань тӓмдӓм сарвалем: йӓнг ваштареш кӓпӹштӹ кредӓлшӹ шыкланымашвлӓ гӹц карангда
12 дӓ язычниквлӓ лошты пурын ӹлӹдӓ. Тенгелӓ, нӹнӹ пуры пӓшӓдӓм ужыт дӓ, худам ӹштӹшӹ манын, ма верц тӓмдӓм кӹзӹт вырсат, толын-кемӹ кечӹнжӹ тидӹн верцок Йымым хваляш тӹнгӓлӹт.
13 Седӹндон Господь верц цилӓ эдем вуйлатышывлӓм колыштда: кугижӓмӓт, вет тӹдӹ сек кого,
14 тӧрӓвлӓмӓт, нӹнӹм вет кугижӓ закон пыдыртышывлӓм шамак кычаш шагалташ дӓ пуры ӹштӹшӹвлӓм хваляш колтен.
15 Вет Йымын ирӹкшӹ* техень: тыменьдӹмӹ эдемвлӓн шотдымы шаяштым пурым ӹштӹмӹдӓ доно цӓрӹшӓшлык ылыда.
16 Ирӹкӓн эдем гань ӹштӹдӓ, но ӹшке ирӹкдӓ доно худам идӓ левед, а Йымын цоражы лидӓ.
17 Цилӓм шотеш пиштӹдӓ, шӱмбелвлӓм яратыда, Йымы гӹц лӱддӓ, кугижӓм жеплӹдӓ.
18 Тӓрзӹвлӓ, лӱдӹн дӓ жеплен, хозавлӓдӓм колыштда, пуры дӓ смирнӓвлӓм веле агыл, тенгеок костанвлӓмӓт.
19 Кӱ Йымы гишӓн шана дӓ тидӹ верц вир укешток ясыланен ойхым цӹтӓ гӹнь, тидӹ Йымылан ярал ылеш.
20 Вуйнаматда верц шимӹ годым цӹтедӓ гӹнь, тӓлӓндӓ махань хвальымаш? Но пурым ӹштӹмӹдӓ годым орлыкым тырхедӓ гӹнь, тидӹ Йымылан ярал ылеш,
21 вет тидӹлӓнок тӓмдӓм ӱжмӹ, Христосат мӓ верцнӓ орлыкым цӹтен дӓ мӓлӓннӓ корным анжыктен: тӓ Тӹдӹн кишӓжӹ семӹнь кешӓшлык ылыда.
22
«Тӹдӹ нимахань сулыкымат ӹштӹде,
дӓ ышмаштыжы алталымаш ылде».*
23 Тӹдӹм вырсенӹт гӹнят, ваштарешӹштӹ вырсен вӓшештӹде; ясыланымыжы годым крозыде, а Тӧр Суйышын кидӹшкӹжӹ цилӓ пуэн.
24 Мӓлӓннӓ сулыквлӓ гӹц ытлаш дӓ тӧр ӹштен ӹлӓш манын, Тӹдӹ мӓмнӓн сулыквлӓнӓм Ӹшке кӓпшӹ доно крестӹш лӱктӓлӹн. Тӹдӹн шушырвлӓжӹ доно тӓ паремдӹмӹ линдӓ.
25 Вет тӓ ямшы шарык гань ылында [кӹтӧзӹ гӹц пасна], а ӹнде йӓнгдӓм Кӹтӹшӹ дӓ Перегӹшӹ докы пӧртӹлӹндӓ.
*2:6 Ис 28:16. *2:7 Пс 117:22, Ис 8:14. *2:15 Ирӹк – воля, желание. *2:22 Ис 53:9.1 Тенгеок тӓӓт, вӓтӹвлӓ, ӹшке марывлӓдӓм колыштда. Тӹнӓм Йымын шамакшым колыштдымы марывлӓ ӹшке вӓтӹвлӓштӹн ӹлӹмӓш доно нимахань шамак гӹц паснаок ӹняндӓрӹмӹ лит,
2 вет тӓмдӓн ирен, Йымы гӹц лӱдӹн ӹлӹмӹдӓм ужыт.
3 Тӓмдӓн цевердӓ вӹлнӹ – айыртемӓлтшӹ ӱп тӹвӹлӹштӹ, шӧртньӹм сӓкӹмӓштӹ ӓль нӓрӓтӓн выргемӹштӹ – агыл,
4 а йӓнг кӧргӹштӹ – вашталтдымы, смирнӓ дӓ тыр шӱмӹштӹ лижӹ – тидӹ Йымы анзылны шергӓкӓн.
5 Молнам святой вӓтӹвлӓӓт, Йымылан уанен, ӹшкӹмӹштӹм тенгеок нӓрӓенӹт, марывлӓштӹм колыштыныт.
6 Тенгеок Сарра Авраамым колыштын, тӹдӹм хоза манын. Тӓӓт пурым ӹштедӓ дӓ нимахань лӱдмӓш гӹц ада лӱд гӹнь, тӓ Сарран тетявлӓжӹ ылыда.
7 Тенгеок тӓӓт, марывлӓ, тӓлӓндӓ ыдылашда ӓптӹртӹш ӹнжӹ ли манын, вӓтӹвлӓдӓн силадымы ылмыштым ужын, сагашты шот доно ӹлӹдӓ, нӹнӹм шотеш пиштӹдӓ, вет нӹнӹ тӓ сагада иквӓреш Йымын благодатьшы доно пумы ӹлӹмӓшӹн наследникшӹ ылыт.
8 Мычашеш келесӓш гӹнь, цилӓн икышын, жӓлӓйӹшӹ, шӱмбел яратышы, пуры йӓнгӓн, келшен ӹлӹшӹ, смирнӓ лидӓ.
9 Худа тӓреш худа доно ӓль вырседӹлмӹ тӓреш вырседӹлмӹ доно идӓ тӱлӹ, анешлӓ, пурым веле согоньлыда, тӓ вет пӓледӓ: тӓ Йымын благословайымыжым нӓлдӓ манын, тенге ӹштӓш ӱжмӹ ылыда.
10 Вет
«кӱ ӹлӹмӓшӹм яратынежӹ дӓ пуры кечӹвлӓм ужнежӹ,
тӹдӹ ӹшке йӹлмӹжӹм худа гӹц
дӓ ӹшке ышмажым алталышы шаявлӓ гӹц кычыжы;
11 худа гӹц карангжы дӓ пурым ӹштӹжӹ;
тырым кӹчӓлжӹ дӓ тӹдӹн докы лишемӓш цацыжы.
12 Вет Господьын сӹнзӓжӹ тӧр ӹштӹшӹ эдемвлӓ докы
дӓ Тӹдӹн пӹлӹшӹжӹ нӹнӹн ыдылмышты докы сӓрӓлмӹ,
но, худам ӹштӹшӹвлӓм мӱлӓндӹ вӹлец пӹтӓрӓш манын,
Господьын лицӓжӹ нӹнӹ ваштареш ылеш».*
13 Тӓ пурым ӹштӹмӹ верц пыт цацедӓ гӹнь, кӱ тӓлӓндӓ худам ӹштӓ?
14 Но тӧр ӹштӹмӹдӓ верц парваледӓ гӹнь, тӓ пуры цӓшӓн ылыда, нӹнӹн лӱдӹктӹмӹштӹ гӹц идӓ лӱд дӓ идӓ ӧр.
15 Ӹшке йӓнгӹштӹдӓ Господь Йымым свящӓйӹдӓ; тӓмдӓн уанымашда шотышты ынгылдарымашым ядшылан цилӓлӓн смирнӓн дӓ шотеш пиштен ответӹм пуаш соок йӓмдӹ лидӓ.
16 Пуры совестян лидӓ, тӹнӓм Христос доно ушнымашты пурын ӹлӹмӹдӓм шудалшывлӓ тӓмдӓм худавлӓм вырсымы семӹнь вырсымыштылан намысыш пырат.
17 Вет Йымын ирӹкшӹ* семӹнь гӹнь, худа пӓшӓ гишӓн агыл, а пуры пӓшӓ гишӓн парвалымыда яжо лиэш.
18 Вет Христосат, мӓмнӓм Йымы докы кандаш манын, икӓнӓ мӓмнӓн сулыквлӓнӓ верц парвален, тӧр ӹштӹшӹ – тӧрсӹр эдемвлӓ верц. Тӹдӹ кӓпшӹ доно пуштмы лин, но шӱлӹш доно ӹлӹжӹн.
19 Шӱлӹш донок Тӹдӹ кен дӓ кызаматышты ылшы шӱлӹшвлӓлӓн попен.
20 Перви, Ной ӹлӹмӹ веремӓн, ковчегӹм стройымы годым, кынам Йымы цӹтен вычен, нӹнӹ шамак колыштдымы ылыныт. Ковчегӹштӹ икманяр эдем веле, вес семӹньжӹ кӓндӓкш йӓнг, вӹд гач ытаралтын.
21 Тӹнӓмшӹ семӹньок кӹзӹт мӓмнӓмӓт вӹд, вес семӹньжӹ крестӹмӓш, Иисус Христосын ӹлӹжмӹжӹ гач ытара, тидӹ – кӓп гӹц лявӹрӓм мышкын колтымаш агыл, а пуры совесть доно ӹлӓш Йымы гӹц ядмаш.
22 Христос пӹлгомыш кузен дӓ Йымын вургымла монгырыштыжы шӹнзӓ. Ангел, власть дӓ силавлӓ Тӹдӹн кидшӹ лӹвӓлнӹ ылыт.
*3:10-12 Пс 33:13-17. *3:17 Ирӹк – воля, желание.1 Тенге Христос мӓ верцнӓ кӓпшӹ дӓ йӓнгжӹ доно парвален гӹнь, тӓӓт тенгеок тӹ шанымашым вырсы хӓдӹр семӹнь нӓлдӓ, вет кӓп доно парвалышы сулыкланаш цӓрнӓ,
2 седӹндон тӹдӹ кӓп доно ӹлӓш кодшы курымжым ӹнде эдемӹн сулыкланымыжы семеш агыл, а Йымын ирӹкшӹ* семӹнь ӹлӓ.
3 Тӧр Йымым пӓлӹдӹмӹвлӓн кымылыштым шоктен, эртӹшӹ ӹлӹмӹ веремӓштӹ мам ӹштендӓ, тидӓт ситӓ: тӓ лявӹрген, сулыкланен, [пӱэргӹ пӱэргӹ доно каштын, вольык доно каштын, худам ӹштен,] ӓрӓкӓм йӱн, шотде качкын-йӱн дӓ идоллан намысдеок кымал ӹлендӓ.
4 Но тӓ нӹнӹ доно иквӓреш ярдымы пӓшӓвлӓшкӹ ада ушны, седӹндон нӹнӹ ӧрӹт дӓ тӓмдӓм вырсат.
5 Ӹлӹшӹ дон колышывлӓм суяш Йӓмдӹ Ылшы анзылны нӹнӹ шамакым кычышашлык ылыт.
6 Вет колышывлӓ эдем семӹнь кӓп доно суялтыныт гӹнят, Йымы семӹнь шӱлӹш доно ӹлӹштӹ манын, нӹнӹлӓнӓт Пуры Уверӹм шайыштмы.
7 Но цилӓжӹлӓнӓт мычаш лишемеш. Тенгежӹ ыдылмыда годым ышан-шотан дӓ ары шанымашан лидӓ.
8 Сек когонжок иктӹ-весӹдӓ докы цат яратымашда лижӹ, вет яратымаш шукы сулыкым леведеш.
9 Ӧпкӓлӹдеок иктӹ-весӹдӓм ӹшке докыда пыртыда.
10 Тӓ логӹцдӓ каждыйжы, Йымын шукы сӹнӓн благодатьшы доно пӓшӓм ӹштӹшӹ пуры пӓшӓзӹ семӹнь, Тӹдӹ гӹц нӓлмӹ моштымаш доно иктӹ-весӹлӓн служыда.
11 Иктӓжӹ попа гӹнь, Йымын шамакшым попымы семӹнь попыжы, кӱ служа гӹнь, Йымын пумы сила доно служыжы. Йымы цилӓ шотыштат Иисус Христос гач лӹмлештӓрӹмӹ лижӹ. Тӹдӹлӓн курым-курымеш лӹмлештӓрӓлтмӓш дӓ сила лижӹ. Аминь.
12 Яратымывлӓэм, тӓ донда иктӓ-ма ынгылыдымы лиэш манын шанен, тӓмдӓм тергӓш толшы тыллан идӓ ӧр.
13 Христосын парвалымашкыжы ушнымыда семӹнь сусу лидӓ, тӹнӓм Тӹдӹн лӹмлештӓрӓлтмӹжӹ каймы годымат сусуланаш дӓ ӹвӹртӓш тӹнгӓлӹдӓ.
14 Тӓмдӓм Христосын лӹмжӹ верц вырсат гӹнь, пуры цӓшӓн ылыда: Лӹмлештӓрӓлтшӹ Шӱлӹш, Йымын Шӱлӹш, тӓ вӹлнӹдӓ. Нӹнӹ Тӹдӹм мыскылат, а тӓ лӹмлештӓредӓ.
15 Тӓ логӹцдӓ иктӓт эдем пуштмылан, шолыштмылан ӓль худам ӹштӹмӹлӓн, ӓль эдем пӓшӓш шӹшкӹлтмӹлӓн ӹнжӹ парвалы.
16 Но иктӓжӹ Христослан ӹнянӹмӹжӹ гишӓн парвала гӹнь, ӹнжӹ намысланы, а тенге лимӹлӓн Йымым лӹмлештӓрӹжӹ.
17 Вет Йымын церкӹжӹ гӹц судын тӹнгӓлмӹ веремӓжӹ лиэш. А мӓ гӹцнӓ тӹнгӓлеш гӹнь, Йымын Евангелижӹ ваштареш ылшывлӓлӓн махань мычаш лиэш?
18
«Тӧр ӹштӹшӹ цуц-цуц ытаралтеш гӹнь,
Йымым жеплӹдӹмӹ дӓ сулыкан эдем кышкы вӓрештеш?»*
19 Тенгежӹ Йымын ирӹкшӹ семӹнь парвалышывлӓӓт ӹшке йӓнгӹштӹм ӹнян Ӹштӹшӹн кидӹшкӹжӹ пушты дӓ варажат пурым ӹштӹштӹ.
*4:2 Ирӹк – воля, желание. Тенгеок – 4:19. *4:18 Притч 11:31.1 Мӹнь, ӹшкежӓт пресвитер, Христосын парвалымыжым ужшы дӓ шайыштшы, пачылтшашлык лӹмлештӓрӓлтмӓшӹм иквӓреш пайылышы эдем, тӓмдӓн пресвитервлӓдӓм сарвалем:
2 Йымын тӓлӓндӓ ӹнянен пумы кӹтӧжӹм кӹтӹдӓ, неволя агыл, а ӹшке кымыл доно, Йымылан яралын тӹдӹм оролыда, намысан пайдам кӹчӓлдеок, а улы кымыл доно цацыда,
3 тӓлӓндӓ ӹнянен пумы эдемвлӓм кид лӹвӓлнӹдӓ идӓ кычы, а кӹтӧлӓн корным анжыктышы лидӓ.
4 Кынам Тӹнг Кӹтӧзӹ толын лӓктеш, тӓ лӹмлештӓрӓлтмӓшӹн лӹвӹжгӹдӹмӹ вуйгӹшӹлӹм нӓлӹдӓ.
5 Сӓмӹрӹквлӓӓт, пресвитервлӓм колыштда. Цилӓнӓт, иктӹ-весӹм колыштын, иктӹ-весӹ доны смирнӓ лидӓ, вет «Йымы когоэшнӹшӹвлӓ ваштареш ылеш, а смирнӓвлӓлӓн благодатьым пуа».*
6 Тенгежӹ, Йымын силан кид лӹвӓлнӹжӹ лиӓш ӹшкӹмдӓм лапемдӹдӓ, ӹшке веремӓштӹжӹ Тӹдӹ тӓмдӓм кӱкшемдӓ.
7 Хоть-махань шытырдам Йымылан ӹнянен пуда: Тӹдӹ тӓ верцдӓ тыргыжлана.
8 Ары шанымашан лидӓ, идӓ амалы: тӓ ваштарешдӓ шалгышы, диавол, ырлышы лев семӹнь, кӱм нелӹн колташ кӹчӓл каштеш.
9 Пингӹдӹ ӹнянӹмӓш доно тӹдӹ ваштареш шагалда. Тӓ пӓледӓ: тӓмдӓн шӱмбелвлӓлӓндӓ улы сӓндӓлӹкӹштӹ техеньок парвалымашым цӹтӓш вӓрештеш.
10 А Христос Иисус доно ушнымашты мӓмнӓм Ӹшкӹмжӹн курымаш лӹмлештӓрӓлтмӓшкӹжӹ ӱжшӹ цилӓ благодатьын Йымыжы, кӹтӹк веремӓ орлыкым тырхымыкыда, тӓмдӓм тӧрлӓтӹжӹ, цаткыдемдӹжӹ, силаным ӹштӹжӹ дӓ пингӹдемдӹжӹ.
11 Тӹдӹлӓн лӹмлештӓрӓлтмӓш дӓ сила курым-курымеш лижӹ. Аминь.
12 Мӹнь тӓлӓндӓ Силуан гач кӹтӹкӹн сирӹшӹм, тӹдӹм ӹнян шӱмбелеш шотлем. Мӹнь тӓмдӓм кымылангдынем дӓ, тидӹжӹ Йымын лачок благодатьшы манын, пӓлдӹртен келесӹнем ыльы. Ти благодатьышты тӓ пингӹдӹн шалгедӓ.
13 Тӓ сагада иквӓреш айырен нӓлмӹ Вавилон церкӹ, тенгеок Марк эргӹм тӓлӓндӓ шӓлӓм колтат.
14 Иктӹ-весӹдӓм яратымаш шыпшалмы доно вӓшлидӓ. Тӓлӓндӓ, Христос Иисус доно ушнышывлӓлӓн, цилӓлӓн тыр лижӹ. Аминь.
*5:5 Притч 3:34.