3 (1-3) Пуры Феофил, орланен колымыжы паштек Иисус живой ылмыжым айырен нӓлмӹ Апостолвлӓжӹлӓн шукы семӹнь ӹняндӓрен анжыктен, нӹллӹ кечӹ нӹнӹлӓн кайын дӓ Йымын Кугижӓншӹ гишӓн шайыштын. Нӹнӹлӓн Святой Шӱлӹш гач шӱдӹмӓшӹжӹм кодымыкы, Иисус пӹлгомыш кузен кен.* Тӹнгӓлтӹш гӹцок ти кечӹ якте мам ӹштӹмӹжӹ дӓ мам тымдымыжы гишӓн цилӓ пӹтӓришӹ книгӓштӹ сиренӓм.
4 Кынам Иисус Апостолвлӓ доно иквӓреш погынен, нӹнӹлӓн шӱден: «Иерусалим гӹц идӓ ке, Ӓтян сӧрӹмӹжӹн шокталтмым вычыда. Ти сӧрӹмӹ гишӓн тӓ Мӹнь гӹцем колында.
5 Вет Иоанн вӹд доно крестен, а тӹлец вара икманяр кечӹштӹ тӓ Святой Шӱлӹш доно крестӹмӹ лидӓ».
6 Тенге, иквӓреш ылмышты годым Апостолвлӓ Иисус гӹц ядыныт: «Господь, ти жепӹн ма Израиль кугижӓншӹм угӹц ӹштет?»
7 Иисус нӹнӹлӓн келесен: «Ӓтян ӹшке властьшы доно пӓлемдӹмӹ жеп дон кечӹм тӓлӓндӓ пӓлӓш ак кел,
8 но кынам тӓ вӹкӹдӓ Святой Шӱлӹш вала, тӓ силам нӓлӹдӓ дӓ Иерусалимӹштӓт, улы Иудей дӓ Самари мычкат, мӱлӓндӹ тӹр яктеӓт Мӹньӹн свидетелем лидӓ».
9 Тенге манмыкы, Апостолвлӓн сӹнзӓ анзылнышток Иисус пӹлгомыш кузен кен, дӓ пӹл Тӹдӹм нӹнӹн сӹнзӓ ужмышты гӹц нӓнген.
10 Тӹдӹн кузен кемӹжӹ годым нӹнӹ пӹлгомышкы тусарен анженӹт. Трӱк нӹнӹ докы ош выргемӓн кок пӱэргӹ толын шагалын,
11 нӹнӹ келесенӹт: «Галилейӹн эдемвлӓжӹ, мам тенге пӹлгомышкы анжен шалгедӓ? Тӓ дорцда ти Иисусын пӹлгомышкы кузен кемӹжӹм ужында. Кыце Тӹдӹ кеен, тенгеок пӧртӹлеш».
12 Тӹнӓм Апостолвлӓ Елеон манмы кырык гӹц Иерусалимӹш пӧртӹлӹнӹт, кырыкшы Иерусалим гӹц мӹндӹрнӹ агыл, кукшыгечшӹ корны* нӓрӹ ӧрдӹжӹштӹ ылеш.
13 Иерусалимӹш толмыкышты, кӱшӹл пачаш кӹдежӹш Петр дон Иаков, Иоанн дон Андрей, Филипп дон Фома, Варфоломей дон Матфей, Алфейӹн Иаковшы дон Зилот манмы Симон дӓ Иаковын Иудажы пыренӹт. Ти жепӹн тишӓк погынат ылын.
14 Нӹнӹ цилӓнӓт икышын со ыдылыныт дӓ Йымым сарваленӹт, нӹнӹ доно иквӓреш икманяр ӹдӹрӓмӓш, Иисусын Мария Ӓвӓжӹ дӓ Тӹдӹн шӱмбелвлӓжӹ ылыныт.
16 (15-16) Ик кечӹн, кынам шӱдӹ коклы нӓрӹ эдем погынен ылын, Петр тыменьшӹвлӓ лошкы лӓктӹн шагалын дӓ келесен: «Шӱмбелвлӓ! Иисусым кычен нӓнгешӹвлӓм видӹшӹ Иуда гишӓн Святой Шӱлӹш Писаништӹ Давид гач мам анзыцок келесен, тӹдӹ шокталтшашлык ылын.
17 Иуда мӓ логӹцнӓ иктӹжӹ ылын, дӓ тӹдӹлӓнӓт ти служымы пӓшӓ вӓрештӹн».
18 Худам ӹштӹмӹлӓн нӓлмӹ оксажы доно мӱлӓндӹм нӓлӹн, но шынгалт вазынат, мӹшкӹржӹ шелӹн, цилӓ кӧргӹжӹ лӓктӹн вазын.
19 Тидӹ гишӓн Иерусалимӹштӹ ӹлӹшӹвлӓ цилӓн пӓлен нӓлӹнӹт, тенге ти мӱлӓндӹжӹмӓт ӹшкӹмӹштӹн йӹлмӹштӹ доно Акелдама манын лӹмденӹт, вес семӹньжӹ «Вӹрӓн мӱлӓндӹ» лиэш.
20 «Псалтирь книгӓштӹ сирӹмӹ:
”Тӹдӹн пӧртшӹ охыр лижӹ,
Тӹштӹ иктӓт ӹнжӹ ӹлӹ”,
дӓ тенгеок сирӹмӹ:
”Тӹдӹн вӓржӹм весӹ нӓлжӹ”.*
22 (21-22) Седӹндон Господь Иисусын лоштына ӹлӹмӹжӹ годым сагана ылшы эдемвлӓ гӹц иктӹжӹ мӓ донна иквӓреш Тӹдӹн ӹлӹж кӹньӹлмӹжӹн свидетельжӹ лишӓшлык. Тӹдӹжӹ, Иоаннын крестӓш пыртымыжы гӹц тӹнгӓлӹн, Иисусын мӓ дорцна пӹлгомыш кузен кемӹ кечӹ якте со сагана каштшы эдем лишӓшлык».
23 Коктым шагалтенӹт: Варсава манмы Иосифӹм, тӹдӹм эче Иуст маныныт, дӓ Матфийӹм.
25 (24-25) Погынышывлӓ тенге попен ыдылыныт: «Тӹнь, Господь, цилӓн шӱмӹштӹм пӓлет. Иуда, вӓрештшӓшлык вӓрӹшкӹжӹ кеӓш манын, служымы пӓшӓжӹм, Апостол вӓржӹм шуэн. Ти кок эдем логӹц кыдыжым вӓрешӹжӹ айыренӓт, мӓлӓннӓ анжыкты».
26 Вара нӹнӹ шӹвӓм ӹштенӹт, шӹвӓ Матфийлӓн вӓрештӹн, дӓ тӹдӹм луатик Апостол докы ушенӹт.
*1:1-3 «Кузен кен» – греклӓ сирӹмӓштӹ тиштӹ дӓ молы техень вӓрвлӓштӹ «нӓлӓлтӹн». *1:12 Кукшыгечшӹ корны – ик уштыш нӓрӹ, кукшыгечӹн тинӓрӹм веле кеӓш лиэш ылын. *1:20 Пс 68:26, 108:8.1 Пятидесятница кечӹ толын шомыкы, нӹнӹ цилӓнӓт иквӓреш икышын ылыныт.
2 Трӱк пӹлгом гӹц силан мардеж ӹфӹлӹмӹ гань юк шактен дӓ нӹнӹн погынымы улы пӧртӹм темен.
3 Нӹнӹлӓн йӹлмӹн-йӹлмӹн шелӓлтшӹ тыл ара гань кайын, дӓ каждый вӹкӹ ик пасна тыл салым вален.
4 Цилӓнӓт Святой Шӱлӹш доно темӹнӹт дӓ молы йӹлмӹ доно попаш тӹнгӓлӹнӹт, мам Шӱлӹш попаш пуэн, тӹдӹм увертӓренӹт.
5 Иерусалимӹштӹ свет вӹлнӹшӹ цилӓ халык логӹц толшы, Йымым шӱм вашт шотеш пиштӹшӹ иудейвлӓ ылыныт.
6 Ти юк лӓкмӹкӹ, халык погынен дӓ когон ӧрӹн, вет каждыйжы ӹшке йӹлмӹжӹ доно попымым колын.
7 Цилӓн ӧрӹнӹт дӓ иктӹ-весӹштӹлӓн цӱдеен попенӹт: «Ти попышывлӓ цилӓнӓт Галилей гӹц агылеп ма?
8 Кыце мӓ каждыйжы ӹшкӹмнӓн шачмы йӹлмӹнӓм колына?
9 Мӓ цилӓн: парфян халык, миди халык, еламитвлӓ, Месопотамиштӹ, Иудейӹштӹ дӓ Каппадокиштӹ, Понтышты дӓ Асиштӹ,
10 Фригиштӹ дӓ Памфилиштӹ, Египетӹштӹ дӓ Ливин Кириней сагашы вӓрӹштӹ ӹлӹшӹвлӓ, дӓ Рим гӹц толшывлӓ, иудейвлӓ, Израильӹн Йымыжылан ыдылшы вес халык эдемвлӓ,
11 крит дӓ араб халык – цилӓн мӓ Йымын кого пӓшӓжӹ гишӓн шачмы йӹлмӹнӓ доно попымыштым колына».
12 Цилӓн когон ӧрӹнӹт дӓ, ынгылен кердде, иктӹ-весӹштӹлӓн попенӹт: «Ма тидӹ техеньӹ?»
13 А южшы мыскылен ваштыл попен: «Нӹнӹ тотлы якшар ӓрӓкӓм утыдон шукым йӱнӹт».
14 А Петр молы луатик Апостол доно иквӓреш кӹньӹл шагалын, юкшым когоэмден попаш тӹнгӓлӹн: «Иудейвлӓ дӓ Иерусалимӹштӹ цилӓ ӹлӹшӹвлӓ! Мам попымем пыт колыштда, тидӹм пӓлен лидӓ:
15 ти эдемвлӓ тӓмдӓн шанымыда семӹнь йӱкшӹ агылеп, вет кӹзӹт кечӹ тӹнгӓлмӹ годшен кым цӓшӹш* веле кен.
16 Мам тӓ ужыда, тӹдӹм пророк Иоиль гач анзыцок келесӹмӹ:
17 ”Пӹтӓртӹш кечӹвлӓн, – попа Йымы, –
Мӹнь цилӓ эдем вӹкӹ Шӱлӹшемӹм опталам,
тӹнӓм тӓмдӓн эргӹвлӓ дон ӹдӹрвлӓдӓ
пророкла попаш тӹнгӓлӹт,
ӹрвезӹвлӓ каймашвлӓм ужыт,
а шонгы пӱэргӹвлӓ – омыным.
18 Тӹ кечӹвлӓн ӹшке Шӱлӹшемӹм
Мӹнь цоравлӓэм вӹкӹ опталам, –
пӱэргӹ вӹкӓт, ӹдӹрӓмӓш вӹкӓт, –
цилӓнӓт пророкла попаш тӹнгӓлӹт.
19 Цӱдӓвлӓм пӹлгомышты кӱшнӹ,
пӓлӹквлӓм мӱлӓндӹ вӹлнӹ ӱлнӹ анжыктем:
вӹрӹм, тылым дӓ ныгыды шӹкшӹм.
20 Господьын кого дӓ лӹмлештшӹ кечӹжӹ толмы анзыц
кечӹ пӹцкемӹшӹш сӓрнӓлтеш, тӹлзӹ – вӹрӹш;
21 а, палшыкым ядын, Господьын лӹмжӹм ӱжшӹ
хоть-кӱӓт ытарымы лиэш”.*
22 Израильӹн эдемвлӓжӹ, ти попымем колыштда: Назорей Иисус тӓлӓндӓ Йымын айырен нӓлмӹ Эдемжӹ ылын. Тӓ ӹшкеӓт пӓледӓ: тидӹм Йымы шукы йиш силам, цӱдӓвлӓм дӓ пӓлӹквлӓм тӓ лоштыда Тӹдӹн гач ӹштӹмӹжӹ доно анжыктен.
23 Йымын анзыцок шанен пиштӹмӹжӹ дӓ пӓлӹмӹжӹ семӹнь Тӹдӹ тӓлӓндӓ пуалтын, а тӓ Тӹдӹм нӓлӹндӓ дӓ законым пӓлӹдӹмӹвлӓн палшымышты доно крестеш пыдален пуштында.
24 Но Йымы Тӹдӹм ӹлӹжтен дӓ колымашын орлыкшы гӹц ытарен – колымашын Тӹдӹм кычен кердшӹ силажат ылде.
25 Давид Тӹдӹ гишӓн тенге попен:
”Ӹшке анзылнем соок мӹнь Господьым ужам,
мӹлӓнем лыпшалташ ӹнжӹ ли манын,
Тӹдӹ вет мӹньӹн вургымла монгырыштем ылеш.
26 Тидӹ гишӓн йӓнгемӓт сусу лин
дӓ йӹлмемӓт ӹвӹртӓ,
кӓпемӓт уанымаш*
доно ладнангеш:
27 Тӹнь вет мӹньӹн йӓнгемӹм адеш ат коды,
святоетлӓн шӱн кимӓшӹм ужаш ат пу.
28 Тӹнь мӹлӓнем ӹлӹмӓш корным анжыктенӓт,
Тӹньӹн цӹреэт анзылны мӹньӹм сусу доно темет”.*
29 Шӱмбелвлӓ, мӓмнӓн Давид ӓтя-тьотяна гишӓн тӓлӓндӓ тӧрӧк келесӓш лиэш: тӹдӹ колен, тӹдӹм тайымы, тӹдӹн шӹгержӹ тагачат мӓ донна.
30 Пророк ылынат, Давид пӓлен: Христосым тӹдӹн йыхшы гӹц шагалташ дӓ тӹдӹн престолышкыжы шӹндӓш Йымы тӹдӹлӓн цуратлен сӧрен.
31 Христосын ӹлӹж кӹньӹлшӓшӹм тӹдӹ анзыцок ужын дӓ, йӓнгжӹ адеш кодымы ак ли, кӓпшӹ шӱн киӓш ак тӹнгӓл, манын попен.
32 Ти Иисусым Йымы ӹлӹжтен, тидӹм мӓ цилӓн свидетельствуенӓ.
33 Тӹдӹ Йымын вургымла кидшӹ доно* кузыктымы ылын. Иисусшы сӧрӹмӹ Святой Шӱлӹшӹм Ӓтя гӹц нӓлӹн дӓ опталын, тӓ кӹзӹт тидӹм ужыда дӓ колыда.
35 (34-35) Давидшӹ пӹлгомыш кузыде, но тенге попен:
”Господь Господемлӓн келесен:
Тӹньӹн тышманвлӓэтӹм ял лӹвӓкет пиштӹмешкем,
Мӹньӹн вургымла велнем шӹнзӹ”.*
36 Тенге, цилӓ Израиль халык пингӹдӹн пӓлӹжӹ: тӓмдӓн пыдален сӓкӹмӹ Иисусым Йымы Господьым дӓ Христосым ӹштен».
37 Колмыкышты, ти шамак шӱмешӹштӹ когон тӹкнен. Нӹнӹ Петр дон вес Апостолвлӓлӓн келесенӹт: «Шӱмбелвлӓ, мӓлӓннӓ мам ӹштӓш?»
38 А Петр нӹнӹлӓн попен: «Йымы сулыкдам простьыжы манын, сулык гӹц карангда дӓ Иисус Христос лӹмеш цилӓнӓт крестӓлтдӓ, тӹнӓм подарка семӹнь Святой Шӱлӹшӹм нӓлӹдӓ.
39 Мӓмнӓн Господь Йымына кӱм ӱжеш, цилӓштӹлӓнӓт Святой Шӱлӹшӹм пуаш сӧрен: тӓлӓндӓӓт, шачшывлӓлӓндӓӓт, мӹндӹрнӹ ӹлӹшӹвлӓлӓнӓт».
40 Тенгеок шукы молы шамак донат Петр ӹняндӓрен попен дӓ кӓнгӓшӹм пуэден. Тӹдӹ келесен: «Ти локтылалтшы йых гӹц ытаралтда».
41 Тенге, Тӹдӹн шамакшым пурын вӓшлишӹвлӓ крестӓлтӹнӹт, дӓ ӹнянӹшӹвлӓ ти кечӹн кым тӹжем нӓрӹ эдемеш шукемӹнӹт.
42 Ӹнянӹшӹвлӓ, Апостолвлӓн тымдымыштым колыштын, ӹзӓк-шыжаракла ӹленӹт, киндӹм тодылын качкаш дӓ йымыдылаш погыненӹт.
43 Цилӓ эдем лӱдӹн, Апостолвлӓ гач Иерусалимӹштӹ цӱдӓвлӓ дӓ пӓлӹквлӓ шукы линӹт.
44 Но ӹнянӹшӹвлӓ иквӓреш ылыныт, дӓ цилӓжӓт нӹнӹн иктеш ылын.
45 Нӹнӹ пӧртӹштӹм дӓ пурлыкыштым выжаленӹт, оксажым каждыйлан керӓл семӹнь пайылен пуэнӹт,
46 кечӹнь Йымын пӧртӹштӹ икышын погыненӹт, тонышты киндӹм иквӓреш тодылыныт, ӹвӹртен дӓ пуры шӱм доно качкыныт.
47 Нӹнӹ Йымым хваленӹт, дӓ улы халык нӹнӹ вӹкӹ пурын анжен. Господь ытарымывлӓм кечӹнь Церкӹш шукемден шалген.
*2:15 Кым цӓш – кӹзӹтшӹ жепӹштӹ ӹндекш цӓш ирок. *2:17-21 Иоиль 2:28-32. *2:26 Уанымаш – надежда. *2:25-28 Пс 15:8-11. *2:33 «Вургымла кидшӹ доно» – тидӹм «Вургымла векӹжӹ» манынат сӓрӓш лиэш. *2:34-35 Пс 109:1.1 Петр дон Иоанн, ӹндекш цӓшӹш* кемӹкӹ, ыдылмы жепеш Йымын пӧртӹш кенӹт.
2 Тӹштӹ шачынок акшак эдем ылын. Тӹдӹм каждый кечӹн Йымын пӧртӹн Цевер манмы капка докы намал канденӹт дӓ пырышывлӓ гӹц кӹчӓш шӹнденӹт.
3 Акшак эдем Йымын пӧрт докы лишемшӹ Петр дон Иоанным ужын дӓ нӹнӹ гӹц кӹчен ядын.
4 Нӹнӹ тӹдӹм тӹшленрӓк анжалыныт, вара Петр келесен: «Мӓ вӹкӹнӓ анжал».
5 Иктӓ-мам пуат манын шанен, акшак эдем нӹнӹм тусарен анжен,
6 но Петр келесен: «Шиэм дӓ шӧртнем мӹньӹн уке, но маэм улы, тӹдӹм тӹлӓт пуэм: Назорей Иисус Христос лӹмеш кӹньӹл дӓ ашкед».
7 Вара тӹдӹм вургымла кид гӹцшӹ кычен кӹньӹлтен, тӹнӓмок акшакын ялжы дӓ ежӹнгвлӓжӹ силам нӓлӹнӹт.
8 Тӹдӹ тӹргештен кӹньӹлӹн, ял вӹлнӹжӹ шалген дӓ кашташ тӹнгӓлӹн. А вара ашкедӹн, тӹргештӹлӹн дӓ Йымым мактен, Апостолвлӓ доно иквӓреш Йымын пӧртӹш пырен.
9 Тӹдӹн каштмыжым дӓ Йымым хвальымыжым цилӓ халык ужын.
10 Ти эдем Йымын пӧртӹн Цевер капкажы сага молнам кӹчен шӹнзӹшӹ ылмым пӓлӹмӹкӹ, тӹдӹн доно тенге лимӹ гишӓн когон лӱдӹнӹт дӓ ӧрӹнӹт.
11 Паремдӹмӹ акшак эдем Петр дон Иоанн гӹц карангде, седӹндон халык ӧрмӹжӹ доно нӹнӹ докы Соломонын левӓшӓн кудывичӹжӹ манмы вӓрӹш пӹсӹн погынен.
12 Тидӹм ужмыкы, Петр халыклан попаш тӹнгӓлӹн: «Израильӹн эдемвлӓжӹ! Малын тӓ тидӹлӓн ӧрӹдӓ? Малын мӓ вӹкӹнӓ анжедӓ, вуйта мӓ тӹдӹн кашташ тӹнгӓлмӹжӹм ӹшке силана ӓли пурылыкна доно ӹштеннӓ?
13 Авраамын, Исаакын, Иаковын Йымышты, ӓтявлӓнӓн Йымышты, Иисусын, ӹшке Шачшыжын, лӹмлештӓрӓлтмӹжӹм анжыктен. Тӓ Тӹдӹм пушташ пуэндӓ, ирӹкӹш лыкташ решӹшӹ Пилат анзылны Тӹдӹн докы тупынь сӓрнӓлӹндӓ.
14 Тӓ Святой дӓ Тӧр Ӹштӹшӹ гӹц карангында дӓ эдемӹм пуштшым ирӹкӹш колташ ядында,
15 тӓ ӹлӹмӓшӹм Пушым пуштында, но Йымы Тӹдӹм колымаш гӹц ӹлӹжтен, тидӹлӓн мӓ свидетель ылына.
16 Тӓмдӓн ужмы дӓ пӓлӹмӹ эдем Иисусын лӹмжӹлӓн ӹнянӹмӹ верц силам нӓлӹн, Иисусын пумы ӹнянӹмӓш тӹдӹм тӓ анзылныда паремден.
17 Тенге гӹнят, шӱмбелвлӓ, пӓлем: тӓ дӓ вуйлатышывлӓдӓ мам ӹштӹмӹдӓм пӓлӹде ӹштендӓ.
18 Тенге Йымы, ӹшкӹмжӹн цилӓ пророквлӓжӹ гач мам увертӓрен, тӹдӹм шоктен: Христос орланен колышашлык ылын.
19 Тенгежӹ, сулыкда ӹштӹлӓлтшӹ манын, сулыкдам простьыктыда дӓ Йымы докы сӓрнӓлдӓ.
20 Господь дорц тӓлӓндӓ кӧргӹ силам ӹлӹжтӹшӹ жеп толжы, Тӹдӹ тӓлӓндӓ анзыцок пӓлемдӹмӹ Иисус Христосым колтыжы.
21 Цилӓ тӧрлӹмӹ жеп якте Тӹдӹ пӹлгомышты кодшашлык. Ти жеп гишӓн цилӓ святой пророкшы гач Йымы шукердшен попа.
22 Ӓтявлӓлӓннӓ Моисей келесен: ”Господь Йымыда мӹнь ганем Пророкым тӓ логӹцдӓ тӓлӓндӓ шагалта, мам Тӹдӹ тӓлӓндӓ попа, цилӓ шотыштат Тӹдӹм колыштда.
23 Тӹ Пророкын шамакшым колыштдымы керек-махань эдем халык логӹц пӹтӓрӹмӹ лиэш”.*
24 Самуил гӹц тӹнгӓлӹн, пророквлӓ цилӓнӓт, кӱ попен, нӹнӹ кӹзӹтшӹ кечӹвлӓ гишӓн анзыцок увертӓренӹт.
25 Тӓ пророквлӓн дӓ ӓтявлӓлӓндӓ Йымын пумы согоньжын эргӹштӹ ылыда. Согоньым пумы годым Йымы Авраамлан попен: ”Тӹньӹн вырлыкет гач мӱлӓндӹ вӹлнӹшӹ цилӓ йых благословаялтеш”.*
26 Ӹшкӹмжӹн Иисус Шачшыжым ӹлӹжтӹмӹкӹ, Йымы цилӓдӓм худа пӓшӓ гӹц карангдаш дӓ благословаяш Тӹдӹм сек анзыц тӓ докыда колтен».
*3:1 Ӹндекш цӓш – кӹзӹтшӹ жепӹштӹ кым цӓш кечӹвӓл. *3:22-23 Втор 18:15-19. *3:25 Быт 22:18.1 Петр дон Иоаннын халыклан попымышты годым священниквлӓ, Йымын пӧрт орол вуйлатышы дӓ саддукейвлӓ нӹнӹ докы лишемӹнӹт.
2 Нӹнӹ шӹдешкӹшӹ ылыныт, вет Петр дон Иоанн халыкым тымденӹт, Иисусын ӹлӹжмӹжӹ гишӓн попымы доно колымаш гӹц ӹлӹжмӹм увертӓренӹт.
3 Петр дон Иоанным роалтен кыченӹт, вады ылынат, ирок якте кызаматыш питӹренӹт.
4 А шамакыштым колыштшывлӓ шукынжы ӹняненӹт, ӹнянӹшӹ пӱэргӹжӹ вӹц тӹжем нӓрӹш шон.
5 Иргодешӹжӹ Иерусалимӹштӹ иудейвлӓн вуйлатышывлӓштӹ, халыкын когоракшывлӓ дӓ закон тымдышывлӓ погыненӹт.
6 Тӹшток архиерей Анна, тенгеок Каиафа, Иоанн, Александр дӓ архиерей йых гӹц молат ылыныт.
7 Петр дон Иоанным сек покшакы лыктын шагалтенӹт дӓ ядыштыныт: «Махань сила доно ӓли кӱн лӹм доно тӓ тидӹм ӹштендӓ?»
8 Тӹнӓм Петр, Святой Шӱлӹш доно темӹн, нӹнӹлӓн попен: «Халык вуйлатышывлӓ дӓ Израильӹштӹшӹ когораквлӓ!
9 Тагачы мӓ гӹцнӓ церлӹ эдемлӓн пуры пӓшӓм ӹштӹмӹ дӓ тӹдӹн кыце пареммӹжӹ гишӓн вӓшештӓш ядыт гӹнь,
10 тӓӓт пӓлӹдӓ, улы Израиль халыкат пӓлӹжӹ: тӓмдӓн пыдален сӓкӹмӹ, колымаш гӹц Йымын ӹлӹжтӹмӹ Назорей Иисус Христосын лӹмжӹ доно ти эдем анзылныда шулыкан шалга.
11 Тӓмдӓн, пӧрт ӹштӹшӹвлӓн, ярдымыш лыкмы, но огол негӹцеш пиштӹмӹ кӱ – Тӹдӹ.* Иктӓт весӹ ытарен ак керд,
12 мӓмнӓм ытарен кердшӹ вес лӹм сӓндӓлӹк вӹлнӹ эдемвлӓлӓн пуалтде».
13 Петр дон Иоаннын лӱддӹмӹштӹм ужмыкы, нӹнӹн тыменьдӹмӹ дӓ проста эдем ылмыштым пӓлӹмӹкӹ, ядыштшывлӓ ӧрӹнӹт, ти жепӹнок нӹнӹ Иисус доно иквӓреш лимӹштӹм пӓлен нӓлӹнӹт.
14 А сагашты шалгышы паремдӹмӹ эдемӹм ужын, тореш нимамат келесен кердделыт.
15 Нӹнӹлӓн Синедрион гӹц лӓктӓш шӱденӹт дӓ ӹшке лоштышты тенге попенӹт:
16 «Ти эдемвлӓ доно мӓлӓннӓ мам ӹштӹмӹлӓ? Нӹнӹ гач цӱдӓ лин, тидӹ рашт, тӹдӹ гишӓн Иерусалимӹштӹ ӹлӹшӹвлӓ цилӓнӓт ӹнде пӓлӓт, а мӓ техень цӱдӓ ылде манын ана керд.
17 Ти Иисусын лӹмжӹ гишӓн иктӹлӓнӓт ӹнжӹштӹ попеп манын, нӹнӹм лӱдӹктен цӓренӓ, тӹнӓм халык лошты тидӹ гишӓн увер утлаок ак шӓрлӹ».
18 Апостолвлӓм мӹнгеш ӱжмӹкӹ, Иисусын лӹмжӹ гишӓн нигынамат попашат, тымдашат ак ли манын, нӹнӹлӓн шӱденӹт.
19 Но Петр дон Иоанн нӹнӹлӓн тенге келесенӹт: «Тӓ ӹшке шаналтыда: Йымы гӹц утларак тӓмдӓм колыштына гӹнь, Йымы анзылны тидӹ тӧр ма?
20 Мам ужмына дӓ мам колмына гишӓн мӓ попыде ана керд».
21 Кӓнгӓшӓш погынышывлӓ Петр дон Иоанным, когон лӱдӹктен, ирӹкӹш колтенӹт. Нӹнӹм наказаш йӧнӹм моделыт, вет улы халык акшакын тӧрлӓнӹмӹжӹ гишӓн Йымым хвален,
22 вет кӱлӓн ти паремдӹмӹ цӱдӓ лин, тӹдӹлӓн нӹллӹ и утла ылын.
23 Ирӹкӹш лӓкмӹкӹ, Петр дон Иоанн ӹшкӹмӹнвлӓ докы толыныт дӓ архиерей дон халыкын когораквлӓжӹн мам попымыштым шайыштыныт.
24 А колыштмыкы, цилӓнӓт Йымылан икышын тенге ыдылыныт: «Пӹлгомым, мӱлӓндӹм, тангыжым дӓ, ма тӹштӹ улы, цилӓжӹмӓт ӹштӹшӹ Господь Йымы!
25 Тӹнь мӓмнӓн Давид ӓтянӓм, ӹшке цораэтӹм, Святой Шӱлӹш доно тенге попыктенӓт:
”Малын язычниквлӓ пыдыраналтыт,
малын халыквлӓ такешӹм шанат?
26 Мӱлӓндӹ вӹлнӹшӹ кугижӓвлӓ кӹньӹлӹнӹт,
Господь дӓ Тӹдӹн Христосшы ваштареш
вуйлатышывлӓ иквӓреш погыненӹт”.*
27 Лачокшымат, Ирод дон Понтий Пилат язычниквлӓ дӓ Израиль халык доно иквӓреш ти халашты Тӹньӹн шӹрӹмӹ Святой Иисус Шачшет ваштареш погыненӹт.
28 Мам ӹшке кидет дӓ шанымет доно Тӹнь анзыцок пӓлемденӓт, нӹнӹ тӹдӹм шоктенӹт.
29 А кӹзӹт, Господи, нӹнӹн лӱдӹктӹлмӹштӹм анжалыма дӓ цоравлӓэтлӓн Тӹньӹн шамакетӹм попаш лӱддӹмӓшӹм пуэмӓ.
30 Кидетӹм виктӓлтемӓ, церлӹвлӓ паремӹштӹ, Тӹньӹн Святой Иисус Шачшетӹн лӹмжӹ доно пӓлӹквлӓ дӓ цӱдӓвлӓ ӹштӓлтӹштӹ».
31 Нӹнӹ ыдылмыкышты, погынымы вӓрӹштӹ цӹтӹрнӓлтӹн, цилӓн Святой Шӱлӹш доно темӹнӹт дӓ Йымын шамакшым лӱдде попаш тӹнгӓлӹнӹт.
32 Ӹнянӹшӹвлӓ ик шӱмӓн, ик йӓнгӓн ылыныт, ӹшкӹмӹштӹн пурлыкышты гӹц иктӓт нимамат мӹньӹн манде, а цилӓ нӹнӹн иктеш ылын.
33 Господь Иисус Христосын ӹлӹж кӹньӹлмӹжӹ гишӓн Апостолвлӓ кого сила доно свидетельствуенӹт, дӓ цилӓштӹ вӹлнӹ Йымын кого благодатьшы ылын.
34 Нӹнӹ лошты иктӓт укеӓн ылде, вет кӱн мӱлӓндӹжӹ ӓли пӧртшӹ ылын, выжаленӹт, выжалымы оксажым
35 Апостолвлӓн ял сагашты пиштенӹт, дӓ нӹнӹжӹ, кӱлӓн ма келӹн, каждыйлан пуэнӹт.
36 Теве Кипреш шачшы Иосий лӹмӓн Левий йых эдем ылын, тӹдӹм Апостолвлӓ Варнава манын лӹмденӹт, вес семӹньжӹ «ладнангдарымашын эргӹжӹ» лиэш.
37 Тӹдӹн ныржы ылын. Иосий ныржым выжален, оксажым канден дӓ Апостолвлӓлӓн ял сагашты пиштен.
*4:11 Пс 117:22. *4:25-26 Пс 2:1-2.1 Ананий лӹмӓн ик пӱэргӹ Сапфира вӓтӹжӹ доно пурлыкыштым выжаленӹт.
2 Вурчымы оксажы гӹц икманярыжым Ананий ӹшкӹлӓнжӹ шӹлтен коден, тидӹм вӓтӹжӓт пӓлен, а молыжым канден дӓ Апостолвлӓн ял сагашты пиштен.
3 Но Петр келесен: «Ананий, малын тӹнь Святой Шӱлӹшӹм алталаш дӓ мӱлӓндӹлӓн нӓлмӹ окса гӹц икманярыжым ӹшкӹлӓнет шӹлтен кодаш шанымашым сатаналан шӱмӹшкет пырташ ирӹкӹм пуэнӓт?
4 Выжалымы анзыц мӱлӓндет тӹньӹн агыл ылын ма? Тӹдӹм выжалымылан нӓлмӹ оксаэт тӹньӹн ылде ма? Кыце тӹнь техеньӹм ӹштӓш шанен пиштенӓт? Тӹнь эдемлӓн агыл, а Йымылан алталенӓт».
5 Техень шамакым колмыкы, Ананий кенвазын, дӓ йӓнгжӹ лӓктӹн. Тидӹм колыштшывлӓм цилӓштӹмӓт кого лӱдмӓш нӓлӹн.
6 А сӓмӹрӹк эдемвлӓ тӹдӹм леведӹнӹт, намал лыктыныт дӓ таенӹт.
7 Иктӓ кым цӓш эртӹмӹкӹ, тӹшкӹ вӓтӹжӓт пырен, ма лимӹм тӹдӹ пӓлӹде.
8 А Петр тӹдӹ гӹц ядын: «Келесӹ мӹлӓм, тинӓреш ма тӓ мӱлӓндӹдӓм выжалендӓ?» Сапфира келесен: «Тенге, тинӓреш».
9 Но Петр тӹдӹлӓн келесен: «Малын тӓ Господьын Шӱлӹшӹм тергӓш попен келшендӓ? Теве тӹньӹн маретӹм тайышывлӓн ял юкышты амаса докы лишемеш, нӹнӹ тӹньӹмӓт намал лыктыт».
10 Сапфира тӹнӓмок тӹдӹн ялжы сага кенвазын, дӓ йӓнгжӹ лӓктӹн. Сӓмӹрӹк эдемвлӓ пыренӹт, Сапфирам колышым ужыныт дӓ марыжы сага лыктын таенӹт.
11 Церкӹм дӓ тидӹ гишӓн колшывлӓм цилӓштӹмӓт кого лӱдмӓш нӓлӹн.
12 Апостолвлӓн кидӹштӹ доно халыкышты пӓлӹквлӓ дӓ цӱдӓвлӓ шукы ӹштӓлтӹнӹт. Соломонын левӓшӓн кудывичӹштӹжӹ ӹнянӹшӹвлӓ икышын иквӓреш ылыныт.
13 Ӧрдӹж эдемвлӓ логӹц нӹнӹ докы ушнаш иктӓт смейӹде, тенге гӹнят халык нӹнӹм лӹмлештӓрен.
14 Пӱэргӹ дон ӹдӹрӓмӓшвлӓ шукыракын дӓ шукыракын Господьлан ӹнянӓш тӹнгӓлӹнӹт.
15 Тенге, эртен кешӹ Петрӹн хоть ӹмӹлжӹ вӓрештшӹ манын, церлӹвлӓм ӧлицӓш лыктыныт, вӓрӹш дӓ краватьыш пиштенӹт.
16 Тенгеок йӹр ылшы халавлӓ гӹц шукын Иерусалимӹш погыненӹт, церлӹвлӓм дӓ худа шӱлӹш доно мутьымывлӓм канденӹт. Нӹнӹжӹ цилӓн паремӹнӹт.
17 А архиерей дӓ тӹдӹн доно иквӓреш ылшывлӓн – нӹнӹжӹ саддукей тӹшкӓ гӹц ылыныт – когон йӓнгӹштӹ йылен,
18 Апостолвлӓм кыченӹт дӓ халык кызаматыш питӹренӹт.
19 Но Господьын Ангелжӹ йыдым кызамат амасам пачын, нӹнӹм виден лыктын дӓ келесен:
20 «Кедӓ дӓ, Йымын пӧртеш шагалын, ти ӹлӹмӓш шамаквлӓм халыклан цилӓ попыда».
21 Ти шамакым колыштын, нӹнӹ ирокок Йымын пӧртӹш пыренӹт дӓ халыкым тымдаш тӹнгӓлӹнӹт. Ти жепӹнок архиерей дӓ тӹдӹн доно иквӓреш ылшывлӓ, толмыкышты, Синедрионым дӓ Израиль эргӹвлӓн цилӓ когоракыштым ӱжӹнӹт дӓ Апостолвлӓм кандаш ӹшке тӓрзӹштӹм кызаматыш колтенӹт.
22 А нӹнӹжӹ, тӹшкӹ мимӹкӹштӹ, Апостолвлӓм кызаматышты моделыт дӓ, пӧртӹлмӹкӹштӹ, увертӓренӹт:
23 «Кызаматым цаткыдын питӹрен шӹндӹмӹ ыльы, оролвлӓ амаса анзылны шалгенӹт, но кынам мӓ амасам пачна, тӹштӹ иктӹмӓт шӹнӓ мо».
24 Ти шамаквлӓм колмыкы, священник, архиерейвлӓ дӓ Йымын пӧрт орол вуйлатышы, ма тидӹ техень манын, когон ӧрӹнӹт.
25 Тӓгӱ-ӓнят толын дӓ нӹнӹлӓн келесен: «Кызаматыш питӹрӹмӹ пӱэргӹвлӓдӓ Йымын пӧртӹштӹ шалгат дӓ халыкым тымдат».
26 Тӹнӓм орол вуйлатышы ӹшкӹмжӹн эдемвлӓжӹ доно иквӓреш Апостолвлӓм кандаш кен. Вӹкӹнӓ кӱм кӹшкен, халык мӓмнӓм пуштеш манын лӱдӹнӹт, седӹндон Апостолвлӓм силам пиштӹдеок канденӹт.
27 Апостолвлӓм кандымыкы, Синедрион анзылан шагалтенӹт, дӓ архиерей ядышташ тӹнгӓлӹн:
28 «Ти Эдемӹн лӹмжӹ гишӓн тымдаш мӓ тӓлӓндӓ цат цӓрӹделна ма? Теве Иерусалимӹм ӹшкӹмдӓн тымдымаш доно темендӓ, дӓ Тӹдӹн вӹржӹм мӓ вӹкӹнӓ пиштӹнедӓ».
29 А Петр дӓ молы Апостол келесенӹт: «Йымым эдем гӹц утларак колыштмыла.
30 Пу мӓнгеш тӓмдӓн пыдален пуштмы Иисусым мӓмнӓн ӓтявлӓнӓн Йымышты ӹлӹжтен.
31 Израиль халыкым Ӹшке векӹжӹ сӓрӓш дӓ тӹдӹн сулыкшым простяш манын, Йымы Иисусым, вургымла кидшӹ доно* лӱктӓлӹн, Вуйлатышеш дӓ Ытарышеш шагалтен.
32 Цилӓ тидӹ шотышты мӓ Тӹдӹн свидетельжӹ ылына, шамакшым колыштшывлӓлӓн Йымын пумы Святой Шӱлӹшӓт тидӹмок свидетельствуя».
33 Тидӹм колын, погынышывлӓ когон шӹдешкенӹт дӓ Апостолвлӓм пуштнештӹ ылын.
34 Тӹнӓм Синедрионын ик эдемжӹ, Гамалиил лӹмӓн фарисей, цилӓ халык лошты шотеш пиштӹмӹ закон тымдышы, кӹньӹл шагалын дӓ Апостолвлӓм икманяр жепеш тӱгӹ лыкташ шӱден.
35 А вара нӹнӹлӓн келесен: «Израильӹн эдемвлӓжӹ, тӓ ти эдемвлӓ доно мам ӹштӹнедӓ, ӹшке лоштыда шаналтыда.
36 Тилец анзыц шукердӹ агыл, ӹшкӹмжӹм тамахань когоэш анжыктен, Февда толын лӓктӹн. Тӹдӹн докы нӹлшӱдӹ эдем нӓрӹ ушнен. Но Февдам пуштыныт, тӹдӹн векӹ лишӹвлӓ цилӓнӓт шӓлӓнен кенӹт дӓ ямын пӹтенӹт.
37 Тӹдӹн паштек, халыкым шотлен сирӹмӹ годым, Галилей Иуда лӓктӹн дӓ ӹшке паштекшӹ шукы эдемӹм тӓрвӓтен нӓнген, но тӹдӹнӓт ӹлӹмӓшӹжӹ кӹрӹлтӹн, дӓ тӹдӹн велнӹ ылшывлӓ шӓлӓнен пӹтенӹт.
38 Кӹзӹт, мӹнь шанымаштем, тенге ӹштӹмӹлӓ: ти эдемвлӓ дорц карангда дӓ нӹнӹм колтыда. Нӹнӹн ӹштӓш шанымы пӓшӓштӹ эдем гӹц ылеш гӹнь, тӹдӹ сӹмӹрлӓ,
39 а Йымы гӹц гӹнь, тӓ тӹдӹм сӹмӹрен ада керд. Йымы ваштареш шагалшы лиӓш агыл манын, перегӓлтдӓ».
40 Цилӓн тӹдӹн доно келшенӹт. Апостолвлӓм ӱжӹктенӹт, нӹнӹм шинӹт, Иисусын лӹмжӹ гишӓн попаш цӓренӹт дӓ колтенӹт.
41 Господь Иисусын лӹмжӹ верц намысыш пыраш ярал лимӹштӹлӓн сусу лин, нӹнӹ Синедрион гӹц кенӹт,
42 кечӹнь Йымын пӧртӹштӹ дӓ эдемвлӓ доны цӓрнӹде тымденӹт дӓ Иисус Христос гишӓн Пуры Уверӹм шӓренӹт.
*5:31 «Вургымла кидшӹ доно»: грек шамакым «Вургымла монгырышкыжы» манынат сӓрӓш лиэш.1 Ти кечӹвлӓн, тыменьшӹвлӓ шукеммӹ годым, греклӓ попышы иудейвлӓ «Мӓ лоштышна тылык вӓтӹвлӓм кечӹнь палшыкым пуэдӹмӹ годым шотыш ак нӓлеп» манын, еврейлӓ попышы иудейвлӓм ӧпкӓлӓш тӹнгӓлӹнӹт.
2 Тӹнӓм луаткок Апостол цилӓ тыменьшӹм ӱжӹн дӓ нӹнӹлӓн келесен: «Эдемвлӓм пукшымаш верц Йымын шамакшым ӧрдӹжеш коденӓ гӹнь, яжо агыл.
3 Седӹндон, шӱмбелвлӓ, Святой Шӱлӹш дӓ кого ыш доно циц темшӹ шотеш пиштӹмӹ шӹм эдемӹм ӹшке логӹцдӓ айырыда, нӹнӹм служымы пӓшӓшкӹ шагалтенӓ.
4 А мӓ соок ыдылмашты дӓ Йымын шамаклан служымашты линӓ».
5 Ти шамак улы погынымашлан келшен. Нӹнӹ Стефаным, ӹнянӹмӓш дӓ Святой Шӱлӹш доно циц темшӹ пӱэргӹм, тенгеок Филиппӹм, Прохор дон Никанорым, Тимон дон Парменӹм, Антиохи гӹц Николайым айыренӹт. Николай молнам язычник ылын дӓ иудей верӓм нӓлӹн.
6 Нӹнӹм Апостолвлӓ анзылан шагалтенӹт, Апостолвлӓ ыдылыныт дӓ вӹкӹштӹ кидӹм пиштенӹт.
7 Тенге Йымын шамакшы шӓрлен. Тыменьшӹвлӓ Иерусалимӹштӹ когон шукемӹнӹт, священниквлӓӓт пиш шукын ӹнянӹмӓшӹн шамакшым колыштшы линӹт.
8 А ӹнянӹмӓш дӓ сила доно темшӹ Стефан халык лошты кого цӱдӓвлӓм дӓ пӓлӹквлӓм ӹштен.
9 Юж эдем тӹдӹн доно кӹрмӓшӓш тӹнгӓлӹн. Иктӹвлӓжӹ либертинец* манмы эдемвлӓн дӓ Кириней дӓ Александри гӹц ылшывлӓн синагогышты гӹц ылыныт, весӹвлӓжӹ Килики дӓ Аси гӹц ылыныт.
10 Но Шӱлӹш Стефанлан когон кого ышым пуэн, седӹндон нӹнӹ тӹдӹн ваштареш шалген кердделыт.
11 Тӹнӓм нӹнӹ икманяр эдемӹм тенге попаш сӓртенӹт: «Моисей дон Йымым мыскылен попымыжым мӓ колынна».
12 Тенге халыкымат, халыкын когорак дӓ закон тымдышывлӓмӓт тӓрвӓтенӹт дӓ Стефаным роалтен кыченӹт, Синедрион анзыкы нӓнгенӹт.
13 Алталышы свидетельвлӓм лыктын шагалтенӹт, нӹнӹжӹ попенӹт: «Тидӹ святой вӓр дӓ закон вӹкӹ худа шамаквлӓм попымым ти эдем ак цӓрнӹ.
14 ”Назорей Иисус ти вӓрӹм шӓлӓтӓ дӓ Моисейӹн мӓлӓннӓ кодымы овуцавлӓм вашталта” манын попымыжым мӓ колынна».
15 Синедрионышты шӹнзӹшӹвлӓ цилӓн Стефан вӹкӹ анженӹт дӓ тӹдӹн лицӓжӹ Ангелӹн гань каймым ужыныт.
*6:9 Либертинец – ирӹкӹш лыкмы раб ылшы иудей.1 Тӹнӓм архиерей ядын: «Ти йӓтлӹмӓш лачок ма?»
2 Но Стефан попаш тӹнгӓлӹн: «Шӱмбелвлӓ дон ӓтявлӓ, колыштда. Кынам мӓмнӓн Авраам ӓтянӓ эче Месопотамиштӹ лин дӓ Харраныш эче ванжыде ылын, тӹдӹлӓн лӹмлештӓрӓлтшӹ Йымы кайын
3 дӓ келесен: ”Ӹшке мӱлӓндет гӹцӓт, ӹшке йыхет гӹцӓт, [ӹшке ӓтятӹн пӧртшӹ гӹцӓт] лӓк дӓ Мӹнь анжыктымем мӱлӓндӹшкӹ ке”.*
4 Тӹнӓм Авраам Халдей мӱлӓндӹ гӹцӹн лӓктӹн дӓ Харранышты ӹлӓш тӹнгӓлӹн. Ӓтяжӹ колымыкы, тӹдӹм Йымы тӹшецӹн тӓмдӓн кӹзӹт ӹлӹмӹ ти мӱлӓндӹшкӹ ваштен.
5 Авраамлан ял лапа нӓрӹмӓт мӱлӓндӹм пуде, но ти мӱлӓндӹм тӹдӹлӓн дӓ вырлыкшылан пуаш сӧрен.* Тӹнӓм Авраамын тетяжӹ эче ылде.
6 Йымы келесен: ”Тӹньӹн вырлыкет вес мӱлӓндӹштӹ ӧрдӹж эдем семӹнь ӹлӓш тӹнгӓлеш, тӹдӹм рабым ӹштӓт, нӹлшӱдӹ и пӹзӹрньӹкӹштӹ урдат.
7 Но Мӹнь, – Йымы манын, – тӹдӹм раб семӹнь кычышы халыкым суем, тидӹн паштек вырлыкет тӹшец кеӓ дӓ ти вӓрӹштӹ Мӹлӓм служаш тӹнгӓлеш”.*
8 Вара Йымы Авраамлан пӹчмӹ овуцам шоктымы согоньым пуэн. Тидӹн паштек Авраам гӹц Исаак шачын, дӓ кӓндӓкшӹмшӹ кечӹн тӹдӹ Исаак доно пӹчмӹ овуцам эртӓрен. Исаакат Иаков доно тенгеок ӹштен, а Иаков мӓмнӓн луаткок патриархланна* тидӹмок ӹштен.
9 Патриархвлӓ йӓнгӹштӹ йылымы доно Иосифӹм Египетӹш выжаленӹт, но Йымы тӹдӹн сага ылын
10 дӓ Иосифӹм цилӓ орлык гӹц ытарен, кого ышым пуэн дӓ фараонын, Египет кугижӓн, кымылжым тӹдӹн векӹ сӓрен. Фараонжы Иосифӹм Египетӹм дӓ ӹшкӹмжӹн цилӓ хозяйствыжым вуйлаташ шагалтен.
11 Шужымаш дӓ кого орлык улы Египет дон Ханаан мӱлӓндӹ мычкы шӓрленӹтӓт, ӓтявлӓнӓ качкышым мон кердделыт.
12 Египетӹштӹ киндӹ улы гишӓн колмыкы, тӹшкӹ Иаков ӓтявлӓнӓм пӹтӓриш гӓнӓ колтен.
13 А кокшы гӓнӓжӹ Иосиф ӹзӓжӹвлӓлӓн кӱ ылмыжы гишӓн келесен, дӓ фараон Иосифӹн йыхшы гишӓн пӓлен нӓлӹн.
14 Иосиф ӹшке докыжы Иаков ӓтяжӹмӓт, улы йыхшымат, цилӓжӹ шӹмлу вӹц эдемӹм, ӱжӓш колтен.
15 Иаков Египетӹш ванжен, тӹшӓк ӹшкежӓт колен, мӓмнӓн ӓтявлӓнӓӓт коленӹт.
16 Нӹнӹм Сихемӹш нӓнгенӹт дӓ Сихем Емморын эргӹвлӓжӹ гӹц Авраамын ши доно тӱлен нӓлмӹ шӹгерӹш пиштенӹт.
17 Авраамлан Йымын цуратлен сӧрӹмӹжӹ шокталтшашлык жеп лишеммӹ семӹнь Израиль халык Египетӹштӹ кушкын дӓ шукемӹн.
18 А вара вес кугижӓ шагалын, тӹдӹ Иосифӹм пӓлӹде.*
19 Тӹдӹ мӓмнӓн йых ваштареш йойланен, ӓтявлӓнӓм пӹзӹрен, ӓзӓвлӓштӹ ӹлӹшӹ ӹнжӹштӹ кодеп манын, нӹнӹм шуэн кодыктен.
20 Ти жепӹн Моисей шачын, тӹдӹ Йымы анзылны ярал ылын. Тӹдӹм кым тӹлзӹ ӓтяжӹн пӧртӹштӹ анженӹт.
21 А вара, шуэн кодымыкы, тӹдӹм фараонын ӹдӹржӹ нӓлӹн, ӹшке эргӹжӹ семӹнь анжен куштен.
22 Египет халыкын цилӓ пӓлӹмӓшӹжӹм Моисейлӓн тымденӹт. Тӹдӹ попымаштат, пӓшӓштӓт силан ылын.
23 А кынам Моисейлӓн нӹллӹ и темӹн, ӹшке шӱмбелвлӓжӹм, Израиль эргӹвлӓм, толын анжалаш шанен пиштен.
24 Нӹнӹ логӹц иктӹжӹлӓн худам ӹштӹмӹм ужмыкы, тӹдӹлӓн палшен, орландарымы эдем верц кӱсӹм пӧрӹктен, Египет пӱэргӹм пуштын.
25 Тӹдӹн кидшӹ доно нӹнӹм Йымы ытара манын, ынгылат, шанен, но нӹнӹ ынгылыделыт.
26 Вес кечӹнжӹ, нӹнӹ логӹц кок эдем шиэдӓлмӹ годым, Моисей толын дӓ пуремӓш ӱжӹн: ”Тӓ шӱмбелвлӓ ылыда, малын иктӹ-весӹлӓндӓ худам ӹштедӓ?”
27 Но лишӹлжӹлӓн худам ӹштӹшӹ эдем Моисейӹм шӹкӓлӹн дӓ келесен: ”Кӱ тӹньӹм мӓмнӓн вуйлатышеш дӓ судьяэш шагалтен?
28 Тенгечӹ Египет пӱэргӹм пуштмет семӹнь тӹнь мӹньӹмӓт пуштнет ма?”*
29 Техень шамакым колмыкы, Моисей тӹшецӹн кыргыжын дӓ Мадиам мӱлӓндӹштӹ ӧрдӹж эдем семӹнь ӹлӓш кодын, тӹштӹ тӹдӹн кок эргӹжӹ шачын.
30 Нӹллӹ и эртӹмӹкӹ, Синай кырык сагашы пустыньышты йылышы имӓн тӹшкӓн тылыштыжы тӹдӹлӓн Господьын Ангелжӹ кайын.
31 Техень каймашым ужын, Моисей когон ӧрӹн, а кынам анжалаш лишемӹн, Господьын юкшым колын:
32 ”Мӹнь тӹньӹн ӓтя-тьотявлӓэтӹн Йымышты, Авраамын Йымыжы, Исаакын Йымыжы, Иаковын Йымыжы ылам”. Моисей лӱдмӹжӹ доно цӹтӹрӓш тӹнгӓлӹнӓт, анжаш смейӹде.
33 А Господь тӹдӹлӓн келесен: ”Тӹньӹн шалгымы вӓрет – святой мӱлӓндӹ, ялеш чимӹ хӓдӹретӹм кыдаш.
34 Мӹнь Египетӹштӹ халыкемӹм пӹзӹрӹмӹм ужынам, тӹдӹн мӓгӹрӹмӹжӹм колынам дӓ тӹдӹм ытараш валенӓм. А ӹнде тол, Мӹнь тӹньӹм Египетӹш колтем”.
35 ”Кӱ тӹньӹм вуйлатышеш дӓ судьяэш шагалтен?” манын, нӹнӹ Моисейӹм карангденӹт. Но имӓн тӹшкӓштӹ кайшы Ангелӹн палшымыжы доно Йымы тӹдӹмок нӹнӹм вуйлаташ дӓ ирӹкӹш лыкташ колтен.*
36 Египет мӱлӓндӹштӹ, Якшар тангыжышты дӓ нӹллӹ и пустыньышты цӱдӓвлӓм дӓ пӓлӹквлӓм ӹштен, Моисей нӹнӹм тӹшец лыктын.
37 Ти Моисейок Израиль эргӹвлӓлӓн келесен: ”Йымы тӓлӓндӓ мӹнь ганем Пророкым ӹшке логӹцдӓ шагалта. Тӹдӹм колыштда”.*
38 Пустынеш погынышы халык доно иквӓреш Моисей ылын; Синай кырыкышты тӹдӹлӓн попышы Ангел доно дӓ мӓмнӓн ӓтявлӓнӓ доно тӹдӹ пустыньышты ылын, дӓ мӓ докына шокташ манын, ӹлӹшӹ шамакым нӓлӹн.
39 Мӓмнӓн ӓтявлӓнӓ тӹдӹн шамакшым ӹнештӹ колыштеп ылын, тӹдӹм карангденӹт дӓ шӱмӹштӹштӹ Египетӹш пӧртӹлӓш шанымашым кыченӹт.
40 Нӹнӹ Ааронлан келесенӹт: ”Мӓмнӓм ажед кешӹ йымывлӓм мӓлӓннӓ ӹштӹ. Мӓмнӓм Египет мӱлӓндӹ гӹц лыкшы ти Моисей доно ма лин, ана пӓлӹ”.*
41 Тӹнӓм сӓмӹрӹк ӱшкӱжлӓ кайшы идолым ӹштенӹт дӓ тӹдӹлӓн кымалтышым пуэнӹт, ӹшке кидӹштӹ доно ӹштӹмӹ хӓдӹр лӹмеш сусу айом эртӓренӹт.
42 А Йымы нӹнӹ гӹц сӓрнӓлӹн дӓ пӹлгомыштышы шӹдӹрвлӓлӓн кымалаш коден. Пророквлӓн книгӓштӹштӹ тенге сирӹмӹ:
”Израиль йых,
тӓ нӹллӹ и пустыньышты ылмы годым
шӹшкӹлмӹ вольыкым дӓ молы жертвӹм Мӹлӓнем кандендӓ ма?
43 Молохын скинижӹм
дӓ Ремфан йымыдан шӹдӹржӹм намалында –
кымалаш ӹшке ӹштӹмӹ хӓдӹрвлӓм сагада нӓнгендӓ,
седӹндон Мӹнь тӓмдӓм Вавилон гӹцӓт мӹндӹркӹ ваштем”.*
44 Свидетельствын скинижӹ пустыньышты мӓмнӓн ӓтявлӓнӓ сага ылын. Тӹдӹжӹм Моисейлӓн Попышын шӱдӹмӹжӹ семӹнь, Моисейӹн ужмы сӹн ганьым ӹштӹмӹ ылын.
45 Тӹдӹм мӓмнӓн ӓтявлӓнӓ нӓлӹнӹт, дӓ Йымын поктен колтымы халыквлӓ гӹц Навин Иисусын вуйлатымыжы доно ти мӱлӓндӹм сӹнген нӓлмӹкӹ, скиним тишкӹ намал канденӹт. Давид годшы жеп якте тенге ылын.
46 Йымы гӹц Давид благодатьым нӓлӹн дӓ Иаковын Йымыжылан ӹлӹмӹ вӓрӹм йӓмдӹлӓш сарвален ядын.
47 А Йымылан пӧртӹм Соломон ӹштен.
48 Но кид доно ӹштӹмӹ пӧртвлӓштӹ Кӱшнӹшӹ Йымы ак ӹлӹ, пророк тенге попен:
49
”Пӹлгом – Мӹньӹн престолем,
мӱлӓндӹ – Мӹньӹн ял шӹндӹмӹ вӓрем.
Мӹлӓнем махань пӧртӹм чангедӓ
ӓли махань вӓрӹштӹ Мӹнь кӓнӓш тӹнгӓлӓм? – попа Господь. –
50 Мӹньӹн кидем агыл ма цилӓ тидӹм ӹштен?”*
51 Шамакым колыштдымывлӓ! Тӓ донда пӹчмӹ овуцам эртӓрӹмӹ, но йӓнгдӓ дӓ пӹлӹшдӓ язычниквлӓн ганьок. Ӓтявлӓдӓ семӹньок тӓӓт Святой Шӱлӹшлӓн со торешлӓнедӓ.
52 Пророквлӓ логӹц кӱм тӓмдӓн ӓтявлӓдӓ поктылделыт? Нӹнӹ Тӧр Ӹштӹшӹн толшашлыкшы гишӓн анзыцок увертӓрӹшӹвлӓм пуштыныт, а ӹнде тӓ Тӹдӹм выжалышы дӓ пуштшы линдӓ.
53 Тӓлӓндӓ Ангелвлӓ гач законым пумы, а тӓ тӹдӹ семӹнь ӹштӹделда».
54 Тидӹм колыштын, Синедрионышты шӹнзӹшӹвлӓ когон шӹдешкенӹт дӓ тӹдӹ вӹкӹ пӱштӹм пырыныт.
55 А Святой Шӱлӹш доно циц темшӹ Стефан пӹлгомыш анжалын, Йымын лӹмлештӓрӓлтмӹжӹм дӓ Йымын вургымла монгырыштыжы шалгышы Иисусым ужын
56 дӓ попен: «Теве мӹнь пачылтшы пӹлгомым дӓ Эдем Эргӹм ужам, Тӹдӹ Йымын вургымла монгырыштыжы шалга».
57 Тӹнӓм нӹнӹ когон саслаш тӹнгӓлӹнӹт, пӹлӹшӹштӹм питӹренӹт дӓ Стефан вӹкӹ иктӹ гань кечӓлтӹнӹт.
58 Нӹнӹ тӹдӹм хала гӹц ӧрдӹжӹш поктен лыктыныт дӓ, пушташ манын, вӹкӹжӹ кӱм кӹшкӓш тӹнгӓлӹнӹт. А свидетельвлӓ вӹлвӓл выргемӹштӹм Савл лӹмӓн сӓмӹрӹк пӱэргӹн ял сагажы кыдаш пиштенӹт.
59 Стефан вӹкӹ кӱм кӹшкенӹт, а тӹдӹжӹ йымыдылын: «Господь Иисус, мӹньӹн йӓнгем нӓл».
60 Вара пылвуй доно шӹнзӹн, кого юк доно сӹгӹрӓл колтен: «Господь! Ти сулыкыштылан нӹнӹм ит йӓтлӹ». Тенге келесӹмӹкӹ, тӹдӹ колен.
*7:3 Быт 12:1. *7:5 Быт 13:15. *7:6-7 Быт 15:13-14. *7:8 Патриарх – родылан тӹнгӓлтӹшӹм пушы кого эдем. *7:18 Исх 1:7-8. *7:26-28 Исх 2:13-14. *7:30-35 Исх 3:2-10. *7:37 Втор 18:15. *7:40 Исх 32:1. *7:42-43 Ам 5:25-27. Молох – ханаан халыкын йымыжы, а Ремфан (юж грек рукописьӹштӹ Райфан) – Сатурн планетым тенге манмы, наверно. *7:49-50 Ис 66:1-2.1 А Савл Стефаным пуштмым яжоэш шотлен. Тӹ кечӹ гӹц Иерусалимӹштӹшӹ церкӹм когон пӹзӹрӓш тӹнгӓлӹнӹт дӓ Апостолвлӓ гӹц пасна молыжы цилӓн Иудейӹштӹ дӓ Самариштӹ шукы вӓре шӓлӓнен кенӹт.
2 Йымым жеплӹшӹ пӱэргӹвлӓ Стефаным таенӹт дӓ тӹдӹн верц когон ойхырен мӓгӹренӹт.
3 А Савл церкӹм пӹтӓрӹнежӹ ылын, пӧрт гӹц пӧртӹш каштын, пӱэргӹ дон ӹдӹрӓмӓшвлӓм шӹдӹрен нӓнген дӓ кызаматыш питӹрӹктен.
4 Тенге, шӓлӓнен кешӹвлӓ Пуры Уверӹм шӓрен каштыныт.
5 Филипп Самариштӹшӹ халаш толын дӓ тӹштӹшӹвлӓлӓн Христос гишӓн увертӓрен.
6 Филиппӹн попымыжым колын дӓ пӓлӹквлӓм ӹштӹмӹжӹм ужын, цилӓн тӹдӹм ик эдем гань тусарен колыштыныт.
7 Вет худа шӱлӹш доно мутьымывлӓ логӹц шукыштын кӧргӹштӹ гӹц, когон саслен, худа шӱлӹшвлӓ лӓктӹнӹт, а пларичӓнвлӓ дӓ акшаквлӓ шукынжы паремӹнӹт.
8 Тӹ халашты кого сусу ылын.
9 Тӹштӹ Симон лӹмӓн ик пӱэргӹ шукы жеп йозыланен, кого эдем ылам манын ӹняндӓрен дӓ Самариштӹшӹ халыкым ӧрӹктӓрен.
10 Изижӓт-когожат тӹдӹм кымылын колыштыныт дӓ «Ти эдем – Йымын кого силажы» манын попенӹт.
11 Тӹдӹ шукы жеп йозыланымыжы доно нӹнӹм ӧрӹктӓрен, седӹндон тӹдӹм колыштыныт.
12 Но Йымын Кугижӓншӹ дӓ Иисус Христосын лӹмжӹ гишӓн Пуры Уверӹм шайыштшы Филиппӹн попымыжылан ӹнянӓш тӹнгӓлмӹкӹ, пӱэргӹвлӓӓт, ӹдӹрӓмӓшвлӓӓт крестӓлтӹнӹт.
13 Симон ӹшкежӓт ӹнянен дӓ, крестӓлтмӹкӹ, Филипп гӹц карангде, ӹштӓлтшӹ силан пӓшӓвлӓм дӓ пӓлӹквлӓм ужынат, когон ӧрӹн.
14 Самари халыкын Йымын шамакым шӱмӹш пиштен вӓшлимӹжӹм колмыкы, Иерусалимӹштӹ ылшы Апостолвлӓ нӹнӹ докы Петр дон Иоанным колтенӹт.
15 Ӹнянӹшӹвлӓ Святой Шӱлӹшӹм нӓлӹштӹ манын, Петр дон Иоанн, толмыкышты, нӹнӹ верц ыдылыныт,
16 вет Святой Шӱлӹш нӹнӹ логӹц иктӹн вӹкӓт эче валыде ылын, нӹнӹ Господь Иисус лӹм доно крестӹмӹ веле ылыныт.
17 Вара вӹкӹштӹ Петр дон Иоанн кидӹм пиштенӹт, дӓ нӹнӹ Святой Шӱлӹшӹм нӓлӹнӹт.
18 Апостолвлӓн кидӹм пиштӹмӹштӹ гач Святой Шӱлӹш пумым ужынат, Симон нӹнӹлӓн оксам канден
19 дӓ попен: «Мӹлӓмӓт техень властьым пуда: мӹнят кӱн вӹкӹ кидӹм пиштем, тӹдӹ Святой Шӱлӹшӹм нӓлжӹ».
20 Но Петр тӹдӹлӓн келесен: «Тӹньӹн оксаэт тӹнь донет иквӓреш пӹтӹжӹ: тӹнь Йымын пумыжым оксала нӓлӓш шаненӓт!
21 Ти пӓшӓштӹ нимахань лаштыкетӓт уке. Йымы анзылны тӹньӹн шӱмет тӧр агыл.
22 Тенгежӹ, техень худаэт гӹц каранг дӓ Йымым сарвалы, ӓнят, Тӹдӹ шӱм шаныметӹм простя.
23 Тӹньӹм качы шӓкш доно темшӹм дӓ сулык доно кӓпшӹлтӹмӹм ужам».
24 Симонжы келесен: «Тӓмдӓн келесӹмӹ гӹц нимат мӹлӓм ӹнжӹ ли манын, тӓ мӹнь верцем Господьым сарвалыда».
25 Господь гишӓн свидетельствуйымыкы дӓ Тӹдӹн шамакшым попымыкы, Апостолвлӓ мӹнгеш Иерусалимӹш кенӹт дӓ корнышты Самариштӹшӹ шукы солашты Пуры Уверӹм шӓренӹт.
26 Икӓнӓ Господьын Ангелжӹ Филипплӓн келесен: «Кӹньӹл дӓ кечӹвӓлвелӹш,* Иерусалим гӹц Газышкы кемӹ тыр корнышкы, лӓк».
27 Тӹдӹжӹ кӹньӹлӹн дӓ кен. Ти жепӹн корны доно Эфиопиштӹшӹ ик евнух кен. Тӹдӹ кандакиян – Эфиопиштӹшӹ ӹдӹрӓмӓш кугижӓн – цилӓ пайдажым перегӹшӹ кого эдемжӹ ылын. Евнух Иерусалимӹш кымалаш толын,
28 а кӹзӹт мӹнгеш кен, аравашты шӹнзен дӓ пророк Исаиян книгӓжӹм лыдын.
29 Филипплӓн Шӱлӹш келесен: «Ти арава докы лишем дӓ сагажы ке».
30 Филипп кыргыж толын дӓ аравашты шӹнзӹшӹ эдемӹн пророк Исаиян книгӓжӹм лыдмы юкым колын. Филипп ядын: «Лыдметӹм ынгылет ма?»
31 Тӹдӹ вӓшештен: «Иктӓт мӹлӓм ак ынгылдары гӹнь, кыце ынгылен кердӓм?» Вара тӹдӹ Филиппӹм сагажы аравашкы шӹнзӓш ядын.
32 А Писаним лыдмы шамакшы тидӹ ылын:
«Тӹдӹм шарык семӹнь шӹшкӹлӓш нӓнгенӹт,
мижӹм тӹредшӹвлӓ анзылны кыце патя юкым ак лык,
Тӹдӓт тенгеок ӹшке ышмажым пачде.
33 Тӹдӹм лапемдӹмӓштӹ
Тӹдӹн тӧр судшы нӓлӓлтӹн.
Йыхшы гишӓн кӱ ынгылдара?
Вет ӹлӹмӓшӹжӹ мӱлӓндӹ вӹлец нӓлӓлтеш».*
34 Филипплӓн евнух попен: «Пуры ли, мӹлӓнем келесӹ: кӱ гишӓн пророк тенге попа? Ӹшкежӹ гишӓн ӓли иктӓжӹ весӹ гишӓн?»
35 Писанин ти шамакшы гӹц тӹнгӓлӹн, Филипп тӹдӹлӓн Иисус гишӓн Пуры Уверӹм попен.
36 Корны доно эртӹмӹштӹ годым нӹнӹ вӹд докы толын шоныт. Евнух попен: «Теве вӹд. Мӹлӓнем крестӓлтӓш ма мешӓйӓ?»
37 А Филипп тӹдӹлӓн келесен: «Улы шӱмет доно ӹнянет гӹньӹ, крестӓш лиэш». Евнух келесен: «Иисус Христос – Йымын Эргӹ манын ӹнянем».
38 Вара аравам шагалташ шӱден. Филлиппӓт, евнухат арава гӹц валенӹт, коктынат вӹдӹш пыренӹт, дӓ Филипп тӹдӹм крестен.
39 Вӹд гӹц лӓкмӹкӹштӹ, Святой Шӱлӹш евнух вӹкӹ вален, а Господьын Ангелжӹ Филиппӹм тӹшец нӓнген. Евнух тӹдӹм ӹнде ужде, сусун ӹшке корныжы доно кен.
40 А Филипп Азотышты ылмыжым ужын дӓ, Кесариш толын шомешкӹжӹ, эртӹшӹлӓжӹ, цилӓ халавлӓштӹ Пуры Уверӹм шӓрен.
*8:26 «Кечӹвӓлвелӹш – тидӹм «тура кечӹвӓлӹн» манынат сӓрӓш лиэш. *8:32-33 Ис 53:7-8.1 А Савлын шӱмжӹ Господьын тыменьшӹвлӓжӹм лӱдӹктӓш дӓ пушташ шанен эче йылен. Тӹдӹ архиерей докы толын
2 дӓ Господьын корныжы доно кешӹвлӓм кӱм моэш – пӱэргӹмӓт, ӹдӹрӓмӓшӹмӓт, – Иерусалимӹш пидӹн кандаш манын, Дамаскыштышы синагогвлӓлӓн тӹдӹ гӹц сирмӓшвлӓм ядын нӓлӹн.
3 Дамаск хала докы толын шомыжы годым корнышты Савл йӹр трӱк пӹлгом гӹц соты валгалтын.
4 Тӹдӹ мӱлӓндӹ вӹкӹ кенвазын дӓ юкым колын, юк попен: «Савл, Савл! Малын тӹнь Мӹньӹм поктылат?»
5 Савл ядын: «Господь, Тӹнь кӱ ылат?» Тӹдӹжӹ келесен: «Мӹнь тӹньӹн поктылмы Иисус ылам. Сила ваштареш тӹлӓт кеӓш нелӹ».
6 Савл лӱдмӹжӹ доно цӹтӹрен келесен: «Господь, мӹлӓнем мам ӹштӹктӹнет?» Господь попен: «Кӹньӹл дӓ халашкы ке, тӹлӓт мам ӹштӓш келеш – келесӓлтеш».
7 Савл доно иквӓреш кешӹ эдемвлӓ тӹнгӹн шагалыныт. Нӹнӹ юкым колыныт, а иктӹмӓт ужделыт.
8 Савл мӱлӓндӹ вӹлец кӹньӹлӹн, но сӹнзӓжӹм пачмыкы, иктӹмӓт ужде. Тӹдӹм Дамаскыш кид гӹц виден канденӹт.
9 Кым кечӹ тӹдӹ ужде, качде, йӱде.
10 Дамаскышты Ананий лӹмӓн ик тыменьшӹ ылын. Господь тӹдӹлӓн каймаш гач келесен: «Ананий!» Тӹдӹ вӓшештен: «Теве мӹнь, Господь!»
11 А Господь тӹдӹлӓн попен: «Тӓрвӓнӹ, Виӓш лӹмӓн ӧлицӓш ке дӓ Иудан пӧртӹштӹжӹ Тарс гӹц ылшы Савлым яд. Тӹдӹ кӹзӹт ыдылеш.
12 Савл каймашым ужын, тӹштӹ тӹдӹн докы Ананий лӹмӓн пӱэргӹ пырен, ужаш тӹнгӓлжӹ манын, тӹдӹн вӹкӹ кидӹм пиштен».
13 Ананий вӓшештен: «Господь, ти эдем гишӓн мӹнь шукы гӹц колынам. Тӹньӹн святойвлӓлӓнет Иерусалимӹштӹ тӹдӹ шукы худам ӹштен.
14 Тӹньӹн лӹметлӓн йымыдылшывлӓм тиштӓт ирӹкде кодаш архиерейвлӓ тӹдӹлӓн властьым пуэнӹт».
15 Но Господь тӹдӹлӓн келесен: «Ке, ти эдем – Мӹньӹн айырен нӓлмӹ хӓдӹр.* Тӹдӹ лӹмемӹм халыквлӓ, кугижӓвлӓ дӓ Израиль эргӹвлӓ анзылны увертӓрен шалгаш тӹнгӓлеш.
16 Мӹньӹн лӹмем верц Савл маняр орланышашлык, Мӹнь тӹдӹлӓн цилӓ анжыктем».
17 Ананий кен, пӧртӹш пырен, Савл вӹкӹ кидшӹм пиштен дӓ келесен: «Савл шӱмбел, толмы корныштет тӹлӓт кайшы Господь Иисус мӹньӹм колтен. Тӹньӹн сӹнзӓэт пачылтшы дӓ тӹнь Святой Шӱлӹш доно тем манын, мӹнь толынам».
18 Тӹнӓмок Савлын сӹнзӓжӹ гӹц кол сӱм карангмы гань лин, трӱк тӹдӹ ужаш тӹнгӓлӹн. Тӹдӹ кӹньӹлӹн, крестӓлтӹн,
19 качкын, дӓ силажы пӧртӹлӹн. Савл тыменьшӹвлӓ сага икманяр кечӹ Дамаскышты ылын
20 дӓ, Иисусым Йымын Эргӹ манын, синагогвлӓштӹ тӹнӓмок шайышташ тӹнгӓлӹн.
21 Колыштшывлӓ цилӓн ӧрӹнӹт дӓ попенӹт: «Иисусын лӹмжӹлӓн йымыдылшывлӓм Иерусалимӹштӹ поктылшы эдем тидок агыл ма? Тишкӓт тӹдӹ техень эдемвлӓм, пидӹн, архиерейвлӓ анзык нӓнгеӓш толде ма?»
22 А Савлын попымыжы утларак дӓ утларак силам нӓлӹн, Иисус – Христос ылеш манын анжыктымыжы доно Дамаск халашты ӹлӹшӹ иудейвлӓм когон ӧрӹктӓрен.
23 Икманяр жепӹштӹ иудейвлӓ Савлым пушташ попен келшенӹт.
24 Но Савл йӹвӹрт шанымыштым пӓлен нӓлӹн. Нӹнӹ, тӹдӹм пушташ манын, йыдшы-кечӹжӹ халан капкавлӓ сага ороленӹт.
25 А тыменьшӹвлӓ, Савлым кого корзинеш шӹнден, йыдым хала стенӓ гач валтенӹт.
26 Савл Иерусалимӹшкӹ толын дӓ тӹштӹшӹ тыменьшӹвлӓ докы ушнаш цацен. Но цилӓн тӹдӹ гӹц лӱдӹнӹт, тыменьшӹ ылеш манын ӹнянӹделыт.
27 Но Варнава тӹдӹм сагажы нӓлӹн, Апостолвлӓ докы канден. Савлын корнышты Господьым ужмыжы, Господьын тӹдӹлӓн попымыжы дӓ Савлын Дамаск халашты Иисус лӹм доно лӱдде попымыжы гишӓн шайыштын.
28 Савл нӹнӹ сага кодын дӓ Иерусалимӹштӹ ирӹкӓн каштын, Господь Иисус лӹм доно лӱдде попен.
29 Тенгеок грек йӹлмӹ доно попышы иудейвлӓ доно хытырен дӓ спорен, а нӹнӹжӹ тӹдӹм пушташ цаценӹт.
30 Тидӹм пӓлен нӓлмӹкӹ, шӱмбелвлӓ тӹдӹм Кесариш ыжатенӹт дӓ Тарсыш колтенӹт.
31 А Иудей, Галилей дӓ Самари мычкы церкӹвлӓ тырышты ылыныт, Господь гӹц лӱдӹн ӹленӹт,* кушкыныт дӓ силангыныт, дӓ Святой Шӱлӹш кымылангдымы доно шукемӹнӹт.
32 Тенге, цилӓ вӓре каштын сӓрнӹшӹлӓ, Петр Лиддашты ӹлӹшӹ святойвлӓ докат толын.
33 Тӹштӹ тӹдӹ Эней лӹмӓн ик эдемӹм вӓшлин, тӹдӹжӹ ӹнде кӓндӓкш и вӓрӹштӹ пларичӓн киэн.
34 Петр тӹдӹлӓн келесен: «Эней, тӹньӹм Иисус Христос паремдӓ, вӓрет гӹц кӹньӹл». Эней тӹнӓмок кӹньӹлӹн.
35 Лиддашты дӓ Саронышты ӹлӹшӹвлӓ цилӓн тӹдӹм ужыныт дӓ Господь велкӹ мелӹн сӓрнӓлӹнӹт.
36 Иоппиштӹ Тавифа лӹмӓн ӹдӹрӓмӓш тыменьшӹ ылын, лӹмжӹ серна* манмым анжыкта. Тӹдӹ пуры пӓшӓвлӓм ӹштен шалген, незервлӓлӓн соок палшен.
37 Ти кечӹвлӓн Тавифа церлӓнен дӓ колен, тӹдӹм мышкыныт дӓ кӱшӹл пачашын кӹдежӹш пиштенӹт.
38 Лиддажы Иоппи гӹц мӹндӹрнок агыл ылын. Петрӹн Лиддашты ылмыжы гишӓн колмыкы, «Жепӹм шыпшде, мӓ докына тол» манын ӱжӓш тыменьшӹвлӓ тӹдӹн докы кок пӱэргӹм колтенӹт.
39 Петр тӹнӓмок нӹнӹ доно иквӓреш толын. Толын шомыкыжы, тӹдӹм кӱшӹл пачашын кӹдежӹш пыртенӹт. Петр докы мӓгӹрӹшӹ тылык ӹдӹрӓмӓшвлӓ цилӓн лишемӹнӹт, ӹлӹмӹжӹ годым Тавифан ыргымы тыгырвлӓм дӓ вӹлвӓл выргемӹм анжыктенӹт.
40 Петр цилӓштӹмӓт лыктын колтен. Вара сукалтен шӹнзӹн ыдылын дӓ кишӹ кӓп векӹ сӓрнӓлӹн келесен: «Тавифа, кӹньӹл!» Тавифа сӹнзӓжӹм пачын, вара Петрӹм ужын дӓ кӹньӹл шӹнзӹн.
41 Кидӹм виктӓлтен, Петр тӹдӹлӓн кӹньӹлӓш палшен, вара святойвлӓ дон тылык вӓтӹвлӓм ӱжӹн, нӹнӹн анзыкы ӹлӹшӹ Тавифам шагалтен.
42 Тидӹ гишӓн улы Иоппи мычкы увер шӓрлен, шукынжы Господьлан ӹнянӓш тӹнгӓлӹнӹт.
43 Петр эче икманяр жеп Иоппиштӹ каваштым ӹштӹшӹ Симон лӹмӓн эдем доны ӹлен.
*9:15 Хӓдӹр – греклӓ сирӹмӓштӹ «ӓтӹ». *9:31 Господь гӹц лӱдмӓш – Тошты Согоньыштышы кымдан пӓлӹмӹ шамак сӓрӓлтӹш. Шамак толшеш, «Соломонын шамакшым» («Книга Притчей Соломоновых») 9:10, 15:16, 19:23 анжы. *9:36 Серна – изи шарды.1 Кесариштӹ Корнилий лӹмӓн ик пӱэргӹ ылын, тӹдӹ италийский манмы полкышты шӱдӹвуй ылын.
2 Тӹдӹ цилӓ тонышыжы доно иквӓреш Йымылан лӱдӹн ыдылшы дӓ Тӹдӹм улы кымыл доно шотеш пиштӹшӹ ылын, халыкышты незервлӓлӓн со палшен шалген дӓ цӓрнӹде Йымылан ыдылын.
3 Икӓнӓ Корнилий, ӹндекш цӓшӹш кемӹкӹ,* каймашты Йымын Ангелжӹм кӹрӓт ужын. Ангел тӹдӹн докы пырен дӓ келесен: «Корнилий!»
4 Ангел вӹкӹ анжалын, Корнилий лӱдӹн келесен: «Ма, Господь?» Ангел тӹдӹлӓн вӓшештен: «Йымы тӹньӹн ыдылметӹм дӓ незервлӓлӓн пуры пӓшӓм ӹштӹметӹм шотыш нӓлӹн.
5 А ӹнде Петр манмы Симоным ӱжӹн кандаш Иоппи халашкы эдемвлӓм колты.
6 Тӹдӹ каваштым ӹштӹшӹ Симон доны хынала, пӧртшӹ тангыж лишнӹ шӹнзӓ. Петр тӹлӓнет тӹньӹм дӓ цилӓ тонышетӹм ытарышы шамакым попа».
7 Ангел тӹдӹлӓн тенге попен кемӹкӹжӹ, Корнилий кок тӓрзӹжӹм дӓ сагажы ылшывлӓ логӹц Йымым йӓнг вашт шотеш пиштӹшӹ ик салтакшым ӱжӹн.
8 Ма лимӹм цилӓ шайыштмыкы, нӹнӹм Иоппишкӹ колтен.
9 Вес кечӹн, колтымы эдемвлӓ корнышты ылмышты дӓ хала докы лишеммӹштӹ годым, Петр, куд цӓшӹш кемӹкӹ, пӧрт левӓш вӹкӹ йымыдылаш кузен.*
10 Вара тӹдӹ шужымым шижӹн, качмыжы шон. Качкаш йӓмдӹлӹмӹ годым тӹдӹм кого ӧрмӓш нӓлӹн,
11 тӹдӹ пачылтшы пӹлгомым дӓ ӹшке докыжы кӱшӹц валышы кымда мӹнер ганьым ужын, тӹдӹжӹм кӹлдӹмӹ нӹл лыкшы доно мӱлӓндӹ вӹкӹ валтенӹт.
12 Тӹштӹ мӱлӓндӹ вӹлнӹшӹ нӹл ялан йиш гӹц йиш зверь дон вольык, авалянен каштшывлӓ, пӹлгомыштышы кеквлӓ ылыныт.
13 Вара юк тӹдӹлӓн келесен: «Кӹньӹл, Петр, шӹшкӹл дӓ кач».
14 Но Петр вӓшештен: «Уке, Господь, мӹнь нигынамат нимахань ярдымым ӓли ире агылым качделам».*
15 Тӹнӓм тӹдӹлӓн юк кокшы гӓнӓ келесен: «Мам Йымы ирӹктен, тӹдӹм ире агыллан ит шотлы».
16 Тенге кым гӓнӓ ылын, вара кымда мӹнер мӹнгеш пӹлгомышкы нӓлӓлтӹн.
17 Ти каймаш мам анжыкта манын, Петрӹн ӧрӹн шалгымыжы годым Корнилийӹн колтымы эдемвлӓжӹ, Симонын пӧртшӹ кышты ылмы гишӓн ядышт пӓлен нӓлмӹкӹ, капка докы толын шагалыныт
18 дӓ юкым когоэмден ядыныт: «Петр манмы Симон тиштӹ ылеш ма?»
19 Петр эче каймаш гишӓн шаныкален, а Шӱлӹш тӹдӹлӓн келесен: «Теве кым эдем тӹньӹм кӹчӓлӹт.
20 Нӹнӹм Мӹнь колтенӓм, седӹндон кӹньӹл, валы дӓ изишӓт ит коктешлӓнӹ, нӹнӹ сага ке».
21 Ӹшке докыжы Корнилий дорц колтымы пӱэргӹвлӓ докы Петр вален дӓ келесен: «Мӹнь кӹчӓлмӹ эдемдӓ ылам. Тӓ махань пӓшӓ доно толында?»
22 Нӹнӹжӹ келесенӹт: «Мӓмнӓм шӱдӹвуй Корнилий колтен. Тӹдӹ тӧр ӹштӹшӹ, Йымылан лӱдӹн ыдылшы эдем, цилӓ иудей халыкат тӹдӹ гишӓн пурын попа. Тӹньӹм ӹшке пӧртӹшкӹжӹ ӱжӹн кандаш дӓ попыметӹм колышташ Корнилийлӓн святой Ангел шӱден».
23 Вара Петр нӹнӹм ӱжӹн пыртен дӓ хыналыктен. А вес кечӹн, кӹньӹлӹнӓт, нӹнӹ сага кен, Иоппиштӹшӹ шӱмбелвлӓ логӹц южшы сагажы кен.
24 Вес кечӹн нӹнӹ Кесариш толын шоныт. Нӹнӹм вычен, Корнилий ӹшке йыхшым дӓ лишӹл тӓнгвлӓжӹм ӱжӹн ылын.
25 Петрӹн пырымыжы годым Корнилий тӹдӹм вӓшлин дӓ анзыланжы кымык вазын кымалын.
26 А Петр тӹдӹм кӹньӹлтен дӓ келесен: «Кӹньӹл, мӹнь ӹшкежӓт эдем веле ылам».
27 Вара, тӹдӹн доно попен, пӧртӹш пырен, шукы погынышым ужын
28 дӓ нӹнӹлӓн келесен: «Иудейлӓн вес халык эдем доно кӹлӹм кычаш ӓли тӹдӹн докы пыраш цӓрӹмӹ гишӓн тӓ пӓледӓ, но ик эдемӹмӓт ярдымеш ӓли ире агылеш шотлаш ак ли манын, Йымы мӹлӓм анжыктен.
29 Седӹндон, мӹньӹм ӱжмӹкӹ, торешлӓнӹде толынам, тенгежӹ ядам: махань пӓшӓлӓн тӓ мӹньӹм ӱжӹндӓ?»
30 Корнилий келесен: «Кым кечӹ анзыц ти цӓш якте мӹнь постенӓм дӓ ӹндекшӹш кемӹ якте мӹнь тонем ыдылынам. Трӱк мӹнь анзылнем йӹлгӹжшӹ ош выргемӓн эдем кайын
31 дӓ келесен: ”Корнилий, тӹньӹн ыдылметӹм колмы, дӓ незервлӓлӓн пуры пӓшӓм ӹштӹметӹм Йымы ышышкыжы пиштен.
32 Тенгежӹ Иоппиш ӹшке эдемвлӓэтӹм колты дӓ Петр манмы Симоным ӱжӹн канды, тӹдӹ каваштым ӹштӹшӹ Симонын пӧртӹштӹжӹ тангыж сага хынала, Петр тӹнь докет толеш дӓ цилӓ келесӓ”.
33 Мӹнь тӹнӓмок тӹнь докет эдемвлӓэм колтенӓм, толмет доно тӹнь яжом ӹштенӓт. Тӹлӓт Йымы мам келесӓш шӱдӹмӹм колышташ мӓ ӹнде цилӓн Йымы анзылны ылына».
34 Тӹнӓм Петр попаш тӹнгӓлӹн: «Йымын цилӓ эдемӹм ик семӹнь анжымыжым кӹзӹт лачок ынгылышым.
35 Тӹдӹлӓн лӱдӹн ыдылшы дӓ тӧр пӓшӓм ӹштӹшӹ эдем, хоть-махань халык гӹц лижӹ, Йымылан ярал ылеш.
36 Израиль эргӹвлӓлӓн Тӹдӹ ӹшке шамакшым колтен, Иисус Христос гач тыр гишӓн Пуры Уверӹм пуэн. Иисус Христосшы цилӓ эдемӹн Господьшы.
37 Иоаннын увертӓрен попымы крестӹмӓш паштек, Галилей гӹц тӹнгӓлӹн, улы Иудей мычкы ма лимӹм тӓ пӓледӓ:
38 Йымы Назарет Иисусым Святой Шӱлӹш дӓ сила доно шӹрен. Иисус сага Йымы ылын, седӹндон Тӹдӹ пурым ӹштен дӓ диаволын кид лӹвӓлнӹжӹ ылшывлӓм цилӓштӹмӓт паремден каштын.
39 Иудей сӓндӓлӹкӹштӹ дӓ Иерусалимӹштӹ Иисус мам ӹштен, цилӓжӹлӓнӓт мӓ свидетель ылына. Тӹдӹм пу мӓнгеш пыдален пуштыныт,
40 а кымшы кечӹн Йымы Тӹдӹм ӹлӹжтен дӓ Тӹдӹлӓн каяш йӧнӹм ӹштен.
41 Но Иисус улы халыклан агыл, а мӓлӓннӓ, Йымын анзыцок айырен нӓлмӹ свидетельвлӓлӓн веле кайын. Колымаш гӹц ӹлӹж кӹньӹлмӹкӹжӹ, мӓ Тӹдӹн доно иквӓреш качкынна дӓ йӱннӓ.
42 Колышывлӓнӓт, ӹлӹшӹвлӓнӓт Судьяшты лиӓш Йымы Тӹдӹм шагалтен манын, мӓлӓннӓ Иисус халыклан увертӓрӓш дӓ свидетельствуяш шӱден.
43 Цилӓ пророквлӓ свидетельствуят: Иисуслан ӹнянӹшӹ каждый эдемӹн сулыкшы Тӹдӹн лӹм доно простялтеш».
44 Петрӹн тидӹм попымыжы годым цилӓ колыштшывлӓ вӹкӹ Святой Шӱлӹш вален.
46 (45-46) Нӹнӹн пӓлӹдӹмӹ йӹлмӹвлӓ доно попымыштым дӓ Йымым хвальымыштым колын, Петр сага толшы, Христослан ӹнянӹшӹ пӹчмӓнвлӓ* Святой Шӱлӹшӹн подаркажы язычниквлӓ вӹкӓт валталтмылан ӧрӹнӹт. Тӹнӓм Петр келесен:
47 «Мӓмнӓн семӹньок Святой Шӱлӹшӹм нӓлшӹ ти эдемвлӓлӓн вӹд доно крестӓлтӓш кӱ-гӹнят цӓрен кердеш ма?»
48 Вара нӹнӹлӓн Иисус Христос лӹмеш крестӓлтӓш шӱден. А нӹнӹжӹ Петрӹм икманяр кечӹ ӹшке донышты лиӓш ядыныт.
*10:3 Ӹндекш цӓш – кӹзӹтшӹ жеп доно 15 цӓш. *10:9 Пӧрт левӓш тӹштӹшӹ вӓрвлӓштӹ седӹрӓ гань тӧр ылын, шӹренок эдемвлӓ тӹштӹ ылыныт. «Куд цӓшӹш кемӹкӹ» – кӹзӹтшӹ веремӓ доно тура кечӹвӓл. *10:14 Иудейвлӓ махань зверь дӓ вольык пайым качкын кердӹнӹт дӓ махань пайжы ире агыл ылмым Моисейӹн законжы раскыдын анжыктен. Шамак толшеш, авалянен каштшывлӓн пайыштым качкаш ак яры ылын (Лев 11). *10:44-46 Анжы тенгеок Ап.пӓш 2:2-4. Пӹчмӓнвлӓ – анжы лӹмдерӹм.1 Язычниквлӓӓт Йымын шамакым шӱмӹшкӹштӹ пиштенӹт манын, Апостолвлӓ дӓ Иудейӹштӹшӹ шӱмбелвлӓ колыныт.
2 Петр Иерусалимӹш толмыкыжы, пӹчмӹ овуцам эртӹшӹвлӓ тӹдӹм йӓтлӓш тӹнгӓлӹнӹт:
3 «Тӹнь пӹчдӹмӹ эдемвлӓ докы пыренӓт дӓ нӹнӹ доно качкынат», – маныныт.
4 А Петр нӹнӹлӓн пачелӓ-пачелӓ шайышташ тӹнгӓлӹн:
5 «Мӹнь Иоппи халашты ылынам дӓ йымыдылынам, тӹнӓм мӹньӹм кого ӧрмӓш нӓлӹн, дӓ каймашым ужынам: кӱшӹц валышы кымда мӹнер ганьым нӹл лыкшы доно пӹлгом гӹц мӹнь докем валтенӹт.
6 Мӹнь тӹдӹм тусарен анженӓм дӓ мӱлӓндӹ вӹлнӹшӹ нӹл ялан вольыквлӓм, зверьвлӓм, авалянен каштшывлӓм дӓ пӹлгомыштышы кеквлӓм ужынам.
7 Тенгеок мӹлӓм попышы юкымат колынам: ”Кӹньӹл, Петр, шӹшкӹл дӓ кач”.
8 А мӹнь келесенӓм: ”Уке, Господь, нимахань ярдымы ӓли ире агыл мӹньӹн ышмашкем нигынамат пырыде”.
9 Пӹлгом гӹц юк кокшы гӓнӓ мӹлӓм попен: ”Мам Йымы ирӹктен, тӹдӹм тӹнь ире агылеш ит шотлы”.
10 Тидӹ кым гӓнӓ ылын, вара цилӓ мӹнгеш пӹлгомыш нӓлӓлтӹн.
11 Тӹнӓмок мӹньӹн ӹлӹмӹ пӧртгутанеш кым эдем шагалын. Нӹнӹм мӹнь докем Кесари гӹц колтенӹт ылын.
12 Изишӓт коктешлӓнӹде нӹнӹ сага кеӓш Шӱлӹш мӹлӓм келесен. Ти куд шӱмбел мӹнь донем иквӓреш кен, дӓ ӱжшӹ эдемӹн пӧртӹшкӹжӹ мӓ пыреннӓ.
13 Тӹдӹ мӓлӓннӓ ӹшке пӧртӹштӹжӹ Ангелӹм ужмыжы гишӓн шайыштын. Ангел тӹдӹлӓн попен: ”Петр манмы Симоным ӱжӹн кандаш эдемвлӓм Иоппиш колты.
14 Тӹдӹ тӹньӹмӓт, тонышывлӓэтӹмӓт ытарышы шамаквлӓм тӹлӓнет келесӓ”.
15 Попаш тӹнгӓлмӹкем, тӹнгӓлтӹшӹштӹ мӓ вӹкӹнӓ валымы семӹньок нӹнӹ вӹкӓт Святой Шӱлӹш вален.
16 Тӹнӓм мӹнь Господьын кыце попымыжым ӓшӹндӓрӹшӹм: ”Иоанн вӹд доно крестен, а тӓ Святой Шӱлӹш доно крестӹмӹ лидӓ”.
17 Тенгежӹ, Господь Иисус Христослан ӹнянӓш тӹнгӓлмӹкӹнӓ, Йымы мӓлӓннӓ мам пуэн, нӹнӹлӓнӓт техеньӹмок пуэн гӹнь, Йымылан ӓптӹртӓш кӱ мӹнь ылам?»
18 Тидӹм колыштмыкы, цилӓн тырленӹт дӓ Йымым хвален попенӹт: «Тенгежӹ, сулык гӹц карангмы гач ӹлӹмӓшӹм нӓлӓш язычниквлӓлӓнӓт Йымы йӧнӹм пуэн».
19 Стефаным пуштмы паштек поктылмаш велдӹк шӓлӓнен кешӹвлӓ Финики, Кипр, Антиохи якте шоныт. Нӹнӹ Христос гишӓн шамакым иудейвлӓ гӹц пасна иктӹлӓнӓт попыделыт.
20 Тенге гӹнят нӹнӹ лошты икманяр эдем Кипр дӓ Кириней гӹц ылын, нӹнӹжӹ, Антиохиш толмыкы, Господь Иисус гишӓн Пуры Уверӹм эллинвлӓлӓнӓт шайыштыныт.
21 Господьын кидшӹ нӹнӹ сага ылын, пиш шукын Господьлан ӹнянӓш тӹнгӓлӹнӹт дӓ Тӹдӹн векӹ сӓрнӓлӹнӹт.
22 Тидӹ гишӓн шая Иерусалим церкӹ якте шон, дӓ Варнавам Антиохиш колтенӹт.
23 Тӹдӹ, толмыкыжы, Йымын благодатьшым ужынат, когон сусу лин дӓ цилӓм Господь доно улы шӱм вашт лиӓш ӱжӹн.
24 Тӹдӹ Святой Шӱлӹш дӓ ӹнянӹмӓш доно циц темшӹ пуры пӱэргӹ ылын. Господь докы шукы эдем ушнен.
25 Вара Варнава Тарсыш Савлым кӹчӓлӓш кен, тӹдӹм мон дӓ Антиохиш канден.
26 Нӹнӹ тӹштӹ ик и мычкы церкӹштӹ халыкым погенӹт дӓ шукы эдемӹм тымденӹт. Антиохиштӹ тыменьшӹвлӓм сек анзыц христианвлӓ манаш тӹнгӓлӹнӹт.
27 Ти кечӹвлӓн Иерусалим гӹц Антиохиш пророквлӓ толыныт.
28 Нӹнӹ логӹц иктӹжӹ, Агав лӹмӓнжӹ, кӹньӹл шагалынат, улы сӓндӓлӹк мычкы кого шужымаш лишӓшлык гишӓн Шӱлӹш пӓлдӓрӹмӹ доно анзыцок увертӓрен. Шужымашыжы Клавдий кесарь годым ылын.
29 Тӹнӓм тыменьшӹвлӓ каждыйжы кердмӹштӹ семӹнь Иудейӹштӹ ӹлӹшӹ шӱмбелвлӓлӓн палшыкым колташ решенӹт.
30 Нӹнӹ тенгеок ӹштенӹт, погымыштым Варнава дон Савл гач пресвитервлӓлӓн колтенӹт.
1 Тӹ жепӹн Ирод кугижӓ* церкӹш каштшывлӓ логӹц икманярыжы вӹкӹ, худам ӹштӓш манын, кидӹм лӱктӓлӹн.
2 Тӹдӹ Иоаннын Иаков ӹзӓжӹм меч доно пуштыктен.
3 Иудейвлӓлӓн тенге ӹштӹмӹ келшӹмӹм ужынат, Петрӹмӓт вара кычыктен, тидӹжӹ Шергиндӹ празнык годым ылын.
4 Кычымыкы, тӹдӹм кызаматыш шӹнден дӓ нӹл эдемӓн нӹл салтак партьылан оролаш коден. Когечӹ паштек Ирод Петрӹм халык анзыкы лыкнежӹ ылын.
5 Тенге Петрӹм кызаматышты ороленӹт, а ти жепӹн церкӹ тӹдӹн верц Йымылан цӓрнӹде ыдылын.
6 Ирод Петрӹм халык анзыкы лыкнежӹ ылын. Кок цеп доно цеплӹмӹ Петр тӹлец анзыцшы йыдым кок салтак лошты амален. Оролвлӓ кызамат амаса сагаат ороленӹт.
7 Трӱк Господьын Ангелжӹ лӓктӹн шагалын дӓ кӹдеж валгалт кен, Петрӹм Ангел покажы гӹц тӹкӓлӹн понгыжалтарен дӓ келесен: «Кӹньӹл йӹлерӓк». Петрӹн кидшӹ гӹц цепвлӓ колталтыныт.
8 Ангел тӹдӹлӓн попен: «Ӹштӓл, ялышкет ялеш чимӹ хӓдӹретӹм чи». Петр тенгеок ӹштен. Вара Ангел келесен: «Вӹлвӓл выргеметӹм чи дӓ паштекем ке».
9 Петр лӓктӹн дӓ паштекшӹ кен. Ангелӹн ӹштӹмӹжӹ лачок ылмым пӓлӹде, а сӹнзӓэшӹжӹ каеш машанен.
10 Нӹнӹ оролвлӓм ик вӓре эртенӹт, вара вес вӓре, халаш лӓкмӹ кӹртни капка докы толын шоныт, тӹдӹжӹ нӹнӹлӓн ӹшкеок пачылтын. Нӹнӹ лӓктӹнӹт, ик ӧлицӓм эртӹмӹкӹ, трӱк Ангел тӹдӹ дорц карангын.
11 Тӹнӓм Петр, шамжы пырымыкы, келесен: «Ӹнде мӹнь лачок пӓлем: Господь Ангелжӹм колтен, мӹньӹм Иродын кидшӹ гӹц дӓ иудей халыкын мӹнь донем ма лишӓшӹм вычымыжы гӹц ытарен».
12 Тидӹм ынгылымыкы, Марк манмы Иоаннын Мария ӓвӓжӹн пӧртшӹ докы толын, кышты шукын погыненӹт дӓ ыдылыныт.
13 А кынам Петр капкам тӹкен, Рода лӹмӓн тӓрзӹ ӹдӹр анжалаш лӓктӹн.
14 Петрӹн юкшым пӓленӓт, сусу лимӹ доно капкам пачде, а кыргыж пырен дӓ Петр капка анзылны шалга манын увертӓрен.
15 А погынышывлӓ тӹдӹлӓн келесенӹт: «Тӹнь ышанок ылат?» Но ӹдӹр ӹшке шамакшы гӹц карангде, а нӹнӹжӹ маныныт: «Тидӹ тӹдӹн Ангелжӹ».
16 Петр капкам тӹкӓш цӓрнӹде. Пачмыкышты, тӹдӹм ужын, когон ӧрӹнӹт.
17 Шӹплӓнӹштӹ манын, Петр кидшӹм лӱктӓлӹн дӓ Господь тӹдӹм кызамат гӹц кыце лыкмы гишӓн нӹнӹлӓн шайыштын дӓ келесен: «Тидӹ гишӓн Иаковлан дӓ шӱмбелвлӓлӓн увертӓрӹдӓ». Вара Петр тӹшец лӓктӹн дӓ вес вӓрӹш кен.
18 Петр доно ма лимӹ гишӓн ирок салтаквлӓ когон тыргыжланаш тӹнгӓлӹнӹт.
19 А Ирод Петрӹм кӹчӓлӹктен, тӹдӹм моделытат, оролвлӓ гӹц ядыштын, нӹнӹм пушташ шӱден, а ӹшкежӹ Иудей гӹц Кесариш кен дӓ тӹштӹ икманяр жепӹм эртӓрен.
20 Тир дон Сидонышты ӹлӹшӹвлӓ вӹкӹ Ирод шӹдешкӹшӹ ылын, а нӹнӹжӹ тӹдӹн докы икышын толыныт, кугижӓн постельник* Властым ӹшке монгырышкышты сӓртенӹт дӓ тырым ядыныт. Нӹнӹ Иродын вуйлатымы вӓр гӹц качкышым нӓлӹнӹт.
21 Пӓлемдӹмӹ кечӹн Ирод, кугижӓн выргемӹм чиэн, суйымы вӓрӹш шӹнзӹн дӓ нӹнӹлӓн попаш тӹнгӓлӹн,
22 а халык саслен: «Тидӹ Йымын юкшы, а эдемӹн агыл!»
23 Йымылан пушашлык лӹмлештӓрӹмӓшӹм Ирод нӓлӹн, седӹндон Господьын Ангелжӹ тӹдӹм тӹнӓмок лыпшалын, Иродым шукшвлӓ качкыныт, тӹдӹ колен.
24 А Йымын шамакшы силангын дӓ шӓрлен.
25 Варнава дон Савл, палшыкым пумы пӓшӓм ӹштен шоктымыкышты, сагашты Марк манмы Иоанным нӓлӹнӹт дӓ Иерусалим гӹц Антиохиш пӧртӹлӹнӹт.
*12:1 Тидӹ Ирод – Ирод Агриппа I. *12:20 Постельник – кугижӓ донышы кого тӧрӓ.1 Антиохиштӹшӹ церкӹштӹ икманяр пророк дон тымдышы ылын: Варнава, Нигер манмы Симеон, Кириней гӹц Луций, тетрарх Ирод доно иквӓреш кушшы Манаил дӓ Савл.
2 Господьлан служымышты дӓ постым айымышты годым Святой Шӱлӹш келесен: «Мӹнь Варнава дон Савлым пасна пӓшӓлӓн ӱжӹнӓм, ти пӓшӓм ӹштӓш Мӹлӓнем нӹнӹм айырен шагалтыда».
3 Тӹнӓм нӹнӹ постым аенӹт, ыдылыныт, Варнава дон Павел вӹкӹ кидӹм пиштенӹт дӓ нӹнӹм колтенӹт.
4 Святой Шӱлӹш колтымы Варнава дон Павел Селевкиш толыныт, тӹшецӹн, корабльыш шӹнзӹн, Кипрыш кенӹт.
5 А Саламинӹшкӹ шомыкышты, иудейвлӓн синагогвлӓштӹ Йымын шамакым увертӓрен тымденӹт. Иоанн сагашты ылын дӓ нӹнӹлӓн палшен.
6 Нӹнӹ Паф якте островым вашт эртенӹт. Тӹштӹ Вариисус лӹмӓн иудейӹм вӓшлинӹт. Тӹдӹжӹ, йозы дӓ алтанзык пророк,
7 Сергий-Павел проконсул сага ылын. Сергий-Павел ышан пӱэргӹ ылын. Йымын шамакшым колыштмыжы шон дӓ Варнава дон Савлым ӹшке докыжы ӱжӹн.
8 Но Елима йозы – лӹмжӹ тидӹмок анжыкта – нӹнӹ ваштареш ылын, проконсулым ӹнянӹмӓш гӹц карангдаш цацен.
9 Тӹнӓм Савл, тӹдӹм тенгеок Павел маныныт, Святой Шӱлӹш доно темӹн, йозы вӹкӹ туран анжалын
10 дӓ келесен: «О, диаволын эргӹжӹ! Тӹнь шукы йиш алталымаш дӓ шукы йиш худа пӓшӓ доно циц темӹнӓт. Тӹнь цилӓ тӧрӹн тышманжы ылат! Господьын тӧр корныжы гишӓн алтален попаш ат цӓрнӹ ма?
11 А теве Господьын кидшӹ тӹнь ваштарешет виктӓрӓлтӹн, тӹнь слӧпӧй лиӓт дӓ пӓлемдӹмӹ жеп якте кечӹм ат уж». Тӹнӓмок йозым пӹц пӹцкемӹш леведӹн, дӓ тӹдӹ, тӹшкӹ-тишкӹ сӓрнен, виден нӓнгешӹм кӹчӓлӹн.
12 Ма лимӹм ужын, Господьын тымдымыжылан проконсул когон ӧрӹн дӓ Господьлан ӹнянен.
13 Павел дӓ тӹдӹн доно иквӓреш каштшывлӓ Пафышты корабльыш шӹнзӹнӹт дӓ Памфилиштӹшӹ Пергиш толын шоныт. Тӹштӹ нӹнӹ гӹц Иоанн айырлен дӓ Иерусалимӹш пӧртӹлӹн.
14 А нӹнӹжӹ Перги гӹц пакыла кенӹт дӓ Писидиштӹшӹ Антиохиш толыныт, кукшыгечӹн синагогыш пыренӹт дӓ шӹнзӹнӹт.
15 Законым дӓ пророквлӓн сирӹмӹштӹм лыдмы паштек синагогын вуйлатышывлӓ нӹнӹлӓн келесӓш колтенӹт: «Шӱмбелвлӓ, халыкым кымылангдымы шамакда улы гӹнь, попыда».
16 Павел кӹньӹлӹн, кидӹм лӱктӓлӹн дӓ келесен: «Израильӹн эдемвлӓжӹ дӓ Йымы гӹц лӱдшӹвлӓ, колыштда:
17 Израиль халыкын Йымыжы мӓмнӓн ӓтявлӓнӓм айырен нӓлӹн дӓ Египетӹштӹ ылмышты годым ти халыкым шукемден. Ӹшкӹмжӹн силан кидшӹ доно тӹдӹм Египет гӹц лыктын
18 дӓ нӹллӹ и нӓрӹ пустыньышты нӹнӹм пукшен,
19 Ханаан мӱлӓндӹштӹ шӹм халыкым пӹтӓрен дӓ нӹнӹн мӱлӓндӹштӹм ӹшке халыкланжы пайылен пуэн.
20 Тидӹн паштек пророк Самуилӹн жепшӹ якте нӹлшӱдӹ вӹцлӹ и нӓрӹ нӹнӹлӓн судьявлӓм пуэн.
21 Вара нӹнӹ кугижӓм ядыныт, дӓ Йымы нӹнӹлӓн Кисӹн Саул эргӹжӹм, Вениамин вырлык гӹц пӱэргӹм, пуэн. Тенге нӹллӹ и эртен.
22 Вара Йымы тӹдӹм карангден дӓ кугижӓэш Давидӹм шагалтен, тӹдӹ гишӓн свидетельствуен келесен:
”Мӹнь шӱмемлӓн келшӹшӹ пӱэргӹм,
Иессейӹн Давид эргӹжӹм, монам,
тӹдӹ Мӹньӹн цилӓ шанымашем шокта”.*
23 Тӹдӹн вырлыкшы гӹц Йымы сӧрӹмӹжӹ семӹньок Израильлӓн Ытарышы Иисусым пуэн.
24 Иисус толмы гӹц анзыц Иоанн улы Израиль халыклан, сулыкыштым простьыктен, Йымы докы сӓрнӓлӓш дӓ крестӓлтӓш келмӹ гишӓн тымден.
25 Ӹшке пӓшӓжӹм пӹтӓрӹмӹжӹ годым Иоанн келесен: ”Мӹньӹм кӱэш шотледӓ, мӹнь тӹдӹ ам ыл, но теве паштекем Весӹ толеш, мӹнь Тӹдӹн ялеш чимӹ хӓдӹржӹн кӓндӹрӓжӹмӓт шӱтӓш ам яры”.
26 Шӱмбелвлӓ, Авраам вырлыкын эргӹвлӓжӹ дӓ тӓ лоштыда Йымылан лӱдӹн ыдылшывлӓ! Тидӹ ытарымаш гишӓн шамакым тӓлӓндӓ колтымы.
27 Иерусалимӹштӹ ӹлӹшӹвлӓ дӓ нӹнӹн вуйлатышывлӓштӹ Иисусын кӱ ылмыжым пӓлӹделыт, Тӹдӹм суйымышты доно кукшыгечӹ йӹде лыдмы пророквлӓн шамакыштым шоктенӹт.
28 Пушташ ситӹшӹ нимахань вуйнаматшым моделыт гӹнят, Иисусым пушташ Пилат гӹц ядыныт.
29 Тӹдӹ гишӓн мам сирӹмӹм цилӓ шоктымыкы, пу мӓнгӹ гӹц валтенӹт дӓ шӹгерӹш пиштенӹт.
30 Но Йымы Тӹдӹм колымаш гӹц ӹлӹжтен.
31 Иисус Ӹшке сагажы Галилей гӹц Иерусалимӹш толшывлӓлӓн шукы кечӹ таманяр гӓнӓ кайын. А ӹнде нӹнӹ халык анзылны Тӹдӹн свидетельжӹ ылыт.
33 (32-33) Мӓ кӹзӹт тӓлӓндӓ Пуры Уверӹм келесенӓ: Йымы мам мӓмнӓн ӓтянӓвлӓлӓн сӧрен, тӹдӹм нӹнӹн тетяштӹлӓн, мӓлӓннӓ, ӹштен шоктен. Кокшы псаломышты сирӹмӹ семӹнь, Иисусым ӹлӹжтен. Тӹштӹ попалтеш:
”Тӹнь Мӹньӹн Эргем ылат,
Мӹнь Тӹньӹм тагачы шачыктенӓм”.*
34 Йымы Иисусым колымаш гӹц ӹлӹжтен гӹнь, Тӹдӹ ӹнде шӱн кимӓшкӹ ак пӧртӹл. Тидӹ гишӓнок Йымы тенге келесен:
”Мӹнь Давидлӓн сӧрӹмӹ
лачок дӓ вашталтдымы пурым тӓлӓндӓ пуэм”.*
35 Вес вӓреӓт попен:
”Святоетлӓн шӱмӓшӹм ужаш ат пу”.*
36 Ӹшке жепӹштӹжӹ Йымын ирӹкшӹлӓн* служымыкы, Давид колен. Тӹдӹм ӓтя-тьотяжы сага таенӹт, дӓ тӹдӹн кӓпшӹ шӱн.
37 А Кӱм Йымы ӹлӹжтен, Тӹдӹ шӱмӓшӹм ужде.
38 Тенгежӹ, шӱмбелвлӓ, пӓлен лидӓ: Иисус верц сулыкдам простьымаш тӓлӓндӓ увертӓрӓлтеш.
39 Кышты тӓ Моисейӹн законжы гач тӧрӹш лӓктӹн кердделда, тӹштӹ цилӓ ӹнянӹшӹвлӓ Иисус гач тӧрӹш лӓктӹт.
40 Перегӓлтдӓ, тӓ донда пророквлӓн попымышты семӹнь ӹнжӹ ли. Нӹнӹ попенӹт:
41
”Анжалда, мыскылышывлӓ, ӧрдӓ дӓ ямда:
Мӹнь тӓмдӓн кечӹвлӓштӹ ӧрӹктӓрӹшӹ пӓшӓм ӹштем,
иктӓжӹ тӓлӓндӓ тидӹм шайыштеш гӹнят,
ада ӹнянӹ ыльы”».*
42 Кынам Павел дон Варнава иудейвлӓн синагогышты гӹц лӓктӹнӹт, язычниквлӓ вес кукшыгечӹнӓт тидӹ гишӓнок шайышташ ядыныт.
43 Погынымаш гӹц шӓлӓнен кемӹкӹ, иудейвлӓ дӓ Йымым шотлышы молнамшы язычниквлӓ шукынжы Павел дон Варнава паштек кенӹт, а Павел дон Варнава нӹнӹ доно хытыренӹт дӓ Йымын благодатьшым кычен ӹлӓш ӹняндӓренӹт.
44 Вес кукшыгечӹн Йымын шамакшым колышташ хала хӓлӓок, манаш лиеш, погынен.
45 Тинӓр халыкым ужмыкы, иудейвлӓн йӓнгӹштӹ когон йылен, торешлӓнен дӓ худан вырсен, Павелӹн попымыжы ваштареш шалгенӹт.
46 Тӹнӓм Павел дон Варнава лӱдде келесенӹт: «Йымын шамакшым сек анзыц тӓлӓндӓ увертӓрӓш келеш ыльы, но тӓ тӹдӹм карангдедӓ, ӹшкӹмдӓм курымашлык ӹлӹмӓшлӓн ярдымым ӹштедӓ, седӹндон мӓ язычниквлӓлӓн попаш тӹнгӓлӹнӓ.
47 Господь мӓлӓннӓ тенге шӱден:
”Мӹнь Тӹньӹм язычниквлӓлӓн соты лиӓш шагалтенӓм,
сӓндӓлӹк тӹр якте Тӹнь ытарымаш лиӓт”».*
48 Тидӹм колмыкы, язычниквлӓ сусу линӹт дӓ Господьын шамакшым хваленӹт, курымашлык ӹлӹмӓшлӓн пӓлемдӹмӹвлӓ цилӓн ӹняненӹт.
49 Господьын шамакшы улы сӓндӓлӹк мычкы шӓрлен.
50 Но иудейвлӓ Йымым шотлышы дӓ когон шотеш пиштӹмӹ ӹдӹрӓмӓшвлӓм, тенгеок халаштышы когораквлӓм тӓрвӓтенӹт, Павел дон Варнавам поктылаш тӹнгӓлӹнӹт дӓ ӹшке вӓрвлӓштӹ гӹц поктен колтенӹт.
51 Ялышты гӹц пыракым нӹнӹ ваштареш пачкалтен, Павел дон Варнава Икониш кенӹт.
52 А тыменьшӹвлӓ сусу дӓ Святой Шӱлӹш доно темӹнӹт.
*13:22 Пс 88:21, 1 Цар 13:14. *13:32-33 Пс 2:7. *13:34 Ис 55:3. *13:35 Пс 15:10. *13:36 Ирӹк – воля, желание. *13:41 Авв 1:5. *13:47 Ис 49:6.1 Икоништӹ Павел дон Варнава эчеӓт иудейвлӓн синагогыш пыренӹт дӓ тенге тымден шайыштыныт, когон шукы иудей дон эллин ӹнянӓш тӹнгӓлӹн.
2 Но ӹнянӹдӹмӹ иудейвлӓ шӱмбелвлӓ ваштареш язычниквлӓм тӓрвӓтенӹт дӓ шӹдештӓренӹт.
3 Павел дон Варнава тиштӹ шукы жеп ылыныт, Господь гишӓн лӱдде попенӹт. Тӹдӹжӹ нӹнӹн кидӹштӹ доно пӓлӹквлӓм дӓ цӱдӓвлӓм ӹштен дӓ тидӹн доно Ӹшкӹмжӹн благодать шамакшын лачок ылмыжым анжыктен.
4 Тенге, халаштышы халык шелӓлтӹн, иктӹвлӓжӹ иудейвлӓ монгырыш линӹт, весӹвлӓжӹ – Апостолвлӓ монгырыш.
5 Вара язычниквлӓ дӓ иудейвлӓ вуйлатышывлӓштӹ доно иквӓреш Павел дон Варнавам мыскылен орландараш дӓ, вӹкӹштӹ кӱм кӹшкен, нӹнӹм шин пушташ шаненӹт.
6 Апостолвлӓ тидӹ гишӓн пӓлен нӓлӹнӹт, Ликаони мӱлӓндӹштӹшӹ Листра дон Дерви халавлӓшкӹ дӓ нӹнӹ лишнӹшӹ вӓрвлӓшкӹ кенӹт.
7 Тӹштӓт Пуры Уверӹм шӓренӹт.
8 Листрашты ял пларичӓн ик пӱэргӹ ӹлен. Тӹдӹ шачынок акшак ылын, со шӹнзен веле, нигынамат каштде.
9 Тӹдӹ Павелӹн попымыжым колыштын. Павел тӹдӹн вӹкӹ анжалын дӓ, паремӓш ӹнянӹмӹжӹм ужын,
10 юкым когоэмден келесен: «Иисус Христос Господьын лӹмжӹ доно тӹлӓнет попем: ял вӹкет тӧр шагал». Акшак эдем тӹнӓмок тӹргештен кӹньӹлӹн дӓ кашташ тӹнгӓлӹн.
11 Павелӹн мам ӹштӹмӹжӹм ужмыкы, эдемвлӓ, юкым когоэмден, ликаон йӹлмӹ доно попаш тӹнгӓлӹнӹт: «Мӓ докына эдем сӹн доно йымывлӓ валенӹт!»
12 Варнавам нӹнӹ Зевс манын лӹмденӹт, а виктӓрен попымыжы гишӓн Павелӹм Ермий маныныт.*
13 Халашкы пырымашты Зевс идолын пӧртшӹ шалген, дӓ Зевслӓн кымалшы карт капка анзыкы ӱшкӱж дон веноквлӓм канден, халык доно иквӓреш цӧклӹнежӹ ылын.
14 Но Варнава дон Павел Апостолвлӓ тидӹ гишӓн колмыкы, вӹлвӓл выргемӹштӹм кышкедӹнӹт, халык лошкы кыргыж пыренӹт дӓ сасленӹт:
15 «Пӱэргӹвлӓ, малын тенге ӹштедӓ? Мӓӓт тӓ ганьдаок эдем веле ылына. Мӓ тӓлӓндӓ Пуры Уверӹм шӓренӓ, тӓмдӓм цилӓ техень акел гӹц карангаш дӓ Ӹлӹшӹ Йымы докы мелӹн сӓрнӓлӓш ядына. Тӹдӹ пӹлгомым, мӱлӓндӹм, тангыжым дӓ тӹштӹ цилӓ ма ылшым ӹштен.
16 Тӹдӹ эртӹшӹ жепӹштӹ халыквлӓлӓн ӹшке корнышты доно кеӓш цӓрӹде.
17 Тӹ веремӓнок пурым ӹштӹмӹжӹ доно Ӹшкӹмжӹм соок пӓлдӹртен шалген: мӓлӓннӓ пӹлгом гӹц юрым колтен, кӹцкӹ лӓктӹшӹм жепӹштӹжӹ пуэн, мӓмнӓм теммеш пукшен, йӓнгнӓм сусуэмден».
18 Тидӹм попен, нӹнӹ лӹмеш ӹнжӹштӹ цӧклеп манын дӓ каждыйжым токышты кеӓш цуц ӹняндӓрен кердӹнӹт. Павел дон Варнава тӹшӓк кодын тымдымышты годым
19 Антиохи дӓ Икони гӹц иудейвлӓ таманярын толыныт, а [Апостолвлӓ] лӱдде попымышты годым халыкым нӹнӹ дорц карангаш ӹняндӓренӹт дӓ келесенӹт: «Ти эдемвлӓ нимат тӧрӹм ак попеп, цилӓ алталат». Толшывлӓ халыкым пыдыратенӹт. Павел вӹкӹ кӱм кӹшкенӹт, вара, колышеш шотлен, хала гӹц шӹдӹртен лыктыныт.
20 Но кынам тыменьшӹвлӓ йӹржӹ погыненӹт, Павел кӹньӹлӹн дӓ халашкы пӧртӹлӹн, а вес кечӹнжӹ Варнава доно иквӓреш Дервиш кен.
21 Ти халашты Пуры Уверӹм шӓрӹмӹкӹ дӓ шукы эдемӹм тыменьшӹм ӹштӹмӹкӹ, нӹнӹ мӹнгеш Листраш, Икониш дӓ Антиохиш пӧртӹлӹнӹт,
22 тыменьшӹвлӓн йӓнгӹштӹм пингӹдемденӹт, Христослан ӹнянӹмӓштӹ цаткыды лиӓш кымылангденӹт. Нӹнӹ попенӹт: «Мӓлӓннӓ Йымын Кугижӓншӹш шукы нелӹ гач пыраш вӓрештеш».
23 Павел дон Варнава каждый церкӹлӓн, вӹкӹштӹ кидӹм пиштен, пресвитервлӓм шагалтенӹт, ыдылмы дӓ постым айымы паштек ӹнянӹмӹ Господьыштылан нӹнӹм анжаш коденӹт.
24 Вара Павел дон Варнава, Писиди гач эртен, Памфилиш толыныт.
25 Пергиштӹ Господьын шамакшым шайыштмыкы, Атталиш кенӹт,
26 а тӹшецӹн, корабльыш шӹнзӹн, Антиохиш толыныт. Кӹзӹт мычашкы шоктымы пӓшӓм ӹштӓш нӹнӹм тишток Господьын благодатьшылан ӹнянен пуэнӹт.
27 Толмыкышты, нӹнӹ церкӹ погынымашым цымыренӹт, Йымы нӹнӹ доно мам ӹштӹмӹм, ӹнянӹмӓш амасам язычниквлӓлӓн пачмым увертӓренӹт.
28 Тӹштӹжӹ тыменьшӹвлӓ доно чӹдӹ агыл жеп ылыныт.
*14:12 Зевс – греквлӓн тӹнг идолышты. Ермий (Гермес, Меркурий) – греквлӓн идолвлӓн увер кандышышты.1 Иудей гӹц толшы икманяр эдем шӱмбелвлӓм тенге тымден: «Тӓ Моисейӹн шӱдӹмӹжӹ семӹнь пӹчмӹ овуцам ӹшкӹлӓндӓ ада эртӓрӹ гӹнь, ытаралт ада керд».
2 Павел дон Варнава нӹнӹ ваштареш шагалыныт дӓ чӹдӹ агыл кӹрмӓшенӹт. Павел дон Варнавам дӓ икманяр молы эдемӹм Апостол дон пресвитервлӓ докы Иерусалимӹш ти ядмаш доно колтенӹт.
3 Тенге, церкӹн эдемвлӓжӹ нӹнӹм ыжатен колтенӹт. Кешӹвлӓ Финики дон Самарим эртенӹт, язычниквлӓн Христос векӹ сӓрнӓлтмӹштӹ гишӓн шайыштыныт, цилӓ шӱмбелвлӓ лошкы сусум канденӹт.
4 А Иерусалимӹш толмыкышты, нӹнӹм церкӹ дӓ Апостол дон пресвитервлӓ вӓшлинӹт. Ӹшкештӹ доно Йымы мам ӹштӹмӹм дӓ ӹнянӹмӓш амасам язычниквлӓлӓн кыце пачмым нӹнӹ цилӓ шайыштыныт.
5 Фарисейвлӓ логӹц ӹнянӓш тӹнгӓлшӹ икманяр эдем кӹньӹл шагалын дӓ попен: «Язычниквлӓ логӹц ылшы ӹнянӹшӹвлӓ доно пӹчмӹ овуцам эртӓрӹмӹлӓ, тенгеок нӹнӹлӓн Моисейӹн законжым шокташ шӱдӹмӹлӓ».
6 Ти ядмашым анжаш Апостол дон пресвитервлӓ погыненӹт.
7 Шукы жеп ланзылымы паштек Петр кӹньӹл шагалын дӓ нӹнӹлӓн келесен: «Шӱмбелвлӓ, тӓ пӓледӓ: язычниквлӓ Пуры Уверӹм мӹнь гӹцем колышты дӓ ӹнянӹштӹ манын, Йымы мӹньӹм мӓ логӹцнӓ шукердок айырен нӓлӹн.
8 Цилӓн шӱмӹм пӓлӹшӹ Йымы язычниквлӓм Ӹшке докыжы лишемден. Святой Шӱлӹшӹм мӓлӓннӓ пумыжы семӹньок нӹнӹлӓнӓт пумыжы доно тидӹм свидетельствуен.
9 Нӹнӹм мӓ гӹцнӓ нима семӹнят айыркалыде, а шӱмӹштӹм ӹнянӹмӓш доно ирӹктен.
10 Тенгежӹ малын кӹзӹт тӓ Йымым тергедӓ? Малын тыменьшӹвлӓн ӹнгӹжӓшкӹштӹ нелӹцӹм пиштӹнедӓ? Мӓмнӓн ӓтянӓвлӓӓт, мӓӓт тӹдӹм намал кердделна.
11 А мӓ нӹнӹ семӹньок Господь Иисус Христосын благодатьшы доно ытаралтына манын ӹняненӓ».
12 Тӹнӓм улы погынымаш шӹплӓнен дӓ Варнава дон Павелӹм колышташ тӹнгӓлӹн. А нӹнӹжӹ шайыштыныт, кыце Йымы нӹнӹ гач язычниквлӓ лошты пӓлӹквлӓм дӓ цӱдӓвлӓм ӹштен.
13 Кынам нӹнӹ шӹплӓненӹт, Иаков попаш тӹнгӓлӹн: «Шӱмбелвлӓ, мӹньӹм колыштда.
14 Кыце Йымы пӹтӓри язычниквлӓ докы пуры доно сӓрнӓлӹн дӓ нӹнӹ логӹц Ӹшкӹлӓнжӹ халыкым нӓлӓш шанен манын, Симон ынгылдарен.
15 Пророквлӓн сирӹмӹ шамаквлӓштӓт тидӹн доно келшен толыт:
16 ”Тидӹн паштек Мӹнь пӧртӹлӓм
дӓ Давидӹн шӓлӓнӹшӹ скинижӹм* угӹц ӹштем,
тӹштӹ шӓлӓтӹмӹм цилӓ чангем дӓ тӧрлем.
17 Тӹнӓм цилӓ мол эдемвлӓ
дӓ Мӹньӹн манын лӹмдӹмӹ цилӓ вес халык
Господьым кӹчӓл кердӹт”.
Цилӓ тидӹм ӹштӹшӹ Господь тенге попен.*
18 Йымылан ӹшке пӓшӓжӹ курымаш ӓкрет годшенок пӓлӹмӹ.
19 Седӹндон язычниквлӓ логӹц Йымы докы сӓрнӓлшӹвлӓлӓн нелӹм ӹштӹшӓшлык ана ыл манын, мӹнь шанем.
20 Идоллан кымалмы доно лявӹргӹшӹ гӹц, шӓхӓрлӓнӹмӹ гӹц, пӹц кен колышын пайжым дӓ вӹрӹм качмы гӹц ӹшкӹмӹштӹм кычышты, тенгеок мам ӹшкӹлӓнӹштӹ ӹнештӹ ӹштӹктӹ, весӹлӓнӓт тӹдӹм ӹнжӹштӹ ӹштеп манын, мӓ нӹнӹлӓн сирӹшӓшлык ылына.
21 Вет Моисейӹн законжым увертӓрӹшӹвлӓ цилӓ халашты первишӹ йых гӹцок ылыт, тӹдӹм кукшыгечӹ йӹде синагогвлӓштӹ лыдыт».
22 Тӹнӓм Апостолвлӓ дон пресвитервлӓ цилӓ церкӹ доно иквӓреш ӹшке лошты гӹц эдемвлӓм айыраш дӓ нӹнӹм Павел дон Варнава сага Антиохиш колташ решенӹт. Нӹнӹ Варсава манмы Иудам дӓ Силам айыренӹт. Шӱмбелвлӓ лошты ти кок эдем вуйлатышы ылын.
23 Сагашты техень сирмӓшӹм колтенӹт: «Апостолвлӓ, пресвитервлӓ дон шӱмбелвлӓ Антиохиштӹ, Сириштӹ дӓ Киликиштӹ ӹлӹшӹ, молнам язычник ылшы шӱмбелвлӓлӓн: сусу лидӓ.*
24 Мӓ колынна: мӓ логӹцнӓ южшы толыныт дӓ шӱдӹмӹнӓ гӹц пасна ”Ӹшкӹмдӓм пӹчкӹктӓш дӓ Моисейӹн законжым шокташ келеш” манмы шамакышты доно тӓмдӓм ӧрӹктӓренӹт дӓ шӱмдӓм пыдыратенӹт, седӹндон
25 мӓ икышын тӓ докыда айырен нӓлмӹ эдемвлӓнӓм колташ шанышна. Нӹнӹ яратымы ӹзӓвлӓнӓ Варнава дӓ Павел доно иквӓреш толыт –
26 нӹнӹжӹ мӓмнӓн Господьна Иисус Христосын лӹмжӹ верц йӓнгӹштӹм пуаш йӓмдӹ ылыныт.
27 Тенге, мӓ Иуда дон Силам колтенӓ, нӹнӹ кӹзӹт сирӹмӹ увернӓмок тӓлӓндӓ попен ынгылдарат.
28 Керӓл гӹц уты нелӹжӹм тӓ вӹкӹдӓ ана пиштӹ. Святой Шӱлӹш дӓ мӓӓт тидӹм яжоэш шотленӓ. Тидӹм веле ядына:
29 идоллан пумы жертвӹм, вӹрӹм, пӹц кен колышын пайжым идӓ кач, идӓ шӓхӓрлӓнӹ, мам ӹшкӹлӓндӓ ӹнедӓ ӹштӹктӹ, весӹлӓнӓт тӹдӹм идӓ ӹштӹ. Техеньӹм ӹштӹмӹ гӹц ӹшкӹмдӓм кычедӓ гӹнь, яжон ӹштедӓ. Шу лидӓ».
30 Тенге, колтымы эдемвлӓ Антиохиш толыныт дӓ, ӹнянӹшӹвлӓм поген, сирмӓшӹм кычыктенӹт.
31 Нӹнӹ, лыдмыкышты, тӹдӹн кымылангдышы шамакшылан сусу линӹт.
32 Иуда дон Сила ӹшкештӓт пророк ылыныт дӓ шӱмбелвлӓлӓн кымылангдышы дӓ пингӹдемдӹшӹ шамакым шукы попенӹт.
33 Нӹнӹ икманяр жеп тӹштӹ линӹт, вара шӱмбелвлӓ, тырым согоньлен, нӹнӹм Апостолвлӓ докы ыжатенӹт.
34 Но Сила тӹшӓк кодаш шанен пиштен, Иуда Иерусалимӹш пӧртӹлӹн.
35 А Павел дон Варнава Антиохиэш кодыныт. Тӹштӹ шукы молы шӱмбел доно иквӓреш Господьын шамакшым тымденӹт дӓ Пуры Уверӹм шӓренӹт.
36 Икманяр жеп эртӹмӹкӹ, Павел Варнавалан келесен: «Господьын шамакшым шайыштмына годым каштмы цилӓ халашкы шӱмбелвлӓ докы ӹнде угӹц кенӓ дӓ, кыце ӹлӓт, анжалына».
37 Варнава сагашты Марк манмы Иоаннымат нӓлнежӹ ылын,
38 но Павел нӹнӹ гӹц Памфилиштӹ карангшы дӓ ӹштӹшӓш пӓшӓшкӹштӹ кедӹмӹ эдемӹм нӓлӓш яжоэш шотлыде.
39 Тенге нӹнӹн спорымаш лӓктӹн, дӓ иктӹ-весӹштӹ гӹц айырленӹт. Варнава Маркым сагажы нӓлӹн дӓ, корабльыш шӹнзӹн, Кипрыш кен.
40 Павел ӹшкӹлӓнжӹ Силам айырен нӓлӹн, дӓ шӱмбелвлӓ Павелӹм Йымын благодатьшылан ӹнянен пуэнӹт. Тӹдӹ корныш лӓктӹн,
41 Сири дон Килики гач эртен дӓ церкӹвлӓм пингӹдемден.
*15:16 Скини – тиштӹ: йых. *15:16-17 Ам 9:11-12. *15:23 «Сусу лидӓ» – грек йӹлмӹштӹ тидӹжӹ здоровайымы шамак.1 Дерви дон Листраш Павел толын шон. А тӹштӹ Тимофей лӹмӓн ик тыменьшӹ ылын. Тӹдӹн ӓвӓжӹ Христослан ӹнянӹшӹ иудей ылын, но ӓтяжӹ – эллин.
2 Тимофей гишӓн Листрашты дӓ Икоништӹ ылшы шӱмбелвлӓ пурын веле попенӹт.
3 Тӹдӹм Павел сагажы нӓлӓш шанен. Тимофейӹн ӓтяжӹ эллин ылмым цилӓн пӓленӹт, седӹндон Павел ти вӓрвлӓштӹ ӹлӹшӹ иудейвлӓ верц Тимофей доно пӹчмӹ овуцам эртӓрен.
4 Хала гӹц халашкы эртӹмӹштӹ годым нӹнӹ Апостолвлӓ дон Иерусалимӹштӹшӹ пресвитервлӓн лыкмы пынзалтышвлӓштӹ гишӓн ӹнянӹшӹвлӓлӓн шайыштыныт дӓ тӹдӹм шоктен шалгаш шӱденӹт.
5 Тенге церкӹвлӓ ӹнянӹмӓштӹ пингӹдемӹнӹт, дӓ эдемӹштӹ кечӹ йӹде шукемӹн.
6 Фриги дон Галати мӱлӓндӹм эртен кемӹкӹштӹ, Святой Шӱлӹш Асиштӹ Христос гишӓн шамакым шӓрӓш пуде.
7 Миси якте толын шомыкы, нӹнӹ Вифиниш кеӓш цаценӹт, но Шӱлӹш тидӹм ӹштӓш пуде.
8 Мисим эртӹмӹкӹ, нӹнӹ Троада халашкы шоныт.
9 Тӹштӹ йыдым Павел каймашым ужын. Тӹдӹн анзылныжы македони эдем шалген дӓ ядын: «Македонишкӹ тол, мӓлӓннӓ палшы».
10 Павел каймашым ужмыкы, мӓ тӹнӓмок Македониш кеӓш йӓмдӹлӓлтӓш тӹнгӓлнӓ. Тӹштӹ Пуры Уверӹм шӓрӓш Господь мӓмнӓм ӱжеш манын, мӓ ынгылышна.
11 Тенге мӓ, корабльыш шӹнзӹн, Троада гӹц кешнӓ, тӧрӧк Самофракиш толна, а вес кечӹнжӹ – Неапольыш,
12 тӹшецӹн Филиппӹш толна. Тидӹ – Македонин ти лаштыкыштыжы пӹтӓришӹ хала, Римӹн колонижӹ. Ти халашты мӓ икманяр кечӹм эртӓрӹшнӓ.
13 Кукшыгечӹн хала гӹц рекӓ докы лӓкнӓ, тӹштӹ ыдылмаш лиэш манын шанышна. Мӓ шӹцнӓ дӓ тӹшкӹ погынышы ӹдӹрӓмӓшвлӓ доно попышна.
14 Тӹштӹ Фиатира хала гӹц ылшы дӓ Йымым шотеш пиштӹшӹ Лидия лӹмӓн ӹдӹрӓмӓш ыльы, тӹдӹ шимӓкӓ-якшар мӹнерӹм выжален ӹлен. Лидия Павелӹм колыштын, дӓ попымыжым улы кымылын вӓшлиӓш тӹдӹн шӱмжӹм Господь пачын.
15 Лидиян дӓ тонышывлӓжӹн крестӓлтмӹкӹштӹ, тӹдӹ мӓмнӓм ӹшке докыжы ӱжӹн: «Тӓ мӹньӹм Господьлан пуры шӱм доно ӹнянӹшеш шотледӓ гӹнь, мӹньӹн пӧртӹшкем ӹлӓш пырыда». Мӓмнӓм тенгеок ӹняндӓрен ӹштӹктен.
16 Икӓнӓ ыдылмы вӓрӹш кемӹнӓ годым анзыкыла ужын моштышы шӱлӹшӓн тӓрзӹ ӹдӹрӹм корнышты вӓшлиннӓ, анзыкыла ужын моштымыжы доно тӹдӹ хозавлӓжӹлӓн кого парышым канден.
17 Ӹдӹр Павел паштек дӓ мӓ паштекнӓ саслен каштын: «Ти эдемвлӓ Кӱшнӹшӹ Йымын цоражы ылыт, нӹнӹ мӓлӓннӓ ытаралтмы корным увертӓрӓт!»
18 Шукы кечӹ тӹдӹ тенге ӹштен. Павел шӹдешкен сӓрнӓлӹн дӓ шӱлӹшлӓн келесен: «Тӹдӹн кӧргӹжӹ гӹц лӓктӓш Иисус Христосын лӹмжӹ доно тӹлӓт шӱдем». Шӱлӹш тӹнӓмок лӓктӹн.
19 Тӹнӓм ӹдӹрӹн хозавлӓжӹ, парыш лӓкмӹ ӹнянӹмӓшӹштӹ пӹтӹмӹм ужмыкы, Павел дон Силам роалтен кыченӹт дӓ вуйлатышывлӓ докы халык погынымы вӓрӹш канденӹт.
20 Халаштышы тӧрӓвлӓ докы кандымыкы, келесенӹт: «Ти эдемвлӓ иудей ылыт, нӹнӹ халаштышы халыкым пыдыратылыт
21 дӓ техень овуцавлӓм тымдат, кыдывлӓм мӓлӓннӓ, Рим халыклан, нӓлӓшӓт, шокташат ак ли».
22 Халыкат Павел дон Сила ваштареш кӹньӹлӹн, а тӧрӓвлӓ нӹнӹ вӹлец выргемӹштӹм роалтен кышкед шуаш дӓ панды доно шиӓш шӱденӹт.
23 Нӹнӹм когон шинӹт, кызаматыш шуэнӹт дӓ ороллан пыт оролаш шӱденӹт.
24 Техень шӱдӹмӹм колмыкы, кызамат орол, ялышкышты пу колодкам чиктен, нӹнӹм сек шайыл вӓрӹшкӹ питӹрен.
25 Йыдпел жепӹштӹрӓк Павел дон Сила ыдылыныт дӓ Йымым хвален мыренӹт, а кызаматышкы питӹрӹмӹвлӓ нӹнӹм колыштыныт.
26 Трӱк мӱлӓндӹ пиш когон цӹтӹрнӓлтӹн, кызаматын негӹцшӓт тӓрвӓнен, тӹнӓмок цилӓ амаса пачылтын, цилӓштӹнӓт цепӹштӹ колталтын.
27 Кызаматын оролжы понгыжалтын, пачылтшы амасавлӓм ужын дӓ питӹрӹмӹвлӓ кыргыжыныт машанен, седӹндон мечшӹм лыктын, ӹшкӹмжӹм ӹшке пуштнежӹ ылын.
28 Но Павел чӹнь сӹгӹрӓлӹн: «Ӹшкӹлӓнет худам ит ӹштӹ! Мӓ цилӓнӓт тиштӹ ылына».
29 Орол тылым чӱктӓш ядын, кызаматыш кыргыж пырен дӓ Павел дон Сила анзылан, цӹтӹрен, кымал вазын.
30 Вара нӹнӹм тӱгӹ лыктын дӓ ядын: «Мӹньӹн хозавлӓэм! Ытаралташ мӹлӓм мам ӹштӹмӹлӓ?»
31 Нӹнӹжӹ келесенӹт: «Господь Иисус Христослан ӹнянӹ, тӹнӓм тӹнь ӹшкежӓт, тонышывлӓэтӓт ытаралтыт».
32 Павел дон Сила ороллан дӓ тӹдӹн пӧртӹштӹжӹ ылшывлӓлӓн цилӓштӹлӓн Господьын шамакшым тымденӹт.
33 Йыдым, тӹ цӓшӹнок, орол нӹнӹм сагажы нӓнген, шушырыштым мышкын. Жепӹм шыпшде, ӹшкежӓт, тонышывлӓжӓт крестӓлтӹнӹт.
34 Вара орол нӹнӹм ӹшке пӧртӹшкӹжӹ канден, хыналыкташ тӹнгӓлӹн дӓ Йымылан ӹнянӓш тӹнгӓлмӹжӹлӓн цилӓ тонышывлӓжӹ доно иквӓреш сусу лин.
35 Сотеммӹкӹ, халаштышы тӧрӓвлӓ нӹнӹм ирӹкӹш лыкташ келеш манын келесӓш кызамат орол докы ӹшке пӓшӓзӹвлӓштӹм колтенӹт.
36 Тидӹ гишӓн кызамат орол Павеллӓн увертӓрен: «Халаштышы тӧрӓвлӓ тӓмдӓм ирӹкӹш лыкташ шӱден колтенӹт, седӹндон ӹнде лӓкдӓ дӓ тыр доно кедӓ».
37 Но Павел нӹнӹлӓн келесен: «Мӓмнӓм, Рим кугижӓншӹн гражданинвлӓжӹм, суддеок улы халык анзылны шинӹт дӓ кызаматыш шуэнӹт. А ӹнде йӹвӹрт лыктын колтынештӹ? Уке, нӹнӹ толышты дӓ ӹшкеок мӓмнӓм лыктышты».
38 Хала пӓшӓзӹвлӓ ти шаям тӧрӓвлӓлӓн келесенӹт. Питӹрӹмӹвлӓ Рим кугижӓншӹн гражданинжӹ ылмыштым пӓлен нӓлмӹкӹ, халаштышы тӧрӓвлӓ когон лӱдӹнӹт,
39 нӹнӹ докы толын, сарваленӹт, нӹнӹм питӹрӹмӓш гӹц лыктыныт дӓ хала гӹц кеӓш ядыныт.
40 Кызамат гӹц лӓкмӹкӹ, Павел дон Сила Лидия докы толыныт, тӹштӹ шӱмбелвлӓм ужыныт дӓ нӹнӹм кымылангденӹт, вара тӹшец кенӹт.
1 Амфиполь дон Аполлоним эртӹмӹкӹ, нӹнӹ Фессалоникӹш толыныт, тӹштӹ иудейвлӓн синагогышты ылын.
2 Павел молнамшы семӹньок тӹшкӹ пырен дӓ нӹнӹ доно, Писанин шамаквлӓжӹм кычылтын, кым кукшыгечӹ шайыштын,
3 нӹнӹлӓн Писаним ынгылдарен. Христос кого орлыкым ужшашлык дӓ колымаш гӹц ӹлӹж кӹньӹлшӓшлык ылын манын анжыктен. Тӹдӹ попен: «Мӹньӹн тӓлӓндӓ увертӓрӹмӹ Иисус – Христос ылеш».
4 Колыштшывлӓ логӹц южшы ӹнянӓш тӹнгӓлӹнӹт дӓ Павел дон Сила докы ушненӹт, тенгеок Йымым шотеш пиштӹшӹ шукы эллин дӓ шотеш пиштӹмӹ шукы ӹдӹрӓмӓш ушнен.
5 Но ӹнянӹдӹмӹ иудейвлӓм йӓнг йылымаш нӓлӹн, нӹнӹ ӧлицӓ гӹц икманяр ярдымы эдемӹм паштекӹштӹ нӓнгенӹт, шукы халыкым погенӹт, халашты тымашам тӓрвӓтенӹт. Иасонын пӧртшӹ докы лишемӹнӹт, Павел дон Силам халык анзыкы лыкташ цаценӹт.
6 Но нӹнӹм моделыт, Иасоным дӓ икманяр шӱмбелӹм хала вуйлатышывлӓ докы кычен канденӹт дӓ сасленӹт: «Сӓндӓлӹкӹм пыдыратышы ти эдемвлӓ ӹнде тишкӓт толыныт,
7 а Иасон нӹнӹм ӹшке докыжы пыртен! Весӹм, Иисусым, кугижӓэш шотлен, нӹнӹ цилӓн кесарьын шӱдӹмӹжӹ ваштареш ӹштӓт».
8 Тидӹм колын, халык дӓ хала вуйлатышывлӓ тыргыжланаш тӹнгӓлӹнӹт.
9 Нӹнӹжӹ Иасон дӓ молышты гӹц ситӓлык оксам нӓлӹнӹт дӓ колтенӹт.
10 А Павел дон Силам шӱмбелвлӓ тӹнӓмок, йыдым, Вериш колтенӹт. Тӹшкӹ толмыкышты, нӹнӹжӹ иудейвлӓн синагогышкы кенӹт.
11 Тӹштӹшӹвлӓ Фессалоникӹштӹшӹвлӓ гӹц пурырак ылыныт: нӹнӹ Христос гишӓн шамакым кого кымыл доно колыштыныт дӓ, тидӹ лачок тенге ма манын, Писаним каждый кечӹн ланзыленӹт.
12 Шукынжы ӹнянӓш тӹнгӓлӹнӹт, тенгеок эллинвлӓ логӹцӓт шотеш пиштӹмӹ ӹдӹрӓмӓшвлӓӓт, шукы пӱэргӓт ӹняненӹт.
13 Но Павел Вериштӓт Йымын шамакым шайыштеш манын, пӓлен нӓлмӹкӹштӹ, Фессалоникӹштӹшӹ иудейвлӓ тӹшкӓт толыныт, халыкым тӓрвӓтӓш дӓ пыдыраташ тӹнгӓлӹнӹт.
14 Шӱмбелвлӓ Павелӹм тӹнӓмок тангыж докы колтенӹт, а Сила дон Тимофей тӹшӓкок кодыныт.
15 Павелӹм Афинӹш шомеш ыжатенӹт. Йӹлерӓк толышты манын, Сила дон Тимофейлӓн келесӓш Павел ыжатышывлӓм ядын, вара нӹнӹжӹ кенӹт.
16 Афинӹштӹ нӹнӹм вычымыжы годым Павел ужын: хала идолын статуйвлӓжӹ доно циц темӹн, седӹндон йӓнгжӹ когон пыдыранен.
17 Синагогышты иудейвлӓ донат, Йымым шотеш пиштӹшӹ молы донат хытырен, ӧлицӓштӹ вӓшлимӹ эдемвлӓ донат кечӹнь шайыштын.
18 Эпикурей дон стоик икманяр философат* тӹдӹн доно спораш тӹнгӓлӹн, дӓ иктӹвлӓжӹ попенӹт: «Тидӹ такешӹм попышы мам келесӹнежӹ?» Павелӹн Иисус дӓ ӹлӹжмӓш гишӓн Пуры Уверӹм попымыжылан южшы манын: «Тӹдӹ йӓл йымывлӓ гишӓн увертӓрӹшӹлӓ каеш».
19 Павелӹм сагашты нӓлӹнӹт, Ареопагыш* канденӹт дӓ ядыныт: «Тӹньӹн увертӓрӹмӹ ти у тымдымаш махань ылеш, мӓ пӓлен кердӹнӓ ма?
20 Тамахань ӧрӹктӓрӹшӹм тӹнь пӹлӹшӹшкӹнӓ пиштет, седӹндон мӓ пӓлӹненӓ ыльы, ма тидӹ техень?»
21 Афинӹштӹ ӹлӹшӹвлӓлӓн, тенгеок вес вӓр гӹц тӹшкӹ толшывлӓлӓн, иктӓ-ма у гишӓн хытырен дӓ иктӓ-мам ум колыштын, жепӹм эртӓрӓш пишок йӓнг семешӹштӹ ылын.
22 А Павел Ареопаг покшалан шагалын дӓ попен: «Афинӹштӹшӹ халык! Йымывлӓм когон жеплӹмӹдӓм цилӓ гӹцӓт ужам.
23 Хала мычкы эртӹшемлӓ дӓ тӓмдӓн кымалмы вӓрвлӓдӓм анжен каштшемлӓ, ик жертвенникӹштӹ мӹнь тенге сирӹмӹм ужым: ”Пӓлӹдӹмӹ Йымылан”. Мӹнь тӓлӓндӓ пӓлӹде ӓклӹмӹ Йымыда гишӓнок увертӓрем.
24 Сӓндӓлӹкӹм дӓ тӹштӹ цилӓ ма ылшым ӹштӹшӹ Йымы, пӹлгомын дӓ мӱлӓндӹн Господьшы, эдем кид доно ӹштӹмӹ пӧртвлӓштӹ ак ӹлӹ.
25 Эдем кид доно служымым Тӹдӹ ак яд, вет Тӹдӹлӓн нимат ак кел. Тӹдӹ Ӹшкеок цилӓлӓн ӹлӹмӓшӹм, шӱлӹшӹм дӓ молымат пуа,
26 дӓ цилӓ мӱлӓндӹ мычкы ӹлӹштӹ манын, ик вӹр гӹц улы эдем йыхым ӹштен, цилӓ халыклан пӓлемдӹмӹ жепӹштӹм пуйырен дӓ ӹлӹмӹ вӓрӹштӹлӓн границӓм ӹштен.
27 Йымым кӹчӓлӹн, лимӹ семӹнь Тӹдӹн докы шижӹн лишемӹштӹ дӓ мон кердӹштӹ манын, тенге ӹштен. Вет Йымы мӓ логӹцнӓ иктӹн дорцат мӹндӹрнӹ агыл.
28 Тӹдӹн доно мӓ ӹленӓ, каштына, ылына. Юж поэтдӓ келесӹмӹ семӹнь, ”мӓ Тӹдӹн йыхшы ылына”.
29 Тенге, Йымын йыхшы ылына гӹнь, мӓ Тӹдӹм эдемӹн шанен лыкмы дӓ мастарлыкшы доно ӹштӹмӹ шӧртньӹ, ши ӓли кӱ хӓдӹр семӹнь ужшаш ана ыл.
30 Пӓлӹдӹмӓш жепӹм Йымы шотыш нӓлде, а кӹзӹт цилӓ вӓре цилӓ эдемлӓн, сулыкыштым простьыктен, Йымы докы сӓрнӓлӓш шӱдӓ:
31 Тӹдӹ кечӹм пӓлемден, кынам анзыцок шагалтымы Эдем гач тӧр суд доно сӓндӓлӹкӹм суяш тӹнгӓлеш, тидӹм цилӓлӓн ти Эдемӹм колымаш гӹц ӹлӹжтӹмӹжӹ доно анжыктен».
32 Колымаш гӹц ӹлӹжмӹ гишӓн колмыкы, иктӹвлӓжӹ мыскылен ваштылыныт, а весӹвлӓжӹ попенӹт: «Тидӹ гишӓн тӹньӹм вес гӓнӓӓт колыштына».
33 Тенге, Павел нӹнӹ логӹц лӓктӹн кен.
34 А икманярыжы Павел докы ушненӹт дӓ ӹнянӓш тӹнгӓлӹнӹт. Нӹнӹ лошты Ареопаг Дионисий, Дамарь лӹмӓн ӹдӹрӓмӓш дӓ молат ылыныт.
*17:18 Эпикурей дон стоиквлӓ – грек философвлӓн тыменьшӹвлӓштӹ. Эпикурейвлӓ шаненӹт: ӹлӹмӓшӹштӹ сек шергӓкӓн – тидӹ шӱм тыр дӓ мындырланымаш, а шӱмӹн колыдымашыжылан нӹнӹ ӹнянӹделыт. Стоиквлӓ ышым мактенӹт дӓ шӱм шижмӓшӹм акелӹш лыктыныт. *17:19 Ареопаг – Афинӹштӹшӹ кӱкшикӓ вӓр, тӹштӹ кӓнгӓш погынен, шамак толшеш, халашты тымдымы пӓшӓм тӹдӹ анжен.1 Тидӹн паштек Павел, Афинӹм коден, Коринфӹш толын.
2 Тӹштӹ тӹдӹ Понтеш шачшы Акила лӹмӓн иудейӹм дӓ тӹдӹн Прискилла вӓтӹжӹм вӓшлин. Клавдий* цилӓ иудейлӓн Римӹм коден кеӓш шӱден, седӹндон нӹнӹ шукердӹ агыл Итали гӹц толыныт ылын. Павел нӹнӹ докы толын.
3 Тӹдӹ нӹнӹ ганьок пӓшӓм ӹштенӓт, торанышты кодын дӓ ровотаен. Нӹнӹжӹ мӹнер амашым* ӹштӹшӹ ылыныт.
4 Кукшыгечӹ йӹде, синагогышты хытырен, иудейвлӓмӓт, эллинвлӓмӓт ӹняндӓрӓш цацен.
5 А Сила дон Тимофей Македони гӹц толмыкышты, Иисусын Христос ылмыжы гишӓн иудейвлӓлӓн свидетельствуяш Павелӹм Шӱлӹш кымылангден.
6 Но иудейвлӓ торешлӓненӹт дӓ мыскыленӹт, седӹндон Павел выргемжӹм пачкалтен дӓ нӹнӹлӓн келесен: «Тӓмдӓн вӹрдӓ ӹшкӹмдӓн вуйда вӹлнӹ, тиштӹ мӹньӹн вуйнаматем уке, ӹнде язычниквлӓ докы кем».
7 Тӹшец кен дӓ Йымым шотеш пиштӹшӹ Иуст лӹмӓн эдем докы толын. Тӹдӹн пӧртшӹ синагог сага ылын.
8 А синагог вуйлатышы Крисп цилӓ тонышыжы доно Господьлан ӹнянӓш тӹнгӓлӹн. Павелӹм колыштмыкы, Коринфӹштӹ ӹлӹшӹвлӓ шукынжы ӹняненӹт дӓ крестӓлтӹнӹт.
9 Йыдым каймашты Павеллӓн Господь келесен: «Ит лӱд, попы, шӹп ит ли.
10 Мӹнь тӹнь сагаэт ылам. Тӹлӓнет худам иктӓт ак ӹштӹ: ти халашты Мӹньӹн эдемем шукы улы».
11 Йымын шамакшым тымден, Павел тӹштӹ ик и дӓ куд тӹлзӹ ӹлен.
12 Ахаиштӹ Галлионын проконсул ылмыжы годым иудейвлӓ Павел ваштареш икышын шагалыныт, тӹдӹм суйымы вӓрӹш канденӹт
13 дӓ попенӹт: «Ти эдем закон семӹнь агыл Йымым шотеш пиштӓш тымда».
14 А кынам Павел попаш тӹнгӓлнежӹ ылын, иудейвлӓлӓн Галлион келесен: «Иудейвлӓ, иктӓ-махань вуйнамат ӓли худа пӓшӓ ылын ылгецӹ, тӓмдӓм колышташ вир лиэш ыльы,
15 но кынам тымдымаш, лӹмвлӓ дӓ тӓмдӓн законда гишӓн спорымаш кеӓ, ӹшке анжыда, мӹнь техеньӹм ӹнем суйы».
16 Вара нӹнӹм суйымы вӓр гӹц поктен колтен.
17 Тӹнӓм эллинвлӓ цилӓн синагог вуйлатышы Сосфенӹм роалтен кыченӹт дӓ суйымы вӓр анзылан шинӹт, но Галлионым тидӹ изишӓт тыргыжландарыде.
18 Эче икманяр жепӹм тӹштӹ эртӓрӹмӹкӹ, Павел шӱмбелвлӓлӓн «цевер» манын дӓ, корабльыш шӹнзӹн, Сириш кеен, сагажы Прискилла дӓ Акила ылыныт. Павел Йымылан шамакым пуэн ылын, седӹндон тӹдӹ Кенхрейӹштӹ ӱпшӹм тӹредӹктен.*
19 Ефесӹш шомыкы, тӹшӓк Прискилла дон Акилам коден, ӹшкежӹ синагогыш пырен дӓ иудейвлӓ доно хытырен.
20 Кынам тӹдӹм тӹштӹ кужынрак лиӓш ядыныт, Павел келшӹде,
21 а нӹнӹлӓн «цевер» манын дӓ келесен: «Толшаш празныкым мӹлӓм Иерусалимӹштӹ эртӓрӓш келешок, а тӓ докыда Йымы пӧртӹлтӹнежӹ гӹнь, пӧртӹлӓм». Тенге Ефес гӹц кен. [Акила дон Прискилла Ефесеш кодыныт.]
22 Кесари паштек тӹдӹ Иерусалимӹш толын, церкӹм приветствуен дӓ Антиохиш кен.
23 Тӹштӹ таманяр жепӹм эртӓрӹмӹкӹ, лӓктӹн дӓ, Галати дон Фриги мӱлӓндӹвлӓ мычкы вӓр гӹц вӓрӹш каштын, цилӓ тыменьшӹн шӱмжӹм пингӹдемден.
24 Александриэш шачшы Аполлос лӹмӓн ик иудей Ефесӹш толын. Тӹдӹ попаш мастар ылын дӓ Писаним яжон пӓлен.
25 Аполлос Господьын корныжылан тымдымы ылын, йӓнг йылен попен, Господь гишӓн яжон тымден, но Иоаннын крестӹмӹжӹм веле пӓлен.
26 Аполлос синагогышты лӱдде попаш тӹнгӓлӹн. Акила дон Прискилла, тӹдӹм колыштмыкы, ӹшке докышты нӓлӹнӹт дӓ Господьын корныжы гишӓн эчеӓт келгӹрӓкӹн ынгылдаренӹт.
27 А кынам Аполлос Ахаиш кеӓш шанен пиштен, пурын вӓшлиӓш кымылангдаш манын, шӱмбелвлӓ тӹштӹшӹ тыменьшӹвлӓлӓн сирмӓшӹм сиренӹт. Тӹшкӹ толмыкыжы, Йымын благодатьшылан верц ӹнянӓш тӹнгӓлшӹвлӓлӓн Аполлос кого палшык ылын.
28 Тӹдӹ иудейвлӓн ӹняндӓрӹмӹштӹм халык анзылны пыт шӧрен попен, Иисусын Христос ылмыжым, Писани гӹц шамакым кычылтын, лачокыш лыктын анжыктен.
*18:2 Клавдий – Римӹн императоржы, тӹдӹ Христос шачмы паштек 41-54 ивлӓн кугижӓ ылын. *18:3 Мӹнер амаш – палатка. *18:18 Анжы: Числ 6:1-21.1 Аполлосын Коринфӹштӹ ылмыжы годым Павел кырыкыштышы мӱлӓндӹвлӓм эртен дӓ Ефесӹш толын, тӹштӹ икманяр тыменьшӹм вӓшлин дӓ
2 нӹнӹ гӹц ядын: «Ӹнянӓш тӹнгӓлмӹкӹдӓ, тӓ Святой Шӱлӹшӹм нӓлӹндӓ ма?» А нӹнӹжӹ тӹдӹлӓн келесенӹт: «Святой Шӱлӹш ылмы гишӓн мӓ колделнаат».
3 Павел ядын: «Тӓмдӓн махань крестӓлтмӓш ылын?» Нӹнӹ попенӹт: «Тидӹ Иоаннын крестӹмӹжӹ ылын».
4 Павел келесен: «Сулыкым простьыктымы дӓ Йымы докы сӓрнӓлмӹ крестӹмӓш доно Иоанн крестен. Но тӹдӹ ӹшке паштекшӹ Толшылан, Христос Иисуслан, ӹнянӹшӓшлык ылыда манын, халыклан попен».
5 Тидӹм колмыкы, нӹнӹ Господь Иисусын лӹмжӹ доно крестӓлтӹнӹт.
6 А кынам нӹнӹ вӹкӹ Павел кидӹм пиштен, Святой Шӱлӹш вӹкӹштӹ вален, дӓ нӹнӹ вес йӹлмӹвлӓ доно попаш дӓ пророкла увертӓрӓш тӹнгӓлӹнӹт.
7 Цилӓжӹ луаткокты нӓрӹ пӱэргӹ ылын.
8 Павел синагогыш толын, кым тӹлзӹ Йымын Кугижӓншӹ гишӓн лӱдде попен, хытырен дӓ ӹняндӓрен.
9 Но кынам икманярынжы шӱмӹштӹм кӱӓнгденӹт дӓ ӹнянӹделыт, халык анзылны Господьын корныжы гишӓн худан попенӹт, тӹнӓм тӹдӹ нӹнӹ дорц карангын, тыменьшӹвлӓм нӹнӹ гӹц айырен дӓ каждый кечӹн Тираннын школыштыжы тымден попен.
10 Тенге кок и шыпшылтын, седӹндон Аси мӱлӓндӹштӹ ӹлӹшӹвлӓ цилӓнӓт – иудейжӓт, эллинжӓт – Господь Иисусын шамакшым колыныт.
11 Йымы ӧрӹктӓрӹшӹ шукы цӱдӓм Павелӹн кидшӹ доно ӹштен.
12 Пӱжвӹд ӹштӹлмӹ савыцвлӓмӓт, ӹштӓлмӹ выргемвлӓжӹмӓт тӹдӹн монгыр гӹц церлӹвлӓ вӹкӹ пиштенӹт, дӓ нӹнӹ паремӹнӹт, кӧргӹштӹ гӹц худа шӱлӹшвлӓ лӓктӹнӹт.
13 Йо шамак доно худа шӱлӹшӹм поктен лыкшы, шукы вӓре каштшы юж иудейӓт Господь Иисусын лӹмжӹм тидӹлӓн кычылташ тӹнгӓлӹн. Нӹнӹ тенге попенӹт: «Павелӹн увертӓрен попымы Иисусын лӹмжӹ доно тӓлӓндӓ шӱденӓ».
14 Скева лӹмӓн иудей архиерейӹн шӹм эргӹжӓт тенге ӹштӓш тӹнгӓлӹнӹт.
15 Но худа шӱлӹш нӹнӹлӓн тенге келесен: «Иисусым пӓлем, Павелжӓт пӓлӹмӹ. А тӓ кӱ ылыда?»
16 Тидӹн паштек худа шӱлӹшӓн эдем нӹнӹ вӹкӹ кого сила доно кечӓлтӹн дӓ цилӓштӹм сӹнген. А нӹнӹжӹ, цӓрӓн дӓ шушыргышывлӓ, тӹ пӧрт гӹц кыргыж лӓктӹнӹт.
17 Тенге лимӹм Ефесӹштӹ ӹлӹшӹ цилӓ иудей дон эллин пӓлен нӓлӹн. Нӹнӹ цилӓн когон лӱдӹнӹт. Господь Иисусын лӹмжӹм лӹмлештӓренӹт.
18 Ӹнянӓш тӹнгӓлшӹвлӓ шукынжы толыныт, худа пӓшӓштӹ гишӓн лыктын келесенӹт.
19 А йозыланышывлӓ шукынжы, тыменьмӹ книгӓштӹм поген, улы халык анзылны йылатенӹт. Нӹнӹн цилӓ ӓкӹштӹм ушен шотлымыкы, вӹцлӹ тӹжем ши окса нӓрӹ лӓктӹн.
20 Тенге Господьын шамакшы кушкын дӓ силангын.
21 Цилӓ тидӹ лимӹ паштек Павел шӱм кӧргӹ шӱлӹшӹжӹ доно* Македони дон Ахаим эртӓш дӓ Иерусалимӹш кеӓш шанен пиштен дӓ келесен: «Тӹштӹ лимӹкӹ, мӹнь Римӹмӓт ужшашлык ылам».
22 Македониш тӹдӹ кок палшышыжым, Тимофей дон Ерастым, колтен, а ӹшкежӹ икманяр жепеш Асиэш кодын.
23 Ти веремӓн Господьын корныжы верц изи агыл пыдыранымаш лӓктӹн.
24 Артемида йымын изи пӧртвлӓжӹм ши доно ӹштӹшӹ Димитрий лӹмӓн ши мастар кидмастарвлӓлӓн чӹдӹ агыл парышым канден.
25 Кӹзӹт тӹдӹ нӹнӹм дӓ техеньок пӓшӓм ӹштӹшӹвлӓм поген дӓ келесен: «Тӓнгвлӓ, тӓ пӓледӓ: мӓмнӓн улан лимӹлӓннӓ ти пӓшӓ негӹц ылеш.
26 Тӓ ужыда дӓ колыда, кыце тӹ Павел Ефесӹштӹ веле агыл, а, манаш лиэш, цилӓ Аси мычкы, ”эдем кид доно ӹштӹмӹ йымывлӓ – йымы агылеп” манын ӹняндӓрен, чӹдӹ агыл халыкым тӧр корны гӹц карангден.
27 Тидӹжӹ мӓлӓннӓ лӱдӹшӹм ӹштӓ: мӓмнӓн пӓшӓнӓ веле агыл жеплӹдӹмӹ лиэш, а кого Артемида йымын пӧртшӓт нималан ак шотлалт лиэш, цилӓ Асиштӹ дӓ сӓндӓлӹкӹштӹ шотеш пиштӹмӹ Артемидан лӹмжӹ вала».
28 Техеньӹм колмыкы, нӹнӹ аренӹт дӓ саслаш тӹнгӓлӹнӹт: «Ефес Артемида – когон кого!»
29 Улы халаге пиш пыдыранен. Эдемвлӓ Павел доно иквӓреш каштшы, Македони гӹц ылшы Гаий дон Аристархым роалтен кыченӹт дӓ икышын театрыш пӹсӹн кенӹт.
30 Павел халык лош лӓкнежӹ ылын, но тыменьшӹвлӓ тӹдӹм колтыделыт.
31 Асиштӹшӹ вуйлатышывлӓӓт икманярынжы, Павелӹн тӓнгвлӓжӹ, театрыш ӹнжӹ ке манын, тӹдӹлӓн шижтӓрӓш колтенӹт.
32 Ти жепӹн иктӹвлӓжӹ иктӹм сасленӹт, весӹвлӓжӹ – весӹм, погынымаш шотдымы ылын, дӓ погынышывлӓ шукынжок малын толмыштымат пӓлӹделыт.
33 Иудейвлӓ Александрым анзыкы шӹкенӹт, тӹдӹлӓн халык логӹц кӓнгӓшӹм пуэнӹт. Александр кидшӹм лӱктӓлӹн, халыклан ӹшкӹмжӹм защищӓен попынежӹ ылын.
34 Но тӹдӹн иудей ылмыжым пӓлен нӓлмӹкӹ, цилӓнӓт ик юк доно саслаш тӹнгӓлӹнӹт: «Ефес Артемида – когон кого!» Тенге кок цӓш нӓрӹ сасленӹт.
35 Остаткаэш халыкым халаштышы сирӹшӹ ладнангдарен кердӹн дӓ келесен: «Ефес эдемвлӓ! Ефес хала кого Артемида йымын пӧртшӹм дӓ Диопетӹм* переген анжышы семӹнь цилӓ эдемлӓн пӓлӹмӹ агыл ма?
36 Тидӹн шотышты спорымаш уке гӹнь, цилӓлӓндӓ тырлымыла дӓ, шаналтыде, нимат ӹштӹмӹлӓ агыл.
37 Ти пӱэргӹвлӓ Артемидан пӧртшӹм кравышы дӓ тӓмдӓн йымыдам мыскылышывлӓ агылеп гӹнят, тӓ нӹнӹм тишкӹ кандендӓ.
38 Димитрийӹн дӓ тӹдӹн доно иквӓреш ылшы кидмастарвлӓн иктӓжӹ вӹкӹ вуй шимӓшӹштӹ улы гӹнь, тидӹлӓн суд погынымаш улы, тенгеок проконсулвлӓ ылыт, нӹнӹ анзылны иктӹ-весӹштӹ вӹкӹ вуй шимӓшӹм пушты.
39 А иктӓ-махань вес ядмашда улы гӹнь, закон семӹнь эртӓрӹмӹ погынымашты решӹмӹ лиэш.
40 Тагачы ма лимӹ верц лӱдӹш улы: мӓмнӓм пыдыранзыкым тӓрвӓтӹмӹ гишӓн йӓтлен кердӹт, а техень шотдымы погынымашым мӓ нима донат тӧрӹш лыктын ана керд». Тенге попен, халыкым шӓлӓтен колтен.
*19:21 «Шӱм кӧргӹ шӱлӹшӹжӹ доно» – тидӹм «Шӱлӹшӹн тӓрвӓтӹмӹжӹ доно» манынат сӓрӓш лиэш. *19:35 Диопет – пӹлгом гӹц кенвацшы манмым анжыкта.1 Халык пыдыранаш цӓрнӹмӹкӹ, Павел тыменьшӹвлӓм ӹшке докыжы ӱжӹн, кымылангден попен, вара «цевер» манын дӓ Македониш кен.
2 Тӹштӹшӹ вӓрвлӓ доно эртӹмӹ годым ӹнянӹшӹвлӓлӓн кымылангдымы шамакым шукым попен, вара Грециш толын.
3 Тӹштӹ кым тӹлзӹ ӹлен, а кынам тӹдӹ Сириш кенежӹ ылын, ӹшке ваштарешӹжӹ иудейвлӓн йӹвӹрт попен келшӹмӹштӹм пӓлен нӓлӹн дӓ Македони гач пӧртӹлӓш шанен пиштен.
4 Аси якте тӹдӹм Вери гӹц Пиррӹн Сосипатр эргӹжӹ, Фессалоника гӹц Аристарх дон Секунд, Дерви гӹц Гаий, тенгеок Тимофей, Аси гӹц Тихик дон Трофим ыжатенӹт.
5 Нӹнӹ анзык кенӹт дӓ мӓмнӓм Троадашты выченӹт.
6 А мӓ Шергиндӹ празнык паштек Филипп гӹц корабль доно кеннӓ, вӹц кечӹштӹ нӹнӹ докы Троадаш толынна, тӹштӹ шӹм кечӹ ылынна.
7 Ӓрнян пӹтӓришӹ кечӹн, тыменьшӹвлӓ киндӹм тодыл качкаш погынымыкышты, Павел погынышывлӓ доно хытырен. Вес кечӹн тӹдӹ тӹшец кеӓш шанен, седӹндон йыдпел якте попен.
8 Мӓмнӓн погынымы кӱшӹл кӹдежӹштӹ шукы лампа ылын.
9 Окняшты Евтих лӹмӓн сӓмӹрӹк пӱэргӹ шӹнзен. Павел шукы жеп попен, дӓ Евтих пӹц амален кен, лыпшалт кенӓт, кымшы пачаш гӹц кенвазын. Кынам тӹдӹм лӱктӓлӹнӹт, колышы ылын.
10 Павел тӹдӹн докы вален, вӹкӹжӹ вазын, тӹдӹм элтӓлен дӓ келесен: «Идӓ тыргыжланы, йӓнгжӹ лӓкде».
11 Павел кӹдежӹш пӧртӹлӹн, киндӹм тодыл качкын, когон шукы, сотемӓлтӓш тӹнгӓлмӹ якте, попен, а вара лӓктӹн кен.
12 А сӓмӹрӹк пӱэргӹм ӹлӹшӹм виден канденӹт, тидӹжӹ цилӓм когон сусуэмден.
13 Мӓ анзыкыла тӓрвӓнӹшнӓ, корабльыш шӹцнӓ дӓ Ассыш кешнӓ, тӹштӹ мӓ Павелӹм сагана нӓлшӓшлык ылынна. Ӹшкежӹ ялын кеӓш шаненӓт, мӓлӓннӓ тенге ӹштӓш шӱден ыльы.
14 Тӹдӹ мӓмнӓм Ассышты вӓшлин, мӓ тӹдӹм корабльыш нӓлӹннӓ дӓ Митилинаш толынна.
15 Тӹшецӹн кеннӓ дӓ вес кечӹнжӹ Хиос турештӹ ылынна, а иргодешӹжӹ Самосыш шонна, Трогиллиштӹ линнӓ, вес кечеш Милитӹш толынна.
16 Асиштӹ шукы жеп лиӓш агыл манын, Павел Ефесӹм эртен кеӓш шанен пиштен. Йӧн лиэш гӹнь, Павел Пятидесятница празныкеш Иерусалимӹш миэн шоаш талашен.
17 Ефес церкӹштӹшӹ пресвитервлӓм ӱжӓш манын, Павел Милит гӹц эдемвлӓм колтен
18 дӓ, кынам пресвитервлӓ толыныт, келесен: «Аси кымдемӹш толмыкем, мӹнь тӓ лоштыда ылмем годым пӹтӓришӹ кечӹ гӹцок кыце ӹленӓм, тӓ пӓледӓ.
19 Иудейвлӓ йӹвӹрт попен келшӹмӹштӹ доно мӹньӹм шукы нелӹш пыртенӹт, а мӹнь Господьлан смирнӓн, сӹнзӓвӹд яре служенӓм.
20 Тӓлӓндӓ ма керӓл ылын, тӹдӹ гишӓн попымы гӹц карангделам, а тӓмдӓм улы халык анзылнат, пӧртӹштӹдӓӓт тымденӓм.
21 Иудейвлӓмӓт, эллинвлӓмӓт мӹнь, сулыкыштым простьыктен, Йымы докы сӓрнӓлӓш дӓ мӓмнӓн Господьна Иисус Христослан ӹнянӓш пыт ӱжӹнӓм.
22 А кӹзӹт, Шӱлӹшӹн ӱжӹн шӱдӹмӹжӹм колыштын, Иерусалимӹш кеем. Мӹнь донем тӹштӹ ма лиэш – ам пӓлӹ.
23 Но мӹньӹм ирӹкӹм ямдымаш дӓ нелӹ выча манын, Святой Шӱлӹш цилӓ халашты пӓлдӓрӓ.
24 Тенге гӹнят мӹнь ӹшке ӹлӹмӓшем ӹшкӹлӓнем шергӓкӓнеш ам шотлы. Сек анзыц ӹшке пӓшӓэм – Господь Иисусын ӹнянен пумы служымы пӓшӓм – сусун шоктынем: Йымын благодатьшы гишӓн Пуры Уверӹм шӓрӹнем.
25 Мӹнь тӓ донда ылынам дӓ Йымын Кугижӓншӹ гишӓн шайыштынам, а тӓ мӹньӹм тилец вара угӹц иктӓт ада уж манын, мӹнь кӹзӹт пӓлем.
26 Седӹндон мӹнь тӓлӓндӓ тагачы увертӓрем: тӓ логӹцдӓ иктӓжӹ ямын пӹтӓ гӹнь, мӹнь вуйнамат ам ыл,
27 мӹнь тӓлӓндӓ Йымын улы ирӹкшӹм* пӓлдӓрӹмӹ гӹц цӓкнӹделам.
28 Ӹшке верцдӓ шалгыда, Святой Шӱлӹшӹн тӓлӓндӓ вуйлаташ пумы кӹтӧ верцӓт шалгыда, Господь Йымын ӹшке Вӹржӹ доно Ӹшкӹлӓнжӹ тӱлен нӓлмӹ Церкӹжӹм кӹтӹдӓ.
29 Мӹнь вет пӓлем: кемӹкем, тӓ лошкыда кӹтӧм ӹжӓлӓйӹдӹмӹ шӹдӹ пирӹвлӓ пырат.
30 Тыменьшӹвлӓм паштекӹштӹ нӓнгеӓш манын, ӹшке логӹцдӓӓт алтален попышывлӓ лӓктӹт.
31 Седӹндон перегӓлтдӓ. Идӓ монды: кым и йыдшы-кечӹжӹ сӹнзӓвӹд яре мӹнь цӓрнӹде тӓмдӓм каждыйдам тымденӓм.
32 Шӱмбелвлӓ, ӹнде мӹнь тӓмдӓм Йымылан дӓ Тӹдӹн благодать шамакшылан ӹнянен пуэм. Тӓмдӓм пингӹдемдӓш Тӹдӹн силажы улы дӓ свящӓйӹмӹ цилӓ эдемвлӓжӹ лошты наследствым тӓлӓндӓӓт пуэн кердеш.
33 Мӹнь иктӹнӓт шижӹмӓт, шӧртньӹжӹмӓт, выргемжӹмӓт нӓлӓш шаныделам.
34 Ӹшкеӓт пӓледӓ, мӹлӓнем дӓ сагаэм ылшывлӓлӓн ма келӹн гӹнь, теве ти кидем доно ӹштен нӓлӹнӓм.
35 Тенге пӓшӓм ӹштен, церлӹвлӓлӓн палшаш дӓ Господь Иисусын ”Пушы эдем нӓлшӹ гӹц цӓшӓнрӓк” манмы шамакшым ӓшӹндӓрӓш келмӹм мӹнь соок тӓлӓндӓ анжыктенӓм».
36 Тенге келесӹмӹкӹ, Павел сукалтен шӹнзӹн дӓ нӹнӹ доно иквӓреш йымыдылын.
37 Тӹнӓм цилӓнӓт когон мӓгӹренӹт, Павелӹм шӱ гӹц элтӓленӹт дӓ шыпшалыныт.
38 Тӹдӹм кӹзӹт остатка гӓнӓ ужыт манын попымыж гишӓн сек когон ойхыренӹт. Вара корабль якте ыжатенӹт.
*20:27 Ирӹк – воля, желание.1 Нӹнӹ гӹц айырлен кемӹкӹ, тангыжыш лӓкнӓ дӓ вик Косыш толна, вес кечӹнжӹ – Родосыш, тӹшецӹн Патараш кешнӓ.
2 Тӹштӹ Финикиш кешӹ корабльым монна, тӹшкӹ шӹцнӓ дӓ кешнӓ.
3 Кипр каяш тӹнгӓлмӹкӹ, тӹдӹм шалахай монгыреш коден, мӓ Сириш кешнӓ дӓ Тирӹш шона. Тӹштӹ корабль грузым йӓстӓрӹшӓшлык ылын.
4 Тыменьшӹвлӓм кӹчӓл момыкына, тӹштӹ шӹм кечӹ ылынна. Иерусалимӹш кеӓш ак кел манын, нӹнӹ Шӱлӹшӹн пӓлдӓрӹмӹжӹ семӹнь Павеллӓн попенӹт.
5 Но, тӹштӹ ти кечӹвлӓм эртӓрӹмӹкӹ, мӓ лӓкнӓ дӓ кешнӓ. Цилӓн, хала гӹц лӓктӹн, мӓмнӓм вӓтӹштӹ дӓ тетяштӹ доно иквӓреш ыжатен толевӹ. Сир тӹрӹштӹ сукалтен шӹнзӹн йымыдылна.
6 Мӓ иктӹ-весӹлӓн «цевер» манна дӓ корабльыш шӹцнӓ, а нӹнӹ токышты пӧртӹлӹнӹт.
7 А мӓ Тир гӹц Птолемаидаш корабль доно толна, тангыж доно каштмы корнына мычашкы шо. Шӱмбелвлӓм «Шу лидӓ» манын вӓшлиннӓ, нӹнӹ доны ик кечӹ ылынна.
8 Вес кечӹнжӹ Павел дӓ мӓ, тӹдӹн доно иквӓреш ылшывлӓ, кешнӓ дӓ Кесариш толын лӓкнӓ. Пуры Уверӹм шӓрӹшӹ Филиппӹн пӧртӹшкӹжӹ пырышна дӓ тӹдӹн доран кодна. Шӹм диакон гӹц иктӹжӹ тӹдӹ ылын.*
9 Тӹдӹн марлан кедӹмӹ дӓ пророкла попышы нӹл ӹдӹржӹ ылын.
10 Тӹштӹ шукы кечӹ ылынна, тӹнӓм Иудей гӹц Агав лӹмӓн пророк толын.
11 Тӹдӹ мӓ докына толын, Павелӹн ӹштӹжӹм нӓлӹн дӓ ӹшкӹмжӹн кид-ялжым ялштен, вара келесен: «Святой Шӱлӹш тенге попа: иудейвлӓ Иерусалимӹштӹ ти ӹштӹн хозажым тенге пидӹт дӓ язычниквлӓн кидӹшкӹ пуат».
12 Кынам тидӹм колынна, тӹнӓм мӓ дӓ тӹштӹшӹ ӹнянӹшӹвлӓ, Иерусалимӹш ӹнжӹ ке манын, Павелӹм сарвалышна.
13 Но Павел келесӹш: «Мам тӓ ӹштедӓ? Малын мӓгӹредӓ дӓ шӱмем сылыкландаредӓ? Мӹнь Иерусалимӹштӹ Господь Иисусын лӹмжӹ верц пидмӹ лиӓш веле агыл, а колашат йӓмдӹ ылам».
14 Тӹдӹ мӓмнӓн шамакнам ак колыштат, сарвалаш цӓрнӹшнӓ дӓ келесӹшнӓ: «Господьын ирӹкшӹ* семӹнь лижӹ».
15 Ти кечӹвлӓ паштек мӓ корныш лӓктӓш йӓмдӹлӓлтнӓ дӓ Иерусалимӹш кешнӓ.
16 Мӓ сагана Кесари гӹц икманяр тыменьшӹ кеен, нӹнӹ мӓмнӓм Кипр гӹц толшы Мнасон докы жепеш ӹлӓш нӓнгенӹт. Мнасон пӹтӓришӹ тыменьшӹвлӓ логӹц иктӹжӹ ылын.
17 Иерусалимӹш толмыкына, шӱмбелвлӓ мӓмнӓм сусун вӓшлинӹт.
18 Вес кечӹн Павел мӓ сагана Иаков докы кен. Тӹшкӹ пресвитервлӓ цилӓн толыныт.
19 Павел нӹнӹ доно здороваен дӓ тӹдӹн служымы пӓшӓжӹ гач язычниквлӓ лошты Йымын мам ӹштӹмӹжӹм цилӓ шайыштын.
20 Тӹдӹн попымыжым колыштмыкы, нӹнӹ Йымым хваленӹт дӓ Павеллӓн попенӹт: «Ужат, ӹзӓ, иудей лошты ӹнянӓш тӹнгӓлшӹвлӓ тӹжем доно ылыт, нӹнӹ цилӓнӓт иудей закон верц шалгат.
21 Язычниквлӓ лошты ӹлӹшӹ цилӓ иудейӹм Моисейӹн законжы гӹц вуйта тӹнь карангаш тымдет, тетяштӹ доно пӹчмӹ овуцам эртӓрӓш дӓ овуца семӹнь ӹлӓш цӓрет манын, тӹнь гишӓнет нӹнӹлӓн попенӹт.
22 Тенгежӹ мам ӹштӹмӹлӓ? Вет эдемвлӓ тӹньӹн толмет гишӓн пӓлен нӓлӹтӓт, шукын погынат.
23 Кыце мӓ тӹлӓт келесенӓ, тенге ӹштӹ: мӓ лоштына Йымылан шамакым пушы нӹл пӱэргӹ улы.
24 Нӹнӹм сагаэт нӓл дӓ иреэммӹ овуцам нӹнӹ доно иквӓреш эртӹ, ӱпӹштӹм тӹредӹктен кердӹштӹ манын, нӹнӹ вӓреш тӱлӹ. Тӹнь гишӓнет попымаш лачок агыл, тӹнь ӹшкежӓт закон семӹнь ӹлет манын, тӹнӓм цилӓн пӓлен нӓлӹт.
25 А ӹнянӓш тӹнгӓлшӹ язычниквлӓ шотышты мӓ анзыцок решеннӓ. Нӹнӹ нимат техеньӹм ӹнжӹштӹ ӹштеп. Идолвлӓлӓн пумы жертвӹм, вӹрӹм, пӹц кен колышын пайжым качмы гӹц дӓ шӓхӓрлӓнӹмӹ гӹц ӹшкӹмӹштӹм кычышты манын, нӹнӹлӓн сирмӓш доно увертӓреннӓ».
26 Тӹнӓм Павел ти нӹл эдемӹм нӓлӹн дӓ вес кечӹн нӹнӹ доно иквӓреш иреэммӹ овуцам эртен, а вара Йымын пӧртӹш пырен, иреэммӹ кечӹвлӓ кынам пӹтӹмӹ дӓ каждый верц жертвӹм кынам пуаш келмӹ гишӓн увертӓрен.
27 Ти шӹм кечӹ пӹтӹшӓш годым Аси гӹц толшы иудейвлӓ, Павелӹм Йымын пӧртӹштӹ ужын, улы халыкым пыдыратенӹт, вӹкӹжӹ кид доно шоныт
28 дӓ сасленӹт: «Израильӹштӹшӹ эдемвлӓ, палшыда! Ти эдемок мӓмнӓн халык, мӓмнӓн закон дӓ ти вӓр ваштареш цилӓ вӓре тымда, эчежӹ Йымын пӧртӹшкӹ эллинвлӓмӓт пыртен дӓ ти святой вӓрӹм лявӹртен!»
29 Нӹнӹ Ефес гӹц толшы Трофимӹм сагажы халашты тӹлец анзыц ужыныт дӓ Павел тӹдӹм Йымын пӧртӹш пыртен манын шаненӹт.
30 Улы хала пыдыранен, дӓ цилӓ вец халык кыргыж толын, Павелӹм роалтен кыченӹт, Йымын пӧрт гӹц тӱгӹ шыпшын лыктыныт дӓ капкавлӓм тӹнӓмок тӹкӹленӹт.
31 Нӹнӹ Павелӹм пуштнештӹ ылын, но улы Иерусалим пыдыранен манмы увер полк вуйлатышы докы шон.
32 Тӹдӹ тӹнӓмок, шӱдӹвуй дон салтаквлӓм нӓлӹн, халык докы пӹсӹн кен. Вуйлатышы дон салтаквлӓм ужмыкы, Павелӹм шиӓш цӓрненӹт.
33 Тӹнӓм полк вуйлатышы лишемӹн, Павелӹм кычен дӓ кок цеп доно цеплӓш шӱден, вара ядын: «Кӱ тидӹ дӓ мам ӹштен?»
34 Халык лошты иктӹ иктӹм саслен, весӹ – весӹм, а юкланымы гишӓн вуйлатышы ма лимӹм цӹлт пӓлен керддеӓт, Павелӹм крепостьыш нӓнгеӓш шӱден.
35 А кынам Павел ташкалтыш докы толын шон, халык пӹзӹренӓт, салтаквлӓлӓн тӹдӹм намал нӓнгеӓш вӓрештӹн.
36 Шукы эдем паштекӹштӹ кен дӓ саслен: «Тӹдӹлӓн колымаш!»
37 Крепостьыш пыртымы годым Павел полк вуйлатышы гӹц ядын: «Мӹлӓм иктӓ-мам тӹлӓт келесӓш лиэш ма?» А тӹдӹжӹ манын: «Тӹнь греклӓ моштет?
38 Тенгежӹ шукердӹ агыл пыдыранымашым тӓрвӓтӹшӹ дӓ нӹл тӹжем разбойникӹм пустыньыш нӓнгешӹ тӹ Египет эдем ат ыл?»
39 Павел вӓшештен: «Мӹнь Тарс гӹц иудей ылам, Киликиштӹшӹ кымдан пӓлӹмӹ халан гражданинжӹ. Тӹнь гӹцет ядам: халыклан попаш мӹлӓнем ирӹкӹм пу».
40 Полк вуйлатышы келшен, дӓ Павел ташкалтышыш шагалын, халык анзылны кидшӹм лӱктӓлӹн, а кынам цилӓн шӹплӓненӹт, нӹнӹлӓн еврейлӓ попаш тӹнгӓлӹн:
*21:8 Анжы Ап.пӓш 6:1-7. *21:14 Ирӹк – воля, желание.1 «Шӱмбелвлӓ дӓ ӓтявлӓ! Ӹнде тӓ анзылныда ӹшкӹмемӹм защищӓен попымем колыштда».
2 Еврей йӹлмӹ доно попаш тӹнгӓлмӹм колмыкы, халык эче шӹпрӓк лин. Павел попен:
3 «Мӹнь иудей ылам, Киликиштӹшӹ Тарсышты шачынам, но ти халашты анжен куштенӹт, Гамалиилӹн тыменьшӹжӹ ылынам, мӹлӓм ӓтявлӓнӓн законыштым яжон тымденӹт. Тагачы тӓ махань ылыда, мӹнят техеньок ылынам, мӹнят Йымы верц когон шалгенӓм.
4 Мӹнь Господьын корныжы доно каштшывлӓм колымашкы шоктен поктылынам, пӱэргӹмӓт, ӹдӹрӓмӓшӹмӓт кычен, кызаматышкы шӹндӹктӹлӹнӓм.
5 Тидӹ гишӓн архиерей дӓ халыкын цилӓ когораквлӓжӹ свидетельствуен попен кердӹт. Мӹнь Дамаскышты ӹлӹшӹ иудей шӱмбелвлӓлӓннӓ сирмӓшвлӓм нӹнӹ гӹцок нӓлӹнӓм, тӹштӹшӹвлӓмӓт, пидӹн, Иерусалимӹш наказаш кандаш манын, тӹшкӹ кенӓм.
6 Кемем годым, кечӹвӓл кытлан, кынам Дамаск докы лишемӹнӓм, трӱк мӹнь йӹрем пӹлгом гӹц яргата соты валгалтын.
7 Мӹнь мӱлӓндӹ вӹкӹ кенвазынам дӓ ”Савл, Савл, малын тӹнь Мӹньӹм поктылат?” манын попымы юкым колынам.
8 Мӹнь вӓшештенӓм: ”Господь, кӱ Тӹнь ылат?” Тӹдӹ мӹлӓнем келесен: ”Мӹнь тӹньӹн поктылмы Назорей Иисус ылам”.
9 Мӹнь сагаэм ылшывлӓӓт сотым ужыныт дӓ когон лӱдӹнӹт, но мӹлӓм Попышын юкшым колделыт.
10 Тӹнӓм мӹнь ядынам: ”Господь, мӹлӓм мам ӹштӹмӹлӓ?” А Господь келесен: ”Кӹньӹл дӓ Дамаскыш ке, мам тӹнь ӹштӹшӓшлык ылат, цилӓ тӹштӹ келесӓт”.
11 Йӹмӹктӓрӹшӹ соты сӹнзӓм слӧпӧйӹм ӹштен, седӹндон сагаэм ылшывлӓ мӹньӹм Дамаскыш кид гӹц виден канденӹт.
12 Тӹштӹ Ананий лӹмӓн эдем ылын, тӹдӹ Йымын законым ӹнянӹн шоктен, Дамаскышты ӹлӹшӹ иудейвлӓ тӹдӹм шотеш пиштенӹт.
13 Мӹнь докем толын, сагаэм шагалын дӓ келесен: ”Савл ӹзӓ, сӹнзӓэт пачылтшы”. Тӹнӓмок мӹнь тӹдӹм ужынам.
14 А тӹдӹ мӹлӓм попен: ”Ӹшке ирӹкшӹм* пӓлен нӓлӓш, Тӧр Ӹштӹшӹм ужаш, Тӹдӹн попымы юкшым колаш ӓтявлӓнӓн Йымышты тӹньӹм анзыцок айырен нӓлӹн.
15 Тӹнь Тӹдӹн свидетельжӹ лиӓт, мам ужмет дӓ колмет гишӓн цилӓ халыклан шайышташ тӹнгӓлӓт.
16 Тенгежӹ мам мызымактылат? Кӹньӹл, крестӓлт, Господь [Иисусын] лӹмжӹм ӱжӹн, сулыкет гӹц мышкылт”.
17 Иерусалимӹш пӧртӹлмӹкем, Йымын пӧртӹштӹ ыдылмем годым мӹньӹм кого ӧрмӓш нӓлӹн,
18 дӓ Господьым ужынам. Тӹдӹ мӹлӓм попен: ”Йӹле тӓрвӓнӹ, Иерусалим гӹц пӹсӹнрӓк лӓктӹн ке, тиштӹ Мӹнь гишӓнем свидетельствуен попыметӹм шотыш ак нӓлеп”.
19 А мӹнь попенӓм: ”Господь, Тӹлӓт ӹнянӹшӹвлӓм кызаматыш шӹндӹмем дӓ синагогвлӓштӹ шиктӹмем нӹнӹ пӓлӓт.
20 Стефанын, Тӹньӹн свидетелетӹн, вӹржӹм йоктарымы годым мӹнь тӹшток шалгенӓм, тӹдӹм пуштмым яжоэш шотленӓм дӓ пуштшывлӓн выргемӹштӹм ороленӓм”.
21 А Тӹдӹ мӹлӓм келесен: ”Ке, Мӹнь тӹньӹм мӹндӹркӹ, язычниквлӓ докы, колтем”».
22 Ти шамак якте иудейвлӓ Павелӹм колыштыныт, а вара саслаш тӹнгӓлӹнӹт: «Техеньӹм мӱлӓндӹ вӹлец пӹтӓрӹ! Тӹдӹ ӹнжӹ ӹлӹ!»
23 Нӹнӹн саслымышты, выргемӹштӹм кӹшкӹлтмӹштӹ дӓ пыракым воздухыш шумышты годым
24 полк вуйлатышы Павелӹм крепостьыш пырташ шӱден, малын тӹдӹ вӹкӹ саслымыштым пӓлӓш манын, тӹдӹм лыпш доно шин ядышташ шӱден.
25 А кынам тӹдӹм шиӓш ӹштӹ доно пидӹнӹт, Павел тӹштӹ шалгышы шӱдӹвуй гӹц ядын: «Тӓлӓндӓ Рим гражданинӹм суд гӹц паснаат шиӓш лиэш ма?»
26 Тидӹм колмыкы, полк вуйлатышы докы шӱдӹвуй толын дӓ попен: «Мам тӹнь ӹштӹнет, анжы! Ти эдем Римӹн гражданинжӹ ылеш».
27 Тӹнӓм вуйлатышы Павел докы толын дӓ ядын: «Мӹлӓм келесӹ, тӹнь Римӹн гражданинжӹ ылат ма?» Павел манын: «Ане».
28 Полк вуйлатышы вӓшештен: «Мӹнь ти гражданствым кого окса доно нӓлӹнӓм». А Павел келесен: «А мӹнь шачынок Римӹн гражданинжӹ ылам».
29 Тӹдӹм шин ядышташ йӓмдӹлӓлтшӹ эдемвлӓ тӹнӓмок карангыныт, а вуйлатышы, Павелӹн Рим гражданин ылмыжым пӓлен нӓлмӹкӹжӹ, тӹдӹм пидӹн пиштӓш шӱдӹмӹжӹ гишӓн лӱдӹн.
30 Иудейвлӓ Павелӹм малын йӓтлӓт манын, лачокым пӓлӓш шанен, вес кечӹн вуйлатышы тӹдӹн кӓпшӹлжӹм колтен, архиерейвлӓлӓн дӓ улы Синедрионлан погынаш шӱден. Вара Павелӹм канден, нӹнӹ анзылан шагалтен.
*22:14 Ирӹк – воля, желание.1 Павел Синедрион вӹкӹ тусарен анжен дӓ келесен: «Шӱмбелвлӓ! Мӹнь тагачшы кечӹ якте Йымы анзылны ире совестян ӹленӓм».
2 А архиерей Ананий Павел сага шалгышывлӓлӓн тӹдӹм ышмажы гӹц шиӓш шӱден.
3 Тӹнӓм Павел тӹдӹлӓн келесен: «Тӹнь, ошемдӹмӹ стенӓ! Тӹньӹм Йымы шиэш. Тӹнь тиштӹ шӹнзет дӓ мӹньӹм закон семӹнь суйынет, а, законым пыдыртен, мӹньӹм шиӓш шӱдет».
4 Сагажы шалгышывлӓ келесенӹт: «Йымын архиерейжӹм вырсет?»
5 Павел вӓшештен: «Шӱмбелвлӓ, мӹнь тӹдӹн архиерей ылмыжым пӓлӹделам. Сирӹмӹ вет: ”Ӹшке халыкетӹн вуйлатышыжы гишӓн худа шамакым ит попы”».*
6 Синедрионышты ик цуцажы саддукей, а вес цуцажы фарисейвлӓ ылмым пӓленӓт, Павел чӹнь попаш тӹнгӓлӹн: «Шӱмбелвлӓ! Мӹнь фарисей ылам, фарисейӹн эргӹжӹ, колышывлӓн ӹлӹж кӹньӹлмӹштӹм ӹнянен вычымы гишӓн мӹньӹм суят».
7 Тӹдӹ тенге манмыкыжы, фарисей дон саддукейвлӓ лошты кӹрмӓшӹмӓш тӹнгӓлӹн дӓ погынымаш шелӓлтӹн.
8 Вет саддукейвлӓн попымышты семӹнь, нимахань ӹлӹжмӓшӓт, Ангелӓт, шӱлӹшӓт уке, а фарисейвлӓ цилӓ тидӹлӓн ӹнянӓт.
9 Цилӓн когон саслаш тӹнгӓлӹнӹт, фарисейвлӓ лоштышы закон тымдышывлӓ кӹньӹл шагалыныт дӓ кӹрмӓшен попенӹт: «Ти эдемӹштӹ нимахань худам ана уж. Тӹдӹлӓн шӱлӹш ӓли Ангел, ӓнят, лачокат попен? Ӓлдӓ Йымы ваштареш ана ли».
10 Кӹрмӓшӹмӓш когоэммӹ доно Павелӹм царген шуэн кердӹт манын, полк вуйлатышы лӱдӹн дӓ салтаквлӓлӓн тӹдӹм халык логӹц лыкташ дӓ крепостьыш нӓнгеӓш шӱден.
11 А вес йыдын Господь Павеллӓн кайын дӓ келесен: «Ит лӱд, Павел. Кыце тӹньӹ Мӹнь гишӓнем Иерусалимӹштӹ свидетельствуенӓт, Римӹштӓт тенгеок свидетельствуйышашлык ылат».
12 Ирок икманяр иудей попен келшенӹт, Павелӹм пуштмешкӹ, ана кач дӓ ана йӱ манын цуратленӹт.
13 Цуратлышы эдемвлӓ нӹллӹ утлан ылыныт.
14 Нӹнӹ архиерейвлӓ дон халыкын когоракшывлӓ докы толыныт дӓ попенӹт: «Павелӹм пуштмешкӹнӓ, мӓ нимамат ышмаш ана пиштӹ манын, шамакым пуэн цуратлышна.
15 Вуйта пӓшӓжӹм тусаренрӓк тергӓш манын, Павелӹм иргодым тӓ докыда кандаш полк вуйлатышы гӹц Синедрион доно иквӓреш ядда, а мӓ тӹшкӹ шомешкӹжок тӹдӹм пушташ йӓмдӹ ылына».
16 Павелӹн ӓкӓжӹн эргӹжӹ, шӹлӹн шӹнзӹмӹштӹ гишӓн колмыкы, толын, крепостьыш пырен дӓ Павеллӓн увертӓрен.
17 А Павел шӱдӹвуй логӹц иктӹжӹм ӱжӹн дӓ келесен: «Ти ӹрвезӹм полк вуйлатышы докы нӓнге, тӹдӹлӓн тамам увертӓрӹшӓшӹжӹ улы».
18 Тӹдӹжӹ ӹрвезӹм сагажы нӓлӹн, полк вуйлатышы докы нӓнген дӓ попен: «Кычен питӹрӹмӹ Павел мӹньӹм ӱжӹн дӓ ти ӹрвезӹм тӹнь докет кандаш ядын. Тӹлӓнет тамам попышашыжы улы».
19 Полк вуйлатышы ӹрвезӹм кид гӹц нӓлӹн, ӧрдӹжӹш карангден дӓ ядын: «Мӹлӓнем мам келесӹшӓшлыкет улы?»
20 Ӹрвезӹ келесен: «Павел гишӓн вуйта шукыракым пӓлӓш манын, иудейвлӓ иргодым тӹдӹм Синедрионыш кандаш тӹнь гӹцет ядаш попен келшенӹт.
21 Тӹнь нӹнӹлӓн ит ӹнянӹ. Нӹнӹ логӹц нӹллӹ утла эдем тӹдӹм йӹвӹрт вычен шалгат. Павелӹм пуштмешкӹнӓ, ана кач дӓ ана йӱ манын, нӹнӹ цуратленӹт. Кӹзӹт нӹнӹ, тидӹн доно келшӹметӹм вычен, йӓмдӹ шалгат».
22 Тӹнӓм полк вуйлатышы «Тидӹм мӹлӓм увертӓрӹмет гишӓн иктӹлӓнӓт ит попы» манын дӓ ӹрвезӹм колтен.
23 Вара полк вуйлатышы кок шӱдӹвуйым ӱжӹн дӓ келесен: «Кесариш кеӓш кым цӓш йыдеш* кокшӱдӹ ялешкӹ салтакым, тенгеок шӹмлу имниэшкӹм дӓ пикшӹзӹ кокшӱдӹ эдемӹм йӓмдӹлӹдӓ.
24 Оселвлӓмӓт йӓмдӹлӹдӓ. Павелӹм кышкыжтен шӹндӹштӹ дӓ нимахань эксӹкдеок вуйлатышы Феликс докы нӓнгештӹ».
25 Вара тӹдӹ техень сирмӓшӹм сирен: