1 Тӹнгӓлтӹшӹштӹ Шамак ылын.
Шамак Йымы доно ылын,
дӓ Шамак Йымы ылын.
2 Тӹнгӓлтӹшӹшток Тӹдӹ Йымы доны ылын.
3 Ма ӹштӓлтӹн, цилӓ Тӹдӹн гач лин,
Тӹдӹн гӹц пасна нимат ӹштӓлтде.
4 Тӹдӹн кӧргӹштӹжӹ ӹлӹмӓш ылын,
а ӹлӹмӓш – эдемвлӓлӓн соты.
5 Соты пӹцкемӹшӹштӹ валгалтеш
дӓ тӹдӹм пӹцкемӹш леведде.
6 Теве Йымы эдемӹм колтен, тӹдӹн лӹмжӹ Иоанн.
7 Цилӓн Соты гишӓн уверӹм колышты дӓ ӹнянӹштӹ манын, Иоанн Соты гишӓн пӓлдӹртӓш толын.
8 Ӹшкежӹ тӹдӹ Соты ылде, Сотым пӓлдӹртӓш колтымы ылын.
9 Но лачок Соты ылын. Тӹдӹ сӓндӓлӹкӹш толшы цилӓ эдемӹмӓт сотемдӓрӓ.*
10 Сӓндӓлӹкӹштӹ Тӹдӹ ылын,
сӓндӓлӹк Тӹдӹн гач ӹштӓлтӹн,
но сӓндӓлӹк Тӹдӹм пӓлӹде.
11 Тӹдӹ ӹшкӹмӹнвлӓжӹ докы* толын,
но ӹшкӹмӹнвлӓжӹ Тӹдӹм пурын вӓшлиделыт.
12 А кӱвлӓ Тӹдӹм пурын вӓшлинӹт
дӓ Тӹдӹн лӹмжӹлӓн ӹняненӹт,
нӹнӹлӓн Йымын тетяжӹ лиӓш властьым пуэн.*
13 Нӹнӹ вӹр гӹц агыл, кӓп кымыл гӹц агыл,
пӱэргӹ кымыл гӹц агыл, а Йымы гӹц шачыныт.
14 Шамак кӓпӓнгӹн дӓ мӓ лоштына ӹлен.
Мӓ Тӹдӹн лӹмлештӓрӓлтмӹжӹм,
Ӓтян Ик Ӹшкет Эргӹжӹн гань лӹмлештӓрӓлтмӹжӹм ужынна.
Тӹдӹ пуры дӓ лачок доно темӹн ылын.
15 Иоанн, Тӹдӹ гишӓн пӓлдӹртен, чӹнь попен: «Мӹнь попенӓм: мӹнь паштекем Толшы мӹнь анзылнем ли, вет Тӹдӹ мӹнь гӹцем андак ылын. Тидӹ – Тӹдӹ».
16 Тӹдӹн цицмӓш пурылыкшы гӹц
мӓ цилӓн пуры вӹлӓн пурым нӓлӹннӓ:
17 закон Моисей гач пуалтын,
а пуры дон лачок Иисус Христос гач толыныт.
18 Йымым иктӓт нигынамат ужде,
Ӓтян кӧргӹштӹ ылшы Ик Ӹшкет Эргӹ
Тӹдӹм пӓлдӓрен.
19 Иоаннын пӓлдӹртӹмӹжӹ теве техень. Иудейвлӓ тӹдӹ гӹц кӱ ылат манын ядаш Иерусалим гӹц священниквлӓм дӓ Левий йых гӹц эдемвлӓм колтенӹт.
20 Тӹдӹ, нимат шӹлтӹде, тӧрӧк келесен, мӹнь Христос ам ыл манын увертӓрен.
21 Нӹнӹ ядыныт: «Тӹнь ӹне кӱ ылат? Тӹнь Илия ылат?» «Агыл», – тӹдӹ манын. «Тӹнь тӹ пророк* ылат?» «Агыл», – келесен тӹдӹ.
22 Нӹнӹ попенӹт: «Тӹнь кӱ ылат? Мӓмнӓм ядаш колтышывлӓлӓн вӓшештӹшӓшлык ылына. Тӹнь ӹшке гишӓнет мам келесет?»
23 Иоанн пророк Исаиян шамакшы доно келесен: «Господьлан корным тӧрӹм ӹштӹдӓ манын, пустыньышты саслышын юкшы* ылам».
24 А колтымы эдемвлӓжӹ фарисейвлӓ логӹц ылыныт.
25 Нӹнӹ Иоанн гӹц ядыныт: «Тӹнь Христосат, Илияат, тӹ пророкат ат ыл гӹнь, малын эдемвлӓм крестет?»
26 Иоанн келесен: «Мӹнь вӹд доно крестем, но тӓ лоштыда Весӹ улы – тӓ Тӹдӹм ада пӓлӹ,
27 Тидӹ Тӹдӹ, кӱ мӹнь паштекем толеш дӓ мӹнь анзылнем лин, мӹнь Тӹдӹн ялеш чимӹ хӓдӹржӹн кӓндӹрӓжӹмӓт шӱтӓш ам яры».
28 Тидӹ цилӓ Вифаварышты, Иордан рекӓ вес велнӹ, ылын. Тӹштӹ Иоанн халыкым крестен.
29 Вес кечӹн тӹдӹн докы толшы Иисусым Иоанн ужын дӓ попен: «Теве Йымын Патяжы, Тӹдӹ сӓндӓлӹкӹн сулыкшым Ӹшке вӹкӹжӹ нӓлеш!
30 Мӹнь паштекем толшы Эдем мӹнь гӹцем андак ылын, седӹндон Тӹдӹ мӹнь анзылнем манын, кӱ гишӓн мӹнь попенӓм, тидӹ – Тӹдӹ ылеш.
31 Кӱ Тӹдӹ, мӹнь ӹшкеӓт пӓлӹделам, но Израильлӓн пӓлӹмӹ лижӹ манын, мӹнь вӹд доно крестӓш толынам».
32 Иоанн ужмыжы гишӓн пыт попен: «Пӹлгом гӹц кӓдӹ гань Шӱлӹш валымым дӓ Тӹдӹн доно кодмым мӹнь ужым.
33 Кӱ Тӹдӹ, мӹнь ӹшкеӓт пӓлӹделам, но мӹньӹм вӹд доно крестӓш Колтышы келесӹш: ”Шӱлӹш кӱн вӹкӹ валымым дӓ кӱ доран кодмым ужат, Тӹдӹ Святой Шӱлӹш доно крестӹшӹ ылеш”.
34 Мӹнь тидӹм ужынам дӓ попенӓм: Тӹдӹ – Йымын Эргӹ».
35 Вес кечӹн Иоанн угӹц тӹшток шалген, тӹдӹн сагажы кок тыменьшӹжӹ ылыныт.
36 Тӹшток кешӹ Иисусым ужмыкы, Иоанн келесен: «Теве Йымын Патяжы!»
37 Тидӹм колмыкы, Иоаннын кок тыменьшӹжӹ Иисус паштек кенӹт.
38 Иисусшы, сӓрнӓлӹн, паштекшӹ кемӹштӹм ужын дӓ манын: «Тӓлӓндӓ ма келеш?» Нӹнӹ ядыныт: «Равви, кышты Тӹнь ӹлет?» «Равви» шамакшы «тымдышы» манмы лиэш.
39 Тӹдӹ нӹнӹлӓн келесен: «Анжалаш толда». Жеп лу цӓш нӓрӹ ылын.* Нӹнӹ Тӹдӹ сага кенӹт, кышты ӹлӹмӹжӹм ужыныт дӓ кечӹ мыч Тӹдӹн доны ылыныт.
40 Иоаннын попымыжым колшы дӓ Иисус паштек кешӹ кокты гӹц иктӹжӹ Симон-Петрӹн Андрей шоляжы ылын.
41 Тӹдӹ сек анзыц Симон ӹзӓжӹм кӹчӓл мон дӓ тӹдӹлӓн келесен: «Мӓ Мессийӹм монна». «Мессий» шамакшы Христос манмы лиеш.
42 Вара тӹдӹм Иисус докы канден. Иисус вӹкӹжӹ анжалын дӓ келесен: «Тӹнь Ионан Симон эргӹжӹ ылат. Но тӹньӹм Кифа манаш тӹнгӓлӹт». Ти лӹмжӹ Петр, вес семӹньжӹ «кӱ» манмым анжыкта.
43 Вес кечӹн Иисус Галилейӹш кеӓш шанен. Тӹдӹ Филиппӹм вӓшлин дӓ келесен: «Мӹнь паштекем ке!»
44 Филипп Вифсаида хала гӹц ылын, кышец Андрей дон Петрӓт ылыныт.
45 Филиппшӹ Нафанаилӹм мон дӓ тӹдӹлӓн келесен: «Кӱ гишӓн Моисей законеш сирен дӓ кӱ гишӓн пророквлӓӓт сиренӹт, мӓ Тӹдӹм монна. Тидӹ Назарет гӹц Иисус, Иосифӹн эргӹжӹ».
46 Нафанаил тӹдӹлӓн попен: «Назарет гӹц иктӓ-ма пуры лин кердеш ма?» Филипп тӹдӹлӓн келесен: «Тол дӓ анжы».
47 Иисус, Ӹшке докыжы лишемшӹ Нафанаилӹм ужмыкы, тӹдӹ гишӓн келесен: «Теве тидӹ лачокшы Израиль эдем, тӹдӹн нимахань алталымашыжат уке».
48 Нафанаил ядын: «Тӹнь мӹньӹм кышец пӓлет?» Иисус тӹдӹлӓн манын: «Филипп тӹньӹм ӱжмешкок Мӹнь тӹньӹм смоква пушӓнгӹ лӹвӓлнӹ ужынам ыльы».
49 Нафанаил келесен: «Равви, Тӹнь Йымын Эргӹ ылат, Тӹнь Израильӹн Кугижӓжӹ ылат!»
50 Иисус тӹдӹлӓн попен: «Тӹньӹм смоква пушӓнгӹ лӹвӓлнӹ ужынам манын келесенӓмӓт, седӹндон ӹнянет. Тӹнь тишец когоракымат ужаш тӹнгӓлӓт».
51 Иисус попен: «Лачок, лачок тӓлӓндӓ попем: тӹлец вара пачылтшы пӹлгомым дӓ Йымын Ангелвлӓн Эдем Эргӹ докы валымыштым дӓ кузымыштым ужыда лиэш».
*1:9 Тидӹм тенгеӓт сӓрӓш лиэш: «Цилӓ эдемӹм сотемдӓрӹшӹ лачокшы Соты сӓндӓлӹкӹш толеш ылын». *1:11 «Ӹшкӹмӹнвлӓжӹ докы»: тидӹм «Ӹшке мӱлӓндӹшкӹжӹ» манынат сӓрӓш лиэш. *1:12 «Властьым пуэн» – ӓли: йӧнӹм ӹштен. *1:21 Иудейвлӓ кого пророкым выченӹт. Нӹнӹн шанымышты семӹнь, техень пророк Христос гӹц анзыц толшашлык ылын *1:23 Ис 40:3. *1:39 «Лу цӓш нӓрӹ»: мӓмнӓн жеп доно кечӹвӓл паштек нӹл цӓш нӓрӹ ылын.1 Кымшы кечӹн Галилейӹштӹшӹ Кана халашты сӱӓн ылын. Тӹштӹ Иисусын Ӓвӓжӓт ылын.
2 Сӱӓнӹш Иисусым дӓ тыменьшӹвлӓжӹмӓт ӱжӹнӹт.
3 Якшар ӓрӓкӓ пӹтен, дӓ Иисусын Ӓвӓжӹ Тӹдӹлӓн манын: «Нӹнӹн якшар ӓрӓкӓштӹ уке».
4 Иисус Тӹдӹлӓн келесен: «Ӹдӹрӓмӓш, Мӹлӓнемжӹ дӓ Тӹлӓнетшӹ ма вара? Мӹньӹн жепем эче толын шоде».
5 Ӓвӓжӹ тӓрзӹвлӓлӓн манын: «Мам Тӹдӹ шӱдӓ, ӹштӹдӓ».
6 Иудейвлӓн иреэммӹ овуцаштым шокташ тӹштӹ куд кӱ ӓтӹ шӹнзен. Каждыйышкы кок-кым мерӓ* нӓрӹ вӹд пырен.
7 Иисус тӓрзӹвлӓлӓн келесен: «Ӓтӹвлӓшкӹ вӹдӹм темӹдӓ». Нӹнӹ циц теменӹт.
8 «А ӹнде кашталда дӓ сӱӓнвуйлан нӓнгедӓ», – манын Иисус. Нӹнӹ нӓнгенӹт.
9 Кынам сӱӓнвуй якшар ӓрӓкӓш сӓрнӓлтшӹ вӹдӹм подыл анжен, – а кышец нӓлмӹм тӹдӹ пӓлӹде, вӹдӹм каштал нӓлшӹ тӓрзӹвлӓ веле пӓленӹт, – тӹдӹ ӹшке докыжы армарым ӱжӹн
10 дӓ келесен: «Хоть-кӱӓт пӹтӓри яжо якшар ӓрӓкӓм йӱктӓ, шукы йӱмӹкӹштӹ веле, – хударакым. А тӹнь яжо ӓрӓкӓм кӹзӹт якте перегенӓт».
11 Тенге Иисус Галилейӹштӹшӹ Кана халашты пӓлӹквлӓжӹлӓн тӹнгӓлтӹшӹм пиштен. Тидӹн доно Тӹдӹ ӹшке лӹмлештӓрӓлтмӹжӹм анжыктен. Тыменьшӹвлӓжӹ Тӹдӹлӓн ӹняненӹт.
12 Тӹлец вара Иисус Капернаумыш кен. Тӹдӹн доно иквӓреш Ӓвӓжӹ, шӱмбелвлӓжӹ дӓ тыменьшӹвлӓжӹ ылыныт. Но тӹштӹ икманяр кечӹ веле ылыныт.
13 Иудейвлӓн Когечӹштӹ лишемӹн, дӓ Иисус Иерусалимӹшкӹ кен.
14 Йымын пӧрт кудывичӹштӹ ӱшкӱжӹм, шарыкым, кӓдӹм выжалышывлӓм дӓ оксам вашталтыл шӹнзӹшӹвлӓм ужын.
15 Керем гӹц лыпшым ӹштенӓт, Иисус нӹнӹм цилӓштӹм Йымын пӧрт гӹц шарыкыштыге, ӱшкӱжӹштӹге поктен лыктын, окса вашталтышывлӓн оксаштым кӹшкен, стӧлӹштӹм сӓрӓл шуэн.
16 Кӓдӹ выжалышывлӓлӓн Тӹдӹ келесен: «Кеквлӓм тишец нӓнгедӓ! Ӓтямӹн пӧртшӹм выжалымы пӧртӹшкӹ идӓ сӓрӹ».
17 Тӹнӓм тыменьшӹвлӓжӹ кыце сирӹмӹм ӓшӹндӓренӹт:
«Тӹньӹн пӧртетӹм йӓнг йылен яратымаш
Мӹньӹм пӹтӓрӓ».*
18 Тӹнӓм иудейвлӓ вӓшештенӹт: «Тенге ӹштӓш Тӹлӓт ирӹкӹм пумым мӓлӓннӓ махань пӓлӹк доно анжыктет?»
19 Иисус келесен: «Йымын ти пӧртӹм шӓлӓтӹдӓ, Мӹнь тӹдӹм кым кечӹштӹ угӹц лӱктен шӹндем».
20 Иудейвлӓ маныныт: «Йымын ти пӧртӹм нӹллӹ куд и ӹштӹмӹ, а Тӹнь тӹдӹм кым кечӹштӹ лӱктен шӹндӹнет?»
21 А Иисусын попымы Йымын пӧртшӹ Тӹдӹн кӓпшӹ ылын.
22 Иисус колымаш гӹц ӹлӹж кӹньӹлмӹкӹжӹ, тыменьшӹвлӓжӹ Тӹдӹн тенге попымыжым ӓшӹндӓренӹт дӓ Писанилӓн, Иисусын келесӹмӹ шамаклан ӹняненӹт.
23 Кынам Иисус Иерусалимӹштӹ Когечӹ празныкышты ылын, Иисусын ӹштӹмӹ пӓлӹквлӓжӹм шукы эдем ужын дӓ Тӹдӹн лӹмжӹлӓн ӹнянӓш тӹнгӓлӹн.
24 Но Иисус нӹнӹлӓн Ӹшкӹмжӹм ӹнянен пуде, вет Тӹдӹ цилӓштӹмӓт пӓлен,
25 дӓ эдем гишӓн Тӹдӹлӓн иктӹнӓт ынгылдарымыжы келде, эдемӹн йӓнгӹштӹжӹ ма ылмым Тӹдӹ Ӹшке пӓлен.
*2:6 Мерӓ – 40 литр нӓрӹ. *2:17 Пс 68:10.1 Фарисейвлӓ лошты Никодим лӹмӓн эдем ылын. Тӹдӹ иудей вуйлатышывлӓ логӹц иктӹжӹ ылын.
2 Иисус докы йыдым толын дӓ Тӹдӹлӓн келесен: «Равви, мӓ пӓленӓ: Тӹнь Йымы дорц толшы Тымдышы ылат, вет сагажы Йымы ак ли гӹнь, иктӓт Тӹньӹн ӹштӹмӹ гань пӓлӹквлӓм ӹштен ак керд».
3 Иисус тӹдӹлӓн вӓшештен: «Лачок, лачок тӹлӓнет попем: кӱ кӱшӹцӹн* ак шач гӹнь, тӹдӹ Йымын Кугижӓншӹм ужын ак керд».
4 Никодим Тӹдӹлӓн манын: «Шонгы эдем кыце шачын кердеш? Вет тӹдӹ, ӓвӓжӹн мӹшкӹрӹш мӹнгеш пырен, кокшы гӓнӓ шачын ак керд?»
5 Иисус келесен: «Лачок, лачок тӹлӓнет попем: кӱ вӹд гӹц дӓ Шӱлӹш гӹц ак шач, тӹдӹ Йымын Кугижӓншӹш пырен ак керд.
6 Кӓп гӹц шачшы кӓпок лиэш, Шӱлӹш гӹц шачшы – шӱлӹш.
7 Тӓлӓндӓ кӱшӹцӹн шачаш келеш манын попымемлӓн ит ӧр.
8 Шӱлӹш* кышты шана, тӹштӹ лиэш. Тӹдӹн юкшым колат, но тӹдӹ кышец толеш дӓ кыш кеӓ, ат пӓлӹ: Шӱлӹш гӹц шачшы цилӓ эдем донат тенгеок лиэш».
9 Никодим ядын: «Кыце тенге лин кердеш?»
10 Иисус келесен: «Тӹнь Израильӹн тымдышыжы ылат дӓ тидӹм ат пӓлӹ?
11 Лачок, лачок тӹлӓнет попем: мӓ мам пӓленӓ, тӹдӹм попенӓ, мам ужына, тӹдӹм пӓлдӹртенӓ, а тӓ мӓмнӓн пӓлдӹртӹмӹнӓм ӹнедӓ колышт.
12 Ти сӓндӓлӹкӹштӹшӹ гишӓн попымемлӓн ада ӹнянӹ гӹнь, пӹлгомыштышы гишӓн келесӹмемлӓн кыце ӹнянен кердӹдӓ?
13 Пӹлгом гӹц валышы дӓ пӹлгомышты ылшы Эдем Эргӹ гӹц молы иктӓт пӹлгомыш кузыде.
14 Кыце Моисей пустыньышты кӹшкӹм кӱшкӹ лӱктӓлӹн,* Эдем Эргӓт тенгеок лӱктӓлтшӓшлык.
15 Тӹдӹлӓн ӹнянӹшӹвлӓ ӹнжӹштӹ ямеп, курымаш ӹлӹмӓшӹм нӓлӹштӹ манын, тенге лиэш.
16 Йымы сӓндӓлӹкӹм тенге яратен, Ик Ӹшкет Эргӹжӹмӓт пуэн: Эргӹжӹлӓн ӹнянӹшӹ иктӓт ӹнжӹ ям, а курымаш ӹлӹмӓшӹм нӓлжӹ манын, тенге ӹштен.
17 Йымы сӓндӓлӹк вӹкӹ Эргӹжӹм сӓндӓлӹкӹм суяш колтыде, а сӓндӓлӹк Тӹдӹн гач ытаралтшы манын колтен.
18 Эргӹлӓн ӹнянӹшӹ ак суялт, а ӹнянӹдӹмӹ уже суялтынат, вет тӹдӹ Йымын Ик Ӹшкет Эргӹн лӹмжӹлӓн ӹнянӹде.
19 Суйымаш тидок: сӓндӓлӹкӹш соты толын, но пӓшӓвлӓштӹ худа ылынытат, эдемвлӓ пӹцкемӹшӹм соты гӹц утларак яратенӹт.
20 Худам ӹштӹшӹ сотым ужын ак керд дӓ, пӓшӓвлӓжӹ вӹкӹ ӹнжӹштӹ лӓкеп манын, соты докы ак тол, вет пӓшӓвлӓжӹ худа.
21 А Йымы доно ушнен ӹштӹмӹ пӓшӓвлӓжӹ кайышты манын, тӧрӹм ӹштӹшӹ эдем соты докы толеш».
22 Тӹлец вара Иисус тыменьшӹвлӓжӹ доно иквӓреш Иудей мӱлӓндӹш кен, тӹштӹ нӹнӹ доно иквӓреш ылын дӓ крестен.
23 А ти жепӹн Салим сагашы Енонышты Иоаннат крестен, тӹштӹ вӹд шукы ылын. Тӹдӹн докы эдемвлӓ толыныт дӓ крестӓлтӹнӹт.
24 Иоанн эче кызаматыш питӹрен шӹндӹмӹ ылде.
25 Иоаннын тыменьшӹвлӓжӹ дон иудейвлӓ лошты иреэммӹ овуцам эртӓрӹмӹ гишӓн кӹрмӓшӹмӓш лӓктӹн.
26 Нӹнӹ Иоанн докы толыныт дӓ келесенӹт: «Равви, Иордан вес монгырышты тӹнь донет иквӓреш ылшы Эдем, кыды гишӓн тӹнь пӓлдӹртенӓт, теве Тӹдӓт крестӓ, дӓ цилӓн Тӹдӹн докы кеӓт».
27 Иоанн келесен: «Пӹлгом гӹц ак пуалт гӹнь, эдем нимат нӓлӹн ак керд.
28 Мӹнь попенӓмӹш: мӹнь Христос ам ыл, мӹнь Тӹдӹ гӹц анзыц колтымы ылам. Ти шамакем ӹшке колында.
29 Кӱн арвӓтӹжӹ улы, тӹдӹ армары ылеш. Армарын тӓнгжӹ, тӹдӹм колыштын, сагажы шалга, армарын юкшым колын, когон сусу лиэш. Кӹзӹт мӹньӹн ти сусуэм шокталтын.
30 Тӹдӹлӓн кушмыла, а мӹлӓнем изиэммӹлӓ.
31 Кӱшӹц Толшы цилӓ гӹц кӱшнӹ. Мӱлӓндӹ гӹц шачшы ӹшкежӓт мӱлӓндӹ веле дӓ мӱлӓндӹ гӹц шачшы семӹнь попа. Но кӱ пӹлгом гӹц толеш, Тӹдӹ цилӓ гӹц кӱшнӹ.
32 Мам Тӹдӹ ужын дӓ колын, тӹдӹ гишӓнок пӓлдӹртӓ, но Тӹдӹн пӓлдӹртӹмӹжӹм иктӓт йӓнгӹшкӹжӹ ак пиштӹ.
33 Кӱ Тӹдӹн попымыжым йӓнгӹшкӹжӹ пиштӓ, тидӹн доно Йымын лачок ылмыжым пингӹдемден анжыкта.
34 Кӱм Йымы колтен, Тӹдӹ Йымын шамакшым попа, вет Шӱлӹшӹм Йымы висӓ доно агыл пуа.
35 Ӓтя Эргӹм ярата дӓ цилӓ Тӹдӹн кидӹш пуэн.
36 Кӱ Эргӹлӓн ӹнянӓ, тӹдӹн курымашлык ӹлӹмӓшӹжӹ улы, а кӱ Эргӹлӓн ак ӹнянӹ, тӹдӹ ӹлӹмӓшӹм ак уж: Йымын шӹдӹжӹ тӹдӹн вӹлӓн кодеш».
*3:3 «Кӱшӹцӹн» – грек шамакым «угӹц» манынат сӓрӓш лиеш. Тенгеок – 3:7. *3:8 Грек йӹлмӹштӹ ик шамакок «шӱлӹш» дон «мардеж» манмым анжыкта. *3:14 «Кӹшкӹ» – книгӓ мычашты «Той доно ӹштӹмӹ кӹшкӹ» шамакым анжы.1 Иисус тыменьшӹвлӓм Иоанн гӹц шукыракым пога, тӹдӹ гӹц утларакым крестӓ манмым фарисейвлӓ колыныт. Тидӹм пӓлен нӓлмӹкӹ, Иисус –
2 хоть Ӹшкежӹ крестӹде, а тидӹм тыменьшӹвлӓжӹ ӹштенӹт, –
3 Иудейӹм коден дӓ эчеӓт Галилейӹш кеен.
4 Тӹдӹ Самари гач кешӓшлык ылын.
5 Теве Иисус Самариштӹшӹ Сихарь лӹмӓн халаш толын, тӹдӹжӹ Иаковын ӹшке Иосиф эргӹжӹлӓн пумы мӱлӓндӹ сага ылын.
6 Тӹштӹ Иаковын вӹдсӹнзӓжӹ ылын. Иисус корнышты янгыленӓт, вӹдсӹнзӓ сага шӹнзӹн. Жеп куд цӓшӹш* кен ылын.
7 Самари ӹдӹрӓмӓш вӹдлӓн толын. Иисус тӹдӹлӓн: «Мӹлӓм йӱӓш пу», – манын.
8 Тӹдӹн тыменьшӹвлӓжӹ халаш качкышым нӓлӓш кенӹт ылын.
9 Ӹдӹрӓмӓш пелештен: «Тӹнь иудей ылат, а мӹнь самари ӹдӹрӓмӓш. Кыце Тӹнь мӹнь гӹцем йӱӓш ядат?» Вет иудейвлӓ самари халык доно кӹлӹм ак кычеп.*
10 Иисус келесен: «Йымын мам пумыжым дӓ тӹнь гӹцет кӱ йӱӓш ядмым пӓлет ылгецӹ, тӹнь Тӹдӹ гӹц ӹшке ядат ыльы, дӓ Тӹдӹ тӹлӓнет ӹлӹшӹ вӹдӹм пуа ыльы».
11 Ӹдӹрӓмӓш Тӹдӹлӓн попен: «Пуры эдем, каштал нӓлӓш Тӹньӹн нимаэтӓт уке, а вӹдсӹнзӓ келгӹ. Кышец Тӹнь ӹлӹшӹ вӹдшӹм нӓлӓт?
12 Ти вӹдсӹнзӓм мӓлӓннӓ Иаков ӓтянӓ пуэн, тишецӹн тӹдӹ ӹшкежӓт йӱн, эргӹвлӓжӓт, вольыкшат йӱнӹт. Тӹнь Иаков гӹц когорак ылат ма?»
13 Иисус келесен: «Кӱ ти вӹдӹм йӱэш, тӹдӹн йӱмӹжӹ эчеӓт шоэш.
14 А кӱ Мӹньӹн пумы вӹдӹм йӱэш, тӹдӹ нигынамат йӱмӹ шомым ак пӓлӹ лиэш. Мӹньӹн пумы вӹдем тӹдӹн кӧргӹштӹ курымаш ӹлӹмӓшӹш йогышы вӹд важ лиэш».
15 «Пуры эдем, – ӹдӹрӓмӓш Тӹдӹлӓн манын, – мӹлӓм техень вӹдӹм пуэмӓ, тӹнӓм йӱмем ак шо дӓ мӹлӓм тишкӹ вӹдлӓн кашташ ак кел ыльы».
16 Иисус келесен: «Ке, маретӹм тишкӹ ӱжӹн канды».
17 Ӹдӹрӓмӓш вӓшештен: «Мӹньӹн марем уке». «Лачокым келесӹшӹц, тӹньӹн марет уке, – тӹдӹлӓн Иисус манын.
18 – Тӹньӹн вӹц марет ылын, а кӹзӹт кӱ доно ӹлет, марет агыл. Тӹнь лачокым попышыц».
19 Тӹдӹлӓн ӹдӹрӓмӓш манеш: «Пуры эдем, мӹнь ужам, Тӹнь пророк ылат.
20 Мӓмнӓн ӓтявлӓнӓ Йымылан ти кырыкышты кымалыныт, а тӓ попедӓ: кышты кымалмыла, тӹ вӓржӹ Иерусалимӹштӹ ылеш».
21 Иисус тӹдӹлӓн попен: «Мӹлӓм ӹнянӹ, ӹдӹрӓмӓш: жеп толын шоэш, кынам Ӓтялӓн ти кырыкыштат агыл, Иерусалимӹштӓт агыл кымалаш тӹнгӓлӹдӓ.
22 Кӱлӓн тӓ кымалыда, ада пӓлӹ, а мӓ Кӱлӓн кымалмынам пӓленӓ, вет ытарымаш иудейвлӓ гӹц толеш.
23 Но жеп шоэш дӓ ӹнде толынат шон, кынам тӧр кымалшывлӓ Ӓтялӓн Шӱлӹш доно дӓ лачок доно кымалаш тӹнгӓлӹт, техень кымалшывлӓм Ӓтя Ӹшкӹлӓнжӹ кӹчӓлеш.
24 Йымы – тидӹ Шӱлӹш, дӓ Тӹдӹлӓн кымалшывлӓ Шӱлӹш доно дӓ лачок доно кымалшашлык ылыт».
25 Ӹдӹрӓмӓш манын: «Мӹнь Христос манмы Мессийӹн толшашлык гишӓн пӓлем. Кынам Тӹдӹ толеш, мӓлӓннӓ цилӓ увертӓрӓ».
26 Иисус келесен: «Тидӹ Мӹнь ылам, тӹнь донет попышы».
27 Ти жепӹн тыменьшӹвлӓжӹ пӧртӹлӹнӹт. Ӹдӹрӓмӓш доно попымыжылан нӹнӹ когон ӧрӹнӹт, тенге гӹнят «Мам Тӹнь ядыштат?» ӓль «Тӹдӹн доно малын попет?» манын, иктӹштӓт келесӹде.
28 Вӹд ӓтӹжӹм коден, ӹдӹрӓмӓш халашкы кен дӓ эдемвлӓлӓн попен:
29 «Кедӓ, мам ӹштенӓм, цилӓ мӹлӓм келесӹшӹ Эдемӹм анжалда. Тӹдӹ Христос агыл вӓл?»
30 Эдемвлӓ хала гӹц лӓктӹнӹт дӓ Иисус докы кенӹт.
31 Ти жепӹн тыменьшӹвлӓжӹ Иисусым ӱжӹнӹт: «Равви, кач!»
32 Но Иисус келесен: «Мӹньӹн техень качкышем улы, маханьым тӓ ада пӓлӹ».
33 Тыменьшӹвлӓжӹ ӹшке лоштышты попенӹт: «Ӓнят, иктӓжӹ Тӹдӹлӓн качкышым канден?»
34 Иисус нӹнӹлӓн келесен: «Мӹньӹм Колтышын шанымыжым ӹштӓш дӓ Тӹдӹн пӓшӓжӹм шокташ – Мӹньӹн качкышем.
35 Тӓ ада попы ма: эче нӹл тӹлзӹ – тӹредмӹ жеп тӹнгӓлеш. Но Мӹнь тӓлӓндӓ попем: вуйдам лӱктӓлдӓ, шурны нырвлӓм анжалда – тӹдӹ саремӹн, тӹредӓшӓт шон!
36 Тӹредшӹ ӹшке пӓшӓдӓржӹм нӓлеш дӓ курымашлык ӹлӹмӓшлӓн кӹцкӹм пога, тенгежӹ ӱдӹшӓт дӓ тӹредшӓт иквӓреш сусу лит.
37 ”Иктӹ ӱдӓ, весӹ тӹредеш” манын попымы шая тиштӹ лачокеш толеш.
38 Ма верц ӹшкежӹ труйыделда, тӹдӹм тӹредӓш тӓмдӓм колтенӓм. Весӹвлӓ пӓшӓм ӹштенӹт, а тӓ нӹнӹн пӓшӓ кӹцкӹштӹм погедӓ».
39 Самариштӹшӹ ти халашты ӹлӹшӹвлӓ логӹц шукынжы, ӹдӹрӓмӓшӹн пӓлдӹртен шайыштмыжым колыштын, Иисуслан ӹняненӹт. Ӹдӹрӓмӓш попен: «Мам мӹнь ӹштенӓм, мӹлӓнем цилӓ келесен».
40 Иисус докы толмыкышты, Самариштӹ ӹлӹшӹвлӓ Тӹдӹм ӹшке донышты кодаш ядыныт. Иисус тӹшӓкен кок кечеш кодын.
41 Кынам Иисус Ӹшке попен, Тӹдӹлӓн утларак шукын ӹняненӹт.
42 А тӹ ӹдӹрӓмӓшлӓн попенӹт: «Ӹнде мӓ тӹньӹн шаяэт гӹц агыл Тӹдӹлӓн ӹняненӓ. Мӓ Тӹдӹм ӹшке колна дӓ Тӹдӹ лачокок сӓндӓлӹкӹм Ытарышы Христос ылмыжым пӓленӓ».
43 Кок кечӹштӹ Иисус тӹшец лӓктӹн дӓ Галилейӹш кеен.
44 Пророкым ӹшке кушмы кымдемӹштӹжӹ ак жеплеп манын, Тӹдӹ Ӹшкеок попен.
45 Кынам Галилейӹш толын, тӹштӹшӹ халык Иисусым пурын вӓшлин: нӹнӹ ӹшкештӓт Иерусалимӹштӹ празныкышты ылыныт дӓ, мам тӹштӹ Иисус ӹштен, цилӓ ужыныт.
46 Галилейӹштӹшӹ Кана халашкы Иисус угӹц толын. Тӹштӹ вӹдӹм якшар ӓрӓкӓш сӓрен ылын. Капернаумышты кугижӓн ик вуйлатышыжын эргӹжӹ церлӹ ылын.
47 Иудей гӹц Галилейӹш Иисусын толмыжы гишӓн колмыкы, вуйлатышы Тӹдӹн докы толын дӓ эргӹжӹм паремдӓш толаш сарвален, тӹдӹжӹ колышашлык гань киэн.
48 Тӹдӹлӓн Иисус келесен: «Пӓлӹквлӓм дӓ цӱдӓвлӓм ада уж гӹнь, тӓ ада ӹнянӹ».
49 Кугижӓн вуйлатышыжы попен: «Господь, эргемӹн колымешкӹжӹ тол».
50 Иисус келесен: «Токет ке, эргӹц ӹлӓш тӹнгӓлеш». Ти эдем Иисусын шамакшылан ӹнянен дӓ лӓктӹн кен.
51 Корнышты ылмыжы годымок тӓрзӹвлӓжӹ тӹдӹм вӓшлинӹт дӓ эргет ӹлӹшӹ кодын манын келесенӹт.
52 Тӹдӹ нӹнӹ гӹц ядын: «Маняр цӓшӹн тӹдӹлӓн куштылгырак лин?» Нӹнӹжӹ келесенӹт: «Шокшымыж тенгечӹ шӹмшӹ цӓшӹн* пӹтен».
53 Ӓтяжӹ ынгылен: кынам Иисус «Эргӹц ӹлӓш тӹнгӓлеш» манын, тидӹжӹ лач тӹ веремӓн ылын. Тӹнӓм ӹшкежӓт, тӹдӹн тонышывлӓжӓт ӹняненӹт.
54 Тенге Иисус, Иудей гӹц Галилейӹш пӧртӹлмӹкӹжӹ, кокшы гӓнӓ пӓлӹкӹм анжыктен.
*4:6 Куд цӓш – мӓмнӓн жеп доно тура кечӹвӓл. *4:9 «Кӹлӹм ак кычеп» – тидӹм «Иквӓреш плошка-савалам ак кычылтеп» манынат сӓрӓш лиэш. *4:52 «Шӹмшӹ цӓшӹн» – кӹзӹтшӹ жеп доно кечӹвӓл эртӹмӹкӹ икшӹ цӓшӹн.1 Тӹлец вара иудейвлӓн празныкышты ылын, дӓ Иисус Иерусалимӹшкӹ толын.
2 Иерусалимӹштӹ Шарык капка доны нӱштӹлмӹ вӓр ылын, тӹдӹм еврейлӓ Вифезда маныныт, тӹдӹн сага левӓшӓн вӹц кудывичӹ ылын.
3 Тӹштӹ пиш шукы церлӹ эдем: слӧпӧй, акшак дӓ кошкышывлӓ киенӹт. Нӹнӹ вӹд пыдыранымым выченӹт,
4 вет нӱштӹлмӹ тӹ вӓр вӹкӹ жепӹн-жепӹн Господьын Ангелжӹ вален дӓ вӹдӹм пыдыратен; пыдыратымы паштек кӱ вӹдӹшкӹ анзыц пырен, тӹ эдем хоть-махань цер гӹцӓт паремӹн.
5 Кымлы кӓндӓкш и церлӓнӹшӹ эдемӓт тӹштӹ ылын.
6 Тӹдӹм кишӹм ужмыкы, шукы жеп церлӓнӹмӹжӹм пӓленӓт, Иисус ядын: «Паремнет ма?»
7 Церлӹ эдем Тӹдӹлӓн попен: «Господь, вӹд пыдыранымы годым нӱштӹлмӹ вӓрӹшкӹ пыраш палшышы мӹньӹн иктӓт уке. Миэн шомешкем, кӱ-гӹнят весӹ мӹнь гӹцем анзыц пырен шокта».
8 Иисус тӹдӹлӓн келесен: «Кӹньӹл, шӓрӹшетӹм нӓл дӓ ашкед».
9 Эдем тӹнӓмок паремӹн, шӓрӹшӹжӹм нӓлӹн дӓ ашкедӹн. А ти кечӹжӹ кукшыгечӹ ылын.
10 Иудейвлӓ паремдӹмӹ эдемлӓн попенӹт: «Тагачы кукшыгечӹ. Шӓрӹшетӹм намал кеӓш тӹлӓнет ак яры».
11 Тӹдӹ нӹнӹлӓн вӓшештен: «Мӹньӹм Паремдӹшӹ мӹлӓнем келесен: ”Шӓрӹшетӹм нӓл дӓ ашкед”».
12 Нӹнӹжӹ ядыныт: «А кӱ ”Шӓрӹшетӹм нӓл дӓ ашкед” маншы Эдемжӹ?»
13 Но кӱ Тӹдӹ, паремдӹмӹ эдем пӓлӹде: Иисус тӹ вӓрӹштӹ шалгышы халык лош пырен ямын.
14 Варарак Иисус тӹдӹм Йымын пӧртӹштӹ вӓшлин дӓ келесен: «Теве тӹнь паремӹнӓт. Тӹнь донет иктӓ-ма хударак ӹнжӹ ли манын, ӹнде сулыкым ит ӹштӹ».
15 Тӹнӓм ти эдем иудейвлӓ докы кеен дӓ увертӓрен: тӹдӹм паремдӹшӹжӹ Иисус ылеш.
16 Кукшыгечӹн техень пӓшӓм ӹштӹмӹ гишӓн иудейвлӓ Иисусым пӹзӹрӓш тӹнгӓлӹнӹт дӓ Тӹдӹм пушташ йӧнӹм кӹчӓлӹнӹт.
17 Но Иисус нӹнӹлӓн келесен: «Мӹньӹн Ӓтям тишкевек ӹштӓ, Мӹнят ӹштем».
18 Седӹндон Иисусым пушташ иудейвлӓн шанымашышты эчеӓт утларак пингӹдемӹн. Тӹдӹ кукшыгечӹн законжым веле агыл пыдыртен, но эче Йымым Ӹшкӹмемӹн Ӓтям манын, тидӹн доно Ӹшкӹмжӹм Йымы доно тӧр шӹнден.
19 Но Иисус нӹнӹлӓн келесен: «Лачок, лачок тӓлӓндӓ попем: Эргӹ Ӹшке гӹцшӹ нимамат ӹштен ак керд, Ӓтян мам ӹштӹмӹжӹм ужеш дӓ тидӹм веле ӹштӓ. Вет Ӓтя мам ӹштӓ, Эргӓт тенгеок ӹштӓ.
20 Ӓтя Эргӹм ярата дӓ, мам Ӹшке ӹштӓ, цилӓ Тӹдӹлӓн анжыкта. Тӹдӹлӓн ти пӓшӓвлӓ гӹц когораквлӓмӓт анжыкта, дӓ тӓ эче когон ӧрӹдӓ.
21 Кыце Ӓтя колышывлӓм ӹлӹжтен кӹньӹлтӓ, тенгеок Эргӓт, кӱм шана, ӹлӹжтӓ.
23 (22-23) Ӓтя иктӹмӓт ак суйы, Ӓтям жеплӹмӹ семӹньок Эргӹмӓт цилӓн жеплӹштӹ манын, Тӹдӹлӓн цилӓ суйымашым пуэн. Кӱ Эргӹм шотеш ак пиштӹ, Эргӹм колтышы Ӓтямӓт шотеш ак пиштӹ.
24 Лачок, лачок тӓлӓндӓ попем: кӱ Мӹньӹн шамакем колыштеш дӓ Мӹньӹм Колтышылан ӹнянӓ, тӹдӹн курымашлык ӹлӹмӓшӹжӹ улы. Тӹдӹ ак суялт, а ӹнде колымаш гӹц ӹлӹмӓшкӹ ванжен.
25 Лачок, лачок тӓлӓндӓ попем: жеп толеш, тӹдӹ ӹнде толын, кынам колышывлӓ Йымын Эргӹн юкшым колыт, дӓ кӱ тӹдӹм колеш, ӹлӹжӹт.
26 Вет кыце Ӓтя ӹлӹмӓш важ ылеш, тенгеок Эргӹжӹмӓт ӹлӹмӓш важым ӹштен.
27 Ӓтя суяшат властьым Эргӹлӓн пуэн, вет Тӹдӹ – Эдем Эргӹ.
28 Тидӹлӓн идӓ ӧр, вет жеп толын шоэш, кынам шӹгервлӓштӹ кишӹвлӓ цилӓн Эдем Эргӹн юкшым колыт
29 дӓ лӓктӹт – кӱ пурым ӹштен, тӹдӹ курым ӹлӹмӓшӹм нӓлӓш кӹньӹлеш, кӱ худам ӹштен – суялташ кӹньӹлеш.
30 Мӹнь ӹшке гӹцӹн нимат ӹштен ам керд, кыце Мӹлӓм попымы, тенге суем. Мӹнь ӹшке шанымем агыл, а Мӹньӹм колтышы Ӓтян шанымыжым шоктем, седӹндон Мӹньӹн суйымем тӧр.
31 Мӹнь Ӹшке гишӓнем Ӹшке пӓлдӹртен попем гӹнь, Мӹньӹн попымем лачок агыл,
32 но Мӹнь гишӓнем Весӹ пӓлдӹртӓ, а Мӹнь пӓлем: Мӹнь гишӓнем Тӹдӹ мам попа – тидӹ лачок.
33 Тӓ Иоанн докы ӹшке эдемвлӓдӓм колтендӓ, дӓ тӹдӹ лачок верц попен.
34 Эдем гӹц агыл Мӹнь пӓлдӹртӹмӓшӹм нӓлнем, а тӓ ытаралтда манын, Мӹнь тидӹм попем.
35 Иоанн сотемдӓрен йылышы лампа гань ылын, а тӓ тӹдӹн сотыштыжы кӹтӹк жеп веле сусу линедӓ ыльы.
36 Но Иоаннын пӓлдӹртӹмӹжӹ гӹц когорак пӓлдӹртӹмӓшем улы: Ӓтян Мӹлӓм шокташ пумы пӓшӓвлӓ. Мӹньӹн ӹштӹмӹ ти пӓшӓвлӓ Мӹньӹм Ӓтя колтымым анжыктат.
37 Тенгеок Мӹньӹм колтышы Ӓтя Мӹнь гишӓнем Ӹшкеок пӓлдӹртӓ. Тӹдӹн юкшым тӓ нигынамат колделда, сӹнжӹмӓт ужделда.
38 Тӹдӹн шамакшат кӧргешдӓ ак код, вет кӱм Тӹдӹ колтен, Тӹдӹлӓн тӓ ада ӹнянӹ.
39 Тӓ Писаним ланзыледӓ, тӹштӹ курымаш ӹлӹмӓшӹм мона манын шанедӓ. А Писани Мӹнь гишӓнем попа.
40 Но ӹлӹмӓшӹм нӓлӓш Мӹнь докем ӹнедӓ тол.
41 Эдемвлӓн хвальымыштым ӹнем нӓл,
42 но Мӹнь тӓмдӓм пӓлем: Йымым яратымашда тӓмдӓн уке.
43 Мӹнь Ӓтямӹн лӹмжӹ доно толынам, а тӓ Мӹньӹм пурын ада вӓшли. Но весӹ ӹшке лӹмжӹ доно толеш гӹнь, тӓ тӹдӹм пурын вӓшлидӓ.
44 Кыце тӓ ӹнянен кердӹдӓ? Тӓ иктӹ-весӹдӓ гӹц хвальымым вычедӓ, а Ик Ӹшкет Йымы гӹц лӹмлештӓрӹмӓшӹм ада кӹчӓл.
45 Ӓтя анзылны тӓмдӓм Мӹнь йӓтлӓш тӹнгӓлӓм манын идӓ шаны: тӓ Моисейлӓн уанедӓ, тӹдӹ тӓмдӓм йӓтлӹшӹ.
46 Вет тӓ Моисейлӓн ӹнянедӓ ылгецӹ, Мӹлӓнемӓт ӹнянедӓ ыльы, тӹдӹжӹ Мӹнь гишӓнем сирен.
47 Но тӹдӹн сирӹмӹжӹлӓн ада ӹнянӹ гӹнь, кыце Мӹньӹн шамакемлӓн ӹнянен кердӹдӓ?»
1 Иисус тӹлец вара Галилей тангыжын, Тивериадан, вес сирӹшкӹжӹ ванжен.
2 Тӹдӹн церлӹ эдемвлӓлӓн ӹштӹмӹ цӱдӓвлӓжӹм йӓл ужыныт, седӹндон Тӹдӹн паштек шукы эдем кен.
3 Иисус кырыкыш кузен дӓ тӹштӹ тыменьшӹвлӓжӹ доно шӹнзен.
4 Иудейвлӓн Когечӹ празныкышты лишемӹн.
5 Иисус анжалын, Ӹшке докыжы толшы шукы халыкым ужын, Филипплӓн келесен: «Нинӹм пукшаш мӓлӓннӓ кышты сыкырым нӓлмӹлӓ?»
6 Мам ӹштӹшӓшлыкшым Тӹдӹ пӓлен. Тыменьшӹжӹм тергӓш манын веле ядын.
7 Филипп Тӹдӹлӓн келесен: «Нӹнӹлӓн каждыйлан хоть изиш вӓрештшӹ манын, кокшӱдӹ динариӓш сыкырат ак ситӹ».
8 Тыменьшӹвлӓжӹ логӹц иктӹжӹ, Симон-Петрӹн Андрей шоляжы, Иисуслан попен:
9 «Тӹштӹ ик ӹрвезӹн вӹц шож сыкыржы дӓ кок изи колжы улы, но тинӓр халыклан тидӹжӹ манярак?»
10 Иисус келесен: «Эдемвлӓлӓн шӹнзӓш шӱдӹдӓ». Тӹштӹ ныгыды шудан вӓр ылын. Вӹц тӹжем нӓрӹ пӱэргӹ тӹшкӹ шӹнзӹн.
11 Тӹнӓм Иисус сыкырвлӓм нӓлӹн, Йымылан таум ӹштен, тыменьшӹвлӓлӓн пайылен пуэн, нӹнӹ шӹнзӹшӹвлӓлӓн пайылен пуэнӹт. Кол донат тенгеок ӹштен. Цилӓн, маняры шаненӹт, тӹнӓрӹм нӓлӹнӹт.
12 Кынам эдемвлӓ качкын темӹнӹт, Иисус тыменьшӹвлӓжӹлӓн келесен: «Нимат ӹнжӹ ям манын, кодшы лаштыквлӓм поген нӓлдӓ».
13 Нӹнӹ погенӹт дӓ вӹц шож сыкырым качшывлӓ паштек кодшы лаштыквлӓ доно луаткок корзинӹм теменӹт.
14 Тӹнӓм, Иисусын ӹштӹмӹ пӓлӹкӹм ужын, халык попен: «Лачокок Тидӹ сӓндӓлӹкӹш толшашлык Пророк ылеш!»
15 Эдемвлӓн толаш, Тӹдӹм роалтен кычаш дӓ кугижӓэш шӹндӓш шанымыштым пӓлен, Иисус угӹцӹн кырыкыш ӹшкетӹн кен.
16 Вады лимӹкӹ, Тӹдӹн тыменьшӹвлӓжӹ тангыж тӹрӹш валенӹт
17 дӓ, пышыш шӹнзӹн, тангыж вес сирӹшкӹ, Капернаумышкы, кеӓш лӓктӹнӹт. Пӹцкемӹшӓлтӹн, а Иисус нӹнӹ докы толде.
18 Силан мардеж ӹфӹлен, тангыж когон коэштӓлтӹн.
19 Иктӓ коклы вӹц-кымлы стади* нӓрӹ пыш доно кемӹкӹштӹ, нӹнӹ тангыж вӹлец ашкедшӹ Иисусым ужыныт, Тӹдӹ пыш докы лишемӹн. Цилӓн лӱдӹн колтенӹт.
20 Но Иисус келесен: «Идӓ лӱд, тидӹ Мӹнь ылам!»
21 Тӹдӹм пышышкы шӹндӹнештӹ ылын, но кышкы кенештӹ ылын, пышышты выртышток тӹ сирӹшкӹ шон.
22 Вес кечӹнжӹ тангыж вес сирӹштӹ ылшы халык ужын: Тӹдӹн тыменьшӹвлӓжӹн шӹцмӹ пыш гӹц пасна тӹштӹ весӹ ылде, Иисус тыменьшӹвлӓжӹ сага шӹцде, а тыменьшӹвлӓжӹ ӹшкетӹшток кенӹт.
23 Ти жепӹн вес пышвлӓ Тивериада гӹц тӹ вӓр лишкӹ толыныт, кышты эдемвлӓ Господьын тау ӹштӹмӹ киндӹжӹм качкыныт.
24 А кынам эдемвлӓ тӹштӹ Иисусын, тыменьшӹвлӓжӹнӓт уке ылмыштым ужыныт, пышвлӓш шӹнзӹнӹт дӓ Капернаумыш Иисусым кӹчӓл кенӹт.
25 Тӹдӹм тангыж вес сирӹштӹ момыкы, нӹнӹ ядыныт: «Равви, Тӹнь кынам тишкӹ толынат?»
26 Иисус нӹнӹлӓн келесен: «Лачок, лачок тӓлӓндӓ попем: тӓ пӓлӹквлӓм ужмы верц агыл, а сыкырым теммеш качмыда велдӹк Мӹньӹм кӹчӓлӹдӓ.
27 Пӹтӹшӓшлык качкыш верц агыл, а курымашлык ӹлӹмӓшӹш кандышы шӱн пӹтӹдӹмӹ качкыш верц пӓшӓлӹдӓ. Тӹдӹм тӓлӓндӓ Эдем Эргӹ пуа, вет Тӹдӹ вӹлӓн Йымы Ӓтя ӹшке пецӓтшӹм шӹнден».
28 Нӹнӹ ядыныт: «Йымын пӓшӓжӹм ӹштӓш манын, мам ӹштӹшӓшлык ылына?»
29 Иисус вӓшештен: «Йымын пӓшӓжӹ теве: кӱм Тӹдӹ колтен, Тӹдӹлӓн ӹнянӹдӓ».
30 Нӹнӹ ядыныт: «Мӓлӓннӓ ужаш дӓ Тӹньӹн шамакетлӓн ӹнянӓш манын, махань пӓлӹкӹм анжыктет? Тӹнь мам ӹштет?
31 Мӓмнӓн ӓтявлӓнӓ пустыньышты манным качкыныт. Сирӹмӹ: ”Нӹнӹлӓн качкаш пӹлгом гӹц Тӹдӹ киндӹм пуэн».*
32 Иисус вӓшештен: «Лачок, лачок тӓлӓндӓ попем: Моисей агыл тӓлӓндӓ пӹлгом гӹц киндӹм пуэн, Мӹньӹн Ӓтям пӹлгом гӹц лачокшы киндӹм тӓлӓндӓ пуа.
33 Пӹлгом гӹц Валышы дӓ сӓндӓлӹклӓн ӹлӹмӓшӹм Пушы – тидӹ Йымын киндӹ».
34 Тӹдӹлӓн келесенӹт: «Господь! Техень киндӹм мӓлӓннӓ со пуэн шалгы!»
35 Иисус нӹнӹлӓн попен: «Мӹнь ӹлӹмӓшӹн киндӹжӹ ылам. Мӹнь докем толшы эдем ак шужы, Мӹлӓнем ӹнянӹшӹн нигынамат йӱмӹжӹ ак шо.
36 А тӓ Мӹньӹм ужында дӓ ада ӹнянӹ манын, Мӹнь тӓлӓндӓ попенӓм.
37 Кӱм Мӹлӓм Ӓтям пуа, Мӹнь докем толеш, дӓ Мӹнь докем толшым ӧрдӹшкӹ поктен ам колты,
38 вет Мӹнь ӹшке шанымем агыл, а Мӹньӹм колтышы Ӓтян шанымыжым шокташ пӹлгом гӹц толынам.
39 Мӹньӹм колтышы Ӓтян шанымашыжы техеньӹ: кӱм Тӹдӹ Мӹлӓм пуэн, нӹнӹ логӹц иктӹмӓт ямдаш агыл, а остатка кечӹн цилӓм ӹлӹжтӓш.
40 Мӹньӹм Колтышын шанымашыжы техень: Эргӹм ужшы дӓ Тӹдӹлӓн ӹнянӹшӹ каждый эдем курымаш ӹлӹмӓшӓн лижӹ. Остатка кечӹн Мӹнь* тӹдӹм ӹлӹжтем».
41 «Мӹнь пӹлгом гӹц валышы киндӹ ылам» манмыжылан иудейвлӓ Тӹдӹ ваштареш ӧпкӓлен попаш тӹнгӓлӹнӹт.
42 Нӹнӹ попенӹт: «Тидӹжӹ Иосифӹн Иисус эргӹжӹ агыл ма? Мӓ Тӹдӹн ӓтяжӹмӓт, Ӓвӓжӹмӓт пӓленӓ. ”Мӹнь пӹлгом гӹц валенӓм” манын, кыце Тӹдӹ попа?»
43 Нӹнӹлӓн Иисус келесен: «Ӹшке лоштыда ӧпкӓлен идӓ попы.
44 Мӹньӹм колтышы Ӓтя ӱжӹн ак канды гӹнь, Мӹнь докем иктӓт толын ак керд. Остатка кечӹн Мӹнь тӹдӹм ӹлӹжтем.
45 Пророквлӓн книгӓштӹ сирӹмӹ: ”Нӹнӹм цилӓштӹм Йымы тымда”.* Кӱ Ӓтям колеш дӓ Тӹдӹ гӹц тыменеш, тӹдӹ Мӹнь докем толеш.
46 Тенге гӹнят Ӓтям иктӓт ужде. Кӱ Йымы дорц толын, Тӹдӹ веле Ӓтям ужын.
47 Лачок, лачок тӓлӓндӓ попем: кӱ Мӹлӓнем ӹнянӓ, тӹдӹн курымашлык ӹлӹмӓшӹжӹ улы.
48 Мӹнь ӹлӹмӓшӹн киндӹжӹ ылам.
49 Тӓмдӓн ӓтявлӓдӓ пустыньышты манным качкыныт, но коленӹт.
50 А пӹлгом гӹц валышы киндӹ техень: кӱ тӹдӹм качкеш, ак колы.
51 Мӹнь пӹлгом гӹц валышы ӹлӹшӹ киндӹ ылам. Кӱ ти киндӹм качкеш, курым-курымок ӹлӓ. Мӹньӹн пушашлык киндем – Мӹньӹн Кӓпем, Мӹнь тӹдӹм сӓндӓлӹкӹн ӹлӹмӓшӹжӹ верц пуэм».
52 Тӹнӓм иудейвлӓ лошты кӹрмӓшӹмӓш тӹнгӓлӹн, нӹнӹ попенӹт: «Кыце ти Эдем ӹшке Кӓпшӹм мӓлӓннӓ качкаш пуэн кердеш?»
53 Иисус нӹнӹлӓн келесен: «Лачок, лачок тӓлӓндӓ попем: Эдем Эргӹн Кӓпшӹм ада кач дӓ Вӹржӹм ада йӱ гӹнь, тӓмдӓн ӹлӹмӓшдӓ ак ли.
54 Кӱ Мӹньӹн Кӓпем качкеш дӓ Вӹрем йӱэш, тӹдӹн курымашлык ӹлӹмӓшӹжӹ улы, дӓ остатка кечӹн Мӹнь тӹдӹм ӹлӹжтем.
55 Мӹньӹн Кӓпем – лачок качкыш, Мӹньӹн Вӹрем – лачок йӱш.
56 Мӹньӹн Кӓпем качшы дӓ Вӹрем йӱшӹ Мӹнь донем ушнен шалга, а Мӹнь тӹдӹн доно ушнен шалгем.
57 Ӹлӹшӹ Ӓтя Мӹньӹм колтен дӓ Мӹнь Ӓтя доно ӹлем, тенгеок Мӹньӹм качшат Мӹнь донем ӹлӓш тӹнгӓлеш.
58 Пӹлгом гӹц валышы киндӹжӹ тидӹ ылеш. Тӹдӹ ӓтявлӓдӓн качмы маннышты гань агыл. Нӹнӹ коленӹт, а кӱ ти киндӹм качкеш, тӹдӹ курымок ӹлӓш тӹнгӓлеш».
59 Тидӹм Иисус Капернаумыштышы синагогышты тымдымыжы годым попен.
60 Тидӹм колын, Тӹдӹн тыменьшӹвлӓжӹ логӹц шукынжы попенӹт: «Махань цӹтӓш лидӹмӹ шамаквлӓ! Кӱ тидӹм колышт кердеш?»
61 Техень шаяжылан тыменьшӹвлӓжӹн ӧпкӓлӹмӹштӹм пӓлен, Иисус нӹнӹлӓн келесен: «Тӓ тидӹлӓн ма алталалтыда?
62 Молнам ылмы вӓрӹшкӹжӹ Эдем Эргӹн кузымыжым ужыда гӹнь, ма лиэш?
63 Ӹлӹмӓшӹм ӹштӹшӹ – тидӹ Йымын Шӱлӹш, эдемӹн кӓп-шӱмжӹ нимахань пайдам ак канды. Тӓлӓндӓ попымы Мӹньӹн шамакем – тидӹ Шӱлӹш дӓ ӹлӹмӓш.
64 Но тӓ лоштыда кыды-тидӹжӹ ак ӹнянӹ». Вет кӱвлӓ ак ӹнянеп дӓ кӱ Тӹдӹм выжала, Иисус тӹнгӓлтӹш гӹцок пӓлен.
65 Дӓ Тӹдӹ келесен: «Седӹндон Мӹнь тӓлӓндӓ попенӓм: Ӓтям гӹц ак пуалт гӹнь, иктӓт Мӹнь докем толын ак керд».
66 Тӹлец вара тыменьшӹвлӓжӹ логӹц шукынжы Тӹдӹн дорц карангыныт дӓ Тӹдӹн доно иквӓреш ӹнде каштделыт.
67 Тӹнӓм Иисус луаткок тыменьшӹжӹ гӹц ядын: «Тӓӓт карангаш ада шаны?»
68 Симон-Петр вӓшештен: «Господь, кӱн докы мӓлӓннӓ кемӹлӓ? Курымашлык ӹлӹмӓшӹн шамакшы Тӹньӹн улы.
69 Мӓ ӹняненӓ дӓ пӓленӓ: Тӹнь Христос, ӹлӹшӹ Йымын Эргӹжӹ ылат».
70 Иисус нӹнӹлӓн келесен: «Мӹнь Ӹшке агыл ма тӓмдӓм луаткоктым айырен нӓлӹнӓм? Но тӓ лоштыда иктӹжӹ диавол!»
71 Тидӹм Тӹдӹ Искариот манмы Симонын Иуда эргӹжӹ гишӓн попен. Иуда, луаткок тыменьшӹжӹ гӹц иктӹжӹ, вара Иисусым выжалышы лишӓшлык ылын. *19">6:19 Стади – грек йӹлмӹштӹ ик стади 185 м нӓрӹ. «Коклы вӹц-кымлы стади» вӹц-куд километр лиэш.
*6:31 Пс 77:24, 104:40. *6:40 Тиштӹ «Мӹнь» шамакым Эргӹ манын ынгылымыла. *6:45 Ис 54:13.1 Иисус тӹлец вара Галилей мычкы каштын. Иудейвлӓ Тӹдӹм пушташ йӧнӹм кӹчӓлӹнӹт, седӹндон Иудейӹштӹ каштмыжы шоде.
2 Иудейвлӓн Амаш шагалтымы празныкышты лишемӹн,
3 Иисуслан шӱмбелвлӓжӹ келесенӹт: «Ти вӓрӹм коды, Иудейӹш ке. Махань пӓшӓвлӓм ӹштет, тыменьшӹвлӓэтӓт ужышты.
4 Цилӓлӓн пӓлӹмӹ лиӓш шанышы эдем нимат йӹвӹрт ак ӹштӹ. А Тӹнь техень пӓшӓвлӓм ӹштет гӹнь, Ӹшкӹметӹм сӓндӓлӹклӓн пӓлдӓрӹ!»
5 Вет шӱмбелвлӓжӓт Тӹдӹлӓн ӹнянӹделыт.
6 Иисус нӹнӹлӓн попен: «Мӹньӹн жепем эче толын шоде, но тӓлӓндӓ хоть-махань жепӓт яра.
7 Сӓндӓлӹк тӓмдӓм ужын керддӹмӹ лин ак керд, а Мӹньӹм ужын керддӹмӹ ылеш, вет тӹдӹн пӓшӓвлӓжӹ худа ылыт манын пӓлдӹртем.
8 А тӓ празныкыш кедӓ. Мӹнь ти празныкыш эче ам ке, вет Мӹньӹн жепем эче толын шоде».
9 Тидӹм попымыкы, Иисус Галилееш кодын.
10 Кынам шӱмбелвлӓжӹ празныкышкы кенӹт, Иисусат тӹшкӹ кеен, но халык анзылны агыл, а йӹвӹрт миэн.
11 Иудейвлӓ Иисусым празныкышты кӹчӓлӹнӹт дӓ ядыштыныт: «Кышты Тӹдӹ?»
12 Тӹдӹ гишӓн халыкышты шукым попенӹт. «Тӹдӹ пуры ылеш», – попенӹт иктӹвлӓжӹ, а весӹвлӓ маныныт: «Уке, Тӹдӹ халыкым алтала».
13 Но иудейвлӓ гӹц лӱдӹн, Тӹдӹ гишӓн иктӓт кӹрӓт попыде.
14 Пел празнык эртӹмӹкӹ, Иисус Йымын пӧртӹш толын дӓ тымдаш тӹнгӓлӹн.
15 Иудейвлӓ ӧрӹн попенӹт: «Кышец Тӹдӹ, тыменьдӹмӹ Эдем, Писаним пӓлӓ?»
16 Иисус нӹнӹлӓн келесен: «Мӹньӹн тымдымем – Мӹньӹн агыл, а Мӹньӹм Колтышын тымдымыжы.
17 Кӱ Тӹдӹн шанымыжым ӹштӹнежӹ, тӹдӹ ти тымдымаш кышец лӓкмӹм пӓлен нӓлеш: тидӹжӹ Йымы гӹц лӓктеш ӓль Мӹнь Ӹшке гӹц попем.
18 Ӹшке гӹц попышы ӹшкӹлӓнжӹ лӹмлештӓрӓлтмӓшӹм кӹчӓлеш, а кӱ Колтышыжылан лӹмлештӓрӓлтмӓшӹм кӹчӓлеш, Тӹдӹ лачок, дӓ Тӹдӹн алталымашыжы уке.
19 Законым тӓлӓндӓ Моисей пуде ма? Но тӓ логӹцдӓ иктӓт закон семӹнь ак ӹштӹ. Малын тӓ Мӹньӹм пуштнедӓ?»
20 Халык вӓшештен: «Тӹньӹн кӧргӹштет иӓ агыл ма? Кӱ Тӹньӹм пуштнежӹ?»
21 Иисус нӹнӹлӓн вӓшештен попен: «Мӹнь ик пӓшӓм ӹштенӓм, дӓ тӓ цилӓн ӧрӹдӓ.
22 Моисей тӓлӓндӓ пӹчмӹ овуцам шокташ шӱден, а тӓ кукшыгечӹнӓт эдемлӓн пӹчмӓшӹм эртӓредӓ. Лачокшым тидӹ Моисей гӹц агыл, ӓтявлӓ гӹц толеш.
23 Моисейӹн законжым пыдырташ агыл манын, кукшыгечӹнӓт эдем доно пӹчмӹ овуцам эртӓрӓт гӹнь, Мӹнь кукшыгечӹн эдемӹм цилӓге паремдӹмем гишӓн тӓ Мӹнь вӹкем шӹдешкедӓ ма?
24 Вӹлец анжен агыл, а тӧр суйыда».
25 Иерусалимӹштӹ ӹлӹшӹвлӓ логӹц кыды-тидӹжӹ попенӹт: «Кӱм пуштнештӹ, ти Эдем Тӹдӹ агыл?
26 Но теве Тӹдӹ халык анзылны попа, дӓ нимат Тӹдӹлӓн ак келесеп. Ӓнят, лачокок Христос ылмыжым вуйлатышывлӓ пӓлен нӓлӹнӹт?
27 Но мӓ ти Эдемӹн кышец ылмыжым пӓленӓ. А кынам Христос толеш, Тӹдӹн кышец ылмыжым иктӓт ак пӓлӹ».
28 Йымын пӧртӹштӹ тымдымыжы годым Иисус чӹнь попен: «Тенгежӹ тӓ Мӹньӹмӓт, кышец ылмемӓт пӓледӓ? Но Мӹнь Ӹшке дорцем толделам. Мӹньӹм Колтышы лачок ылеш. Тӓ Тӹдӹм ада пӓлӹ,
29 а Мӹнь Тӹдӹм пӓлем, вет Мӹнь Тӹдӹн дорц толынам, дӓ Тӹдӹ Мӹньӹм колтен».
30 Тӹнӓм нӹнӹ Иисусым кычынештӹ ылын, но эче Тӹдӹн жепшӹ толде, седӹндон Тӹдӹн вӹкӹ иктӓт кидӹм лӱктӓлде.
31 Но халык логӹц шукынжы Тӹдӹлӓн ӹняненӹт дӓ попенӹт: «Кынам Христос толеш, ти Эдем гӹц шукырак пӓлӹкӹм анжыкта ма?»
32 Халык лошты Иисус гишӓн ти попымашым фарисейвлӓ колыныт. Тӹнӓм фарисейвлӓ дон архиерейвлӓ Тӹдӹм кычаш ӹшке эдемвлӓштӹм колтенӹт.
33 А Иисус нӹнӹлӓн попен: «Эче изиш тӓ сагада лиӓм, а вара Мӹньӹм Колтышы докы кеем.
34 Тӓ Мӹньӹм кӹчӓлӓш тӹнгӓлӹдӓ, но ада мо. Кышты Мӹнь лиӓм, тӹшкӹ тӓ толын ада керд».
35 Тӹнӓм иудейвлӓ ӹшке лоштышты попенӹт: «Мӓ модымы вӓрӹш кышкы Тӹдӹ кенежӹ? Эллинвлӓ* лошты шӓпшӓлӓн ӹлӹшӹвлӓ докы кенежӹ дӓ эллинвлӓм тымдаш тӹнгӓлнежӹ ма?
36 ”Тӓ Мӹньӹм кӹчӓлӓш тӹнгӓлӹдӓ, но ада мо” дӓ ”Кышты Мӹнь лиӓм, тӹшкӹ тӓ толын ада керд” манмыжы мам анжыкта?»
37 Празныкын остатка сек кого кечӹнжӹ Иисус кӹньӹл шагалын дӓ чӹнь попен: «Кӱн йӱмӹжӹ шоэш, Мӹнь докем толжы дӓ йӱжӹ!
38 Кӱ Мӹлӓнем ӹнянӓ, Писаништӹ келесӹмӹ семӹнь, тӹдӹн кӧргӹжӹ гӹц ӹлӹшӹ вӹдӓн рекӓвлӓ йогаш тӹнгӓлӹт!»
39 Тӹдӹлӓн ӹнянӹшӹвлӓ Шӱлӹшӹм нӓлшӓшлык ылыт ыльы, дӓ Шӱлӹш гишӓн Иисус тенге попен. Тӹ жепӹн Святой Шӱлӹш эче пуалтде, вет Иисус эче лӹмлештӓрӓлтмӓшкӹ шоде.
40 Тӹдӹн техень шамакшым колмыкы, халык логӹц шукынжы попенӹт: «Тидӹ лачокок Пророк ылеш».
41 А весӹвлӓ маныныт: «Тидӹ Христос». Южшы попенӹт: «Галилей гӹц Христос толеш ма?
42 Писаништӹ келесӹмӹ вет, Христос – Давидӹн вырлыкшы, Тӹдӹ Вифлеем гӹц, Давидӹн шачмы вӓржӹ гӹц, толеш».
43 Тенге Иисус верц халык шелӓлтӹн.
44 Южшы Тӹдӹм кычынежӹ ылын, но иктӓт Иисус вӹкӹ кидӹм лӱктӓлде.
45 А колтымы эдемвлӓ архиерейвлӓ дон фарисейвлӓ докы пӧртӹлӹнӹт. Нӹнӹжӹ ядыныт: «Малын Тӹдӹм тӓ кычен шӹдӓ канды?»
46 Нӹнӹ келесенӹт: «Ти Эдем ганьы эче иктӓт нигынамат попыде».
47 Фарисейвлӓ нӹнӹлӓн попенӹт: «Тӓӓт алталалтында ма?
48 Вуйлатышывлӓ ӓль фарисейвлӓ логӹц иктӓжӹ Тӹдӹлӓн ӹнянӓ ма?
49 А ти халык законым ак пӓлӹ, тӹдӹ проклятайымы ылеш».
50 Но фарисейвлӓ логӹц иктӹжӹ, Иисус докы икӓнӓ йыдым толшы Никодим, нӹнӹлӓн келесен:
51 «Ӹшкӹмжӹм пӹтӓри колыштде дӓ мам ӹштӹмӹжӹм пӓлен нӓлде, мӓмнӓн закон эдемӹм суя ма?»
52 Нӹнӹ келесенӹт: «Тӹнят Галилей гӹц ылат ма? Писаним шӹмлӹ – ынгылет: пророк Галилей гӹц лин ак керд».
53 Дӓ цилӓн томан йӹде шӓлӓненӹт.
*7:35 Эллинвлӓ – вес семӹньжӹ греквлӓ.1 А Иисус Елеон кырыкыш кен.
2 Ирок ирӹ Тӹдӹ угӹц Йымын пӧртӹш толын. Иисус докы цилӓ халык цымырген, дӓ Тӹдӹ шӹнзӹн, нӹнӹм тымден.
3 Ти жепӹн законым тымдышывлӓ дӓ фарисейвлӓ тӹшкӹ ӹдӹрӓмӓшӹм канденӹт, тӹдӹм шӓхӓрлӓнӹмӹ годым кыченӹт. Ӹдӹрӓмӓшӹм цилӓ анзылан шагалтенӹт,
4 нӹнӹ Иисуслан попенӹт: «Тымдышы, ти ӹдӹрӓмӓшӹм шӓхӓрлӓнӹмӹжӹ годым кычымы.
5 Техень ӹдӹрӓмӓшвлӓм кӱм кӹшкен пушташ законышты Моисей мӓлӓннӓ шӱден. А Тӹнь мам келесет?»
6 Иисусым йӓтлӓш вирӹм моаш манын, тергӓш шанен, нӹнӹ тенге попенӹт. Но Иисус, нӹнӹ вӹкӹ анжалдеӓт, пӱгӹнен, рокеш парня донжы сирен.
7 Но кынам нӹнӹ Тӹдӹм пакылажат ядыштыныт, Иисус, вуйым лӱктӓлӹн, нӹнӹлӓн келесен: «Тӓ лоштыда кӱн сулыкшы уке, тӹдӹ сек анзыц ӹдӹрӓмӓш вӹкӹ кӱм шужы».
8 Эчеӓт пӱгӹнен дӓ рокеш сирен.
9 А нӹнӹ, тидӹм колын, намысланенӹт, когораквлӓ гӹц тӹнгӓлӹн, остатка эдем якте иктӹ паштек весӹ тӹшец кенӹт. Иисус ӹшкетшӹ кодын, ӹдӹрӓмӓш веле ӹшке вӓрӹштӹжок шалген.
10 Иисус вуйжым лӱктӓлӹн, ӹдӹрӓмӓш гӹц молым иктӹмӓт ужде, тӹдӹлӓн келесен: «Ӹдӹрӓмӓш, кышты тӹньӹм йӓтлӹшӹвлӓэт ылыт? Тӹньӹм иктӓт суйыде ма?»
11 Тӹдӹ вӓшештен: «Иктӓт, Господь!» Иисус тӹдӹлӓн келесен: «Мӹнят тӹньӹм ам суйы, ке дӓ анзыкыла сулыкым ит ӹштӹ».
12 Иисус эчеӓт халыклан попен: «Мӹнь сӓндӓлӹклӓн соты ылам. Кӱ паштекем кеӓ, тӹдӹ пӹцкемӹшӹштӹ ак кашт, а ӹлӹмӓшӹн сотыжы тӹдӹн лиэш».
13 Фарисейвлӓ тӹнӓм келесенӹт: «Тӹнь Ӹшке гишӓнет Ӹшке пӓлдӹртен попет, Тӹньӹн пӓлдӹртен попымет лачок агыл».
14 Иисус нӹнӹлӓн вӓшештен: «Мӹнь Ӹшке гишӓнем Ӹшке пӓлдӹртен попем гӹнят, Мӹньӹн попымем лачок ылеш, вет Мӹнь пӓлем, кышец толынам дӓ кышкы кеем, а тӓ, Мӹнь кышец толынам дӓ кышкы кем, ада пӓлӹ.
15 Тӓ эдем семӹнь суеда, а Мӹнь иктӹмӓт ам суйы.
16 Но Мӹнь суем гӹнь, Мӹньӹн суйымем тӧр лиэш, вет Мӹнь ӹшкетӹн ам ыл: Мӹньӹм колтышы Ӓтя Мӹнь донем иквӓреш.
17 А тӓмдӓн законышты сирӹмӹ: кок эдемӹн пӓлдӹртен попымышты лачок ылеш.
18 Мӹнь Ӹшке гишӓнем Ӹшке пӓлдӹртен попем, дӓ Мӹнь гишӓнем Мӹньӹм колтышы Ӓтя пӓлдӹртен попа».
19 Тӹнӓм нӹнӹ ядыныт: «А кышты Тӹньӹн Ӓтятшӹ?» Иисус келесен: «Тӓ Мӹньӹмӓт, Мӹньӹн Ӓтямӹмӓт ада пӓлӹ. Тӓ Мӹньӹм пӓледӓ ылгецӹ, Мӹньӹн Ӓтямӹмӓт пӓледӓ ыльы».
20 Тидӹм Иисус Йымын пӧртӹштӹ тымдымыжы годым жертва окса пиштӹмӹ вӓр сага попен. Иктӓт Тӹдӹм кычыде, эче Тӹдӹн жеп толын шоде.
21 Иисус эчеӓт попен: «Мӹнь кен колтем, тӓ Мӹньӹм кӹчӓлӓш тӹнгӓлӹдӓ, дӓ тӓ ӹшке сулыквлӓдӓ лоэш коледӓ. Кышкы Мӹнь кеем, тӓ тӹшкӹ толын ада керд».
22 Иудейвлӓ попаш тӹнгӓлӹнӹт: «Кышкы Мӹнь кеем, тӓ тӹшкӹ толын ада керд манын, малын Тӹдӹ попа? Тӹдӹ Ӹшкӹмжӹм Ӹшке пуштнежӹ ма?»
23 Иисус келесен: «Тӓ тишец, ӱлӹцӹн, ылыда, а Мӹнь – кӱшӹц. Тӓ ти сӓндӓлӹк гӹц ылыда, а Мӹнь ти сӓндӓлӹк гӹц ам ыл.
24 Седӹндон тӓлӓндӓ ӹшке сулыквлӓдӓ лоэш коледӓ манын попышым. Тидӹ Мӹнь Ылам* манын ада ӹнянӹ гӹнь, ӹшке сулыквлӓдӓ лоэш коледӓ».
25 Нӹнӹ ядыныт: «Тенгежӹ Тӹнь кӱ ылат?» Иисус нӹнӹлӓн келесен: «Кыце тӓлӓндӓ попенӓм, тӹнгӓлтӹш гӹцок [Ылшы].
26 Тӓ гишӓндӓ Мӹнь шукы попен дӓ тӓмдӓм шукы гишӓн суен кердӓм. Но Мӹньӹм Колтышы лачок ылеш, дӓ мам Мӹнь Тӹдӹ гӹц колынам, тӹдӹм сӓндӓлӹклӓн попем».
27 Иисус Ӓтя гишӓн попа манын, нӹнӹ ынгылыделыт.
28 Тӹдӹ пакыла попен: «Кынам Эдем Эргӹм кузыктедӓ, тӹнӓм ынгыледӓ: тидӹ Мӹнь Ылам, Мӹнь Ӹшке гӹц нимат ам ӹштӹ, но мам Мӹлӓм Ӓтям тымден, тӹдӹм попем.
29 Мӹньӹм Колтышы Мӹнь донем иквӓреш ылеш, Ӓтя Мӹньӹм ӹшкетемӹм кодыде, вет Мӹнь со Тӹдӹлӓн яралым ӹштем».
30 Иисусын тидӹм попымы годым шукынжы Тӹдӹлӓн ӹнянӓш тӹнгӓлӹнӹт.
31 Тӹдӹлӓн ӹнянӹшӹ иудейвлӓлӓн Иисус келесен: «Тӓ Мӹньӹн шамакем доно ӹледӓ гӹнь, лачокок Мӹньӹн тыменьшем ылыда,
32 тӹнӓм тӓ лачокым пӓлен нӓлӹдӓ, а лачок тӓмдӓм ирӹкӓнӹм ӹштӓ».
33 Нӹнӹ келесенӹт: «Мӓ Авраамын вырлыкшы ылына дӓ нигынамат иктӹнӓт цоражы ылделна! Кыце Тӹнь ”Ирӹкӓн лидӓ” манат?»
34 Иисус нӹнӹлӓн вӓшештен: «Лачок, лачок тӓлӓндӓ попем: кӱ сулыкым ӹштӓ, тӹдӹ сулыкын цоражы.
35 А цора пӧртеш курымеш ак код, эргӹ курымеш кодеш.
36 Эргӹ тӓмдӓм ирӹкӹш лыктеш гӹнь, тӓ лачокок ирӹкӓн лидӓ.
37 Мӹнь пӓлем, тӓ Авраамын вырлыкшы ылыда, но тенге гӹнят Мӹньӹм пушташ шанедӓ, вет тӓмдӓн кӧргӹштӹдӓ Мӹньӹн шамакемлӓн вӓр уке.
38 Мам Мӹнь Ӓтям сага ужынам, тӹдӹ гишӓн попем. Тенгеок тӓӓт, ӹшке ӓтядӓ сага мам ужында, тӹдӹм ӹштедӓ».
39 «Мӓмнӓн ӓтянӓ – Авраам!» – попенӹт нӹнӹ. Иисус нӹнӹлӓн келесен: «Тӓ лачокок Авраамын тетявлӓжӹ ылыда ылгецӹ, Авраам семӹнь ӹштедӓ ыльы.
40 Мӹнь лачокым Йымы гӹц колынам дӓ тӓлӓндӓ увертӓренӓм, а ӹнде тӓ Мӹньӹм пушташ шанедӓ. Авраам техеньӹм ӹштӹде.
41 Тӓ ӓтядӓ семӹнь ӹштедӓ». Нӹнӹ келесенӹт: «Мӓ шӓхӓрлӓнӹмӹ доно шачшы ана ыл. Мӓмнӓн Ӓтянӓ иктӹ: Йымы!»
42 Иисус нӹнӹлӓн попен: «Йымы тӓмдӓн Ӓтядӓ ылеш ылгецӹ, тӓ Мӹньӹм яратедӓ ыльы, вет Мӹнь Йымы дорц лӓктӹнӓм дӓ толынам. Мӹнь Ӹшке гӹцем толделам, Йымы Мӹньӹм колтен.
43 Тӓ Мӹньӹн шамакем колын ада керд, седӹндон попымем ада ынгылы.
44 Тӓ ӹшке ӓтядӓн, диаволын, тетявлӓжӹ ылыда дӓ ӓтядӓн сулыкан кымылжым шоктынедӓ. А диавол тӹнгӓлтӹш гӹцок эдемӹм пуштшы ылын дӓ лачокышты ӹлӹде, вет тӹдӹн доны лачок уке. Кынам алтала, тӹдӹ ӹшкӹмжӹнӹм попа, вет тӹдӹ алталышы дӓ алталымашын ӓтяжӹ ылеш.
45 А Мӹнь лачокым попем, седӹндон тӓ Мӹлӓм ада ӹнянӹ.
46 Кӱ тӓ логӹцдӓ Мӹньӹм сулыканыш лыктын кердеш? А Мӹнь лачокым попем гӹнь, малын Мӹлӓнем ада ӹнянӹ?
47 Кӱ Йымы гӹц ылеш, тӹдӹ Йымын шамакшым колеш. Тӓ Йымы гӹц ада ыл, седӹндон тӓ ада кол».
48 Иудейвлӓ Иисуслан келесенӹт: «Тӹнь Самари гӹц ылат, дӓ кӧргӹштет иӓ шӹнзӓ. Мӓ лачокым ана попы ма?»
49 Иисус вӓшештен: «Мӹньӹн кӧргӹштем иӓ уке, Мӹнь ӹшке Ӓтямӹм шотеш пиштем, а тӓ Мӹньӹм орледӓ.*
50 Мӹнь Ӹшкӹлӓнем лӹмлештӓрӹмӓшӹм ам кӹчӓл, Кӹчӓлшӹ дӓ Суйышы весӹ улы.
51 Лачок, лачок тӓлӓндӓ попем: кӱ Мӹньӹн шамакем шоктен толеш, тӹдӹ нигынамат колымашым ак уж».
52 Иудейвлӓ Тӹдӹлӓн келесенӹт: «Тӹньӹн кӧргӹштет иӓ ылмым ӹнде мӓ пӓлӹшнӓ. Авраам колен, пророквлӓӓт коленӹт. А Тӹнь попет: кӱ Мӹньӹн шамакем шоктен толеш, нигынамат колымашым ак уж!
53 Тӹнь мӓмнӓн Авраам ӓтянӓ гӹцӓт когорак ылат ма? Авраам колен, пророквлӓӓт коленӹт. Ӹшкӹметӹм Тӹнь кӱэш шотлет?»
54 Иисус попен: «Мӹнь Ӹшкӹмемӹм Ӹшке лӹмлештӓрем гӹнь, Мӹньӹн лӹмлештӓрӓлтмем нимат агыл. Кӱм тӓ мӓмнӓн Йымына маныда, Тӹдӹ, Мӹньӹн Ӓтям, Мӹньӹм лӹмлештӓрӓ.
55 Тӓ Тӹдӹм нигынамат пӓлӹделда, а Мӹнь Тӹдӹм пӓлем. Мӹнь Тӹдӹм ам пӓлӹ манам ылгецӹ, Мӹнь тӓ ганьдаок алталышы лиӓм ыльы. Но Мӹнь Тӹдӹм пӓлем дӓ шамакшым шоктен шалгем.
56 Тӓмдӓн Авраам ӓтядӓ Мӹньӹн кечем ужшашлыкшылан ӹвӹртен – ужын дӓ пиш сусу лин».
57 «Тӹлӓт вӹцлӹ иӓт уке, а Тӹнь Авраамым ужынат?» – иудейвлӓ пелештенӹт.
58 Иисус нӹнӹлӓн келесен: «Лачок, лачок тӓлӓндӓ попем: Авраам ылмы гӹц анзыц Мӹнь Ылам».*
59 Тӹнӓм Тӹдӹ вӹкӹ кӹшкӓш нӹнӹ кӱм роалтенӹт, но Иисус сӹнзӓ анзыц ямын дӓ Йымын пӧрт гӹц лӓктӹн. Тӹдӹ нӹнӹ логӹц эртен дӓ пакыла ашкедӹн.
*8:24 «Мӹнь Ылам» – Йымын лӹмжӹ, тӹдӹм Исход (Лӓкмӓш) книгӓштӹ (3:14) кычылтмы. (Анжы тенгеок – Ин 8:28 дӓ 13:19.) *8:49 Орлаш – бесчестить. *8:58 «Мӹнь Ылам» – 8:24 ынгылдарымым анжы.1 Эртӹмӹжӹ годым Иисус слӧпӧйок шачшы эдемӹм ужын.
2 Тыменьшӹвлӓжӹ Иисус гӹц ядыныт: «Равви, тӹдӹ малын слӧпӧй шачын? Кӱ сулыкым ӹштен: тӹдӹ ӹшке ӓль ӓтя-ӓвӓжӹ?»
3 Иисус келесен: «Тӹдӹ ӹшкӹмжӹн сулыкшы гишӓнӓт агыл, ӓтя-ӓвӓжӹн сулыкышты гишӓнӓт агыл слӧпӧй, а Йымын пӓшӓжӹ тӹдӹн доно кайшашлык.
4 Мӹньӹм Колтышын пӓшӓвлӓжӹм Мӹнь сотыгечӹнок ӹштӹшӓшлык ылам; йыд лиэш, тӹнӓм иктӓт пӓшӓм ӹштен ак керд.
5 Мӹнь сӓндӓлӹкӹштӹ ылмем годым сӓндӓлӹклӓн соты ылам».
6 Тенге попымыкы, Иисус мӱлӓндӹ вӹкӹ шӹвӓлӹн, шӹвӹльвӹдшӹм рок доно ярен, слӧпӧйӹн сӹнзӓшкӹжӹ ти лявӹрӓм шӹрен
7 дӓ тӹдӹлӓн келесен: «Силоам нӱштӹлмӹ вӓрӹшкӹ ке дӓ мышкылт». Силоам «колтымы» манмы лиэш. Тӹдӹ кеен, мышкылтын дӓ ужын кердшӹ пӧртӹлӹн.
8 Тӹдӹн пашкудывлӓжӹ дӓ слӧпӧй ылмыжым тӹлец анзыц ужшы эдемвлӓ ядыныт: «Тидӹ кӹчен шӹнзӹшет агыл ма?»
9 Иктӹвлӓжӹ попенӹт: «Тидӹ – тӹдӹ». Весӹвлӓжӹ келесенӹт: «Тидӹ тӹдӹлӓ каеш веле». Ӹшкежӹ келесен: «Тидӹ мӹнь ылам».
10 Нӹнӹ ядыныт: «А кыце тӹньӹн сӹнзӓэт пачылтын?»
11 Тӹдӹ вӓшештен: «Иисус манмы Эдем лявӹрӓм ӹштӹш, мӹньӹн сӹнзӓэш шӹрӓльӹ дӓ келесӹш: Силоамыш, нӱштӹлмӹ вӓрӹшкӹ, ке дӓ мышкылт. Мӹнь кешӹм, мышкылтым дӓ ужаш тӹнгӓльӹм».
12 «Кышты ти Эдемжӹ?» – нӹнӹжӹ ядыныт. «Ам пӓлӹ», – тӹдӹ манын.
13 Молнам слӧпӧй ылшы ти эдемӹм фарисейвлӓ докы канденӹт.
14 Кынам Иисус лявӹрӓм ӹштен дӓ слӧпӧйӹн сӹнзӓжӹм пачын, кукшыгечӹ ылын.
15 Фарисейвлӓӓт кыце ужаш тӹнгӓлмӹжӹ гишӓн ядыныт. Тӹдӹ вӓшештен: «Тӹ Эдем мӹньӹн сӹнзӓэшем лявӹрӓм тышкалтыш, мӹнь мышкылтым дӓ ӹнде ужам».
16 Тӹнӓм фарисейвлӓ логӹц южшы попенӹт: «Ти Эдем Йымы дорц агыл. Кукшыгечӹ гишӓн законым ак шокты». Весӹвлӓжӹ маныныт: «Но сулыкан эдем кыце техень пӓлӹквлӓм ӹштен кердеш?» Тенге нӹнӹ шелӓлтӹнӹт.
17 Слӧпӧй гӹц угӹц ядыныт: «Тӹнь ӹшкежӹ Тӹдӹ гишӓн мам келесет? Вет Тӹдӹ тӹньӹн сӹнзӓэтӹм пачын». Тӹдӹ келесен: «Тӹдӹ пророк ылеш».
18 Ужаш тӹнгӓлшӹн ӓтя-ӓвӓжӹм ӱжӹн кандымешкӹ, ти эдем слӧпӧй ылмылан дӓ ужаш тӹнгӓлмӹлӓн иудейвлӓ ӹнянӹделыт.
19 Ӓтя-ӓвӓжӹ гӹц ядыныт: «Тидӹ тӓмдӓн эргӹдӓ? Слӧпӧй шачын манын попедӓ? Ӹндежӹ кыце тӹдӹ ужеш?»
20 Ӓтя-ӓвӓжӹ вӓшештенӹт: «Тидӹ мӓмнӓн эргӹ дӓ тӹдӹ слӧпӧй шачын, мӓ пӓленӓ.
21 А кыце ӹнде ужаш тӹнгӓлӹн, мӓ ана пӓлӹ, дӓ сӹнзӓжӹм кӱ пачын, мӓ ана пӓлӹ. Ӹшке гӹцшӹ ядда. Тӹдӹ кого, ӹшке гишӓнжӹ келесен кердеш».
22 Иудейвлӓ гӹц лӱдӹнӹтӓт, ӓтя-ӓвӓжӹ тенге попенӹт, вет кӱ Иисусын Христос ылмыжылан ӹнянӹмӹжӹм пачын попа, каждыйым синагог гӹц карангдаш иудейвлӓ икышын хытырен келшенӹт.
23 Седӹндон слӧпӧй шачшын ӓтя-ӓвӓжӹ келесенӹт: «Тӹдӹ кого, ӹшке гӹцшӹ ядда».
24 Слӧпӧй ылшы эдемӹм кокшы гӓнӓ ӱжӹнӹт дӓ тӹдӹлӓн келесенӹт: «Йымым лӹмлештӓрӹ!* Мӓ пӓленӓ, тӹ Эдем сулыкан».
25 Тӹдӹ келесен: «Сулыкан ма, ам пӓлӹ. Иктӹм пӓлем: мӹнь слӧпӧй ылынам, а ӹнде ужам».
26 Нӹнӹ эче ядыныт: «Тӹнь донет Тӹдӹ мам ӹштен? Кыце сӹнзӓэтӹм пачын?»
27 Слӧпӧй ылшы вӓшештен: «Мӹнь тидӹм тӓлӓндӓ попышым, а тӓ шӹдӓ колышт. Малын тӓ эче ик гӓнӓ колнедӓ? Ӓнят, тӓӓт Тӹдӹн тыменьшӹвлӓжӹ линедӓ?»
28 Нӹнӹ вырсен попенӹт: «Тидӹ тӹнь Тӹдӹн тыменьшӹжӹ ылат, а мӓ Моисейӹн тыменьшӹвлӓжӹ ылына.
29 Мӓ пӓленӓ, Моисейлӓн Йымы попен. А ти Эдем кышецӹн, мӓ ана пӓлӹ».
30 Слӧпӧй ылшы келесен: «Тидӹжок ӧрӹктӓрӓ: Тӹдӹ кышец, тӓ ада пӓлӹ, а Тӹдӹ мӹньӹн сӹнзӓэм пачын.
31 Мӓ пӓленӓ, сулыканвлӓм Йымы ак колышт, а кӱ Йымым жеплӓ дӓ шанымыжым ӹштӓ, тӹдӹм колыштеш.
32 Слӧпӧйок шачшын сӹнзӓм иктӓжӹ пачмы гишӓн курымат колалтде.
33 Ти Эдем Йымы дорц агыл ылгецӹ, нимат ӹштен ак керд ыльы».
34 Нӹнӹ вӓшештенӹт: «Тӹнь цилӓге сулыкеш шачшы ылат, а эче мӓмнӓм тымдет!» Вара тӹдӹм поктен колтенӹт.
35 Ти эдемӹм поктен лыкмы гишӓн Иисус колын дӓ, тӹдӹм момыкыжы, ядын: «Йымын Эргӹлӓн тӹнь ӹнянет?»
36 Тӹдӹ келесен: «Господь, Тӹдӹлӓн ӹнянӓшем манын, кӱ Тӹдӹ?»
37 Иисус келесен: «Тӹнь Тӹдӹм ужынат. Кӱ тӹнь донет попа – Тӹдӹ».
38 «Господь, ӹнянем!» – слӧпӧй ылшы манын дӓ Тӹдӹ анзылан кымалын.
39 Иисус келесен: «Ти сӓндӓлӹкӹш Мӹньӹн толмем сӓндӓлӹклӓн суд лиэш: слӧпӧйвлӓ ужаш тӹнгӓлӹт, а ужшывлӓ слӧпӧй лит».
40 Тидӹм колмыкы, Иисус сага шалгышы юж фарисей Тӹдӹлӓн попен: «Мӓӓт слӧпӧй ылына ма?»
41 Иисус нӹнӹлӓн келесен: «Тӓ слӧпӧй ылыда ылгецӹ, вӹлнӹдӓ сулык ак ли ыльы. Но тӓ попедӓ: ”Мӓ ужына”, седӹндон сулыкда тӓ вӹлӓндӓ кодеш».
*9:24 «Йымым лӹмлештӓрӹ»: ти шамак тӹдӹ гӹц цуратлымашым ядмым анжыкта.1 «Лачок, лачок тӓлӓндӓ попем: кӱ шарык кудывичӹш капка вашт ак пыры, а пичӹ гач ванжа, тӹдӹ шолы дӓ разбойник.
2 Но кӱ капка гӹц пыра, тӹдӹ шарык кӹтӧзӹ ылеш.
3 Орол тӹдӹлӓн капкам пачеш, шарыквлӓ юкшым колыштыт. Тӹдӹ ӹшке шарыквлӓжӹм лӹм доно ӱжеш дӓ виден лыктеш.
4 А ӹшкӹмжӹн цилӓ шарыквлӓжӹм лыкмыкы, тӹдӹ нӹнӹн анзыц ашкедеш, шарыквлӓ паштекшӹ кеӓт, вет нӹнӹ тӹдӹн юкшым пӓлӓт.
5 Ӧрдӹж эдем паштек ак кеп, тӹдӹн дорцын кыдалыт, вет ӧрдӹж эдемӹн юкым ак пӓлеп».
6 Иисус нӹнӹлӓн тенге тыштен попен, но ма гишӓн попымыжым нӹнӹ ынгылыделыт,
7 седӹндон Иисус пакыла попен: «Лачок, лачок тӓлӓндӓ попем: Мӹнь шарыквлӓлӓн капка ылам.
8 Мӹнь гӹцем анзыц толшывлӓ цилӓн шолы дӓ разбойник ылыныт. Но шарыквлӓ нӹнӹм колыштделыт.
9 Мӹнь капка ылам: кӱ Мӹнь гачем пыра, тӹдӹ ытаралтеш: пыра, лӓктеш, алыкым моэш.
10 Шолы шолышташ, пушташ дӓ пӹтӓрӓш веле толеш. Мӹнь ӹлӹмӓшӹм, цицмӓш ӹлӹмӓшӹм, пуаш толынам.
11 Мӹнь пуры кӹтӧзӹ ылам, пуры кӹтӧзӹ шарыквлӓ верц ӹшке ӹлӹмӓшӹжӹм пуа.
12 А тӓрлӓлтшӹ эдем лачокшы кӹтӧзӹ агыл, шарыквлӓ ӹшкӹмжӹн агылеп, пирӹ толмым ужмыкы, шарыквлӓм коден, кыргыжеш. Пирӹ шарыквлӓм роалта дӓ кӹтӧм шӓлӓтен колта.
13 Ти эдем тӓрлӹмӹ веле, седӹндон шарыквлӓ верц ак тыргыжланы.
15 (14-15) Мӹнь пуры кӹтӧзӹ ылам. Кыце Ӓтя Мӹньӹм пӓлӓ дӓ Мӹнь Тӹдӹм пӓлем, тенгеок Мӹнь ӹшкӹмемӹнвлӓм пӓлем дӓ нӹнӹ Мӹньӹм пӓлӓт. Шарыквлӓ верц Мӹнь ӹшке ӹлӹмӓшем пуэм.
16 Мӹньӹн вес шарыквлӓэмӓт улы, нӹнӹ ти кудывичӹ гӹц агылеп, Мӹнь нӹнӹмӓт кӹтӹшӓшлык ылам. Нӹнӓт Мӹньӹн юкем колыштыт, тенге ик кӹтӧ дӓ ик Кӹтӧзӹ лиэш.
17 Ӹлӹмӓшемӹм угӹц нӓлӓш манын, Мӹнь тӹдӹм пуэм, седӹндон Ӓтя Мӹньӹм ярата.
18 Мӹнь гӹцем ӹлӹмӓшӹм иктӓт ак нӓл, Мӹнь тӹдӹм Ӹшке пуэм. Тӹдӹм пуаш властем улы, тӹдӹм мӹнгеш нӓлӓшӓт властем улы. Ӓтям Мӹлӓм тенге ӹштӓш шӱден».
19 Техень шамаквлӓ гишӓн иудейвлӓ эчеӓт шелӓлтӹнӹт.
20 Нӹнӹ логӹц шукынжы попенӹт: «Тӹдӹн кӧргӹштӹжӹ иӓ, Тӹдӹ ышдымы лин. Мам тӓ Тӹдӹм колыштыда?»
21 Весӹвлӓжӹ попенӹт: «Иӓ мутьымы тенге ак попы. Слӧпӧй эдемӹн сӹнзӓжӹм иӓ пачын кердеш ма?»
22 Тел ылын. Иерусалимӹштӹ Йымын пӧртӹм уэмдӹмӹ празнык ылын.
23 Иисус Йымын пӧртӹштӹ, Соломонын левӓшӓн кудывичӹштӹ, сӓрнен.
24 Иудейвлӓ Тӹдӹм йӹр ӓрен шагалтенӹт дӓ ядыныт: «Тӹнь мӓмнӓм маняр жеп эче ынгылыдымашты кычет? Тӹнь Христос ылат гӹнь, тӧрӧк келесӹ».
25 Иисус нӹнӹлӓн вӓшештен: «Мӹнь тӓлӓндӓ тидӹм келесенӓм, но тӓ ада ӹнянӹ. Ӓтямӹн лӹмжӹ доно ӹштӹмӹ пӓшӓвлӓэм Мӹньӹм пӓлдӹртӓт.
26 Но кӹце Мӹнь тӓлӓндӓ попенӓм, тӓ Мӹньӹн шарыквлӓэм ада ыл, седӹндон ада ӹнянӹ.
27 Мӹньӹн шарыквлӓэм юкем колыштыт, Мӹнь нӹнӹм пӓлем, дӓ нӹнӹ паштекем кеӓт.
28 Мӹнь нӹнӹлӓн курымаш ӹлӹмӓшӹм пуэм. Нӹнӹ нигынамат ак ямеп, иктӓт нӹнӹм Мӹньӹн кидем гӹц роалтен ак нӓл.
29 Ӓтям, кыды Мӹлӓнем нӹнӹм пуэн, цилӓ гӹц кого. Ӓтямӹн кидшӹ гӹц иктӓт нӹнӹм роалтен ак керд.
30 А Мӹнь дӓ Ӓтя – иктӹ ылына».
31 Тӹдӹм шин пушташ манын, иудейвлӓ угӹц кӱвлӓм роалтенӹт.
32 Иисус келесен: «Мӹнь тӓлӓндӓ Ӓтям гӹц лӓкшӹ шукы пуры пӓшӓм анжыктенӓм. Нӹнӹ логӹц кыды пӓшӓ гишӓн Мӹнь вӹкем кӱвлӓм кӹшкӹнедӓ?»
33 Иудейвлӓ Тӹдӹлӓн попенӹт: «Пуры пӓшӓ гишӓн агыл мӓ Тӹнь вӹкет кӱвлӓм кӹшкӹненӓ, а Йымым мыскылымет гишӓн. Эдем ылмы вӹлец Тӹнь Ӹшкӹметӹм Йымеш шотлет!»
34 Иисус нӹнӹлӓн вӓшештен: «Тӓмдӓн законыштыда ”Мӹнь келесенӓм: тӓ йымы ылыда” манын сирӹмӹ агыл ма?*
35 Тенгежӹ Йымын шамакым колшывлӓ йымы маналтыт, а Писани укеш лӓктӹн ак керд.
36 Ӓтя Мӹньӹм свящӓен дӓ сӓндӓлӹкӹш колтен. Мӹнь Йымын Эргӹ ылам манам гӹнь, кыце тӓ ”Йымым мыскылет” манын кердӹдӓ?
37 Мӹнь Ӓтямӹн пӓшӓвлӓжӹм ам ӹштӹ гӹнь, Мӹлӓм идӓ ӹнянӹ.
38 А ӹштем гӹнь, Мӹньӹн шамакемлӓн ада ӹнянӹ гӹнят, пӓшӓвлӓэмлӓн ӹнянӹдӓ, тӹнӓм пӓледӓ дӓ ӹнянедӓ: Ӓтя Мӹнь донем ушнен шалга, а Мӹнь Ӓтя доно ушнен шалгем».
39 Нӹнӹ эчеӓт Тӹдӹм роалтен кычаш цаценӹт, но Иисус нӹнӹн кид гӹц сӹсӹрген.
40 Иисус эчеӓт Иордан рекӓ вес векӹ кеен, кышты Иоанн молнам крестен, ти вӓрӹш толын дӓ тишӓк кодын.
41 Иисус докы шукы эдем толын. Нӹнӹ попенӹт: «Иоанн ик пӓлӹкӹмӓт ӹштӹде, но мам Тӹдӹ гишӓн Иоанн попен, цилӓ лачок».
42 Тӹштӹ Иисуслан шукынжы ӹнянӓш тӹнгӓлӹнӹт.
*10:34 Пс 81:6.1 Лазарь лӹмӓн ик эдем церлӹ ылын. Тӹдӹ Вифани гӹц, Мариян дӓ тӹдӹн Марфа ӓкӓжӹн ӹлӹмӹ сола гӹц ылын.
2 Марияжы тӹдӹ ылын, кӱ Господьым миро доно шӹрен дӓ Тӹдӹн ялжым ӱпшӹ доно ӹштӹн. Церлӹ Лазарь Мариян шӱмбелжӹ ылын.
3 Шыжарвлӓжӹ Иисуслан келесӓш колтенӹт: «Господь, Тӹнь кӱм яратет, тӹдӹ церлӹ».
4 Тидӹм колмыкы, Иисус келесен: «Ти церлӓнӹмӓш колымашлан агыл, а Йымын лӹмлештӓрӓлтмӹжӹлӓн: тидӹн гач Йымын Эргӹн лӹмлештӓрӓлтмӹжӹ толеш».
5 Марфам, тӹдӹн шыжаржым дӓ Лазарьым Иисус яратен.
6 Лазарьын церлӓнӹмӹжӹ гишӓн колмыкы, ти вӓрешок эче кок кечеш кодын,
7 а вара тыменьшӹвлӓжӹлӓн келесен: «Мӹнгеш Иудейӹш кенӓ».
8 Тӹдӹлӓн тыменьшӹвлӓжӹ попенӹт: «Равви, иудейвлӓ кӹзӹт веле вӹкет кӱм кӹшкен шин пуштнештӹ ыльы, а Тӹнь эчеӓт тӹшкӹ кет?»
9 Иисус нӹнӹлӓн келесен: «Кечӹн кытшы луаткок цӓш агыл ма? Кӱ сотыгечӹн каштеш, ак шӹртнялт: тӹдӹ ти сӓндӓлӹкӹн сотыжым ужеш.
10 А кӱ йыдым каштеш, шӹртнялтеш: тӹдӹ сага соты уке».
11 Тенге попымыкы, Иисус эче келесен: «Мӓмнӓн Лазарь тӓнгнӓ амален кен, но Мӹнь тӹдӹм кӹньӹлтӓш кеем».
12 Тӹдӹн тыменьшӹвлӓжӹ пелештенӹт: «Господь, амален кен гӹнь, тӧрлӓнӓ».
13 Иисус нӹнӹлӓн Лазарь колымы гишӓн попен, но тыменьшӹвлӓжӹ Тӹдӹ амалымы гишӓн веле попа машаненӹт.
14 Тӹнӓм Иисус тӧрӧк келесен: «Лазарь колен.
15 Мӹнь тӹштӹ ылделам, седӹндон тӓ верцдӓ сусу ылам: ӹнде тӓ ӹнянӓш тӹнгӓлӹдӓ. Но ӹнде тӹдӹн докы кенӓ».
16 Йӹгӹр манын лӹмдӹмӹ Фома молы тыменьшӹвлӓлӓн келесен: «Мӓӓт кенӓ дӓ Иисус доно иквӓреш коленӓ».
17 Тӹшкӹ толмыкы, ӹнде нӹлӹмшӹ кечӹ Лазарь шӹгерӹштӹ кимӹм Иисус пӓлен нӓлӹн.
18 Вифани Иерусалим лишнок ылын, иктӓ луатвӹц стади* нӓрӹштӹ,
19 дӓ шӱмбелӹштӹ верц ойхырышы Марфа дон Мариям ладнангдараш манын, нӹнӹ докы шукы иудей толын.
20 Иисус толмы гишӓн колмыкы, Марфа Тӹдӹм вӓшлиӓш кеен. А Мария тонышты шӹнзен.
21 Марфа Иисуслан келесен: «Господь, Тӹнь тиштӹ ылынат ылгецӹ, мӹньӹн шӱмбелем ак колы ыльы!
22 Но мӹнь кӹзӹтӓт пӓлем: Тӹнь мам Йымы гӹц ядат, Тӹдӹ Тӹлӓнет пуа».
23 Иисус тӹдӹлӓн манын: «Тӹньӹн шӱмбелет ӹлӹж кӹньӹлеш».
24 Марфа келесен: «Пӓлем, остатка кечӹн ӹлӹжтӹмӹ годым ӹлӹжеш».
25 Иисус келесен: «Мӹнь ӹлӹжмӓш дӓ ӹлӹмӓш ылам. Кӱ Мӹлӓнем ӹнянӓ, тӹдӹ кола гӹнят, ӹлӓш тӹнгӓлеш.
26 А кӱ ӹлӓ дӓ Мӹлӓнем ӹнянӓ, иктӓт нигынамат ак колы. Тидӹлӓн тӹнь ӹнянет?»
27 Марфа вӓшештен: «Тенге, Господь. Тӹнь Христос, сӓндӓлӹк вӹкӹ толшашлык Йымын Эргӹ ылат манын, ӹнянем».
28 Тенге келесӹмӹкӹ, Марфа кеен дӓ Мария шыжаржым ӧрдӹшкӹрӓк ӱжӹнӓт, келесен: «Тымдышы тиштӹ, Тӹдӹ тӹньӹм ӱжеш».
29 Мария, тидӹм колын, пӹсӹн кӹньӹлӹн дӓ Иисус докы кен.
30 Иисус эче солаш пырыде, а кышты Тӹдӹм Марфа вӓшлин, тӹ вӓрӹшток ылын.
31 Мариян пӹсӹн кӹньӹлмӹжӹм дӓ лӓктӹн кемӹжӹм ужмыкы, пӧртӹштӹ иквӓреш ылшы дӓ тӹдӹм ладнангдарышы иудейвлӓ паштекшӹ кенӹт, тӹдӹ шӹгер докы мӓгӹрӓш кеӓ машаненӹт.
32 А Мария, Иисус ылмы вӓрӹш мимӹкӹ, Тӹдӹм ужын, ялышкыжы кымал вазын дӓ Тӹдӹлӓн попен: «Господь, Тӹнь тиштӹ ылынат ылгецӹ, мӹньӹн шӱмбелем ак колы ыльы».
33 Мариян мӓгӹрӹмӹжӹм дӓ тӹдӹн сага толшы иудейвлӓн мӓгӹрӹмӹштӹм ужын, Иисусын йӓнгжӹ ойхырен, дӓ Тӹдӹ шӹдешкен.
34 Тӹдӹ ядын: «Тӓ Лазарьым кышак пиштендӓ?» Нӹнӹ келесенӹт: «Господь, ке дӓ анжал».
35 Иисусын сӹнзӓвӹдшӹ лӓктӹн.
36 Иудейвлӓ попенӹт: «Анжалда, кыце тӹдӹм яратен».
37 А нӹнӹ логӹц южшы маныныт: «Тӹдӹ слӧпӧйӹн сӹнзӓжӹм пачын. Лазарь ӹнжӹ колы манын, Тӹдӹ иктӓ-мам ӹштен ак керд ыльы ма?»
38 Эчеӓт кӧргӹштӹжӹ ойхырен, Иисус шӹгер докы толын. Тидӹ кырыкышты ылын, ӓнгжӹм кӱ питӹрен.
39 Иисус келесен: «Кӱм карангдыда». Колышын Марфа шыжаржы Тӹдӹлӓн попен: «Господь, ӹнде пышланаш тӹнгӓлӹн, колымыжылан нӹлӹмшӹ кечӹ».
40 Иисус тӹдӹлӓн пелештен: «Ӹнянет гӹнь, Йымын лӹмлештӓрӓлтмӹжӹм ужат манын, Мӹнь тӹлӓнет попыделам ма?»
41 Колышы кимӹ шӹгер ӓнг гӹц кӱм карангденӹт. Иисус пӹлгомыш анжалын дӓ келесен: «Ӓти, Мӹньӹм колметлӓн Тӹлӓнет тау.
42 Мӹньӹм соок колметӹм Ӹшке пӓлем, но Мӹньӹм Тӹнь колтыметлӓн ӹнянӹштӹ манын, йӹр шалгышы эдемвлӓ верц тенге попышым».
43 Тенге попымыкы, Тӹдӹ кого юк доно сӹгӹрӓл колтен: «Лазарь, лӓк!»
44 Колышы лӓктӹн, кидшӹ дӓ ялжы тайымы мӹнер доно вӹдӹлмӹ ылыныт, лицӓжӹ савыц доно вӹдӹлмӹ. Иисус нӹнӹлӓн келесен: «Мӹнерӹм карангдыда дӓ тӹдӹм колтыда».
45 Мария докы толшы дӓ Иисус мам ӹштӹмӹм ужшы иудейвлӓ логӹц шукынжы Иисуслан ӹняненӹт.
46 Но южшы фарисейвлӓ докы кенӹт дӓ Иисус мам ӹштӹмӹ гишӓн шайыштыныт.
47 Архиерейвлӓ дон фарисейвлӓ Синедрионым погенӹт дӓ попенӹт: «Мӓлӓннӓ мам ӹштӓш? Ти Эдем пӓлӹквлӓм шукы ӹштӓ.
48 Тӹдӹм тенгеок коденӓ гӹнь, цилӓн Тӹдӹлӓн ӹнянӓш тӹнгӓлӹт. Тӹнӓм римлянвлӓ толыт дӓ мӓмнӓн святой вӓрнӓмӓт, халыкнамат нӓлӹт».
49 Нӹнӹ логӹц иктӹжӹ, Каиафа, тӹ ин архиерей ылын, нӹнӹлӓн попен: «Тӓ нимат ада пӓлӹ!
50 Улы халык пӹтӹмешкӹ, халык верц ик эдем кола гӹнь, мӓлӓннӓ яжорак лиэш, тидӹм ада ынгылы».
52 (51-52) Тидӹм ӹшке гӹцшӹ попыде, тӹ ин архиерей ылынат, пророкла попен: Иисус халык верц, дӓ ти халык верц веле агыл, а Йымын шӓпшӓлӓ ӹлӹшӹ тетявлӓжӹмӓт иктӹш цымырымы верц колышашлык.
53 Тӹ кечӹ гӹц нӹнӹ Иисусым пушташ шанен пиштенӹт.
54 Седӹндон Иисус иудейвлӓ лошты Ӹшкӹмжӹм пӓлдӓрен каштде. Тишецӹн пустыня сагашы мӱлӓндӹш, Ефраим лӹмӓн халашкы, кеен дӓ тӹштӹ тыменьшӹвлӓжӹ доно иквӓреш кодын.
55 Иудейвлӓн Когечӹштӹ лишемӹн. Иреэмдӹмӹ овуцам шокташ манын, цилӓ вӓр гӹц шукынжы Иерусалимӹшкӹ празнык анзыцок кенӹт.
56 Нӹнӹ Иисусым кӹчӓлӹнӹт дӓ Йымын пӧртӹштӹ шалгышылашты ӹшке лоштышты попенӹт: «Тӓ кыце шанедӓ? Тӹдӹ празныкышкы ак тол ма?»
57 Архиерейвлӓ дон фарисейвлӓ шӱденӹт: Иисусым кычаш манын, Тӹдӹн кышты ылмыжым кӱ пӓлӓ гӹнь, тидӹ гишӓн увертӓрӹшӓшлык.
*11:18 «Луатвӹц стади» – кым уштыш.1 Иисус Когечӹ гӹц куд кечӹ анзыц Вифаниш, колымаш гӹц Тӹдӹн ӹлӹжтӹмӹ Лазарьын ӹлӹмӹ вӓрӹш, толын.
2 Тӹштӹ Иисус лӹмеш вады качкышым эртӓренӹт. Марфа хынавлӓм анжен, а Иисус доно иквӓреш стӧл лошты ылшывлӓ логӹц иктӹжӹ Лазарь ылын.
3 Тӹнӓм Мария пиш шергӓкӓн ик кӹрвенгӓ ире нард миром нӓлӹн, Иисусын ялешӹжӹ шӹрен дӓ ӹшке ӱпшӹ доно Тӹдӹн ялжым ӹштӹн. Пӧрт циц тотлы миро пыш шӓрлен.
4 Иисусын тыменьшӹвлӓжӹ логӹц иктӹжӹ, Искариот манмы Симонын Иуда эргӹжӹ, – варажы Иисусым выжалышы, – келесен:
5 «Малын ти миром кымшӱдӹ динариэш выжалыделыт дӓ оксажым незервлӓлӓн шӓлӓтӹделыт?»
6 Незервлӓ верц тыргыжланен агыл, а шолы ылынат, тенге попен: окса ӓтӹ сагажы ылын, тӹшкӹ пиштӹмӹм ӹшкӹлӓнжӹ шукы гӓнӓ нӓлӹн.
7 Иисус келесен: «Мариям идӓ тыргыжландары. Тидӹм Мӹньӹм тайымы кечеш переген коден.
8 Незервлӓ со тӓ сагада лит, а Мӹнь тӓ сагада со ам ли».
9 Шукы иудей Иисусын Вифаништӹ ылмыжым пӓлен нӓлӹнӹт дӓ тӹшкӹ толыныт, но Иисус гишӓн веле агыл, а Тӹдӹн колымаш гӹц ӹлӹжтӹмӹ Лазарьымат ужнештӹ ылын.
10 Тӹнӓм архиерейвлӓ Лазарьымат пушташ шанен пиштенӹт,
11 вет тидӹ гишӓн шукы иудей нӹнӹ дорц карангын дӓ Иисуслан ӹнянен.
12 Празныкышкы толшы шукы халык вес кечӹн, Иисус Иерусалимӹшкӹ толеш манмым колмыкы,
13 пальма укшвлӓм нӓлӹн, Тӹдӹн ваштареш лӓктӹн дӓ чӹнь попен:
«Осанна!
Господьын лӹмжӹ доно Толшы
Израильӹн Кугижӓжӹ хвальымы лижӹ!»*
14 Иисус сӓмӹрӹк оселым мон, тӹдӹн вӹкӹ шӹнзӹн. Сирӹмӹ семӹнь лин:
15 «Сион ӹдӹр, ит лӱд!
Теве, сӓмӹрӹк оселым кышкыжын,
тӹньӹн Кугижӓэт толеш».*
16 Тӹдӹн тыменьшӹвлӓжӹ пӹтӓри тидӹм ынгылыделыт, но варарак, Иисус лӹмлештӓрӓлтмӹкӹ, Тӹдӹ гишӓн тенге сирӹмӹм дӓ Тӹдӹн доно тенге ӹштӹмӹм нӹнӹ ӓшӹндӓренӹт.
17 Иисус Лазарьым шӹгер гӹц ӱжмӹжӹ дӓ колымаш гӹц ӹлӹжтӹмӹжӹ годым Тӹдӹн доно иквӓреш ылшы халык ужмыжы гишӓн попен.
18 Техень пӓлӹкӹм ӹштӹмӹжӹ гишӓн халык колын, седӹндон Тӹдӹм вӓшлиӓш лӓктӹн.
19 А фарисейвлӓ ӹшке лоштышты попенӹт: «Ужыда теве, нимат ӹштен ада шокты. Улы сӓндӓлӹк Тӹдӹн паштек кеӓ».
20 Празныкыш Йымылан кымалаш толшывлӓ лошты икманяр эллин ылын.
21 Нӹнӹ Филипп докы толыныт – тӹдӹжӹ Галилейӹштӹшӹ Вифсаида гӹц ылын – дӓ тӹдӹ гӹц ядыныт: «Пуры эдем, мӓ Иисусым ужненӓ».
22 Филипп кен дӓ тидӹ гишӓн Андрейлӓн попен, а вара Андрей дон Филипп тидӹ гишӓн Иисуслан шайыштыныт.
23 Иисусшы келесен: «Эдем Эргӹлӓн лӹмлештӓрӓлтӓш жепшӹ шон.
24 Лачок, лачок тӓлӓндӓ попем: шӓдӓнгӹ пӹрцӹ, рокыш вацмыкы, ак колы гӹнь, тӹдӹ ӹшкетӹн кодеш, а кола гӹнь, шукы шурным пуа.
25 Кӱ ӹшке йӓнгжӹм ярата, тӹдӹ йӓнгжӹм ямда, а кӱ ти сӓндӓлӹкӹштӹ ӹшке йӓнгжӹм ужын керддӹмӹ ылеш, тӹдӹ йӓнгжӹм курымаш ӹлӹмӓшлӓн переген кода.
26 Кӱ Мӹлӓнем служа гӹнь, тӹдӹ Мӹнь паштекем кежӹ, кышты Мӹнь ылам, тӹшток тӓрземӓт лиэш. Кӱ Мӹлӓнем служа гӹнь, тӹдӹм Ӓтям шотеш пиштӓ.
27 Ӹнде йӓнгем когон пыдырана. Мам Мӹнь келесен кердӓм? Ӓти, ти жеп гӹц Мӹньӹм ытары! Но Мӹнь лач ти жеп верц толынам.
28 Ӓти, ӹшке лӹметӹн лӹмлештӓрӓлтмӹжӹм анжыкты!» Пӹлгом гӹц юк шактен: «Мӹнь тӹдӹн лӹмлештӓрӓлтмӹжӹм анжыктенӓм дӓ эчеӓт анжыктем».
29 Тӹштӹ шалгышы халык тидӹм колын дӓ попен: «Тидӹ хӹдӹртӹш». А весӹвлӓ маныныт: «Тӹдӹлӓн Ангел попен».
30 Иисус нӹнӹлӓн келесен: «Ти юк Мӹнь верцем агыл, а халык верц ылын.
31 Теве ти сӓндӓлӹклӓн суйымаш толын, ӹнде ти сӓндӓлӹкӹн вуйлатышыжы* поктен колтымы лиэш.
32 А кынам Мӹнь мӱлӓндӹ вӹлец кузыктымы лиӓм, цилӓштӹм Ӹшке докем ӱжӹн нӓлӓм».
33 Тӹдӹ ти шамакшы доно кыце колышашыжым пӓлдӓрен.
34 Халык Тӹдӹлӓн попен: «Христос курым-курымеш лиэш манын, мӓ закон гӹц пӓленӓ. Эдем Эргӹ кузыктымы лишӓшлык манын, кыце Тӹнь попет? Тидӹ Эдем Эргӹжӹ кӱ?»
35 Иисус нӹнӹлӓн келесен: «Эче кӹтӹк жеп соты тӓ сагада лиэш. Пӹцкемӹш тӓмдӓм ӹнжӹ левед манын, соты годым каштда. Кӱ пӹцкемӹшӹштӹ каштеш, кышкы кемӹжӹм ак пӓлӹ.
36 Сотын тетявлӓжӹ лиӓш манын, соты тӓ доныда ылмы годым сотылан ӹнянӹдӓ». Тидӹм келесӹмӹкӹ, Иисус нӹнӹн сӹнзӓ анзыц ямын.
37 Эдемвлӓ анзылны Иисус тинӓр пӓлӹкӹм анжыктен гӹнят, Тӹдӹлӓн ӹнянӹделыт,
38 вет Исаия пророкын шамакшы шокталтшашлык ылын. Исаия попен:
«Господь, мӓмнӓн попымылан кӱ ӹнянен?
Господьын силажы кӱлӓн пачылтын?»*
39 Нӹнӹн ӹнянен керддӹмӹштӹн виржӹм Исаия эче попен:
40 «Тӹдӹ сӹнзӓштӹм слӧпӧйӹм ӹштен
дӓ шӱмӹштӹм кӱ ганьым ӹштен,
седӹндон сӹнзӓштӹ доно ак ужеп,
йӓнгӹштӹ доно ак ынгылеп,
нӹнӹм Мӹлӓнем паремдӓш манын,
Мӹнь докем ак сӓрнӓлеп».*
41 Иисусын лӹмлештӓрӓлтмӹжӹм ужын, Исаия тенге попен. Тӹдӹ Иисус гишӓн попен.
42 Тенге гӹнят вуйлатышывлӓ логӹц Иисуслан шукын ӹняненӹт, но фарисейвлӓ нӹнӹм синагог гӹц ӹнжӹштӹ карангдеп манын, ӹнянӹмӓшӹштӹм пачын анжыктыделыт.
43 Нӹнӹ эдем анзылны лӹмлештӓрӓлтмӹм Йымы гӹц нӓлмӹ лӹмлештӓрӓлтмӹ гӹц утларак яратенӹт.
44 Иисус чӹнь келесен: «Мӹлӓнем ӹнянӹшӹ Мӹлӓм агыл, а Мӹньӹм Колтышылан ӹнянӓ.
45 Мӹньӹм ужшы Мӹньӹм Колтышымат ужеш.
46 Мӹлӓнем ӹнянӹшӹ иктӓт пӹцкемӹшеш ӹнжӹ код манын, Мӹнь ти сӓндӓлӹкӹш соты гань толынам.
47 Кӱ Мӹньӹн шамакем колыштеш, но ак ӹнянӹ, тӹдӹм Мӹнь ам суйы: Мӹнь сӓндӓлӹкӹм суяш агыл, а ытараш толынам.
48 Кӱ Мӹньӹм ӹшкежӹ дорц карангда дӓ Мӹньӹн шамакем шӱмӹшкӹжӹ ак пиштӹ, тӹдӹн судьяжы улы: Мӹньӹн попымы шамакем остатка кечӹн тӹдӹм суя.
49 Вет Мӹнь Ӹшке гӹц попыделам, а мам келесӓш дӓ мам попаш, Мӹньӹм колтышы Ӓтя Мӹлӓм шӱден.
50 Мӹнь пӓлем: Тӹдӹн шӱдӹмӹжӹ – курымашлык ӹлӹмӓш, тенгежӹ мам Мӹнь попем, Мӹлӓнем Ӓтя келесӹмӹ семӹнь попем».
*12:13 Пс 117:26. *12:15 Зах 9:9. «Сион ӹдӹр» – Иерусалимӹм тенге манмы. *12:31 «Ти сӓндӓлӹкӹн вуйлатышыжы» – сатана. *12:38 Ис 53:1. *12:40 Ис 6:9-10.1 Когечӹ празнык анзыц Иисус, Ӹшкӹлӓнжӹ ти сӓндӓлӹк гӹц Ӓтя докы ванжымы жеп шомым пӓленӓт, ти сӓндӓлӹкӹштӹ ылшы яратымы эдемвлӓжӹлӓн мычаш якте яратымыжым анжыктен.
2 Вады качкыш жеп шомыкы, Искариот манмы Симонын Иуда эргӹжӹн шӱмӹшкӹжӹ Иисусым выжалаш шанымашым диавол пиштен шоктен ылын.
3 Иисус пӓлен: Ӓтя Тӹдӹн кидӹш цилӓ пуэн, Тӹдӹ Йымы дорц толын дӓ ӹнде Йымы докок кеӓ.
4 Седӹндон стӧл логӹц кӹньӹлӹн, вӹлвӓл выргемжӹм кыдашын дӓ, шӹргӹмсавыцым нӓлӹн, ӹштӓлӹн.
5 Вара ӓтӹш вӹдӹм пиштен, тыменьшӹвлӓжӹн ялыштым мышкаш дӓ ӹштӓлмӹ шӹргӹмсавыцшы доно ӹштӓш тӹнгӓлӹн.
6 Симон-Петр докы Тӹдӹ толын. Тӹдӹжӹ келесен: «Господь, Тӹлӓнет ма мӹньӹн ялемӹм мышкаш?»
7 Иисус келесен: «Мам Мӹнь ӹштем, тӹнь эче ат пӓлӹ, но вара ынгылет».
8 Петр манын: «Тӹнь мӹньӹн ялем курымат ат мыш!» Иисус вӓшештен: «Тӹньӹм ам мыш гӹнь, Мӹнь донем тӹньӹн лаштыкет ак ли».
9 Симон-Петр келесен: «Господь, мӹньӹн ялем веле агыл, кидем дӓ вуемӓт мыш!»
10 Иисус келесен: «Мышкылтшы эдем тӹрӹс ире. Тӹдӹн ялжым веле мышкаш келеш. Тӓ ире ылыда, но цилӓн агыл».
11 Кӱ Тӹдӹм выжала, Иисус пӓлен, седӹндон Тӹдӹ келесен: «Тӓ цилӓн агыл ире ылыда».
12 Нӹнӹн ялыштым мышмыкы, Иисус вӹлвӓл выргемжӹм чиэн, стӧл лош пӧртӹлӹн дӓ келесен: «Мам Мӹнь тӓлӓндӓ ӹштӹшӹм, тӓ ынгыледӓ?
13 Тӓ Мӹньӹм Тымдышы дӓ Господь маныда. Лачок попедӓ, Мӹнь Тымдышы дӓ Господь ылам.
14 Мӹнь, Тымдышы дӓ Господь, тӓмдӓн ялдам мышкынам гӹнь, тӓӓт икӹжӓк-иктӹдӓн ялдам мышшашлык ылыда.
15 Кыце Мӹнь тӓлӓндӓ ӹштенӓм, тӓӓт тенгеок ӹштӹдӓ манын, Мӹнь тӓлӓндӓ корным анжыктенӓм.
16 Лачок, лачок тӓлӓндӓ попем: цора ӹшке хозажы гӹц кого агыл дӓ колтымы эдемӓт колтышыжы гӹц кого агыл.
17 Ӹнде тидӹм пӓледӓ. Тенгеок ӹштӓш тӹнгӓлӹдӓ гӹнь, цӓшӓн лидӓ.
18 Мӹнь цилӓдӓ гишӓн ам попы: Мӹнь айырен нӓлмӹ эдемвлӓэм пӓлем. Но Писаништӹ келесӹмӹ: ”Мӹнь донем иквӓреш киндӹм качшы Мӹнь вӹкем ял кавалжым лӱктӓлӹн”.* Ти шамак шокталтшашлык.
19 Тенге лимӹкӹ, тидӹ Мӹнь Ылам манын ӹнянӓшдӓ, Мӹнь кӹзӹт, тенге лимӹ гӹц анзыц, тӓлӓндӓ тидӹм попем.
20 Лачок, лачок тӓлӓндӓ попем: Мӹньӹн колтымы эдемӹм кӱ пурын вӓшлиэш, Мӹньӹм пурын вӓшлиэш, а кӱ Мӹньӹм пурын вӓшлиэш, Мӹньӹм Колтышым пурын вӓшлиэш».
21 Тидӹм попымыкы, Иисусын йӓнгжӹ пыдыранен. Тӹдӹ тӧрӧк келесен: «Лачок, лачок тӓлӓндӓ попем, тӓ логӹцдӓ иктӹжӹ Мӹньӹм выжала».
22 Кӱ гишӓн попымыжым ынгылыде, тыменьшӹвлӓжӹ иктӹ-весӹштӹ вӹкӹ анженӹт.
23 Тыменьшӹвлӓжӹ логӹц иктӹжӹ – кӱм Иисус паснаок яратен – Иисус докы сек лишнӹ ылын.
24 Кӱ гишӓн попа, тӹдӹ ядшы манын, Симон-Петр ти тыменьшӹлӓн вуйжы доно анжыктен.
25 Иисусын онгжы тервен пӹзӹрген, тыменьшӹжӹ ядын: «Господь, кӱ тидӹ?»
26 Иисус келесен: «Сыкыр лаштыкым кӱлӓн нӧртен пуэм, тӹдӹ». Иисус сыкыр лаштыкым нӧртен дӓ Искариот манмы Симонын Иуда эргӹжӹлӓн пуэн.
27 Иуда лаштыкым нӓлӹн, дӓ сатана тӹнӓмок кӧргӹшкӹжӹ пырен. Иисус Иудалан келесен: «Мам ӹштӹнет, йӹлерӓк ӹштӹ».
28 Малын тӹдӹлӓн Иисус тидӹм попен, стӧл лошты ылшывлӓ логӹц иктӓт ынгылыде.
29 Окса ӓтӹ Иуда доны ылын, седӹндон ӹшкӹлӓнӹштӹ празныкеш ма керӓлӹм нӓлӓш ӓль иктӓ-мам незервлӓлӓн пуаш Иисус шӱдӓ манын, южшы шанен.
30 Киндӹ лаштыкым нӓлмӹкӹ, Иуда тӹнӓмок лӓктӹн кен. Йыд ылын.
31 Иуда лӓкмӹкӹ, Иисус келесен: «Теве ӹнде Эдем Эргӹ лӹмлештӓрӓлтӹн, дӓ Йымы Тӹдӹн гач лӹмлештӓрӓлтӹн.
32 Йымын лӹмлештӓрӓлтмӹжӹ Эдем Эргӹ гач пачылтын гӹнь, Йымат Тӹдӹн лӹмлештӓрӓлтмӹжӹм Ӹшке гачшы анжыкта, дӓ тидӹм шукышты агыл анжыкта.
33 Тетявлӓэм! Мӹнь тӓ донда эче кӹтӹк жеп лиӓм. Тӓ вара Мӹньӹм кӹчӓлӓш тӹнгӓлӹдӓ, но мам Мӹнь иудейвлӓлӓн попенӓм, тенгеок кӹзӹт тӓлӓндӓӓт попем: кышкы Мӹнь кеем, тӓ тӹшкӹ толын ада керд.
34 Мӹнь тӓлӓндӓ у шӱдӹмӓшӹм пуэм: иктӹ-весӹдӓм яратыда. Кыце Мӹнь тӓмдӓм яратенӓм, тӓӓт тенгеок иктӹ-весӹдӓм яратыда.
35 Тӓ лоштыда яратымаш лиэш гӹнь, тӓ Мӹньӹн тыменьшем ылмыдам цилӓн пӓлӓт.
36 Иисус гӹц Симон-Петр ядын: «Господь, Тӹнь кышкы кеет?» Иисус келесен: «Мӹнь кышкы кеем, кӹзӹт тӹнь Мӹнь паштекем кен ат керд, но варарак паштекем толат».
37 Петр Тӹдӹлӓн манын: «Господь, малын мӹнь Тӹнь паштекет кӹзӹт кен ам керд? Мӹнь Тӹнь верцет йӓнгем пуэм».
38 Иисус тӹдӹлӓн келесен: «Мӹнь верцем ӹшке йӓнгетӹм пуэт? Лачок, лачок тӹлӓнет попем: ӓптӓн мыралтымешкӹ, тӹнь кым гӓнӓ Мӹнь гӹцем карангат».
*13:18 Пс 40:10.1 «Тӓмдӓн йӓнгдӓ ӹнжӹ тыргыжланы. Йымылан ӹнянӹдӓ дӓ Мӹлӓм ӹнянӹдӓ.
2 Ӓтямӹн пӧртӹштӹжӹ шукы ӹлӹмӹ вӓр улы. Тенге агыл гӹнь, Мӹнь тӓлӓндӓ ”Вӓрӹм йӓмдӹлӓш кеем” манын келесем ыльы.*
3 Мӹнь кеем дӓ тӓлӓндӓ вӓрӹм йӓмдӹлем, а вара, кышты Мӹнь лиӓм, тӓӓт тӹштӹ лидӓ манын, Мӹнь мӹнгеш пӧртӹлӓм дӓ тӓмдӓм Ӹшке докем нӓлӓм.
4 А кышкы Мӹнь кеем, тӓ пӓледӓ, корнымат пӓледӓ».
5 Фома келесен: «Господь, Тӹнь кышкы кеет, мӓ ана пӓлӹ. Кыце мӓ корнетӹм пӓлен кердӹнӓ?»
6 Иисус тӹдӹлӓн келесен: «Мӹнь корны, лачок дӓ ӹлӹмӓш ылам. Мӹнь гачем агыл гӹнь, иктӓт Ӓтя докы толын ак керд.
7 Тӓ Мӹньӹм пӓледӓ ылгецӹ, Ӓтямӹмӓт пӓледӓ ыльы. Ти жеп гӹц тӓ Тӹдӹм пӓледӓ дӓ Тӹдӹм ужында».
8 Филипп келесен: «Господь, мӓлӓннӓ Ӓтям анжыкты, тидӹ мӓлӓннӓ ситӓ».
9 Иисус тӹдӹлӓн келесен: «Мӹнь тинӓр жеп сагада ылынам, а тӹнь, Филипп, Мӹньӹм ат пӓлӹ? Кӱ Мӹньӹм ужын, тӹдӹ Ӓтям ужын. Кыце тӹнь ”мӓлӓннӓ Ӓтям анжыкты” манын попет?
10 Мӹнь Ӓтя доно, а Ӓтя Мӹнь донем ушнен шалгымылан ат ӹнянӹ ма? Мам Мӹнь тӓлӓндӓ попем, Ӹшке гӹцем ам попы: Мӹнь донем ушнен шалгышы Ӓтя ӹшке пӓшӓжӹм ӹштӓ.
11 Мӹлӓнем ӹнянӹдӓ: Мӹнь Ӓтям доно ушнен шалгем, Ӓтя Мӹнь донем ушнен шалга. А Мӹньӹн шамакемлӓн ада ӹнянӹ гӹнь, пӓшӓвлӓэм гишӓн Мӹлӓнем ӹнянӹдӓ.
12 Лачок, лачок тӓлӓндӓ попем: мам Мӹнь ӹштем, Мӹлӓм ӹнянӹшӹ тидӹмок ӹштӓш тӹнгӓлеш, тидӹн гӹц когоракымат ӹштӓш тӹнгӓлеш, вет Мӹньӹ Ӓтям докы кеем.
13 Мӹньӹн лӹмем доно Ӓтя гӹц мам ядыда гӹнь, Мӹнь тӹдӹм ӹштем, дӓ тидӹн доно Ӓтя Эргӹжӹ гач лӹмлештӓрӓлтеш.
14 Мӹньӹн лӹм доно иктӓ-мам ядыда гӹнь, Мӹнь тӹдӹм ӹштем.
15 Тӓ Мӹньӹм яратедӓ гӹнь, Мӹньӹн шӱдӹмем ӹштӹдӓ.
16 Мӹнь Ӓтя гӹц сарвален ядам, дӓ Тӹдӹ тӓлӓндӓ вес Перегӹшӹм пуа, Тӹдӹжӹ тӓ сагада курымеш лиэш.
17 Тидӹ – Лачокын Шӱлӹшӹжӹ, сӓндӓлӹк Тӹдӹм нӓлӹн ак керд, вет Тӹдӹм ак уж дӓ ак пӓлӹ. Но тӓ Тӹдӹм пӓледӓ, вет Тӹдӹжӹ тӓ сагада кодеш дӓ тӓ донда ушнен шалга.
18 Мӹнь тӓмдӓм тылыкеш ам коды, тӓ докыда толам.
19 Эче икманяр жеп, дӓ сӓндӓлӹк Мӹньӹм ӹнде ак уж, а тӓ Мӹньӹм ужыда, вет Мӹнь ӹлем, дӓ тӓӓт ӹлӓш тӹнгӓлӹдӓ.
20 Тӹ кечӹн тӓ ынгыледӓ: Мӹнь Ӓтям доно ушнен шалгем, тӓ Мӹнь донем ушнен шалгедӓ, а Мӹнь тӓ донда ушнен шалгем.
21 Мӹньӹн шӱдӹмӹвлӓэм кӱн улы дӓ нӹнӹм кӱ шокта, тӹдӹ Мӹньӹм ярата. А кӱ Мӹньӹм ярата, Ӓтям тӹдӹм яраташ тӹнгӓлеш, Мӹнят тӹдӹм яратем дӓ тӹдӹлӓн Ӹшкӹмемӹм анжыктем».
22 Искариот агыл Иуда попен: «Господь, малын Тӹнь Ӹшкӹметӹм мӓлӓннӓ анжыктынет, а сӓндӓлӹклӓн агыл?»
23 Иисус келесен: «Кӱ Мӹньӹм ярата, тӹдӹ Мӹньӹн шамакем семӹнь ӹштӓ. Ӓтям тӹдӹм яраташ тӹнгӓлеш, Мӓ тӹдӹн докы толына, тӹштӹ Ӹшкӹлӓннӓ ӹлӹмӹ вӓрӹм ӹштенӓ.
24 Кӱ Мӹньӹм ак яраты, Мӹньӹн шамакем семӹнь ак ӹштӹ. А колыштмы шамакда Мӹньӹн агыл, а Мӹньӹм колтышы Ӓтян.
25 Тидӹм Мӹнь тӓлӓндӓ сагада ылмем годым келесенӓм.
26 А Ӓтя Мӹньӹн лӹмем доно Перегӹшӹм, Святой Шӱлӹшӹм, колта. Тӹдӹжӹ тӓмдӓм цилӓэш тымда дӓ, мам Мӹнь попенӓм, тӓлӓндӓ цилӓ ӓшӹндӓрен пуа.
27 Тӓлӓндӓ тырым кодем, ӹшкӹмемӹн тырем тӓлӓндӓ пуэм, сӓндӓлӹк пумы семӹнь агыл Мӹнь пуэм. Тӓмдӓн шӱмдӓ ӹнжӹ тыргыжланы дӓ ӹнжӹ лӱд.
28 Мӹнь кеем, но тӓ докыда угӹц толам манын, попымем тӓ колында. Тӓ Мӹньӹм яратедӓ гӹнь, Ӓтя докы кеем манын келесӹмемлӓн сусу лидӓ ыльы, вет Ӓтям Мӹнь гӹцем кого.
29 Тидӹ лимӹкӹ, тӓ ӹнянӹдӓ манын, Мӹнь тидӹ гишӓн анзыцок попенӓм.
30 Мӹлӓнем тӓ донда попаш шукы кодде, вет ти сӓндӓлӹкӹн вуйлатышыжы лишемеш. Мӹнь вӹлнем тӹдӹн нимахань властьшы уке.
31 Но сӓндӓлӹк пӓлӹжӹ: Мӹнь Ӓтям яратем дӓ, кыце Тӹдӹ Мӹлӓм шӱден, Мӹнь тенге ӹштем. Кӹньӹлдӓ, тишецӹн кенӓ!»
*14:2 «Мӹнь тӓлӓндӓ ”Вӓрӹм йӓмдӹлӓш кеем” манын келесем ыльы»: тенгеӓт сӓрӓш лиэш: «Мӹнь тӓлӓндӓ, вӓрӹм йӓмдӹлӓш кеем манын, келесем ыльы ма?»1 «Мӹнь лачокшы виноград пушӓнгӹ ылам, а Мӹньӹн Ӓтям – виноградым куштышы.
2 Мӹньӹн кӹцкӹдӹмӹ цилӓ укшем Тӹдӹ пӹчкӹн айыра, а кӹцкӹм ӹштӹшӹ цилӓ укшем, кӹцкӹжӹ шукырак лижӹ манын, итӹрӓйӓ.
3 Мӹньӹн тӓлӓндӓ попымы шамакем гишӓн тӓ ире ылыда.
4 Мӹнь донем ушнен шалгыда, тӹнӓм Мӹнят тӓ донда ушнен шалгем. Кыце укш ӹшке семӹньжӹ пушӓнгӹ гӹц пасна кӹцкӹм ӹштен ак керд, тенгеок тӓӓт Мӹнь гӹцем пасна кӹцкӹм пуэн ада керд.
5 Мӹнь виноград пушӓнгӹ ылам, а тӓ – укшвлӓ. Кӱ Мӹнь донем ушнен шалга дӓ кӱн доно Мӹнят ушнен шалгем, тӹдӹ шукы кӹцкӹм пуа, вет Мӹнь гӹцем пасна тӓ нимат ӹштен ада керд.
6 Кӱ Мӹнь донем ушнен ак шалгы, тӹдӹ укш семӹнь ӧрдӹжӹш шуалтеш дӓ кошка. А техень укшвлӓм погат, тылышкы кӹшкӓт, дӓ нӹнӹ йылат.
7 А тӓ Мӹнь донем ушнен шалгедӓ дӓ Мӹньӹн шамаквлӓэм тӓ донда ушнен шалгат гӹнь, мам шанедӓ, тӹдӹм ядда, дӓ цилӓ ядмыдам нӓлӹдӓ лиэш.
8 Кынам тӓ шукы кӹцкӹм пуэдӓ дӓ Мӹньӹн тыменьшӹвлӓэм лидӓ, тидӹн доно Ӓтям лӹмлештӓрӓлтеш.
9 Кыце Мӹньӹм Ӓтя яратен, тенгеок Мӹнят тӓмдӓм яратенӓм. Мӹньӹн яратымаштем кодда.
10 Кыце Мӹнь Ӓтямӹн шӱдӹмӹжӹм ӹштен шалгенӓм дӓ Ӓтян яратымаштыжы кодам, тӓӓт тенгеок, Мӹньӹн шӱдӹмем шоктен шалгедӓ гӹнь, Мӹньӹн яратымашыштем кодыда.
11 Мӹньӹн сусуэм тӓмдӓн лижӹ дӓ тӓмдӓн сусуда циц лижӹ манын, Мӹнь тидӹм тӓлӓндӓ келесенӓм.
12 Теве Мӹньӹн шӱдӹмем: кыце Мӹнь тӓмдӓм яратенӓм, иктӹ-весӹдӓм тенгеок яратыда.
13 Тӓнгвлӓжӹ верц ӹлӹмӓшӹжӹм пумы гӹц кого яратымаш иктӹнӓт уке.
14 Мам Мӹнь тӓлӓндӓ шӱдем, тӹдӹм шоктедӓ гӹнь, тӓ Мӹньӹн тӓнгвлӓэм ылыда.
15 Ӹнде Мӹнь тӓмдӓм цора ам ман, вет хозажын мам ӹштӹмӹжӹм цора ак пӓлӹ. Мӹнь тӓмдӓм тӓнгвлӓэм маньым: мам Ӓтям гӹц колынам, Мӹнь цилӓ тӓлӓндӓ келесенӓм.
16 Тӓ агыл Мӹньӹм айырен нӓлӹндӓ, Мӹнь тӓмдӓм айырен нӓлӹнӓм, тӓ кедӓ, кӹцкӹдӓ лижӹ дӓ кӹцкӹдӓ перегӓлтшӹ манын, тӓмдӓм шагалтенӓм. Тенге ӹштедӓ гӹнь, Ӓтя гӹц Мӹньӹн лӹм доно мам ядыда, тӓлӓндӓ цилӓ пуа.
17 Теве мам Мӹнь тӓлӓндӓ шӱдем: иктӹ-весӹдӓм яратыда.
18 Сӓндӓлӹк тӓмдӓм ужын керддӹмӹ лиэш гӹнь, ӓшӹндӓрӹдӓ: тӹдӹ тӓ гӹцдӓ анзыцок Мӹньӹм ужын керддӹмӹ ылын.
19 Тӓ сӓндӓлӹк гӹц ылыда ылгецӹ, тӹдӹ ӹшкӹмжӹнӹм ярата ыльы. Но тӓ сӓндӓлӹк гӹц ада ыл, Мӹнь тӓмдӓм сӓндӓлӹк гӹц айырен нӓлӹнӓм, седӹндон сӓндӓлӹк тӓмдӓм ужын ак керд.
20 Ӓшӹндӓрӹдӓ, цора ӹшке хозажы гӹц кого агыл манын, Мӹнь тӓлӓндӓ попенӓм. Мӹньӹм поктылыныт гӹнь, тӓмдӓмӓт поктылаш тӹнгӓлӹт. Мӹньӹн шамакем шоктенӹт гӹнь, тӓмдӓнӹмӓт шокташ тӹнгӓлӹт.
21 Но цилӓ тидӹм нӹнӹ тӓлӓндӓ Мӹньӹн лӹмем верц ӹштӓт, вет Мӹньӹм Колтышым ак пӓлеп.
22 Мӹнь ам тол дӓ нӹнӹлӓн ам попы ылгецӹ, нӹнӹ вуйнаматан ак лиэп ыльы, а ӹнде нӹнӹ сулыкыштым тӧрӹш лыктын ак кердеп.
23 Мӹньӹм ужын керддӹмӹ эдем Ӓтямӹмӓт ужын ак керд.
24 Мӹнь нӹнӹ лошты иктӓт весӹ ӹштен керддӹмӹ пӓшӓвлӓм ӹштӹделам ылгецӹ, нӹнӹ вуйнаматан ак лиэп ыльы. Но ӹнде нӹнӹ Мӹньӹн ӹштӹмем ужыныт дӓ Мӹньӹмӓт, Мӹньӹн Ӓтямӓт ужын керддӹмӹ линӹт.
25 Нӹнӹн законыштышы шамаквлӓ шокталтышты манын, тенге лин. Законыштыжы сирӹмӹ: ”Мӹньӹм такеш ужын кердделыт”.*
26 Но Ӓтя дорц Мӹньӹн колтымы Перегӹшӹ – Ӓтя гӹц лӓкшӹ Лачокын Шӱлӹшӹжӹ – тӓ докыда толмыкы, Мӹнь гишӓнем пӓлдӹртӓш тӹнгӓлеш.
27 Тӓӓт пӓлдӹртедӓ, вет тӓ тӹнгӓлтӹш гӹцӹнок Мӹнь сагаэм ылыда.
*15:25 Пс 34:19.1 Тидӹм Мӹнь тӓлӓндӓ идӓ алталалт манын попенӓм.
2 Тӓмдӓм синагогвлӓ гӹц карангдат, дӓ техень жеп толын шоэш, кынам тӓмдӓм пуштшывлӓ тидӹн доно Йымылан служенӓ машанат.
3 Ӓтямӓт, Мӹньӹмӓт ак пӓлеп, седӹндон нӹнӹ тенге ӹштӓт.
4 Техень жеп толмыкы, тидӹ гишӓн Мӹньӹн попымем ӓшӹндӓрӹдӓ манын, тӓлӓндӓ тидӹм попенӓм. Тишкевек тӓ сагада иквӓреш ылынам, седӹндон тидӹ гишӓн пӹтӓри попыделам.
5 Ӹнде Мӹньӹм Колтышы докы кеем, а Мӹнь гӹцем, кышкы кеет манын, тӓ логыцдӓ иктӓт ак яд:
6 тидӹм тӓлӓндӓ попымем гишӓн йӓнгдӓ сылык доно темӹн.
7 Но Мӹнь лачокым попем: Мӹньӹн кемем тӓлӓндӓ яжорак. Мӹнь ам ке гӹнь, тӓ докыда Перегӹшӹ ак тол, а кеем гӹнь, Мӹнь Тӹдӹм тӓ докыда колтем.
8 Тӹдӹ, толмыкыжы, сулык гишӓн, лачок гишӓн дӓ суйымы гишӓн сӓндӓлӹкӹн самынь шанымыжым вӹкӹ лыктеш:
9 сулык гишӓн – Мӹлӓнем ак ӹнянеп, сулыкшы тиштӹ;
10 лачок гишӓн – Мӹнь Ӓтям докы кеем дӓ ӹнде тӓ Мӹньӹм ада уж, лачокшы тиштӹ;
11 суйымы гишӓн – ти сӓндӓлӹкӹн вуйлатышыжы* ӹнде суйымы, судшы тиштӹ.
12 Тӓлӓндӓ келесӹшӓшем эче шукы улы, но кӹзӹтеш тидӹм колыштын ада керд.
13 Но кынам Тӹдӹ, Лачокын Шӱлӹшӹжӹ, толеш, тӓмдӓм цилӓ лачоклан тымда, вет мам Тӹдӹ келесӓ, Ӹшке гӹцшӹ ак попы: мам колеш, тӹдӹм келесӓ дӓ тӓлӓндӓ анзыкылашым увертӓрӓ.
14 Тӹдӹ Мӹньӹн лӹмлештӓрӓлтмӓшем пачын анжыкта, вет Мӹнь гӹцем нӓлеш дӓ тӓлӓндӓ увертӓрӓ.
15 Ма Ӓтян улы, цилӓ Мӹньӹн. Теве малын ”Мӹнь гӹцем нӓлеш дӓ тӓлӓндӓ увертӓрӓ” манын келесӹшӹм.
16 Икманяр жеп эртӓ, дӓ тӓ Мӹньӹм ада уж, но шукок ак эртӹ, тӓ Мӹньӹм угӹц ужыда, вет Мӹньӹ Ӓтя докы кеем».
17 Тӹнӓм тыменьшӹвлӓжӹ логӹц южшы ӹшке лоштышты попенӹт: «”Икманяр жеп эртӓ, дӓ тӓ Мӹньым ада уж, но шукок ак эртӹ, тӓ Мӹньӹм угӹц ужыда” манмыжы доно Тӹдӹ мам келесӹнежӹ? ”Мӹнь Ӓтя докы кеем” малын манеш?»
18 Нӹнӹ икӹжӓк-иктӹштӹ гӹц ядыштыныт: «Икманяр жеп манмыжы ма тидӹ техеньӹ? Ма гишӓн Тӹдӹ попа, мӓ ана ынгылы».
19 Тӹдӹ гӹц ядаш шанымыштым Иисус пӓлен, седӹндон келесен: «”Икманяр жеп эртӓ, дӓ тӓ Мӹньӹм ада уж, но шукок ак эртӹ, тӓ Мӹньӹм угӹц ужыда” манмем гишӓн тӓ иктӹ-весӹдӓ гӹц ядыштыда ма?
20 Лачок, лачок тӓлӓндӓ попем: тӓ мӓгӹрӓш дӓ ойхыраш тӹнгӓлӹдӓ, а сӓндӓлӹк сусу лиэш. Тӓ сылыкангыда, но тӓмдӓн сылыкда сусуш ванжа.
21 Ӓзӓм ӹштӹмӹ годым ӹдӹрӓмӓш сылык, вет тӹдӹн жепшӹ шон, но, ӓзӓм ӹштӹмӹкӹ, сӓндӓлӹк вӹкӹ эдем шачмылан сусу лиэш дӓ ясыланымыжы гишӓн ӹнде ак ӓшӹндӓрӹ.
22 Тӓӓт ӹнде сылык ылыда, но Мӹнь тӓмдӓм угӹц ужам, дӓ тӓмдӓн шӱмдӓ ӹвӹртӓ, дӓ тӓмдӓн сусудам иктӓт шыпшын ак нӓл.
23 Тӹ кечӹн тӓ Мӹнь гӹцем нимат ада яд. Лачок, лачок тӓлӓндӓ попем: Мӹньӹн лӹмем доно Ӓтя гӹц мам ядыда, цилӓ пуа.
24 Тӓ кӹзӹт якте Мӹньӹн лӹмем доно эче нимат ядделда. Ядда – тӹнӓм нӓлӹдӓ, дӓ тӓмдӓн сусуда циц лиэш.
25 Мӹнь тӓлӓндӓ тидӹм тыштен попенӓм, но жеп шоэш, кынам Мӹнь ӹнде тыштен ам попы, а Ӓтя гишӓн тӓлӓндӓ тӧрӧк увертӓрем.
26 Тӹ кечӹн тӓ Мӹньӹн лӹмем доно ядаш тӹнгӓлӹдӓ, а Мӹнь тӓ верцдӓ Ӓтям сарвалаш тӹнгӓлӓм ам ман.
27 Тӓ Мӹньӹм яратедӓ дӓ Йымы дорц толмемлӓн ӹнянедӓ, седӹндон Ӓтя Ӹшкежӹ тӓмдӓм ярата.
28 Мӹнь, Ӓтя дорц лӓктӹн, сӓндӓлӹкӹш толынам. Кӹзӹт, сӓндӓлӹкӹм коден, Ӓтя докы кеем».
29 Тӹдӹлӓн тыменьшӹвлӓжӹ келесенӹт: «Теве ӹнде Тӹнь тӧрӧк дӓ тыштыдеок попет.
30 Ӹнде мӓ ужына: Тӹнь цилӓ пӓлет дӓ иктӹнӓт ядмашыжы Тӹлӓт ак кел. Седӹндон мӓ ӹняненӓ: Тӹнь Йымы дорц толынат».
31 Иисус келесен: «Ӹнде ӹнянедӓ?
32 Теве жеп шоэш, ти жеп шонат, кынам тӓ цилӓн ӹшке велкӹдӓ шӓлӓнен кедӓ дӓ Мӹньӹм ӹшкетемӹм кодедӓ. Но Мӹнь ӹшкетем ам ыл, вет Ӓтя Мӹнь сагаэм.
33 Мӹнь донем ушнен шалгымашты тӓмдӓн тырда лижӹ манын, тӓлӓндӓ тидӹм попышым. Сӓндӓлӹкӹштӹ тӓ орланаш тӹнгӓлӹдӓ, но лӱддӹмӹ лидӓ: Мӹнь сӓндӓлӹкӹм сӹнгенӓм».
*16:11 «Ти сӓндӓлӹкӹн вуйлатышыжы» – сатана.1 Тенге манмыкы, Иисус пӹлгомыш анжалын дӓ келесен: «Ӓти, жеп шон, Эргет Тӹньӹн лӹмлештӓрӓлтметӹм анжыктыжы манын, Тӹдӹн лӹмлештӓрӓлтмӹжӹм анжыкты.
2 Кӱвлӓм Тӹдӹлӓн ӹнянен пуэнӓт, цилӓлӓн курымаш ӹлӹмӓшӹм пужы манын, Тӹнь Тӹдӹлӓн цилӓ эдем вӹлнӹшӹ властьым пуэнӓт.
3 А курымаш ӹлӹмӓш – тидӹ Тӹньӹм, ик ӹшкет лачок Йымым, дӓ Тӹньӹн колтымы Иисус Христосым пӓлӹмӓш.
4 Тӹньӹн ӹнянен пумы пӓшӓэтӹм шоктен, Мӹнь лӹмлештӓрӓлтметӹм мӱлӓндӹ вӹлнӹ анжыктенӓм.
5 Сӓндӓлӹк лимешкок, Тӹнь донет Мӹньӹн махань лӹмлештӓрӓлтмӓшем ыльы, ӹнде тӹ лӹмлештӓрӓлтмӓш донок Тӹнь, Ӓтя, Мӹньӹм Ӹшке анзылнет лӹмлештӓрӹ.
6 Тӹнь сӓндӓлӹк гӹц Мӹлӓм эдемвлӓм пуэнӓт, дӓ Мӹнь нӹнӹлӓн лӹметӹм пӓлдӓренӓм. Нӹнӹ Тӹньӹн ылыныт, нӹнӹм Мӹлӓм пуэнӓт. Нӹнӹ Тӹньӹн шамакетӹм кыченӹт.
7 Ӹнде нӹнӹ пӓлӓт: Тӹнь мам Мӹлӓм пуэнӓт, цилӓ Тӹнь дорцет.
8 Мам попышашлыкым Тӹнь Мӹлӓм пуэнӓт, цилӓ нӹнӹлӓн попенӓм, дӓ тидӹм нӹнӹ пурын вӓшлинӹт, Мӹнь Тӹнь дорцет толынам манын, нӹнӹ лачокок ынгылат дӓ Мӹньӹм Тӹнь колтыметлӓн ӹнянӓт.
9 Мӹнь нӹнӹ верц сарвалем, сӓндӓлӹк верц ам сарвалы, а нӹнӹ верц, кӱм Тӹнь Мӹлӓнем пуэнӓт, вет нӹнӹ Тӹньӹн ылыт,
10 дӓ ма Мӹньӹн улы – цилӓ Тӹньӹн, а ма Тӹньӹн улы – Мӹньӹн. Нӹнӹ гач Мӹнь лӹмлештӓрӓлтӹнӓм.
11 Ӹнде Мӹнь сӓндӓлӹкӹштӹ ам ыл, Тӹнь докет кеем, а нӹнӹ сӓндӓлӹкеш кодыт. Святой Ӓтя! Кыце Мӓ иктӹ ылына, нӹнӓт тенгеок иктӹ лиштӹ манын, Мӹлӓм пумы эдемвлӓэтӹм лӹмет доно переген коды.
12 Нӹнӹ сага сӓндӓлӹкӹштӹ ылмем годым Мӹлӓм пумы эдемвлӓэтӹм Мӹнь лӹмет доно пыт перегенӓм: Писани шокталтшы манын, кӱ ямшашлык, тӹдӹ веле пӹтен, молы иктӓт ямде.
13 А ӹнде Тӹнь докет толам. Мӹньӹн циц сусуэм нӹнӹн лижӹ манын, тидӹм сӓндӓлӹк вӹлнӹ попем.
14 Мӹнь Тӹньӹн шамакетӹм нӹнӹлӓн попенӓм, дӓ сӓндӓлӹк нӹнӹм ужын керддӹмӹ лин, вет кыце Мӹнь сӓндӓлӹк гӹц ам ыл, нӹнӓт тенгеок сӓндӓлӹк гӹц агылеп.
15 Сӓндӓлӹк гӹц нӹнӹм нӓл манын, Мӹнь ам сарвалы, худа гӹц нӹнӹм перегӹ манын сарвалем.
16 Кыце Мӹнь сӓндӓлӹк гӹц ам ыл, нӹнӓт тенгеок сӓндӓлӹк гӹц агылеп.
17 Лачокет доно нӹнӹм свящӓйӹ. Тӹньӹн шамакет – лачок.
18 Кыце Тӹнь Мӹньӹм сӓндӓлӹкӹш колтенӓт, тенгеок Мӹнят нӹнӹм сӓндӓлӹкӹш колтенӓм.
19 Нӹнӓт лачок доно свящӓйӓлтӹштӹ манын, нӹнӹ верц Мӹнь Ӹшкӹмемӹм Ӹшке пуэм.
20 Нӹнӹ верц веле агыл Мӹнь сарвалем, нӹнӹн шамакышты гишӓн Мӹлӓнем ӹнянӹшӹвлӓ верцӹнӓт сарвалем.
21 Нӹнӹ цилӓн иктӹ лиштӹ. Кыце Тӹнь, Ӓтя, Мӹнь донем ушнен шалгет дӓ Мӹнь – Тӹнь донет, нӹнӓт, Мӓ донна ушнен, иктӹ лиштӹ. Тӹнӓм Мӹньӹм Тӹнь колтенӓт манын, сӓндӓлӹк ӹнянӓ.
22 Кыце Мӓ Тӹнь донет иктӹ ылына, тенгеок нӹнӓт иктӹ лиштӹ манын, Мӹлӓнем пумы лӹмлештӓрӓлтметӹм Мӹнь нӹнӹлӓн пуэнӓм.
23 Кынам Мӹнь нӹнӹ доно ушнен шалгем, а Тӹнь Мӹнь донем ушнен шалгет, нӹнӹ яшт иктӹ ылыт, тӹнӓм сӓндӓлӹк пӓлен нӓлеш: Мӹньӹм Тӹнь колтенӓт дӓ, кыце Мӹньӹм яратет, тенгеок нӹнӹмӓт яратет.
24 Ӓти, кышты Мӹнь лиӓм, Тӹньӹн Мӹлӓм пумы эдемвлӓэтӓт тӹштӹ Мӹнь сагаэм иквӓреш лиштӹ шанем. Сӓндӓлӹкӹм ӹштӹмешкок Мӹньӹм яратымет гишӓн Мӹлӓм пумы лӹмлештӓрӓлтметӹм нӹнӓт ужышты.
25 Тӧр ӹштӹшӹ Ӓти! Сӓндӓлӹк Тӹньӹм ак пӓлӹ, а Мӹнь пӓлем, дӓ нӹнӓт Мӹньӹм Тӹнь колтыметӹм пӓлен нӓлӹнӹт.
26 Мӹньӹм яратымы гань яратымашет нӹнӹн шӱмӹштӹ лижӹ шанем, Ӹшкеӓт нӹнӹ доно ушнен шалгынем, седӹндон нӹнӹлӓн Тӹньӹн лӹметӹм пӓлдӓренӓм дӓ пакылажат пӓлдӓрем».
1 Тенге келесӹмӹкӹ, Иисус тыменьшӹвлӓжӹ доно иквӓреш Кедрон вӹд вес сирӹш ванжен. Тӹштӹ сад ылын, дӓ Иисус дон тыменьшӹвлӓжӹ тӹшкӹ пыренӹт.
2 Иудаат, Иисусым выжалышы, ти вӓрӹм пӓлен. Иисус тыменьшӹвлӓжӹ доно тӹштӹ шӹренок погыненӹт ылын.
3 Теве Иуда, салтак партьым, тенгеок архиерейвлӓ дон фарисейвлӓ колтымы тӓрзӹвлӓм сагажы нӓлӹн, тӹшкӹ толын. Нӹнӹн фонарьышты, факелӹштӹ дӓ вырсы хӓдӹрӹштӹ ылын.
4 Иисус Ӹшкежӹ доно ма лишӓшӹм цилӓ пӓленӓт, нӹнӹ докы лӓктӹн дӓ ядын: «Тӓ кӱм кӹчӓлӹдӓ?»
5 Нӹнӹ вӓшештенӹт: «Назорей Иисусым». Иисус келесен: «Тидӹ Мӹнь Ылам». Тӹдӹм выжалышы Иудаат нӹнӹ доно иквӓреш шалген.
6 «Тидӹ Мӹнь Ылам» манын, Иисус келесӹмӹкӹ, нӹнӹ шайыкы цӓкненӹт дӓ мӱлӓндӹ вӹкӹ кенвазыныт.
7 Иисус нӹнӹ гӹц угӹц ядын: «Тӓ кӱм кӹчӓлӹдӓ?» Нӹнӹ вӓшештенӹт: «Назорей Иисусым».
8 Иисус келесен: «Тидӹ Мӹнь Ылам, тӓлӓндӓ келесӹшӹм. Тӓ Мӹньӹм кӹчӓлӹдӓ гӹнь, нӹнӹм колтыда, кештӹ».
9 Тенге Тӹдӹн Ӹшке келесӹмӹ шамакшы шокталтын: «Кӱм Тӹнь Мӹлӓм пуэнӓт, нӹнӹ логӹц иктӹмӓт ямдыделам».
10 Симон-Петрӹн мечшӹ ылын, тӹдӹм роалтен лыктынат, архиерейӹн цоражым роалын дӓ тӹдӹн вургымла пӹлӹшӹжӹм пӹчкӹн шуэн. Цоражын лӹмжӹ Малх ылын.
11 Иисус Петрлӓн келесен: «Мечетӹм ладакышкыжы пиштӹ. Ӓтян Мӹлӓм пумы цӓшкӓ гӹц цилӓ йӱшӓшлык ам ыл ма?»
12 Тӹнӓм вуйлатышы доно иквӓреш салтак партьы дӓ иудей тӓрзӹвлӓ Иисусым кыченӹт дӓ пидӹнӹт.
13 Тӹдӹм пӹтӓри Каиафан Анна лӹмӓн оньыжы* докы нӓнгенӹт, Каиафажы тӹ ин архиерей ылын.
14 Улы халык вӓреш ик эдем кола гӹнь, яжорак лиэш манын, иудейвлӓлӓн Каиафа ышым пуэн ылын.
15 Иисус паштек Симон-Петр дӓ вес тыменьшӹжӹ кенӹт. Ти тыменьшӹжӹ архиерейӹн пӓлӹмӹжӹ ылын, Иисус доно иквӓреш архиерейӹн кудывичӹшкӹжӹ пырен,
16 а Петр капка анзылан шалген кодын. Вара вес тыменьшӹжӹ, архиерейӹн пӓлӹмӹжӹ, лӓктӹн, капка оролышы ӹдӹр доно попен дӓ Петрӹм кудывичӹш пыртен.
17 Тӹнӓм капка оролышы цора ӹдӹр Петрлӓн келесен: «Тӹнят ти Эдемӹн тыменьшӹвлӓжӹ логӹц ат ыл?» «Агыл», – манын Петр.
18 Ӱштӹ ылын. Цора дон оролвлӓ тылым ӹлӹжтенӹт дӓ ӹрен шалгенӹт. Петрӓт нӹнӹ сага ӹрен шалген.
19 Архиерей Иисус гӹц Тӹдӹн тыменьшӹвлӓжӹ дӓ мам тымдымыжы гишӓн ядыштын.
20 Иисус келесен: «Мӹнь сӓндӓлӹклӓн цилӓн анзылны попенӓм. Кышты со иудейвлӓ погынат, синагогышты ӓль Йымын пӧртӹштӹ, Мӹнь со тымденӓм. Мӹнь йӹвӹрт нимат попыделам.
21 Тенгежӹ малын тӹнь Мӹнь гӹцем ядат? Мам нӹнӹлӓн попенӓм, колыштшывлӓ гӹц яд. Мам попымем нӹнӹ пӓлӓт».
22 Иисус тенге манмыкы, сагажы шалгышы тӓрзӹвлӓ логӹц иктӹжӹ Тӹдӹм савен шелӹн дӓ сӹгӹрӓлӹн: «Тӹнь архиерейлӓн тенге попет?»
23 Иисус келесен: «Мӹнь самынь попенӓм гӹнь, самынем анжыкты. А Мӹнь лачокым попенӓм гӹнь, малын тӹнь Мӹньӹм шиӓт?»
24 Тӹнӓм Анна Тӹдӹм архиерей Каиафа докы пидмӹмок колтен.
25 А Симон-Петр ӹрен шалген. Тӹдӹ гӹц ядыныт: «Тӹнят Тӹдӹн тыменьшӹвлӓжӹ логӹц ат ыл?» Петр тореш попен: «Агыл».
26 Архиерейӹн цоравлӓжӹ логӹц иктӹжӹ ядын: «А тӹньӹм агыл ма садышты Тӹдӹн доно иквӓреш ужынам ыльы?» Петр тӹдӹн родыжын пӹлӹшӹжӹм роал шуэн ылын.
27 Петр эчеӓт «Уке» манын. Тӹнӓмок ӓптӓн мыралтен колтен.
28 Иисусым Каиафа дорц преториш канденӹт. Тидӹ ирок ирӹ ылын. Иудейвлӓ ӹшкештӹ преториш пырыделыт, вет ӹшкӹмӹштӹм лявӹргӹмӹ гӹц перегӹнештӹ дӓ когечӹ вады качкышым качнештӹ ылын.
29 Пилат нӹнӹ докы лӓктӹн дӓ ядын: «Ти Эдемӹм ма гишӓн йӓтледӓ?»
30 Нӹнӹ вӓшештенӹт: «Худам ӹштӹде ылгецӹ, мӓ Тӹдӹм тӹнь докет ана канды ыльы».
31 Пилат манын: «Тӹдӹм ӹшке нӓлдӓ дӓ законда семӹнь суйыда». Иудейвлӓ келесенӹт: «Мӓлӓннӓ иктӹмӓт пушташ ирӹк пуалтде».
32 Иисусын попымы шамакшы шокталтшы манын, тенге лин: Тӹдӹ кыце колышашыжым анзыцок пӓлдӓрен ылын.
33 Пилат мӹнгеш преториш пырен дӓ Иисусым ӱжӹктен. Тӹдӹ ядын: «Тӹнь иудейвлӓн Кугижӓштӹ ылат?»
34 Иисус келесен: «Тидӹм ӹшке гӹцет попет ӓль Мӹнь гишӓнем весӹвлӓ попенӹт?»
35 Пилат вӓшештен: «Мӹнь иудей ылам ма? Ӹшке халыкет дӓ архиерейвлӓ мӹлӓнем Тӹньӹм кычен пуэнӹт. Мам Тӹнь ӹштенӓт?»
36 Иисус келесен: «Мӹньӹн Кугижӓншем ти сӓндӓлӹк гӹц агыл. Мӹньӹн Кугижӓншем ти сӓндӓлӹк гӹц лиэш ылгецӹ, Мӹньӹм иудейвлӓн кидӹш кычен пумы ваштареш тӓрзӹвлӓэм Мӹнь верцем кредӓлӹт ыльы. Но Мӹньӹн Кугижӓншем тишец агыл».
37 Тӹнӓм Пилат Тӹдӹ гӹц ядын: «Тенгежӹ Тӹнь Кугижӓ ылат?» Иисус келесен: «Мӹньӹм Кугижӓ ылам манын, тӹнь попет. Мӹнь сӓндӓлӹкӹш лачок гишӓн пӓлдӹртӓш толынам дӓ тидӹлӓнок шачынам. Кӱ лачок гӹц, Мӹньӹн юкем колыштеш».
38 Пилат келесен: «Ма техень лачокшы?» Тенге попымыкы, Пилат иудейвлӓ докы угӹц лӓктӹн дӓ нӹнӹлӓн келесен: «Мӹнь Тӹдӹн нимахань вуйнаматшымат ам мо.
39 Тӓмдӓн техень овуцада улы: мӹнь кычен питӹрӹмӹ ик эдемӹм тӓлӓндӓ Когечӹн ирӹкӹш колтем. Тӓлӓндӓ иудейвлӓн Кугижӓштӹм лыктам гӹнь, яра?»
40 Цилӓн саслаш тӹнгӓлӹнӹт: «Тӹдӹм агыл! Вараввам!» А Варавважы разбойник ылын.
*18:13 Оньы – тесть, марын ӓтяжӹ.1 Тӹнӓм Пилат Иисусым лыпш доно шиктен.
2 Салтаквлӓ имӓн укшвлӓ доно вуйгӹшӹлӹм пидӹнӹт дӓ Иисусын вуйышкыжы пиштенӹт, Тӹдӹлӓн пӹцӓлгӹ-якшар выргемӹм чиктенӹт.
3 Нӹнӹ попенӹт: «Сусу ли, иудейвлӓн Кугижӓштӹ!» Тӹдӹм шӹргӹ гӹц савенӹт.
4 Пилат угӹц лӓктӹн дӓ халыклан попен: «Мӹнь Тӹдӹм йӓтлӓш нимахань вуйнаматшымат ам мо, тидӹм пӓлӹдӓ манын, теве мӹнь Тӹдӹм тӓ анзыкыда лыктам».
5 Имӓн укш вуйгӹшӹлӓн дӓ пӹцӓлгӹ-якшар выргемӓн Иисус тӹнӓм лӓктӹн. Пилат нӹнӹлӓн келесен: «Теве Эдем!»
6 Но кынам архиерейвлӓ дон тӓрзӹвлӓ Иисусым ужыныт, нӹнӹ саслаш тӹнгӓлӹнӹт: «Тӹдӹм пыдален сӓкӹ! Пыдален сӓкӹ!» Пилат нӹнӹлӓн келесен: «Тӹдӹм ӹшке нӓлдӓ дӓ пыдален сӓкӹдӓ! Мӹнь Тӹдӹн вуйнаматшым ам мо!»
7 Иудейвлӓ вӓшештенӹт: «Мӓмнӓн законна улы, дӓ закон семӹнь Тӹдӹ колышашлык, вет Тӹдӹ Ӹшкӹмжӹм Йымын Эргеш шотла».
8 Тидӹм колмыкы, Пилат когоракын лӱдӹн.
9 Тӹдӹ угӹц преториш пырен дӓ Иисус гӹц ядын: «Тӹнь кышец ылат?» Но Иисус нимат попыде.
10 Тӹнӓм Пилат келесен: «Мӹлӓнем ма ат попы? Тӹньӹм пыдален сӓкӓшӓт, ирӹкӹш колташат властем улым ат пӓлӹ ма?»
11 Иисус вӓшештен: «Кӱшӹц ак пуалт ылгецӹ, Мӹнь вӹлнем тӹньӹн нимахань властет ак ли ыльы. Седӹндон тӹньӹн кидӹшкет Мӹньӹм кычен пушын сулыкшы когорак».
12 Тӹлец вара Пилат Тӹдӹм ирӹкӹш лыкташ цацен. Но иудейвлӓ сасленӹт: «Тӹнь Тӹдӹм колтет гӹнь, кесарьлан тӓнг ат ыл! Кӱ ӹшкӹмжӹм кугижӓ ылам манеш, тӹдӹ кесарьын тышманжы!»
13 Пилат, ти шамаквлӓм колмыкы, Иисусым лыктын дӓ Лифостротон* манмы суйымы вӓрӹшкӹ шӹнзӹн, еврейлӓ тӹ вӓрӹм Гаввафа маныныт.
14 Тӹнӓм Когечӹ анзыцшы когарня кечӹ ылын, жепшӹ куд цӓш кытла ылын.* Пилат иудейвлӓлӓн келесен: «Теве тӓмдӓн Кугижӓдӓ!»
15 Нӹнӹжӹ сасленӹт: «Нӓл, нӓл, Тӹдӹм пыдален сӓкӹ!» Пилат келесен: «Тӓмдӓн Кугижӓдӓм пыдален сӓкӓш ма?» Архиерейвлӓ попенӹт: «Кесарь гӹц пасна мӓмнӓн кугижӓнӓ уке!»
16 Пыдален сӓкӹштӹ манын, тӹнӓм Пилат Иисусым нӹнӹн кидӹшкӹштӹ пуэн. Иисусым виден нӓнгенӹт.
17 Иисус, ӹшке крестӹжӹм намалын, Лепкӓ манмы вӓрӹш толын, еврейлӓ ти вӓржӹ Голгофа маналтеш.
18 Тӹштӹ Тӹдӹм пыдален сӓкенӹт, а Тӹдӹн сага эче коктым – иктӹжӹм ик велеш, весӹжӹм вес велеш, а Иисусым покшалан пыдаленӹт.
19 Пилат хангаэш сирен дӓ крестеш сӓкӓлтен, хангаштыжы сирӹмӹ ылын: «Назорей Иисус, иудейвлӓн Кугижӓштӹ».
20 Ти сирӹмӹм шукы иудей лыдын, вет Иисусым пыдален сӓкӹмӹ вӓржӹ хала сагаок ылын. Сирӹмӹжӹ еврейлӓ, греклӓ, римлӓ ылын.
21 Иудей архиерейвлӓ Пилатлан попенӹт: «”Иудейвлӓн Кугижӓштӹ” манын ит сирӹ. Тенге сирӹ: ”Ти Эдем Ӹшкӹмжӹм иудейвлӓн Кугижӓштӹ манын лӹмден”».
22 Пилат пелештен: «Мам мӹнь сиренӓм, тӹдӹм сиренӓм».
23 Иисусым пыдален сӓкӹмӹкӹштӹ, салтаквлӓ Тӹдӹн выргемжӹм нӓлӹнӹт дӓ нӹлӹтеш пайыленӹт, нӹнӹлӓн ик лаштык гӹц вӓрештӹн. Нӹнӹ тыгыржымат нӓлӹнӹт, тӹдӹжӹ ыргышдымы, кӱшӹц тӹнгӓлӹн ӱлӹк шомеш комы ылын.
24 Нӹнӹ иктӹ-весӹштӹлӓн попенӹт: «Тидӹм ана кышкед. Шӹвӓм ӹштенӓ дӓ анжалына, кӱлӓн тӹдӹ вӓрештеш». Тенге, Писанин шамакшы шокталтын:
«Выргемвлӓэм ӹшке лоштышты пайылевӹ,
выргемем гишӓн шӹвӓм шуэвӹ».*
Салтаквлӓ тенгеок ӹштенӹт.
25 Иисусын крестӹжӹ сага Ӓвӓжӹ, Ӓвӓжӹн ӓкӓжӹ, Клеопан Мария вӓтӹжӹ дӓ Мария Магдалина шалгенӹт.
26 Иисус, Ӓвӓжӹм дӓ тӹшток шалгышы яратымы тыменьшӹжӹм ужын, Ӓвӓжӹлӓн келесен: «Ӹдӹрӓмӓш, теве Тӹньӹн эргет».
27 А вара тыменьшӹлӓнжӹ попен: «Теве тӹньӹн Ӓвӓт». Тыменьшӹжӹ Иисусын Ӓвӓжӹм тӹнӓмок токыжы нӓлӹн.
28 Тидӹн паштек Иисус, ӹнде цилӓ шокталтмым пӓленӓт, Писани шокталтшы манын, келесен: «Йӱмем шоэш».
29 Тӹштӹ шапышы ӓрӓкӓ доно циц темӹмӹ ӓтӹ ылын. Нӹнӹ, шапышы ӓрӓкӓэш нӧртӹмӹ губкым иссоп укшеш керӹлӹн, Тӹдӹн ышмажы докы лӱктӓлӹнӹт.
30 Шапышы ӓрӓкӓм подылмыкы, Иисус келесен: «Ӹнде цилӓ шокталты!» Вара вуйжым сӓкен, дӓ йӓнгжӹ лӓктӹн.
31 Ти когарня паснаок кого кукшыгечӹ анзыц ылынат, кӓпвлӓ кукшыгечеш крестеш ӹнжӹштӹ кодеп манын, иудейвлӓ крестӹштӹ кечӹшӹвлӓн ялвургыштым шин шӓлӓтӓш дӓ кӓпӹштӹм крестӹ гӹц валташ Пилат гӹц ядыныт.
32 Салтаквлӓ толыныт, Иисус доно иквӓреш пыдален сӓкӹмӹвлӓ логӹц пӹтӓри иктӹнӹм, вара весӹнӹм ялвургыштым шин шӓлӓтенӹт,
33 а Иисус докы толмыкы, Тӹдӹм колышым ужыныт, седӹндон ялвургыжым шин шӓлӓтӹделыт.
34 Но ик салтак Иисусын покажым пӹсӹ йӹпш доно шыралын, тӹшец тӹнӓмок вӹр дӓ вӹд йоген лӓктӹн.
35 Тӓӓт ӹнянӹдӓ манын, тидӹм ӹшке сӹнзӓжӹ доно ужшы эдем попен. Тӹдӹн попымыжы лачок, тӹдӹ лачокым попымыжым пӓлӓ.
36 «Тӹдӹн лужы шин шӓлӓтӹмӹ ӹнжӹ ли» манын Писаништӹ попымы шокталтшашлан тидӹ лиӓлтӹн.*
37 А вес вӓре Писани келесӓ: «Кӱм шыралыныт, Тӹдӹн вӹкӹ анжат».*
38 Тӹлец вара Аримафейӹштӹшӹ Иосиф Иисусын кӓпшӹм нӓлӓш Пилат гӹц ядын, Пилат пуаш сӧрен. Иосифшӹ Иисусын тыменьшӹжӹ ылын, но иудейвлӓ гӹц лӱдӹнӓт, тидӹм пӓлдӹртӹде. Иосиф кеен дӓ Иисусын кӓпшӹм нӓлӹн.
39 Иисус докы молнам йыдым мишӹ Никодимӓт толын, тӹдӹ смирнӓ дон алой гӹц ӹштӹмӹ шӱдӹ кӹрвенгӓ ярымым канден.
40 Нӹнӹ Иисусын кӓпшӹм нӓлӹнӹт, тотлы пышан ярымы доно иквӓреш мӹнереш вӹдӹлӹнӹт. Иудейвлӓн тайымы овуцашты семӹнь тенге ӹштенӹт.
41 Иисусым пыдален сӓкӹмӹ вӓрӹштӹ сад ылын, а садышты – у шӹгерлӓ ыраж, тӹшӓк эче иктӹмӓт пиштӹделыт.
42 Шӹгер лишнок ылынат, иудейвлӓн когарня кечӹштӹ гишӓн Иисусым тӹшӓк пиштенӹт.
*19:13 «Лифостротон» – кӱ доно шӓрӹмӹ кӱкшикӓ вӓр. *19:14 «Куд цӓш кытла» – кӹзӹтшӹ жеп доно тура кечӹвӓл. *19:24 Пс 21:19. *19:36 Исх 12:46, Числ 9:12, Пс 33:21. *19:37 Зах 12:10.1 Кукшыгечӹ иргодеш, ирок ирӹ, валгалташ тӹнгӓлмешкӹ, Мария Магдалина шӹгер докы толын дӓ ужын: ӓнгӹштӹшӹ кӱм пӧрдӹктен карангдымы.
2 Мария тӹшец кыргыжын, Симон-Петр дӓ Иисусын яратымы вес тыменьшӹжӹ докы кеен, нӹнӹлӓн келесен: «Господьым шӹгер гӹц нӓнгенӹт, а кышкы Тӹдӹм пиштенӹт, мӓ ана пӓлӹ».
3 Петр дӓ вес тыменьшӹжӹ лӓктӹнӹт дӓ шӹгер докы кенӹт.
4 Нӹнӹ иквӓреш кыргыжыныт, но вес тыменьшӹжӹ Петр гӹц пӹсӹнрӓк кыргыжын дӓ шӹгер докы анзыцрак миэн шон.
5 Тӹдӹ анжалаш манын пӱгӹрнен дӓ тӹштӹ мӹнер кимӹм ужын. Но кӧргӹш пырыде.
6 Тӹдӹн паштек Симон-Петр толын. Тӹдӹ шӹгерӹш пырен дӓ тӹштӹ кишӹ мӹнерӹм
7 дӓ Иисусын вуйжым пӹтӹрӹмӹ савыцым ужын. Савыцшы мӹнер сага агыл, а вес вӓре, пасна пӹтӹрен пиштӹмӹ, киэн.
8 Тӹнӓм шӹгер докы сек анзыц кыргыж толшы вес тыменьшӹжӓт пырен. Тӹдӹ ужын дӓ ӹнянен.
9 Иисус колымаш гӹц ӹлӹжшӓшлык манын, Писаништӹ попымым нӹнӹ эче пӓлӹделыт.
10 Вара тыменьшӹвлӓжӹ мӹнгеш пӧртӹлӹнӹт.
11 А Мария тӱнӹ шӹгер сага мӓгӹрен шалген. Мӓгӹрӹмӹжӹ годым шӹгерӹш пӱгӹрнен анжалын
12 дӓ ужын: молнам Иисусын кӓпшӹ кимӹ вӓрӹштӹ ош выргемӓн кок Ангел шӹнзӓ – иктӹжӹ вуй турешты, весӹжӹ ял мычашты.
13 Нӹнӹ ядыныт: «Ӹдӹрӓмӓш, тӹнь малын мӓгӹрет?» Тӹдӹжӹ келесен: «Мӹньӹн Господем нӓнгенӹт, а кышкы Тӹдӹм пиштенӹт, мӹнь ам пӓлӹ».
14 Тенге попымыжы годым шайыкы сӓрнӓл анжалын дӓ тӹштӹ шалгышы Иисусым ужын. Но тидӹ Иисус ылмым тӹдӹ пӓлӹде.
15 Иисус тӹдӹлӓн манын: «Ӹдӹрӓмӓш, тӹнь малын мӓгӹрет? Кӱм кӹчӓлӓт?» Тидӹжӹ садышты ӹштӹшӹ ылеш манын, Мария шаналтен дӓ Тӹдӹлӓн келесен: «Пуры эдем, тӹнь Тӹдӹм нӓнгенӓт гӹнь, мӹлӓм келесӹ, кышак пиштенӓт, мӹнь Тӹдӹм нӓлӓм».
16 Иисус тӹдӹлӓн пелештен: «Мария». Мария сӓрнӓл шагалын дӓ Тӹдӹлӓн келесен: «Раввуни!» Тидӹжӹ «тымдышы» манмы лиэш.
17 Иисус тӹдӹлӓн попен: «Мӹнь тервенем ит тӹкнӹ, Мӹнь эче Ӓтям докы пӹлгомыш кузыделам. Мӹньӹн шӱмбелемвлӓ докы ке дӓ келесӹ: Мӹнь ӹшке Ӓтям дӓ тӓмдӓн Ӓтядӓ докы, ӹшке Йымем дӓ тӓмдӓн Йымыда докы кузем».
18 Мария Магдалина тыменьшӹвлӓ докы толын дӓ нӹнӹлӓн «Мӹнь Господьым ужынам» манын увертӓрен. Вара, мам Иисус келесен, тӹдӹм нӹнӹлӓн попен.
19 Тӹ кечӹнок, ӓрнян пӹтӓриш кечӹнжӹ, иудейвлӓ гӹц лӱдӹнӹтӓт, тыменьшӹвлӓжӹ вадеш амасам тӹкӹленӹт дӓ иквӓреш шӹнзенӹт. Тӹнӓм Иисус толын, покшалан шагалын дӓ нӹнӹлӓн келесен: «Тӓлӓндӓ тыр лижӹ!»
20 Тенге попымыкы, нӹнӹлӓн ӹшке кидшӹм[, ялжым] дӓ покажым анжыктен. Тыменьшӹвлӓжӹ, Господьым ужын, сусу линӹт.
21 Иисус нӹнӹлӓн угӹц попен: «Тӓлӓндӓ тыр лижӹ! Кыце Ӓтя Мӹньӹм колтен, Мӹнят тӓмдӓм тенгеок колтем».
22 Тидӹм келесӹмӹкӹ, ӹфӹлӓлӹн дӓ нӹнӹлӓн манын: «Святой Шӱлӹшӹм нӓлдӓ.
23 Кӱн сулыкшым простедӓ, тӹдӹн простялтеш, а кӱн вӹлӓн кодедӓ, тӹдӹ вӹлӓн сулык кодеш».
24 Но Иисус толмы годым луаткок тыменьшӹ гӹц иктӹжӹ, Йӹгӹр манмы Фома, нӹнӹ сага ылде.
25 Вес тыменьшӹвлӓ тӹдӹлӓн попенӹт: «Мӓ Господьым ужынна!» Тӹдӹ келесен: «Тӹдӹн кидӹштӹжӹ пыда гӹц кодшы шушыр ыражым ужде, парняэм тӹ шушыр ыражышкы дӓ покашкыжы кидем пиштӹде, ам ӹнянӹ!»
26 Кӓндӓкш кечӹ эртӹмӹкӹ, Тӹдӹн тыменьшӹвлӓжӹ угӹц пӧртӹштӹ иквӓреш ылыныт, нӹнӹ лошты Фомаат ылын. Амаса тӹкӹлӹмӹ ылын, Иисус нӹнӹ лошкы толын шагалын дӓ келесен: «Тӓлӓндӓ тыр лижӹ!»
27 А вара Фомалан попен: «Парняэтӹм тишкӹ виктӓлтӹ дӓ Мӹньӹн кидем анжал. Кидетӹм виктӓлтӹ, тӹдӹм покашкем пиштӹ. Ӹнянӹдӹмӹ ит ли, ӹнянӹшӹ ли!»
28 Фома Тӹдӹлӓн келесен: «Мӹньӹн Господем дӓ мӹньӹн Йымем!»
29 Иисус тӹдӹлӓн манын: «Тӹнь Мӹньӹм ужынат, седӹндон ӹнянет. Кӱвлӓ ужде ӹнянӓт, нӹнӹ цӓшӓн ылыт».
30 Иисус ӹшке тыменьшӹвлӓжӹ анзылны тенгеок шукы молы пӓлӹквлӓм ӹштен, цилӓштӹ гишӓн ти книгӓштӹ сирӹмӹ агыл.
31 Иисус – тидӹ Христос, Йымын Эргӹ ылмылан ӹнянӹдӓ, ӹнянӹмӹдӓ доно, Тӹдӹн лӹмжӹ верц курымаш ӹлӹмӓшӹм нӓлдӓ манын, тидӹм сирӹмӹ.
1 Тӹлец вара Иисус Тивериада тангыж лишнӹ тыменьшӹвлӓжӹлӓн эчеӓт кайын. Теве кыце тидӹ ылын.
2 Симон-Петр, Йӹгӹр манын лӹмдӹмӹ Фома, Галилейӹштӹшӹ Кана гӹц Нафанаил, Зеведейӹн эргӹвлӓжӹ дӓ Иисусын эче вес кок тыменьшӹжӹ иквӓреш ылыныт.
3 Симон-Петр нӹнӹлӓн келесен: «Мӹнь кол кычаш кеем». Молыжы попенӹт: «Мӓӓт тӹнь сагаэт кенӓ». Нӹнӹ тӹнӓмок кенӹт дӓ пышыш шӹнзӹнӹт, но тӹ йыдым нимат кычыделыт.
4 А ирӹ векӹлӓ Иисус сир тӹрӹштӹ шалген, но тыменьшӹвлӓжӹ тидӹ Иисус ылмым пӓлӹделыт.
5 Нӹнӹлӓн Иисус келесен: «Тетявлӓ, тӓмдӓн иктӓ-махань качкышда улы?» Тӹдӹлӓн вӓшештенӹт: «Уке».
6 Иисус манын: «Вӓпшӹм пыш гӹц вургымла монгырыш шуда, тӹнӓм кычедӓ». Нӹнӹ вӓпшӹм шуэнӹт дӓ кол шукы гишӓн мӹнгеш лыктын кердделыт.
7 Иисусын яратымы тыменьшӹжӹ Петрлӓн манын: «Тидӹ Господь!» Тидӹ Господь манмым колмыкы, Симон-Петр кыдашмы выргемжӹм кӹдӓлешӹжӹ кӹлден дӓ тангыжыш тӹргештен.
8 А вес тыменьшӹвлӓжӹ, колан вӓпшӹм шыпшын, сир докы пыш доно толыныт. Сирӹш мӹндӹр агыл ылын, кокшӱдӹ кӹнер нӓрӹ.*
9 Сирӹш лӓкмӹкӹштӹ, нӹнӹ йылышы тылшолым ужыныт, вӹлнӹжӹ кол киэн, тӹштӹ сыкырат ылын.
10 Иисус нӹнӹлӓн келесен: «Кӹзӹт кычымы колдам кандыда».
11 Симон-Петр кен дӓ кого кол доно темшӹ вӓпшӹм сирӹш шыпшын лыктын, цилӓжӹ тӹштӹ шӱдӹ вӹцлӹ кым кол ылын. Тинӓр шукы кол ылын гӹнят, вӓпш кышкедӓлтде.
12 Иисус нӹнӹлӓн келесен: «Толда, качда». Тӹнь кӱ ылат манын, тыменьшӹвлӓжӹ логӹц иктӓт Тӹдӹ гӹц ядаш смейӹделыт. Тидӹ Господь ылмым нӹнӹ ӹнде пӓленӹт.
13 Иисус толын, киндӹм нӓлӹн дӓ нӹнӹлӓн пуэн, кол донат тенгеок ӹштен.
14 Колымаш гӹц ӹлӹжмӹжӹ паштек ӹшке тыменьшӹвлӓжӹлӓн Иисус ӹнде кымшы гӓнӓ кайын.
15 Качмыкышты, Иисус Симон-Петрлӓн келесен: «Симон, Ионан эргӹжӹ, тӹнь Мӹньӹм нӹнӹ гӹц утларак* яратет ма?» Петр Тӹдӹлӓн келесен: «Тенге, Господь. Тӹнь пӓлет, мӹнь Тӹньӹм яратем». Иисус тӹдӹлӓн попен: «Мӹньӹн патявлӓэм кӹтӹ».
16 Эче вес гӓнӓ тӹдӹ гӹц ядын: «Симон, Ионан эргӹжӹ, тӹнь Мӹньӹм яратет ма?» Петр келесен: «Тенге, Господь, Тӹнь пӓлет, мӹнь Тӹньӹм яратем». Иисус келесен: «Мӹньӹн шарыквлӓэм кӹтӹ».
17 Кымшы гӓнӓӓт Иисус тӹдӹлӓн попен: «Симон, Ионан эргӹжӹ, тӹнь Мӹньӹм яратет ма?» Кымшы гӓнӓ «Мӹньӹм яратет ма?» манын ядмашеш Петр сылык лин. Иисуслан тӹдӹ келесен: «Господь, Тӹнь цилӓ пӓлет, Тӹнь пӓлет, мӹнь Тӹньӹм яратем». Иисус тӹдӹлӓн келесен: «Мӹньӹн шарыквлӓэм кӹтӹ.
18 Лачок, лачок тӹлӓнет попем: сӓмӹрӹк ылмет годым ӹштӹм тӹнь ӹшке ӹштӓлӹнӓт дӓ кышкы шаненӓт, тӹшкӹ кенӓт. А кынам шонгемӓт, кидетӹм шӓрӓлтет дӓ весӹ тӹньӹм ӹштӓлеш дӓ, кышкы ӹнет ке, тӹшкӹ нӓнгеӓ».
19 Махань колымаш доно Петр Йымылан лӹмлештӓрӓлтмӓшӹм кандышашлык, Иисус ти шамак доно пӓлдӓрен.* Тидӹм попымыкы, Петрлӓн келесен: «Паштекем ке!»
20 Петр сӓрнӓл анжалын дӓ Иисусын яратымы тыменьшӹжӹм ужын. Тӹдӹжӹ паштекӹштӹ ашкедӹн. Ти тыменьшок вады качкыш годым Иисусын онгжы тервен пӹзӹрген дӓ ядын: «Господь, кӱ Тӹньӹм выжала?»
21 Петр, тӹдӹм ужмыкы, Иисус гӹц ядын: «Господь, тӹдӹн доно ма лиэш?»
22 Иисус тӹдӹлӓн келесен: «Мӹнь толмешкем тӹдӹ ӹлӹшӹ кодшы манын шанем ыльы гӹнь, тӹлӓнетшӹ ма вара? Тӹнь паштекем ке».
23 Ти тыменьшӹ ак колы манмы шая шӱмбелвлӓ лошты шӓрлен. Но тӹдӹ ак колы манын, Иисус попыде. Тӹдӹ келесен: «Мӹнь толмешкем, тӹдӹ ӹлӹшӹ кодшы манын шанем ыльы гӹнь, тӹлӓнетшӹ ма вара?»
24 Ти тыменьшок тидӹ гишӓн пӓлдӹртен попа дӓ цилӓ тидӹм сирен. Тӹдӹн пӓлдӹртӹмӹжӹ лачок ылмым мӓ пӓленӓ.
25 Эче шукы весӹмӓт Иисус ӹштен. Цилӓ тидӹм пачелӓ-пачелӓ сирӓш гӹнь, сӓндӓлӹкӹштӹ тинӓр шукы книгӓлӓн вӓр ак ситӹ ыльы, шанем. Аминь.
*21:8 Кокшӱдӹ кӹнер – 100 метр нӓрӹ. *21:15 «Нӹнӹ гӹц утларак»: тидӹм «Цилӓ молы гӹц утларак» манынат сӓрӓш лиэш. *21:19 Петрӹм Римӹштӹ пыдален сӓкӹмӹ манмы ӓшӹндӓрӹмӓш кодын.