1 Мӓ лоштына лишӹ дӓ яжон пӓлӹмӹ пӓшӓвлӓ гишӓн шукын сирӓш тӹнгӓлӹнӹт.
2 Тӹнгӓлтӹш гӹцок цилӓ тидӹм ужшывлӓн дӓ Шамаклан служышывлӓн мӓлӓннӓ увертӓрӹмӹштӹм сирӓт.
3 Седӹндон мӹнят, тӹнгӓлтӹш гӹцок цилӓ ланзылен лӓкмӹкӹ, тидӹм тӹлӓнет, шотеш пиштӹмӹ Феофил, рӓдӹ доно сирӓш шанен пиштӹшӹм.
4 Тӹлӓнет тымдымы тӧр ылмым пӓлӹ манын, тидӹм сирем.
5 Иудейӹн Ирод кугижӓжӹ годым Авийӹн партьыштыжы служышы* Захарий лӹмӓн священник ылын. Тӹдӹн вӓтӹжӓт Аарон йых гӹц ылын, лӹмжӹ Елисавета.
6 Нӹнӹ коктынат Йымы анзылны тӧр ӹштӹшӹ ылыныт, Господьын шӱдӹмӹжӹм дӓ законжым цилӓ ӹштенӹт, йӓтлӓш вирӹм пуделыт.
7 Но Елисавета тетям ӹштен керддӹмӹ ылын, седӹндон нӹнӹн тетяштӹ ылде. Нӹнӹ коктынат кого иӓшӓн ылыныт.
8 Икӓнӓ, ӹшке партьыштыжы пӓшӓ церотшы толын шомыкы, Захарий Йымы анзылны служен.
9 Священниквлӓн овуцашты семӹнь шӹвӓм лыкмыкы, тӹдӹлӓн Господьын пӧртӹшкӹжӹ тӹтӹрӓш* пыраш вӓрештӹн,
10 а ладыным тӹтӹрӹмӹ годым улы халык тӱнӹ йымыдылын.
11 Тӹнӓм Захарийлӓн Господьын Ангелжӹ кайын, тӹдӹ тотлы пышым тӹтӹрӹмӹ стӧлӹн вургымла велнӹжӹ шалген.
12 Тӹдӹм ужмыкы, Захарий когон ӧрӹн, тӹдӹм лӱдмӓш нӓлӹн.
13 Но Ангел тӹдӹлӓн келесен: «Захарий, ит лӱд. Тӹньӹн йымыдылметӹм колмы. Елисавета вӓтет тӹлӓт эргӹм ӹштӓ, дӓ тӹнь тӹдӹлӓн Иоанн лӹмӹм пуэт.
14 Тӹлӓнет сусу дӓ ӹвӹртӹмӓш лиэш, тӹдӹн шачмыжылан шукын сусу лит.
15 Господь анзылны тӹдӹ пиш кого лиэш. Тӹдӹ якшар ӓрӓкӓмӓт, ош ӓрӓкӓмӓт йӱӓш ак тӹнгӓл, ӓвӓ кӧргӹштӹ ылмыжы годымок Святой Шӱлӹш доно темеш,
16 Израиль эргӹвлӓ логӹц шукыштым нӹнӹн Господь Йымышты докы сӓрӓлеш.
17 Господь анзыкы йӓмдӹлӹмӹ халыкым лыкташ манын, Илиян гань сила дӓ шӱлӹш доно тӹдӹ Господь гӹц анзылны каштеш, ӓтявлӓн йӓнгӹштӹм тетявлӓштӹ докы сӓрӓ, тӧр ӹштӹшӹвлӓ семӹнь шанаш шамак колыштдымывлӓм пӧртӹлтӓ».
18 Захарий Ангеллӓн келесен: «Тидӹ лачокок тенге лимӹм мӹнь кышец пӓлем? Мӹнь шонгы ылам, вӓтемӓт иӓшӹжӹ доно кого».
19 Ангел тӹдӹлӓн вӓшештен: «Мӹнь Гавриил ылам, Йымы анзылны шалгем, тӹлӓнет попаш дӓ ти сусу уверӹм келесӓш колтымы ылам.
20 Теве тӹнь йӹлмӹдӹмӹ лиӓт, цилӓ тидӹ шокталтмы кечӹ якте попен ат керд. Ӹшке жепӹштӹжӹ шокталтшашлык шамакемлӓн тӹнь ӹнянӹделат, седӹндон тенге лиэш».
21 Захарийӹм халык вычен дӓ тӹдӹн Йымын пӧртӹштӹ шукы жеп ылмыжылан ӧрӹн.
22 Захарий лӓктӹн, но нӹнӹлӓн нимат попен кердде. Эдемвлӓ ынгыленӹт: Йымын пӧртӹштӹ тӹдӹ каймашым ужын. Захарий кидшӹ доно анжыктылын дӓ йӹлмӹдӹмок кодын.
23 А служымы кечӹвлӓжӹ эртӹмӹкӹ, Захарий токыжы пӧртӹлӹн.
24 Икманяр жепӹштӹ Елисавета вӓтӹжӹ мӹшкӹрӓн лин дӓ вӹц тӹлзӹ шӹлӹн ӹлен. Тӹдӹ попен:
25 «Тидӹм мӹлӓм Господь ӹштен! Ти кечӹвлӓн Тӹдӹ вӹкем анжалын, эдемвлӓ гӹц тырхен ӹлӹмӹ намысем мӹнь вӹлецем карангден».
26 Кудымшы тӹлзӹн Йымы Гавриил Ангелӹм Галилейӹштӹшӹ Назарет манмы халашкы
27 Давид йыхын Иосифлӓн сӧрӹмӹ ӹдӹр докы колтен. Ӹдӹрӹн лӹмжӹ Мария ылын.
28 Ангел Тӹдӹн докы толын дӓ келесен: «Пурым нӓлшӹ ӹдӹр, сусу ли! Господь Тӹнь сагаэт. Ӹдӹрӓмӓшвлӓ лошты Тӹнь благословайымы ылат».
29 Но тӹдӹм ужмыкыжы, Мария техень шамаквлӓ гӹц ӧрӹн, лӱдӹн колтен дӓ шанаш тӹнгӓлӹн: здоровайымыжы мам анжыкта.
30 Ангел Тӹдӹлӓн келесен: «Мария, ит лӱд. Тӹнь Йымы гӹц пурым нӓлӹнӓт.
31 Тӹнь нелемӓт дӓ Эргӹм ӹштет. Тӹдӹлӓн Иисус лӹмӹм пуэт.
32 Тӹдӹ пиш кого лиэш, Кӱшнӹшӹ Йымын Эргӹ манын лӹмдӓлтеш. Господь Йымы Тӹдӹлӓн Давид ӓтяжӹн престолжым пуа.
33 Тӹдӹ курымеш Иаков родын кугижӓжӹ лиэш, Тӹдӹн кугижӓлӓнӹмӹжӹлӓн мычаш ак ли».
34 Ангеллӓн Мария келесен: «Кыце тидӹ лин кердеш, Мӹнь пӱэргӹм ам пӓлӹ?»
35 Ангел Тӹдӹлӓн келесен: «Вӹкет Святой Шӱлӹш вала, Кӱшнӹшӹ Йымын силажы Тӹньӹм леведеш. Седӹндон ти шачшашлык Ӓзӓ святой ылеш, Тӹдӹм Йымын Эргӹ манын лӹмдӓт.
36 Теве Тӹньӹн Елисавета родетӓт, шонгы гӹнят, мӹшкӹрӓн, тӹдӹн эргӹ шачеш. Тӹдӹм цилӓн тетям ӹштен керддӹмеш шотленӹт, ӹнде кудымшы тӹлзӹ Елисавета нелемшӹ.
37 Йымын ик шамакшат ӹштен керддӹмӹ ак ли».*
38 Мария келесен: «Мӹнь Господьын Цоражы ылам. Мӹлӓнем попымет семӹньок лижӹ». Ангел Тӹдӹн дорц карангын.
39 Ти кечӹвлӓн Мария тӓрвӓнен дӓ кырыкан кымдемӹштӹшӹ Иудан халашкы талашен кен.
40 Тӹдӹ Захарийӹн пӧртӹшкӹжӹ пырен дӓ Елисаветалан вӓшлимӹ шамаквлӓм келесен.
41 Мариян здоровайымым Елисавета колмыкыжы, мӹшкӹрӹштӹшӹ ӓзӓжӹ силан тӓрвӓнен, дӓ Елисавета Святой Шӱлӹш доно темӹн.
42 Тӹдӹ когон сӹгӹрӓл колтен: «Ӹдӹрӓмӓшвлӓ лошты Тӹнь благославайымы ылат! Йӓнг лӹвӓлнӹ намалмы Тетяэтӓт благословайымы.
43 Мӹнь докем Господемӹн Ӓвӓжӹ толын. Мӹлӓнем кышец техень цӓш?
44 Кынам мӹнь здоровайымы юкетӹм кольым, кӧргӹштем ӓзӓэм сусу лимӹжӹ доно силан тӓрвӓнӹш.
45 Ӹнянӹшӹ – пуры цӓшӓн, вет Тӹдӹлӓн Господьын келесӹмӹжӹ шокталтеш».
46
Мария келесен:
«Мӹньӹн йӓнгем Господьым хваля
47 дӓ Йымылан, Мӹньӹн Ытарышылан, кӧргӹ шӱлӹшем ӹвӹртӓ.
48 Тӹдӹ изи цора Ӹдӹржӹ вӹкӹ анжалын,
тилец вара цилӓ йых Мӹньӹм цӓшӓн манаш тӹнгӓлеш:
49 Силан Йымы Мӹлӓм когон кого пурым ӹштен.
Тӹдӹн лӹмжӹ святой ылеш.
50 Тӹдӹлӓн лӱдӹн ыдылшывлӓлӓн
Тӹдӹ йых гӹц йыхыш ӹшке пурыжым анжыкта.
51 Тӹдӹ ӹшке кидшӹ доно силан пӓшӓвлӓм ӹштен,
йӓнгӹштӹштӹ когоэшнӹшӹ шанымашым кычышывлӓм шӓлӓтен колтен.
52 Силанвлӓм престол гӹц сӹмӹрен,
смирнӓвлӓм лӱктӓлӹн,
53 шужышывлӓм пуры доно темен,
пайышывлӓм нима гӹц пасна колтен.
55 (54-55) Мӓмнӓн ӓтявлӓлӓннӓ попымыжы семӹнь,
Авраамлан дӓ тӹдӹн йыхшылан пурыжым курым ӓшӹндӓрен,
Тӹдӹ ӹшкӹмжӹн Израиль шачшыжым яратен нӓлӹн».
56 Елисавета доны Мария кым тӹлзӹ нӓрӹ ылын, вара мӹнгеш токыжы толын.
57 Елисаветалан ӓзӓм ӹштӓш жеп шон, тӹдӹ эргӹм ӹштен.
58 Господьын Елисавета докы когон пуры ылмы гишӓн пашкудывлӓ дӓ роднявлӓжӹ колыныт дӓ тӹдӹн доно иквӓреш сусу линӹт.
59 Кӓндӓкшӹмшӹ кечӹн ӓзӓлӓн пӹчмӹ овуцам эртӓрӓш толыныт дӓ тӹдӹм ӓтяжӹн лӹмжӹ доно Захарий манын лӹмдӹнештӹ ылын.
60 Но тетян ӓвӓжӹ келесен: «Уке. Тӹдӹм Иоанн манын лӹмденӓ».
61 Елисаветалан келесенӹт: «Но техень лӹмӓнжӹ тӹньӹн йыхыштет иктӓт уке».
62 Ӓзӓм кыце лӹмдӹнежӹ манын, ӓтяжӹ гӹц кид доно анжыктыл ядыныт.
63 Захарий изи хангам ядын дӓ сирен: «Тӹдӹн лӹмжӹ Иоанн». Цилӓн ӧрӹнӹт.
64 Ти жепӹнок Захарийӹн йӹлмӹжӹ пачылтын, тӹдӹ попаш дӓ Йымым хваляш тӹнгӓлӹн.
65 Нӹнӹ йӹр ӹлӹшӹвлӓ цилӓн когон лӱдӹнӹт. Цилӓ тидӹ гишӓн Иудейӹн кырыкан вӓржӹ мычкы попенӹт.
66 Кӱ тидӹ гишӓн колын, цилӓн йӓнгӹшкӹштӹ пиштенӹт дӓ попенӹт: «Ти тетя ма лиэш?» Вет тӹдӹн сага Господьын кидшӹ ылын.
67 Захарий, Иоаннын ӓтяжӹ, Святой Шӱлӹш доно темӹн дӓ пророкла попен:
68
”Израильӹн Господь Йымыжы хвальымы лижӹ!
Тӹдӹ ӹшке халыкшы докы лишемӹн
дӓ тӹдӹлӓн ирӹкӹш лӓкмӓшӹм йӓмдӹлен.
70 (69-70) Ӓкрет годымок святой пророквлӓжӹн
келесӹмӹштӹ гач сӧрӹмӹжӹм ӹштен:
Давид шачшыжын йыхшы гӹц
Тӹдӹ мӓлӓннӓ силан Ытарышым лыктын.
71 Тышманвлӓнӓ гӹц, мӓмнӓм ужын керддӹмӹвлӓн
цилӓн кидӹштӹ гӹц
Господь ытара.
72 Тенге Тӹдӹ ӓтянӓвлӓлӓн пурыжым анжыкта
дӓ ӹшке святой согоньжым ӓшӹндӓрӓ,
75 (73-75) Авраам ӓтялӓннӓ цуратлымыжым мондыде:
мӓмнӓм тышман кид лӹвец ирӹкӹш лыктеш,
дӓ, анзылныжы святой семӹнь дӓ тӧр ӹштен,
ӹлӹшӓш кечӹвлӓнӓ мычкы Тӹдӹлӓн лӱдде служен кердӹнӓ.
76 А тӹнь, тетя,
Кӱшнӹшӹ Йымын пророкшы манын лӹмдӓлтӓт,
Господь гӹц анзыц кет, Тӹдӹлӓн корным йӓмдӹлет дӓ
77 Тӹдӹн халыкшылан пӓлдӓрет:
ти халыкын ытаралтмашыжы сулыквлӓштӹм простьымашты.
78 Тенге Йымына шӱм пурыжы доно
мӓлӓннӓ кӱшӹц Ир Сотым колтен –
79 Тӹдӹжӹ пӹцкемӹшӹштӹ дӓ колымаш ӹмӹлӹштӹ
шӹнзӹшӹвлӓм сотемдӓрӓ
дӓ тыр корныш мӓмнӓн ашкылнам виктӓрӓ».
80 А тетя кушкын дӓ кӧргӹ шӱлӹшӹжӹ цаткыдемӹн. Израиль халык анзыкы лӓктӓш жеп шомешкӹ, тӹдӹ пустыньышты ӹлен. *5">1:5 Иерусалимӹштӹшӹ Йымын пӧртӹштӹ служышы священниквлӓ коклы нӹл сменеш пайылалтыныт. Нӹнӹ логӹц кӓндӓкшӹмшӹжӹ – Авийӹн сменыжы, анжы 1 Пар 24:10.
*1:9 Тӹтӹрӓш – обдать дымом, окуривать. *1:37 Тидӹм «Йымы ӹштен керддӹмӹ нимат уке» манынат ынгылаш лиэш.1 Ти жепӹн Август кесарь цилӓ мӱлӓндӹ мычкы халыкым шотлен сирӓш шӱден.
2 Ти пӹтӓришӹ шотлен сирӹмӓшӹм Квиринийӹн Сириштӹ вуйлатымыжы годым эртӓренӹт.
3 Цилӓн ӹшке вырлыкыштын халашкы сирӓлтӓш кенӹт.
4 Иосиф Давидӹн вырлыкшы гӹц ылын, седӹндон Галилейӹштӹшӹ Назарет хала гӹц Иудейӹшкӹ, Давидӹн Вифлеем лӹмӓн халашкыжы, кен.
5 Сирен шотлымашкы Иосиф тӹдӹлӓн сӧрӹмӹ Мария доно иквӓреш кен. Мария мӹшкӹрӓн ылын.
6 Вифлеемӹштӹ ылмышты годым Мариялан ӓзӓм ӹштӓш жеп шон.
7 Мария пӹтӓриш Тетяжӹм,* Эргӹм, ӹштен, Тӹдӹм савыцеш вӹдӹлӹн, шуды йӓшлӓш пиштен. Пӧртӹштӹ нӹнӹлӓн вӓр уке ылын.
8 Тӹ кымдемӹшток кӹтӧзӹвлӓ алыкышты ылыныт. Нӹнӹ йыдым кӹтӧм ороленӹт.
9 Трӱк анзыкышты Господьын Ангелжӹ лӓктӹн дӓ Господьын сотыжы нӹнӹм валгалтарен. Кӹтӧзӹвлӓ когон лӱдӹнӹт,
10 но Ангел келесен: «Идӓ лӱд! Мӹнь тӓлӓндӓ кого сусум увертӓрем, тидӹжӹ цилӓ халыклан ӹвӹртӹмӓш лиэш:
11 тагачы Давидӹн халаштыжы тӓлӓндӓ Ытарышы – Христос, Господь шачын.
12 Теве тӓлӓндӓ пӓлӹк: тӓ вӹдӹл пиштӹмӹ Ӓзӓм шуды йӓшлӓштӹ кишӹм мода».
13 Трӱк ти Ангел сага пӹлгомыштышы салтаквлӓ когон шукын лӓктӹнӹт, нӹнӹ Йымым хваленӹт:
14 «Йымылан кӱшнӹ лӹмлештӓрӹмӓш лижӹ!
Мӱлӓндӹ вӹлнӹ тыр,
эдемвлӓ доны Йымын пуры кымылжы!»
15 Ангелвлӓ нӹнӹ дорц пӹлгомыш пӧртӹлмӹкӹштӹ, кӹтӧзӹвлӓ икӹжӓк-иктӹштӹлӓн попенӹт: «Ӓлдӓ Вифлеемӹш кенӓ, Господь ма гишӓн увертӓрӹмӹм, тӹштӹ ма лимӹм, анжалына».
16 Нӹнӹ талашен лӓктӹнӹт, толмыкышты, Мариям, Иосифӹм дӓ шуды йӓшлӓштӹ кишӹ Ӓзӓм моныт.
17 Нӹнӹм ужмыкышты, ти Ӓзӓ гишӓн нӹнӹлӓн мам увертӓрӹмӹм келесенӹт.
18 Тидӹм колшывлӓ кӹтӧзӹвлӓн попымыштылан цилӓн когон ӧрӹнӹт.
19 А Мария цилӓ тидӹм йӓнгӹшкӹжӹ пиштен дӓ переген.
20 Ужмы-колмыштылан Йымым лӹмлештӓрен дӓ хвален, кӹтӧзӹвлӓ мӹнгеш пӧртӹлӹнӹт. Ангел попымы семӹньок цилӓ лин.
21 Кӓндӓкшӹмшӹ кечеш, кынам Ӓзӓлӓн пӹчмӹ овуцам эртӓрӓш жеп шон, Тӹдӹлӓн Иисус лӹмӹм пуэнӹт. Эче ӓвӓжӹ мӹшкӹрӓн лимешкок, Ангел Тӹдӹм тенге лӹмден.
22 Моисейӹн законжы семӹнь иреэммӹ овуцам эртӓрӹмӹ кечӹ шомыкы, Иисусым, Господь анзыкы кандаш манын, Иерусалимӹш канденӹт.
23 Господьын законыштыжы сирӹмӹ семӹнь, «сек анзыц шачшы цилӓ эргӹ ӓзӓ Господьлан айыралтшашлык».*
24 Господьын законышты келесӹмӹ семӹнь, жертва шотеш кок тыргӓдӹм* ӓли кок кӓдӹ игӹм пушашлык ылыныт.
25 Иерусалимӹштӹ Симеон лӹмӓн тӧр ӹштӹшӹ дӓ Йымым когон шотеш пиштӹшӹ пӱэргӹ ылын. Тӹдӹ Израильӹм ладнангдарымым уанен* вычен, дӓ вӹлнӹжӹ Святой Шӱлӹш ылын.
26 Господьын Христосым ужмешкӹ колымашым ат уж манын, Симеонлан Святой Шӱлӹш анзыцок увертӓрен.
27 Шӱлӹш кымылангдымы доно тӹдӹ Йымын пӧртӹш толын. Кынам Иисусын ӓтяжӹ дон Ӓвӓжӹ, законышты сирӹмӹ овуцам Тӹдӹн доно эртӓрӓш манын, Ӓзӓм тӹшкӹ канденӹт,
28 Симеон Тӹдӹм кидӹшкӹжӹ нӓлӹн дӓ Йымым хвален келесен:
29 «Ӹнде, Господь, шамакетӹм шоктен,
ӹшке цораэтӹм тыр доно колтет:
30 мӹньӹн сӹнзӓэм Тӹньӹн пумы ытарымашым ужы,
31 тӹдӹм тӹнь халыквлӓ анзылны йӓмдӹленӓт.
32 Тӹдӹ язычниквлӓлӓн тӧрӹм пачшы соты,
Тӹньӹн Израиль халыкетлӓн хвальымаш лиэш».
33 Ӓзӓ гишӓн попымы шамаклан Иосиф дон Ӓзӓн Ӓвӓжӹ ӧрӹнӹт.
34 Симеон нӹнӹм благословаен, а Ӓзӓн Мария Ӓвӓжӹлӓн келесен: «Теве Тӹдӹ верц Израильӹштӹ шукы эдем вален вацшашлык дӓ шукы эдем лӱктӓлтшӓшлык ылеш. Тӹдӹ кӹрмӓшӹмӓшӹм лыкшы пӓлӹк лиэш.
35 Тенге шукыштын йӓнгеш шӹлтӹмӹ шанымашышты пачылтеш. Тӹньӹнӓт йӓнгет вашт вырсы хӓдӹр лӓктеш».
36 Тӹшток Асир йых гӹц Фануилӹн ӹдӹржӹ, когон шонгы пророк Анна, ылын. Ӹдӹр курымжы эртӹмӹкӹ, Анна марыжы доно шӹм и ӹлен,
37 а вара кӓндӓкшлу нӹл и шомешкӹ* тылык ӹлен. Йымын пӧрт гӹц тӹдӹ карангде, постен дӓ йымыдылын, йыдет-кечет Йымылан служен.
38 Ти жепӹн Анна толын дӓ Йымым хвален, Иерусалимӹштӹ ытарымым вычышывлӓлӓн цилӓштӹлӓнӓт Иисус гишӓн попен.
39 Господьын законжы ядмым цилӓ ӹштӹмӹкӹ, нӹнӹ Галилейӹшкӹ, ӹшкӹмӹштӹн Назарет халашкы, пӧртӹлӹнӹт.
40 Тетя кушкын, кӧргӹ шӱлӹшӹжӹ цаткыдемӹн, ышым поген. Йымын пурылыкшы Тӹдӹн сага ылын.
41 Иисусын ӓтяжӹ дон Ӓвӓжӹ и йӹде Иерусалимӹш Когечӹ празныкыш каштыныт.
42 Тӹдӹлӓн луаткок и теммӹкӹ, нӹнӹ овуца семӹньок Иерусалимӹш празныкыш толыныт.
43 Празнык кечӹвлӓ пӹтӹмӹкӹ, нӹнӹ токышты кенӹт, а Ӹрвезӹ Иисус Иерусалимеш кодын. Тидӹм Иосиф дон Тӹдӹн Ӓвӓжӹ пӓлӹделыт,
44 Тӹдӹ иквӓреш каштшывлӓ сага ашкедеш машаненӹт. Тенге нӹнӹ кечӹ мыч кенӹт, вара Эргӹштӹм роднявлӓштӹ дӓ пӓлӹмӹвлӓ лошты кӹчӓлӓш тӹнгӓлӹнӹт.
45 Иисусым моделытат, Иерусалимӹш пӧртӹлӹнӹт дӓ Тӹдӹм тӹштӹ кӹчӓлӹнӹт.
46 Иисусым кым кечӹштӹ Йымын пӧртӹштӹ моныт. Тӹдӹ тымдышывлӓ лошты шӹнзен, нӹнӹм колыштын дӓ ядмашвлӓм пуэн.
47 Иисусым колыштшывлӓ цилӓн Тӹдӹн ынгылымашыжылан дӓ вӓшештӹмӹжӹлӓн ӧрӹнӹт.
48 Тӹдӹм ужмыкы, ӓтяжӹ дон Ӓвӓжӹ когон ӧрӹнӹт. Ӓвӓжӹ Тӹдӹлӓн попен: «Эргем, малан Тӹнь мӓ донна тенге ӹштенӓт? Мӓ ӓтят доно, когон тыргыжланен, Тӹньӹм кӹчӓлӹннӓ».
49 Тӹдӹ нӹнӹлӓн келесен: «Малан тӓ Мӹньӹм кӹчӓлӹндӓ? Ма Ӓтямӹн ылеш, Мӹньӹн тӹштӹ ылшашлыкем тӓ пӓлӹделда ма?»
50 Но нӹнӹ Тӹдӹн попымы шамаквлӓжӹм ынгылыделыт.
51 Иисус ӓтя дон Ӓвӓжӹ сага кеен, Назаретӹш пӧртӹлӹн дӓ цилӓ шотыштат шамакыштым колыштын. А Ӓвӓжӹ цилӓ ти шамаквлӓм йӓнгӹштӹжӹ переген.
52 Иисус кушкын дӓ ивлӓ теммӹ семӹнь ышым шӹнден. Тӹдӹм Йымат, эдемвлӓӓт утларак дӓ утларак яратенӹт.
*2:7 «Пӹтӓриш тетя» – грек шамак Тӹдӹ пӹтӓриш тетя манмын веле анжыкта; вес тетяжӹ ылын ӓли уке, ак анжыкты. *2:23 Исх 13:2,12. *2:24 Тыргӓдӹ – горлица, горлинка. *2:25 Уанаш – надеяться. *2:37 «Кӓндӓкшлу нӹл и шомешкӹ» – тӹдӹм грек йӹлмӹ гӹц «кӓндӓкшлу нӹл и» манын сӓрӓшӓт лиэш.1 Тиверий кесарь луатвӹзӹмшӹ и кугижӓлӓнӹмӹ годым, кынам Иудейӹм Понтий Пилат вуйлатен, Ирод Галилейӹн тетрархшы ылын, тӹдӹн Филипп ӹзӓжӹ – Итурейӹн дон Трахонит кымдемӹн, Лисаний – Авилинейӹн тетрархшы
2 дӓ Анна дон Каиафа архиерей ылыныт, пустыньышты Захарийӹн Иоанн эргӹжӹлӓн Йымы гӹц шамак ылын.
3 Тӹдӹжӹ Иордан рекӓ кымдемӹштӹ цилӓ вӓрӹм эртен дӓ, сулыкыштым простьыкташ манын, сулык гӹц карангаш крестӓлтӓш тымден.
4 Исаия пророкын шамакшым сирӹмӹ книгӓштӹ кыце келесӹмӹ, тенгеок ылын:
«Пустыньышты саслышын юкшы шакта:
Господьлан корным йӓмдӹлӹдӓ!
Тӹдӹн ялгорныжым тӧрӹм ӹштӹдӓ:
5 цилӓ карем мӱдӓлтшӹ,
а кӱкшикӓ вӓр дӓ кырык изиэмӹштӹ,
какляка корнывлӓ виӓнӹштӹ,
лаксакан корнывлӓ тӧр лиштӹ –
6 Йымын ытарымашыжым цилӓ ӹлӹшӹ ужеш».*
7 Крестӓлтӓш толшы эдемвлӓлӓн Иоанн попен: «Шим кӹшкӹ гӹц шачшывлӓ! Анзыкыла лишӓшлык шӹдӹ гӹц ытлен кыргыжаш кӱ тӓлӓндӓ ышым пуэн?
8 Сулыкым простьыктен, Йымы докы сӓрнӓлмӹлӓндӓ келшен толшы кӹцкӹм шачыктыда дӓ, ”Мӓмнӓн ӓтянӓ Авраам” манын, ӹшке кӧргӹштӹдӓ шанаш идӓ тӹнгӓл. Тӓлӓндӓ попем: Йымы теве ти кӱвлӓ гӹц Авраамын тетявлӓм ӹштен кердеш.
9 Ӹнде пушӓнгӹ тӹнгӹштӹ тавар йӓмдӹ киӓ: пуры кӹцкӹм ӹштӹдӹмӹ цилӓ пушӓнгӹм роат дӓ тылыш шуат».
10 «Мам мӓлӓннӓ ӹштӓш?» – тӹдӹ гӹц халык ядыштын.
11 Иоанн вӓшештен: «Кӱн кок выргемжӹ улы, иктӹжӹм выргемдӹмӹ эдемлӓн пужы. Кӱн качкышыжы улы, тенгеок ӹштӹжӹ».
12 Лӹм оксам погышывлӓӓт крестӓлтӓш толыныт. Нӹнӹ тӹдӹ гӹц ядыныт: «Тымдышы, мӓлӓннӓ мам ӹштӹмӹлӓ?»
13 Тӹдӹ вӓшештен: «Тӓлӓндӓ пӓлдӹртӹмӹ гӹц утыжым нимамат идӓ тергӹ».
14 Салтаквлӓ тӹдӹ гӹц ядыныт: «А мӓлӓннӓ мам ӹштӓш?» Тӹдӹ келесен: «Иктӹмӓт идӓ пӹзӹрӹ, йӓлӹм идӓ кравы, пӓшӓдӓрдӓ доно келшӹдӓ».
15 Халык Христосым когон вычен, Иоанн гишӓн, Христос агыл вӓл манын, цилӓн йӓнгӹштӹштӹ шаненӹт.
16 Но Иоанн цилӓлӓн келесен: «Мӹнь тӓмдӓм вӹд доно крестем, но мӹнь гӹцем Силанрак толеш. Мӹнь Тӹдӹн ялеш чимӹ хӓдӹржӹн кӓндӹрӓжӹм шӱтӓшӓт ам яры. Тӹдӹ тӓмдӓм Святой Шӱлӹш дӓ тыл доно крестӓш тӹнгӓлеш.
17 Тӹдӹн кидӹштӹжӹ пуалтымы кольмы, йӹдӹмжӹм итӹрӓйӓ дӓ шӓдӓнгӹм кӹлӓтӹшкӹжӹ пога, а ӓрвӓжӹм йӧртӓш лидӹмӹ тылеш йылата».
18 Халыклан шукым тымден, Иоанн Пуры Уверӹм шӓрен.
19 А Ирод тетрархым ӹшке шӱмбелжӹн Иродиада вӓтӹжӹ доно ӹлӹмӹжӹлӓн дӓ молы худа пӓшӓжӹлӓн Иоанн йӓтлен попенӓт,
20 тӹдӹм кызаматыш Ирод питӹрен, ӹшке худа пӓшӓшкӹжӹ тидӹмӓт ушен.
21 Цилӓ халык крестӓлтмӹ годым Иисусат крестӓлтӹн, а ыдылмыжы годым пӹлгом пачылтын,
22 кӓдӹлӓ кайшы кӓп доно Тӹдӹн вӹкӹ Святой Шӱлӹш вален. Пӹлгом гӹц юк шактен: «Тӹнь Мӹньӹн яратымы Эргем ылат, Тӹнь донет Мӹньӹн пуры кымылем!»
23 Ӹшке служымыжым тӹнгӓлмӹ годым Иисуслан кымлы и нӓрӹ ылын. Тӹдӹ Иосифӹн Эргӹжӹ ылеш манын шаненӹт. Иосифӹн ӓтяжӹ Илий ылын,
24 тӹдӹжӹн – Матфат, Левий, Мелхий, Ианнай, Иосиф,
25 Маттафий, Амос, Наум, Еслим, Наггей,
26 Мааф, Маттафий, Семей, Иосих, Иуда,
27 Иоаннан, Рисай, Зоровавель, Салафиил, Нирий,
28 Мелхий, Аддий, Косам, Елмодам, Ир,
29 Иосий, Елиезер, Иорим, Матфат, Левий,
30 Симеон, Иуда, Иосиф, Ионан, Елиаким,
31 Мелеай, Маинан, Маттафай, Нафан, Давид,
32 Иессей, Овид, Вооз, Салмон, Наассон,
33 Аминадав, Арам, Есром, Фарес, Иуда,
34 Иаков, Исаак, Авраам, Фарра, Нахор,
35 Серух, Рагав, Фалек, Евер, Сала,
36 Каинан, Арфаксад, Сим, Ной, Ламех,
37 Мафусал, Енох, Иаред, Малелеил, Каинан,
38 Енос, Сиф, Адам, Йымы.
*3:4-6 Ис 40:3-5.1 Святой Шӱлӹш доно темӹн, Иисус Иордан рекӓ гӹц пӧртӹлӹн, дӓ Тӹдӹм Шӱлӹш пустыньыш нӓнген.
2 Тӹштӹ Тӹдӹм нӹллӹ кечӹ диавол терген. Ти кечӹвлӓн Иисус нимат качде, но ти кечӹвлӓ эртымӹкӹ, шужымыжым шижӹн.
3 Диавол Тӹдӹлӓн попен: «Тӹнь Йымын Эргӹ ылат гӹнь, ти кӱлӓн киндӹш сӓрнӓлтӓш шӱдӹ».
4 Иисус вӓшештен: «Сирӹмӹ: ”Киндӹ доно веле агыл, Йымын каждый шамакшы доно эдем ӹлӓ”».*
5 Тӹдӹм диавол кӱкшӹ кырыкыш кузыктен дӓ улы сӓндӓлӹкӹн цилӓ кугижӓншӹм икмӓгӓлӹштӹ анжыктенӓт,
6 келесен: «Мӹнь Тӹньӹн кидӹшкет цилӓ ти кугижӓншӹвлӓм дӓ нӹнӹн лӹмлештӓрӓлтмӹштӹм пуэм. Цилӓ тидӹ мӹлӓм пуалтын, а мӹнь, кӱлӓн шанем, тӹдӹлӓн пуэн кердӓм.
7 Мӹнь анзылнем Тӹнь кымалат гӹнь, цилӓжӓт тидӹ Тӹньӹн лиэш».
8 Иисус тӹдӹлӓн келесен: «Каранг Мӹнь дорцем, сатана! Сирӹмӹ:
”Господь Йыметлӓн кымал,
ик Тӹдӹлӓн веле служы”».*
9 Тӹдӹм Иерусалимӹш сатана нӓнген, Йымын пӧрт левӓш тӹрӹш шагалтен дӓ келесен: «Тӹнь Йымын Эргӹ ылат гӹнь, тишец ӱлӹк тӹргештӹ.
10 Сирӹмӹ вет:
”Тӹдӹ Ангелвлӓжӹлӓн Тӹньӹм перегӓш шӱдӓ:
11 ялет доно кӱэш ит шӹртньӹ манын,
нӹнӹ Тӹньӹм кидешӹштӹ намал кеӓт”».*
12 Иисус келесен: «Келесӹмӹ: ”Господь Йыметӹм ит тергӹ”».*
13 Терген пӹтӓрӹмӹкӹ, диавол Тӹдӹ гӹц жепеш карангын.
14 Иисус Галилейӹш пӧртӹлӹн, Святой Шӱлӹшӹн силажы Тӹдӹн сага ылын. Тӹдӹ гишӓн йӹрвӓш попенӹт.
15 Иисус нӹнӹн синагогвлӓштӹ тымден, дӓ Тӹдӹм цилӓн хваленӹт.
16 Иисус Назаретӹш толын – ти халашты Тӹдӹм анжен куштенӹт – дӓ молнамшы семӹньок кукшыгечӹн синагогыш пырен. Тӹдӹ Писаним лыдаш шагалын.
17 Иисуслан Исаия пророкын книгӓжӹм пуэнӹт. Тӹдӹм пачын дӓ тенге сирӹмӹ вӓрӹм мон:
19 (18-19) «Господьын Шӱлӹшӹжӹ Мӹнь вӹлнем –
Тӹдӹ Мӹньӹм незервлӓлӓн Пуры Уверӹм шӓрӓш шӹрен пӓлемден,
тодылалтшы кымыланвлӓм паремдӓш колтен.
Кычен питӹрӹмӹвлӓлӓн ирӹкӹш колтымы гишӓн,
слӧпӧйвлӓлӓн сӹнзӓштӹ пачылтмы гишӓн увертӓрӓш,
пӹзӹрӓлтшӹвлӓм ирӹкӹш лыкташ,
Господьын пумы пуры ижӹ толмы гишӓн увертӓрӓш
Тӹдӹ Мӹньӹм колтен».*
20 Иисус книгӓм чӱчӹн, синагогышты служышылан пуэн дӓ шӹнзӹн. Синагогышты цилӓ ылшывлӓн сӹнзӓштӹ Тӹдӹ вӹкӹ анжен.
21 Иисус попаш тӹнгӓлӹн: «Тагачы тӓмдӓн колыштмы ти сирӹмӓш ӹнде шокталты».
22 Цилӓн Тӹдӹм хваленӹт дӓ Тӹдӹн йӹлмӹжӹ гӹц лӓкшӹ пуры шамакшылан когон ӧрӹнӹт. Нӹнӹ попенӹт: «Тӹдӹ Иосифӹн эргӹжок агыл?»
23 Иисус нӹнӹлӓн келесен: «Тӓ, конешны, Мӹлӓм халык шаям келеседӓ: ”Паремдӹшӹ, Ӹшкӹметӹм Ӹшке паремдӹ! Капернаумышты ма ылмым мӓ колынна, тӹдӹмок тиштӹ, кушмы кымдемӹштетӓт, ӹштӹ”.
24 Тӓлӓндӓ лачок попем, – Иисус пакылажы попен, – нимахань пророкым ӹшке кушмы кымдемӹштӹжӹ ак жеплеп.
25 Лачокым келесем: Илия ӹлӹмӹ годым, кынам пӹлгом питӹрнӓлтӹн, кым и дӓ куд тӹлзӹ юр юрде дӓ улы мӱлӓндӹ мычкы кого шужымаш тӹнгӓлӹн, Израильӹштӹ шукы тылык ӹдӹрӓмӓш ылын,
26 но нӹнӹ логӹц иктӹн докат Илия колтымы ылде, а Сидоныштышы Сарепташты ӹлӹшӹ тылык ӹдӹрӓмӓш докы веле колтымы.
27 Елисей пророк ӹлӹмӹ годымат Израильӹштӹ проказа церӓн эдем шукы ылын, но нӹнӹ логӹц иктӓт ирӹктӓлтде, лач Сири гӹц толшы Нееман веле».
28 Тидӹм колмыкы, синагогышты цилӓн когон шӹдешкенӹт,
29 кӹньӹлӹнӹт дӓ Иисусым хала гӹц поктен лыктыныт. Нӹнӹн халашты кырык вӹлнӹ ылын. Иисусым ӱлӹк шӹкӓл шуаш манын, кырык нерӹш нӓнгенӹт,
30 но Тӹдӹ нӹнӹн покшец эртен кен дӓ карангын.
31 Галилейӹштӹшӹ Капернаум халаш Иисус толын дӓ кукшыгечӹн халыкым тымден.
32 Тымдымыжылан цилӓн ӧрӹнӹт. Тӹдӹн шамакшы властян ылын.
33 Синагогышты йӹрнӹк иӓ шӱлӹш доно мутьымы эдем ылын, дӓ тӹдӹ улы юк доно сӹгӹрӓл колтен:
34 «Назарет Иисус, мӓмнӓм коды, мам Тӹнь мӓ донна ӹштӹнет? Тӹнь мӓмнӓм пӹтӓрӓш толынат? Кӱ ылметӹм мӹнь пӓлем, Тӹнь Йымын Святойжы ылат!»
35 Но Иисус худа шӱлӹшӹм цӓрен келесен: «Шӹп ли! Кӧргӹжӹ гӹц лӓк!» Иӓ ти эдемӹм синагог покшалан йӧрӹктен дӓ, нимахань эксӹкӹм ӹштӹде, тӹдӹн кӧргӹжӹ гӹц лӓктӹн.
36 Цилӓн ӧрӹн-лӱдӹн шагалыныт дӓ иктӹ-весӹштӹлӓн попенӹт: «Тидӹ ма техеньӹ! Тӹдӹ сила дӓ власть доно худа шӱлӹшвлӓлӓн шӱдӓ, а нӹнӹжӹ лӓктӹт».
37 Тӹдӹ гишӓн йӹрӹм-йӹр цилӓ вӓрвлӓшкӹ шамак шӓрлен.
38 Иисус синагог гӹц лӓктӹн дӓ Симонын пӧртӹшкӹжӹ пырен. Симонын кувыжы шокшымыж доно когон орланен, дӓ Иисус гӹц тӹдӹлӓн палшаш ядыныт.
39 Иисус тӹдӹн докы лишемӹн дӓ шокшымыжлан лӓктӓш шӱден. Цер ӹдӹрӓмӓш гӹц карангын. Ӹдӹрӓмӓш тӹнӓмок кӹньӹлӹн дӓ хынавлӓм анжаш тӹнгӓлӹн.
40 А кӱн шукы йиш цер доно орланышы лишӹл эдемжӹ ылын гӹнь, кечӹ шӹцмӹ годым цилӓн Иисус докы нӹнӹм канденӹт. Тӹдӹжӹ цилӓ церлӹ вӹкӹ кидӹм пиштен дӓ паремден.
41 Тенгеок шукыштын кӧргӹштӹ гӹц иӓвлӓ лӓктӹнӹт дӓ сасленӹт: «Тӹнь Христос, Йымын Эргӹ ылат!» Нӹнӹ Тӹдӹн Христос ылмыжым пӓленӹт, седӹндон Иисус нӹнӹм цӓрен дӓ тенге попаш ирӹкӹм пуде.
42 Ирок ирӹ пӧрт гӹц лӓктӹн, Иисус йӓрӓ вӓрӹш кен. Халык Тӹдӹм кӹчӓлӹн. Кӹчӓл момыкы, Иисус нӹнӹ дорц ӹнжӹ ке манын, цӓрӓш цаценӹт.
43 Но Тӹдӹ «Мӹнь Йымын Кугижӓншӹ гишӓн Пуры Уверӹм вес халавлӓштӓт шӓрӹшӓшлык ылам, тидӹлӓн Мӹньӹм колтымы» манын
44 дӓ Галилейӹштӹшӹ синагогвлӓштӹ увертӓрен тымден.
*4:4 Втор 8:3. *4:8 Втор 6:13, 10:20. *4:10-11 Пс 90:11-12. *4:12 Втор 6:16. *4:18-19 Ис 61:1-2, 58:6.1 Икӓнӓ Иисус Геннисарет йӓр тӹрӹштӹ шалген, а халык, Йымын шамакым колаш манын, Тӹдӹм йӹрвӓш пӹзӹрен.
2 Сирӹштӹ Иисус кок пышым ужын. А пыш гӹц лӓкшӹ коллоэцвлӓ вӓпшӹштӹм мышкыныт.
3 Ик пышыжы Симонын ылын. Иисус тӹшкӹ шӹнзӹн дӓ сир гӹц изиш карангаш ядын, пыш гӹц эдемвлӓм тымден.
4 А вара, попен цӓрнӹмӹкӹ, Симонлан келесен: «Келгӹрӓк вӓрӹш ке. Колым кычаш тӹшӓк вӓпшвлӓдӓм шуда».
5 «Тымдышы, – попен Симон, – мӓ йыдвашт лоэннӓ дӓ нимамат кычыделна. Но Тӹнь келесет гӹнь, мӹнь вӓпшвлӓм шуэм».
6 Нӹнӹ тенгеок ӹштенӹт дӓ тӹнӓр шукы колым кыченӹт, вӓпшвлӓштӓт вӓк кышкедӓлтӓш тӹнгӓлӹнӹт.
7 Палшаш толышты манын, вес пышышты ылшы тӓнгвлӓштӹм, кидӹм лыпшен, ӱжӹнӹт. Нӹнӹ толыныт. Кок пышге кол доно тенге теменӹт, вӹдӹш валаш тӹнгӓлӹнӹт.
8 Тидӹм ужмыкы, Иисус анзылан Симон-Петр сукалтен вазын дӓ келесен: «Господь, мӹнь дорцем каранг, мӹнь сулыкан эдем ылам!»
10 (9-10) Симон дӓ цилӓн, кӱ тӹдӹн доно иквӓреш ылын – тенгеок тӓнгвлӓжӹ, Зеведейӹн Иаков дон Иоанн эргӹвлӓжӹ – тинӓр шукы кычымылан ӧрӹн-лӱдӹн шагалыныт. Но Иисус Симонлан келесен: «Ит лӱд. Ӹнде тӹнь эдем лошы лиӓт».
11 Вара, кок пышге сирӹш шыпшын лыкмыкы, нӹнӹ цилӓ коденӹт дӓ Иисус паштек кенӹт.
12 Икӓнӓ Иисусын ик халашты ылмыжы годым цилӓ кӓпге проказа церӓн эдем толын. Иисусым ужмыкы, анзыланжы кымал вазын дӓ сарвален ядын: «Господь, паремдӹнет гӹнь, мӹньӹм ирӹктен кердӓт».
13 Иисус кидӹм виктӓлтен, тӹдӹм тӹкӓлӹн дӓ келесен: «Паремдӹнем, ирӹктӓлт». Тӹнӓмок проказа цержӹ пӹтен.
14 Иисус тидӹ гишӓн иктӹлӓнӓт попаш шӱдӹде дӓ тӹдӹлӓн келесен: «Ке, ӹшкӹметӹм священниклӓн анжыкты. Иреэммет лӹмеш Моисейӹн шӱдӹмӹжӹ семӹнь жертвӹм пу. Тидӹн доно тӹнь паремметӹм анжыктет».
15 Но Иисус гишӓн шая утларак веле шӓрлен, пиш шукы халык Тӹдӹм колышташ дӓ ӹшке церӹштӹм паремдӹктӓш толын.
16 Но Тӹдӹ шӹренок йӓрӓ вӓрӹш кеен дӓ ыдылын.
17 Ик кечӹн, кынам Иисус тымден, Тӹдӹм колыштшывлӓ лошты Галилей дон Иудейӹштӹшӹ цилӓ сола гӹц дӓ Иерусалим гӹц толшы фарисей дон закон тымдышывлӓ шӹнзенӹт. Господьын силажы церлӹвлӓм паремдӹмӓштӹ пӓлдӹрнен.
18 Теве пӱэргӹвлӓ, шӓрӹшеш намалын, пларичӓн эдемӹм канденӹт дӓ, Иисус анзык пиштӓш манын, пӧртӹш пырташ цаценӹт.
19 Халык шукы ылынат, намал пыртен кердделыт. Нӹнӹ пӧрт вӹкӹ кузенӹт, левӓшӹштӹ ыражым ӹштенӹт дӓ тӹдӹм эдемвлӓ покшакы Иисус анзыкы шӓрӹшӹжӹге валтенӹт.
20 Нӹнӹн ӹнянӹмӹштӹм ужын, Иисус тӹ эдемлӓн келесен: «Тӹньӹн сулыкет простялтеш».
21 Закон тымдышывлӓ дӓ фарисейвлӓ шанаш тӹнгӓлӹнӹт: «Йымым мыскылышыжы кӱ тидӹ техень? Йымы гӹц молы кӱ сулыкым простен кердеш?»
22 Иисус, нӹнӹн шанымыштым пӓленӓт, вӓшештен: «Тӓ йӓнгӹштӹдӓ мам шанедӓ?
23 Мажым куштылгырак келесӓш: ”Тӹньӹн сулыкет простялтеш” ӓли ”Кӹньӹл дӓ ашкед” манаш?
24 Но тӓ пӓлӹдӓ: Эдем Эргӹн мӱлӓндӹ вӹлнӹ сулыкым простяш властьшы улы». Пларичӓн эдемлӓн Иисус келесен: «Тӹлӓт попем: кӹньӹл, шӓрӹшетӹм нӓл дӓ токет ке».
25 Церлӹ тӹнӓмок нӹнӹн анзылны кӹньӹлӹн, шӓрӹшӹжӹм нӓлӹн дӓ, Йымым лӹмлештӓрен, токыжы ашкедӹн.
26 Цилӓм кого лӱдмӓш ӓвӓлтен,* цилӓн Йымым лӹмлештӓренӹт дӓ лӱдӹн попенӹт: «Тагачы мӓ цӱдейӹмӓн пӓшӓвлӓм ужна».
27 Тидӹн паштек Иисус лӓктӹн дӓ лӹм оксам погымы вӓрӹштӹ шӹнзӹшӹ Левий лӹмӓн ясак погышым ужын. Тӹдӹлӓн келесен: «Паштекем ке».
28 Тӹдӹ, кӹньӹлӹн, цилӓ коден дӓ Иисус паштек кен.
29 Левий тоныжы Тӹдӹм когон хыналыктен. Тӹштӹ нӹнӹ сага лӹм оксам погышывлӓ дӓ молат шукын иквӓреш качкыныт.
30 Закон тымдышывлӓ дӓ фарисейвлӓ Иисусын тыменьшӹвлӓжӹлӓн ӧпкӓлен попенӹт: «Малын тӓ лӹм оксам погышывлӓ дӓ сулыканвлӓ доно иквӓреш качкыда дӓ йӱдӓ?»
31 Иисус нӹнӹлӓн келесен: «Шулыкан эдемлӓн агыл паремдӹшӹ келеш, а церлӹлӓн.
32 Мӹнь тӧр ӹштӹшӹвлӓм агыл, а сулыканвлӓм сулыкыштым простьыкташ дӓ Йымы докы сӓрнӓлӓш ӱжӓш толынам».
33 Иисуслан келесенӹт: «Малын Иоаннын тыменьшӹвлӓжӹ шӹрен постят дӓ йымыдылыт, фарисейвлӓнӓт тенгеок ӹштӓт, а Тӹньӹн – качкыт дӓ йӱт?»
34 Иисус нӹнӹлӓн келесен: «Сагашты армары ылмы годым сӱӓнӹш толшы хынавлӓм постьыктен кердӹдӓ ма?
35 Но техень жеп толын шоэш, кынам армарым нӹнӹ дорц нӓлӹт, тӹнӓм нӹнӹ тӹ кечӹвлӓн постяш тӹнгӓлӹт».
36 Нӹнӹлӓн эче тыштен келесен: «У выргем гӹц кышкед нӓлӹн, тошты выргемӹш иктӓт тумышым ак шӹндӹ – ужымат кышкедеш, тоштыжыланат у мӹнер доно ӹштӹмӹ тумыш ак яры.
37 Шун шоктыдымы якшар ӓрӓкӓм иктӓт тошты шувышыш ак опты – шун шоктыдымы ӓрӓкӓ шувышым кышкедеш, ӹшкежӓт йога, шувышыжат ярдымы лиэш.
38 Шун шоктыдымы ӓрӓкӓм у шувышыш опталмыла. Тӹнӓм нӹнӹ коктынат перегӓлтӹт.
39 А тошты ӓрӓкӓм йӱмӹкӹ, иктӹнӓт у ӓрӓкӓм тӹнӓмок йӱмӹжӹ ак шо, вет попа: ”Тоштыжы яжорак”».
*5:26 Ӓвӓлтӓш – охватить.1 Когечӹн кокшы кечӹжӹ паштек пӹтӓриш кукшыгечӹн Иисус шурны ныр гач кен. Тыменьшӹвлӓжӹ пӹрцӹ вуйвлӓм кӹрӹнӹт дӓ, кидеш тыржын, качкыныт.
2 Юж фарисейжӹ попен: «Малын тӓ кукшыгечӹн ӹштӓш шӱдӹдӹмӹм ӹштедӓ?»
3 Иисус нӹнӹлӓн келесен: «Ӹшкежӓт, сагажы ылшывлӓӓт шужымыкы, Давид мам ӹштӹмӹ гишӓн тӓ лыдделда ма?
4 Жертвӹш кандымы киндӹм священник гӹц молылан иктӹлӓнӓт качкаш ак яры ылын гӹнят, тӹдӹ Йымын пӧртӹш пырен, ти киндӹм нӓлӹн дӓ качкын, сагажы ылшывлӓлӓнӓт пуэн».
5 Вара нӹнӹлӓн келесен: «Эдем Эргӹ кукшыгечӹлӓнӓт хоза ылеш».
6 Вес кукшыгечӹнӓт Иисус синагогыш пырен дӓ тымден. Тӹштӹ ик эдем ылын, тӹдӹн вургымла кидшӹ кошкышы ылын.
7 Закон тымдышывлӓ дӓ фарисейвлӓ Иисусым йӓтлӓш йӧнӹм кӹчӓлӹнӹт, кукшыгечӹнӓт паремдӓ ма манын, паштекшӹ ороленӹт.
8 Но Иисус, нӹнӹн шанымашыштым пӓлен, кошкышы кидӓн эдемлӓн келесен: «Кӹньӹл дӓ анзыкы лӓк». Тӹдӹ кӹньӹлӹн дӓ анзыкы лӓктӹн.
9 Тӹнӓм Иисус нӹнӹлӓн келесен: «Мӹнь тӓ гӹцдӓ ядам: мам кукшыгечӹн ӹштӓш лиэш? Пурым ӓли худам? Ӹлӹмӓшӹм ытараш ӓли пӹтӓрӓш?» Нӹнӹ пелештӹде шалгенӹт.
10 Иисус цилӓштӹ вӹкӹ анжалын дӓ тӹ эдемлӓн манын: «Кидетӹм виктӓлтӹ». Тӹдӹ тенгеок ӹштен, кидшӹ весӹжӹ ганьок шу лин.
11 Нӹнӹн кӧргӹштӹштӹ шӹдӹ темӹн, дӓ Иисус доно мам ӹштӓш манын ӹшке лоштышты попенӹт.
12 Ти кечӹвлӓн Иисус кырыкыш ыдылаш кузен дӓ ти йыдым Йымылан ыдыл эртӓрен.
13 А кынам сотемӹн, ӹшке тыменьшӹвлӓжӹм ӱжӹн дӓ нӹнӹ логӹц луаткоктым айырен нӓлӹн. Нӹнӹм Апостол манын лӹмден:
14 Симоным – тӹдӹмок Петр манын лӹмден, – тӹдӹн Андрей шоляжым, Иаковым, Иоанным, Филиппӹм, Варфоломейӹм,
15 Матфейӹм, Фомам, Алфейӹн эргӹжӹ Иаковым, Зилот манмы Симоным,
16 Иаковын эргӹжӹ Иудам дӓ Искариот Иудам. Тидӹжӹ вара Иисусым выжалышы лин.
17 Нӹнӹ доно иквӓреш валымыкы, Иисус тӧр вӓреш шагалын. Пиш шукы тыменьшӹвлӓжӹ дӓ цилӓ Иудей гӹц, Иерусалим гӹц, тангыж тӹрӹштӹшӹ Тир дон Сидон вӓрвлӓ гӹц шукы халык Тӹдӹн доно иквӓреш ылыныт.
18 Нӹнӹ Иисусым колышташ дӓ цер гӹц паремдӹктӓш толыныт. Худа шӱлӹш гӹц орланышывлӓӓт паремӹнӹт.
19 Иисус гӹц сила лӓктӹн шалген дӓ цилӓм паремден, седӹндон улы халык Тӹдӹн тервен тӹкнӓш цацен.
20 Тыменьшӹвлӓжӹ вӹкӹ анжен, Иисус попаш тӹнгӓлӹн:
«Тӓ, ӹшкӹмдӓм Йымы анзылны изиэш ужшывлӓ,
пуры цӓшӓн ылыда:
Йымын Кугижӓншӹ тӓмдӓн улы.
21 Тӓ, кӹзӹт шужышывлӓ, пуры цӓшӓн ылыда:
тӓ темӹдӓ.
Тӓ, кӹзӹт мӓгӹрӹшӹвлӓ, пуры цӓшӓн ылыда:
тӓ сусун ваштылаш тӹнгӓлӹдӓ.
22 Кынам Эдем Эргӹ верц эдемвлӓ тӓмдӓм ужын керддӹмӹ лит, кынам ӹшке дорцынышты карангдат, вырсат дӓ эче лӹмдӓмӓт худаэш ужыт – тӓ пуры цӓшӓн ылыда.
23 Ти кечӹн сусу лидӓ, ӹвӹртӹдӓ! Тӓлӓндӓ пӹлгомышты кого тӓр лиэш. Пророквлӓ донат ӓтявлӓштӹ тенге ӹштенӹт.
24
А паянвлӓ, ойхы тӓлӓндӓ:
тӓ ӹшке сусудам нӓлӹндӓ!
25 Кӹзӹт темшӹвлӓ, ойхы тӓлӓндӓ:
тӓ шужаш тӹнгӓлӹдӓ.
Кӹзӹт ваштылшывлӓ, ойхы тӓлӓндӓ:
тӓ ойхыраш дӓ мӓгӹрӓш тӹнгӓлӹдӓ!
26 Кынам тӓмдӓм цилӓ эдем хваля – ойхы тӓлӓндӓ: нӹнӹн ӓтявлӓштӹ алтанзык пророквлӓм тенгеок хваленӹт.
27 Но тӓлӓндӓ, кӱ Мӹньӹм колыштеш, попем: ӹшке тышмандам яратыда, тӓмдӓм ужын керддӹмӹвлӓлӓн пурым ӹштӹдӓ,
28 кӱ тӓмдӓм шудалеш, тӹдӹлӓн пурым согоньлыда, кӱ тӓмдӓм вырса, тӹдӹн верц йымыдылда.
29 Кӱ тӹньӹм ик шӹргет гӹц сава, весӹжӹмӓт тӹдӹлӓн сӓрӓл, дӓ вӹлвӓл выргеметӹм нӓлшӹлӓн тыгырым нӓлмӹжӹлӓнӓт ит торешлӓнӹ.
30 Тӹнь гӹцет ядшылан цилӓлӓн пу, а кӱ тӹньӹнӹм нӓлеш, мӹнгеш ит яд.
31 Эдемвлӓлӓн ӹшкӹлӓндӓ мам ӹштӹктӹнедӓ, ӹшкежӓт нӹнӹлӓн тенгеок ӹштӹдӓ.
32 Тӓмдӓм яратышым яратедӓ гӹнь, тӓлӓндӓ тидӹлӓнжӹ малын таум ӹштӹмӹлӓ? Сулыканвлӓӓт, кӱ нӹнӹм ярата, тӹдӹмок ярататыш.
33 Кӱ тӓлӓндӓ пурым ӹштӓ, тӓӓт нӹнӹлӓн пурым ӹштедӓ гӹнь, тӓлӓндӓ тидӹлӓнжӹ малын таум ӹштӹмӹлӓ? Сулыканвлӓӓт тенге ӹштӓт.
34 Кӱ гӹц мӹнгеш нӓлӹн кердмӹлӓн ӹнянедӓ дӓ тӹдӹлӓн веле кӱсӹн пуэдӓ гӹнь, тӓлӓндӓ тидӹлӓнжӹ малын таум ӹштӓш? Тӹнӓрок мӹнгеш нӓлӓш манын, сулыканвлӓӓт сулыканвлӓлӓн кӱсӹн пуат.
35 А тӓ ӹшке тышмандам яратыда, пурым ӹштӹдӓ, мӹнгеш нӓлӓш шаныде, кӱсӹн пуда. Тӹнӓм тӓлӓндӓ кого тӓр лиэш, дӓ тӓ Кӱшнӹшӹ Йымын тетяжӹ лидӓ. Тӹдӹ таум ӹштӹдӹмӹвлӓ дӓ худавлӓ докы пуры.
36 Тенгежӹ, ӹшке Ӓтядӓ ганьок ӹжӓлӓйӹшӹ лидӓ.
37 Иктӹмӓт идӓ суйы – тӓӓт ада суялт, иктӹмӓт вуйнаматаныш идӓ лык – тӓӓт ада лыкталт. Тӓ простьыда – тӓмдӓнӓт сулыкда простялтеш.
38 Пуда – тӓлӓндӓӓт пуалтеш. Темден, шӹшкӹн, тӹргач оптымы циц висӓ доно тӓлӓндӓ пуалтеш. Махань висӓ доно тӓ виседӓ, тӓлӓндӓӓт техень висӓ донок висӓлтеш».
39 Иисус нӹнӹлӓн тенге тыштен попен: «Слӧпӧй слӧпӧйӹм видӹшӹ лин кердеш ма? Нӹнӹ коктынат йӓмӹш ак кенвазеп ма?
40 Тыменьшӹжӹ тымдышыжы гӹц кого агыл, а тымень пӹтӓрӹмӹкӹжӹ, каждыйжы тымдышыжы гань лиэш.
41 Кыце тӹнь шӱмбелетӹн сӹнзӓштӹжӹ сӱкӹм ужат, а ӹшкӹметӹнӹштӹ пренямӓт ат шиж?
42 Ӓли кыце тӹнь шӱмбелетлӓн ”Тӓнгем, пу йӓ, мӹнь сӹнзӓэт гӹц сӱкӹм лыктам” манын попен кердӓт, кынам ӹшке сӹнзӓштет преням ат уж? Яжон каяш цацышы! Пӹтӓри ӹшке сӹнзӓ гӹцет преням лык, вара веле, шӱмбелетӹн сӹнзӓжӹ гӹц сӱкӹм кыце лыкмыла, ужат.
43 Ярдымы кӹцкӹм пушы яжо пушӓнгӹ уке, яжо кӹцкӹм пушы ярдымы пушӓнгӓт уке.
44 Хоть-махань пушӓнгӹм кӹцкӹжӹ доно пӓлӓт. Имӓн тӹшкӓ гӹц смоквам, писӓн гӹц виноградым ак погеп.
45 Пуры эдем шӱм пайдажы гӹц пурым лыктеш, худа эдем шӱм кӧргӹ худажы гӹц худам лыктеш. Вет эдемӹн шӱмжӹ ма доно темӹн, тӹдӹмок йӹлмӹжӹ попа.
46 Мӹньӹм малын ”Господь, Господь!” манын ӱжӹдӓ, а мам шӱдем, тӹдӹм ада ӹштӹ.
47 Мӹнь докем толшы, шамакем колыштшы дӓ тӹдӹм шоктышы эдем кӱ гань ылеш? Мӹнь тидӹм тӓлӓндӓ келесем.
48 Тӹдӹ пӧртӹм ӹштӹшӹлӓ келгӹ йӓмӹм капайышы дӓ кӱ вӹлӓн негӹцӹм пиштӹшӹ эдем ганьы. Полой годым ти пӧрт вӹкӹ вӹд шынгалтын, но тӹдӹм тӓрвӓтен кердде, вет пӧртӹн негӹцшӹ кӱ вӹлӓн пиштӹмӹ.
49 А Мӹньӹн шамакем колыштшы, но тӹдӹм шоктыдымы эдем – негӹцде рок вӹлӓн пӧртӹм ӹштӹшӹ эдем ганьы. Пӧрт вӹкӹ полой вӹд шынгалтын, дӓ пӧрт тӹнӓмок сӹмӹрлен. Сӹмӹрлӹмӹжӹ пиш кого ылын».
1 Попышашлыкшым халыклан цилӓ шайышт пӹтӓрӹмӹкӹ, Иисус Капернаумыш кен.
2 Ик шӱдӹвуйын тӓрзӹжӹ церлӹ ылын дӓ колашок киэн. Ти тӓрзӹжӹм шӱдӹвуй когон ӓклен.
3 Иисус гишӓн колмыкы, тӓрзӹжӹн ӹлӹмӓшӹжӹм ытараш толжы манын, шӱдӹвуй Тӹдӹн докы когорак иудейвлӓм ядаш колтен.
4 Иисус докы толмыкы, нӹнӹ сарвален ядаш тӹнгӓлӹнӹт дӓ попенӹт: «Тӹнь паремдӹ манын, ти эдем ярал ылеш.
5 Тӹдӹ халыкнам ярата, мӓлӓннӓ синагогым ӹштен».
6 Иисус нӹнӹ сага кен. Шӱдӹвуйын пӧртшӹ докы лишеммӹ годым шӱдӹвуй тӓнгвлӓжӹм Иисуслан тенге келесӓш колтен: «Господь, Ӹшкӹметӹм ит тыргыжландары. Вет пӧртӹшкем пырашет мӹнь ярал ам ыл.
7 Мӹнь ӹшкӹмемӹм Тӹнь докет толаш ярдымылан шотленӓм. Шамакым веле келесӹ, тӹнӓм мӹньӹн тӓрзем паремеш.
8 Мӹнь ӹшкежӓт кид лӹвӓлнӹшӹ эдем ылам, мӹньӹнӓт вуйлатымы салтаквлӓэм улы. Иктӹлӓн келесем ”Ке” – тӹдӹ кеӓ, весӹлӓн ”Тишкӹ тол” манам – тӹдӹ толеш, тӓрземлӓн попем ”Тӹдӹм ӹштӹ” – ӹштӓ».
9 Тидӹм колмыкы, Иисус тӹдӹлӓн ӧрӹн, паштекшӹ кешӹ халык докы сӓрнӓлӹн дӓ келесен: «Тӓлӓндӓ попем, техень ӹнянӹмӓшӹм Мӹнь Израиль халык лоштат моделам».
10 Иисусым ӱжӓш колтымывлӓ мӹнгеш пӧртӹш толмыкышты, церлӹ тӓрзӹм паремшӹм ужыныт.
11 Тидӹ паштек Наин лӹмӓн халашкы Иисус кен. Тӹдӹн доно иквӓреш тыменьшӹвлӓжӹ логӹц шукынжы дӓ пиш шукы халык кенӹт.
12 Кынам Тӹдӹ хала капка докы лишемӹн, тӹшец колышым намал лыктыныт. Тидӹжӹ ӓвӓжӹн ик ӹшкет эргӹжӹ ылын, ӓвӓжӹ тылык ылын. Ӹдӹрӓмӓш доно иквӓреш хала гӹц шукы халык лӓктӹн.
13 Господь ӹдӹрӓмӓшӹм ужын, тӹдӹм ӹжӓлӓен дӓ келесен: «Ит мӓгӹрӹ».
14 Вара толын дӓ колышым нӓнгемӹ вӓрӹм тӹкӓлӹн, намал кешӹвлӓ шагалыныт. Иисус келесен: «Ӹрвезӹ, тӹлӓт попем: кӹньӹл!»
15 Колышы кӹньӹл шӹнзӹн дӓ попаш тӹнгӓлӹн. Иисус тӹдӹм ӓвӓжӹлӓн пӧртӹлтен.
16 Цилӓн когон лӱдӹнӹт, Йымым хвален, нӹнӹ тенге попенӹт: «Мӓ логӹцнӓ кого пророк лӓктӹн, Йымы ӹшке халыкшы докы лишемӹн».
17 Иисус гишӓн техень шанымаш цилӓ Иудейӹштӹ дӓ йӹр кымдемвлӓштӹ шӓрлен.
18 Цилӓ тидӹ гишӓн Иоаннлан тӹдӹн тыменьшӹвлӓжӹ увертӓренӹт.
19 Иоанн ӹшке докыжы кок тыменьшӹжӹм ӱжӹн дӓ нӹнӹм Иисус докы «Толшашлык Тӹнь ылат, ӓли мӓлӓннӓ весӹм вычымыла» манын, ядаш колтен.
20 Нӹнӹ Иисус докы толыныт дӓ келесенӹт: «Крестӹшӹ Иоанн Тӹнь докет мӓмнӓм ядаш колтен: ”Толшашлык Тӹнь ылат, ӓли мӓлӓннӓ весӹм вычымыла?”»
21 Ти жепӹн Иисус шукы эдемӹм цер гӹц, мыж гӹц, худа шӱлӹш гӹц паремден, шукы слӧпӧйӹн сӹнзӓжӹм пачын.
22 Иисус келесен: «Кедӓ, ужмыдам-колмыдам Иоаннлан увертӓрӹдӓ:
слӧпӧйвлӓ ужаш тӹнгӓлӹт,
акшаквлӓ каштыт,
проказа церӓнвлӓ иреэмӹт,
клухойвлӓ колыт,
колышывлӓ ӹлӹж кӹньӹлӹт,
незервлӓ Пуры Уверӹм шӓрӓт.*
23 Алталалтын, кӱ Мӹнь гӹцем ак каранг, тӹдӹ пуры цӓшӓн!»
24 Иоаннын колтымы эдемвлӓ кемӹкӹ, Иисус халыклан Иоанн гишӓн попаш тӹнгӓлӹн: «Тӓ пустыньыш мам анжаш лӓктӹндӓ? Мардежеш ламаялтшы амыжым ма?
25 Мам тӓ ужаш каштында? Шергӓкӓн выргемӹм чишӹ эдемӹм ма? Кавырланен чишӹ дӓ мындырланен ӹлӹшӹ паянвлӓ кугижӓвлӓн дворецвлӓштӹ ылыт.
26 Тӓ мам анжаш лӓктӹндӓ? Пророкым? Тенге, тӓлӓндӓ попем, тӹдӹ пророк, но пророк гӹцӓт когорак.
27 Лач тӹдӹ гишӓн тенге сирӹмӹ: ”Теве Тӹнь гӹцет анзыц Мӹнь Ӹшкӹмемӹн Ангелем колтем. Тӹдӹ Тӹнь анзылнет корнетӹм йӓмдӹлӓ”.*
28 Тӓлӓндӓ попем: ӹдӹрӓмӓшвлӓ гӹц шачшывлӓ лошты Крестӹшӹ Иоанн гӹц когорак ик пророкат уке, но Йымын Кугижӓншӹштӹ сек изижӓт тӹдӹн гӹц когорак».
29 Тӹдӹм колыштшы цилӓ халык, тенгеок лӹм оксам погышывлӓӓт, Иоанн доны крестӓлтмӹштӹ доно Йымын тӧр ылмыжылан ӹнянӹмӹштӹм анжыктенӹт.
30 А фарисей дон законым тымдышывлӓ, Иоанн доно крестӓлтделытат, Йымын шанымыжы гӹц карангыныт.
31 Господь пакылажы попен: «Ти шачышын эдемвлӓм кӱ доно Мӹлӓм тӓнгӓштӓрӓш? Кӱ гань нӹнӹ ылыт?
32 Нӹнӹ пазар ӧлицӓштӹ шӹнзӹшӹ дӓ иктӹ-весӹштӹм сӹгӹрӹшӹ тетя ганьы ылыт, нӹнӹ попат: ”Мӓ тӓлӓндӓ шишкыш доно шишкышна, а тӓ шӹдӓ кушты, мӓ тӓлӓндӓ ойхан мырым мырышна, а тӓ шӹдӓ мӓгӹрӹ”.
33 Крестӹшӹ Иоанн толын, киндӹмӓт ак кач, якшар ӓрӓкӓмӓт ак йӱ, а тӓ попедӓ: ”Тӹдӹн кӧргӹштӹжӹ иӓ!”
34 Эдем Эргӹ толын, качкеш, йӱэш, а тӓ попедӓ: ”Теве качкаш дӓ якшар ӓрӓкӓм йӱӓш яратышы Эдем, лӹм оксам погышывлӓ дон сулыканвлӓн тӓнгӹштӹ”.
35 Но Ышын тетявлӓжӹ Йымын ышыжым цилӓн тӧреш шотлат».
36 Ик фарисей ӹшке докыжы Иисусым качкаш ӱжӹн. Иисус фарисейӹн пӧртӹшкӹжӹ пырен дӓ стӧл лошты ӹшке вӓржӹм нӓлӹн.
37 Теве ти халашты ӹлӹшӹ сулыкан ӹдӹрӓмӓш, фарисейӹн пӧртӹштӹ Иисусын качмым пӓлен нӓлмӹкӹ, алебастр ӓтеш миром канден.
38 Вара Тӹдӹн шайыкы ял сагажы шагалын дӓ, мӓгӹрен, Иисусын ялжым сӹнзӓвӹдшӹ доно нӧртӓш тӹнгӓлӹн, ӱпшӹ доно ӹштӹн, Тӹдӹн ялжым шыпшалын дӓ миром шӹрен.
39 Тидӹм ужмыкы, Иисусым ӱжшӹ фарисей ӹшкедурешӹжӹ шаналтен: «Ти Эдем лачокшымат пророк ылеш ылгецӹ, махань ӹдӹрӓмӓш Тӹдӹн тервен тӹкнӹмӹм пӓлӓ ыльы, вет ӹдӹрӓмӓшӹжӹ сулыкан».
40 Но Иисус тӹдӹлӓн келесен: «Симон, Мӹнь тӹлӓнет иктӓ-мам келесӹнем». «Попы, Тымдышы», – келесен тӹдӹжӹ.
41 «Кӱсӹн пушы ик эдемӹн кӱсӹн нӓлшӹжӹ кок эдем ылын. Иктӹжӹ вӹцшӱдӹ динарим пушашлык ылын, весӹжӹ – вӹцлӹм.
42 Но нӹнӹн тӱлӓшӹштӹ нимаштат уке ылынат, тӹдӹ когыньыштыланат кӱсӹштӹм простен. Келесӹ, нӹнӹ логӹц кыдыжы кӱсӹн пушым утларак ярата?»
43 Симон вӓшештен: «Мӹньӹн шанымаштем, кыдылан шукырак кӱсӹм простен, тӹдӹжӹ». Иисус келесен: «Тӹнь тӧр шанет».
44 Вара, ӹдӹрӓмӓш велкӹ сӓрнӓлӹн, Симонлан келесен: «Ти ӹдӹрӓмӓшӹм ужат? Мӹнь пӧртӹшкет пырышым, тӹнь ялым мышкаш вӹдӹм шӹц пу, а тӹдӹ Мӹньӹн ялем сӹнзӓвӹдшӹ доно нӧртӹш дӓ ӱпшӹ доно ӹштӹльӹ.
45 Тӹнь Мӹньӹм шӹцӓт шыпшал, а ти ӹдӹрӓмӓш Мӹнь толмем годшен ялем шыпшалаш цӓрнӹде.
46 Тӹнь Мӹньӹн вуешем ӱм шӹц шӹрӹ, а тӹдӹ миро доно Мӹньӹн ялем шӹрен.
47 Седӹндон Мӹнь тӹлӓт келесем: тӹдӹн шукы сулыкшы простялтеш, вет тӹдӹ техень кого яратымашым анжыктен. Кӱлӓн изиш веле простялтеш, тӹдӹ изиш веле ярата».
48 Ӹдӹрӓмӓшлӓн Иисус келесен: «Тӹньӹн сулыкет простялтын».
49 Стӧл лошты Тӹдӹ сага ылшывлӓ ӹшкедурешӹштӹ шанаш тӹнгӓлӹнӹт: «Кӱ Тӹдӹ техень, сулыкымат простя?»
50 Но Иисус ӹдӹрӓмӓшлӓн келесен: «Ӹнянӹмӓшет тӹньӹм ытарен, тыр доно ке».
*7:22 «Незервлӓ Пуры Уверӹм шӓрӓт»: тидӹм «незервлӓлӓн Пуры Уверӹм шӓрӓт» манынат сӓрӓш лиэш. *7:27 Мал 3:1.1 Йымын Кугижӓншӹн Пуры Увержӹм хала гӹц халашкы, сола гӹц солашкы Иисус тилец вара шайышт каштын. Сагажы луаткок тыменьшӹжӹ,
2 тенгеок цер дӓ худа шӱлӹш гӹц паремдӹмӹ икманяр ӹдӹрӓмӓш ылын: Магдалина манын лӹмдӹмӹ Мария – тӹдӹн кӧргӹжӹ гӹц шӹм иӓ лӓктӹн –
3 Иродын пӧрт вуйлатышы Хузан Иоанна вӓтӹжӹ, Сусанна дӓ шукы молат. Нӹнӹжӹ ма улышты доно Иисуслан служенӹт.
4 Икӓнӓ, кынам когон шукы халык погынен дӓ Тӹдӹн докы эдемвлӓ цилӓ хала гӹц толыныт, Иисус нӹнӹлӓн тыштен попен:
5 «Ӱдӹшӹ пӹрцӹм ӱдӓш лӓктӹн. А ӱдӹмӹжӹ годым юж пӹрцӹжӹ корны сага вазын, тӹштӹ нӹнӹм ташкен пӹтӓренӹт, пӹлгом кеквлӓ чӹнген нӓлӹнӹт.
6 Весӹвлӓжӹ кӱӓн вӓрӹш вазыныт, шӹтен лӓкмӹкӹштӹ, кошкенӹт, вет нӹнӹлӓн лывыргы ситӹде.
7 А южшы самшудан вӓрӹш вазыныт, нӹнӹ доно иквӓреш самшуды кушкын дӓ азымым пӹзӹрӓлӹн.
8 А южшы яжо рокыш вазыныт, кушкыныт дӓ шӱдӹ пачаш шукы шурным пуэнӹт». Тидӹм келесӹмӹкӹ, Иисус сӹгӹрӓлӹн: «Кӱн пӹлӹшӹжӹ колышташ улы, колжы!»
9 Ти тыштен попымыжы мам анжыкта манын, тыменьшӹвлӓжӹ Иисус гӹц ядыныт.
10 Тӹдӹ келесен: «Йымын Кугижӓншӹн тайнывлӓжӹм ынгылаш тӓлӓндӓ ӹнянен пумы, а молылан цилӓжӓт тыштен келесӹмӹ гач пуалтеш. Седӹндон нӹнӹ ”анжат, дӓ ак ужеп, колыштыт, дӓ ак ынгылеп”.*
11 Ти тыштен келесӹмӹ теве мам анжыкта: пӹрцӹ – тидӹ Йымын шамакшы.
12 Корны сага кенвацшы пӹрцӹ – тидӹ нӹнӹ ылыт, кӱвлӓ шамакым колыт, но вара диавол толеш дӓ, ӹнжӹштӹ ӹнянеп, ӹнжӹштӹ ытаралтеп манын, йӓнгӹштӹ гӹц шамакым нӓнгеӓ.
13 А кӱӓн вӓрӹш вацшы пӹрцӹ – тидӹ нӹнӹ ылыт, кӱвлӓ, шамакым колын, сусу лимӹштӹ доно тӹдӹм йӓнгӹшкӹ пиштӓт, но важышты укеӓт, ик жеп ӹнянӓт, а аздарен тергӹмӹ годым карангыт.
14 Самшудан вӓрӹш вацшы – тидӹ нӹнӹ ылыт, кӱвлӓ шамакым колыт, но тиштӹшӹ ӹлӹмӓшӹштӹ тыргыжланымы, пайдам погымы дӓ мындырланымы доно пӹц кеӓт, седӹндон кӹцкӹштӹ кушкын ак шо.
15 А яжо рокыш вацшы – тидӹ нӹнӹ ылыт, кӱвлӓ, шамакым колмыкы, тӹдӹм пуры дӓ ире шӱмӹштӹ перегӓт, тырхымаш доно лӓктӹшӹм пуат». [Тидӹм келесӹмӹкӹ, Иисус сӹгӹрӓлӹн: «Кӱн пӹлӹшӹжӹ колышташ улы, колжы!»]
16 «Сартам чӱктӹмӹкӹ, тӹдӹм иктӓт ӓтӹ доно ак левед ӓли олманга лӹвӓкӹ ак шӹндӹ. А пырышывлӓ сотым ужышты манын, тӹдӹм ӹшке вӓрӹшкӹжӹ шӹндӓт.
17 Вет йӹвӹрт ӹштӹмӹ цилӓ вӹкӹ лӓктеш, цилӓ шӹлтӹмӹ сӹнзӓлӓн каеш дӓ пӓлӹ лиэш.
18 Тенгежӹ, кыце тӓ колыштыда, анжалда. Кӱн улы, тӹдӹлӓн пуалтеш, а кӱн уке, тӹдӹ гӹц, ма гишӓн ”мӹньӹн улы” манын шана, тӹдӹжӓт нӓлӓлтеш».
19 Иисус докы Ӓвӓжӹ дӓ шӱмбелвлӓжӹ толыныт, но халык шукы ылынат, лишкӹжӹ миэн кердделыт.
20 Иисуслан увертӓренӹт: «Тӹньӹн Ӓвӓт дӓ шӱмбелвлӓэт тӱнӹ шалгат, Тӹньӹм ужнештӹ».
21 Но Тӹдӹ нӹнӹлӓн келесен: «Йымын шамакшым колыштшывлӓ дӓ ӹштӹшӹвлӓ Мӹньӹн ӓвӓм дон шӱмбелвлӓэм ылыт».
22 Ик кечӹн Иисус тыменьшӹвлӓжӹ доно иквӓреш пышыш шӹнзӹн дӓ нӹнӹлӓн келесен: «Йӓрӹн вес сирӹшкӹжӹ ванженӓ». Нӹнӹ пыш доно тӓрвӓненӹт.
23 Кемӹштӹ годым Иисус амален кен. Йӓрӹштӹ кого мардеж тӓрвӓнен, коэвлӓ пышыш вӹдӹм кӹшкенӹт, нӹнӹ эксӹкӹш вӓрештӹнӹт.
24 Иисус докы тыменьшӹвлӓжӹ лишемӹнӹт, Тӹдӹм понгыжалтаренӹт дӓ келесенӹт: «Тымдышы! Тымдышы! Пӹтенӓ!» Иисус кӹньӹлӹн дӓ мардеж дон коэлӓн цӓрнӓш шӱден. Нӹнӹ цӓрненӹт, тыр лин.
25 «Кышты тӓмдӓн ӹнянӹмӓшдӓ?» – тыменьшӹвлӓжӹлӓн Иисус келесен. Нӹнӹ иктӹ-весӹштӹлӓн лӱдӹн, ӧрӹн попенӹт: «Кӱ Тидӹ? Мардежлӓнӓт, вӹдлӓнӓт шӱдӓ, дӓ нӹнӹжӹ Тӹдӹм колыштыт!»
26 Нӹнӹ Галилей ваштареш вӓрлӓнӹшӹ Гадара кымдемӹш пыш доно толыныт.
27 Кынам Иисус сирӹш лӓктӹн, Тӹдӹм халашты андак ӹлӹшӹ, иӓвлӓ доно шукердшен мутьымы эдем вӓшлин. Тӹдӹжӹ выргем гӹц пасна каштын, пӧртӹштӹ агыл, а шӹгервлӓштӹ ӹлен.
28 Иисусым ужмыкы, сӹгӹрӓл колтен, анзыланжы шынгалтын дӓ кого юк доно келесен: «Иисус, Кӱшнӹшӹ Йымын Эргӹжӹ, мӹнь донем Тӹньӹн махань пӓшӓэт? Тӹньӹм сарвален ядам, мӹньӹм ит орландары!»
29 Ти эдемӹн кӧргӹжӹ гӹц худа шӱлӹшлӓн Иисус лӓктӓш шӱден, седӹндон тӹдӹ тенге попен. Ти эдемӹм иӓ шукердшен мутен, тӹдӹн кид-ялжым цепленӹт, пидӹнӹт, тӹдӹм ороленӹт, но пӱэргӹ кӹлдӹмӹм кӹрӹштӹн, тӹдӹм пустыньыш иӓ поктен нӓнген.
30 Иисус тӹдӹ гӹц ядын: «Тӹньӹн лӹмет кыце?» «Легион», – келесен тӹдӹ. Тӹдӹн кӧргӹштӹжӹ шукы иӓ ылын.
31 Пындашдымы келгӹцӹш кеӓш ӹнжӹ шӱдӹ манын, нӹнӹ Иисусым сарваленӹт.
32 Тӹшток, кырыкышты, кого сасна кӹтӧ каштын. Иӓвлӓ сасна кӧргӹш пыраш ирӹкӹм Иисус гӹц ядыныт. Иисус нӹнӹлӓн ирӹкӹм пуэн.
33 Иӓвлӓ, эдем кӧргӹ гӹц лӓкмӹкӹ, саснавлӓ кӧргӹш пыренӹт. Кӹтӧ тура сир гӹц йӓрӹш шынгалтын дӓ вален кен.
34 Тидӹм ужмыкы, кӹтӧзӹвлӓ кыргыжыныт, халашты дӓ солавлӓштӹ тидӹ гишӓн попенӹт.
35 Ма лимӹм анжаш эдемвлӓ толыныт. Иисус докы лишеммӹкӹ, иӓвлӓ гӹц ытарымы эдемӹм ужыныт. Иисусын ял сагажы тӹдӹ шӹнзен, выргемӹм чишӹ дӓ раскыды ышан ылын. Нӹнӹ когон лӱдӹнӹт.
36 Иӓ доно мутьымы эдемӹн кыце ытаралтмыжым ужшывлӓ нӹнӹлӓн тидӹм попенӹт.
37 А Гадара кымдемӹштӹшӹ халыкым кого лӱдмӓш ӓвӓлтен, седӹндон Иисусым тӹшец кеӓш цилӓн ядыныт. Иисус пышыш шӹнзӹн дӓ мӹнгеш кеӓш тӓрвӓнен.
38 Кӱн кӧргӹ гӹц иӓвлӓ лӓктӹнӹт, тӹ эдем Иисус сага кеӓш сарвален ядын. Но Иисус тӹдӹм колтен дӓ келесен:
39 «Токет пӧртӹл дӓ Йымы тӹлӓнет мам ӹштӹмӹ гишӓн шайышт». Тӹдӹ кен дӓ Иисус тӹдӹлӓн мам ӹштӹмӹ гишӓн улы хала мычкы шайыштын.
40 Кынам Иисус мӹнгеш толын, Тӹдӹм халык шокшын вӓшлин, цилӓн Тӹдӹм выченӹт.
41 Теве Иаир лӹмӓн эдем толын, тӹдӹ синагог вуйлатышы ылын. Иисусын ялышкыжы кымал вазын дӓ токыжы пыраш ядын.
42 Тӹдӹн луаткок и кытлаш ик ӹшкет ӹдӹржӹ колашок церлӹ ылын. Иисус кемӹ годым цилӓ монгыр гӹц халык Тӹдӹм пӹзӹрен.
43 Ик ӹдӹрӓмӓш вӹр йогымы доно луаткок и орланен. Лекӹрвлӓлӓн ӹдӹрӓмӓш цилӓ пайдажым шӓвен пӹтӓрен, но иктӓт тӹдӹм паремден кердде.
44 Тӹдӹ шайыцын миэн дӓ Иисусын выргем пачшым тӹкӓлӹн, тӹнӓмок вӹр йогаш цӓрнен.
45 «Кӱ Мӹнь тервенем тӹкнӹш?» – Иисус ядын, но тӹкненӓм маншы иктӓт ылде. Тӹнӓм Петр дӓ тӹдӹн сага ылшывлӓ келесенӹт: «Тымдышы, халык Тӹньӹм йӹр ӓрен дӓ пӹзӹрӓ, а Тӹнь Мӹнь докем кӱ тӹкнӹш манат!»
46 «Тӓгӱ Мӹнь тервенем тӹкнӹш, кӧргем гӹц Мӹнь сила лӓкмӹм шижӹм», – Иисус келесен.
47 Тӹнӓм ӹдӹрӓмӓш, цаклыдымы кодын керддӹмӹжӹм ужын, Иисус докы цӹтӹрен толын дӓ анзыланжы кымал вазын. Тӹдӹн тервен малын тӹкнӹмӹжӹ дӓ кыце икӓнӓштӹ тӧрлӓнӹмӹжӹ гишӓн улы халык анзылны попен.
48 Тӹдӹлӓн Иисус келесен: «Ӹдӹрем, ит лӱд, тӹньӹм ӹнянӹмӓшет ытарен, тыр доно ке».
49 Иисус тидӹм попымыжы годым синагог вуйлатышын пӧртшӹ гӹц ик эдем толын дӓ келесен: «Тӹньӹн ӹдӹрет колен. Тымдышым ит тыргыжландары».
50 Но Иисус, тидӹм колмыкы, Иаирлӓн келесен: «Ит лӱд, ӹнянӹ веле, тӹнӓм ӹдӹрет ытаралтеш».
51 Пӧртшӹ докы шомыкы, Петр, Иоанн, Иаков, ӹдӹрӹн ӓтяжӹ дон ӓвӓжӹ гӹц молылан Иисус пыраш шӱдӹде.
52 Ӹдӹр верц цилӓн мӓгӹренӹт дӓ ойхыренӹт. Но Иисус келесен: «Идӓ мӓгӹрӹ, тӹдӹ колыде, амала веле».
53 Ӹдӹр колымым пӓленӹтӓт, эдемвлӓ Иисусым ваштылыныт.
54 Но Иисус, цилӓм поктен лыкмыкы, ӹдӹрӹн кидшӹм кычен дӓ чӹнь келесен: «Ӹдӹр, кӹньӹл!»
55 Ӹдӹрӹн йӓнгжӹ пӧртӹлӹн, тӹдӹ тӹнӓмок кӹньӹлӹн. Иисус тӹдӹлӓн качкаш пуаш шӱден.
56 Ӹдӹрӹн ӓтяжӹ дон ӓвӓжӹ когон ӧрӹнӹт. Иисус нӹнӹлӓн ма лимӹ гишӓн иктӹлӓнӓт попаш шӱдӹде.
*8:10 Ис 6:9-10.1 Иисус луаткок тыменьшӹжӹм поген, нӹнӹлӓн цилӓ иӓм поктен лыкташ, цер гӹц паремдӓш силам дӓ властьым пуэн,
2 Йымын Кугижӓншӹ гишӓн увертӓрӓш дӓ церлӹвлӓм паремдӓш нӹнӹм колтен.
3 Тӹдӹ нӹнӹлӓн попен: «Корныш нимат идӓ нӓл: пандымат, тӓпнӓкӹмӓт, киндӹмӓт, оксамат, вес выргемӹмӓт.
4 Кыды пӧртӹш пыредӓ, вес вӓре кемешкӹдӓ тӹшток ӹлӹдӓ.
5 А кышты тӓмдӓм ак пыртеп, тӹ хала гӹц кемӹдӓ годым ял гӹцдӓ пыракымат пачкалтыда: тидӹжӹ нӹнӹн ваштареш анзыцок шижтӓрӹмӓш лижӹ».
6 Тыменьшӹвлӓжӹ кенӹт, сола гӹц солаш каштыныт, Пуры Уверӹм шайыштыныт дӓ цилӓ вӓре паремденӹт.
7 Ирод тетрарх цилӓ ма лиӓлтмӹ гишӓн колын дӓ ынгылен шоктыде, малын манаш гӹнь, иктӹвлӓжӹ тидӹ Иоанн колымаш гӹц ӹлӹжӹн маныныт,
8 весӹвлӓжӹ – Илия толын, а кыдыжы ӓкрет годшы пророквлӓ логӹц иктӹжӹ ӹлӹж кӹньӹлӹн маныныт.
9 Ирод келесен: «Иоаннын вуйжым мӹнь роалыктенӓм, а кӱ гишӓн мӹнь техеньӹм колам, Тидӹжӹ кӱ техень?» Тӹдӹ Иисусым ужнежӹ ылын.
10 Пӧртӹлмӹкӹштӹ, Апостолвлӓ мам ӹштӹмӹштӹ гишӓн Иисуслан шайыштыныт. Иисус нӹнӹм сагажы нӓлӹн дӓ Вифсаида лӹмӓн хала сагашы йӓрӓ вӓрӹш кен.
11 Но халык тидӹм пӓлен нӓлӹн дӓ паштекшӹ толын. Иисус нӹнӹм пурын вӓшлин, Йымын Кугижӓншӹ гишӓн нӹнӹлӓн шайыштын, кӱм паремдӓш келеш ылын гӹнь, паремден.
12 Кечӹ вады векӹлӓ лыпшалтын. Луаткок тыменьшӹжӹ Тӹдӹн докы лишемӹнӹт дӓ попенӹт: «Халыкым колты, нӹнӹ лишнӹшӹ солавлӓшкӹ дӓ ӹлӹмӹ вӓрвлӓшкӹ кештӹ, амалаш вӓрӹм дӓ качкышым кӹчӓлӹштӹ. Тиштӹ мӓ халык ӹлӹдӹмӹ вӓрӹштӹ ылына».
13 Иисус нӹнӹлӓн келесен: «Тӓ нӹнӹлӓн качкаш пуда». Нӹнӹ вӓшештенӹт: «Вӹц сыкыр дон кок кол гӹц пасна мӓмнӓн ниманаат уке. Цилӓ ти эдемвлӓлӓн качкышым нӓлӓш мӓ кешӓшлык ылына ма?»
14 Вет тиштӹ вӹц тӹжем нӓрӹ пӱэргӹ ылын. Тыменьшӹвлӓлӓн Иисус келесен: «Нӹнӹм рӓдӹ доно вӹцлӹн-вӹцлӹн шӹндӹдӓ».
15 Тенгеок ӹштенӹт, цилӓм шӹнденӹт.
16 Тӹдӹ вӹц сыкыр дон кок колым нӓлӹн дӓ, пӹлгомыш анжалын, благословаен, тодылын дӓ, халыклан шӓлӓтӹдӓ манын, тыменьшӹвлӓжӹлӓн пуэн.
17 Цилӓн качкыныт дӓ темӹнӹт, нӹнӹ гӹц кодшы лаштыквлӓжӹм эче луаткок корзинӹм погенӹт.
18 Икӓнӓ, кынам Иисус ӹшкетшӹ ыдылын дӓ тыменьшӹвлӓжӓт Тӹдӹн сага ылыныт, Тӹдӹ нӹнӹ гӹц ядын: «Халыкышты Мӹньӹм кӱэш шотлат?»
19 Нӹнӹ келесенӹт: «Иктӹвлӓ Крестӹшӹ Иоаннеш, весӹвлӓ – Илияэш, а кыдыжы ӓкрет годшы пророквлӓ логӹц иктӹжӹ ӹлӹж кӹньӹлӹн маныт».
20 Тӹдӹ ядын: «А тӓжӹ Мӹньӹм кӱэш шотледӓ?» Петр вӓшештен: «Йымын Христосеш».
21 Но тидӹ гишӓн иктӹлӓнӓт ӹнжӹштӹ попы манын, Иисус тыменьшӹвлӓжӹлӓн пингӹдӹн шӱден
22 дӓ келесен: «Эдем Эргӹ шукы орлыкым ужшашлык. Халыкын когораквлӓжӹ, архиерейвлӓ дӓ законым тымдышывлӓ Тӹдӹм ярдымыш лыктыт. Тӹдӹм пуштыт, дӓ кымшы кечӹн ӹлӹжеш».
23 А вара Иисус цилӓлӓн келесен: «Кӱ Мӹнь паштекем кенежӹ гӹнь, ӹшке гӹцшӹ карангжы, ӹшке крестӹжӹм нӓлжӹ дӓ Мӹнь паштекем ашкедшӹ.
24 Вет кӱ ӹшке йӓнгжӹм ытарынежӹ, тӹдӹ ямда, а кӱ йӓнгжӹм Мӹнь верцем ямда, тӹдӹ йӓнгжӹм ытара.
25 Эдем сӓндӓлӹк хӓлӓ кидӹшкӹжӹ нӓлеш дӓ ӹшкӹмжӹм ӹшке ямда, ӓли эксӹкӹм тырха гӹнь, тӹдӹлӓн махань пайда?
26 Кӱ Мӹнь гӹцем дӓ Мӹньӹн шамакем гӹц важылеш, Эдем Эргӓт ӹшкӹмжӹн, Ӓтяжӹн дӓ святой Ангелвлӓн лӹмлештӓрӓлтмӓш доно толмыжы годым тӹдӹн гӹц важылеш.
27 Тӓлӓндӓ лачок попем: тиштӹ шалгышывлӓ логӹц южшы Йымын Кугижӓншӹм ужмешкӹ ак колы».
28 Ти попымы паштек, кӓндӓкш кечӹ нӓрӹ эртӹмӹкӹ, Петрӹм, Иоанным, Иаковым Иисус сагажы нӓлӹн дӓ кырыкыш ыдылаш кузен.
29 Ыдылмыжы годым Тӹдӹн шӹргӹ цӹрежӹ валгалт вашталтын, выргемжӹ ошы, йӹлгӹжшӹ лин.
30 Теве Тӹдӹн доно кок пӱэргӹ попенӹт, нӹнӹжӹ Моисей дон Илия ылыныт,
31 нӹнӹ пӹлгомыштышы лӹмлештӓрӓлтмӓш доно кайыныт дӓ Иисусын Иерусалимӹштӹ ӹлӹмӓш гӹц кешӓшлыкшы гишӓн попенӹт.
32 Петр дӓ тӹдӹн доно иквӓреш ылшывлӓм ом сӹнген, а, понгыжалтмыкышты, Иисусын лӹмлештӓрӓлтмӹжӹм дӓ сагажы шалгышы кок пӱэргӹм ужыныт.
33 Нӹнӹ Иисус гӹц айырлымышты годым Петр Тӹдӹлӓн келесен: «Тымдышы, тиштӹ ылмына пиш яжо! Ӓлдӓ мӓ кым амашым ӹштенӓ: иктӹм Тӹлӓнет, иктӹм Моисейлӓн дӓ Илиялан иктӹм». Мам попымыжым тӹдӹ пӓлӹде.
34 Петрӹн попымыжы годымок пӹл толын дӓ нӹнӹм леведӹн. Нӹнӹ ти пӹлӹш вӓрештмӹкӹ, тыменьшӹвлӓ когон лӱдӹнӹт.
35 Но пӹл гӹц юк шактен: «Тидӹ Мӹньӹн яратымы Эргем, Тӹдӹм колыштда!»
36 Ти юк цӓрнӹмӹкӹ, Иисусым нӹнӹ ӹшкетшӹм ужыныт. Тыменьшӹвлӓжӹ ышмам пачделыт, мам ужмышты гишӓн нӹнӹ ти кечӹвлӓн иктӹлӓнӓт попыделыт.
37 Вес кечӹн, кырык гӹц валымыкышты, Иисусым шукы халык вӓшлин.
38 Халык логӹц ик эдем сӹгӹрӓл колтен: «Тымдышы, Тӹньӹм сарвалем, эргем вӹкӹ анжал! Тӹдӹ мӹньӹн иктӹ веле.
39 Худа шӱлӹш тӹдӹм кыча: эргем трӱк саслаш тӹнгӓлеш, а ти шӱлӹш тӹдӹм сепнӹктӓ, ышмажы гӹц шонгым йоктара, тӹдӹм орландара дӓ тӹдӹ гӹц нелӹн айырла.
40 Худа шӱлӹшӹм поктен лыкташ мӹнь Тӹньӹн тыменьшӹвлӓэтӹм ядынам, но нӹнӹ тидӹм ӹштен кердделыт».
41 Иисус келесен: «О, кайышан дӓ ӹнянӹдӹмӹ шачыш! Кышкевек тӓ сагада лиӓм дӓ тӓмдӓм тырхем? Эргетӹм тишкӹ канды!»
42 Кынам эргӹжӹ лишемӹн, иӓ тӹдӹм йӧрӹктен шуэн дӓ сепнӹктӓш тӹнгӓлӹн, но Иисус худа шӱлӹшӹм цӓрен, ӹрвезӹм паремден дӓ тӹдӹм ӓтяжӹлӓн пуэн.
43 Йымын кого силажылан цилӓн когон ӧрӹнӹт. Иисусын мам ӹштӹмӹжӹлӓн цилӓн ӧрӹн шалгымы годым тыменьшӹвлӓжӹлӓн Тӹдӹ келесен:
44 «Колыштда дӓ ти шамаквлӓэм ӓшӹндӓрӹдӓ: Эдем Эргӹ эдемвлӓн кидӹш пумы лиэш».
45 Но ти шамаквлӓм нӹнӹ ынгылыделыт, нӹнӹ гӹц тидӹ шӹлтӹмӹ ылын, дӓ нӹнӹ тидӹм ынгылыделыт, а Иисус гӹц ти попымыжы гишӓн ядаш лӱдӹнӹт.
46 Кыдыжы нӹнӹ лошты когорак манын, тыменьшӹвлӓжӹ шанаш тӹнгӓлӹнӹт.
47 Иисус нӹнӹн кӧргӹ шанымашыштым пӓленӓт, тетям нӓлӹн, сагажы шагалтен
48 дӓ нӹнӹлӓн келесен: «Кӱ Мӹньӹн лӹмем верц ти тетям нӓлеш, тӹдӹ Мӹньӹм нӓлеш. А кӱ Мӹньӹм нӓлеш, тӹдӹ Мӹньӹм Колтышым нӓлеш. Кӱ тӓ логӹцдӓ сек изи, тӹдӹ кого ылеш».
49 Тӹнӓм Иисуслан Иоанн келесен: «Тымдышы, Тӹньӹн лӹмет доно иӓвлӓм поктен лыкшы ик эдемӹм мӓ ужынна, но тӹдӹ мӓ донна иквӓреш ак кашт, седӹндон мӓ тӹдӹм цӓрӹшнӓ».
50 Иоаннлан Иисус келесен: «Идӓ цӓрӹ. Кӱ тӓ ваштарешдӓ агыл, тӹдӹ тӓ верцдӓ ылеш».
51 Кынам Иисусым пӹлгомыш нӓлмӹ жеп лишемӹн, Тӹдӹ Иерусалимӹш кеӓш шанен.
52 Ӹшкежӹ гӹц анзыц увертӓрӹшӹвлӓм колтен. Нӹнӹжӹ, тӹдӹлӓн ма келеш, цилӓ йӓмдӹлӓш манын, корныш тӓрвӓненӹт дӓ Самариштӹшӹ солаш миэнӹт.
53 Но тӹштӹ Тӹдӹм ӹшке докышты пыртыделыт, вет Тӹдӹн корныжы Иерусалимӹшкӹлӓ кен.
54 Тидӹм ужмыкы, Иаков дон Иоанн тыменьшӹвлӓжӹ келесенӹт: «Господь, шанет гӹнь, мӓ Илия ӹштӹмӹ семӹнь пӹлгом гӹц тыллан валаш дӓ нӹнӹм пӹтӓрӓш шӱденӓ».
55 Но Иисус нӹнӹ векӹ сӓрнӓлӹн дӓ цӓрен келесен: «Махань шӱлӹшӹн ылмыдам тӓ ада пӓлӹ.
56 Эдем Эргӹ эдемвлӓн йӓнгӹм пӹтӓрӓш агыл, а ытараш толын». Вара вес солаш кенӹт.
57 Корнышты ылмышты годым Иисуслан ик эдем попен: «Господь, хоть-кышкы Тӹнь кеет, мӹнь паштекет миэм».
58 Тӹдӹлӓн Иисус келесен: «Ӹрвӹжвлӓн ӹлӹмӹ ыражышты улы, пӹлгомыштышы кеквлӓн – пӹжӓшӹштӹ, а Эдем Эргӹлӓн вуйымат пиштӓш нигыш».
59 А весӹлӓн келесен: «Паштекем ке». Но тӹдӹжӹ попен: «Господь, пӹтӓри ӓтямӹм таяш ирӹкӹм пу».
60 Иисус келесен: «Колышывлӓштӹм таяш колышывлӓм коды; а тӹнь ке дӓ Йымын Кугижӓншӹ гишӓн увертӓрӹ».
61 Вес эдем Иисуслан попен: «Господь, мӹнь Тӹнь паштекет кеем, но пӹтӓри тонышывлӓлӓн ”цевер” манаш ирӹкӹм пу».
62 Иисус келесен: «Кӱ шагавуйым кыча, а вара шайыкыла анжылтеш, тӹдӹ Йымын Кугижӓншӹлӓн семеш агыл».
1 Тилец вара Господь эче шӹмлу тыменьшӹм айырен нӓлӹн дӓ Ӹшкежӹ гӹц анзыц цилӓ халашкы, цилӓ вӓрӹшкӹ, кышкы Ӹшке кенежӹ ылын, коктын-коктын колтен.
2 Тӹдӹ нӹнӹлӓн попен: «Тӹредӓш пиш шукы, а пӓшӓзӹ – чӹдӹ. Тенгежӹ, пӓшӓзӹвлӓм тӹредӓш колтыжы манын, лӓктӹшӹн Хозажы гӹц ядын ыдылда.
3 Кедӓ! Мӹнь тӓмдӓм патявлӓм пирӹвлӓ лошкы колтымы семӹнь колтем.
4 Окса кармакымат, тӓпнӓкӹмӓт, ялеш чимӹ хӓдӹрӹмӓт сагада идӓ нӓл, корнышты иктӹн донат идӓ здоровайы.
5 Кынам иктӓ-махань пӧртӹш пыредӓ, пӹтӓриок келесӹдӓ: ”Ти пӧртлӓн тыр лижӹ!”
6 Тӹштӹ тырын эдемжӹ ӹлӓ гӹнь, тӓмдӓн тырда тӹдӹн доно кодеш, а уке гӹнь, тӓ докыда пӧртӹлеш.
7 Ти пӧртеш кодда, ма улыжым качда, йӱдӓ: пӓшӓзӹ пӓшӓдӓржӹм сылен нӓлеш. Пӧрт гӹц пӧртӹш идӓ ванжыл.
8 Иктӓ-махань халашкы толмыкыда, тӓмдӓм пурын вӓшлит гӹнь, мам тӓлӓндӓ пуат, тӹдӹм качда,
9 тӹштӹ ылшы церлӹвлӓм паремдӹдӓ дӓ попыда: ”Йымын Кугижӓншӹ тӓ докыда лишемӹн”.
10 А иктӓ-махань халашкы толмыкыда, тӓмдӓм пурын ак вӓшлиэп гӹнь, ӧлицӓвлӓш лӓкдӓ дӓ келесӹдӓ:
11 ”Тӓмдӓн халашты мӓлӓннӓ пижшӹ пыракымат мӓ тӓлӓндӓ пачкалтен пӧртӹлтенӓ. Но пӓлӹдӓ: Йымын Кугижӓншӹ ӹнде тӓ докыда лишемӹн”.
12 Тӓлӓндӓ попем: суд кечӹн Содомлан ти хала гӹц куштылгырак лиэш.
13 Ойхы тӹлӓт, Хоразин! Ойхы тӹлӓт, Вифсаида! Тӓ донышдаш ганьы цӱдӓвлӓ Тир дон Сидонышты линӹт ылгецӹ, нӹнӹ шукердок, ойхы выргемӹм чиэн дӓ ломыжышты шӹнзен, сулыкыштым простьыктен, Йымы докы сӓрнӓлӹт ыльы.
14 Но суд кечӹн Тир дон Сидонлан тӓ гӹцдӓ куштылгырак лиэш!
15 А тӹнь, пӹлгомыш шомеш лӱктӹмӹ Капернаум, адыш сӹмӹрӓлмӹ лиӓт!
16 Кӱ тӓмдӓм колыштеш, тӹдӹ Мӹньӹм колыштеш, кӱ ӹшкежӹ гӹц тӓмдӓм карангда, Мӹньӹм карангда. А кӱ ӹшкежӹ гӹц Мӹньӹм карангда, Мӹньӹм Колтышымат карангда».
17 Шӹмлу тыменьшӹжӹ сусу лин пӧртӹлӹнӹт дӓ попенӹт: «Господь, Тӹньӹн лӹмет верц шамакнам иӓвлӓӓт колыштыт».
18 Но нӹнӹлӓн Иисус келесен: «Пӹлгом гӹц валгынзыш семӹнь сатанан кенвацмым Мӹнь ужынам.
19 Теве тӓлӓндӓ кӹшкӹм, скорпионым дӓ тышманын цилӓ силажым ташкалаш властьым пуэм – нимат тӓлӓндӓ эксӹкӹм ак ӹштӹ.
20 Но шӱлӹшвлӓн шамакдам колыштмылан агыл, а тӓмдӓн лӹмдӓм пӹлгомышты сирӹмӹлӓн сусу лидӓ!»
21 Тӹнӓмок Иисус Святой Шӱлӹш доно ӹвӹртен дӓ келесен: «Ӓти, пӹлгом дон мӱлӓндӹн Господьшы, Тӹнь кого ышанвлӓ гӹцӓт, шанен моштышывлӓ гӹцӓт тидӹм шӹлтенӓт дӓ изивлӓлӓн пачынат, тидӹ гишӓн Мӹнь Тӹньӹм хвалем! Теве, Ӓти, Тӹньӹн пуры шанымашет техень ылын!»
22 Тыменьшӹвлӓжӹ докы сӓрнӓлӹн, Иисус попен: «Ӓтям Мӹлӓм цилӓ ӹнянен пуэн. Эргӹ кӱ ылмым Ӓтя гӹц молы иктӓт ак пӓлӹ, Ӓтя кӱ ылмым Эргӹ гӹц молы дӓ кӱлӓн Эргӹ пачаш шана, тӹдӹн гӹц молы иктӓт ак пӓлӹ».
23 Вара тыменьшӹвлӓжӹ векӹ сӓрнӓлӹн дӓ пасна нӹнӹлӓн келесен: «Тӓ мам ужыда, тӹдӹм ужшы сӹнзӓ пуры цӓшӓн!
24 Мӹнь тӓлӓндӓ попем: шукы пророквлӓ дӓ кугижӓвлӓ тӓмдӓн ужмым ужнештӹ ыльы, но ужделыт, тӓмдӓн колмыдам колнештӹ ыльы, но колделыт».
25 Закон тымдышы ик эдем, Иисусым тергӓш шанен, кӹньӹл шагалын дӓ келесен: «Тымдышы, курымаш ӹлӹмӓшӹм нӓлӓш манын, мӹнь мам ӹштӹшӓшлык ылам?»
26 Иисус ядын: «Законышты мам сирӹмӹ? Тӹштӹ тӹнь мам лыдат?»
27 Тӹдӹ келесен: «Господь Йыметӹм шӱм вашт, йӓнг вашт, улы силаэт доно дӓ улы ынгылымашет доно яраты. Лишӹлетӹмӓт ӹшкӹметӹм яратымы семӹньок яраты».*
28 Иисус попен: «Тӹнь тӧр келесӹшӹц. Тенгеок ӹштет гӹнь, ӹлӓш тӹнгӓлӓт».
29 Но закон тымдышы, ӹшкӹмжӹм тӧрӹш лыкташ шанен, Иисус гӹц ядын: «А кӱ мӹньӹн лишӹлем?»
30 Иисус тӹдӹлӓн келесен: «Ик эдем Иерусалим гӹц Иерихоныш кен дӓ разбойниквлӓн кидӹш вӓрештӹн. Нӹнӹ тӹдӹн выргемжӹм кыдаш нӓлӹнӹт, шин шушыртенӹт дӓ пеле колышым шуэн коденӹт.
31 Теве ти корны донок священник вален, кишӹм ужмыкы, корны вес монгыр доно эртен кен.
32 Левий йых* эдемӓт тенге ӹштен, ти вӓрӹш толын шомыкы, шушыргышым ужын, корны вес монгыр доно эртен кен.
33 А Самари гӹц ик эдем, ти корны донок кешӹлӓжӹ, тӹдӹн докы толын лӓктӹн, а ужмыкы, ӹжӓлӓен,
34 лишемӹн, шушыржым ӱ дӓ якшар ӓрӓкӓ доно мышкын, ялштен, осел вӹкӹ кузыктен шӹнден, хына пӧртӹш канден дӓ тӹдӹм анжен.
35 А вес кечӹн, тӹшец кемешкӹ, кок динарим лыктын, хына пӧртӹн хозалан пуэн дӓ тӹдӹлӓн келесен: ”Тӹдӹм анжы, мам утыжым кычылтат гӹнь, пӧртӹлмӹкем, мӹнь тӹлӓт пуэм”.
36 Тӹньӹн шанымашты, разбойниквлӓн кидӹш вӓрештшӹлӓн ти кымыт гӹц кыдыжы лишӹл ылын?»
37 Тӹдӹжӹ келесен: «Тӹдӹлӓн пурым ӹштӹшӹ». Иисус келесен: «Ке, тӹнят тенге ӹштӹ».
38 Корны доно кемӹштӹ годым Иисус ик солаш пырен. Тӹштӹ Марфа лӹмӓн ӹдӹрӓмӓш Тӹдӹм ӹшке пӧртӹшкӹжӹ пыртен.
39 Ӹдӹрӓмӓшӹн Мария лӹмӓн шыжаржы ылын. Тӹдӹжӹ Иисусын ял сагажы шӹнзӹн дӓ попымыжым колыштын.
40 Марфан хынам анжымы пӓшӓжӹ когон шукы ылын. Тӹдӹ лишкӹ толын дӓ келесен: «Господь! Шыжарем улы пӓшӓм ӹшкетлӓнем шуэн коден. Тидӹ гишӓн Тӹнь ат шаналты ма? Тӹдӹлӓн келесӹ, мӹлӓм палшыжы!»
41 «Марфа, Марфа! – келесен Иисус. – Тӹнь шукы верц тыргыжланет, шытырланет,
42 а керӓлжӹ иктӹ веле. Мария яжо ӹлӹмӓш лаштыкым айырен нӓлӹн, тидӹжӹ тӹдӹн гӹц ак нӓлӓлт».
*10:27 Втор 6:5, Лев 19:18. *10:32 «Левий йых»: лӹмдерӹм анжы.1 Икӓнӓ Иисус ик вӓре ыдыл пӹтӓрӹмӹкӹжӹ, тыменьшӹвлӓ логӹц иктӹжӹ Тӹдӹлӓн келесен: «Господь, мӓмнӓм ыдылаш тымды. Вет Иоаннат ӹшке тыменьшӹвлӓжӹм тымден».
2 Иисус нӹнӹлӓн келесен: «Ыдылмыда годым тенге попыда:
Пӹлгомышты ылшы мӓмнӓн Ӓтинӓ!
Тӹньӹн святой лӹмет лӹмлештӓрӓлтшӹ,
Тӹньӹн Кугижӓншет толжы!
Тӹньӹн ирӹкет мӱлӓндӹ вӹлнӓт
пӹлгомыштышы ганьок лижӹ!*
3 Мӓлӓннӓ керӓллык киндӹм кечӹньок пу.
4 Мӓмнӓн сулыквлӓнӓм простьы,
вет мӓӓт мӓлӓннӓ сулыкым ӹштӹшӹвлӓн сулыкыштым простенӓ.
Сулыкышкы* мӓмнӓм ит пырты,
худа гӹцӹн мӓмнӓм ытары».
5 Вара нӹнӹлӓн келесен: «Ӓли тӓ логӹцдӓ иктӓжӹ йыдпелӹн ӹшке тӓнгжӹ докы толеш дӓ келесӓ: ”Тӓнг, мӹлӓм кым сыкырым кӱсӹн пу,
6 корныш лӓкшӹ тӓнгем пырен, а мӹньӹн стӧл вӹкӹ шӹндӓш нимаэмӓт уке”.
7 А тӹдӹжӹ пӧрт гӹц лӓкдеок келесӓ: ”Мӹньӹм ит тыргыжландары. Амаса ӹнде тӹкӹлӹмӹ, тетявлӓэмӓт сагаэм вӓрӹштӹ киӓт, мӹнь тӹлӓт тидӹм пуаш кӹньӹл ам керд”.
8 Тӓлӓндӓ попем, тӓнгеш шотлен ак кӹньӹл дӓ ак пу гӹнят, вӹлӓн-вӹлӓн ядмыжылан кӹньӹлеш дӓ маняры келеш, тӹнӓрӹм пуа.
9 Мӹнь тӓлӓндӓ келесем: сарвалыда – тӓлӓндӓ пуалтеш, кӹчӓлдӓ – мода, тӹкӓлтӹдӓ – тӓлӓндӓ пачыт,
10 вет сарвалышы нӓлеш, кӹчӓлшӹ моэш, тӹкӓлтӹшӹлӓн пачыт.
11 Эргӹдӓ киндӹм ядеш гӹнь, тӹдӹлӓн кӱ маклакам пушы ӓли колым ядеш гӹнь, кол вӓреш кӹшкӹм пушы ӓтя тӓ лоштыда улы ма?
12 Ӓли эргӹ мыным ядеш гӹнь, кӱ тӓ логӹцдӓ тӹдӹлӓн скорпионым пуа?
13 Тенгежӹ, худа ылмы вӹлецӓт тӓ тетявлӓлӓндӓ яжо подаркам пуэн моштедӓ гӹнь, Пӹлгомыштышы Ӓтя Тӹдӹ гӹц ядшылан Святой Шӱлӹшӹм ак пу ма?»
14 Икӓнӓ Иисус эдем кӧргӹ гӹц апай иӓм поктен лыктын. Кынам иӓ лӓктӹн, апай попаш тӹнгӓлӹн, дӓ халык когон цӱдеен.
15 Но южшы попенӹт: «Тӹдӹ веельзевулын, иӓвлӓн вуйлатышыштын, силажы доно иӓвлӓм поктен лыктеш».
16 А весӹвлӓ, Тӹдӹм тергӓш шанен, пӹлгом гӹц пӓлӹкӹм анжыкташ ядыныт.
17 Но Иисус нӹнӹн шанымыштым пӓлен дӓ келесен: «Хоть-махань кугижӓншӹ кӧргӹштӹ ӹшке лошты кредӓлмӓш тӹнгӓлеш гӹнь, тӹдӹ охыремеш дӓ пӧртвлӓ иктӹ-весӹ вӹкӹ сӹмӹрлӓт.
18 Сатана ӹшке донжы ӹшке кредӓлеш гӹнь, кыце тӹдӹн кугижӓншӹжӹ кодын кердеш? А тӓ попедӓ, вуйта Мӹнь иӓвлӓм веельзевулын силажы доно поктен лыктам.
19 Мӹнь нӹнӹм веельзевулын силажы доно поктен лыктам гӹнь, тӓмдӓн эргӹвлӓдӓ кӱн силажы доно поктен лыктыт? Седӹндон нӹнӹ тӓмдӓм суйышы лит.
20 А Мӹнь Йымын кид доно иӓвлӓм поктен лыктам гӹнь, тенгежӹ Йымын Кугижӓншӹ тӓ докыда ӹнде толын.
21 Кынам ӹшке пӧртшӹм силан дӓ вырсы хӓдӹрӓн эдем орола, пурлыкшы перегӓлт кодеш.
22 Тӹдӹн гӹц силанрак вӹкӹжӹ кечӓлтеш дӓ тӹдӹм сӹнгӓ гӹнь, тӹдӹн ӹнянеш шотлымы вырсы хӓдӹржӹм шыпшын нӓлеш дӓ шолышт нӓлмӹжӹм пайыла.
23 Кӱ Мӹнь донем иквӓреш агыл, тӹдӹ Мӹнь ваштарешем, дӓ кӱ Мӹнь донем иквӓреш ак погы, тӹдӹ шӓлӓтӹлеш.
24 Эдем кӧргӹ гӹц лӓкмӹкӹ, худа шӱлӹш вӹддӹмӹ кымдемӹштӹ кӓнӓлтӓш вӓрӹм кӹчӓл каштеш, но ак мо дӓ попа: ”Мӹнь лӓктӹн кемӹ вӓрӹшкем пӧртӹлӓм”.
25 Пӧртӹлмӹкӹжӹ, тӹдӹм ирен ӹштӹн дӓ тӹвӹлӓен шӹндӹмӹм ужеш.
26 Тӹнӓм кеӓ, сагажы ӹшкежӹ гӹцӓт худа шӹм шӱлӹшӹм нӓлеш, цилӓнӓт пырат дӓ тӹштӹ ӹлӓш тӹнгӓлӹт. Тӹ эдемлӓн остаткаэш тӹнгӓлтӹш гӹц хударак лиэш».
27 Кынам Тӹдӹ тидӹ гишӓн попен, халык логӹц ик ӹдӹрӓмӓш сӹгӹрӓл колтен: «Тӹньӹм намалшы мӹшкӹр дӓ Тӹньӹм пукшышы цӹзӹ пуры цӓшӓн ылыт!»
28 Иисус келесен: «Кӱ Йымын шамакым колыштеш дӓ тӹдӹм шоктен шалга, нӹнӹвлӓ пуры цӓшӓн ылыт!»
29 Иисус йӹр халык шукырак погынен. Тӹдӹ попаш тӹнгӓлӹн: «Ти шачыш худа! Пӓлӹкӹм ядеш, но Иона пророкын пӓлӹкшӹ гӹц молы тӹдӹлӓн ак пуалт.
30 Кыце Ниневиштӹ ӹлӹшӹвлӓлӓн Иона пӓлӹк лин, Эдем Эргӓт ти шачышлан тенгеок лиэш.
31 Кечӹвӓлвелнӹшӹ ӹдӹрӓмӓш кугижӓ ти шачышын эдемвлӓ доно иквӓреш суд кечӹн кӹньӹлеш дӓ нӹнӹм вуйнаматыш лыктеш, вет тӹдӹ Соломонын ышан шаяжым колышташ мӱлӓндӹн вес тӹржӹ гӹц толын, дӓ теве тиштӹ Соломон гӹц Когорак улы.
32 Ниневиштӹ ӹлӹшӹвлӓ суд кечӹн ти шачыш доно иквӓреш кӹньӹлӹт дӓ тӹдӹм вуйнаматыш лыктыт, вет Ионан увертӓрен тымдымыжым колмыкы, нӹнӹ, сулыкыштым простьыктен, Йымы докы сӓрнӓлӹнӹт, а тиштӹ Иона гӹц Когорак улы.
33 Сартам чӱктӹмӹкӹ, тӹдӹм иктӓт ак шӹлтӹ ӓли ӓтӹ доно ак левед. Пӧртӹш пырышывлӓ сотым ужышты манын, ӹшке вӓрӹшкӹжӹ шӹндӓт.
34 Кӓпӹн валгалтарышыжы – сӹнзӓ. Тенгежӹ, сӹнзӓэт ире лиэш гӹнь, тӹньӹн улы кӓпет соты лиэш, а сӹнзӓэт худа лиэш гӹнь, кӓпетӓт пӹцкемӹш лиэш.
35 Перегӓлт, тӹньӹн сотет пӹцкемӹш ӹнжӹ ли.
36 Тӹньӹн улы кӓпет соты дӓ тӹштӹ нимахань пӹцкемӹш лаштыкат уке гӹнь, тӹдӹ цилӓ соты лиэш, вуйта тӹньӹм лампын тылжы сотемдӓрӓ».
37 Кынам Иисус попен пӹтӓрен, ик фарисей Тӹдӹм ӹшке докыжы качкаш ӱжӹн. Иисус пӧртӹш пырен дӓ стӧл лошты ӹшке вӓржӹм нӓлӹн.
38 Качмы анзыц Тӹдӹ кидшӹм мышдеӓт, фарисей, тидӹм ужмыкы, когон ӧрӹн.
39 Но Господь тӹдӹлӓн келесен: «Теве тӓ, фарисейвлӓ, карка дон плошкам вӹлец иреэмдедӓ, а кӧргӹдӓ шолыштмаш дӓ худа доно темӹн.
40 Шанен моштыдымывлӓ! Кӱ вӹлвӓлӹм ӹштен, кӧргӹжӹмӓт Тӹдок агыл ма ӹштен?
41 Мада улы, тӹдӹм незервлӓлӓн пуда, тӹнӓм тӓлӓндӓ цилӓжӓт ире лиэш.
42 А ойхы тӓлӓндӓ, фарисейвлӓ! Тӓ пӱртньӹкӹн, рута шудын дӓ цилӓ кавштавичӹ хӓдӹрӹн лӓктӹш гӹц лу пай гӹц иктӹжӹм Йымылан пуэдӓ, а пурын суйымым дӓ Йымым яратымым керӓлеш ада шотлы. Тидӹжӹмӓт ӹштӓш келеш ыльы, весӹжӹмӓт ӧрдӹжеш кодымыла агыл.
43 Ойхы тӓлӓндӓ, фарисейвлӓ! Тӓ синагогышты сек шотан вӓрвлӓштӹ шӹнзӹмӹм, халык погынымы вӓрвлӓштӹ тӓлӓндӓ кымалмым яратедӓ.
44 Ойхы тӓлӓндӓ, закон тымдышывлӓ дон фарисейвлӓ, яжон каяш цацышывлӓ! Тӓ пӓлӹм ӹштӹдӹмӹ шӹгервлӓ ганьы ылыда. Нӹнӹ вӹлнӹ эдемвлӓ каштыт, но тидӹм ак пӓлеп».
45 Закон тымдышы логӹц иктӹжӹ Иисуслан келесен: «Тымдышы, тидӹм попен Тӹнь мӓмнӓмӓт вырсет!»
46 Но Иисус келесен: «Закон тымдышывлӓ, тӓлӓндӓӓт ойхы. Тӓ эдем вӹкӹ намалаш ясы намалтышвлӓм артен пуэдӓ, а ӹшкежӹ тӹшкӹ ик парня донат ада тӹкнӹ.
47 Ойхы тӓлӓндӓ! Тӓ пророквлӓлӓн итӹрӓ шӹгервлӓм ӹштедӓ, а нӹнӹм тӓмдӓн ӓтявлӓдӓ пуштыныт.
48 Тенге тӓ ӓтявлӓдӓн ӹштӹлмӹштӹм пӓлӹмӹдӓм дӓ яжоэш шотлымыдам анжыктедӓ: нӹнӹ пророквлӓм пуштыныт, а тӓ пророквлӓлӓн шӹгервлӓм ӹштедӓ.
49 Седӹндонок Йымын Ышыжы попен: ”Мӹнь нӹнӹ докы пророквлӓм дӓ Апостолвлӓм колтем, иктӹвлӓжӹм нӹнӹ пуштыт, весӹвлӓжӹм поктылаш тӹнгӓлӹт”.
50 Тенгежӹ, сӓндӓлӹкӹм ӹштӹмӹ гӹц тӹнгӓлӹн, цилӓ пророквлӓн вӹрӹштӹм йоктарымы верц ти шачыш гӹц ядмы лиэш:
51 Авельӹн вӹржӹ гӹц тӹнгӓлӹн, жертвенник дон святой пӧрт лошты пуштмы Захарийӹн вӹржӹ якте. Тенге, тӓлӓндӓ попем: ти шачыш гӹц ядмы лиэш.
52 Закон тымдышывлӓ, ойхы тӓлӓндӓ! Тӓ пӓлӹмӓшӹн сыравачшым нӓлӹндӓ: ӹшкеӓт пырыделда, пыраш шанышыланат ӓптӹртендӓ».
53 Кынам Иисус нӹнӹлӓн тидӹм попен, закон тымдышы дон фарисейвлӓ Тӹдӹм тышманла анжаш дӓ шукы гишӓн ядышташ тӹнгӓлӹнӹт.
54 Тӹдӹм иктӓ-махань шамакеш кычаш дӓ йӓтлӓш манын, ороленӹт.
*11:2 Ирӹк – воля, желание. Лижӹ – тидӹм «шокталтшы» манынат сӓрӓш лиэш. *11:4 Сулыкышкы – греклӓ: аздарымашкы (искушенишкӹ).1 Ти жепӹн шукы тӹжем халык погыненӓт, эдемвлӓ иктӹ-весӹштӹм пӹзӹренӹт. Иисус пӹтӓриок Ӹшкӹмжӹн тыменьшӹвлӓжӹлӓн попаш тӹнгӓлӹн: «Фарисейвлӓн руашышты гӹц перегӓлтдӓ, тидӹжӹ нӹнӹн яжола каяш цацымашышты ылеш.
2 Нимахань питӹрӹмӹ пачылтде ак код, нимахань йӹвӹрт ӹштӹмӹ пӓлӹде ак код.
3 Мам тӓ пӹцкемӹшӹштӹ попендӓ, кечӹвӓл сотышты колыт. Мам тӓ йӹвӹрт пӹлӹшеш пӧрт кӧргӹштӹ попендӓ, пӧрт левӓш гӹц увертӓрӓш тӹнгӓлӹт.
4 Мӹнь тӓлӓндӓ, тӓнгвлӓлӓнем, попем: кӓпӹм пуштшывлӓ дӓ варажы нимат ӹштен керддӹмӹвлӓ гӹц идӓ лӱд.
5 Кӱ гӹц лӱдӓш, Мӹнь тӓлӓндӓ келесем: пуштмыкы, тылан адыш сӹмӹрен шуаш кӱн властьшы улы, Тӹдӹ гӹц лӱддӓ. Тенге, тӓлӓндӓ попем: теве кӱ гӹц лӱддӓ!
6 Вӹц изи кекӹм агыл ма кок ассари* оксала выжалат? А Йымы нӹнӹ логӹц иктӹжӹмӓт мондыде.
7 А тӓмдӓн вуйыштышы ӱп пӹрцӹдӓмӓт цилӓ шотлымы. Идӓ лӱд! Тӓ шукы изи кек гӹц шергӹ ылыда!
8 Мӹнь тӓлӓндӓ попем: кӱ эдемвлӓ анзылны Мӹньӹм пӓлӹмӹжӹ гишӓн пачын попа, Эдем Эргӓт Йымын Ангелвлӓжӹ анзылны тӹдӹм пӓлӹмӹжӹ гишӓн пачын попа.
9 А кӱ эдемвлӓ анзылны Мӹнь гӹцем карангеш, тӹдӓт Йымын Ангелвлӓжӹ анзылны карангдымы лиэш.
10 Кӱ Эдем Эргӹ ваштареш шамакым келесӓ, тӹдӹлӓн простялтеш. Но кӱ Святой Шӱлӹшӹм мыскылен попа, тӹдӹлӓн ак простялт.
11 Кынам тӓмдӓм синагогавлӓшкӹ, вуйлатышывлӓ дӓ властянвлӓ докы кычен кандат, кыце перегӓлтӓш дӓ мам попаш манын, идӓ тыргыжланы.
12 Мам попаш келеш, Святой Шӱлӹш тӓмдӓм тӹ цӓшӹн тымда».
13 Халык логӹц иктӹжӹ Иисуслан тенге попен: «Тымдышы, мӹньӹн ӹзӓмлӓн ӓтя гӹц кодшы пурлыкым мӹнь донем пайылаш келесӹ».
14 Тӹдӹлӓн Иисус келесен: «Эдем, тӓмдӓн судьяда лиӓш ӓли пурлыкдам пайылаш кӱ Мӹньӹм шагалтен?»
15 Вара Тӹдӹ цилӓлӓн попен: «Анжыда, шыкланымаш гӹц перегӓлтдӓ. Эдемӹн пайдажы шукы гӹнят, ӹлӹмӓшӹжӹ пайдашты агыл».
16 Иисус нӹнӹлӓн тыштен келесен: «Ик паян эдемӹн ныржы яжо лӓктӹшӹм пуэн,
17 дӓ тӹдӹ ӹшкедурешӹжӹ шанен: ”Мам мӹлӓм ӹштӓш? Цилӓ поген нӓлмӹ шурным нигышты перегӓш”.
18 Вара келесен: ”Теве мам ӹштем: кӹлӓтвлӓэм шӓлӓтем дӓ когораквлӓм чангем. Тӹшкӹ цилӓ шурным дӓ пайдаэм погем
19 дӓ ӹшкӹлӓнем келесем: йӓнгем, тӹньӹн шукы иэш ситӹшӹ пайдаэт улы. Кӓнӹ, кач, йӱ, сусу лин ӹлӹ”.
20 Но Йымы тӹдӹлӓн келесен: ”Ышдымы! Ти йыдымок йӓнгетӹм тӹнь гӹцет нӓлӹт. Тӹньӹн йӓмдӹлӹмет кӱлӓн кодеш?”
21 Кӱ ӹшкӹлӓнжӹ пайдам пога, а Йымы анзылны паян агыл, тӹдӹн доно тенге лиэш».
22 А тыменьшӹвлӓжӹлӓн Иисус келесен: «Седӹндон Мӹнь тӓлӓндӓ попем: мам качкына манын, йӓнгдӓ верц идӓ шытырланы, вӹкӹнӓ мам чиэнӓ манын, кӓпдӓ гишӓнӓт идӓ ойхыры.
23 Йӓнг качкыш гӹц, дӓ кӓп выргем гӹц шергӓкӓнрӓк.
24 Кеквлӓм анжыда: нӹнӹ ак ӱдеп, ак тӹредеп, нӹнӹн кӹлӓтӹштӓт, амбарыштат уке, но Йымы нӹнӹм пукша. А тӓ кек гӹц маняреш шергӓкӓнрӓк ылыда!
25 А тӓ логӹцдӓ кӱ шытыржы доно хоть ик кӹнереш кӓп кытшым* кужемден кердеш?
26 А тӓ техень изимӓт ӹштен ада керд гӹнь, молыжы гишӓн мам тыргыжланедӓ?
27 Анжыда, кыце лили пеледӹшвлӓ кушкыт: нӹнӹ пӓшӓм ак ӹштеп, ак шӹдӹреп. Но тӓлӓндӓ попем: пайдажы доно лӹмлештӹн гӹнят, Соломонат нӹнӹ логӹц иктӹн ганят чиде.
28 Тагачы нырышты кушшы, а иргодым камакаш шушашлык шудым Йымы тенге чиктӓ гӹнь, тӓмдӓм, чӹдӹ ӹнянӹшӹвлӓм, ак чиктӹ ма?
29 Мам тӓлӓндӓ качкаш, мам йӱӓш, идӓ кӹчӓл дӓ тидӹ гишӓн идӓ тыргыжланы.
30 Сӓндӓлӹк вӹлнӹшӹ халыквлӓ цилӓ тидӹм кӹчӓлӹт, а тӓмдӓн Ӓтядӓ тидӹ тӓлӓндӓ келмӹм пӓлӓ.
31 Сек анзыц тӓ Йымын Кугижӓншӹжӹм кӹчӓлдӓ, тӹнӓм тидӹ цилӓ тӓлӓндӓ пуалтеш.
32 Изи кӹтӧ, ит лӱд! Ӓтядӓ тӓлӓндӓ Кугижӓншӹм пуаш яжоэш шотлен.
33 Пайдадам выжалыда дӓ оксажым незервлӓлӓн пайылен пуда, тӹгӓнен керддӹмӹ окса кармакым ӹшкӹлӓндӓ ӹштӹдӓ, пӹтӹдӹмӹ пӹлгомыштышы пайдам погыда, тӹшкӹ шолы ак лишем, тӹштӹ когершӹ ак кач.
34 Кышты тӓмдӓн пайдада, тӹштӹ тӓмдӓн йӓнгдӓӓт лиэш.
35 Ӹштӹдӓ со ӹштӓлмӹ дӓ лампыда чӱктӹмӹ лиштӹ,
36 ӹшкӹмӹштӹн хозаштын сӱӓн гӹц пӧртӹлмӹжӹм вычышы эдемвлӓ ганьы лидӓ. Кынам толеш дӓ тӹкӓлтӓ, нӹнӹ тӹнӓмок тӹдӹлӓн пачаш йӓмдӹ ылыт.
37 Хоза пӧртӹлмӹжӹ годым цоравлӓжӹм амалыде вычышывлӓм ужеш гӹнь, нӹнӹ цӓшӓн ылыт. Тӓлӓндӓ лачок попем, тӹдӹ ӹшке ӹштӹжӹм ӹштӓлеш, цоравлӓжӹм стӧл лошкы шӹндӓ дӓ нӹнӹм анжаш тӹнгӓлеш.
38 Тӹдӹ йыдым, кокшы ӓли кымшы орол годым, толеш гӹнят, цоравлӓн тенге ӹштӹмӹштӹм ужеш гӹнь, нӹнӹ пуры цӓшӓн ылыт.
39 Пӓлӹдӓ, маняр цӓшӹн шолын толмым пӧрт хоза пӓлӓ ылгецӹ, вычен шалга дӓ пӧртӹшкӹжӹ капаен пыраш ирӹкӹм ак пу ыльы.
40 Тӓӓт йӓмдӹ лидӓ, вет маняр цӓшӹн ада вычы, тӹнӓм Эдем Эргӹ толеш».
41 «Господь, ти тыштен келесӹмӓшӹм мӓлӓннӓ попет ӓли цилӓлӓн?» – Петр Тӹдӹн гӹц ядын.
42 Господь келесен: «Молы тӓрзӹм вуйлаташ дӓ нӹнӹлӓн ӹшке жепӹштӹжӹ киндӹм висен пайылаш хозан шагалтымы ӹнян дӓ ышан пӧрт вуйлатышы кӱ лиэш?
43 Толмыкыжы, тӹ цоран шӱдӹмӹ семӹнь ӹштӹмӹжӹм хоза ужеш гӹнь, цоражы цӓшӓн ылеш.
44 Тӓлӓндӓ лачок попем, улы пурлыкшым анжаш тӹдӹм шагалта.
45 А тӹ цора ӹшкедурешӹжӹ ”Мӹньӹн хозаэм эче ак тол” манын шаналта дӓ качкаш, йӱӓш, йӱкшӹ лиӓш, молы тӓрзӹм, ӹдӹрӓмӓшӹмӓт, пӱэргӹмӓт шиӓш тӹнгӓлеш гӹнь,
46 хозажы вычыдымы кечӹн дӓ шаныдымы цӓшӹн толын лӓктеш. Хоза тӹдӹм роал шуа дӓ ӹнянӹдӹмӹвлӓн ужшашлык орлыкыштым анжыкта.
47 Цора хозажын шанымыжым пӓлӓ, ак йӓмдӹлӓлт дӓ тӹдӹн шанымыжы семӹнь ак ӹштӹ гӹнь, тӹдӹм когон шит.
48 А цора хозажын шанымыжым ак пӓлӹ дӓ шиӓш яралым ӹштӓ гӹнь, тӹдӹм чӹдӹрӓк шит. Кӱлӓн шукы пумы, тӹдӹ гӹц шукы ядалтеш, кӱлӓн шукы ӹнянӹмӹ, тӹдӹ гӹц шукырак ядыт.
49 Мӹнь тылым мӱлӓндӹ вӹкӹ кандаш толынам, ӹнде тылым йылаш тӹнгӓлшӹм когон ужнем ыльы!
50 Мӹнь крестӓлтмӹ доно крестӓлтшӓшлык ылам. Тенге лимешкӹ, кыце Мӹнь ясыланем!
51 Мӹнь мӱлӓндӹ вӹкӹ тырым кандаш толынам манын, тӓ шанедӓ ма? Уке, келесем Мӹнь, шелӓлтмӓшӹм кандаш толынам.
52 Пӧртӹштӹ вӹзӹтӹн ылыт гӹнь, тилец вара нӹнӹ шелӓлтӹт: кымытын коктыт ваштареш, коктын кымыт ваштареш лит.
53 Ӓтя эргӹ ваштареш лиэш, эргӹ ӓтя ваштареш, ӓвӓ ӹдӹржӹ ваштареш, ӹдӹр ӓвӓжӹ ваштареш, кувы ӹшке шешкӹжӹ ваштареш, а шешкӹ кувыжы ваштареш».
54 А вара Иисус халыклан попен: «Кечӹ шӹцмӹ велнӹ пӹл кузымым ужыда гӹнь, тӓ тӹнӓмок келеседӓ: ”Юр лиэш”. Тенгеок лиэш.
55 А кынам кечӹвӓлвел гӹц мардеж ӹфӹлӓш тӹнгӓлеш, шокшы лиэш маныда. Тенгеок лиэш.
56 Яжон каяш цацышывлӓ! Мӱлӓндӹ вӹкӹ дӓ пӹлгом цӹрем анжен, мам ужмыдам ынгылдарен моштедӓ, а кыце кӹзӹтшӹ жепӹм тӹшлен ада мошты?
57 Ма тӧр ылмым малын ӹшке ӹнедӓ ынгылы?
58 Тӹнь ваштарешетлӓ ылшы эдем доно вуйлатышы докы кемет годым корнышты тӹдӹн доно хытырен келшӓш цилӓ ӹштӹ, уке гӹнь, тӹдӹ тӹньӹм судья анзыкы канда, а судья оролылан пуа, тӹдӹжӹ тӹньӹм кызаматыш шуа.
59 Тӹлӓт келесем: пӹтӓртӹш ырет якте тӱлӹмешкӹ, тӹшец ат лӓк».
*12:6 Ассари – тыгыды окса. *12:25 «Кӓп кытшым»: грек шамакым «ӹлӹмӓшӹжӹм, курымжым» манынат сӓрӓш лиэш.1 Ти жепӹн тӹшкӹ толшы икманяр эдем Иисуслан Галилей гӹц толшывлӓ гишӓн попен: Пилат нӹнӹн вӹрӹштӹм жертвӹвлӓштӹ доно ярен.
2 Иисус нӹнӹлӓн вӓшештен: «Нӹнӹ тенге парваленӹтӓт, ти эдемвлӓ Галилейӹштӹ ӹлӹшӹ цилӓ молы гӹц сулыканрак ылыныт манын шанедӓ ма?
3 Тӓлӓндӓ келесем: уке! Но сулыкдам простьыктен, Йымы докы ада сӓрнӓл гӹнь, цилӓн тенгеок пӹтедӓ.
4 Ӓли Силоам башня кенвацмы годым луаткӓндӓкш эдемӹм пӹзӹрен пуштын гӹнь, Иерусалимӹштӹ молы ӹлӹшӹ гӹц нӹнӹ сулыканрак ылыныт шанедӓ ма?
5 Тӓлӓндӓ келесем: уке! Но сулыкдам простьыктен, Йымы докы ада сӓрнӓл гӹнь, цилӓн тенгеок пӹтедӓ.
6 Иисус тенге тыштен келесен: «Ик эдемӹн виноград ӓнгӓштӹжӹ смоква пушӓнгӹм шӹндӹмӹ ылын. Тӹдӹ ти пушӓнгӹ докы толын дӓ кӹцкӹм кӹчӓлӓш тӹнгӓлӹн, но моде
7 дӓ виноград куштышылан келесен: ”Ӹнде кымшы и ти смоквашты кӹцкӹм кӹчӓлӓш толам, но ам мо. Тӹдӹм ро! Малын вӓрӹм такеш нӓлӹн шалга?”
8 Но тӹдӹжӹ келесен: ”Хоза, эче ик иэш тӹдӹм коды, мӹнь йӹржӹ капаем дӓ намозым оптем.
9 Ӓнят, кӹцкӓнгеш. А уке гӹнь, вес ин роэт”».
10 Кукшыгечӹн ик синагогышты Иисус тымден.
11 Синагогышты церлӓндӓрӹшӹ шӱлӹш доно луаткӓндӓкш и орланышы ӹдӹрӓмӓш ылын. Тӹдӹ пӱгӹр ылын дӓ тӧр шагал кердде.
12 Тӹдӹм ужмыкы, Иисус Ӹшке докыжы ӱжӹн дӓ келесен: «Ӹдӹрӓмӓш, тӹнь цер гӹцет ытаралтынат».
13 Вара вӹкӹжӹ кидшӹм пиштен, ӹдӹрӓмӓш тӹнӓмок виӓнен шагалын дӓ Йымым лӹмлештӓрӓш тӹнгӓлӹн.
14 А Иисус кукшыгечӹн паремдӹмӹлӓн синагог вуйлатышы шӹдешкен дӓ халыклан келесен: «Пӓшӓм ӹштӓш куд кечӹ улы, ти кечӹвлӓн ӹшкӹмдӓм паремдӹктӓш толда, а кукшыгечӹн агыл».
15 Но Господь тӹдӹлӓн келесен: «Яжола каяш цацышы! Тӓ логӹцдӓ каждыйжы кукшыгечӹн ӱшкӱжшӹм ӓли оселжым, шуды йӓшлӓ гӹц шӱтен, йӱктӓш ак нӓнге ма?
16 Авраамын ти ӹдӹржӹм сатана луаткӓндӓкш и кӹлден кычен. Ти кӓпшӹл гӹц кукшыгечӹн тӹдӹм ытараш ак ли ыльы ма?»
17 Кынам тенге попен, Тӹдӹн ваштареш ылшывлӓ цилӓн намысланенӹт, а улы халык Иисусын лӹмлештшӹ цилӓ пӓшӓлӓнжӹ сусу лин.
18 Иисус келесен: «Йымын Кугижӓншӹ махань? Тӹдӹм Мӹлӓм ма доно тӓнгӓштӓрӓш?
19 Тӹдӹ горчицӹн нӱшмӹжӹ ганьы, тӹдӹм эдем нӓлӹн дӓ ӹшкӹмжӹн кавштавичӹштӹжӹ ӱден, а тӹдӹ кушкын, кого пушӓнгӹ лин, дӓ укш лоштыжы пӹлгомыштышы кеквлӓ ӹлӓш тӹнгӓлӹнӹт».
20 Иисус эчеӓт келесен: «Йымын Кугижӓншӹм Мӹлӓм ма доно тӓнгӓштӓрӓш?
21 Тӹдӹ ру ганьы, тӹдӹм ӹдӹрӓмӓш нӓлӹн дӓ кым висӓ лашашыш пиштен, вара улы руаш шун».
22 Иисус хала гӹц халаш, сола гӹц солаш каштын дӓ эдемвлӓм тымден, Тӹдӹ Иерусалимӹш корным кычен.
23 Ик эдем Тӹдӹ гӹц ядын: «Господь! Ытаралтшы эдемвлӓ чӹдӹн ылыт?» Иисус нӹнӹлӓн келесен:
24 «Ӓнгӹсӹр капкаш пыраш улы силам пиштен анжыда. Тӓлӓндӓ попем, шукын пыраш цацат, но ак кердеп.
25 Жеп толеш, пӧрт хоза кӹньӹлеш дӓ амасам питӹрӓ, тӹнӓм тӓ тӱнӹ лидӓ, амасам тӹкедӓ дӓ попедӓ: ”Господь, Господь, мӓлӓннӓ пач!” А Тӹдӹ тӓлӓндӓ келесӓ: ”Тӓ кӱ дӓ кышец ылыда, Мӹнь тӓмдӓм ам пӓлӹ”.
26 Тӹнӓм тӓ попаш тӹнгӓлӹдӓ: ”Мӓ Тӹнь донет иквӓреш качкынна дӓ йӱннӓ, Тӹнь мӓмнӓн ӧлицӓвлӓштӹ тымденӓт”.
27 А Тӹдӹ келесӓ: ”Тӓлӓндӓ попем: кӱ дӓ кышец ылыда, Мӹнь тӓмдӓм ам пӓлӹ. Худам ӹштӹшӹвлӓ, цилӓн Мӹнь дорцем карангда!”
28 Кынам Йымын Кугижӓншӹштӹ Авраамым, Исаакым, Иаковым дӓ цилӓ пророкым ужыда, а ӹшкӹмдӓм – поктен колтымым, тӓ мӓгӹрӓш дӓ пӱм пыраш тӹнгӓлӹдӓ.
29 Кечӹ лӱлтмӹ вел дӓ кечӹ шӹцмӹ вел, йыдпел монгыр дӓ кечӹвӓл монгыр гӹц эдемвлӓ толыт дӓ Йымын Кугижӓншӹштӹ качкаш вӓрлӓнӓт.
30 Тӹнӓм юж шайылнышы анзылны, а юж анзылнышы шайылны лит».
31 Ти кечӹнок икманяр фарисей толын, дӓ нӹнӹ Иисуслан келесенӹт: «Лӓк дӓ тишец ке, Ирод Тӹньӹм пуштнежӹ».
32 Иисус нӹнӹлӓн вӓшештен: «Кедӓ, ти ӹрвӹжлӓн келесӹдӓ: тагачат, иргодымат иӓвлӓм поктен лыктам дӓ эдемвлӓм паремдем, а кымшы кечӹн ӹшке пӓшӓэм пӹтӓрем.
33 Но Мӹнь тагачат, иргодымат, весиргодымат пакыла кешӓшлык ылам, вет пророк Иерусалим гӹц ӧрдӹжеш колышашлык агыл.
34 О, Иерусалим, Иерусалим, пророквлӓм шин пуштшы, тӹнь докет колтымывлӓм кӱвлӓм кӹшкен пӹтӓрӹшӹ! Кек игӹвлӓжӹм шылдыржы лӹвӓкӹ погымы семӹнь тӹньӹн тетявлӓэтӹм маняр гӓнӓ Мӹнь погынем ыльы, но тӓ ваштареш линдӓ!
35 А ӹнде тӓмдӓн пӧртдӓ тӓлӓндӓ охыр кодеш. Тӓлӓндӓ попем: ”Господь лӹм доно Толшы хвальымы лижӹ!”* манмешкӹдӓ, тӓ Мӹньӹм ада уж».
*13:35 Пс 117:26.1 Икӓнӓ, кукшыгечӹн, Иисус ик вуйлатышы фарисейӹн пӧртӹшкӹжӹ качкаш толын. Тӹштӹ Тӹдӹм тӹшленӹт.
2 Тӹнӓм Иисус докы кӱпӹшӹ церӓн* эдем лишемӹн.
3 Законым тымдышывлӓ дӓ фарисейвлӓ гӹц Иисус ядын: «Кукшыгечӹн паремдӓш лиэш ма?»
4 Нӹнӹ ик юкымат лыкделыт. Иисус тӹ эдемӹм тӹкӓлӹн дӓ паремден, вара колтен.
5 А нӹнӹлӓн келесен: «Тӓ логӹцдӓ иктӓжӹн оселжы ӓли ӱшкӱжшӹ вӹдсӹнзӓш кенвазеш гӹнь, кукшыгечӹнӓт тӹдӹм тӹнӓмок ада лык ма?»
6 Тидӹлӓн нӹнӹ нимат келесен кердделыт.
7 Хынавлӓн яжорак вӓрӹм айыраш цацымыштым Иисус ужын дӓ нӹнӹлӓн тыштен келесен:
8 «Тӹньӹм сӱӓнӹш иктӓжӹ ӱжеш гӹнь, яжорак вӓрӹм ит нӓл. Тӹнь гӹцет утларак шотеш пиштӹмӹ эдемӹм ӱжӹн кердӹнӹт.
9 Техень годым тӹньӹмӓт, тӹдӹмӓт ӱжшӹ хоза, толмыкыжы, тӹлӓт келесӓ: ”Ти вӓрӹм тӹдӹлӓн пу”. Тӹнӓм, намысыш пырен, сек тӹреш вӓрештӓт.
10 А кынам тӹньӹм ӱжӹт, ке дӓ тӹрӹштӹшӹ вӓрӹм нӓл. Кынам тӹньӹм ӱжшӹ хоза толеш, тӹлӓнет келесӓ: ”Тӓнг, анзыкырак тол”. Тӹнӓм сагаэт стӧл лошты ылшывлӓ анзылны тӹлӓнет шотеш пиштӹмӓш лиэш.
11 Ӹшкӹмжӹм кӱшкӹ шӹндӹшӹ лапемдӹмӹ лиэш, а ӹшкӹмжӹм лапемдӹшӹ лӱктӓлтеш».
12 Тӹдӹм ӱжшӹ фарисейлӓн Иисус попен: «Кечӹвӓл ӓли вады качкышым ӹштӹмет годым тӓнгвлӓэтӹм, шӱмбелвлӓэтӹм, ӹшке йыхетӹм, паян пашкудетвлӓм ит ӱж. Нӹнӹ ӹшкештӓт тӹньӹм ӱжӹн дӓ тидӹн доно тӹлӓт пӧртӹлтен кердӹт.
13 Празныкым ӹштӹмет годым незервлӓм, пел яланвлӓм, акшаквлӓм, слӧпӧйвлӓм ӱж,
14 тӹнӓм тӹнь пуры цӓшӓн лиӓт: нӹнӹ тӹлӓт нимат пӧртӹлтен ак кердеп. Тӹлӓт тӧр ӹштӹшӹвлӓн ӹлӹж кӹньӹлмӹ годым тӱлӓлтеш».
15 Тидӹм колмыкы, Иисус сага стӧл лошты ылшывлӓ логӹц иктӹжӹ Тӹдӹлӓн келесен: «Кӱ Йымын Кугижӓншӹштӹ киндӹм качкеш, тӹдӹ пуры цӓшӓн!»
16 А Иисус тӹдӹлӓн келесен: «Ик эдем кого вады качкышым ӹштен дӓ шукы хынам ӱжӹн.
17 Кынам вады качкыш жеп шон, ӱжмӹвлӓлӓн ”Толда, ӹнде цилӓ йӓмдӹ” манын келесӓш цоражым колтен.
18 Но толын ам керд манын, цилӓн икышын ынгылдараш тӹнгӓлӹнӹт. Пӹтӓришӹ тӹдӹлӓн келесен: ”Мӹнь мӱлӓндӹм нӓлӹнӓм, мӹлӓм анжал сӓрнӓл толаш келеш, вуеш ит нӓл, толын ам керд”.
19 Весӹ келесен: ”Мӹнь вӹц мыжыр ӱшкӱжӹм нӓлӹнӓм, нӹнӹм тергӓш кеем, вуеш ит нӓл, толын ам керд”.
20 Кымшы келесен: ”Мӹнь ӹдӹрӹм нӓлӹнӓм, седӹндон толын ам керд”.
21 Цора пӧртӹлӹн дӓ хозажылан тидӹм увертӓрен. Тӹнӓм пӧрт хоза когон шӹдешкен дӓ ӹшке цоражылан келесен: ”Халаштышы ӧлицӓвлӓш, проулкавлӓш йӹле ке дӓ тишкӹ незервлӓм, пел яланвлӓм, слӧпӧйвлӓм дӓ акшаквлӓм канды”.
22 Вара цора келесен: ”Хоза, тӹньӹн шӱдӹметӹм шоктымы, но вӓр эче улы”.
23 Тӹнӓм хоза цоражылан келесен: ”Сола корны дӓ ялгорны доно ке, тишкӹ цилӓм толаш тӓрвӓтӹ, пӧртем хынавлӓ доно темжӹ!
24 Тӓлӓндӓ попем, кӱм мӹнь ӱжӹнӓм, нӹнӹ логӹц иктӹжӓт мӹньӹн вады качкышем тотешт ак анжы! Вет ӱжмӹвлӓ шукын ылыт, а айырен нӓлмӹвлӓ – чӹдӹ”».
25 Иисус доно иквӓреш когон шукы эдем каштын. Тӹдӹ нӹнӹ векӹ сӓрнӓл келесен:
26 «Кӱ Мӹнь докем толеш, но ӓтяжӹм, ӓвӓжӹм, вӓтӹжӹм, тетявлӓжӹм, шӱмбелвлӓжӹм, ӓкӓ-шыжарвлӓжӹм, ӹшке ӹлӹмӓшӹжӹмӓт ужын керддӹмӹ ак ли гӹнь, тӹдӹ Мӹньӹн тыменьшем лин ак керд.
27 Кӱ ӹшке крестӹжӹм ак намал дӓ паштекем ак ке, тӹдӹ Мӹньӹн тыменьшем лин ак керд.
28 Тӓ логӹцдӓ кӱ башньым ӹштӹнежӹ гӹнь, маняр келмӹм дӓ ӹштен пӹтӓрӓш окса ситӹшӓшӹм шотлаш пӹтӓри ак шӹц ма?
29 Негӹцӹм пиштӹмӹкӹ, башньым ӹштен пӹтӓрен ак керд гӹнь, тидӹм ужшывлӓ цилӓн тӹдӹм ваштылаш
30 дӓ попаш тӹнгӓлӹт: ”Ти эдем чангаш тӹнгӓлӹн, а пӹтӓрен кердде”.
31 Ӓли ик кугижӓ вес кугижӓ вӹкӹ вырсы доно кенежӹ гӹнь, лу тӹжем салтакшы доно ваштарешӹжӹ толшы коклы тӹжемӓнӹм цӓктӓрен шагалташ вижӹ ситӓ ма манын, тӹдӹ пӹтӓри ак шӹц дӓ ак шаналты ма?
32 Ак ситӹ гӹнь, тышманжы мӹндӹрнӹ ылмы годымок тӹдӹн докы мирейӹмӹ гишӓн попаш эдемвлӓжӹм колта.
33 Тӓ дондаат тенгеок: кӱ ма улыжы гӹц ак каранг гӹнь, Мӹньӹн тыменьшем лин ак керд.
34 Санзал – яжо, но тӹдӹ санзалан лиӓш цӓрнӓ гӹнь, кыце тӹдӹм угӹц санзаланым ӹштӓш?
35 Техень санзал мӱлӓндӹшкӓт, намозышкат пиштӓш ак яры, тӹдӹм шуэн колтат. Кӱн пӹлӹшӹжӹ колышташ улы, колжы!»
*14:2 Кӱпӹшӹ цер – водянка.1 Лӹм оксам погышывлӓ дӓ сулыканвлӓ цилӓн Иисус докы колышташ толыныт.
2 Фарисейвлӓ дӓ законым тымдышывлӓ ӧпкӓлен попенӹт: «Ти эдем сулыканвлӓм Ӹшке докыжы лишемдӓ дӓ нӹнӹ доно иквӓреш качкеш!»
3 Иисус тӹнӓм нӹнӹлӓн тенге тыштен келесен:
4 «Тӓ логӹцдӓ иктӹжӹн шӱдӹ шарыкшы улы дӓ иктӹжӹм ямда гӹнь, ӹндекшлу ӹндекшӹжӹм пустынеш коден, ямшыжым момешкӹ кӹчӓлӓш ак ке ма?
5 А момыкы, сусу лиэш дӓ шарыкшым ӹнгӹжӓ вӹкӹжӹ пиштӓ.
6 Токыжы толмыкы, тӓнгвлӓжӹм дӓ пашкудывлӓжӹм ӱжӹн попа: ”Мӹнь ямшы шарыкем монам, мӹнь сагаэм ӹвӹртӹдӓ!”
7 Тӓлӓндӓ попем: кӱлӓн сулыкыштым простьыкташ ак кел, техень ӹндекшлу ӹндекш тӧр ӹштӹшӹ эдем доно тӓнгӓштӓрӹмӓштӹ, сулыкшым простьыктышы дӓ Йымы докы сӓрнӓлшӹ ик эдем верц пӹлгомышты тенгеок когорак ӹвӹртӹмӓш лиэш.
8 Ӓли ӹдӹрӓмӓш ӹшкӹмжӹн лу драхма окса гӹц иктӹжӹм ямда гӹнь, сартам чӱктен, пӧртӹм ӹштӹн-ӹштӹн, момешкӹжӹ пыт ак кӹчӓл ма?
9 А момыкы, ӹдӹрӓмӓш тӓнгвлӓжӹм дӓ пашкудывлӓжӹм ӱжеш дӓ келесӓ: ”Мӹнь сагаэм ӹвӹртӹдӓ, мӹньӹ ямдымы оксаэм монам!”
10 Тӓлӓндӓ попем: сулыкшым простьыктен Йымы докы сӓрнӓлшӹ ик сулыкан верц Йымын Ангелвлӓжӹ лошты техеньок ӹвӹртӹмӓш лиэш».
11 Иисус пакылажы попен: «Ик эдемӹн кок эргӹжӹ ылын.
12 Изирӓкшӹ ӓтяжӹлӓн келесен: ”Ӓти! Пурлыкет гӹц мӹлӓнем вӓрештшӓшлык паем пу”. Ӓтя пурлыкшым эргӹвлӓлӓн пайылен пуэн.
13 Икманяр кечӹ эртӹмӹкӹ, цилӓ поген, изирӓк эргӹ мӹндӹр велӹш кен. Тӹштӹ шӓлӓн ӹлен, ӹшке пайжым шаналтыде кычылтын.
14 Кынам цилӓ шӓлӓтӹл пӹтӓрен, тӹнӓм тӹ мӱлӓндӹштӹ кого шужымаш тӹнгӓлӹн, дӓ эргӹлӓн нуждам тырхаш вӓрештӹн.
15 Тиштӹшӹ ик эдем докы толын, а тӹдӹжӹ ӹшке нырышкыжы саснам кӹтӓш колтен.
16 Тӹдӹ сасналан пукшымы пырса аваха доно мӹшкӹржӹм темӓш шанен, но тӹдӹлӓн тидӹжӹмӓт иктӓт пуде.
17 Тӹнӓм тӹдӹ шанаш тӹнгӓлӹн дӓ ӹшкӹлӓнжӹ келесен: ”Ӓтямӹн маняр тӓрлӓлтшӹ эдемжӹ улы, цилӓлӓн киндӹ утымеш ситӓ, а мӹнь шужен колем!
18 Кем, ӓтям докы пӧртӹлӓм дӓ келесем: Ӓти! Мӹнь Пӹлгом ваштареш дӓ тӹнь анзылнет сулыкым ӹштенӓм.
19 Ӹнде эргет маналташат ам яры, мӹньӹм тӓрзӹвлӓ лошкет нӓл”.
20 Тӹдӹ кӹньӹлӹн дӓ ӓтяжӹ докы кен. Эче мӹндӹрнӹ ылмыжы годымок ӓтяжӹ тӹдӹм ужын дӓ ӹжӓлӓен колтен, ваштарешӹжӹ кыргыж лӓктӹн, шӱшкӹжӹ кечӓлтӹн дӓ шыпшалын.
21 Эргӹжӹ тӹдӹлӓн келесен: ”Ӓти! Мӹнь Пӹлгом ваштареш дӓ тӹнь анзылнет сулыкым ӹштенӓм. Ӹнде эргет маналташат ам яры”.
22 Но ӓтяжӹ цоравлӓлӓнжӹ келесен: ”Сек яжо выргемӹм кандыда дӓ тӹдӹм чиктӹдӓ. Кидӹшкӹжӹ тӹдӹлӓн шӓргӓшӹм* пуда дӓ ялеш чимӹ хӓдӹрӹм кандыда.
23 Ӧрдӹктӹмӹ презӹм виден кандыда дӓ шӹшкӹлдӓ, качкаш дӓ веселӓйӓш тӹнгӓлӹнӓ!
24 Мӹньӹн ти эргем колен ыльы, ӹнде ӹлӹжӹн, ямын ыльы, ӹнде момы”. Нӹнӹ веселӓйӓш тӹнгӓлӹнӹт.
25 А когорак эргӹжӹ нырышты ылын. Мӹнгеш толмыжы годым, пӧрт докы лишеммӹкӹ, мырымым дӓ веселӓйӹмӹм колын.
26 Тӓрзӹвлӓ логӹц иктӹжӹм ӱжӹн дӓ ядын: ”Ма тидӹ техеньӹ?”
27 Тӹдӹжӹ келесен: ”Тӹньӹн шоляэт толын. Тӹдӹ ӹлӹшӹ дӓ шулыкан толынат, ӓтят ӧрдӹктӹмӹ презӹм шӹшкӹлӹн”.
28 Кого эргӹ шӹдешкен, пӧртӹшкӓт ӹнежӹ пыры ылын. Ӓтяжӹ лӓктӹн дӓ тӹдӹм ӱжӹн.
29 Но тӹдӹ ӓтяжӹлӓн келесен: ”Теве мӹнь тӹлӓнет тинӓр и пӓшӓм ӹштем, тӹньӹн шӱдӹметӹм икӓнӓкӓт ӹштӹде кодыделам, но тӹнь мӹлӓм тӓнгемвлӓ доно празныкым эртӓрӓш нигынамат кесӹ патямат пуделат.
30 А ти эргет тӹньӹн пайдаэтӹм шӓхӓр ӹдӹрӓмӓшвлӓ доно каштын пӹтӓрен толмыкы, тӹнь тӹдӹлӓн ӧрдӹктӹмӹ презӹм шӹшкӹлӹнӓт!”
31 Но ӓтяжӹ тӹдӹлӓн келесен: ”Эргем, тӹнь соок мӹнь сагаэм ылат. Мӹньӹн ма улы, цилӓжӓт тӹньӹн.
32 А кӹзӹт сусу лиӓш дӓ веселӓйӓш келеш: тӹньӹн ти шоляэт колен ыльы, ӹнде ӹлӹжӹн, ямын ыльы, ӹнде моалтын”».
*15:22 Шӓргӓшӹм пумыжы когон шотеш пиштӹмӹм анжыкта.1 Иисус тыменьшӹвлӓжӹлӓн попен: «Ик паянын сурт пӓшӓм виктӓрӹшӹжӹ ылын. Хозан пурлыкшым тӹдӹ кычылт пӹтӓрӓ манын, хозалан йӓтлен попенӹт.
2 Хозажы тӹдӹм ӹшке докыжы ӱжӹн дӓ келесен: ”Тӹнь гишӓнет мӹнь мам колам? Суртым виктӓрӹмет гишӓн ынгылдарен сирен пу, ӹнде тӹлӓнет вуйлаташ ак ли”.
3 Тӹнӓм сурт виктӓрӹшӹ шаналтен: ”Мам мӹлӓнем ӹштӓш? Хоза мӹньӹм ти пӓшӓ гӹц лыктын колта. Капаяш силаэм уке, кӹчен кашташ важылам.
4 Суртым виктӓрӹмӹ пӓшӓ гӹц лыктын колтымыкы, эдемвлӓ ӹшке пӧртвлӓшкӹштӹ мӹньӹм нӓлӹштӹ манын, мам ӹштӓш пӓлем!”
5 Хозажылан кӱсӹш пырышы эдемвлӓм пасна-пасна ӹшке докыжы ӱжӹн. Пӹтӓришӹ гӹц ядын: ”Мӹньӹн хозаэмлӓн маняры пушашет улы?”
6 ”Шӱдӹ висӓ ӱм”, – келесен тӹдӹжӹ. Сурт виктӓрӹшӹ манын: ”Кӱслӹмет гишӓн сирӹмӹм нӓл, пӹсӹн шӹц дӓ сирӹ: вӹцлӹ”.
7 Вара весӹ гӹц ядын: ”А тӹньӹ манярым пушашлык ылат?” ”Шӱдӹ висӓ шӓдӓнгӹм”, – тӹдӹжӹ вӓшештен. Тӹдӹлӓн келесен: ”Кӱслӹмет гишӓн сирӹмӹм нӓл дӓ кӓндӓкшлу манын сирӹ”.
8 Йӧнӹм момыжылан алталышы сурт виктӓрӹшӹжӹм хозажы хвален. Ти сӓндӓлӹкӹн тетявлӓжӹ ӹшке лоштышы пӓшӓвлӓштӹ сотын тетявлӓ гӹц пӹсӹрӓк ышан ылыт.
9 Мӹнь тӓлӓндӓ попем: лачок агыл пайда доно ӹшкӹлӓндӓ тӓнгвлӓм ӹштӹдӓ, тенге ӹштедӓ гӹнь, нуждаэш кодмыкыда, тӓмдӓм курымаш ӹлӹмӹ вӓрӹш нӓлӹт.
10 Кӱ изиштӹ ӹнян, тӹдӹ когоштат ӹнян. Кӱ изиштӹ ӹнян агыл, тӹдӹ когоштат ӹнян агыл.
11 Тенгежӹ, тӓ лачок агыл пайда шотышты ӹнян лиделда гӹнь, кӱ тӓлӓндӓ лачокшы пайдам ӹнянен пуа?
12 Тӓ весӹвлӓн пайдам ӹнянӹн анжыделда гӹнь, кӱ тӓлӓндӓ ӹшкӹмдӓнӹм пуа?
13 Ик тӓрзӓт кок хозалан служен ак керд: иктӹжӹм ужын керддӹмӹ лиэш, весӹжӹм ярата, ӓли иктӹжӹлӓн шӱм вашт ӹштӓ, весӹжӹм ак шотлы. Тӓ ик жепӹшток Йымылан дӓ пайдалан служен ада керд».
14 Оксам яратышы фарисейвлӓӓт цилӓ тидӹм колыныт дӓ Иисусым мыскылен ваштылыныт.
15 Но Тӹдӹ нӹнӹлӓн келесен: «Тӓ ӹшкӹмдӓм эдем анзылны тӧр ӹштӹшӹлӓ анжыктедӓ, но Йымы тӓмдӓн йӓнгдӓм пӓлӓ. Мам эдемвлӓ ӓклӓт, Йымы анзылны йӹрнӹк веле.
16 Закон дон пророквлӓ Иоанн якте ылыныт. Ти жеп гӹц Йымын Кугижӓншӹ гишӓн пуры уверӹм тымдат дӓ хоть-кӱӓт тӹшкӹ пыт пыра.
17 Но пӹлгом дон мӱлӓндӹ пӹтӓт гӹнят, законышты ик ыдыралтышат ак ям.
18 Кӱ, ӹшке вӓтӹжӹм айырен колтен, весӹм марлан нӓлеш гӹнь, тӹдӹ шӓхӓрлӓнӓ. А кӱ айырен колтымым марлан нӓлеш, тӹдӓт шӓхӓрлӓнӓ.
19 Ик эдем паян ылын, цевер шимӓлгӹ-якшар итӹн выргемӹм чиэн, кечӹнь йӱн-качкын, мындырланен ӹлен.
20 Тенгеок Лазарь лӹмӓн незер эдем ылын, тӹдӹ паянын капка анзылныжы лимӓн киэн
21 дӓ паянын стӧл вӹлец шуэн колтымы киндӹ пыдыргым качкаш шанен. Пивлӓ толыныт дӓ тӹдӹн лимжӹм ныленӹт.
22 Вара Лазарь колен дӓ Ангелвлӓ тӹдӹм Авраам сагашы вӓрӹш нӓнгенӹт. Паянат колен, тӹдӹм таенӹт.
23 Адышты орланымыжы годым паян кӱшкӹ анжалын дӓ мӹндӹрнӹ Авраамым, а сагажы Лазарьым ужын.
24 Паян сӹгӹрӓлӹн: ”Авраам, ӓтя! Мӹньӹм ӹжӓлӓйӹ, Лазарьым мӹнь докем колты, парнявуйжым вӹдеш нӧртен, йӹлмем ӱкшӹктӹжӹ. Мӹнь ти тылышты когон орланем”.
25 Но Авраам келесен: ”Эргем, ӓшӹндӓрӹ, тӹнь яжо паетӹм ӹлӹмет годым нӓлӹнӓт, а Лазарь – худам. Ӹнде тиштӹ тӹдӹн ойхыжым карангдымы, а тӹнь орланет.
26 Тилец пасна, мӓ лоштына кого урмашым ӹштӹмӹ: тӓ докыда тишец ванжаш шанышы ванжен ак керд. Тӹшецӓт мӓ докына иктӓт ванжен ак керд”.
27 Тӹнӓм паян келесен: ”Тенгежӹ, ӓти, мӹнь тӹнь гӹцет ядам, ӓтямӹн суртышкыжы тӹдӹм колты.
28 Мӹньӹн вӹц шӱмбелем улы. Нӹнӓт ти ясыланымаш вӓрӹш ӹнжӹштӹ вӓрештеп манын, тӹдӹ нӹнӹм шижтӓрӹжӹ”.
29 Авраам келесен: ”Нӹнӹн Моисей дон пророквлӓштӹ улы, нӹнӹм колыштышты”.
30 Паян келесен: ”Уке, Авраам ӓти! Иктӓжӹ колышы нӹнӹ докы толеш гӹнь, сулыкыштым простьыктен, Йымы докы сӓрнӓлӹт”.
31 Но Авраам тӹдӹлӓн келесен: ”Моисей дон пророквлӓм ак колыштеп гӹнь, нӹнӹм колымаш гӹц ӹлӹж кӹньӹлшӓт ӹняндӓрен ак керд”».
1 А ӹшке тыменьшӹвлӓжӹлӓн Иисус келесен: «Аздарымаш толде ак керд, но кӱ гач толеш, тӹдӹлӓн ойхы!
2 Ти изирӓквлӓ логӹц иктӹжӹм тӧр корны гӹц аздарен карангдышым, шӱшкӹжӹ вӓкш кӱм сӓкен, тангыжыш шуат гӹнь, тӹдӹлӓн яжорак лиэш ыльы.
3 Ӹшкӹмдӓм тӹшлӹдӓ. Тӹньӹн шӱмбелет тӹлӓнет сулыкым ӹштӓ гӹнь, тӹдӹлӓн шижтӓрен попы. Сулыкшы гӹц карангеш гӹнь, простьы.
4 Тӹлӓнет шӱмбелет кечеш шӹм гӓнӓ сулыкым ӹштӓ дӓ кечеш шӹм гӓнӓ, тӹнь докет пӧртӹлӹн, ”мӹнь вуйнамат ылам” манеш гӹнь, тӹдӹм простьы».
5 Апостолвлӓ Господьлан попенӹт: «Мӓмнӓн ӹнянӹмӓшнӓм шукемдӹ».
6 Господь келесен: «Тӓмдӓн ӹнянӹмӓшдӓ хоть горчица нӱшмӹ нӓрӹ лиэш дӓ теве ти смоква пушӓнгӹлӓн ”Важге лӓк дӓ тангыжыш ванжы!” маныда ылгецӹ, тӹдӹ тӓмдӓм колыштеш ыльы.
7 Тӓ логӹцдӓ иктӓжӹдӓн кыралшы ӓли кӹтӹшӹ цорада улы гӹнь, ныр гӹц цора толмыкыжы, тӹдӹлӓн хоза ”Пӹсӹнрӓк лишем, стӧл лошкы тол!” манын келесӓ ма?
8 Уке, хоза келесӓ: ”Мӹлӓм вады качкышым йӓмдӹлӹ, ӹштӹм ӹштӓл дӓ качмем-йӱмем годым мӹлӓм стӧл вӹкӹ канден шалгы, вара ӹшке кач дӓ йӱ”.
9 Шӱдӹмӹжӹм шоктымылан цоражылан таум келесӓ ма? Тенге ам шаны.
10 Тӓ дондаат тенгеок лиэш: кынам цилӓ шӱдӹмӹм ӹштедӓ, попыда: ”Мӓ ярдымы цора веле ылына, мӓ мам ӹштӹшӓшлык ылынна, тӹдӹм веле ӹштеннӓ”».
11 Иерусалимӹш кемӹжӹ годым Иисус Самари дон Галилей ло доно эртен.
12 Ик солаш пырымыжы годым проказа церӓн лу эдем Тӹдӹм вӓшлинӹт. Нӹнӹ ӧрдӹшкӹрӓк шагалыныт
13 дӓ сасленӹт: «Иисус, Тымдышы, мӓмнӓм ӹжӓлӓйӹ!»
14 Нӹнӹм ужмыкы, Иисус келесен: «Кедӓ дӓ священниквлӓлӓн ӹшкӹмдӓм анжыктыда». Кемӹштӹ годым нӹнӹ проказа цер гӹц иреэмӹнӹт.
15 Нӹнӹ логӹц иктӹжӹ, пареммӹжӹм ужмыкы, мӹнгеш толын. Улы юкын Йымым лӹмлештӓрен,
16 Иисусын ял анзылан тӹдӹ кымал вазын дӓ таум ӹштен. Ти эдем Самари гӹц ылын.
17 Иисус ядын: «Лун агыл ма иреэмӹнӹт? А молы ӹндекшӹжӹ кышты ылыт?
18 Ти вес йыхын эдем гӹц пасна Йымым лӹмлештӓрӓш иктӓт пӧртӹлделыт ма?»
19 Вара тӹдӹлӓн келесен: «Кӹньӹл дӓ ке, тӹньӹм ӹнянӹмӓшет ытарен».
20 Йымын Кугижӓншӹ кынам толеш манын, фарисейвлӓ Иисус гӹц ядыныт. Нӹнӹлӓн Иисус келесен: «Йымын Кугижӓншӹ пӓлдӹрнен ак тол.
21 ”Теве тӹдӹ тиштӹ” ӓли ”Теве тӹштӹ” иктӓт келесен ак керд. Вет Йымын Кугижӓншӹ – тӓмдӓн кӧргӹштӹ».*
22 А тыменьшӹвлӓжӹлӓн Иисус келесен: «Техень жеп толеш, кынам Эдем Эргӹн хоть ик кечӹжӹм когон ужмыда шоэш, но ада уж.
23 Тӓлӓндӓ попат: ”Теве Тӹдӹ тиштӹ” ӓли ”Теве тӹштӹ”. Но тӓ идӓ ке, паштекӹштӹ идӓ кыргыж.
24 Эдем Эргӹ ӹшке кечӹнжӹ пӹлгомым ик тӹр гӹц вес тӹрӹш йӹлгӹж валгалтарышы валгынзыш ганьы лиэш.
25 Но тилец анзыц Тӹдӹ шукы орланышашлык, дӓ ти шачыш Тӹдӹм ӹшкежӹ гӹц карангда.
26 Ной годым кыце ылын, тенгеок Эдем Эргӹ годымат лиэш.
27 Ной ковчегӹш шӹцмӹ кечӹ якте качкыныт, йӱнӹт, ӹдӹрӹм нӓлӹнӹт, марлан кенӹт. Тӹнӓм потоп ылын дӓ цилӓм пӹтӓрен.
28 Лот годымат кыце ылын, тенгеок лиэш: качкыныт, йӱнӹт, нӓлӹнӹт, выжаленӹт, кушкышым шӹнденӹт, пӧртӹм ӹштенӹт,
29 но Содом гӹц Лот лӓкмӹ кечӹн пӹлгом гӹц йылышы киш тыл юр юрын дӓ цилӓм пӹтӓрен.
30 Эдем Эргӹ толмы кечӹнӓт тенгеок лиэш.
31 Ти кечӹн кӱ левӓш вӹлнӹ гӹнь, а хӓдӹрвлӓжӹ пӧртӹштӹ – нӹнӹм нӓлӓш ӹнжӹ валы. Кӱ нырышты лиэш – мӹнгеш ӹнжӹ пӧртӹл.
32 Лотын вӓтӹжӹ гишӓн ӓшӹндӓрӹдӓ!*
33 Кӱ ӹшке йӓнгжӹм переген кодаш цаца, тӹдӹ йӓнгжӹм ямда. А кӱ тӹдӹм ямда, ӹшкӹлӓнжӹ тӹдӹм ытарен кода.
34 Тӓлӓндӓ попем: тӹ йыдым кок эдем ик вӓрӹштӹ амалат, иктӹжӹ нӓлӓлтеш, весӹжӹ кодеш.
35 Кок ӹдӹрӓмӓш иквӓреш янгыштат, иктӹжӹ нӓлӓлтеш, весӹжӹ кодеш.
36 Кок эдем нырышты лит, иктӹжӹ нӓлӓлтеш, весӹжӹ кодеш».
37 Тыменьшӹвлӓжӹ тӹнӓм Тӹдӹ гӹц ядыныт: «Господь, кышты тидӹ лиэш?» Иисус келесен: «Кышты колышы кӓп, тӹшкӹ кучкыжвлӓӓт погынат».
*17:21 «Кӧргӹштӹ» – тидӹм «лошты» манынат сӓрӓш лиэш. *17:32 Анжы: Быт 19:15-26.1 Кымылым валтыде со ыдылаш келмӹ гишӓн Иисус тыменьшӹвлӓжӹлӓн тыштен шайыштын:
2 «Ик халашты судья ылын. Тӹдӹ Йымы гӹц лӱдде, эдемвлӓ гӹц важылде.
3 Ти халашток тылык ӹдӹрӓмӓш ӹлен. Судья докы шукы гӓнӓ каштын дӓ попен: ”Ваштарешем ылшы эдем гӹц мӹньӹм переген нӓл”.
4 Но тӹдӹжӹ шукы жеп тореш ылын, а вара ӹшкӹлӓнжӹ ӹшке келесен: ”Мӹнь Йымы гӹцӓт ам лӱд, эдем гӹцӓт ам важыл гӹнят,
5 ти ӹдӹрӓмӓшӹм переген нӓлӓм, вет тӹдӹ мӹлӓнем ирӹкӹм ак пу. Уке гӹнь, тишкӹ каштмыжы доно мӹньӹм янгылдара”».
6 Господь ядын: «Ти тӧр агыл судьян попымыжым тӓ колыда?
7 Хоть вычыкта гӹнят, йыдшы-кечӹжӹ палшыкым ядын сарвалышы, айырен нӓлмӹ эдемвлӓжӹм Йымы переген ак нӓл ма?
8 Тӓлӓндӓ попем: Тӹдӹ нӹнӹм пӹсӹн переген нӓлеш. Но, толмыкыжы, Эдем Эргӹ мӱлӓндӹ вӹлнӹ ӹнянӹмӓшӹм моэш ма?»
9 Тӧр ӹштӹшӹ ылына манын ӹнянӹшӹ дӓ молыштым жеплӹдӹмӹ икманяр эдемлӓн Иисус тенге тыштен попен:
10 «Кок эдем Йымын пӧртӹш ыдылаш пыренӹт: иктӹжӹ фарисей ылын, весӹжӹ – лӹм оксам погышы.
11 Фарисей шагалын дӓ ӹшкедурешӹжӹ тенге ыдылын: ”О, Йымы! Мӹнь молы эдем гань кравышы, худам ӹштӹшӹ, шӓхӓрлӓнӹшӹ ӓли ти лӹм оксам погышы гань ам ыл, тидӹлӓн Тӹлӓт таум келесем.
12 Мӹнь ӓрняштӹ кок гӓнӓ постем, мам ӹштен нӓлмем гӹц лушы лаштыкым Тӹлӓт пуэм”.
13 А лӹм оксам погышы ӧрдӹжтӹрӓк шалген, сӹнзӓжӹмӓт пӹлгомыш ӹнежӹ лӱктӓл ылын, ӹшкӹмжӹм онг гӹц шин попен: ”Йымы! Мӹньӹм, сулыканым, ӹжӓлӓйӹ!”
14 Тӓлӓндӓ попем, фарисей агыл, а лӹм оксам погышы токыжы тӧреш лыкмы пӧртӹлӹн. Вет ӹшкӹмжӹм кӱшкӹ шӹндӹшӹ лапемдӹмӹ лиэш, а ӹшкӹмжӹм лапемдӹшӹ – лӱктӓлтеш».
15 Иисус нӹнӹм тӹкӓлжӹ манын, Тӹдӹн докы изи тетявлӓмӓт намал канденӹт. Тидӹм ужын, тыменьшӹвлӓ нӹнӹм вырсенӹт,
16 но Иисус тетявлӓм Ӹшкежӹ докы ӱжӹн дӓ келесен: «Тетявлӓм Мӹнь докем пыртыда, нӹнӹм идӓ цӓрӹ. Вет Йымын Кугижӓншӹ техеньӹвлӓн ылеш.
17 Тӓлӓндӓ лачок попем: кӱ Йымын Кугижӓншӹм тетя гань ак вӓшли, тӹдӹ тӹшкӹ пырен ак керд».
18 Вуйлатышы ик эдем Иисус гӹц ядын: «Пуры Тымдышы, курымаш ӹлӹмӓшӹм нӓлӓш манын, мӹнь мам ӹштӹшӓшлык ылам?»
19 Иисус ядын: «Малын тӹнь Мӹньӹм пуры манат? Йымы гӹц молы иктӓт пуры агыл.
20 Тӹдӹн шӱдӹмӹжӹм тӹнь пӓлет: ит шӓхӓрлӓнӹ, ит пушт, ит шолышт, иктӹн верцӓт, иктӹн вӹкӓт алтален ит попы, ӓтят-ӓвӓтӹм шотеш пиштӹ».*
21 Тӹдӹжӹ Иисуслан попен: «Цилӓ тидӹм мӹнь ӹрвезем годшенок шоктен шалгем».
22 Тидӹм колмыкы, Иисус келесен: «Тӹлӓт эче иктӹ ак ситӹ: ма тӹньӹн улы, цилӓ выжалы дӓ оксажым незервлӓлӓн шӓлӓтӹ. Тӹнӓм пӹлгомышты тӹньӹн пайдаэт лиэш. Вара Мӹнь докем тол дӓ паштекем ке».
23 Тӹдӹжӹ, тидӹм колмыкы, когон сылыкланен. Тӹдӹ когон паян ылын.
24 Иисус, тӹдӹн сылыкангмыжым ужынат, келесен: «Паян эдемлӓн Йымын Кугижӓншӹш пыраш когон нелӹ!
25 Верблюдлан им шу вашт лӓктӓш куштылгок агыл, а паянлан Йымын Кугижӓншӹш пыраш тилецӓт нелӹрӓк».
26 Колыштшывлӓ Иисус гӹц ядыныт: «Тенгежӹ кӱ ытаралт кердеш?»
27 Иисус келесен: «Мам эдем ӹштен ак керд, Йымы кердеш».
28 Тӹнӓм Петр келесен: «А мӓ теве, цилӓ коден, Тӹнь паштекет кеннӓ».
29 «Тӓлӓндӓ лачок попем, – келесен Иисус, – кӱ Йымын Кугижӓншӹ верц пӧртӹм, ӓтя-ӓвӓм, шӱмбелӹм, ӓкӓ-шыжарым, вӓтӹм ӓли тетявлӓм коден,
30 тӹдӹ кӹзӹтшӹ курымышты шукы пачаш утларак нӓлеш, а толшашлык курымышты курымашлык ӹлӹмӓшӹм нӓлеш».
31 Иисус луаткок тыменьшӹжӹм Ӹшке докыжы ӱжӹн дӓ нӹнӹлӓн келесен: «Теве мӓ Иерусалимӹш толын шона, дӓ Эдем Эргӹ гишӓн пророквлӓн сирӹмӹштӹ цилӓжӓт шокталтеш.
32 Тӹдӹм язычниквлӓн кидӹш пуат, мыскылаш, вырсаш, вӹкӹжӹ шӹвӓш тӹнгӓлӹт.
33 Лыпш доно лыпшымыкы, Тӹдӹм пуштыт, но кымшы кечӹн ӹлӹж кӹньӹлеш».
34 Но тыменьшӹвлӓжӹ тенге попымы гӹц нимат ынгылыделыт. Иисусын шамаквлӓжӹ нӹнӹ гӹц шӹлтӹмӹ ылыныт, седӹндон ынгылыделыт.
35 Кынам Иисус Иерихон докы лишемӹн, корны сага ик слӧпӧй кӹчен шӹнзен.
36 Ӹшке дорцынжы эдемвлӓн эртӹмӹм колмыкы, ядын: «Ма тидӹ техеньӹ?»
37 Назорей Иисус эртӓ манын, тӹдӹлӓн келесенӹт.
38 Слӧпӧй саслаш тӹнгӓлӹн: «Иисус, Давидӹн Эргӹжӹ! Мӹньӹм ӹжӓлӓйӹ!»
39 Анзылны кешӹ эдемвлӓ тӹдӹлӓн цӓрнӓш шӱденӹт, но тӹдӹ эчеӓт когоракын саслен: «Давидӹн Эргӹжӹ! Мӹньӹм ӹжӓлӓйӹ!»
40 Иисус шагалын дӓ тӹдӹм Ӹшке докыжы кандаш шӱден. Слӧпӧй лишеммӹкӹ, Иисус тӹдӹ гӹц ядын:
41 «Тӹнь Мӹнь гӹцем мам ӹштӹмем вычет?» «Господь, сӹнзӓэм ужшы», – келесен тӹдӹ.
42 Тӹдӹлӓн Иисус попен: «Сӹнзӓэт ужшы! Тӹньӹм ӹнянӹмӓшет ытарен».
43 Слӧпӧй тӹнӓмок ужаш тӹнгӓлӹн дӓ, Йымым лӹмлештӓрен, Иисус паштек кен. Тидӹм ужын, улы халык Йымым хвален.
*18:20 Исх 20:12-16.1 Иерихоныш пырымыкы, Иисус хала доно эртен.
2 Тӹшток Закхей лӹмӓн эдем ылын, тӹдӹ лӹм оксам погышывлӓм вуйлатен, паян ылын.
3 Иисусым, Кӱ Тӹдӹ манын, когон ужнежӹ ылын, но изи кӓпӓн ылынат, халык шайыц ужын кердде.
4 Тӹнӓм тӹдӹ анзык кыргыжын, Иисусым ужаш манын, Тӹдӹн эртен кешӓшлык корны сагашы смоква пушӓнгӹш кузен.
5 Ти вӓрӹш толын шомыкы, Иисус кӱшкӹ анжалын, тӹдӹм ужын дӓ келесен: «Закхей, пӹсӹнрӓк валы! Мӹнь тагачы тӹньӹн пӧртӹштет лишӓшлык ылам».
6 Тӹдӹжӹ пӹсӹн вален дӓ Иисусым сусун пӧртӹшкӹжӹ хыналыкеш пыртен.
7 Тидӹм ужын, цилӓн ӧпкӓлен попаш тӹнгӓлӹнӹт: «Тӹдӹ сулыкан эдем докы пырен!»
8 Закхей анзыкы лӓктӹн дӓ Господьлан келесен: «Господь, пел пайдаэм незервлӓлӓн пуэм, а кӱн гӹц алтален нӓлӹнӓм гӹнь, нӹл пачаш шукыракым пӧртӹлтем!»
9 Иисус тӹдӹлӓн келесен: «Тагачы ти пӧртӹш ытаралтмаш толын, вет ти эдемӓт Авраамын эргӹжӹ.
10 Вет Эдем Эргӹ ямшым кӹчӓл моаш дӓ ытараш толын».
11 Тидӹм колшывлӓлӓн Иисус эче тыштен шайыштын, вет Тӹдӹ Иерусалим гӹц мӹндӹрнӹ ылде, дӓ Йымын Кугижӓншӹ шукышты агыл толеш манын, эдемвлӓ шаненӹт.
12 Иисус попен: «Лӹмлӹ роды гӹц лӓкшӹ ик эдем, кугижӓ лин пӧртӹлӓш манын, мӹндӹр мӱлӓндӹш кеен.
13 Тӹдӹ, кемешкӹжӹ, ӹшке докыжы лу цоражым ӱжӹн, нӹнӹлӓн лу мина* оксам пуэн дӓ келесен: ”Мӹнь толмешкем, моштен кычылтда”.
14 Но мӱлӓндӹштӹжӹ ӹлӹшӹвлӓ, тӹдӹм ужын кердделытат, паштекшӹ эдемвлӓм тенге келесӓш колтенӹт: ”Ти эдем мӓмнӓн кугижӓнӓ ӹнжӹ ли, тидӹ мӓлӓннӓ ак яры”.
15 Кугижӓ лин пӧртӹлмӹкӹжӹ, кӱ мам ӹштен нӓлмӹм пӓлӓш манын, ти эдем оксам нӓлшӹ цоравлӓм ӹшке докыжы ӱжӓш шӱден.
16 Пӹтӓришӹ толын дӓ келесен: ”Хоза, тӹньӹн ик минаэт лу мина парышым пуэн”.
17 ”Яжо, пуры цора, – тӹдӹлӓн кугижӓ келесен. – Изиштӹ ӹнян ылынатат, тӹлӓт лу халам вуйлаташ пуэм”.
18 Кокшы толын дӓ келесен: ”Хоза, тӹньӹн ик минаэт вӹц минам пуэн”.
19 Кугижӓ тӹдӹлӓн келесен: ”Тӹньӹм вӹц халам вуйлаташ шагалтем”.
20 А кымшы толын дӓ попен: ”Хоза! Теве тӹньӹн минаэт, савыцеш пӹтӹрӓл пиштен, мӹнь тӹдӹм перегенӓм.
21 Мӹнь тӹнь гӹцет лӱдӹнӓм. Тӹнь ӹжӓлӓйӹдӹмӹ эдем ылат: мам пиштӹделат, нӓлӓт, мам ӱдӹделат, тӹдӹм тӹредӓт”.
22 Кугижӓ тӹдӹлӓн келесен: ”Ӹшке шамакет донок тӹньӹм суем, ярдымы цора. Тӹнь пӓленӓт: мӹнь ӹжӓлӓйӹдӹмӹ эдем ылам, мам пиштӹделам, нӓлӓм, мам ӱдӹделам, тӹдӹм тӹредӓм.
23 Тенгежӹ, мӹнь толмыкем, оксам тӱлет доно нӓлӓш манын, малын тӹнь тӹдӹм торгейӹшӹвлӓлӓн пуделат?”
24 Вара сагажы шалгышывлӓлӓн кугижӓ келесен: ”Тӹдӹ гӹц минам нӓлдӓ дӓ, кӱн лу минажы улы, тӹдӹлӓн пуда”.
25 ”Хоза, – келесенӹт нӹнӹжӹ, – тӹдӹн лу минажы улы!”
26 ”Мӹнь тӓлӓндӓ попем: кӱн улы, тӹдӹлӓн пуалтеш, а кӱн уке, улыжат нӓлӓлтеш.
27 Но нӹнӹн кугижӓштӹ мӹньӹ лимӹ ваштареш ылшы тышманвлӓэм тишкӹ кандыда дӓ анзылнем шин пуштда”».
28 Тидӹм келесӹмӹкӹ, Иисус пакыла Иерусалимӹшкӹ кузен.
29 Елеон лӹмӓн кырыкышты вӓрлӓнӹшӹ Виффаги дӓ Вифани докы лишеммӹ годым Иисус кок тыменьшӹжӹм колтен:
30 «Анзылныда кайшы солаш кедӓ. Солаш пырымыкы, ялштен шагалтымы сӓмӹрӹк оселым ужыда. Тӹдӹм эче иктӓт нигынамат кышкыжде. Шӱтӹдӓ дӓ виден кандыда.
31 ”Малын шӱтедӓ?” – тӓ гӹцӹндӓ иктӓжӹ ядеш гӹнь, тенге келесӹдӓ: ”Тӹдӹ Господьлан келеш”».
32 Колтымы тыменьшӹвлӓжӹ кенӹт дӓ Иисус келесӹмӹ семӹньок цилӓ лимӹм ужыныт.
33 Кынам нӹнӹ сӓмӹрӹк оселым шӱтӓш тӹнгӓлӹнӹт, тӹдӹн хозавлӓжӹ нӹнӹлӓн попенӹт: «Тӓ малын тӹдӹм шӱтедӓ?»
34 Нӹнӹ келесенӹт: «Тӹдӹ Господьлан келеш».
35 Вара Иисус докы сӓмӹрӹк оселым виден канденӹт, тупшым выргемӹштӹ доно леведӹнӹт дӓ вӹкӹжӹ Иисусым шӹнденӹт.
36 Кемӹжӹ годым эдемвлӓ корнышкы выргемвлӓштӹм шӓренӹт.
37 Елеон кырык гӹц валаш тӹнгӓлмӹ вӓрӹш Иисус толын шомыкы, шукы-шукы тыменьшӹжӹ сусу лимӹштӹ доно ужмы цилӓ цӱдӓлӓн улы юкын Йымым хваляш тӹнгӓлӹнӹт:
38
«Господь лӹм доно толшы Кугижӓ
хвальымы лижӹ!
Пӹлгомышты тыр дӓ кӱшнӹ лӹмлештӓрӹмӓш лижӹ!»*
39 Халык лошты лишӹ фарисейвлӓ логӹц кыдыжы Тӹдӹлӓн попенӹт: «Тымдышы, тыменьшӹвлӓэтӹм цӓрӹ!»
40 Но Тӹдӹ нӹнӹлӓн келесен: «Тӓлӓндӓ попем, нӹнӹ тырлат гӹнь, кӱвлӓ саслаш тӹнгӓлӹт».
41 Иисус хала докы лишемӹн. Халам ужмыкы, тӹдӹ верц мӓгӹрӓл колтен
42 дӓ келесен: «О, тӹлӓнет тырым ма кандымым ӹшке кечетӹн пӓлет ылгецӹ! Но кӹзӹт тидӹм тӹньӹн сӹнзӓэт гӹц шӹлтӹмӹ.
43 Теве техень кечӹвлӓм тӹлӓнет ужаш вӓрештеш, кынам тышманвлӓэт тӹнь йӹрет рокым аралат, тӹньӹм ӓрен нӓлӹт дӓ цилӓ монгыр гӹц пӹзӹрӓш тӹнгӓлӹт.
44 Тӹнь докет Йымы лишеммӹ жепӹм пӓлӹделатат, нӹнӹ тӹньӹм рок доно ярен пӹтӓрӓт, тетявлӓэтӹм пуштыт. Тӹнь вӓрешет кӱ вӹлӓн кӱм ак кодеп».
45 Иисус Йымын пӧртӹш пырен дӓ тӹштӹ выжалышывлӓ дон нӓлшӹвлӓм покташ тӹнгӓлӹн.
46 Нӹнӹлӓн попен: «Сирӹмӹ: ”Мӹньӹн пӧртем – йымыдылмы пӧрт”, а тӓжӹ тӹдӹм разбойниквлӓн пӹжӓшӹшкӹ сӓртендӓ!»*
47 Иисус кечӹнь Йымын пӧртӹштӹ тымден. Архиерейвлӓ, законым тымдышывлӓ дӓ халык вуйлатышывлӓ Тӹдӹм пушташ йӧнӹм кӹчӓлӹнӹт.
48 Но Тӹдӹ доно мам ӹштӓш, нӹнӹ пӓлӹделыт. Вет Иисус сага со халык ылын дӓ пыт колыштын.
*19:13 Мина – шӱдӹ кечӓш пӓшӓдӓр ӓли шӱдӹ динари. *19:38 Анжы: Пс 117:26. *19:46 Ис 56:7, Иер 7:11.1 Ик кечӹн Йымын пӧртӹштӹ Иисусын халыкым тымдымыжы дӓ Пуры Уверӹм шайыштмыжы годым архиерейвлӓ, закон тымдышывлӓ дӓ халыкын когораквлӓжӹ лишемӹнӹт
2 дӓ Тӹдӹ гӹц ядыныт: «Мӓлӓннӓ келесӹ, махань власть доно Тӹнь цилӓ тидӹм ӹштет, ӓли ти властьым кӱ Тӹлӓнет пуэн?»
3 Иисус келесен: «Мӹнят тӓ гӹцдӓ иктӹ гишӓн ядам, тӓ Мӹлӓнем келесӹдӓ:
4 Иоаннын крестӹмӹжӹ Пӹлгом гӹц ӓли эдемвлӓ гӹц ылын?»
5 Нӹнӹ иктӹ-весӹштӹ доно ланзылен хытыренӹт: «Пӹлгом гӹц манына гӹнь, Тӹдӹ келесӓ: ”Малын тӹдӹлӓн ӹнянӹделда?”
6 Эдемвлӓ гӹц манына гӹнь, вӹкӹнӓ кӱм кӹшкен, цилӓ халык мӓмнӓм пуштеш. Иоанн пророк ылын манын, нӹнӹ ӹнянӓт».
7 Седӹндон нӹнӹ келесенӹт: «Тидӹ кышец, мӓ ана пӓлӹ».
8 Иисус нӹнӹлӓн келесен: «Тенгежӹ Мӹнят махань власть доно тидӹм ӹштӹмем ам келесӹ».
9 Вара халыклан Иисус тенге тыштен шайышташ тӹнгӓлӹн: «Ик эдем ӓнгӓэшӹжӹ виноградым шӹнден дӓ куштышывлӓлӓн анжаш пуэн, а ӹшкежӹ шукы жепеш кен.
10 Жеп шомыкы, виноград кӹцкӹм пушты манын, цоражым виноград анжышывлӓ докы колтен. Но нӹнӹ цоражым шинӹт, нимадеок мӹнгеш колтенӹт.
11 Тӹнӓм вес цорам колтен, тидӹжӹмӓт шинӹт, мыскыленӹт дӓ нимадеок поктен колтенӹт.
12 Ӹнде кымшым колтен, тӹдӹмӓт шушыртенӹт дӓ шуэн колтенӹт.
13 Тӹнӓм виноград ӓнгӓн хозажы келесен: ”Мам ӹштӓш мӹлӓнем? Яратымы эргем колтем, ӓнят, тӹдӹм ужмыкышты намысланат”.
14 Но виноград анжышывлӓ, тӹдӹм ужмыкы, иктӹ-весӹштӹлӓн попенӹт: ”Тидӹ наследник! Ӓлдӓ кенӓ дӓ тӹдӹм пуштына, тӹнӓм цилӓ мӓлӓннӓ кодеш”.
15 Ӓнгӓ гӹц тӹдӹм лыктыныт дӓ пуштыныт. Ӓнгӓн хозажы ӹнде нӹнӹ доно мам ӹштӓ?
16 Тӹдӹ толеш дӓ виноград анжышывлӓм пуштеш, а ӓнгӓжӹм весӹвлӓлӓн пуа». Тидӹм колыштшывлӓ келесенӹт: «Тенге ӹнжӹ ли!»
17 Иисус нӹнӹ вӹкӹ анжалын дӓ попен: «”Пӧрт ӹштӹшӹвлӓн ярдымеш лыкмы кӱ негӹц огол кӱ лин”* манмы Писаништӹшӹ шамак мам анжыкта?
18 Кӱ ти кӱ вӹкӹ кенвазеш, тӹдӹ шушырга, а кӱн вӹкӹ кӱ кенвазеш, тӹдӹм пӹзӹрен пиштӓ».
19 Архиерейвлӓ дон закон тымдышывлӓ Иисусын тыштен шайыштмашыжы нӹнӹ гишӓн ылмым ынгыленӹт дӓ Иисус вӹкӹ тӹнӓмок кидӹм лӱктӓлнештӹ ылын, но халык гӹц лӱдӹнӹт.
20 Иисус паштек ороленӹт дӓ тӧр ӹштӹшӹлӓ каяш цацышы эдемвлӓм Тӹдӹм йӹвӹрт тӹшлӓш колтенӹт. Нӹнӹжӹ, вуйлатышын кидӹш суяш пуаш манын, Иисусым иктӓ-махань шамакеш кычаш цаценӹт.
21 Нӹнӹ Тӹдӹ гӹц ядыныт: «Тымдышы! Мӓ пӓленӓ: Тӹньӹн попымет дӓ тымдымет тӧр. Тӹлӓнет цилӓ эдем икань ылыт, а Йымын корнылан тӧрӹм попен тымдет.
22 Келесӹ, мӓлӓннӓ кесарьлан лӹм оксам тӱлӓш лиэш ӓли ак ли?»
23 Иисус нӹнӹн йойланымыштым ужын дӓ келесен: «Малын Мӹньӹм тергедӓ?
24 Мӹлӓнем динари оксам анжыктыда: кӱм тӹштӹ анжыктымы дӓ кӱн лӹмжӹ?» Нӹнӹ келесенӹт: «Кесарьын».
25 Иисус келесен: «Тенгежӹ, кесарьлан кесарьыным, Йымылан Йымыным пуда».
26 Нӹнӹ халык анзылны Тӹдӹм шамакеш кычен кердделыт, Иисусын вӓшештӹмӹжӹлӓн ӧрӹн, нимат попыделыт.
27 Ӹлӹжмӓш уке маншы саддукейвлӓ логӹц таманярыжы Иисус докы толыныт дӓ Тӹдӹ гӹц ядыныт:
28 «Тымдышы! Моисей мӓлӓннӓ сирен: ”Кӱн вӓтӓн тетядӹмӹ шӱмбелжӹ кола гӹнь, шоляжы ӓли ӹзӓжӹ тӹдӹн вӓтӹжӹм марлан нӓлшӓшлык дӓ колышын вырлыкшым пакыла шӓрӹшӓшлык”.*
29 Шӹм шӱмбел ылыныт. Пӹтӓришӹжӹ ӹдӹрӹм нӓлӹн, колен, тетяжӹ уке ылын.
30 Вара кокшыжы тӹ вӓтӹмок нӓлӹн дӓ тӹдӹжӓт тетядеок колен;
31 а вара кымшыжы тӹ ӹдӹрӓмӓшӹм марлан нӓлӹн. Тенгеок цилӓ шӹмӹтӹштӹ донат лин: тетядеок коленӹт.
32 Цилӓн паштек ӹдӹрӓмӓшӓт колен.
33 Колышывлӓ ӹлӹжмӹкӹ, нӹнӹ логӹц кыдыжын вӓтӹжӹ лиэш? Вет шӹмӹтӹнӓт тӹдӹм нӓлӹнӹт».
34 Иисус попен: «Ти курымын эдемвлӓ ӹдӹрӹм нӓлӹт, марлан кеӓт.
35 Но колымаш гӹц ӹлӹж кӹньӹлӓш дӓ толшаш курымыш вӓрештӓш ярышылан шотлалтшывлӓ тӹштӹ ӹдӹрӹмӓт ак нӓлеп, марланат ак кеп.
36 Ӹнде нӹнӹ колен ак кердеп, а Ангел гань лит. Нӹнӹ Йымын ӹлӹж кӹньӹлшӹ тетявлӓжӹ ылыт.
37 Йылышы тӹшкӓ гишӓн шайыштмашты Моисейӓт колышывлӓн ӹлӹжмӹштӹм анжыктен. Моисей Господьым ”Авраамын Йымыжы, Исаакын Йымыжы дӓ Иаковын Йымыжы” манын.*
38 Йымы колышывлӓн Йымышты агыл, а ӹлӹшӹвлӓн. Тӹдӹлӓн цилӓн ӹлӹшӹ ылыт».
39 Тӹнӓм закон тымдышывлӓ логӹц южшы келесенӹт: «Тымдышы, Тӹнь яжон келесӹшӹц».
40 Тилец вара Тӹдӹ гӹц нимамат ядаш смейӹделыт. А Иисус нӹнӹлӓн келесен:
41 «Христосым Давидӹн Эргӹжӹ манын, кыце эдемвлӓ попат?
43 (42-43) Давид ӹшкежӓт Псалтирь книгӓштӹ попен:
”Господь Господемлӓн келесен:
Тӹньӹн тышманвлӓэтӹм ял лӹвӓкет пиштӹмешкем,
Мӹньӹн вургымла велнем шӹнзӹ”.*
44 Тенгежӹ Давидӓт Тӹдӹм Господь манеш. Кыце Христос Давидӹн Эргӹжӹ лин кердеш?»
45 Кынам улы халык Иисусым колыштын, тыменьшӹвлӓжӹлӓн Тӹдӹ келесен:
46 «Закон тымдышывлӓ гӹц перегӓлтдӓ. Нӹнӹ сӹлнӹ кужы выргемӹм чиӓш, халык погынымы вӓрвлӓштӹ эдемвлӓн нӹнӹм шу ли манын вӓшлимӹштӹм яратат. Синагогвлӓштӹ сек анзылны шӹнзӹнештӹ дӓ празныкышты сек шотан вӓрӹм нӓлнештӹ.
47 Нӹнӹ тылык ӹдӹрӓмӓшвлӓн пӧртӹштӹм незеремдӓт дӓ, йӓл ужышты манын, кужын ыдылыт. Нӹнӹм айыртемӹнок кого суйымаш выча».
*20:17 Пс 117:22. *20:28 Втор 25:5. *20:37 Исх 3:3,16. *20:42-43 Пс 109:1.1 Иисус анжалынат, жертва оксам пиштӹмӹ вӓрӹш паянвлӓн подаркам пиштӹмӹштӹм ужын.
2 Тенгеок кок лепта оксам тӹшкок пиштӹшӹ тылык ӹдӹрӓмӓшӹмӓт ужын
3 дӓ келесен: «Тӓлӓндӓ лачок попем: ти незер тылык ӹдӹрӓмӓш цилӓ гӹц шукым пиштен.
4 Нӹнӹ цилӓн утыжым Йымылан подаркаэш пиштенӹт, а тӹдӹ, незер гӹнят, мажы ӹлӓшӹжӹ ылын, цилӓ пиштен».
5 Махань яжо кӱвлӓ дӓ шергӓкӓн подаркавлӓ доно цеверемдӹмӹ манын, южшы Йымын пӧрт гишӓн попен. Тӹнӓм Иисус келесен:
6 «Мам тӓ кӹзӹт ужыда, цилӓ шӓлӓтӹмӹ лиэш. Жеп шомыкы, тиштӹ кӱ вӹлӓн кӱ ак код».
7 Тӹдӹн гӹц ядыныт: «Тымдышы, а тидӹжӹ кынам лиэш? Тидӹ шукышты агыл лишӓшлыкым махань пӓлӹк анжыкта?»
8 Иисус келесен: «Тӓмдӓм ӹнжӹштӹ алталеп манын, перегӓлтдӓ. Вет Мӹньӹн лӹмем доно шукын толыт дӓ попаш тӹнгӓлӹт: ”Тидӹ Мӹнь ылам”, ”Жеп лишемӹн!” Нӹнӹ паштек идӓ ке.
9 Кынам вырсы дӓ пыдыранзык гишӓн колыда, идӓ лӱд. Пӹтӓри тенге лишӓшлык, но икӓнӓштӹ мычаш ак ли».
10 Вара нӹнӹлӓн Иисус келесен: «Халык вӹкӹ халык кӹньӹлеш, кугижӓншӹ вӹкӹ – кугижӓншӹ.
11 Шукы вӓре мӱлӓндӹ когон цӹтӹрнӓлтеш, шужымаш дӓ мор шӓрлӓт, кого лӱдмӓшвлӓ дӓ пӓлӹквлӓ пӹлгом гӹц лит.
12 Но цилӓ тидӹ лимешкӹ, тӓ вӹкӹдӓ кидӹм лӱктӓш дӓ поктылаш тӹнгӓлӹт. Мӹньӹн лӹмем верц синагогвлӓшкӹ суяш дӓ кызаматыш шӹндӓш кычен пуат, кугижӓвлӓ дӓ вуйлатышывлӓ анзыкы нӓнгеӓт.
13 Тӹнӓм Мӹнь гишӓнем пӓлдӹртедӓ.
14 Со ӓштӹдӓ: ӹшке верцдӓ мам попаш, анзыцок идӓ тыргыжланы.
15 Мӹнь тӓлӓндӓ техень ышым дӓ шамакым пуэм, ваштареш шалгышы ик эдемӓт тӓмдӓн шамакдам сӹнген дӓ нӹнӹлӓн тореш лин ак керд.
16 Тӓмдӓм ӓтя-ӓвӓдӓӓт, шӱмбелвлӓдӓӓт, вырлыкдаат дӓ тӓнгвлӓдӓӓт выжалат. Тӓ логӹцдӓ южшым пуштыт.
17 Мӹньӹн лӹмем верц тӓмдӓм цилӓн ужын керддӹмӹ лит.
18 Но тӓмдӓн вуй гӹцдӓ ик ӱпӓт ак ям.
19 Тырхымыда доно ӹшке йӓнгдӓм ытарыда.
20 Кынам Иерусалимӹм салтаквлӓ йӹр ӓрен нӓлмӹм ужыда, пӓлӹдӓ: тӹдӹн пӹтӹмӹ жепшӹ толын шон.
21 Тӹнӓм Иудейӹштӹ ылшывлӓ кырыкыш кыргыжышты. А кӱ халашты – тӹдӹм коден кежӹ, а кӱ воктенжӹ, тӹшкӹ ӹнжӹ пыры.
22 Тидӹжӹ кӱсӹм пӧрӹктӹмӹ кечӹвлӓ ылыт. Писаништӹ мам келесӹмӹ, тӹнӓм цилӓ шокталтеш.
23 Ойхы лиэш тӹ кечӹвлӓн мӹшкӹрӓнвлӓлӓн дӓ цӹзӹм пукшышывлӓлӓн! Ти мӱлӓндӹштӹ когон нелӹ лиэш, ти халык вӹкӹ шӹдӹ вазеш:
24 шукынжы пӹсӹ меч лӹвӓлӓн колат, весӹвлӓжӹм цилӓ халык лошкы пленӹш нӓнгеӓт. Язычниквлӓ, нӹнӹн жепӹштӹ мычаш якте шомешкӹ, Иерусалимӹм ташкаш тӹнгӓлӹт.
25 Кечӹштӹ, тӹлзӹштӹ дӓ шӹдӹрвлӓштӹ пӓлӹквлӓ кайыт. Тангыж ружга, пыдырана, дӓ мӱлӓндӹ вӹлнӹшӹ халыквлӓм кого тыргыжланымаш дӓ ӧрмӓш нӓлеш.
26 Сӓндӓлӹк вӹкӹ ма толмым ужын, эдемвлӓ лӱдӹн вычымышты доно тӹнгӹн шагалыт, вет пӹлгомыштышы силавлӓ вӓр гӹц тӓрвӓнӓт.
27 Тӹнӓм Эдем Эргӹн пӹл вӹлнӹ кого сила дӓ лӹмлештӓрӓлтмӓш доно толмыжым ужыт.*
28 Кынам тидӹ шокталташ тӹнгӓлеш, кӹньӹлдӓ дӓ вуйдам лӱктӓлдӓ: тӓмдӓм ирӹкӹш лыкмы жеп лишемеш».
29 Иисус нӹнӹлӓн тыштен келесен: «Анжалда смоквам дӓ мол пушӓнгӹм.
30 Кынам нӹнӹн ӹлӹштӓшӹштӹ лӓкмӹм ужыда, тӓ пӓледӓ: шукыштат агыл кӓнгӹж толеш.
31 Тиштӓт тенгеок: кынам попымем шокталтмым ужыда, Йымын Кугижӓншӹ лишнок ылмым пӓлӹдӓ.
32 Тӓлӓндӓ лачок попем: цилӓ тидӹ лимешкӹ, ти шачыш ак пӹтӹ.
33 Пӹлгом дон мӱлӓндӹ пӹтӓт, но Мӹньӹн шамаквлӓэм ак пӹтеп.
35 (34-35) Тенгежӹ, перегӓлтдӓ, йӱкшӹ лимӓш, йӱмӓш, тиштӹшӹ ӹлӹмӓш верц тыргыжланымаш доно йӓнгдӓ ӹнжӹ нелем. Уке гӹнь, ти кечӹ тӓмдӓм вычыдымын вӓпшлӓ леведеш, вет ти кечӹ сӓндӓлӹк мычкы цилӓ ӹлӹшӹ вӹкӹ вазеш.
36 Цилӓ ти лишӓшлыкым тырхен лӓктӓш дӓ Эдем Эргӹ анзыкы шагалаш ярышы лиӓш манын, со йӓмдӹ лидӓ дӓ йымыдылда».
37 Иисус кечӹвӓл йӹде Йымын пӧртӹштӹ тымден, а йыдым, хала гӹц лӓктӹн, Елеон манмы кырыкышты эртӓрен.
38 А ирок ирӹ улы халык Тӹдӹм колышташ Йымын пӧртӹш погынен.
*21:27 Дан 7:13.1 Когечӹ манын лӹмдӹмӹ Шергиндӹ празнык лишемӹн.
2 Архиерейвлӓ дон законым тымдышывлӓ халык гӹц лӱдӹнӹтӓт, Иисусым пӹтӓрӓш манын, йӧнӹм кӹчӓлӹнӹт.
3 Но луаткок тыменьшӹжӹ гӹц иктӹжӹн, Искариот манмы Иуда кӧргӹш, сатана пырен.
4 Иудажы архиерейвлӓ дон оролышывлӓн вуйлатышышты докы кен, нӹнӹлӓн Иисусым кыце выжалымы гишӓн попен.
5 Нӹнӹжӹ сусу линӹт дӓ тӹдӹлӓн оксам пуаш сӧренӹт.
6 Иуда келшен дӓ Иисус сага халык уке годым Тӹдӹм нӹнӹлӓн выжалаш йӧнӓн жепӹм кӹчӓлӓш тӹнгӓлӹн.
7 Шергиндӹ кечӹ толын шон, когечӹ патям шӹшкӹлмӹлӓ ылын.
8 Иисус Петр дон Иоанным колтен дӓ келесен: «Кедӓ дӓ мӓлӓннӓ когечӹ качкышым йӓмдӹлӹдӓ».
9 Нӹнӹжӹ ядыныт: «Кышакен Тӹнь йӓмдӹлӹктӹнет?»
10 Иисус келесен: «Кынам халаш пыредӓ, кувшинеш вӹдӹм намал кешӹ эдемӹм тӓ вӓшлидӓ. Паштекшӹ кедӓ. Кыды пӧртӹш пыра, тӹшкӹ пырыда.
11 Пӧрт хозалан келесӹдӓ: ”Тымдышына тӹнь гӹцет ядеш: Мӹлӓм тыменьшемвлӓ доно когечӹ качкышым качкаш кӹдежет кышты?”
12 Тӹдӹ тӓлӓндӓ йонгата дӓ ӹштӹн шӹндӹмӹ кӱшӹл кӹдежӹм анжыкта, тӹшӓк йӓмдӹлӹдӓ».
13 Нӹнӹ кенӹт. Кыце Иисус попен, цилӓ тенгеок лин. Тыменьшӹвлӓжӹ когечӹ качкышым йӓмдӹленӹт.
14 Жеп шомыкы, Иисус стӧл лошкы вӓрлӓнен, а Тӹдӹн доно иквӓреш луаткок Апостол.
15 Нӹнӹлӓн Иисус келесен: «Орланымем анзыц Мӹнь тӓ донда ти когечӹ качкышым когон качнем ыльы!
16 Тӓлӓндӓ попем, Йымын Кугижӓншӹштӹ тӹдӹ шокталтмешкӹ, тӹлец вара Мӹнь тӹдӹм ам кач».
17 Тӹдӹ цӓшкӓм нӓлӹн, таум ӹштен дӓ попен: «Тидӹм нӓлдӓ дӓ ӹшке лоштыда пайылыда.
18 Тӓлӓндӓ попем: Йымын Кугижӓншӹ толмешкӹ, тӹлец вара виноград кӹцкӹ гӹц ӹштӹмӹм ам йӱ».
19 Тӹдӹ вара киндӹм нӓлӹн, таум ӹштен дӓ тодылын, тыменьшӹвлӓжӹлӓн пуэн дӓ келесен: «Тидӹ тӓ верцдӓ пумы Кӓпем. Мӹньӹм ӓшӹндӓрен, тенге ӹштӹдӓ».
20 Вады качкыш паштек Иисус цӓшкӓм тенгеок нӓлӹн дӓ попен: «Ти цӓшкӓ – тӓ верцдӓ йоктарымы Мӹньӹн Вӹрем доно ӹштӹмӹ у согонь.
21 А теве Мӹньӹм выжалышы эдемӹн кидшӹ Мӹньӹн кидем доно иквӓреш стӧл вӹлнӹ.
22 Лачокат Эдем Эргӹ анзыцок пӓлемдӹмӹ корным эртӹшӓшлык. Но кӱ Тӹдӹм выжала, тӹ эдемлӓн ойхы!»
23 Тидӹм нӹнӹ логӹц кӱ ӹштӓ манын, тыменьшӹвлӓ иктӹ-весӹ гӹц ядышташ тӹнгӓлӹнӹт.
24 Ӹшке лоштышты кӱ когоракеш шотлалтшашлык манын, тыменьшӹвлӓжӹ кӹрмӓшӓш тӹнгӓлӹнӹт.
25 Но Иисус нӹнӹлӓн келесен: «Кугижӓвлӓ ӹшке халыкышты доно хозаланат, дӓ властянвлӓ ӹшкӹмӹштӹм ”пурым ӹштӹшӹ” маныт.
26 А тӓмдӓн тенге ӹнжӹ ли. Тӓ лоштыда когоракшы изирӓк гань лижӹ, а вуйлатышыжы – тӓрзӹ гань.
27 Кӱжӹ когорак: стӧл лошты ылшы ӓли тӹдӹм анжышы? Стӧл лоштышы агыл ма? Но теве Мӹнь тӓ лоштыда тӓрзӹ гань ылам.
28 Тергӹмӓшвлӓм тырхымем годым тӓ Мӹнь донем иквӓреш кодында.
29 Седӹндон Ӓтям Мӹлӓм пумы семӹньок Мӹнят Кугижӓншӹм тӓлӓндӓ пуэм,
30 дӓ Мӹньӹн Кугижӓншӹштӹ стӧл лоштем качкаш дӓ йӱӓш тӹнгӓлӹдӓ, престолвлӓштӹ шӹнзӓш дӓ Израильӹн луаткок шачышым суяш тӹнгӓлӹдӓ».
31 Господь келесен: «Симон, Симон, сатана тӓмдӓм шӓдӓнгӹ семӹнь шактын айыраш ядын.
32 Но ӹнянӹмӓшет ӹнжӹ пӹтӹ манын, Мӹнь тӹнь верцет ыдылынам. Кынам мӹнгеш пӧртӹлӓт, шӱмбелвлӓэтӹн ӹнянӹмӓшӹштӹм пингӹдемдӹ».
33 Иисуслан Петр келесен: «Господь, мӹнь Тӹнь донет кызаматышкат, колашат кеӓш йӓмдӹ ылам!»
34 Иисус келесен: «Петр, тӹлӓт попем, тагачы ӓптӓн мырымешкӹ, тӹнь кым гӓнӓ Мӹнь гӹцем карангат».
35 Иисус нӹнӹ гӹц ядын: «Кынам Мӹнь тӓмдӓм окса кармак, тӓпнӓк дӓ ялеш чимӹ хӓдӹр гӹц пасна колтенӓм, тӓлӓндӓ иктӓ-ма ситӹде ма?» Нӹнӹ келесенӹт: «Цилӓ ситен».
36 Иисус нӹнӹлӓн попен: «Но ӹнде, кӱн окса кармакшы улы, тӹдӹм нӓлжӹ, тӓпнӓкӹмӓт нӓлжӹ, а кӱн мечшӹ уке, ӹшке выргемжӹм выжалыжы дӓ нӓлжӹ.
37 Сирӹмӹ: ”Законым пыдыртышы лошкы пыртенӹт”.* Тӓлӓндӓ попем: ти шамаквлӓ Мӹлӓм шокталтшашлык ылыт. Мӹнь шотыштем цилӓжӓт мычашыш шоэш».
38 Нӹнӹ келесенӹт: «Господь, теве тиштӹ кок меч!» Иисус келесен: «Ситӓ!»
39 Иисус лӓктӹн дӓ молнамшы семӹньок Елеон кырыкыш кен. Паштекшӹ тыменьшӹвлӓжӹ толыныт.
40 Вӓрӹш миэн шомыкы, Тӹдӹ нӹнӹлӓн келесен: «Аздаралташ ӹнжӹ ли манын, ыдылда».
41 А Ӹшкежӹ нӹнӹ гӹц кӱм шумы нӓрӹшкӹ карангын дӓ, сукалтен вазын, сарвален ыдылын:
42 «Ӓти, ти цӓшкӓм Мӹнь гӹцем ӧрдӹжӹш карангдаш шанет ылгецӹ! Но Мӹнь шанымем семӹнь агыл, а Тӹнь шанымет семӹнь лижӹ».
43 Тӹдӹлӓн пӹлгом гӹц Ангел кайын дӓ силам пуэн.
44 Ясыланымыжы доно Иисус эчеӓт силанрак ыдылын, Тӹдӹн пӱжвӹдшӹ мӱлӓндӹш йогышы вӹр патькалтыш гань ылын.
45 Ыдылмыкы, Тӹдӹ кӹньӹлӹн, тыменьшӹвлӓжӹ докы толын дӓ ужын: нӹнӹ ойхышты доно амален кенӹт.
46 Тӹдӹ нӹнӹлӓн келесен: «Тӓ малын амаледӓ? Кӹньӹлдӓ дӓ, аздаралташ ӹнжӹ ли манын, ыдылда».
47 Тӹдӹн попымыжы годымок эдем цуца толын лӓктӹн, а анзылны луаткок тыменьшӹжӹ гӹц иктӹжӹ, Иуда лӹмӓнжӹ, ашкедӹн. Тӹдӹ, шыпшалаш манын, Иисус докы лишемӹн. Иисусым техень пӓлӹк доно анжыктышашлык ылын: «Кӱм шыпшалам, Тӹдӹ Иисус».
48 Иисус тӹдӹлӓн келесен: «Иуда, Эдем Эргӹм шыпшалмет доно выжалет ма?»
49 Иисус сага ылшывлӓ, ма лишӓшлыкым ужмыкы, келесенӹт: «Господь, меч доно роалаш гӹнь веле?»
50 Нӹнӹ логӹц иктӹжӹ архиерейӹн цоражым роалын, тӹдӹн вургымла пӹлӹшӹжӹм пӹчкӹн шуэн.
51 «Ситӓ, цӓрнӹдӓ!» – Иисус келесен, цоран пӹлӹшӹжӹм тӹкӓлӹн дӓ паремден.
52 А Тӹдӹ ваштареш погынен толшы архиерейвлӓлӓн, Йымын пӧрт оролышывлӓн вуйлатышывлӓлӓн дӓ халыкын когораквлӓжӹлӓн келесен: «Мечӹм, шывыньым нӓлӹн, разбойник вӹкӹ лӓкмӹлӓ, тӓ Мӹньӹм кычаш толында ма?
53 Мӹнь кечӹнь Йымын пӧртӹштӹ тӓ лоштыда ылынам, но тӓ Мӹнь вӹкем кидӹм лӱктӓлделда. А кӹзӹт – тӓмдӓн жепдӓ дӓ пӹцкемӹшӹн властьшы».
54 Нӹнӹ Иисусым кыченӹт дӓ архиерейӹн пӧртӹшкӹжӹ нӓнгенӹт. А Петр ӧрдӹж гӹц паштекӹштӹ кен.
55 Кудывичӹ покшалны тылым олтенӹт, эдемвлӓ тыл йӹр шӹнзӹнӹт, Петрӓт лошкышты шӹнзӹн.
56 Тӹдӹн тыл сага шӹнзӹмӹжӹм ужын, ик тӓрзӹ ӹдӹр тусарен анжалын дӓ келесен: «Ти эдемӓт Тӹдӹн доно иквӓреш ылын».
57 Но Петр тореш попен: «Мӹнь Тӹдӹм ам пӓлӹ, ӹдӹрӓмӓш!»
58 Изиш варарак вес эдем тӹдӹм ужын дӓ келесен: «Тӹнят нӹнӹ логӹц ылат». Петр келесен: «Уке, нӹнӹ логӹц ам ыл!»
59 Ик цӓш нӓрӹ эртен, эче иктӹ ӹняндӓрен попен: «Лачокат, ти эдемӓт Тӹдӹн доно ылын, вет тӹдӓт Галилей гӹцок».
60 Петр келесен: «Ма гишӓн тӹнь попет, ам пӓлӹ». Тӹнӓмок, тидӹм попымыжы годым, ӓптӓн мыралтен колтен.
61 Господь сӓрнӓлӹн, Петр вӹкӹ анжалын. Петр Господьын попымы шамакшым ӓшӹндӓрен: «Ӓптӓн мыралтымешкӹ, тӹньӹ Мӹнь гӹцем кым гӓнӓ карангат».
62 Петр тӹшецӹн лӓктӹн дӓ шӱм ясы доно мӓгӹрен.
63 Иисусым оролен кычышывлӓ Тӹдӹм мыскыленӹт дӓ шинӹт.
64 Тӹдӹн сӹнзӓжӹм питӹренӹт, шӹргӹ гӹц савенӹт дӓ ядыныт: «Пророк ылат гӹнь, кӱ Тӹньӹм савен, келесӹ!»
65 Тӹдӹм шукы йиш вес шамаквлӓ донат мыскыленӹт.
66 Кечӹ лӓкмӹкӹ, халыкын когораквлӓжӹ, архиерейвлӓ дӓ закон тымдышывлӓ погыненӹт, Иисусым Синедрионышты анзыкы нӓнгенӹт.
67 Нӹнӹ ядыныт: «Тӹнь Христос ылат гӹнь, мӓлӓннӓ келесӹ». Иисус вӓшештен: «Тӓлӓндӓ келесем гӹнь, тӓ ада ӹнянӹ.
68 А Ӹшке тӓ гӹцдӓ ядам гӹнь, ада вӓшештӹ дӓ Мӹньӹм ада колты.
69 Но тилец вара Эдем Эргӹ Силан Йымын вургымла велнӹжӹ шӹнзӓш тӹнгӓлеш».*
70 Цилӓн ядыныт: «Тенгежӹ, тӹнь Йымын Эргӹ ылат?» Иисус келесен: «Тидӹ Мӹнь ылам манын, тӓ попедӓ».
71 Нӹнӹ тӹнӓм маныныт: «Малан мӓлӓннӓ эче свидетельствуйымы келеш? Ӹшкежӹ гӹцок мӓ тидӹм колна!»
*22:37 Ис 53:12. *22:69 Пс 109:1.1 Тӹнӓм нӹнӹ цилӓн кӹньӹлӹнӹт дӓ Иисусым Пилат докы нӓнгенӹт.
2 Иисусым йӓтлӓш тӹнгӓлӹнӹт: «Мӓ ужынна: ти Эдем мӓмнӓн халыкым пыдырата, кесарьлан лӹм оксам тӱлӹмӹм цӓрӓ, Ӹшкӹмжӹм Христос-Кугижӓ манеш».
3 Пилат Иисус гӹц ядын: «Тӹнь иудейвлӓн Кугижӓштӹ ылат?» Иисус келесен: «Ӹшке тидӹм келесӹшӹц».
4 Архиерейвлӓлӓн дӓ халыклан Пилат попен: «Ти Эдемӹн нимахань вуйнаматшымат мӹнь ам мо».
5 Нӹнӹ пыт шалген попенӹт: «Тӹдӹ халыкым пыдыратылеш, улы Иудей мычкы тымда. Тӹнгӓлӹнжӹ Галилей гӹц, а ӹнде тишкӹ толын».
6 Галилей гишӓн колмыкы, Пилат ядын: «Тӹдӹ Галилей гӹц ма?»
7 Иисус Иродын кымдем гӹц ылмым пӓлен нӓлмӹкӹ, Тӹдӹм Ирод докы колтен. Тӹ кечӹвлӓн Иродат Иерусалимӹштӹ ылын.
8 Ирод шукердшен Иисусым ужнежӹ ылын, седӹндон, Тӹдӹм ужмыкы, когон сусу лин. Иисус гишӓн анзыцок шукым колын дӓ ӹнде иктӓ-махань цӱдӓм анжыктыжы манын вычен.
9 Иисуслан тӹдӹ шукы ядмашым пуэн, но Иисус нимамат попыде.
10 Архиерейвлӓ дон закон тымдышывлӓ тӹшток шалгенӹт дӓ Тӹдӹм когон йӓтленӹт.
11 Ирод ӹшке салтаквлӓжӹ доно иквӓреш Тӹдӹм мыскылен дӓ ваштылын, вара цевер выргемӹм чиктен дӓ Пилат докы мӹнгеш колтен.
12 Ти кечӹн Ирод дон Пилат тӓнг линӹт, тишкевек иктӹ-весӹ доно тышман ылыныт.
13 Пилат архиерейвлӓм, вуйлатышывлӓм, халыкым поген
14 дӓ нӹнӹлӓн попен: «Халыкым пыдыратылшы семӹнь мӹнь докем тӓ ти Эдемӹм кандендӓ. Теве мӹнь тӓ анзылныда Тӹдӹм терген лӓктӹм, но ти Эдемӹн тӓ йӓтлӹмӹдӓ семӹнь ик вуйнаматшымат шӹм мо.
15 Иродат моде, ти Эдемӹм тӹдӹн докы колтенӓм. Пушташ ситӹшӹм Тӹдӹ нимат ӹштӹде.
16 Мӹнь Тӹдӹм наказем, а вара колтем».
17 Празнык годым Пилат кычен питӹрӹмӹ логӹц иктӹжӹм нӹнӹлӓн ирӹкӹш колтышашлык ылын.
18 Но улы халык саслаш тӹнгӓлӹн: «Тӹдӹлӓн колымаш! А мӓлӓннӓ Вараввам колты!»
19 Халашты пыдыранзыкым тӓрвӓтӹмӹ дӓ эдемӹм пуштмы гишӓн Варавва питӹрен шӹндӹмӹ ылын.
20 Иисусым ирӹкӹш лыкташ шанен, Пилат угӹц нӹнӹлӓн попен.
21 А нӹнӹ сасленӹт: «Пыдален сӓкӹ! Тӹдӹм пыдален сӓкӹ!»
22 Кымшы гӓнӓ Пилат келесен: «Махань вара худам Тӹдӹ ӹштен? Тӹдӹм пушташ нимахань вуйнаматшымат мӹнь ам уж. Тӹдӹм наказем, вара колтем».
23 Иисусым пыдален сӓкӓш манын, нӹнӹ, когон саслен, пыт ядыныт. Вара архиерейвлӓ доно саслен сӹнгенӹт.
24 Пилат нӹнӹн ядмыштым ӹштӓш решен.
25 Пыдыранзыкым тӓрвӓтӹмӹ дӓ эдемӹм пуштмы гишӓн кызаматыш шӹндӹмӹ эдемӹм нӹнӹн ядмышты семӹнь ирӹкӹш лыктын, а Иисусым шанымышты семӹнь пушташ пуэн.
26 Кынам Иисусым нӓнгенӹт, Кириней гӹц ылшы Симоным роалтен кыченӹт. Тӹдӹ ныр гӹц толеш ылын. Вӹкӹжӹ крестӹм пиштенӹт дӓ Иисус паштек намалыктенӹт.
27 Иисус паштек когон шукы халык кен, Тӹдӹн верц ойхырен мӓгӹрӹшӹ ӹдӹрӓмӓшвлӓӓт ылыныт.
28 Иисус нӹнӹ векӹ сӓрнӓлӹн дӓ келесен: «Иерусалимӹн ӹдӹрвлӓжӹ, Мӹнь верцем идӓ мӓгӹрӹ. Ӹшке верцдӓ дӓ тетявлӓдӓ верц мӓгӹрӹдӓ.
29 Техень жеп толын шоэш, кынам попаш тӹнгӓлӹт: ”Тетям ӹштен керддӹмӹвлӓ, ӓзӓм ӹштӹдӹмӹвлӓ дӓ цӹзӹм пукшыдымывлӓ цӓшӓн ылыт”.
30 Тӹнӓм кырыквлӓлӓн ”Мӓ вӹкӹнӓ кенвацда!”, кӱкшикӓвлӓлӓн ”Мӓмнӓм леведдӓ!” манын попаш тӹнгӓлӹт.*
31 Ыжар пушӓнгӹ доно тенге ӹштӓт гӹнь, кукшыжы доно ма лиэш?»
32 Иисус доно иквӓреш пушташ худам ӹштӹшӹ кок эдемӹмӓт нӓнгенӹт.
33 «Лепкӓ» манмы вӓрӹш толмыкы, тӹштӹ Иисусым дӓ худам ӹштӹшӹвлӓм пыдален сӓкенӹт, иктӹжӹм вургымла монгыреш, весӹжӹм шалахай монгыреш.
34 Иисус попен: «Ӓти, нӹнӹм простьы, вет мам ӹштӹмӹштӹм ак ынгылеп». Шӹвӓм ӹштен, Тӹдӹн выргемжӹм пайыленӹт.
35 Халык анжен шалген. Вуйлатышывлӓӓт нӹнӹ доно иквӓреш мыскылен ваштылыныт дӓ попенӹт: «Ти Эдем йӓлӹм ытарен. Тӹдӹ Христос, Йымын Айырен нӓлмӹ ылеш гӹнь, ӹнде Ӹшкӹмжӹм ытарыжы!»
36 Салтаквлӓӓт Тӹдӹм мыскыленӹт. Лишкӹ миэн, шапы ӓрӓкӓм канденӹт
37 дӓ попенӹт: «Тӹнь иудейвлӓн Кугижӓштӹ ылат гӹнь, Ӹшкӹметӹм Ӹшке ытары!»
38 Тӹдӹн вуй вӹлнӹжӹ грек, рим, еврей буквавлӓ доно сирӹмӹ ылын: «Тидӹ – иудейвлӓн Кугижӓштӹ».
39 Пыдален сӓкӹмӹ худам ӹштӹшӹ гӹц иктӹжӹ Иисусым мыскылен попен: «Тӹнь Христос ылат гӹнь, Ӹшкӹметӹм дӓ мӓмнӓм ытары!»
40 А весӹжӹ тӹдӹм цӓрен попен: «Тӹньӹ Йымы гӹц ат лӱд ма? Тӹнь ӹшкежӓт тенгеок суйымы ылат!
41 Мӓмнӓм тӧр суенӹт, мӓ пӓшӓнӓ семӹнь нӓлӹннӓ, а Тӹдӹ нимат худам ӹштӹде».
42 Вара Иисуслан келесен: «Господь, ӹшке Кугижӓншӹшкет толмыкет, мӹньӹм ӓшӹндӓрӹ!»
43 Иисус тӹдӹлӓн келесен: «Тӹлӓнет лачок попем: тагачок Мӹнь донем иквӓреш райышты лиӓт».
45 (44-45) Куд цӓшӹш кемӹкӹ,* кечӹ пӹцкемӹшӓлтӹн, улы мӱлӓндӹ вӹлнӹ ӹндекш цӓш якте пӹцкемӹш лин. Йымын пӧртӹштӹ кечӹшӹ кого савыц покшец кышкедӓлтӹн.
46 Иисус когон сӹгӹрӓл колтен: «Ӓти, Тӹньӹн кидӹшкет йӓнгем пуэм!»* Тидӹм келесӹмӹкӹ, колен.
47 Ма лимӹм ужмыкы, шӱдӹвуй Йымым лӹмлештӓрен дӓ попен: «Ти Эдем лачокшымок тӧр ӹштӹшӹ ылын».
48 Пыдален сӓкӹмӹм анжаш погынышывлӓ, ма лимӹм ужмыкы, ӹшкӹмӹштӹм онг гӹц шин,* токышты кенӹт.
49 Иисусын цилӓ пӓлӹмӹвлӓжӹ, тенгеок Галилей гӹц Тӹдӹн паштек толшы ӹдӹрӓмӓшвлӓ ӧрдӹжӹштӹ шалгенӹт дӓ тидӹм анженӹт.
50 Теве Иосиф лӹмӓн эдем толын. Тӹдӹ Синедрионыш пырен, пуры дӓ тӧр ӹштӹшӹ эдем ылын.
51 Тӹдӹ Синедрионын шанен пиштӹмӹжӹ дӓ мам ӹштӹмӹжӹ доно келшӹде. Иосиф иудейвлӓн Аримафей хала гӹц ылын дӓ Йымын Кугижӓншӹм вычен.
52 Иосиф Пилат докы кен дӓ Иисусын кӓпшӹм ядын.
53 Иосиф кӓпшӹм валтен, итӹн мӹнереш вӹдӹлӹн дӓ кӱ кырык нереш капайымы шӹгерлӓ ыражыш пиштен. Ти шӹгереш иктӹмӓт эче пиштӹделыт ылын.
54 Тӹнӓм когарня кечӹ ылын, кукшыгечӹ лишемӹн.
55 Иисус доно иквӓреш Галилей гӹц толшы ӹдӹрӓмӓшвлӓӓт Иосиф паштек кенӹт дӓ шӹгерӹм, Иисусын кӓпшӹм кыце тӹшкӹ пиштӹмӹм анженӹт.
56 Халашкы пӧртӹлмӹкӹ, тотлы пышанвлӓм дӓ миром йӓмдӹленӹт. Законын шӱдӹмӹжӹм шоктен, нӹнӹ кукшыгечӹн кӓненӹт.
*23:30 Ос 10:8. *23:44 Куд цӓш – мӓмнӓн жеп доно тура кечӹвӓл. *23:46 Пс 30:6. *23:48 Онгым шимӓш тиштӹ ойхым анжыкта.1 Кукшыгечӹ иргодеш, йӓмдӹлӹмӹ ӱвлӓм нӓлӹн, ӹдӹрӓмӓшвлӓ ир жерӓ лӓкмӹ годым шӹгер докы толыныт. Нӹнӹ доно иквӓреш икманяр вес эдем ылын.
2 Нӹнӹ ужыныт: шӹгер ӓнгӹштӹшӹ кӱм карангдымы ылын.
3 А кӧргӹш пырымыкы, Господь Иисусын кӓпшӹм моделыт.
4 Кынам ӹдӹрӓмӓшвлӓ тидӹлӓн ӧрӹн шалгенӹт, трӱк анзылнышты йӹлгӹжшӹ выргемӓн кок пӱэргӹ лӓктӹн шагалын.
5 Лӱдмӹштӹ доно ӹдӹрӓмӓшвлӓ вуйыштым кымык сӓкенӹт. Пӱэргӹвлӓ нӹнӹлӓн попенӹт: «Малын тӓ ӹлӹшӹм колышывлӓ лошты кӹчӓлӹдӓ?
6 Тӹдӹ тиштӹ уке, ӹлӹж кӹньӹлӹн. Эче Галилейӹштӹ ылмыжы годымок мам тӓлӓндӓ попен, ӓшӹндӓрӹдӓ:
7 ”Эдем Эргӹ сулыкан эдемвлӓн кидӹш пуалтшашлык, пыдален сӓкӓлтшӓшлык дӓ кымшы кечӹн ӹлӹж кӹньӹлшӓшлык”».
8 Ӹдӹрӓмӓшвлӓ Иисусын шамакшым ӓшӹндӓренӹт.
9 Шӹгер гӹц пӧртӹлмӹкӹ, цилӓ тидӹм луатик тыменьшӹлӓнжӹ дӓ цилӓ молыланат шайыштыныт.
10 Ӹдӹрӓмӓшвлӓ Мария Магдалина, Иоанна дӓ Иаковын Мария ӓвӓжӹ дӓ молат ылыныт. Нӹнӹ тидӹ гишӓн Апостолвлӓлӓн попенӹт,
11 но нӹнӹлӓн шамакышты так попымашеш чучын, дӓ ӹдӹрӓмӓшвлӓлӓн ӹнянӹделыт.
12 Тенге гӹнят, Петр тӹнӓмок шӹгер докы кыргыжын. Анжалаш пӱгӹрнӹмӹкӹ, вӹдӹлмӹ мӹнер кимӹм веле ужын дӓ, ма лимӹлӓн ӧрӹн, мӹнгеш толын.
13 Ти кечӹнок Иерусалим гӹц Еммаус лӹмӓн солаш кок тыменьшӹжӹ кенӹт, ти корным ялын кок цӓшӹштӹ эртӓш лиэш ылын.*
14 Цилӓ ма лимӹ гишӓн нӹнӹ ӹшке лоштышты попенӹт.
15 Попымышты дӓ ланзылымышты годым Иисус Ӹшкежӓт нӹнӹ докы лишемӹн дӓ иквӓреш ашкедӹн.
16 Но нӹнӹн сӹнзӓштӹ питӹрӹмӹ ганьы лин, нӹнӹ Тӹдӹм пӓлӹделыт.
17 Иисус нӹнӹлӓн келесен: «Кемӹдӓ годым тӓ ма гишӓн хытыредӓ? Малын тӓ сылык ылыда?»
18 Иктӹжӹ, Клеопа лӹмӓнжӹ, Иисуслан келесен: «Ти кечӹвлӓн тӹштӹ ма лимӹ гишӓн пӓлӹдӹмӹжӹ Иерусалимӹш толшывлӓ лошты Тӹнь веле ылат, шанем».
19 Иисус ядын: «Ма гишӓн?» Нӹнӹ келесенӹт: «Назарет Иисус доно ма лимӹ гишӓн. Тӹдӹ пророк ылын, Йымы дӓ улы халык анзылны пӓшӓ донат, шамак донат силан ылын,
20 но мӓмнӓн архиерейвлӓнӓ дӓ вуйлатышывлӓнӓ Тӹдӹм кыченӹт дӓ пушташ суйыктенӹт, крестеш пыдален сӓкенӹт.
21 А мӓ ӹнянен выченнӓ: кӱ Израильӹм ирӹкӹш лыкшашлык, тидӹ – Тӹдӹ. Но тидӹ эче цилӓ агыл: Иисус доно тенге лимӹлӓн тагачы кымшы кечӹ,
22 а теве мӓмнӓн ӹдӹрӓмӓшвлӓ логӹц икманярыжы мӓмнӓм ӧрӹктӓренӹт. Нӹнӹ ирок ирӹ шӹгер докы кенӹт,
23 Тӹдӹн кӓпшӹм моделыт, пӧртӹлӹнӹт дӓ попенӹт: мӓлӓннӓ Ангелвлӓ кайыныт дӓ Иисус ӹлӓ маныныт.
24 Вара мӓ сагана ылшывлӓ логӹц икманярыжы шӹгер докы кенӹт дӓ ӹдӹрӓмӓшвлӓ шайыштмы ганьымок ужыныт, но Тӹдӹм Ӹшкӹмжӹм ужделыт».
25 Иисус келесен: «Тӓ махань шанен моштыдымы ылыда! Пророквлӓн попымыштылан ӹнянӓш тӓлӓндӓ махань ясы!
26 Христос ти орланымаш гач эртӹшӓшлык дӓ вара лӹмлештӓрӓлтмӓшкӹжӹ шошашлык агыл ыльы ма?»
27 Вара Моисей гӹц дӓ цилӓ пророквлӓ гӹц тӹнгӓлӹн, Ӹшке гишӓнжӹ цилӓ Писаништӹ мам келесӹмӹ, нӹнӹлӓн ынгылдарен.
28 Кешӓшлык солашкы лишеммӹкӹ, Иисус пакыла кеӓш шанышыла кайын.
29 Но Тӹдӹм Клеопа дӓ вес тыменьшӹжӹ цӓренӹт: «Мӓ сагана код, кечӹ вады векӹ сӓрнӓлӹн». Иисус пӧртӹш пырен дӓ нӹнӹ доно кодын.
30 Нӹнӹ сага стӧл лошты ылмыжы годым Иисус киндӹм нӓлӹн, благословаен, тодылын дӓ нӹнӹлӓн пуэн.
31 Тӹнӓм сӹнзӓштӹ пачылтын, дӓ нӹнӹ Тӹдӹм пӓленӹт, но Иисус нӹнӹлӓн кайдымы лин.
32 Тыменьшӹвлӓжӹ иктӹ-весӹштӹлӓн попенӹт: «Мӓлӓннӓ корнышты попымыжы, Писаним ынгылдарымыжы годым йӓнгнӓ ӹш йылы ма?»
33 Нӹнӹ кӹньӹлӹнӹт дӓ тӹнӓмок Иерусалимӹш пӧртӹлӹнӹт. Тӹштӹ иквӓреш погынышы луатик Апостол дӓ сагашты ылшывлӓ докы миэнӹт.
34 Погынышывлӓ келесенӹт: «Господь лачокат ӹлӹж кӹньӹлӹн дӓ Симонлан кайын».
35 А Клеопа дон тӓнгжӹ корнышты ма лимӹ дӓ киндӹм тодылмыжы годым кыце Иисусым пӓлӹмӹштӹ гишӓн шайыштыныт.
36 Нӹнӹ шайыштмышты годымок Иисус Ӹшкежок лоштышты шалген дӓ келесен: «Тӓлӓндӓ тыр лижӹ!»
37 Нӹнӹ когон ӧрӹнӹт дӓ лӱдӹнӹт, шӱлӹшӹм ужына, шаненӹт.
38 Нӹнӹлӓн Иисус попен: «Малын тӓ тенге ӧрӹдӓ? Малын тӓмдӓн йӓнгӹшкӹдӓ техень шанымаш пыра?
39 Мӹньӹн кидем дӓ ялем анжалда – тидӹ Мӹнь Ӹшке ылам. Мӹньӹм тӹкӓлдӓ дӓ анжалда. Шӱлӹшӹн кӓпшӓт, лужат уке, а Мӹньӹн, ӹшкеӓт ужыда, улы».
40 Тенге попымыкыжы, нӹнӹлӓн кидшӹ дон ялжым анжыктен.
41 Нӹнӹ сусу лимӹштӹ доно эче ӹнянӹделыт, ӧрӹнӹт веле. Тӹнӓм Иисус ядын: «Тӓмдӓн иктӓ-махань качкышда тиштӹ улы?»
42 Нӹнӹ кӱктӹмӹ кол лаштыкым дӓ кӓрӓшӓн мӱм пуэнӹт.
43 Иисус нӓлӹн дӓ анзылнышток качкын.
44 Вара келесен: «Эче тӓ сагада иквӓреш ылмем годым тидӹ гишӓнок попенӓм: Мӹнь гишӓнем Моисейӹн законыштыжы, пророквлӓн книгӓвлӓштӹ дӓ Псаломвлӓштӹ сирӹмӹ цилӓжӓт шокталтшашлык».
45 Вара Писаним ынгылаш ышыштым пачын.
46 Иисус келесен: «Тенге сирӹмӹ: Христос тенге орланышашлык дӓ кымшы кечӹн колымаш гӹц ӹлӹж кӹньӹлшӓшлык ылын.
47 Иерусалим гӹц тӹнгӓлӹн, цилӓ халыквлӓлӓн Тӹдӹн лӹм доно сулык гӹц карангмы дӓ сулыкыштым простьымы гишӓн увертӓрӹмӹлӓ.
48 Тӓ тидӹлӓн пӓлдӹртӹшӹ ылыда.
49 А Ӓтям мам сӧрен, тӓлӓндӓ тӹдӹм Мӹнь колтем. Тӓ, кӱшӹц силам нӓлмешкӹдӓ, Иерусалим халаэшок кодда».
50 Иисус тыменьшӹвлӓжӹм хала гӹц Вифани якте лыктын, тӹштӹ Тӹдӹ кидшӹм лӱктӓлӹн дӓ нӹнӹм благословаен.
51 Благословайымыжы годымок Иисус нӹнӹ гӹц карангаш дӓ пӹлгомыш кузаш тӹнгӓлӹн.
52 Нӹнӹ Тӹдӹлӓн кымалыныт. Вара Иерусалимӹш кого сусу доно пӧртӹлӹнӹт
53 дӓ со Йымын пӧртӹштӹ ылыныт, Йымым хваленӹт дӓ лӹмлештӓренӹт. Аминь.
*24:13 Кок цӓш кемӹ корны – греклӓ «кудлу стади». Ик стадин кытшы 185 метр нӓрӹ ылеш.