Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ГÖРД САРИДЗЫН ЕГИПЕТСАЯСЛÖН КУЛÖМ
Войнас египетсаяс тшöтш пырисны потöм саридзö, мед вöтöдны Израиль войтырöс. Асывнас Ен шызьöдіс египетса тышкайöзöс. Налöн тарантасъясыс сибдісны сы выйöдз, мый сьöкыд вöлi перйынысö. Египетсаяс шуисны öта-мöдныслы: «Пышъямöй израильсаясысь! Господьыс тышкасьö на пыдди».
Кор Енлöн став войтырыс вуджис саридзсö, Ен шуис Мöисейлы: «Нюжöд китö саридзланьыс». Мöисей вöчис, кыдзи тшöктiс сылы Ен. Саридзыс важ мозыс кутiс гыавны, а став египетса тышкайöз пöдiсны ва пытшкас. Кор Израиль войтыр аддзис, кыдзи Енмыс вына кинас мездiс найöс египетсаясысь, повзис Енсьыс да эскис Сылы и Сылöн Мöисей кесйöглы. Сэки Мöисей Израиль войтыркöд сьылiс ошкана сьыланкыв вына Мездысьлы:
– Господь – менам вынöй, Сiйö мездiс менö.
Сiйö – менам Енмöй, ошка Сiйöс.
Господьöй, Тэнад веськыд киыд шензьöдö аслас выннас.
Тэнад веськыд киыд, Господьöй, вермö паныд мунысьöс.
Аслад ыджыд вынöн Тэ пасьвартан Тэныд паныд сувтысьöс.
Эм-ö Тэ кодьыс енъяс пöвстын?
Эм-ö Тэ кодьыс вежалунöн шензьöданаыс,
бурö пуктанаыс, вöчöмторъясöн нималанаыс,
шензьöданаторъяс вöчысьыс?
Господь ыджыдалö нэмъяс чöж!
Петöм 14:23-31, 15:1-18
96 
