Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ИСУСÖС МЫЖДÖМ
Пилат тшöктiс чорыда нöйтны Исусöс. Шыпуртаяс пуктiсны Исуслы юрас лежнöгысь кыöм юркытш, пасьтöдiсны Сiйöс пемыдгöрд паськöмö да шуалiсны: «Мед олас юдейяслöн Öксы!» Сэсся кучкалiсны чужöмас.
Пилат бара петiс йöзыс дiнö да шуис: «Ме петкöда Сiйöс тiян дiнö, медым тöдiнныд: ме некутшöм мыж Сылысь ог аддзы». Исус петiс пемыдгöрд паськöма, юр вылас вöлi лежнöгысь юркытш. Пилат шуис йöзыслы: «Со, тайö Мортыс». Исусöс аддзигöн аркирейяс да крам видзысьяс горöдiсны: «Тувъяв! Тувъяв Сiйöс!» Пилат шуис налы: «Ме некутшöм мыж Сылысь ог аддзы». Найö вочавидзисны: «Индöдным серти Сылы колö кувны, öд Асьсö Сiйö Ен Пиöн шуö».
Тайöс кылöм мысти Пилат ёнджыка на повзис. Сiйö пырис керкаас да юалiс Исуслысь: «Тэ кытысь?» Исус сылы нинöм эз вочавидз. Пилат шуис: «Он кöсйы сёрнитны мекöд? Он öмöй Тэ тöд, мый ме верма тувъявны Тэнö, верма и мездыны?» Исус вочавидзис: «Тэ эськö нинöм эн вермы вöчны Мекöд, эз кö вöв сетöма тэныд вылiсянь. Та вöсна Менö вузалысь ёнджыка на мыжа». Тайöс кылöм бöрын Пилат кöсйис лэдзны Исусöс. Сiйö петкöдiс Исусöс ывлаö, ачыс пуксис мыждан пуклöсö да шуис юдейяслы: «Со, тiян Öксыныд!» Найö горöдiсны: «Босьт, тувъяв Сiйöс!»
Аркирейяс пöрысьяскöд ыззьöдiсны йöзсö, мед корасны лэдзны Варавваöс. Пилат юалiс: «Мый шуанныд вöчны Исускöд, кодöс Кристосöн шуöны?» Ставныс горöдiсны: «Тувъявны!» «Мый лёксö Сiйö вöчис?» – юалiс Пилат. Йöзыс гораджыка на горöдiсны: «Тувъявны Сiйöс!» Пилат аддзис: йöзыс оз лöньны, мöдарö, ёнджыка на шызьöны. Сэки налöн син водзын Пилат мыськис кисö да шуис: «Ме абу мыжа тайö веськыда олысь мортсö виöмысь. Видзöдöй асьныд». Став йöзыс воча горöдiсны: «Мед Сылöн вирыс миян вылö да миян челядьным вылö коляс». Сэки Пилат лэдзис Варавваöс, а Исусöс нöйтöм бöрын сетiс тувъявны.
Матвей 27:20-26, Иоан 19:1-16
422 
