Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ИЗРАИЛЬ МУ ЮКСЬÖ КЫК ПЕЛЬÖ
Саул, Давид да Соломон öксыяс дырйи Израиль му сулалiс сё кызь во. Быдöн на пиысь юралiс нелямын во чöж. Соломонлöн кулöм бöрын муыс юксис кык пельö: Израиль да Иуда юкöнъяс вылö. Тайö лои тадзи. Сикем карын чукöртчис став Израиль войтырыс, медым пуктыны Соломонлысь Ровоам писö öксыö. Еровам нима сюсь вежöра том морт Израиль войтыркöд шыасис Ровоам дiнö: «Тэнад батьыд сьöкыда нартитлiс миянöс. Кокньöд миянлысь сьöкыд уджсö да чорыда нартитöмсö. Сэки ми кутам кесъявны тэныд».
Ровоам сёрнитiс пöрысьяскöд, кодъяс кесъявлiсны Соломон батьыслы. Найö шуисны сылы: «Тэ кö талун кутан кесъявны тайö войтырыслы да могмöдан налысь корöмсö, найö лоасны тэныд кесйöгъясöн нэм кежлад». Но Ровоам эз пыдди пукты пöрысьяслысь вöзйöмсö. Сiйö мунiс сёрнитны ас арлыда том йöзкöд, кодъяс кесъялiсны сылы. Найö вöзйисны: «Шу войтырыдлы: менам кö батьöй сьöкыда нартитлiс тiянöс, ме кута ёнджыка на нартитны. Сiйö кö кучкавлiс тiянöс беддьöн, ме кута нöйтны тiянöс кöрт пома орсöн». Ровоам вочавидзис Израиль войтырлы том йöзлöн вöзйöм серти.
Кыдзи ми тöдам нин, Яковлöн дас кык писянь Израильын лои дас кык чужанкотыр. Ровоамлысь кывъяссö кылöм бöрын дас чужанкотырыс кыпöдчис сылы паныд, торйöдчис да пуктiс öксыö Еровамöс. Налöн муыс шусис Израильöн. Сiйöс шуöны тшöтш Войвыв муöн, öд сiйö кöсйысьöм мулöн войвыв юкöныс. Тайö Израиль муыс сулалiс кыксё во. Сiйöс бырöдiс ассирияса öксы 722 воын Кристос чужтöдз.
Ровоамкöд кольччисны сöмын Иудалöн чужанкотыр да кодсюрö Венямин чужанкотырысь, кодъяс артмöдiсны Иуда му. Сiйö вöлi кöсйысьöм муын лунвылас, та вöсна сiйöс шуöны тшöтш Лунвыв муöн. Сэнi юркарнас вöлi Ерусалим. Иуда му сулалiс 350 во гöгöр. Сiйöс бырöдiсны вавилонсаяс 586 воын Кристос чужтöдз.
Öксыяслöн коймöд небöг 12
186 
