Выбрать язык
Выбрать рассказ Ветхого Завета
Выбрать рассказ Нового Завета
Исусыс висьтасяс отирлö велöтана висьтас:
Öтiк мортлöн вöлiсö кык зон. Учöтжык зоныс айыслö шуас: «Айö, сет меным ассим пайöс». Сэк айыс торйöтöм пайнысö кыкнан зоныслö.
Кынымкö лун бöртi учöтжык зоныс быдöс ассис пайсö öктас да мунас ылiсь муэзö. Сэтчин лэдзчисьöмöн олiкö быдöс видзыштас. Сiя кадö нiя муэзын пондöтчас тшыг олан. Зонкаыслöн быдöс бырас, овны лоöм сьöкыт. Сiя мунас öтiк морт дынö, медасяс видзöтны порссез сьöрын. Мукöдпыр сiя мöдöм сёйны нельки порсь сёянсö, сылö озö лэдзö. Сэк зонкаыс шуас аслыс: «Кыным медалöм морт сёйö менам айлiсь няньсö пöттöдз! Ме татöн кула тшыгйöн. Муна айö дынö да висьтала сылö: Айö, ме умöльсö кери Ен одзын да тэ одзын. Ме ог лöсяв тэныт зонö, медав менö аслат уджалiсьö». Чожа сыбöрын мунас айыс дынö.
Зонкаыс вöлöм ылынкодь на, айыс казялас сiйö, котöртас паныт, сывтыртас*а, окалас, шуас аслас отсасиссезлö: «Нач кылö бура вердöм куканьöс. Пондам сёйны-юны, гажöтчыны! Менам зонö эд вöлi кулöм ни да ловзис. Сiя öшлiс да бöр адззисис». Сiдз быдöнныс пондасö гажöтчыны.
Ыджытжык зоныс сiя кадö вöлöм ыб вылын. Ыб вылiсь бертöм бöрын кылас сьылöм-гажöтчöм. Сiя корас дынас öтiк отсасисьöс, юалас: «Мый нö лоис?» Мöдыс висьталöм: «Тэнат воныт локтiс. Айыт тшöктiс начкывны бура вердöм куканьöс, воныт локтiс ловья да». Мöдыс лöгасяс, оз мöд нельки пырны керкуас. Айыс петас, корас сiйö. Зоныс горöтчас айыслö: «Кыным во*б ме уджала тэныт, пыр кывзiси. Тэ эд меным эн сетлы нельки кöзапиянöс, мед ме верми гажöтчыны ёрттэзöкöт».
Айыс висьталас: «Зонö, тэ пыр мекöт. Мый менам, сiя тэнат. Гажöтчыны колö воныт понда: сiя вöлi кулöм ни да ловзис, öшлiс да бöр адззисис».
Лука 15:11-32
*а сывтыртны – обнять
*б во – год
90 