Davidan psalm. 1Ižand om kunigaz! Säraikat kaik mirun rahvahad! Hänen valdištmen kandaba heruvimad. Säraida, ma! 2Ižand om sur’ Sionas, hän om ülembaine kaikiden mirun rahvahiden päl. 3Kitkat hänen sur’t da pöl’gästoitajad nimed! Se om pühä.
4Kunigahan vägi om siš, miše hän navedib oiktad sudad. Sinä toid oiktuden, sinä andoid Izrail’ale oiktan sudan da toden. 5Ülenzoitkat Ižandad, meiden Jumalad, kumarkatoiš hänen jaugoiden alandusihe. Ned oma pühäd.
6Moisei da Aaron oliba papiden kogos, Samuil oli heiden gruppas, ked kuctihe abuhu hänen nimed. Hö kirguiba Ižandad, i hän andoi heile vastusen. 7Pil’vpachaspäi hän pagiži heile, hö tegiba hänen sanoiden da käsköiden mödhe, miččid hän andoi heile. 8Sur’ Sünduižem, meiden Jumal, sinä andoid heile vastusen, sinä prostid heid, hot’ openzid-ki heid kovas heiden pahoiš tegoiš. 9Ülenzoitkat Ižandad, meiden Jumalad, kumarkatoiš hänen pühäl mägel, sikš ku Ižand, meiden Jumal, om pühä.
с русским текстом