1Horan ohjandajale. Korejan poigiden psalm. 2Sur’ Sünduižem! Sinä oled olnu ičeiž male hüvä. Sinä pördutid Jakovan rodun ozan: 3sinä pästid sinun rahvahan grähkäd, katoid kaik heiden pahad radod, 4sinä tüništoitid sinun taban, sambutid sinun vihan lämoin.
5Tege meid enččikš, Jumal, meiden Päzutai! Ala enamba pidä vihad meiden päle. 6Jose sinä igäks käreganzid meiden päle i sinun viha jatkub pol’vespäi pol’vehe? 7Jose ed eläbzoita meid udes, miše sinun rahvaz ihastuiži sinus? 8Sur’ Sünduižem, anda meile nähta sinun armoid, päzuta meid.
9Minä kundlen, midä Ižand Jumal sanub. Hän toivotab mirud ičeze rahvahale i valitud mehile, vaiše algha hö langekoi möst meletomudehe. 10Hänen päzutand om tozi-ki läz nenid, ked varaidaba händast, i muga hänen hoštotez eläškab meiden mas. 11Armod da tozi vasttasoiš, oiged mel’ da mir sebaidasoiš. 12Tozi libub maspäi, oiged mel’ kacuškab sihe taivhaspäi. 13Ižand andab kaiked hüväd, a meiden ma andab villän. 14Oiged mel’ astub Ižandan edes i tegeb vaumheks hänele ten.
с русским текстом