1Pajo. Asafan psalm. 2Minun Jumal, ala ole vaitti! Ala ole vaihitoi da hil’l’, minun Jumal. 3Sinun vihanikad kidastaba, sinun vasthaolijad oma libutanuded päd. 4Hö punoba peitmanitust sinun rahvast vaste, ladiše kesknezoi mänetamha sinun kaičendas olijoid. 5Hö sanuba: «Lähtem da lopim kaiken rahvahan, muga miše Izrail’an nimi-ki unohtaižihe». 6Hö kožuihe kesknezoi, tegiba sindai vaste kožmusen: 7Edoman eländtahod da izmail’aižed, Moav da agarilaižed, 8Geval, Ammon i Amalik, filistil’aižed da Tiran eläjad. 9Assur-ki ühtni heihe, tuli abuhu Lotan poigile.
10Tege heile muga, kut tegid Madiamale, kut tegid Sisarale, kut Javinale Kissonan jogenno, 11kudambad surmitihe Aendoras, tehtihe hergeks man täht. 12Tege heiden knäzile muga, kut tegit Orivale da Zivale, i heiden pämehile, kut Zevejale i Salmanale, 13kudambad pagižiba: «Otkam ičelemoi ižandoitmaha Jumalan eländtahod».
с русским текстом