Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

АПОСТОЛЪЁСЛЭН УЖЪЁССЫ

Глава 7

7-тӥ ЛЮКЕТ

1Архиерей Стефанлэсь юаз: «Зэм-а со?»2Соку Стефан шуиз: «Агай-вынъёс, атайёс! Кылзӥськелэ! Пиштӥсь данлыклэн Инмарез асьмелэн Авраам атаймылы, солэн Харранэ улыны выжонэзлэсь азьвыл Месопотамияысен возьматскиз3но солы шуиз: ”Аслад музъемысьтыд, выжы-кумыед пӧлысь, атаедлэн коркасьтыз потыса, Мынам возьматоно музъемам мын”.4Соку со, Халдей музъемысь потыса, Харранэ улыны интыяськиз. Нош отысен, атаез кулэм бере, Инмар сое тӥляд али улон музъемады улыны выжытӥз.5Отын Инмар Авраамлы пыдтыш быдӟа но люкет музъем ӧз сёты. Но Инмар Авраамлы кыл сётӥз: Авраамлы но, со бӧрсьы кылем солэн выжыезлы но та музъемез Со люкетлы сётоз. Нош Авраамлэн соку нылпиосыз ӧй вал на.6Солы Инмар тазьы вераз: ”Тынад вуоно выжыосыд мурт музъемын улӥсьёс луозы; ляльчи радын улозы; ог ньыль сю ар ӵоже соосты ултӥяса возёзы.7Нош Мон, – Инмар шуиз, – соосты ляльчи радын возись калыкез судить каро. Собере соос отысь потозы но та интыын Мыным вӧсяськыса улозы”.8Соку Инмар Авраамлы вандӥськон сямез ортчытыны сӥзён-косон сётӥз. Собере Авраамлэн Исаак пиез вордскиз. Тямысэтӥ нуналаз Авраам солы вандӥськон сямез ортчытӥз; Исааклэсь вордскем Иаков, нош Иаковлэсь дас кык выжыослэн йыръёссы вордскизы.

9Вожъяськеменызы сэрен соос Иосифез Египетэ вузазы. Но Инмар Иосифез ӧз кушты.10Вань куректон-кайгуосызлэсь Инмар сое мозмытӥз. Египетлэн эксэез фараон азьын Иосифлы Со дэлет но визьлык сётӥз. Нош фараон Иосифез быдэс Египетлы, аслаз вань юртъерезлы кузёйыр карыса пуктӥз.11Собере сютэм ар, бадӟым куректон-кайгу вуиз быдэс Египетэ но, Ханаан музъеме но. Милям атайёсмы, кӧттыр шедьтытэк, сютэм улӥзы.12Иаков Египетын нянь вань шуыса кылӥз но атайёсмес нырысь ползэ отчы ыстӥз.13Нош соос кыкетӥ ползэ лыктэм бере Иосиф агай-вынъёсызлы аслэсьтыз кин луэмзэ шарае поттӥз. Соку Иосифлэн выжыез фараонлы но тодмо луиз.14Иосиф аслэсьтыз атайзэ, Иаковез, вань выжы-кумызэ – сизьымдон вить муртэ – ӧтьыны ыстӥз.15Иаков Египетэ улыны выжиз. Отын со ачиз но, атайёсмы но кулӥзы.16Мугорзэс Сӥхеме вайыса, шайгуэ понӥзы; со шайгуэз Авраам Сӥхемысь Емморлэн пиосызлэсь азвесь сётыса басьтӥз.

17Инмарлэн Авраамлы сӥзьыса сётэм дырыз матэ вуэмъя Египетын израиль калык йылӥз, лыдыз будӥз.18Озьы вал: Египетэ мукетыз эксэй пуксиз, Иосиф сярысь со номыр но уг тоды вал.19Таиз эксэй асьме выжылы пумит, кескич улӥз. Атайёсмес ӝиптыса возиз. Вордӥськем нылпиоссэс куштытъятӥз, – соос улэп медаз ни кыле шуыса.20Со вадесын Моисей вордӥськиз. Со Инмар азьын туж чебер-йӧно вал; куинь толэзь ӵоже сое атай юртаз сюдыса вордӥзы.21Нош сое куштыса кельтэмзы бере фараонлэн нылыз та нуныез шедьтыса басьтӥз но, ас дораз вайыса, пизэ кадь сое утиз-вордӥз.22Египетлэн вань визьнодлыкезлы Моисей дышетэмын вал; кылын но, ужен но со кужмо луиз.

23Моисейлы ньыльдон арес тырмем бере со, израиль пиос доры мыныса, агай-вынъёсыныз адӟиськыны мылкыд кариз.24Египет пилэсь израиль пиез ултӥямзэ со адӟиз но со пилы дурбасьтӥз; ултӥям мурт понна пунэмзэ берыктыкуз, Египет пиез вииз.25Со малпаз, солэн агай-вынъёсыз валалозы, Инмар со пыр израиль пиослы утиськон сётэ шуыса; нош соос ӧз валалэ.26Мукетаз нуналэ израиль пиослэсь куспазы жугиськемзэс адӟиз. Доразы лыктӥз но соосты куспазы тупаса улыны косӥз, со шуиз: ”Тӥ – агай-вынъёс, малы огдэс огды ултӥяськоды?”27Нош матысьсэ ултӥясь израиль пи Моисеез донгыса лэзиз но шуиз: ”Милемлы кин тонэ кузёйыр, судья карыса пуктӥз?28Монэ но виыны уд ӧдъяськы-а, кызьы тон толон египет пиез виид?”29Та кылъёс бере Моисей Египетысь пегӟыса кошкиз, Мадиан музъемын улыны кутскиз. Отысен солэн кык пиосыз вордскизы.

30Ньыльдон ар ортчыса, Сӥнай гурезь вӧзысь кыр музъемын, ӝуась тёрнпу куак пушкысен Моисейлы Кузё-Инмарлэн Кылчинэз возьматскиз.31Та адӟонлы Моисей туж паймиз. Нош матаз учкыны мынэм бераз солы Кузё-Инмарлэн куараез кылӥськиз:32”Мон – тынад атайёсыдлэн Инмарзы, Авраамлэн Инмарез, Исааклэн Инмарез, Иаковлэн Инмарез”. Куалектэменыз Моисей синзэ ӝутыны но ӧз дӥсьты.33Кузё-Инмар солы шуиз: ”Пыдысьтыд кутчандэ кыль, тынад али сылоно интыед – святой музъем ук!34Адӟи Мон, адӟи кызьы Мынэсьтым калыкме Египетын ӝиптыса возё, кылӥ солэсь викышъямзэ но сое мозмытыны васьки. Нош али лыкты, Мон тонэ Египетэ ысто”.35Самой та Моисеез, кудзэ израиль пиос тазьы вераса палэнтӥзы: ”Кин тонэ милемлы кузёйыр, судья карыса пуктӥз?” Самой та Моисеез тёрнпу куак пӧлысен возьматскем Кылчин пыр Инмар израиль калыклы кузёйыр, мозмытӥсь карыса ыстӥз.36Моисей соосты Египетысь поттӥз. Египет музъемын но, Горд Кам зарезьын но, кыр дуннеын но ньыльдон ар ӵоже паймымон ужъёс, паймымон тодметъёс лэсьтылӥз.

37Та самой со Моисей, израиль пиослы тазьы шуись: ”Инмарды Кузё-Инмар агай-вынъёсты пӧлысь, монэ кадь, тӥледлы Пророкез ӝутоз; Солэсь верамзэ кабыл басьтэ”.38Та самой со Моисей, кин кыр дуннеын люкаськем калык пӧлын Кылчинэн но атайёсынымы огазьын вал, Кылчин солы Сӥнай гурезь йылысен вераз. Со Инмарлэсь улэп кылъёссэ кабыл басьтӥз асьмелы сётон понна.39Нош атайёсмылэн Моисейлэсь кылзӥськемзы ӧз поты, сое кулэтэм каризы но сюлмынызы Египет пала берытскизы.40Ааронлы соос шуизы: ”Милемлы инмаръёс лэсьты, соос милям азьпаламы мед мынысалзы, ум тодӥське уго, мар луиз асьмеды Египет музъемысь поттӥсь Моисеен”.41Со нуналъёсы соос ошпи лэсьтӥзы но та сульдэрзылы-идолзылы курбон сётӥзы, асьсэлэн киынызы лэсьтэм маке азьын шулдыръяськизы.42Нош Инмар соослэсь палэнскиз но соосты инмысь кизилиослы йыбыртъяны кельтӥз, кызьы пророкъёслэн книгаязы гожтэмын:

”Израиль калык!
Ньыльдон ар ӵоже кыр дуннеетӥ ветлыкуды,
тӥ Мыным виро, курбон сётӥды-а?
43Сьӧрады тӥ нуллӥды Молохлэсь тылыссэ,
Ремфан инмардылэсь кизилизэ,
асьтэлы йыбыртъяны лэсьтэм суредъёстэс:
соин ик Мон тӥледыз Вавилонлэн сьӧраз улыны келяло”.

44Асьмелэн атайёсмылэн, кыр дуннеын улыкузы, сӥзён-косонэн скиниязы вал. Моисей сое Инмарлэн косэмезъя Инмысь адӟем скиниялы укшатыса лэсьтӥз.45Асьмелэн атайёсмы асьсэлэн атайёссылэн киысьтызы скинияез басьтӥзы. Иисус Навинлэн валтэм улсаз сое сьӧразы, атайёсмылэн син азьысьтызы Инмарен уллям калыкъёслэн музъемазы, нуизы. Отын со Давидлэн нуналъёсыз вуытозь улӥз.46Инмар Давидлы дэлет сётӥз, нош Давид Инмар азьын Иаковлэн Инмарезлы улон инты мед шедьтоз вал шуыса вӧсяськиз.47Нош Инмарлы корка Соломон пуктӥз.48Но Вылысь Инмарез адями киын лэсьтэм вӧсь коркаосы улыны интыяны уг луы. Уго пророк пыр шуэмын:

49”Ин – Мынам эксэй пуконэ,
музъем – Мынам пыдул лёгетэ;
Мыным кыӵе корка пуктоды? – шуэ Кузё-Инмар. –
Яке, кытын луыны быгатоз Мынам шутэтскон интые?
50Ваньмыз таос Мынам киыным кылдытэмын ӧвӧл шат?”

51Вог муртъёс! Сюлмынызы, пельынызы вандӥськымтэ адямиос! Кызьы ке тӥляд атайёсты, озьы ик тӥ но ялан Святой Духлы пумитъяськиськоды.52Вал-а одӥг ке но пророк, кудзэ тӥляд атайёсты ӧз уллялэ? Шонер Улӥсьлэсь лыктонзэ азьвыл ивортӥсьёсты соос виизы. Нош Сое вузасьёс, Сое виисьёс табере тӥ луиды, –53тӥ, кинъёс Кылчинъёс пыр Инмар закон басьтӥды, но солы ӧд тэрытске».

54Тае кылзыса, соос йырзы курен урмизы, пиньёссэс йырйизы.55Нош Стефан, Святой Духен тыр луыса, инме учкиз но Инмарлэсь пиштӥсь данлыксэ, Инмарлэн бурпалаз сылӥсь Иисусэз адӟиз.56Соку со шуиз: «Тани, мон усьтӥськем Инмез, Инмарлэн бурпалаз сылӥсь Адями Пиез адӟисько».57Нош соос шуш куараен кеськизы, пельёссэс ӵоксазы. Собере ваньзы ӵош со вылэ урдскизы.58Город сьӧры поттӥзы но со вылэ изъёс зӥръяны кутскизы. Адӟисьёс дӥськутсэс Савл нимо егит пилэн пыд выжыяз понӥзы.59Стефанэз изъёсын жугизы, нош со вӧсяськыса шуиз: «Кузё-Инмаре Иисус! Лулме Ас кияд басьты».60Собере пыдес вылаз султӥз но бадӟым куараен кеськыса вераз: «Кузё-Инмаре! Соослы тае сьӧлыклы эн гожты». Тае вераз но, лулыз потӥз.


предыдущая глава Глава 7 следующая глава