Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ЛУКАЛЭСЬ ӞЕЧ ИВОР

Глава 21

21-тӥ ЛЮКЕТ

1Иисус учкиз но узыръёслэсь ваньбур тырон шыкысэ кузьым тыремзэс адӟиз.2Озьы ик Со, отчы кык лепта понӥсь куанер улӥсь палкышноез адӟыса,3шуиз: «Зэм ик тӥледлы верасько: та куанер палкышно ваньмызлэсь уно коньдон понӥз.4Уго соос ваньзы мултэсэз ваньысь Инмарлы кузьым тыризы, нош со, куанер улыса но, кӧтсэ тырон понна маиз вань, ваньзэ понӥз».

5Куд-огъёсыз храм сярысь со дуно изъёсын, кузьымъёсын чеберъямын шуыса веразы, соку Иисус шуиз:6«Вуозы нуналъёс, куке, мае тӥ али адӟиськоды, ваньмыз куашкатэмын луоз, из вылэ из но уз кыльы».

7Солэсь юазы: «Дышетӥсь! Ку бен та луоз? Та луон азьын кыӵе тодмет луоз?»8Иисус шуиз: «Чаклаське, тӥледыз медаз йыромытэ, малы ке шуоно тросэз Мынам нимыным лыктозы но ”Мон – Христос” шуозы. Сыӵе дыр матын ини. Соослэн сьӧразы эн мынэ.9Ожмаськонъёс, бугыръяськонъёс сярысь кылӥды ке, эн кышкатске, ваньмыз та азьвыл луоно уго; но соку ик пумыз уз луы ай».10Соку Иисус соослы шуиз: «Калык калыклы, эксэйлык эксэйлыклы ваче пумит султозы;11интыен-интыен музъем кужмо зуркалоз, сютэм аръёс, урод черъёс, кӧшкемыт адӟонъёс луозы, инмысен туж бадӟымесь тодметъёс возьматскозы.12Но ваньмызлэсь таослэсь азьвыл тӥ вылэ кизэс вуттозы, тӥледыз уллялозы, сӥнагогаосы но пытсэтъёсы сётылозы, Мынам нимы понна эксэйёс азе, кивалтӥсьёс азе нуозы.13Соку тӥ Мон сярысь тодытоды.14Но тае сюлмады возе: мар вералом шуыса, азьло ик малпаськыса эн улэ.15Мон тӥледлы кыл но, визь но сёто, тӥляд пумитъяськисьёсты пӧлысь талы пумит кыл вераны, пумит султыны одӥгез но уз быгатэ.16Анай-атайёсты, агай-вынъёсты, ӵыжы-выжыосты, эшъёсты тӥледыз кутыса сётозы; куд-огдэс тӥ пӧлысь виёзы но.17Мынам нимы понна ваньмыз тӥледыз адӟемпотостэм карозы.18Но тӥляд йырысьтыды йырсиды но арам уз луы.19Чидан пыр лулъёстэс утелэ.

20Адӟиды ке солдатъёсын котыртэм Иерусалимез, соку тодэлэ, солэн тырттэм кылён дырыз матэ вуиз шуыса.21Соку Иудея музъеме учырамъёс гурезьёсы мед пегӟозы. Кин городын ке, потэ отысь; кин солэн котыраз ке, эн пыры отчы,22малы ке шуоно та пунэм берыктон нуналъёс, – мар гожтэмын, ваньмыз мед быдэсмоз.23Кайгу луоз со нуналъёсы нуны ваёноослы, нуны нонтӥсьёслы; уго музъем вылын туж бадӟым шугадӟон луоз, Инмарлэн вожпотонэз та калык вылэ усёз.24Усьылозы лэчыт палаш улэ; вань калыкъёс пӧлы пленэ нуэмын луозы. Язычникъёслэн дырзы бырытозь, Иерусалимез язычникъёс лёгаса возёзы.

25Шундыын но, толэзьын но, кизилиосын но тодметъёс луозы, нош музъем вылын – калыкъёс, мылкыдзы куашкаса, абдраса улозы. Зарезь туж шаугетоз, бугыръяськоз.26Адямиос кышкаса, дунне вылэ шугадӟонъёслэсь вуэмзэс возьмаса чоньдылозы, малы ке шуоно ин кужымъёс вырӟозы.27Соку пилем вылын быдӟым кужымен, пиштӥсь данлыкен лыктӥсь Адями Пиез адӟозы.28Та быдэсмыны кутскем бере соку шонертӥськыса йырдэс ӝутэ, – тӥляд мозмытсконды матэ вуэ».

29Иисус соослы мадён вераз: «Смоквапу шоры, вань писпуос шоры учке.30Соос куар поттыны кутско ке, тае адӟыса, гужем матын ни шуыса тодӥськоды.31Озьы ик тӥ но та тодметъёслэсь быдэсмемзэс адӟиды ке, тодэлэ, Инмар Эксэйлык матын ини шуыса.32Зэм ик тӥледлы верасько: та выжы бырытозь, ваньмыз но та луоз.33Ин но музъем бырозы, нош Мынам кылъёсы уз быре.

34Асьтэдыз асьтэос чаклалэ: мултэс сиыса, вина юыса, та улонлэн сюлмаськонъёсынызы сэрен сюлэмъёсты секыт медаз улы. Со нунал тӥледыз шӧдтэк шорысь медаз куты,35уго со музъем вылын вань улӥсьёс доры калтон кадь кутыны лыктоз.36Озьыен, котькыӵе дыре но сак улэ, вӧсяське, вань шугадӟонъёслэсь утиськыны но Адями Пи азе султыны мед быгатоды».

37Нуназе Со храмын дышетӥз, нош уйёсты Елеон шуон гурезьын ортчытъяз.38Вань калык ӵукна ик Иисус доры храме Сое кылзӥськыны ветлӥз.


предыдущая глава Глава 21 следующая глава