Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ЛУКАЛЭСЬ ӞЕЧ ИВОР

Глава 15

15-тӥ ЛЮКЕТ

1Солэн матаз вань выт бичасьёс, сьӧлыкоос Сое кылзӥськыны лыктӥзы.2Фарисейёсын книга тодӥсьёс ӟургетыса улӥзы, соос шуизы: «Со сьӧлыкоосын кусып возе, соосын огазьын сиське».3Соку Иисус соослы таӵе мадён вераз:4«Кин тӥ пӧлысь сю ыжез вань вылысь одӥгзэ ыштӥз ке, укмыстон укмыссэ кыре кельтыса, ыштэм ыжзэ шедьтытозяз уз утча?5Шедьтэм бераз шумпотыса сое пельпумаз ӝутоз.6Дораз бертыса, эшъёссэ, бускельёссэ ӧтёз но соослы шуоз: ”Монэн валче шумпотэ, мон ышем ыжме шедьтӥ”.7Тӥледлы верасько: озьы ик Инмын но, одӥг сьӧлыко мурт понна, кудӥз ӧпкельыса сьӧлыкъёсызлэсь куштӥське, укмыстон укмыс шонер улӥсьёс сярысь, кудъёсызлы ӧпкельыса сьӧлыкъёслэсь куштӥськыны кулэ ӧвӧл, бадӟымгес шумпотон луоз.

8Яке кыӵе кышномурт дас драхма коньдонэз вань вылысь одӥгзэ ыштӥз ке, сюсьтыл ӝуатыса, комнатазэ уз ӵужы но шедьтытозяз сое пыр-поч уз утча?9Нош шедьтэм бераз эшъёссэ, бускельёссэ ӧтёз но шуоз: ”Монэн валче шумпотэ, мон ыштэм драхмаме шедьтӥ”.10Озьы ик, тӥледлы верасько, одӥг сьӧлыко мурт ӧпкельыса сьӧлыкъёсызлэсь куштӥське ке, со понна но Инмарлэн Кылчинъёсыз шумпото».

11Эшшо вераз на: «Кыӵе ке но адямилэн кык пиез вылэм.12Соос пӧлысь покчиез атаезлы шуэм: ”Атай! Вай мыным юртъерлэсь сюроно люкетсэ”. Атаез юртъерзэ соослы люкем.13Трос ик нуналъёс ортчымтэ, покчиез пи ваньзэ, маиз вань, тырем но кыдёкысь шаере кошкем, калгыса, азыса улэм но отын вань юртъер люкетсэ тус-тас карем.14Ваньзэ быдтэм бераз со кунын туж секыт сютэм ар луэм, со ӟудыса улыны кутскем.15Мынэм но та кунын улӥсь одӥг мурт доры интыяськем, нош соиз бусыяз парсьёсты возьманы сое ыстэм.16Со шумпотыса кӧтсэ тырысал парсьёслы сюдоно пуртэсо сиёнэн, нош солы нокин но сое уг сёты вылэм.17Визь пырем бере со шуэм: ”Атае дорын кӧня медъяськем муртъёс нянен тыр уло, нош мон сютэм кулӥсько ини!18Султо, мыно атае доры но солы шуо: Атай! Инлы но, тон азьын но мон сьӧлыкай,19тынад пиед шуыса лыдӟиськыны но мон уг яраськы ни. Басьты монэ медоосыд радэ”.20Султэм но атаез доры кошкем. Кыдёкысен ик сое атаез адӟем, солы со жаль потэм, бызьыса мынэм но чырты бордаз ӟыгыртӥськыса чупам сое.21Нош пиез солы шуэм: ”Атай! Инлы но, тон азьын но мон сьӧлыкай, тынад пиед шуыса лыдӟиськыны но мон уг яраськы ни”.22Атаез ляльчиосызлы верам: ”Ваелэ умойзэ дӥськут, – дӥсялэ сое, кияз зундэс сётэ, пыдаз – пыдкутчан.23Куайытэмзэ кунянэз вайыса вандэ: сиёме, шулдыръяськоме,24уго мынам таиз пие кулэмын вал, но улӟиз, ышыса улӥз, но сюриз”. Шулдыръяськыны кутскиллям.

25Бадӟымез пиез бусыын вылэм. Бертыкуз, дорезлы матэ вуыса, кырӟам, шулдыръяськем куараосыз кылэм.26Медоос пӧлысь одӥгзэ ӧтьыса юам: ”Мар та таӵе?”27Соиз солы шуэм: ”Выныд бертӥз но, атаед куайытэм кунянзэ вандӥз, со таза куен берытскиз уго”.28Со вожзэ поттэм, корка пырыны ик уг ни малпа вылэм. Нош атаез потыса сое ӧтем.29Но со атаезлы ответ сётыса шуэм: ”Тани, кӧня ар мон тыныд ужасько ни, одӥг косондэ но быдэстытэк ӧй кельты, нош тон мыным эшъёсыным шулдыръяськыны кечпидэ но ӧд сёты.30Нош тани, та пиед, юртъер люкетсэ, азэм нылъёсын калгыса, быдтыса бертӥз но, тон со понна куайытэм куняндэ вандӥд”.31Атаез солы шуэм: ”Пие! Тон котьку но монэн огазьын, маи мынам вань, со ваньмыз тынад.32Со понна кулэ вал шумпотыны, шулдыръяськыны: та выныд кулэмын вал, но улӟиз, ышыса улӥз, но сюриз”».


предыдущая глава Глава 15 следующая глава