Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ЛУКАЛЭСЬ ӞЕЧ ИВОР

Глава 11

11-тӥ ЛЮКЕТ

1Луиз озьы: одӥг интыын вӧсяськыса дугдэм бераз дышетскисьёсыз пӧлысь одӥгез Иисуслы шуиз: «Кузё-Инмаре! Милемыз вӧсяськыны дышеты, кызьы Иоанн аслэсьтыз дышетскисьёссэ дышетӥз».2Соослы Со шуиз: «Вӧсяськыкуды тазьы вералэ:

”Инмысь Атаймы! Тынад нимыд дано мед луоз;
Тынад Эксэйлыкед мед лыктоз;
Тынад эрикедъя мед луоз музъем вылын но,
инмын кадь ик;
3Милемлы нуналлы быдэ улымон няньмес сёты;
4Милесьтым сьӧлыкъёсмес но кушты,
милемлы вань пунэмо луисьёслэсь ми но куштӥськом уго;
милемыз визь сынаськонлэсь но утьы,
уродлэсь но мозмыты милемыз”».

5Соослы Иисус шуиз: «Кин ке но тӥ пӧлысь, кудӥзлэн эшез вань, уйшор уйин со доры лыктоз но солы шуоз: ”Эше! Вай мыным пунэмен куинь няньдэ.6Мон доры сюрес вылысь эше пыриз, нош мынам солы ӵектыны номыри но ӧвӧл”.7Нош соиз пуш паласен солы ответ сётыса шуоз: ”Эн раньӟыты монэ, ӧсъёс ӵогамын ни, нылпиосы но монэн огазьын валесын кыллё, уг быгатӥськы султыса тыныд нянь сётыны”.8Тӥледлы верасько, эш луыса вылысь но султыса ӧз ке сёты, соиз куремысь ӧз ке дугды, султоз но, кӧня куре, сомында сётоз.9Мон тӥледлы верало: курелэ, тӥледлы сётэмын луоз; утчалэ – шедьтоды; йыгаське – тӥледлы усьтозы.10Уго котькудӥз курись мурт басьтэ, утчась мурт шедьтэ, йыгаськисьлы – усьтозы.11Тӥлесьтыд кыӵе атай луоз, пиед нянь куриз ке, нош тон солы из сётӥд ке? Яке, чорыг куриз ке, чорыг интые тон солы кый сётӥд ке?12Яке, курегпуз куроз но, тон солы скорпион сётӥд ке?13Озьыен, тӥ, уродэсь-лекесь луыса но, асьтэлэн нылпиостылы ӟечесь кузьымъёс сётъяны быгатӥськоды ке, уката но Инмысь Атай Солэсь курисьёслы Святой Духез сётоз».

14Одӥг пол Иисус кылтэм периез улляса поттӥз. Пери потэм бере кылтэм вераськыны кутскиз. Калык паймиз.15Соос пӧлысь куд-огез вераськизы, Со периосты периослэн эксэйзылэн веельзевуллэн кужыменыз улляса потта.16Нош мукетъёсыз, визьзэ сынаса, инмысь тодмет мед возьматоз шуыса, Солэсь куризы.17Нош Иисус, таослэсь малпанъёссэс тодыса, соослы шуиз: «Котькыӵе но эксэйлык аслыз ачиз пумит люкиськиз ке, тырттэм кылёз, корка но аслыз ачиз пумит люкиськиз ке, куашкалоз.18Шайтан но аслыз ачиз пумит люкиськиз ке, кызьы солэн эксэйлыкез быдэс возиськоз? Нош тӥ шуиськоды, Мон периосты веельзевуллэн, пе, кужыменыз улляса поттӥсько.19Мон веельзевуллэн кужыменыз периосты улляса поттасько ке, нош тӥляд пиосты кинлэн кужыменыз соосты улляло? Соин ик соос тӥледыз судить карисьёс луозы.20Нош Мон Инмар чиньыен периосты улляса поттасько ке, соку, зэм но, Инмарлэн Эксэйлыкез тӥ доры вуиз.21Кужмо мурт корказэ ожмаськон тӥрлыкен возьма ке, со юртлы кышкытлык ӧвӧл.22Нош со вылэ солэсь кужмоез урдскиз но вормиз ке сое, соку солэсь вань ожмаськон тӥрлыксэ басьтоз, кудӥз вылэ со оскиськыса улӥз вал, нош собере солэсь лушкам ваньбурзэ кызьы мылыз потэ, озьы люкылоз.23Кин Монэн ӧвӧл, со Мыным пумит; кин Монэн огазьын уг бича, со арам-сюрам каре.

24Адями пушкысь пери потэ ке, со вутэм интыостӥ, каньылэн улон инты утчаса ветлэ но шедьтытэк шуэ: ”Берытско аслам коркам, кытысь потӥ”.25Лыктэ но адӟе: со ӵужемын, утялтэмын.26Соку со мынэ но ас бордаз мукетъёссэ, аслэсьтыз но лекесьёссэ, сизьым периосты басьтэ. Соос адями пушкы пыро но отын уло. Соку адямилы, нырысетӥез сярысь, берпуметӥез эшшо но уродгес луэ».

27Тае веран куспетӥз калык пӧлысь одӥг кышномурт бадӟым куараен Солы шуиз: «Шудо Тонэ нуллӥсь мугорпуш, Тонэ сюдӥсь ноныос!»28Нош Иисус шуиз: «Шудоесь Инмарлэсь кылзэ кылзӥсьёс, сое быдэсъясьёс».

29Калык тросэн люкаськыны кутскем бере Иисус вераны кутскиз: «Та – кескич выжы. Со тодмет утча, но, Иона пророклэн паймымон тодметэз сяна, солы мукет тодмет уз сётӥськы.30Кызьы Иона Ниневия калык понна паймымон тодмет луиз, Адями Пи но та ёзлы-выжылы озьы ик луоз.31Лымшорысь нылкышно эксэй та ёзэн-выжыен ӵош судэ султоз но соосты янгыше уськытоз, уго со дуннелэн пумысьтыз Соломонлэсь визьмо веранъёссэ кылзыны лыктӥз; но тани, татын Соломонлэсь Бадӟымез сылэ.32Ионалэн тодытонэз пыр ӧпкельыса сьӧлыкъёссылэсь куштӥськем Ниневия карын улӥсьёс та выжыен ӵош судэ султозы но та выжыез соос янгыше уськытозы; но тани, татын Ионалэсь Бадӟымез сылэ.

33Нокин но сюсьтылэз ӝуатыса лушкем интые, посуда улэ но уг пукты. Пырисьёс югытэз мед адӟозы шуыса, сюсьтыл пуктонэ пуктэ.34Мугорлэн югдытӥсез син луэ. Озьыен, синмыд чылкыт ке луиз, быдэс мугорыд югыт луоз; нош со урод ке луиз, соку мугорыд но пеймыт луоз.35Озьыен, учкы: югыт, кудӥз тон пушкын, – ӧвӧл-а пеймытлык?36Быдэс мугорыд югыт ке, ӧвӧл ке одӥг но пеймыт люкетэз, со быдэс югыт пиштыса улоз, лампадалэн тонэ пиштыса югдытэмез кадь ик».

37Тае вераса улыкуз, одӥг фарисей Сое гуртаз нуназе карыны ӧтиз. Со лыктыса ӝӧк сьӧры пуксиз.38Сиськон азьын Иисус кизэ ӧз миськы шуыса, фарисей паймиз.39Но Кузё-Инмар солы шуиз: «Али тӥ, фарисейёс, тэркылэсь, тусьтылэсь педпалзэ сузяськоды, нош асьтэлэн пушъёсты лушкаськонэн, кескич улонэн тырмемын.40Нодтэмъёс! Кин педпалзэ кылдытӥз, Со ик пуш палзэ но ӧз кылдыты-а?41Ваньбурды пӧлысь оглюкетсэ ёрмыса улӥсьёслы сётӥды ке, умойгес луысал: соку тӥляд ваньмыз чылкыт луысал.42Куректон тӥледлы, фарисейёс: бутниклэсь, рута турынлэсь, пӧртэм бакча сиёнъёслэсь дасэтӥ люкетсэ сётӥськоды, нош Инмарлэн шонер судэз но яратонэз сярысь уд сюлмаськиське. Таоссэ кулэ кароно вал, сооссэ но кулэтэм кароно ӧй вал.43Куректон тӥледлы, фарисейёс, сӥнагогаосын азьпал радын пуконэз, калык люкаськон интыосын ӟечкыламез яратэмды понна.44Куректон тӥледлы, книга тодӥсьёс, фарисейёс, чеберъяськисьёс, тӥ куштӥськем шайгуос кадесь, кудъёсыз вылтӥ адямиос ветло но уг тодо соос сярысь».

45Талы пумит закон тодӥсьёс пӧлысь кин ке но шуиз: «Дышетӥсь! Тазьы вераса, Тон милемыз вӧсь кариськод».46Нош Иисус шуиз: «Тӥледлы но, закон тодӥсьёслы, куректон: адямиос вылэ ӝутыса вормонтэм ныпъетъёс ошиськоды, нош асьтэос пал чиньыеныды но соос борды уд йӧтӥськиське.47Куректон тӥледлы атайёсыныды виылэм пророкъёслы шӧй возён коркаос лэсьтылэмды понна.48Таин тӥ атайёстылэсь ужъёссэс умоен лыдъямдэс возьматӥськоды, уго соос пророкъёсты виылӥзы, нош тӥ соослы шӧй возён коркаос лэсьтылӥськоды.49Соин ик Инмарлэн визьлыкез шуэ: ”Соос доры пророкъёсты, апостолъёсты ысто, но соос пӧлысь огъёссэ виёзы, нош мукетъёссэ уллялозы”.50Дунне кылдэм дырысен вань виылэм пророкъёслэн вирзы понна та выжы кыл мед кутоз,51Авельлэн вирыз бордысен курбон сётон ӝӧкен храм вискын вием Захариялэн вирыз дырозь. Зэм, тӥледлы верасько, та выжы кыл кутоз.52Куректон тӥледлы, закон тодӥсьёс, тодон-валанлэсь усьтонзэ тӥ басьтӥды: асьтэос но ӧд пыре, пырисьёслы но люкетӥды».

53Тае соослы вераса улыкуз, книга тодӥсьёс но фарисейёс, Иисуслэсь трос юанъёслы ответ курыса, Со борды зол тэбиньыны кутскизы.54Сое чакласа улӥзы, Сое янгыше уськытон вылысь вераськон кылысьтыз шексэ утчазы.


предыдущая глава Глава 11 следующая глава