Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ЛУКАЛЭСЬ ӞЕЧ ИВОР

Глава 9

9-тӥ ЛЮКЕТ

1Дас кыксэ ик дышетскисьёссэ ӧтиз но вань периосты улляса поттаны, висёнъёсты бурмытъяны соослы кужым, эрик сётӥз,2соосты Инмар Эксэйлыкез тодытыны, висисьёсты йӧнатыны ыстӥз.3Соослы шуиз: «Сюрес вылэ номыр но эн басьтэ: боды но, пуйы но, нянь но, азвесь но, кык пумо дӥськутты но медаз луы.4Кыӵе корка пыриды, отчы кыле, отысен сюрес вылэ потэ.5Ӧз ке пыртэ тӥледыз, соку со городысь потыкуды, соослэсь янгышъёссэс шарае поттон понна пыдысьтыды сюйзэ курткыса кельтэ».6Соос мынӥзы но, гуртъёстӥ Ӟеч Ивор вераса, котькытӥ но йӧнатыса ветлӥзы.

7Ньылетӥ люкетэн кивалтӥсь Ирод ваньмыз сярысь, мар лэсьтэ Иисус, кылӥз но абдраз: уго огъёсыз верало вал со, пе, Иоанн улӟыса султэм,8мукетъёсыз – Илия лыктэм, нош куд-огъёсыз шуизы вашкала пророкъёс пӧлысь одӥгез, пе, улӟыса султэм.9Ирод шуиз: «Иоаннлэсь йырзэ ӵогыса басьтӥ. Кин бен Со, Кин сярысь мон таӵе ивор кылӥсько?» Ирод Иисусэз адӟыны турттыса, Сое адӟемез потыса улӥз.

10Апостолъёс берытскыса Иисуслы мар лэсьтэмзы сярысь веразы. Со, соосты сьӧраз басьтыса, Вифсаида шуон городлы матысь чик калыктэм интые кошкиз.

11Нош калык тодӥз но Иисус бӧрсьы мынӥз. Соосты Со бордаз кутӥз но Инмар Эксэйлык сярысь соослы вераз, йӧнатыны курисьёсты йӧнатылӥз.12Нунал ӝыт пала кыстӥськыны кутскиз. Со доры лыктыса, дас кык дышетскисьёсыз Солы веразы: «Калыкез артысь гуртъёсы, починкаосы кӧлыны, сиён утчаны лэзь, асьмеос кыр интыын уго».13Нош Иисус соослы шуиз: «Тӥ соослы сиён сётэлэ». Соос шуизы: «Милям вить няньмы но кык чорыгмы сяна, номырмы но ӧвӧл. Вань калыклы мыныса сиён басьтоно ке шат?»14Отын ог вить сюрс пиосмурт вал. Со дышетскисьёсызлы шуиз: «Пуктэлэ соосты витьтон муртэн, чурен-чурен».15Озьы каризы, ваньзэс пуктылӥзы.16Нош Иисус вить нянез но кык чорыгез басьтыса, ин пала учкиз, соосты бакель кариз, тӥялтӥз но, калыклы мед люкылозы шуыса, дышетскисьёсызлы сётъяз.17Сиизы, ваньзылэн кӧтсы тыриз. Соос бере кылем юдэсъёсты дас кык кудые тыраз бичазы.

18Одӥг пол, шыпыт интыын вӧсяськыса улыкуз, бордаз дышетскисьёсыз вал. Соослэсь Со юаз: «Калык Монэ кин шуыса лыдъя?»19Соос ответ сётыса шуизы: «Иоанн Пылатӥсь, куд-огез Илия шуэ; мукетъёсыз шуо вашкала пророкъёс пӧлысь, пе, одӥгез улӟем».20Соослэсь Иисус юаз: «Нош тӥ асьтэос Монэ кин шуыса лыдъяськоды?» Петр ответ сётыса шуиз: «Инмарлэн Христосэз шуыса».21Та сярысь нокинлы но медаз вералэ шуыса, соосты юн алӥз.22Вераз, Адями Пилы трос курадӟонэз чидано луоз, тӧроос, архиерейёс, книга тодӥсьёс Сое палэнтозы, Сое виёзы, куинетӥ нуналаз улӟыса султоз шуыса.

23Нош ваньмызлы шуиз: «Кин Мон сьӧры мыныны малпа, аслэсьтыд ачид куштӥськы, киростэ басьты но Мон сьӧры мын.24Уго кинлэн лулзэ утемез потэ, со сое ыштоз, нош кин Мон понна лулзэ ыштоз – со лулзэ утёз.25Адямилы мар пайдаез быдэс дуннеез аслыз басьтӥз ке, нош ачиз быриз яке аслыз изъян лэсьтӥз ке?26Уго кин Мынэсьтым, Мынам кылъёсылэсь возьдаськиз ке, Аслаз пиштӥсь данлыкеныз, Атаезлэн, святой Кылчинъёслэн пиштӥсь данлыкенызы лыктыкуз, со муртлэсь Адями Пи но возьдаськоз.27Зэм ик тӥледлы верасько: татын сылӥсьёс пӧлын вань куд-ог адямиос, соос кулыса уз вуэ, Инмар Эксэйлыкез адӟозы».

28Та кылъёс бере, ог тямыс нунал ортчыса, Петрез, Иоаннэз но Иаковез басьтыса, Иисус вӧсяськыны гурезе тубиз.29Вӧсяськыкуз Солэн ымнырыз воштӥськиз, дӥсянэз пиштӥсь тӧдьы луиз.30Тани кык пиосмуртъёс Соин вераськыса улӥзы, со Моисеен Илия вал.31Данлыкен лыктыса, Солэн кошконэз сярысь вераськизы, кудзэ Со Иерусалимын быдэстыны кулэ луоз.32Петрез но соин ӵош луэмъёсты ум нюртыса возиз. Сайказы но Солэсь пиштӥсь данлыксэ, Соин огазьын сылӥсь кык пиосмуртъёсты адӟизы.33Соос дорысь кошкыкузы, Петр Иисуслы шуиз: «Дышетӥсь! Милемлы татын улыны ӟеч; ваелэ куинь тылыс пуктоме, одӥгзэ Тыныд, одӥгзэ Моисейлы, одӥгзэ Илиялы», – мар верамзэ валатэк.34Тае веракуз, пилем лыктыса соосты шобыртӥз; пилем пушкы пырем беразы кышкатскизы.35Пилем пушкысь тазьы верась куара кылӥськиз: «Та Мынам Яратоно Пие; Солэсь кылзӥське».36Та куара бере Иисус огназ кылиз. Нош соос шып улӥзы, со нуналъёсы ма адӟемзы сярысь нокинлы но ӧз вералэ.

37Мукет нуналаз, гурезьысь васькем беразы, Иисусэз трос калык пумитаз.38Шӧдтэк шорысь калык пӧлысен кин ке но черектӥськиз: «Дышетӥсь! Тэльмырыса Тонэ пиме учкыны курисько, со мынам одӥг гинэ:39Сое пери кутэ но, соку ик со черектӥське, курадӟытэ сое, шукыез ик вия; катьтэммытэм бераз гинэ мырдэм со дорысь кошке.40Тынэсьтыд дышетскисьёстэ кури вал перизэ улляса поттыны; нош соос ӧз быгатэ».41Иисус ответ сётыса шуиз: «Эй, оскисьтэм, азэм выжы! Кема уло на-а тӥ пӧлын, кема-а чидало на тӥледыз? Вай татчы пидэ».42Со лыктэ вал ай, нош пери сое уськытыса тышканы кутскиз. Иисус периез алӥз но пинал пиез йӧнатӥз, сое атаез кие сётӥз.43Инмарлэн быдӟымлыкезлы ваньзы паймыса улӥзы.

Ваньзы соос Иисуслэн вань лэсьтэмъёсызлы паймыса улыку, Со дышетскисьёсызлы шуиз:44«Пеляды понэ та кылъёсыз: Адями Пи адямиослэн киулазы сётэмын луоз».45Но та верам кылэз соос ӧз валалэ; уго сое медаз валалэ шуыса, со кыл соослэсь ватӥськемын вал. Нош Солэсь со кыл сярысь юаны кышказы.

46Соослэн сюлмазы малпан лыктӥз: соос пӧлысь кин меда ваньмызлэсь бадӟымез?47Иисус, соослэсь сюлэм малпанзэс тодыса, пичи пиналэз кутӥз но Аслаз азяз султытӥз.48Собере соослы шуиз: «Кин Мынам нимы понна та пиналэз кабыл басьтэ, со Монэ кабыл басьтэ; нош кин Монэ кабыл басьтэ, со Монэ Ыстӥсез кабыл басьтэ. Уго тӥ пӧлысь кин ваньмызлэсь покчи, со ваньмызлэсь быдӟым луоз».

49Соку Иоанн шуиз: «Дышетӥсь! Тынад нимыныд периосты уллясь адямиез ми адӟимы, но ӧм ни лэзе со ужен вырыны, малы ке шуоно со асьмемын уг ветлы».50Иисус солы шуиз: «Эн алэ; уго кин тӥледлы пумит ӧвӧл, со – тӥ палан».

51Дунне вылысь басьтӥськон нуналъёсыз матэ вуыны кутскем бере Иисус Иерусалиме мыныны потӥз.52Аслаз азяз ивортӥсьёсты лэзиз. Соос мыныса самарян гуртэ пыризы, – Солы ваньзэ дасян понна.53Но отын Сое кабыл ӧз басьтэ, малы ке шуоно Солэн вылтусыз Иерусалиме мынӥсь муртлэн кадь вал.54Тае адӟыса, дышетскисьёсыз Иаков но Иоанн шуизы: «Кузё-Инмаре! Кулэ-а Тыныд, ми вералом, Инмысь тыл мед васькоз но соосты мед быдтоз шуыса, кызьы Илия лэсьтӥз вал?»55Нош Иисус, соос пала берытскыса, соосты алыса шуиз: «Уд тодӥське, кыӵе духен тӥ.56Адями Пи адями лулъёсты быдтыны ӧз лыкты, утьыны Со лыктӥз ук». Отысен соос мукет гуртэ кошкизы.

57Луиз озьы: сюрес вылын дыръязы кин ке но Солы шуиз: «Кузёе! Кытчы гинэ Тон уд мыны, мон Тон сьӧры мыно».58Иисус солы шуиз: «Ӟичыослэн гутёзы вань, ин тылобурдоослэн – карзы; нош Адями Пилэн йырзэ понон интыез но ӧвӧл».59Мукетызлы адямилы Со шуиз: «Мон сьӧры мын». Соиз шуиз: «Кузё-Инмаре! Нырысь лэзь вал монэ аслэсьтым атайме ватыны мыныны».60Иисус солы шуиз: «Кулэмъёс асьсэлэсь кулэмъёссэс мед ватозы, нош тон мын но Инмар Эксэйлык сярысь Ӟеч Иворез тодытыса ветлы».61Эшшо мукетыз адями Солы шуиз: «Мон Тон сьӧры мыно, Кузёе! Но азьвыл лэзь монэ гуртоосыным люкиськыны».62Иисус солы шуиз: «Нокудӥз но геры вылэ кизэ поныса берланяз утчаськись мурт Инмар Эксэйлыклы оскиськымон адями уг луы».


предыдущая глава Глава 9 следующая глава