Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНДИ ПАНЧФ НЯЙФКС

Глава 18

Вавилонть прамац

1Тяда меле мон няень лия ангел, кона валгондсь менельста. Сонь ульсь оцюдонга оцю азорксшиц, и модась вандолгодсь сонь иневалдонц эзда.2Ангелсь ювадсь кайги вайгяльса:
«Прась, прась инь оцю Вавилон ошсь!
Сон тиевсь кяжи ваймопожфненди эряма вастокс
и эрь кодама аф ару ваймопожфти кяшема вастокс,
эрь кодама аф ару и нулготькс нармонти пизокс;
сяс мес сон симдезень сембе ломаньтналхнень
усксевомань кяжи винадонза.
3Масторлангонь оцязорхне усксевсть мархтонза
и масторлангонь мишендихне-рамсихне козякодсть
сонь пяк оцю козяшидонза».

4Сяльде мон кулень менельста лия вайгяль, кона корхтась:
«Листь эздонза, Монь ломаньтналозе,
афолеть тие пежет сонь лацонза,
и афолеть пова ся кальдяфнень алу,
конат учендсазь сонь.
5Менельти кассь сонь пежень пандоц,
и Шкайсь ашезень юкста сонь аф видешинзон.
6Пандода ина тейнза сняра, мзяра сон макссесь тейнть,
кафтонь-крда пандода сонь тевонзон инкса.
Сяка кядьготи, конаса сон аноклакшнесь симомбяль лиятненди,
аноклада тейнза кафксть сяда сяпи вина.
7Мзяра сон шнафнезе прянц и эрясь козяшиса,
сняра максода тейнза маятамада и ризфта.
Вдь сон корхтай эсь седисонза:
"Озадан оцязорава лаца,
мон аф удаван и мон аф няян ризф".
8Вов мес фкя шиня лангозонза прайхть сембе кяльдяфне:
куломась, ризфсь и вачашись, и сон ули плхтаф толса,
сяс мес Азор Шкайсь, сонь судендаец, виидонга вии».

9Масторлангонь оцязорхне, конат мархтонза прашендсть усксевомас и козяшис, кармайхть авардема и явсема инксонза, мзярда няйсазь сонь паломань качамонц.10Синь ащихть ичкозе сонь эздонза, пелезь ваныхть сонь маятаманзон лангс, и корхтайхть:
«Кальдяв, кальдяв тейть, оцюдонга оцю ош,
инь вии Вавилон ош!
Фкя частонь потмоста тиевсь лангсот суд!»

11И масторлангонь мишендихне-рамсихне кармайхть авардема и явсема сонь инксонза, сяс мес кивок ни аф рамсесыне синь паршиснон,12зрнянь и сиянь паршихнень, питни кефнень и жемчукнень, шуваня иляназть и шобда-якстерь котфть, парьхцить и валда-якстерь котфть; эрь кодама танцти шине шуфттнень и слононь пакарьста эрь кодама паршихнень; и эрь кодама тифкснень – питни шуфтонь, серень, кшнинь, и мраморонь;13корицать и фимиамть, мирать и ладанть, винать и вайшуфтонь вайть, почфть и тозерть; тракснень и учатнень, алашатнень и крандаскятнень, уретнень и ломанень ваймотнень.14Мишендихне-рамсихне корхтайхть:
«Кенерьф имошт, конатнень анасыне ваймоце,
аф улихть тейть,
марнек козяшице и марнек пиндолфце юмасть,
мзярдовок аф мрдайхть тейть».

15Пелемась сявсыне сятнень, кит мишендсть-рамсесть ня паршихнень эса и кит козякодсть оцюдонга оцю усксеви авать вельде. Синь ащихть ичкозе эздонза, пелезь ваныхть сонь маятаманзон лангс. Синь авардезь и явсезь16корхтайхть:
«Кальдяв, кальдяв оцюдонга оцю ошти,
кона щаф шуваня иляназса,
шобда-якстерь и валда-якстерь котфса,
и кона пиндолды зрняса, питни кевняса и жемчугса,
17сяс мес фкя частонь потмоста юмась-арась сонь козяшиц!»

Сембе оцю венчень вятихне, сембе оцюведьге уендихне, и оцю венчса покодихне, сембе, кие пря трясь оцюведть эзда – сембе синь арасть ширеняв.18И мзярда няезь паломань качамонц, ювадсть: «Кодама ош ладяви тя оцюдонга оцю ошть ваксс?»19Синь кулуса почерязь пряснон и авардезь и явсезь юватькшнесть:
«Кальдяв, кальдяв тейть, оцюдонга оцю ош!
Сембе, кинь ульсть оцю венченза оцюведьса,
козякоткшнесть тонь питни паршихнень эзда –
вов фкя частста тон тиевоть шава вастокс!»
20
«А тон, менель, кеняртькшнек!
Тиньге, Шкаень сембе ломаттне,
апостолхне и пророкне, кеняртькшнеда!
Шкайсь судендазе сонь сембонкса сянкса,
мезе сон тиендсь тейнть!»

21Эста фкя пяк вии ангелсь сявсь кев, яжафтоманнешка, и ёрдамок оцюведти, мярьгсь:
«Ва тяфтама вийса ули врнофтф оцюдонга оцю Вавилон ошсь,
и аф муви тяда меле сон.
22Тонь эсот оду аф кулихть аф арфань вайгяль,
аф морамань вайгяль;
аф кайгозевихть тонь ульцяват нюдиень и торамань морамат;
тонь эсот аф муйхть фкявок ломань,
кона стаки кармаль машты кядьса тиема эсь тевонц,
и яжамань кефнень увфсновок аф кулеви тоньцот.
23Валдоптоматневок аф кармайхть валдоптома тейть,
рьвяяень и рьвянянь вайгяльхтьке аф кулевихть тоньцот.
И сембе сяс, мес тонь мишендихне-рамсихне ульсть
сембода оцюкс масторлангса,
и тонь колдувамацень вельде
васькафтфтольхть сембе ломаньтналхне.
24И тонь лангсот пророкнень версна,
Шкаень ломаттнень версна,
и масторлангса сембе шавфнень версна».


предыдущая глава Глава 18 следующая глава