Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНДИ ПАНЧФ НЯЙФКС

Глава 16

Шкаень кяжса пяшкотьф кядьготне

1Мон кулень Шкаень кудста кайги вайгяль, кона корхтась сисем ангелхненди: «Арда и валость Шкаень кяжса пяшкотьф сисем кядьготнень масторть лангс!»

2Васенце ангелсь лиссь и валозе эсь кядьгонц масторть лангс – казяма и аеркс сыияфксне вельхтязь сятнень, кинь лангса ульсь кяжи жуватать тяштьфксоц и кит сюконякшнесть сонь ликонцты.

3Омбоце ангелсь валозе эсь кядьгонц оцюведти – оцюведсь тиевсь кулофонь вер лаца, и машфтовсь эсонза сембе эряйсь.

4Колмоце ангелсь валозе эсь кядьгонц ляйхненди и лихтибрятненди – сембе синьге арасть веркс.5Тяса мон кулине ведень ангелть, кона корхтась:
«Тон видексшинь Тиият, Азор,
Тон Ся, кона ули и кона ульсь фалу.
Тон иняруват, сяс мес тяфта судендать:
6синь валозь иняруфнень и пророкнень верснон,
и Тон максоть тейст симомс верда.
Тейст тя тев коряс!»

7Мон кулень алтарьста корхтай вайгяль:
«Тяфта, Азор Шкай, Сембонь Кирдись,
афкуксоннет и видексшинь Тонь суттне!»

8Нилеце ангелсь валозе эсь кядьгонц шить лангс – и шити максфоль плхнемс ломаттнень эсь толсонза.9Ломаттне пицевсть аф кирдемшкань псить эзда, и синь сялдозь Шкайть лемонц, сялдозь Сянь, конань ульсь азорксшиц ня кальдяфнень лангса. Но синь сяка ашесть шарфта Шкайти, ашесть аза Тейнза шнама.

10Ветеце ангелсь валозе эсь кядьгонц кяжи жуватать оцязоронь озама вастонц лангс – и сонь оцязорксшиц вельхтявсь шобдаса. Ломаттне сярятьфть эзда сускондозь эсь кяльснон,11и сялдозь менелень Шкайть эсь сярятьфснон и эсь сыияфксснон инкса; и сяка ашезь када эсь пежу тевснон.

12Котоце ангелсь валозе эсь кядьгонц оцюдонга оцю Евфрат ляйть лангс – и сонь ведец коськсь. Тяфта аноклафоль ки шинь стяма пяльде сай оцязорхненди.13Тяда меле мон няине, кода драконть, кяжи жуватать и аф афкуксонь пророкть кургста лиссть колма аф ару ваймопожфт, конат няемас коря ульсть бта ватракшт.14Нят – кяжи ваймопожфт, конат тиендихть дивань тяштькст. Синь тусть сембе масторлангонь оцязорхненди кочкамост синь тюремас Сембонь Кирди Шкайть инь оцю шистонза.15Иисус Христоссь корхтай:
«Мон саян апак учентт, кода салай.
Павазу ули аф удысь
и эсь щамонь ванфтысь:
афоль сав тейнза якамс крхтапа
и визделготкшнемс сембонь ингольде».

16И кяжи ваймопожфне кочказь оцязорхнень ся вастти, кона еврейкс лемневи Армагеддон.

17Сисемце ангелсь валозе эсь кядьгонц кожфти – и менелень Шкаень кудста, оцязоронь озама вастть эзда, кайгозевсь вайгяль, кона мярьгсь: «Тиф!»18И кфчядсть ёндолхт, торазевсть атяпне и кайгозевсть вайгяльхне, и тиевсь оцюдонга оцю модашерьхкома. Мзярс ломанць эряй масторть лангса, тяфтама модашерьхкома нинге ашель.19И оцю ошсь колавсь колма пяльксова, и лия ломаньтналхнень ошсна срадсть. Шкайсь ашезе юкста оцюдонга оцю Вавилонть колга, и Вавилонти савсь симомс кядьгось, кона пяшкотьфоль Шкаень кяжса лакай винада.20Сембе усиятне юмасть и панттневок аф мувихть.

21Пелькс цярахман, эрсь ниле пудонь сталмоса, прась менельста ломаттнень лангс, а синь сялдозь Шкайть тяфтама кальдявонкса, сяс мес пяк ни вельф оцюволь тя кальдявсь.


предыдущая глава Глава 16 следующая глава