Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНДИ ПАНЧФ НЯЙФКС

Глава 5

Ашкоркс лаца книга и Верозсь

1Оцязоронь вастса Озадоть види кядьсонза мон няень ашкоркс лаца книга. Сон ульсь сёрматф кафцьке пяльде и пякстафоль пякстамань сисем тяштьксса.2И нинге мон няень виидонга вии ангел, кона кайгиста азозе: «Кие кондясти валхтомс ня пякстамань тяштькснень и панжемс книгать?»3Но панжемс тя книгать и варжакстомс эзонза кивок ашезь машта – аф менельса, аф модать лангса, аф модать ала.4Мон седиге аварьгодонь, сяс мес ашезь мув фкявок кондясти тя книгать панжемс и лувомс, и мянь варжакстомс эзонза.5Эста атятнень ёткста фкясь мярьгсь тейне: «Тят аварде! Ватт, Иудань юромста Лефсь, кона лиссь Давидонь юрста, сяськсь. Тейнза валхтовихть пякстамань сисем тяштьксне и панжеви книгась».

6И мон няине: оцязоронь озама вастть и ниле эряй ваймотнень ёткса, и атятнень ёткса ащесь Верозсь. Сон кода печкфоль, и Сонь ульсть сисем сюронза и сисем сельмонза. Ня сисем сельмотне – Шкаень сисем ваймопожфт, конат кучфтольхть марнек модать келес.7Сон сась и сявозе книгать оцязоронь вастса Озадоть види кядьстонза.8Мзярда Верозсь сявозе книгать, ниле эряй ваймотне и комсь нилие атятне прасть инголенза комада. Эрсь кирдсь кядьсонза арфа и зрнянь кядьге, кона пяшксель танцти шине фимиамда – Шкаень ломаньтналть озондомадонза.9Синь морасть од мора:
«Тонь оцюшицень коряс Тейть сявови книгась
и валхтовихть лангстонза пякстамань тяштьксне,
сяс мес Тон улеть печкф
и Эсь версот рамайть Шкайти ломаттнень
эрь юромста, кяльста, ломаньтналста и масторста.
10Тон тиемасть минь оцязоркс и минь Шкаеньконди озксвятикс,
и минь карматама оцязорондама масторлангса».

11Оцязоронь озама вастть перьфке и эряй ваймотнень и атятнень перьфке мон няень ангелхт и кулень лама ангелонь вайгяль. Ангелхнень лувкссна ульсь аф лувови,12и синь морасть кайги вайгяльса:
«Верозти, кона ульсь печкф,
оцюшинц коряс максови азорондама, козяши, смузьши, вий,
пара лувкс, иневалда и бславама!»

13И мон кулине, кода эрь тифсь менельса, модать лангса, модать ала и оцюведьса – сембось, мезе ули синь эсост, морась:
«Оцязоронь вастса Озадоти и Верозти
улеза бславама и пара лувкс,
шнама и азорксши пефтома пингс!»

14И тянь каршес ниле эряй ваймотне азозь: «Аминь», а комсь нилие атятне прасть комада и сюконясть пефтома пингс Эряйти.


предыдущая глава Глава 5 следующая глава