Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНДИ ПАНЧФ НЯЙФКС

Глава 3

Христоссь пачфти вал Сардисонь кемаень пуромксти

1«Сардисонь кемаень пуромксть ангелонцты сёрматт: "Вов мезе корхтай Ся, кинь улихть Шкаень сисем ваймопожфонза и сисем тяштенза: Мон содасайне тонь тефнень. Тонь луфтядязь эряйкс, но афкукс тон кулофат.2Сргость и кемокстак сянь, мезе нинге лядсь эсот, сявок вов-вов ни кулы. Мон няйса, Шкаезень инголе тонь тефне аф сембе ширде цебярьхть.3Лятфтак, мезе тейть максфоль и мезе тон кулеть. Киртть сонь эсонза и каендак. А кда аф сргозят, Мон саян апак учт, салай лаца, содамонга аф кармат, мзярда кундате тонь.4Но Сардисса, тонь ширесот, улихть тяфтаптка, конат ашезь рдаскофта эсь щамснон, аньцек эздост аф лама. Синь кармайхть якама Монь мархтон акша щамса, сяс мес синь кондястихть тянди.

5Кие сяськи, сянь щасазь акша щамса, и Мон аф нардаса сонь лемонц эрямань книгаста. Мон лувса сонь Монценнекс Алязень и Сонь ангелонзон инголе.

6Кинь улихть пиленза – кулеза, мезе корхтай Ваймопожфсь кемаень пуромксненди"».

Христоссь пачфти вал Филадельфиянь кемаень пуромксти

7«Филадельфиянь кемаень пуромксть ангелонцты сёрматт: "Вов мезе корхтай Инярусь и Видесь, конань кядьса Давидонь панжемац; Сон ся, кие панчсы кенкшть – и киндинге аф пякстави; Ся, кие пякстасы кенкшть – и киндинге аф панжеви:8Мон содасайне тонь тефнень. Вага, Мон панжине инголет кенкшть, и киндинге сон аф пякстави. Хуш тонь и кржа вийдот, но тон сяка кемоста кирдят Монь валозти и ашеть шарфта Монь эздон.9Мон макссайне тейть Сатанать пуромксста сятнень, кит лемнесазь пряснон еврейкс, но синь прокс аф сят, кикс лемнесазь пряснон, синь васькафнихть. Мон вятьфтсайне синь тейть и комафтсайне пильгозт. Эста синь содасазь – Мон кельгте тонь.10Тон ванфтыть монь кошардомазень улемс кирдикс, сяс монга карман ванфтомот тонь варчсемань-маятамань пингста, кона шашты марнек масторть лангс и кармай варчсемост-маятафтомост модалангонь сембе эряйхнень.11Мон курок саян – тон ина кемоста киртть сянди, мезце тонь ули, кивок тязазе сяв сяськиень каштазцень.

12Сяськить Мон тиса вельхксонь кирди нежекс Шкаезень кудса, и сон иляды тоса пефтома пингс. Мон сёрмадса сонь лангозонза Шкаезень лемонц и Шкаезень ошенц лемонц – од Иерусалимть, кона валгонды менельста Шкаезень эзда, сёрмадса и Эсь од лемозень.

13Кинь улихть пиленза – кулеза, мезе Ваймопожфсь корхтай кемаень пуромксненди"».

Христоссь пачфти вал Лаодикиянь кемаень пуромксти

14«Лаодикиянь кемаень пуромксть ангелонцты сёрматт: "Вов мезе корхтай Аминь, валонь кирди и виде азондысь, конань вельде Шкайсь тиезе семботь:15Мон содасайне тонь тефнень. Тон аф кельмат, аф псият. Вай, кда тон улелеть кельме али пси!16Но сяс, мес тон лямбат, а аф кельмат и аф псият, Мон уксонте тонь Эсь кургстон.17Тон корхтат: "Мон козян, монь сембодон лама и тейне мезевок ни аф эряви". Но тон аф шарьхкодьсак: тон аф павазуват, ужялят, ашуват, сокорат и крхтапат.18Мон максан тейть ёнь – рамак кядьстон толонь пачк ётафтф зрнязень, и афкукс козякодат. Рамак акша щаптка, щасайть и киндинге аф кармай няевома тонь крхтапашицень визьксоц; рамак сельмовадемавок, вадьсайть сельмотнень и кармат няема.19Кинь кельгса, сянь пежензон лихтьсайне лангти и сюцеса-тонафтса сонь. Сяс ульхть виень путыкс и кадыть пежетнень!20Вов ащан кенкш фтала и чакан: кие кульсы Монь тердемазень и панчсы Тейне кенкшть, сянь пяли суван и карман ярхцама мархтонза, а сон – Монь мархтон.

21Кие сяськи, сянди мярьган озамс Монь мархтон оцязоронь озама вастозон. Тяфта Монга, сяськомок, озань Алязень мархта оцязоронь озама вастозонза.

22Кинь улихть пиленза – кулеза, мезе корхтай Ваймопожфсь кемаень пуромксненди"».


предыдущая глава Глава 3 следующая глава