Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЕВРЕЙХНЕНДИ СЁРМАСЬ

Глава 13

Эряда Шкайть мяленц коряс

1Фалу кельгода фкя-фкянь кемай ялгань кельгомаса.2Тясть юксне инжиень кельгомать. Вдь ульсть ломатть, конат апак содак, васьфтсть эсь пялост ангелхт.3Арьседа сятнень колга, кит пякстафт, и лездода тейст тяфта, бта тиньге мархтост пякстафтада, и тясть юксне маятайхнень, бта тиньге маятатада синь мархтост.

4Катк эрсь кирдьсы пара лувксса рьвяямань сотксть. Мирттненди и рьватненди эряви улемс видекс и арукс фкя-фкянь инголе; вдь Шкайсь судендасыне сятнень, кит усксевихть и васькафнесазь поласнон.5Тяда панце ярмакнень мельге, но катк тейнть саты ся, мезенте ули ни. Вдь Сонць Шкайсь мярьгсь:
«Аф катте тонь и аф туян эздот».

6Сяс минь аф пелезь корхтатама:
«Азорсь тейне лезды, и мон аф карман пелема.
Мезе тии тейне ломанць?»

7Мяляфтость эсь вятиентень, конат азондозь тейнть Шкаень валть. Ванода, кода синь эрясть и кодама имож кандсь синь эряфсна, и тиендеда синь кемамаснон коряс.8Иисус Христоссь фкя тяка и исяк, и тячи, и пефтома пингс.9Тясть макса шарфтомс прянтень виде ки лангста эрь кодама и ширде саф тонафнематненди. Пара, кда седись кемокстай Шкаень пароказнеть эзда, а аф ярхцамань койхнень мельге молемать эзда. Ня койхнень мельге молемась нинге киндиге ашезь канда лезкс.10Минь ули алтареньке, конань лангста аф мярьгондеви ярхцамс сятнендни, кит покодихть иняру кошса.11Тинь содасасть: озксвятиень оцюнясь каннесыне жувататнень верснон пежеть инкса озксказнекс иняру вастти, а синь ронгснон плхнесыне Израилень ломаттнень эряма вастснон эзда ширеса,12сяс Иисусовок маятась и кулось ширеса, аф ошть потмоса вага мезенкса: Эсь веронц вельде иняруяфтомс ломаттнень.13Сяс листяма Тейнза, ширети, и каннесаськ Сонь сялдоманц.14Вдь тяса минь аш фалунь ошеньке, но минь вешендьсаськ ся ошть, кона кармай улема сай пинкнень.15Сяс, карматама Иисусонь вельде апак лотксек каннема шнамань озксказне Шкайти, лиякс мярьгомс, эсь валоньконь, конат шнасазь Сонь лемонц.16Тясть юксне паронь тиемать и фкя-фкянди лездомать, сяс мес тяфтама озксказнетне мялезонза Шкайти.

17Кулхцондода эсь вятиентень эса и уледа сятявкс мархтост. Вдь синь шинек-венек пичедихть-канзедихть тинь ваймонтень инкса, сяс мес тейст сави тинь инксонт корхтамс Шкайть инголе. Катк синь тиендьсазь тянь кеняртькс потмоса, а аф куфцезь. Вдь тя аф лезды тейнть.

18Озондода минь инксонк. Минь кемоста содасаськ: ваймовайгяленьке аруфт, вдь минь сембоса ёратама эрямс видеста.19Мон эняльдян тейнть сядонга пяк озондомс вага мезенкса: максольхть тейне сяда курок мрдамс тейнть.

Озондомась и мекольце валхне

20
Сетьмошинь Шкайсь,
кона вельмафтозе кулофнень эзда
минь Азороньконь Иисусть (Христость),
учань инь оцю Ваныть,
и Сонь веронц вельде кемокстазе пефтома пингонь сотксть,
21катк аноклатядязь тинь эрь кодама пара тевонди,
и тяфта тинь карматада тиендема Сонь мяленц коряс.
И катк Сон Иисус Христосонь вельде тисы эсонт сянь,
мезе Сонь мялезонза.
Улеза Христости иневалда пефтома пингс! Аминь.

22Эняльдян тейнть, кемай ялгат, кулхцондость тя кемокстай валть. Вдь мон аф лама сёрмадонь тейнть.23Тейнть эряви содамс: кемай ялганьконь, Тимофеень, нолдазь пякстамгудста. И кда сон курокста сай тейне, эста минь марса сатама тинь ширезонт.

24Азода пара вал сембе вятиентенди и сембе иняру ломаттненди. Италиянь кемай ялганьке кучихть тейнть пара валхт.25Шкаень пароказнесь улеза тинь сембонь мархтонт! Аминь.


*а 13:5 5 Моисея 31:6,8

*б 13:6 Псалтирь 117:6


предыдущая глава Глава 13 следующая глава