Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЕВРЕЙХНЕНДИ СЁРМАСЬ

Глава 10

Христос – афсатыксфтома озксказнесь

1Койсь – тя аньцек сай пингонь паротнень цильфсна. Тя нинге аф синць паротне. Сяс койти мзярдонга аф тиевихть афсатыксфтомокс сят, конат эрь кизоня сашендыхть фкя сяка озксказнеснон мархта.2Кда Шкайти покодихне весть и сембе пинкненди улельхть аруяфтфт, синь лоткальхть тяфтама озксказнень каннемда, сяс мес лангсост афоль уле кодамовок пеже.3Но тяфтама озксказнетне эрь кизоня лятфнихть пежетнень колга.4Вдь букань и сявань версь аф машты валхтомс пежеть.

5Сяс Христос, масторлангти самстонза, мярьгсь Шкайти:
«Тейть ашесть эряв озксказнет и казнет,
но Тон аноклать Тейне ронга.
6Тонь мялезт ашесть ту плхтаф озксказнетне
и пежетнень инкса озксказнетне.
7Эста Мон мярьгонь: "Мон тясан и молян
– кода книгаса сёрматф Монь колган,
– тиемс Тонь мяльцень коряс, Шкай"».

8Васенда Сон мярьгсь: «Аф озксказнет, аф казнет, аф плхтаф озксказнет, аф озксказнет пеже инкса Тейть ашесть эряв, синь аф мялезт Тейть», хуш синь койть коряс канневихть.9Сяльде Сон мярьгсь: «Мон тясан, и молян тиемс Тонь мяльцень коряс, Шкай». Тяфта Сон урядазе васенцеть и путозе сонь вастозонза омбоцеть.10Шкайть мяленц коряс минь улеме иняруяфтфт Иисус Христость ронгонц вельде, конань Сон кандозе озксказненди весть и сембе пинкненди.

11Шиста шис эрь озксвятись ащи эсь покодемасонза и каннесыне фкя сяка озксказнетнень, конатнень аш вийсна валхтомс пежетнень.12А вага Христос весть и сембе пинкненди кандсь аньцек фкя озксказне пежетнень инкса и тяда меле озась Шкайть види ширезонза.13Ся пингста сявомок Христос учи, мзярда Шкайсь путсыне каршек ащихнень Сонь пильгалонза.14Вдь фкя озксказне вельде Сон тиезень пефтома пингс афсатыксфтомокс сятнень, конат иняруяфтовихть.

15Тянь кемокстасы тейнек Иняру Ваймопожфське. Вдь васенда Сон корхтай:16
«Вага соткссь, конань Мон тиса синь мархтост
тона шитнень меле, – корхтай Азорсь,
– Мон путсайне Эсь койнень синь седиезост
и сёрмадсайне синь мялезост».

17И сяльде Сон тага корхтай:
«Пежеснон и койфтома тевснон
оду мзярдонга аф лятфтасайне».

18Мзярда пежетне нолдафт, эста ни аф эряви озксказне пежетнень инкса.

Сатама Шкайти панжада седиса

19Кемай ялгат! Иисус Христость веронц вельде минь машттама аф пелезь сувамс сембодонга иняру вастти, молемок од и эряфонь максы киге.20Сон панжезе тейнек тя од кить, конац ётай котфонь перяфксть пачк, лиякс мярьгомс, Сонь ронгонц пачк, кона ульсь кантф озксказнекс.21Минь ули инь оцю Озксвятиеньке, кона ащи азоркс Шкаень кудть тевонзон лангса.22Эрьда сашенттама Шкайть инголи панжада седиса, кеме кемамаса, стама седиса, конац аруяфтф верса мувору ваймовайгяльть эзда, и ронгса, конац штаф ару ведьса.23Карматама кемоста кирдевома ся надиямаса, конань минь азонкшнесаськ сембонь инголе, сяс мес Надияфтысь кирдьсы валонц.24Эрьда арьсетяма вага мезень кувалма: кода тейнек крьвястемс эрть эса кельгома и пара тевонь тиема.25Аф карматама кадондомс эсь пуромксоньконь, кода конат-конат тиендихть. Меколанкт, эрьда карматама кемокстакшнема фкя-фкянь. И тяни, мзярда няйсасть Азорть шинц маладоманц, нинге сядонга пяк кемокстакшнеда фкя-фкянь.

Тяда шарфне Христость эзда

26Вдь кда минь, конатненди максф содамс видешить, шарьхкодезь тиенттяма пежет, эста минь пеженьконь инкса аш кодамовок озксказне.27Иляды аньцек фкя: пелемаса учемс Шкаень судть и кяжи толть, кона анок нилемс Шкайти каршек ащихнень.28Кие шарфты Моисеень койть эзда, ся апак ужяльтть ули судендаф куломати, кда улихть кафта али колма няихть-содайхть, конат кемокстасазь тя шарфтомать.29Арьседа, конашкава сяда стака наказама учсы сянь, кие пильгса тапсесы Шкаень Цёрать и аф лувсы инярукс сотксонь верть, конаса сон ульсь иняруяфтф, и кие пароказнень Ваймопожфть сялдсы!30Минь содасаськ Сянь, конац мярьгсь:
«Монь кядьсон кяжень пандомась. Мон пандса».

И нинге:
«Азорсь судендасы Эсь ломаньтналонц».

31Конашкава пелькс повомс эряй Шкайть кядьс!

Ащеда кемоста стака пингста

32Лятфтасть ингольдень шитнень, мзярда Шкайсь валдоптодязь тинь Эсь валдсонза. Эста тинь кирдеде лама оцю сталма и сякокс ащеде кемоста.33Ульсть пинкт, мзярда сембонь ингольде тинь эсонт сялдсть и маятафтсть, и ульсть пинкт, мзярда тинь марсоледе сятнень мархта, кит маятасть тинь лацонт.34Тинь марясть ризнамаснон сятнень, кит ульсть пякстамгудса. Тинь кеняртькшнеде, мзярда нельгондезь тинь уликсшинтень, сяс мес содасть: менельса тинь ули сяда цебярь уликсшинте, кона кармай улема фалу.

35Сяс, тясть кадонда аф пелемать, вдь тянкса кармай инь оцю казне.36Тейнть эряви кирдемс сталмотнень пингста. Тянь вельде тейнть пяшкодеви Шкайть мялец и максови Сонь эздонза надияфтфсь:37
«Вдь нинге аф лама,
прокс аф лама, и сай Ся, кинди эряви самс.
Сон пингть аф таргасы.
38Видексшинь ломанць кармай эряма кемамать вельде;
а кда кие кармай пелема и сяс кадсы кемамать,
ся аф туй Монь ваймозень мяльс».

39Но минь аф сятнень ёткста, конат пелеманкса кадозь эсь кемамаснон и повихть аду. Минь сятнень ёткста, конат кемайхть и сяс идефтяма.


*а 10:5-7 Псалтирь 39:7-9

*б 10:16 Иеремия 31:33

*в 10:17 Иеремия 31:34

*г 10:30 5 Моисея 32:35

*д 10:30 5 Моисея 32:36


предыдущая глава Глава 10 следующая глава