Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ ТИТОНДИ

Глава 1

Шумбракстомась

1-4Павел, Шкайть покодиец и Иисус Христосонь апостолоц, кучи пара вал Титонди, марстонь кемамать коряс афкуксонь цёранцты. Улеза тейть пароказне, кельгозь ужяльдема и сетьмоши Шкай Алять и Иисус Христос Азорть, минь Идиеньконь эзда! Мон кучфан кемокстамс Шкаень кочкафнень кемамаснон и шарьхкодемаснон тя видешить колга, кона Шкайть мяленц коряс и кона максы надияма пефтома эрямати. Шкайсь надияфтозе тянь нинге пингть ушедомда инголе, и Сон аф васькафни. Мзярда сась виде пингсь, Сон эвондазе Эсь валонц Пара кулянь азондомазень вельде. Тя тевсь максфоль тейне Шкайть, Минь Идиеньконь кошардоманц коряс.

Кодамкс улема кемаень пуромксонь оцюняти

5Вага мезенди мон кадыхтень тонь Критса: тейть эряви ладямс ся тефнень, конат педа-пес апак тикт, и путомс сембе ошева кемаень пуромксонь оцюнят, кода мон тейть мярьгондень.6Тейст эряви улемс аф муворукс, аньцек фкя аванди мирдекс, шабанзонды эряви улемс кемайкс и лац прянь вятикс: киндиге афольхть муворгофтов синь визьксонь тевонь тиемаса и аф кулхцондомаса.7Вдь кемаень пуромксть мельге ваныти, кода Шкаень кудть тевонзон вятиенцты, эряви улемс аф муворукс, прянь вярьге аф кепсикс, вишкста кяжс аф сувайкс, аф симикс, аф тюрикс и ярмакнень мельге аф панцикс.8Меколанкт, тейнза улема инжиень кельгикс, паронь кельгикс, шумбраста-аруста арьсикс, виде тевонь кельгикс, Шкаень мялень ваныкс и эсь прянь кирдикс.9Тейнза эряви ванфнемс видешинь валть, конанди сон ульсь тонафтф. Тяфта, шумбра тонафтомать вельде сон машты виияфтомс ломаттнень, а каршек молихненди няфтемс синь аф видешиснон.

Аф виде тонафтыхнень прянь вятемасна

10Вдь ули лама ломаньда, – сидеста еврейхнень ёткста, – конат киньге аф кулхцондыхть, шавоста лабордыхть, васькафнихть.11Тяфтапнень кургсна эрявихть пякстамс, сяс мес синь вятнихть тапарямас марнек кутт, тонафтомок сянди, мезенди аф эряви. Синь ярмаконь сюнеда аф виздезь тиендьсазь тянь.12Критса эряйхнень эзда фкясь, конань синь лувсазь смузю тонафтыкс, мярьгсь колгаст: «Критонь эряйхне фалу васькафнихть, кяжи жуватат и нолат, аф топафтови пект!»13Ня валхне видет. Сяс кемоста кардайть синь: катк улихть шумбрат кемамаса,14и катк аф кулхцонкшнесазь еврейхнень ёфксснон и ломаттнень кошарксснон, конат аердафтыхть видешить эзда.15Аруфненди сембось ару. А сятненди, конат аф аруфт и аф кемайхть – тейст мезевок аш ару. Сятнень мяльсна и ваймовайгяльсна тиевсть ни аф арукс.16Синь корхтайхть, бта содасазь Шкайть, а эсь тевсост шарфтыхть Эздонза. Синь нильготькст, аф кулхцондыхть и кодамовок пара тевонь тиема аф маштыхть.


предыдущая глава Глава 1 следующая глава