Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ВАСЕНЦЕ СЁРМАЦ КОРИНФ ОШЕНЬ КЕМАЙХНЕНДИ

Глава 4

Апостолонь покодемась

1Тейнть эряви лувомс минь Христосонь покодикс, конатненди максф азондомс Шкаень салавашить.2Сятнень кядьста, кинди максозь тяфтама оцю тевть, вешеви: эрсь эздост тиендель тевонь максыть мяленц коряс.3Монь прокс аф таколфтсамань – тинь судендасамасть монь али лия ломанень судсь. Мон монць аф судендаса эсь прязень.4И хуш мон мезеньге муворши эсь мельган аф содан, тя нинге аф корхтай сянь колга: мон видексшинь ломанян. Монь судьязе фкя – Азорсь.5Сяс пингта инголе киньге тясть суденда, мзярс аф сай Азорсь. Сон валдти лихтьсы семботь, мезе кяшф шобдаса, и тисыне няевиксокс салавань мяльхнень-арьсематнень. Эста эрти максови шнама Шкайть эзда.

6Кемай ялгат, мон семботь тянь азондыне Аполлосонь и эсь колган ва мезенкса: лангозонк ванозь, тинь тонадолесть кошардомать: «Катк тейнть саты ся, мезе сёрматф». Эста тинь аф карматада прянь няезь ащема фкять ширеса и улемс каршек омбоцети.7Кие мярьгсь, бта тон лияда сяда цебярят? Мезце тонь ули стама, мезть максолезе тейть аф Шкайсь? И кда тейть сембось максф кода казне, мезенди шнасак пряцень, бта тонць семботь сатыть?8Тинь ни вельф топоцтотада! Тинь козякододе и оцязорондатада миньфтомонк! Монь пяк мялезе: оцязорондаледе афкукс, эста миньге мархтонт марса оцязорондалеме!9Тейне-арам, Шкайсь минь путомазь сембе ломаттнень ёткста инь мекольцекс, кода сембонь сельминголе куломас судендаф ломаттнень. Минь араме ванома вастокс масторлангти, ангелхненди, ломаттнендинге.10Минь Христость инкса ёньфтомотама, а тинь Христость эса смузюфтада. Минь лафчтама, а тинь виихтяда. Тинь пара лувкссотада, а минь аш пара лемоньке.11Минь тячиень шис вачедотама и сась симоманьке, минь щамоньке – лоскотт, минь эсонк пикссихть, минь якатама вастста вастс12и минь виень путозь покоттяма кядьса. Минь эсонк сялдыхть, но минь сембонди арьсетяма пара, минь эсонк панихть, но минь кирттяма.13Минь валондсамазь рдазса, но минь каршезост ляпоста корхтатама. Минь тянемс лувсамазь тя масторлангса назём маркс, киндиге аф эряви рдазкс.

14Мон сёрмадан тянь колга аф визделгофтоманксонт, а ёран путомс тинь ёньц, кода кельгома иднень.15Катк Христости кемамаса тонафтыдонт ламодонга лама, но алянте уленди аньцек фкя. Тя мон азондыне тейнть Пара кулять, и эста тинь шачеде Христос Иисусонь эса.16Сяс эняльдян тейнть: тиендеда монь лацон, кода мон тиендян Христость лаца.17Тянкса мон кучине тейнть Тимофеень, конань мон кельгса и лувондса эстейне ваймопожфонь коряс цёракс, и конань лангс ули кода надиямс. Сон лятфтасы тейнть, кода мон эрян Христость эса и кода тонафтан сембе вастова, кемаень сембе пуромкснень эса.18Конат-конат ёткстонт кепсесазь пряснон, синь арьсихть мон аф саян ширезонт.19Но кда Азорти эряви, мон курок саян и содасайне ня прянь няихнень аф валснон, а вийснон.20Сяс мес Шкаень Оцязорксшись аф валса, а вийса.21Мезе тинь кочкатада: самс тейть локша мархта али кельги и лямбе седиса?


предыдущая глава Глава 4 следующая глава