Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНЬ КОЛМОЦЕ СЁРМАЦ

Глава 1

Шумбракстомась

1Кемаень пуромксонь содавикс атясь кучи пара вал кельгома Гаий ялгати. Мон видешить инкса келькте тонь.

2Кельгома ялгай, мон озондан сянкса: улеза тонь эряфсот сембось лац и улеза шумбра тонь ронгце, кода шумбра тонь ваймоцевок.3Мон пяк кенярдень, мзярда тейне сашендсть кемай ялгане и азондозь: синь няезь, кода кемоста тон эрят видешиса. Виде, тон якат видешинь киге.4Тейне аш сяда оцю кеняртькс тя куляда башка: монь шабане якайхть видешинь киге.

Лездода Шкайть якай-шяяй покодиензонды

5Кельгома ялгай, тонь лангозт ули кода надиямс. Тянь колга корхтайхть сембе тефне, конатнень тон тиендьсайть кемай ялгатнень инкса, и нльне сятнень инкса, конат ульсть тейть аф содафт.6Кемаень пуромксть ингольде синь корхтасть тонь кельгомацень колга. И улель пяк пара, кда тон лездолеть тейст синь якамасост стане, кода ладяй тиендемс Шкаень ломаттненди.7Вдь синь тусть тя якамас Христость лемонц инкса и мезевок аф вешендихть аф кемайхнень эзда.8Сяс тейнек эряви лездомс тяфтама ломаттненди, и тянь вельде минь аратама видешить инкса покодикс синь мархтост фкя тевса.

Диотреф и Димитрий

9Мон сёрмадонь сёрма кемаень пуромксти, но Диотреф, кона кельгсы азорондамс тоса, аф сявсы мяльс сянь, мезе минь корхтатама.10Сяс, мзярда мон саян тоза, эста сембонь ингольде лихтсайне лангу ся тефнень, конатнень сон тиендьсыне. Сон ноляй минь колганк кяжи васькафнемат, но тейнза тявок кржа. Сон аф васьфнесыне ширде саф кемай ялгатнень и лиятнендиге аф мярьгонди тянь тиендемс. Сон мянь кемаень пуромксста панцесыне сятнень, кит васьфнесазь ширде саф кемай ялгатнень.

11Кельгома ялгай, тят моле кяжень тиихнень мельге, а мольхть паронь тиихнень мельге. Кие тиенди пара тефт, ся ломанць Шкайть эзда. Кие тиенди кальдяв тефт, ся мзярдонга ашезе няенде Шкайть.12Димитриень колга сембе корхтайхть аньцек цебярь, тяфта корхтай сонь эряфоцка, кона видешить коряс. Миньге корхтатама сонь колганза аньцек пара, и тинь содасасть: минь валоньке видет.

Мекольце валхне

13Ламонь колга мон ёралень азондомс тейть, но аш мялезе тиемс тянь черниласа и толгаса.14Мон надиян курок няемс тонь, и эста минь корхтатама сельмода-сельмос.

15Сетьмоши тейть! Тонь тястонь ялгатне кучихть тейть пара валхт. Аст пара вал сембе минь ялганьконди, пшкятть эрти лемга. Аминь.


предыдущая глава Глава 1 следующая глава