Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИАКОВОНЬ СЁРМАЦ

Глава 2

Тяда вана вярде ашуфнень лангс

1Кемай ялгат, тинь, конат кемайхть Иисус Христосонди, минь иневалдонь Азороньконди, ванода ломаттнень лангс фкакс, аф явфнемок синь башка.2Мярьктяма, сай пуромксозонт козяста щаф ломань зрнянь суркс мархта, а мельганза сувай ашу ломань, каннеф щамса.3Кда тинь, няемок козяста щафть, мярьктяда: «Озак тяза, тяса сяда цебярь вастсь», а ашути мярьктяда: «А тон ащек тоса», али «Озак кияксу, пильгопезон»,4дяряй тяфта тинь ашеде тие аф фкаксши эсь кемай ялгантень ёткса, дяряй тинь ашеде ара судьякс, конат аф видеста судендайхть?

5Кулхцондода, кельгома кемай ялгат: дяряй аф масторлангонь ашуфнень Шкайсь кочказень улемс козякс кемамаса и дяряй аф тейст максозе Эсь Оцязорксшинц, конань Сон надияфтозе Эсь кельгиензонды.6А тинь мезькска аф лувсасть ашушиса эряйть. Дяряй аф козятне люпштайхть эсонт и вятнетядязь судга?7Дяряй аф синь сялдсазь ся пара Лемть, конаса тинь лемдеводе?

8Сёрматфксса максф Шкайть Оцязорксшинь коец: «Кельк мала ломанцень, кода эсь пряцень». Кда тинь пяшкотькшнесасть тя койть, эста видеста тиенттяда,9а кда аф фкакс ваттада ломаттнень лангс, эста тихтяда пеже, и койсь няфнесы – тинь коень колайхтяда.10Кие пяшкотькшнесы марнек койть, и аньцек мезьсовок фкаса тии пеже, эста сембоса арси муворукс.11Вдь Ся, кие мярьгсь: «Тяк полафне полацень», тяконь лаца мярьгсь: «Тят шава». Сяс, кда тон ашить полафне полацень, но шавоть ломань, эста тон сяка коень колаят.12Корхтада и тиендеда кода ломатть, конат улихть судендафт воляшинь максы койть коряс.13Вдь аф ужяльдеви судса ся, кие сонць киньге аф ужяльдьсы, а ужяльдись сяськи судса.

Кемамась и тефне

14Кемай ялгане, кодама лезкс сянь эзда, кда кивок корхтай, бта сон кемай, а тевса тянь кодавок аф няфнесы? Идесы-аф сонь тяфтама кемамась?15Кда кемай ялгати аш мезе щамс и аш мезьда ярхцамс,16а кивок тинь эздонт мярьги тейнза: «Мольхть сетьмошиса, эжентть и топодемс ярхцак», а сонць аф максы мезе эряви сонь ронгонцты, эста кодама лезкссь сонь валонзон эзда?17Тяфта кемаматьке мархта: тевфтома сон кулоф.

18Но кда кивок мярьги: «Тонь ули кемамаце, а монь улихть тевне», эста каршезонза азса: «Няфтьк тейне эсь кемамацень тевфтома, а мон тейть эсь кемамазень няфтьса тевнень вельде».19Тон кемат: Шкайсь фкя? Лац тият. Вдь кяжи ваймопожфневок кемайхть и трнатыхть!20Шава ломань, ули-аф тонь мяльце содамс тянь: кемамась тевфтома кулоф.21Дяряй минь аляньке, Авраам, аф тевонзон вельде лувфоль видексшинь ломанькс, мзярда эсь цёранц, Исааконь, максозе озксказнень путома вастти?22Тон няйсак, Авраамонь кемамац ульсь няфтьф тевонзон эса, и ня тефнень вельде сон нинге сяда кемокстась.23Тяфта пяшкодевсть Сёрматфксть валонза: «Авраам кемась Шкайти, и тянкса Шкайсь лувозе сонь видексшинь ломанькс». И Авраам лемтьф ялгакс Шкайти.24Тинь няйсасть, ломанць лувови видексшиса эряйкс аф аньцек кемаманц вельде, но тевонзонга вельде.25Тяфта ульсь Раав усксеви авать мархтовок. Сон ульсь лувф видексшинь ломанькс эсь тевонзон вельде, мзярда кудозонза нолдазень Израилень алятнень, салава якайхнень-ваныхнень, и кучезень синь лия киге.26Сяс азса: кода ронгсь кулоф ваймофтома, тяфта кемамаське кулоф тевфтома.


предыдущая глава Глава 2 следующая глава