Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛХНЕНЬ ТЕВСНА

Глава 20

Павел моли Троадав

1Таколдомать аделамда меле Павел кочказень тонафнихнень, азсь тейст кемокстамань валхт, ашкодсь мархтост и тусь Македонияв.2Ся модава ётамста сон лама корхнесь кемайхнень мархта, кепсезень синь мяльснон. Меколи пачкодсь Грецияв,3коса ащесь колма кофт. Тоста сон ёрась молемс Сирияв, но кодак кулезе – еврейхне арьсесть каршезонза кальдяв тев, сон срхкась мрдамс Македониять пачк.4Сонь мархтонза Асияв мольсть Вериянь ошэряйсь Сосипатр – Пиррань цёрац, Фессалоникань эряйхне Аристарх и Секунд, Дервия ошень Гаий, Тимофей, а нинге Тихик и Трофим, кафцьке шачемас коре Асияста.5Синь лиссть кис сяда инголи и учемазь минь Троадаса.6А минь аф шапама кшинь илада меле туме ведьге Филиппаста и вете шинь потмоста пачкодеме тейст Троадав. Тоса ащеме недяля.

Павел вельмафтсы Евтихонь

7Недялянь васенце шиня минь кочкавоме кшинь синдемас и марса ярхцамас. Павелонь мялецоль тумс омбоце шиня, сяс сон ламос корхнесь тонафнихнень мархта, и корхнемасна таргавсь пялевес.8Вярцень кудбяльксса, коза минь пуромоме, палсь лама лампа.9Вальмя лангса озадоль од цёра, лемоцоль Евтих, а сяс мес корхнемасна вельф таргавсь, сон матодовсь и удомбачк прась колмоце этажста. Мзярда кеподезь, цёрась кулофоль ни.10Павел валгсь алу, венемсь ронгонц вельхксс, ктмордазе сонь и мярьгсь: «Тяда пичедь, сон шиса».11Павел куцсь меки вярдень кудьбяльксти, синдсь кши и сембонь мархта ярхцась. Сяльде поладозе корхтаманц мянь варьхмодемас, и тяда меле тусь.12А тя ёткть цёрать вятезь куду шиса-парса и сембе озаф седихть кеняртьфтольхть.

Троадаста Милиту уемась

13Минь туме оцю венчса Ассу, коса Павел ёрась шоворемс ёткозонк. Сон кошардомазь тяфта тиемс, сяс мес мялецоль Ассу пачкодемс ялга.14Мзярда минь васедеме Асс ошса, сон озась мархтонк оцю венчти, и туме Митилинав.15Тоста минь туме и омбоце шиня пачкодеме Хиос усиять видес, а тага фкя шида меле минь пачкодеме Самос усияв, меле лотксеме Трогиллияв, а омбоце шиня улеме ни Милитса.16Ефесса минь ашеме лотксе, сяс мес Павел ашезь ёра кирдевомс Асияса. Сон пяк эряскодсь повомс, кда лиси, Иерусалиму Ведьгемонце шинь илати.

Павел корхтай Ефесонь кемаень пуромксть оцюнянзон мархта

17Милитста сон кучсь Ефесу тостонь кемаень пуромксонь оцюнятнень инкса.18Мзярда сят састь тейнза, сон мярьгсь: «Тинь тинць содасасть, кода мон эрянь тинь мархтонт сембе ся пингть, васенце шиста сявомстокиге, мзярда пильгозе шятясь Асиянь модать лангс.19Мон сятявста и лама сельмоведень пяярдезь покодень Азорти варчсематнень-сталмотнень ёткса, конат сатнемазь еврейхнень и синь кяжи арьсефксснон инкса.20Мон мезевок ашень мянде сянь эзда, мезе лувондонь тейнть эрявиксокс, мзярда кандонь Шкаень вал и тонафтонь эсонт ломаттнень инголе и кудга якамста.21Мон еврейхненьге и аф еврейхненьге тернине шарфтомс Шкайти и кемамс Иисус Христос Азороньконди.

22А тяни, Ваймопожфть кошардоманцты прянь максозь, мон молян Иерусалиму и афи содаса, мезе тоса учсамань.23Содаса фкять: кодама ошс афолень са, Иняру Ваймопожфсь корхтай тейне: монь учсамазь пякстамгудсь и ризфне-маятаматне.24Но мон мезькска аф путса эсь эряфозень, аньцек максоза тейне Шкайсь кеняртьксонь марязь шумордамс кизень и покодемазень, конань сявине Иисус Азорть эзда: азондомс Пара кулять Шкаень пароказнеть колга.

25Тяни вов мон содаса: тинь эздонт кивок, кинди мон азонкшнень Шкаень Оцязорксшить колга, оду мзярдонга аф няйсы шамаликозень.26Сяс мон тячиень шиста кемоста азса: мон аруван, аф муворуван киньге юмамаса.27Вдь мон най азонкшнине тейнть Шкайть марнек мялензон.

28Ванода эсь мельгант и марнек стадать мельге, конань ваномонза ладядязь Иняру Ваймопожфсь. Ваность Азорть и Шкайть кемаень пуромксонц, конань Сон рамазе Эстейнза веронц питнеса.29Вдь содаса, монь тумдон меле тейнть сайхть кяжи врьгаст и аф ужяльдьсазь стадать.30Тинценьге ёткстонт эвондайхть ломатть, конат кармайхть кяльготнезь корхнема эсь мельгаст тонафнихнень ускоманкса.31Сяс тяда уда, мяляфтость, кода мон колма кизоньберьф апак лотксек, шинек-венек, сельмоведь мархта тонафнине эрть эздонт.

32Вов тяни, кемай ялгат, мон каттядязь тинь Шкайти и Сонь пароказнень валонцты, конанди вийс коре сядонга кемокстамс тинь и максомс тейнть сянь, мезе надияфнесь сембонди, кинь иняруяфтозе.33Мон ашень анце кядьстонт аф сия, аф зрня, аф щамбяль.34Тинць содасасть, ва ня кядьса мон тряйне эсь прязень и ялганеньге.35Тянь вельде мон няфтине: тейнтьке эряви тяфта покодезь лездомс лафчненди и кирдемс мяльса Иисус Азорть валонзон. Вдь Сон Сонць мярьгсь: "Сяда пара максомс, аф сявомс"».

36Ня валда меле Павел мархтост марса арась плманжа лангс и озондсь.37Сембе авардсть, прашендсть Павелонь кргас и палсезь сонь.38Синь пяк ризнафтозь сонь валонза, кле, оду аф няйсазь сонь шамаликонц. Сяльде синь ильхтезь Павелонь оцю венчти.


предыдущая глава Глава 20 следующая глава