Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНЬ КОРЯС ЕВАНГЕЛИЯ

Глава 14

Иисус – кись Менелень Аляти

1«Тяза ризна седиенте; кемада Шкайти, Тейневок кемада.2Алязень кудса ули коса эрямс. А кда улель аф тяфта, Мон афолень мярьге тейнть: "Мон молян тейнть эряма вастонь аноклама".3Мон молян и аноклан тейнть васта, сяльде саян меки и сяфтядязь тинь Эсь ширезон, тиньге улеледе тоса, косан Мон.4А коза Мон молян, тинь содасасть, китьке тоза содасасть».

5Фома мярьгсь Тейнза: «Азор! Минь аф содасаськ, коза молят; эста коста содасаськ тоза кить?»6Иисус мярьгсь тейнза: «Мон – кись, видешись и эряфсь; кивок аф сави Алязень пяли, аньцек кда Монь вельден сай.7Кда тинь Монь содасамасть, эста Алязеньге содасасть. Тячиень шиста содасасть Сонь, и няесть Сонь».

8Филипп пшкядсь Тейнза: «Азор! Няфтьк тейнек Аляцень, и саты тейнек».9Иисус мярьгсь тейнза: «Тняра пинге Мон мархтонтан, и тон аф содасамак, Филипп? Монь няиезе няезе Алязеньге. Кода ина тон корхтат: "Няфтьк тейнек Аляцень"?10Дяряй тон аф кемат, Мон Алязень эсан и Алязе Монь эсон? Валхнень, конатнень Мон корхтасайне тейнть, корхтасайне аф Эсь эздон – тя Алязе, кона Монь эсон, тиендьсыне тевонзон.11Кемада Тейне – Мон Алязень эсан, Алязевок Монь эсон. А кда аф кематада валненди, кемада Тейне тевнень коряс.

12Видеста корхтан тейнть: Тейне кемайсь кармай тиендема ся тефнень эса, конатнень тиендьсайне Мон, и тии корязост сяда оцю тефт; сяс мес Мон туян Алязти.13И кда мезевок анатада Алязень кядьста Монь лемсон, сянь тиса, улель няфтьф Алять оцюшиц Цёрасонза.14Кда мезевок анатада Монь лемсон, сянь Мон тиса».

Иисус максы вал Иняру Ваймопожфть кучеманц колга

15«Кда кельгсамасть Монь, тиендеда Монь кошардомвалнень коряс.16Мон эняльдян Алязти, и Сон максы тейнть лия Лезды, кона кармай улема мархтонт пефтома пингс.17Тя Лездысь – видешити вяти Ваймопожф, конань масторлангонь ломаттне аф маштыхть нолдамс эсь седиезост, сяс мес аф няйсазь Сонь и аф содасазь Сонь. А тинь Сонь содасасть, вдь Сон мархтонт и эсонт.

18Мон аф каттядязь тинь урозкс; мрдан тейнть.19Ётай аф лама пинге, и масторлангсь ни аф няйсамань Монь; а тинь Монь няйсамасть, сяс мес Мон эрян, тиньге карматада эряма.20Ся шиня тинь карматада содамонза: Мон Алязень эсан, тиньге Монь эсонотада, Монга эсонтан.21Кошардомвалнень мяльс сявисна и синь пяшкотькшнисна – ся Монь кельгиезе. А кие кельгсамань Монь, сянь кельгсы Монь Алязе; Монга сянь карман кельгомонза, и эвондан тейнза».

22Иуда – аф Искариотсь – корхтай Тейнза: «Азор! Тя мезе, Тонь мяльце няфтемс пря тейнек, а аф масторлангти?»

23Иисус каршезонза мярьгсь: «Кие Монь кельгсамань, ся тиенди Монь валнень коряс; Алязе кармай кельгомонза сонь, и Минь сатама тейнза и ульхтяма мархтонза.24Монь аф кельгиезе аф тиенди Монь валнень коряс. А валсь, конань кульсасть, аф Монне, но Алязень, кона кучемань Монь.

25Тянь Мон корхтаса нинге мархтонт улемстон.26А Лездысь, Иняру Ваймопожфсь, конань Алязе кучсы Монь лемсон, тонафттядязь тинь семботи, и лятфтасы мялезонт семботь, мезе Мон корхнень тейнть.

27Кадан тейнть сетьмоши. Монцень сетьмошизень максса тейнть; максса аф стане, кода максси масторлангсь. Тяза коле и тяза пеле седиенте.28Тинь кулесть, мезе Мон азонь тейнть: "Туян эздонт и мрдан ширезонт". Кельгондярялемасть Монь, эста ни кенярделеде, мес Мон мярьгонь: "Молян Алязти"; сяс мес Алязе Мондедон оцю.29И вов, семботь Мон азыне тейнть улемдонза инголе. И тяфта, мзярда тя тиеви, тинь карматада кемама.30Аф лама ни Тейне корхнемс мархтонт, сяс мес сай тя масторлангть азороц. Монь лангсон сонь азорксшиц аш,31но катк содасы сембе масторлангсь: Мон кельгса Алязень. Сяс тиса семботь, мезе Сон мярьгсь тиемда. Стякшнеда, тутама тяста».


*а 14:18 уроз – сирота


предыдущая глава Глава 14 следующая глава