Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНЬ КОРЯС ЕВАНГЕЛИЯ

Глава 8

Лия алянь ваксста кундаф ава

1А Иисус тусь Вайшуфта пандть лангс.2Шобдава тага сась Шкаень куду, и сембе мольсть Тейнза. Сон озась и кармась тонафтома эсост.

3Тяса койти тонафтыхне и фарисейхне вятсть Тейнза ава, кона кундафоль лия алянь ваксста, арафтозь сонь кучкати,4мярьгсть Иисусти: «Тонафты! Тя авась кундаф лия алянь ваксста,5а Моисей койсонза мярьгсь тейнек шавондомс тяфтапнень кевса: Тон мезе азат?»6Тяфта синь корхтасть, сяс мес ёрасть кундамс Иисусть валса и мумс кодамовок туфтал Сонь муворгофтомс.

Но Иисус комась и сурсонза сёрмадсь модать лангс.7А мзярда тага ушедсть Сонь кизефнемонза, Сон кеподезе прянц и азозе тейст: «Кие ёткстонт пежефтома, ся катк васенцекс ёрдай авать лангс кев».8Иисус тага комась и сёрмадсь модать лангс.9Мзярда синь марязь тянь, ваймовайгяльсна лихтезень лангу муворшиснон, и синь ушедсть тушендома фкя-фкянь мельге, и васенцекс тусть сиретне. Лядсь ськамонза Иисус и авась, кона ащесь инголенза.10Иисус кеподезе Эсь прянц и авада башка киньге апак няйхть, мярьгсь авати: «Ава! Косот тонь муворгофнихне? Кивок ашензе суденда?»11Авась мярьгсь каршезонза: «Кивок аш, Азор». Иисус корхтай тейнза: «Монга аф судендате, архт и оду тят тиенде пежет».

Иисус – валдсь масторлангти

12Иисус тага корхтась ломаттненди и мярьгсь: «Мон валдсь масторлангти. Кие моли мельган, ся аф якай шобдашиса, но сянь ули эряфонь максы валдоц».

13Эста фарисейхне мярьгсть Тейнза: «Тон Тонць азонкшнят Эсь колгат; Тонь азонкшнемаце аф виде».14Иисус каршезост мярьгсь: «Катк Эсь колган Монць азонкшнян, Монь азондомазе виде; сяс мес Мон содаса, коста сань и ков молян. А тинь аф содасасть, коста сань и ков молян.15Тинь судендатада ланга ванозь; Мон киньге аф судендаса.16А кда ни судендалень, Монь судендамазе улель виде, сяс мес Мон аф ськамонан, Монь мархтон Алязе, Монь Кучиезе.17Тинь коентень эса сёрматф: "Кафта ломаттнень азондомасна виде".18Мон Монць азондан Эсь колган, и азонды колган Алязе, Монь Кучиезе».19Эста мярьгсть Тейнза: «Коса Аляце?» Иисус каршезост мярьгсь: «Аф Монь, аф Алязень тинь аф содасасть; содалемасть Монь, эста содалесть Монь Алязеньге».

20Ня валхнень Иисус азозень ярмаконь кочкама арзять ваксса, мзярда Сон тонафтсь Шкаень кудса. И кивок ашезе кунда Сонь, сяс мес нинге ашезь са Сонь пингоц.

21Иисус тага мярьгсь тейст: «Мон туян, и карматада Монь вешендемон; но кулотада эсь пежесонт. Ков Мон молян, тов тинь аф сафтада».22Тяса еврейхнень оцюнясна корхтасть: «Кали шавсы Эсь прянц, мес корхтай: "Ков Мон молян, тов тинь аф сафтада"?»23Иисус мярьгсь тейст: «Тинь тяста, алдоннетнень эзда, а Мон вярденнетнень; тинь тя масторлангста, Мон аф тя масторлангонь.24Сяс Мон мярьгонь тейнть: кулотада эсь пежесонт. Кда аф кематада – тя Монан, эста кулотада эсь пежесонт».25Эста синь кизефтезь Сонь: «Ина кият Тон?» Иисус азозе тейст: «Мон Ся, кие ушетксстокиге ули, кода Мон и корхнень тейнть.26Мон мулень лама мезе корхтамс колгант и мезенкса судендамс тинь; но Монь Кучиезе виде, и мезе Мон кулень ширденза, сянь и корхтаса масторлангти».

27Синь ашесть шарьхкоде: Сон корхтась Алянц колга.28Сяс Иисус мярьгсь тейст: «Мзярда кеподьсасть Ломанень Цёрать, эста карматада содамонза: тя Монан и мезевок аф тиендян Эсь эздон. Но кода тонафтомань Алязе, стане и корхтан.29Монь Кучиезе мархтон. Сон ашемань када ськамон, сяс мес Мон фалу тиендьса сянь, мезсь туй Сонь мялезонза».30Иисусть ня валонзон кулемста ламотне кармасть Тейнза кемама.

Видешись нолдасы ломанть воляс

31Эста Иисус мярьгсь ся еврейхненди, конат кармасть Тейнза кемама: «Эряндярятада Монь валозень коряс, эста тинь видекс Монь тонафнине.32И карматада содамонза видешить, и видешись нолдатядязь тинь воляс».33Каршезонза мярьгсть: «Минь Авраамонь уноконь-уноконзотама и мзярдовок киндинге урекс ашеме уленде; мес ина Тон корхтат: "Мянттяда воляс"?»34Иисус азозе: «Видеста корхтан тейнть: эрь пежень тиись – пежети уре.35Уресь азоронц кудса эряй аф сембе пингс; кудса сембе пингс эряй кудазорть цёрац.36Вов, кда Цёрась нолдатядязь тинь воляс, эста афкукс аратада воляс нолдафокс.37Содаса: тинь Авраамонь уноконь-уноконзотада; и сякокс ёрасамасть Монь шавомс, сяс мес Монь валозе ашезь сува эзонт.38Мон корхтаса сянь, мезе няень Алязень ваксса; а тинь тиендьсасть сянь, мезть кулесть эсь алянтень эзда».

Авраамонь афкуксонь иденза тиендихть Авраамонь лаца

39Синь каршезонза мярьгсть: «Минь аляньке Авраам». Иисус азозе тейст: «Улендяряледе Авраамонь иденза, эста тиенделесть Авраамонь тевонзон.40А тяни ёрасамасть шавомс Монь, Ломанть, кона азозе тейнть ся видешить, конань кулезе Шкайть кургста. Авраам лацонт афоль тие.41Тинь тиендьсасть эсь алянтень тевснон».

Тянь каршес мярьгсть Тейнза: «Минь аф лия алянь эзда шачфтама; минь ули фкя аляньке, Шкайсь».42Иисус мярьгсь тейст: «Улендяряль Шкайсь тинь алянте, кельголемасть Монь, сяс мес Мон сань Шкайть эзда; вдь Мон аф Эсь эздон сань, а Сон кучемань Монь.43Мес тинь аф шарьхкодьсасть корхтамазень? Сяс мес аф ёратада Монь валозень кулхцондомс.44Тинь алянте идемэвозсь; и тинь мяленте тиендемс алянтень лаца визькс тефт. Сон ушетксстокиге ульсь ломанень шавонды и ашезь ащев видешиса; сяс мес аш эсонза видеши. Мзярда сон кяльготни, корхтай эсенц; сяс мес сон – кяльготнись и кяльготнемать аляц.45А мзярда Мон видеть корхтаса, тинь аф кематада Тейне.46Киндивок няфтеви Монь пежес сувамазе? А кда Мон корхтан видеста, мес ина аф кематада Тейне?47Кие Шкайть эзда, ся кульсыне Шкаень валхнень. Тинь сяс аш мяленте кулхцондомс, мес аф Шкайть эздотада».

Иисус ульсь Авраамонь шачемдонза инголе

48Тянь каршес еврейхне корхтасть Иисусонди: «Дяряй аф видеть корхтасаськ: Тон Самариянь эряят и эсот кяжи ваймопожфсь?»49Иисус каршезост мярьгсь: «Эсон аш кяжи ваймопожф; Мон шнаса Алязень, а тинь сялдсамасть Монь.50Мон аф вешендян эстейне шнама; ули вешенди и ули судендай.51Видеста корхтан тейнть: кие тиенди Монь валнень коряс, ся мзярдовок аф кулы».

52Еврейхне мярьгсть Тейнза: «Тяни минь содасаськ: кяжи ваймопожфсь эсот. Кулось Авраам, пророкневок; а Тон корхтат: "Кие тиенди Монь валнень коряс, ся мзярдовок аф кулы".53Дяряй Тон сяда оцюват минь аляньконь Авраамонь коряс, кона кулось? Пророкневок кулсесть: кикс лувондсак Эсь пряцень?»

54Иисус каршезост: «Кда Мон Монць шнаса-оцюлгофнеса Эсь прязень, эста Монь шнамазе-оцюлгофтомазе мезевок аш. Монь эсон шнай-оцюлгофты Алязе, конань колга тинь корхтатада: "Сон минь Шкаеньке".55И тинь ашесть сода Сонь; а Мон Сонь содаса; и кда мярьган: "Аф содаса Сонь", эста аран тинь лацонт кяльготникс. Но Мон содаса Сонь и тиендян Сонь валонц коряс.56Тинь алянте Авраам кенярдсь, сяс мес Тейнза сави няемс Монь сама шизень; няезе и кенярдсь».

57Тянь каршес еврейхне Тейнза мярьгсть: «Тейть аш нинге ведьгемонь кизовок, и Тон няить Авраамонь?»58Иисус мярьгсь тейст: «Видеста корхтан тейнть: Авраамонь шачемдонза инголе Мон ни улень и улян».59Эста синь кочкасть кефт лангозонза ёрямс; но Иисус кяшсь, лиссь Шкаень кудста, ётась синь ётковаст и тусь сяда тов.


*а 8:9 ваймовайгяль – совесть

*б 8:24 «Тя Монан» – тя Шкайть лемоц.

*в 8:58 «Мон Улян» – тя Шкайть лемоц.


предыдущая глава Глава 8 следующая глава