Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главас русским текстом

СВЯТОЙ ИОАНН БОГОСЛОВЛАН ПОЧМАШ

Глава 22

6-21 Христосын толмыжо.

1Вара Суксо мыланем илыш вӱдын яндар эҥержым ончыктен, тудо – хрусталь гай волгыдо, Юмын да Пачан престолжо деч лектеш.2Олан уремже покшелне да эҥерын кок могырыштыжат – илыш пушеҥге. Тудо ийлан латкок гана саскам пуа, тылзе еда саскажым конда, а пушеҥгын лышташыже калыкым паремда.3Нимо каргыме ынде ок лий. Тушто Юмын да Пачан престолышт лиеш, да тарзыж-влак Тудлан служитлаш тӱҥалыт.4Нуно Тудын чурийжым ужыт, да Тудын лӱмжӧ нунын саҥгаштышт лиеш.5Йӱд тушто ок лий, да нунылан лампе але кече волгыдо ок кӱл: Господь Юмо нуным волгалтараш тӱҥалеш, да нуно курым-курымеш кугыжаланаш тӱҥалыт.

6Суксо мылам ойлен: «Нине шомак чын да ӱшанле улыт. Вашке мо лийшашым тарзыж-влаклан ончыкташ манын, святой пророк-влакын Господь Юмышт шке Суксыжым колтен».7«Теве, вашке толам. Тиде книгасе пророкла ойлымо шомакым шуктышо поро пиалан».

8Мый, Иоанн, чыла тидым ужынам да колынам. А ужмекем да колмекем, чыла тидым ончыктышо Суксын йол воктекыже вуйым саваш кумык возынам,9но Суксо мылам каласен: «Ончо, тыге ит ыште! Мый тый денет, пророк иза-шольыч-влак да тиде книгасе шомакым кучышо чыла еҥ дене пырля служитлыше улам. Сукен, вуетым Юмылан саве».

10Тудо мылам каласен: «Тиде книгасе пророкла ойлымо шомакым палдарыде ит кодо: шукталтме жап лишемын.11Чын огыл ыштыше еҥ тек умбакыжат чын огылым ыштыже, шакше тек умбакыжат шакшын ила. Чын ыштыше тек умбакыжат чыным ышта, святой умбакыжат святитлалтше.12Теве Мый вашке толам, тӱлышашем кондем, кажнылан пашаж почеш тӱлем.13Мый Альфа да Омега, Тӱҥалтыш да Мучаш, Икымше да Пытартыш улам.14Тудын кӱштымыжым шуктышо-влак поро пиалан улыт: нуно илыш пушеҥге гыч кочкаш да олашке капка гыч пураш эрыкым налыт.15А пий да юзо-влак, яжарланыше, еҥым пуштшо, шояк юмылан кумалше-влак, шоям йӧратыше да тудым ыштыше-влак чылан тӱжвалан кодыт.16Мый, Иисус, тыланда черкылаште тидын нерген таныклаш шке Суксем колтенам. Мый Давидын вожшо да тукымжо улам, волгыдо да эрденысе шӱдыр улам».

17Шӱлышат, налшаш ӱдырат ойлат: «Тол!» Кӧ тидым колеш, тек тудат ойла: «Тол!» Кӧн йӱмыжӧ шуэш, тек толеш, кӧ илыш вӱдым налнеже, тек яра налеш.

18Кӧ тиде книгасе пророкла каласыме шомакым колеш, мый чылаштлан таныклем: иктаж-кӧ нине шомакыш иктаж-мом ешара гын, тудо еҥлан Юмо тиде книгаште возымо эҥгекым ешара.19А иктаж-кӧ пророкла ойлымо тиде книгасе шомак гыч иктаж-мом кораҥда гын, Юмо тудым илыш книгаште да святой олаште лийме деч, да мом тиде книгаште возымо, тудын деч кораҥда.

20Тидым Таныклыше каласа: «Чынже денак, вашке толам!» Аминь. Туге, тол, Господь Иисус!

21Господьна Иисус Христосын порылыкшо тек чыланда пелен лиеш. Аминь.


предыдущая глава Глава 22